Хайцентра® (Иммуноглобулины нормальные человеческие для внесосудистого введения)

Хайцентра ®

Жоқ

Дәрілік түрі, дозасы

Тері астына енгізуге арналған ерітінді, 200 мг/мл

Жүйелі қолдануға арналған микробқа қарсы препараттар. Иммундық сарысулар және иммуноглобулиндер. Иммуноглобулиндер. Адамның қалыпты иммуноглобулиндері. Тамырдан тыс енгізуге арналған адамның қалыпты иммуноглобулиндері.

АТХ коды J06BA01

Ересектер мен балалардағы (0-18 жастағы) төмендегідей бастапқы иммун тапшылығының орын басу емінде:

- антиденелер өндірілуінің бұзылуы бар бастапқы иммун тапшылығының (БИТ) синдромы;

- профилактика үшін антибиотиктер қабылдау тиімсіз болған немесе қарсы көрсетілімдегі созылмалы лимфоцитарлық лейкозы бар пациенттердегі гипогаммаглобулинемия және қайталанатын бактериялық инфекциялар;

- гипогаммаглобулинемия және көптеген миеломасы бар пациенттердегі қайталанатын инфекцияларда;

- гематопоэтиялық діңдік жасушалардың аллогенді трансплантациясына дейін және одан кейінгі пациенттердегі гипогаммаглобулинемия.

- Ересектердегі, балалар және жасөспірімдердегі иммун модульдейтін ем (0-18 жастағы);

Хайцентра® препараты созылмалы қабынбалы демиелинизациялаушы полинейропатия (СҚДП) бар пациенттерге вена ішіне енгізу үшін пациенттерге жай-күйі тұрақтанғаннан кейін демеуші ем ретінде адамның иммуноглобулині көмегімен тағайындалуы мүмкін.

Қолдануды бастағанға дейін қажетті мәліметтер тізбесі

• препарат құрамына кіретін әсер етуші затына немесе кез келген басқа компонентіне жоғары сезімталдық;

• I немесе II типті гиперпролинемиясы бар пациенттер.

Қолдану кезіндегі қажетті сақтандыру шаралары

Хайцентра® препараты тек тері астына енгізуге арналған. Хайцентра® дәрілік препаратын қан тамырына кездейсоқ енгізген жағдайда пациентте шок дамуы мүмкін.

Препаратты енгізу жылдамдығын сақтау керек. Пациенттерге мұқият бақылау жүргізу керек және инфузия кезеңінде жағымсыз құбылыстар туындауына бақылау жасау керек. Белгілі бір жағымсыз реакциялар көбіне адамның қалыпты иммуноглобулинімен емді алғаш қабылдайтын пациенттерде немесе сирек жағдайларда адамның қалыпты иммуноглобулинінің басқа препараттарына ауысуда немесе емді сегіз аптадан астам кезеңге тоқтатқанда туындауы мүмкін.

Төмендегіге көз жеткізгенде болжамды асқынуларды болдырмауға болады:

препаратты бастапқы енгізуді баяу жүзеге (20 мл/сағат/аумағы) асырғанда пациентте адамның қалыпты иммуноглобулиніне сезімталдық білінбейді;

инфузияның барлық кезеңі бойына пациенттерде туындайтын кез келген симптомдарға мұқият бақылау жүргізіледі. Атап айтқанда, бұрын адамның қалыпты иммуноглобулинімен ем алмаған пациенттерге, сондай-ақ иммуноглобулиннің басқа препараты емінен ауыстырылған немесе алдыңғы инфузиядан кейін аралығы ұзақ болғанда ықтимал жағымсыз құбылыстарды анықтау үшін бірінші инфузия кезінде және бірінші инфузиядан кейін алғашқы сағат ішінде бақылау жүргізу керек. Барлық қалған пациенттер препарат қабылдағаннан кейін ең кемі 20 минут бойына бақылауда болуы тиіс.

Аллергиялық реакцияға немесе анафилаксиялық түрдегі реакцияларға күдік болғанда препарат енгізуді дереу тоқтату керек. Шок дамыған жағдайда шоктың жай-күйін емдегенде стандартты шаралар қолдану керек.

Аса жоғары сезімталдық

Аса жоғары сезімталдықтың негізгі реакциялары сирек кездеседі. Олар IgA антиденелері бар пациенттерде туындауы мүмкін, оларды аса сақтықпен емдеу керек.

Тері астына енгізілетін IgG препараттары емдеудің жалқы нұсқасы болып табылатын IgA антиденелері бар пациенттерді Хайцентра® препаратына тек мұқият медициналық бақылау аясында ғана ауыстыру керек.

Адамның қалыпты иммуноглобулині тіпті бұрын да адамның қалыпты иммуноглобулині емі жақсы жағымды болған пациенттердің өзінде артериялық қысымның төмендеуі болатын анафилаксиялық реакция дамуын сирек туындатуы мүмкін.

Тромбоэмболия

Миокард инфарктісін, инсульт, терең веналар тромбозын және өкпе артериясының эмболиясын қоса, иммуноглобулин қолдануға байланысты артериялық және вена тромбоэмболиясының жағдайлары анықталды. Тромбоздық асқынулар даму қаупінің анықталған факторлары (егде жас, артериялық гипертензия, қант диабеті, анамнездегі буын аурулары немесе тромбоздық асқынулар, жүре пайда болған немесе тұқым қуалайтын тромбофилиялық бұзылулары бар пациенттер, қимыл-қозғалысының ұзақ уақыт бұзылуы болған пациенттер, ауыр гиповолемиясы бар пациенттер, қан тұтқырлығы артуы бақыланатын аурулары бар пациенттер сияқты) бар пациенттерде сақтық керек. Ентігу, аяқ-қолдың ауыруы және ісінулері, ошақтық неврологиялық бұзылыстар және кеуде қуысының ауыруын қоса, тромбоэмболиялық құбылыстардың бірінші симптомдары туралы және олар пайда болғанда дереу дәрігерге қаралау қажеттігі туралы пациенттер хабардар болуы тиіс. Иммуноглобулиндерді қолдану алдында пациенттер судың жеткілікті мөлшерін ішуі тиіс.

Асептикалық менингит синдромы (АМС)

Асептикалық менингит синдромы дамуының жағдайлары венаішілік иммуноглобулинді (ВІИГ) немесе теріастылық иммуноглобулинді (ТАИГ) қолдануда сипатталған. Синдром, әдетте иммуноглобулинмен емнен кейін бірнеше сағаттан 2 күнге дейінгі кезеңде басталады. АМС үшін келесі симптомдар мен белгілер тән: қатты бас ауыруы, желке бұлшықеттерінің сіресуі, ұйқышылдық, қызба, жарыққа қарай алмау, жүрек айнуы және құсу. АМС симптомдары мен белгілері бар пациенттер менингиттің басқа себептерін жоққа шығару үшін жұлын сұйықтығын зерттеуді қоса, мұқият неврологиялық тексеруден өтуі тиіс. Иммуноглобулинмен емді тоқтату қандай да бір салдарсыз бірнеше күн бойына АМС ремиссиясына әкелуі мүмкін.

Инфекция қоздырғыштарына қатысты қауіпсіздік бойынша ақпарат

Қаннан немесе адам плазмасынан дайындалатын дәрілік препараттарды қолдану нәтижесінде туындайтын инфекциялардың берілуін болдырмаудың стандартты шараларына донор таңдау, инфекцияның спецификалық маркерлерінің болуына донацияны және плазма пулдарын жеке-дара тексеру және вирустардың белсенділігін төмендету/жою бойынша өндірістің тиімді сатыларын қосу жатады. Осыған қарамастан, қаннан немесе адам плазмасынан дайындалатын препараттарды қолдануда инфекциялық агенттердің берілуін толық жоққа шығаруға болмайды. Бұл сондай-ақ белгісіздерге немесе жаңа вирустарға және басқа қоздырғыштарға қатысты.

Вирусқа қарсы қауіпсіздікті қамтамасыз ету үшін қолданылатын шаралар АИТВ, В және С гепатиті вирустары сияқты қабықты вирустар үшін, сондай-ақ А гепатиті вирусы және парвовирус B19 сияқты қабықсыз вирустар үшін тиімді саналады.

Адамның иммуноглобулин препараттарынан А гепатиті немесе парвовирус B19 берілуі болмайтынын көрсететін сенімді клиникалық тәжірибе алынды және сондай-ақ антиденелердің болуы вирус қауіпсіздігіне елеулі үлес қосатыны болжанады. Препарат сериясы мен пациент арасындағы байланысты ұстап тұру үшін пациентке енгізілетін Хайцентра® препаратын әр қолданғанда препараттың атауын және серия нөмірін тіркеу ұсынылады.

Серологиялық зерттеулерге әсері

Пациенттің қанында иммуноглобулин инъекциясынан кейін пассивті берілген әртүрлі антиденелердің саны уақытша артады, бұл серологиялық тесттерде жалғаноң нәтижелерге әкелуі мүмкін. Антиденелердің эритроциттердің антигендеріне, мысалы A, B және D пассивті ауыстырылуы эритроциттерге антиденелерді анықтауға арналған (мысалы, Кумбс сынамасы) кейбір серологиялық тесттерге әсер етуі мүмкін.

Натрий құрамы

Хайцентра® препаратының құрамында натрий жоқ дерлік.

Басқа дәрілік препараттармен өзара әрекеттесуі

Тірі аттенуирленген вирустық вакциналар

Иммуноглобулинмен емнен кейін қызылша, қызамық, эпидемиялық паротит және желшешекке қарсы тірі аттенуирленген вакциналардың тиімділігі ең кемі 6 апта бойынан және 3 айға дейін азайтылуы мүмкін.

Препаратты тағайындау және тірі аттенуирленген вакцинамен вакцинациялау арасы 3 айлық аралықпен болуын қадағалау керек.

Қызылшаға қарсы вакцинация жағдайында вакцинаның тиімділігі төмендеуі 1 жылға дейін созылуы мүмкін. Осылайша, қызылшаға қарсы вакцина егілген пациенттерде антиденелер деңгейін бақылау керек.

Хайцентра® препаратын басқа дәрілік препараттармен араластыруға болмайды, өйткені үйлесімділігі бойынша зерттеулер жүргізілмеген.

Арнайы ескертулер

Балалар мен жасөспірімдерде қолдану

Балалар мен жасөспірімдерге (0-18 жас) арналған дозалау режимі ересектердікінен ерекшеленбейді, өйткені әрбір көрсетілім үшін дозалар дене салмағына қайта есептеліп келтірілген, ал алмастыру емінің көрсетілімі бойынша қолданған кезде оларды клиникалық нәтиже бойынша түзету жүргізіледі.

Егде жастағы пациенттерде қолдану

Доза дене салмағына байланысты таңдалатындықтан және жоғарыда көрсетілген жағдайлардың клиникалық нәтижесі негізінде түзетілетіндіктен, егде жастағы пациенттер үшін дозалау режимі 18-65 жас аралығындағы ересек пациенттердегі дозадан ерекшеленбейді.

Жүктілік және бала емізу кезеңінде қолданылуы

Жүктілік

Жүкті әйелдерде адамның қалыпты иммуноглобулинін қолдану бойынша деректер шектеулі. Сондықтан Хайцентра® препаратын жүктілік және бала емізу кезеңінде сақтықпен қолдану керек. Иммуноглобулиндерді клиникалық қолдану тәжірибесі жүктілік барысына, шаранаға немесе жаңа туған нәрестеге теріс әсері болмайтынын болжайды.

Жүкті әйелдерді үздіксіз емдеу жаңа туған нәрестеде пассивті иммунитет болуын қамтамасыз етеді.

Бала емізу кезеңі

Иммуноглобулиндер емшек сүтімен бөлінеді, бұл арада жаңа туған нәрестелерде антиденелер қорғаныс әсерін беруі мүмкін.

Фертильділігі

Иммуноглобулиндерді клиникалық қолдану тәжірибесі фертильділігіне уытты әсерінің жоқтығын айғақтайды.

Препараттың көлік құралдарын және қауіптілігі зор механизмдерді басқару қабілетіне әсер ету ерекшеліктері

Хайцентра® препаратының әсеріне байланысты кейбір жағымсыз реакциялар көлік құралдарын немесе қозғалатын механизмдерді басқару қабілетіне әсер етуі мүмкін. Хайцентра® препаратын енгізгенде жағымсыз реакциялар бақыланатын пациенттер үшін көлік құралдарын немесе қозғалатын механизмдерді басқару жағымсыз реакциялардың симптомдары жойылғаннан кейін ғана ықтимал.

Қолдану жөніндегі нұсқаулар

Дозалары және енгізу режимі қолданылуына байланысты.

Емді СҚДП және иммун тапшылығын тері астына енгізуге арналған иммуноглобулиндер көмегімен емдеуде тәжірибесі бар дәрігер бастауы және бақылауы тиіс.

Дозалау режимі

Ересектер және балалар (0-18 жас)

Орын басу емі

Хайцентра® препаратын тері астына енгізу керек. Әр пациент үшін орын басу емінде фармакокинетикалық және клиникалық жауабына және қан сарысуындағы IgG ең аз деңгейіне қарай жеке доза таңдау талап етілуі мүмкін. Нұсқау ретінде келесі дозалау сызбасы берілген.

Тері астына енгізуді қолданумен дозалау сызбасында 5-тен 6 г/л дейінгі диапазондағы IgG қалдық деңгейіне (препаратты келесі енгізу алдында өлшенетін) және пациент жасына байланысты қан сарысуындағы IgG диапазондағы қолжетімді деңгейіне жету керек. Дене салмағына қарай 0,2-0,5 г/кг (1,0-2,5 мл/кг) кем емес қанықтыратын доза талап етілуі мүмкін. Оның бірнеше күнге бөлінуі талап етілуі мүмкін. IgG деңгейінің тұрақты жай-күйіне жеткеннен кейін демеуші дозаны дене салмағына қарай 0,4-0,8 г/кг (2,0-4,0 мл/кг) жуық болатын жиынтық айлық дозаға қол жеткізу үшін қайталанатын аралықпен енгізеді. Әрбір жеке дара дозаны енгізу орны әртүрлі болуы мүмкін.

Қалдық деңгейді пациенттің клиникалық жауабына сәйкес анықтау және бағалау керек. Клиникалық жауабына қарай (мысалы инфекция жиілігі) жоғарырақ қалдық деңгейге жету үшін дозаның және/немесе дозалау аралығының түзетілуі қарастырылуы мүмкін.

СҚДП бар пациенттердегі иммунмодульдейтін ем

Хайцентра® препаратымен емдеу IgG вена ішіне соңғы инфузиялаудан соң апта өткеннен кейін басталады. Ұсынылатын дозасы аптасына дене салмағына қарай 0,2–ден 0,4 г/кг дейінді құрайды. Тері астына енгізуге арналған бастапқы доза IgG вена ішіне енгізуге арналған алдындағы дозаға сәйкес (апталық дозаға есептелгенде) болуы мүмкін.

Мысалы, үш аптаға есептелген вена ішіне енгізуге арналған 1 г/кг IgG алдыңғы дозасы Хайцентра® препаратының апталық дозасы 0,33 г/кг құрайды. Апталық доза бірнеше аздаған дозаға бөлінуі және қажетті мөлшері аптасына бір рет енгізілуі мүмкін. Препаратты екі аптада бір рет енгізу режимінде енгізілетін доза екі еселенген апталық дозаға тең болады. Талап етілетін клиникалық жауапты алу үшін доза түзетілуі талап етілуі мүмкін. Ең алдымен дозаны түзету кезінде пациенттің жеке клиникалық жауабы назарға алынуы тиіс. Клиникалық жай-күйі нашарлауы жағдайында дозасы ұсынылатын ең жоғары доза аптасына 0,4 г/кг дейін ұлғайтылуы мүмкін.

СҚДП көрсетілімінде демеуші ем ретінде Хайцентра® препаратын қолдану 6 айдан астам кезең бойына зерттелмеген. 6 айдан астам кезең бойына ем жүргізгенде пациенттің клиникалық жауабы негізінде және көрсетілімдегі ұзағырақ емнің қажеттігін жеке-дара қарастыру керек.

Хайцентра® препаратының тиімділігін тікелей салыстыру мен вена ішіне енгізуге арналған IgG салыстырудың деректері жоқ.

Дозалау дене салмағына есептеліп келтірілгендіктен және жоғарыда аталған жай-күйлердегі клиникалық нәтижелер бойынша түзетілуіне байланысты балалар және жасөспірімдердегі (0-18 жас) дозалау, сондай-ақ егде пациенттердегі дәл осындай ересектердегіден (18-65 жас) айырмасы жоқ деп саналады.

Сарысулық IgG қажетті деңгейіне қол жеткізу үшін балаларда дозалау бойынша арнайы талаптар жоқ.

Дәрілік препаратты пайдаланып көру алдында немесе оны қолдануда жасалуы қажет сақтық шаралары

Хайцентра® препаратын тек тері астына енгізу керек!

Үй жағдайында емдегенде тері астына енгізуді бастапқы сатыларында пациенттерді үйде емдеу аясында іс жүргізу тәжірибесі бар медицина қызметкері бастауы және бақылауы керек. Тері тастына енгізу үшін тері астына енгізуге арналған жарамды жиынтық пайдалану керек. Оған күтім жасайтын тұлғаға немесе пациентке инфузия жүргізу техникасы бойынша, емдеу күнделігін жүргізуге және ауыр жағымсыз реакциялар туындаған жағдайда қолданылатын шаралар туралы нұсқау берілуі тиіс.

Ұсынылатын енгізу орны: іш аумағы, сан, иықтың жоғары бөлігі және санның латеральді беткейі және бөксе.

Препаратты бастапқы ұсынылатын енгізу жылдамдығы пациенттің жеке қажеттілігіне қарай болады және енгізу орнына 20 мл/сағаттан аспауы тиіс. Жағымдылығы жақсы болған жағдайда енгізу жылдамдығы енгізу орнына 35 мл/сағатқа дейін біртіндеп ұлғайтылуы мүмкін. Енгізу жылдамдығын кейін ұлғайту мүмкіндігі пациентке жағымдылығымен анықталады.

Иммуноглобулиндерді тері астына енгізу үшін жарамды инфузиялық помпаларды пайдалануға болады. Бірнеше инфузиялық помпалар бір мезгілде пайдаланылуы мүмкін. Әртүрлі енгізу орнына енгізілетін дәрілік препараттың мөлшері ауытқуы мүмкін. Жаңа туған нәрестелерде және балаларда инфузия енгізу орны әр 5-15 мл енгізуден кейін өзгертілуі мүмкін. Ересектерде енгізу орнына бір доза 50 мл дейін болуы мүмкін. Инфузияны енгізу орнының саны бойынша шектеу жоқ. Инъекция орны бір бірінен 5 см кем емес арақашықтықта болуы тиіс.

Хайцентра® препараты қолдануға дайын дәрілік препарат. Ерітінді құрамында консерванттар болмауына байланысты Хайцентра® препаратының құтысы ашылуынан кейін мүмкін болғанша тезірек енгізілуі тиіс.

Препарат енгізу алдында бөлме температурасына дейін немесе дене температурасына дейін жеткізілуі тиіс.

Бұлыңғырланған ерітіндіні немесе шөгіндісі бар ерітіндіні пайдалануға болмайды.

Хайцентра® препаратының құтысы бір рет пайдалануға арналуына байланысты құтыда қалған пайдаланылмаған препараттың кез келген мөлшері тиісті талаптарға сәйкес жойылуы тиіс.

ДП стандартты қолдану кезінде көрініс беретін жағымсыз реакциялар сипаттамасы және осы жағдайда қабылдау керек шаралар (қажет болса)

Хайцентра® препаратын қолдануда қалтырау, бас ауруы, қызба, құсу, аллергиялық реакциялар, жүрек айнуы, артралгия, төмен артериялық қысым және арқаның орташа ауыруы сияқты жағымсыз реакциялар туындауы мүмкін.

Сондай-ақ артериялық қысымның төмендеуі сирек және кейбір жағдайларда анафилаксиялық шок дамуы (тіпті егер пациентте бұрын иммуноглобулин препараттарына аса жоғары сезімталдық бақыланбаса да) бақылануы мүмкін.

Сондай-ақ енгізу орнында реакциялар болуы да мүмкін: ісіну, ауырсыну, қызару, тығыздану, температураның жергілікті жоғарылауы, қышыну, гематома және бөртпе.

Хайцентра® препаратының жағымсыз әсерлері туралы төменде келтірілген ақпарат MedDRA және кездесу жиілігіне сәйкес жіктелген: өте жиі (≥1 / 10), жиі (≥1/100 және <1/10), жиі емес (≥1 /1 000 және <1/100), сирек (≥ 1/10 000 - < 1/1 000 дейін). Өздігінен болатын пост-маркетингтік жағымсыз реакциялар үшін кездесу жиілігі белгісіз ретінде жіктелген.

Балаларда қолданылуы

Балаларда жоғарыда аталған барлық жағымсыз реакциялар туындауы мүмкін.

Егде жастағы пациенттерде қолданылуы

Егде жастағы пациенттерде жоғарыда аталған барлық жағымсыз реакциялар туындауы мүмкін. Клиникалық зерттеулер нәтижелері бойынша жасы 65-тен үлкен пациенттердегі және жасырақ пациенттер арасындағы препараттың қауіпсіздік бейіні және айырмашылығының болмауы бойынша шектеулі деректер алынған.

Хайцентра® препаратын қолданудың тіркеуден кейінгі кезеңінде оның жасы 65-тен үлкен пациенттердегі және жасырақ пациенттер арасындағы қауіпсіздік бейінінде айырмашылық болмаған.

Медициналық қызметкерлерге Хайцентра® препаратын қолдануға байланысты болуы мүмкін кез келген бақыланатын жағымсыз реакциялар туралы хабарлау қатаң түрде ұсынылады.

Жағымсыз дәрілік реакциялар туындаса медицина қызметкеріне, фармацевтика қызметкеріне немесе дәрілік препараттардың тиімсіздігі туралы хабарламаларды қоса, дәрілік препараттарға жағымсыз реакциялар (әсерлер) бойынша ақпараттық деректер базасына тікелей хабарласыңыз:

Қазақстан Республикасы Денсаулық сақтау министрлігі Тауарлар мен көрсетілетін қызметтердің сапасы мен қауіпсіздігін бақылау комитеті «Дәрілік заттарды және медициналық бұйымдарды сараптау ұлттық орталығы» ШЖҚ РМК

http://www.ndda.kz

Қосымша мәліметтер

Дәрілік препараттың құрамы

1 миллилитр препараттың құрамында

белсенді зат - адам плазмасы ақуыздары, оның иммуноглобулині G 98% кем емес - 200 мг

қосымша заттар: L-пролин, полисорбат 80, инъекцияға арналған су,

хлорсутек қышқылы және/немесе натрий гидроксиді

Сыртқы түрінің, иісінің, дәмінің сипаттамасы

Ашық сары немесе ашық қоңыр түсті мөлдір ерітінді. Сақтау барысында жеңіл бұлыңғырлануы немесе көрінетін бөлшектердің аздаған мөлшері пайда болуына жол беріледі.

Шығарылу түрі және қаптамасы

Тері астына енгізуге арналған ерітінді, 200 мг/мл.

Галобутилді тығынмен тығындалған және пластик дискісі бар алюминий қалпақшамен қаусырылған мөлдір түссіз шыны құтыларда ( I типі, Еур. Ф. немесе Ф. АҚШ) 5 мл, 10 мл немесе 20 мл-ден немесе мөлдір түссіз шыны құтыларда (II типі, Еур. Ф. немесе Ф. АҚШ) 50 мл-ден.

1 құтыдан медициналық қолдану жөніндегі нұсқаулықпен бірге картон қорапшада.

30 ай

Жарамдылық мерзімі өткеннен кейін қолдануға болмайды.

Жарықтан қорғалған жерде, 25 ºС-ден аспайтын температурада сақтау керек. Мұздатып қатыруға болмайды.

Балалардың қолы жетпейтін жерде сақтау керек.

Стерильді.

Рецепт арқылы

Өндіруші туралы мәліметтер

CSL Behring AG, Швейцария

Wankdorfstrasse 10, 3014 Bern, Switzerland

Тіркеу куәлігінің ұстаушысы

CSL Behring AG, Швейцария

Wankdorfstrasse 10, 3014 Bern, Switzerland

Қазақстан Республикасы аумағында дәрілік заттың тіркеуден кейінгі қауіпсіздігіне жауапты ұйымның атауы, мекенжайы және байланыс деректері

«Regicom» ЖК

Қазақстан Республикасы, 050000, Алматы қ., Абылай хан даңғ., 122, 12 кеңсе

Тел. +7(727) 261-22-15 (фармакологиялық қадағалау)

e-mail: safety@regicompany.com

Телефон 24 сағат бойы қолжетімді: +7 705 132 78-51

Қазақстан Республикасы аумағында тұтынушылардан дәрілік заттың сапасына қатысты шағымдарды (ұсыныстарды) қабылдайтын ұйымның атауы, мекенжайы және байланыс деректері

«Regicom» ЖК

Қазақстан Республикасы, 050000, Алматы қ., Абылай хан даңғ., 122, 12 кеңсе

Тел. +7(727) 261-22-15

+7 705 132 78-51

e-mail: safety@regicompany.com