Фурагин® №30 (50 мг, ОЛАЙНФАРМ)

• русский
• қазақша

• Скачать инструкцию медикамента

Саудалық атауы

Фурагин®

Халықаралық патенттелмеген атауы

Жоқ

Дәрілік түрі

50 мг таблеткалар

Құрамы

Бір таблетканың құрамында

белсенді зат – 50 мг фурагин,

қосымша заттар: лактоза моногидраты, картоп крахмалы, қант, полисорбат 80 (твин 80), стеарин қышқылы.

Сипаттамасы

Жалпақ цилиндр пішінді, ойығы бар, сарыдан қызғылт-сары реңді сары түске дейінгі таблеткалар.

Фармакотерапиялық тобы

Бактерияға қарсы басқа препараттар. Нитрофуранның туындылары.АТХ коды J01XE

Фармакологиялық қасиеттері

Фармакокинетикасы

Фурагин асқазан-ішек жолынан жақсы сіңеді. Препараттың сіңірілуі негізінен ішектің дистальді сегментінде пассивті диффузия жолымен жүреді. Бір реттік дозасынан кейін белсенді затының қан плазмасындағы ең жоғарғы концентрациясына 30 минуттан соң жетеді, осы деңгейде 1 сағат бойы сақталады, сосын баяу төмендейді. Фурагиннің қан плазмасындағы бактериостатикалық концентрациясы 8-12 сағат бойы сақталады. Фурагин қан плазмасындағы ақуыздарымен байланысады. Салыстырмалы түрде енгізілген дозасының азғантай бөлігі (10 %) бауыр мен бүйректе биоөзгеріске түседі, бірақ бүйректің шығару қызметі төмендегенде енгізілген дозасының көп бөлігі биоөзгеріске түседі. Фурагиннің жартылай шығарылу кезеңі қысқа (1 сағатқа жуық). Фурагин бүйрек арқылы, көбінесе өзекшелік сөлініс арқылы шығарылады (85 %). Енгізілген фурагиннің 8-13 %-ы несепке түседі, мұнда фурагиннің концентрациясы сезімтал микроорганизмдердің басым бөлігі үшін ең төменгі тежегіш концентрациясынан едәуір артық болады. Фурагиннің несептегі ең жоғарғы концентрациясы – 5,7 мкг/мл. Фурагиннің әсері қышқылды ортада анағұрлым айқын (рН 5,5). Несепті бейтараптандыратын заттар препараттың тиімділігін төмендетеді.

Фармакодинамикасы

Фурагин - бактерияға қарсы дәрі, нитрофуранның туындысы, грамоң (Staphylococcusepidermidis, Streptococcusaureus, Streptococcusfaecalis) және грамтеріс (Enterbacteriaceae - Salmonella, Shigella, Proteus, Klebsiella, Escherchia, Enterbacter және т.б.) бактерияларға қатысты тиімді. Препарат стафилококктарға және сульфаниламидтер мен антибиотиктерге төзімді микроорганизмдердің патогенді штаммдарына әсер етеді. Микроорганизмдердің фурагинге резистенттілігі өте баяу дамиды және жоғары дәрежеге жетпейді. Препаратқа Pseudomonosaeruginosa төзімді.

Препараттың микробқа қарсы әсер ету механизмі нитротоптарды амин тобына қалпына келтіруіне байланысты. Сонымен қатар, препараттың қалпына келтірілген түрлері жасушалық макромолекулаларға және микроб жасушасындағы электрондардың тасымалдануына тікелей ықпалын тигізеді. ДНҚ деңгейінде өзара әрекеттесе отырып (дезоксирибонуклеин қышқылы) ондағы жарылулар мен мутацияларды туғызады, ол оның биологиялық қызметінің бұзылуына алып келеді. Сондай-ақ прeпараттың қалпына келтірілген түрі микроорганизмдердің энзимдік жүйелер қатарын тотықтырады. Кейбір микроорганизмдерге қатысты фурагиннің микробқа қарсы әсері басқа нитрофурандарға қарағанда жоғарырақ. Препарат әсіресе, несеп жолдарының жұқпалары кезінде тиімді.

Нитрофурандар ағзаның иммундық жүйесін бәсеңдетіп қана қоймайды, сондай-ақ оны белсенділендіреді, мысалы комплемент титрін және лейкоциттердің микроорганизмдерді фагоциттеу қабілетін арттырады.

Қолданылуы

- жедел және созылмалы несеп шығару жолдарының (пиелонефрит, цистит, уретрит) және қуықасты (простатит) безінің жұқпаларында

- несеп-жыныс жүйесінің операциядан кейінгі жұқпаларында (операциядан кейінгі пиелонефрит, цистит, простатит).

Қолдану тәсілі мен дозалары

Фурагин® таблеткаларын тамақтан кейін ішке, жеткілікті су мөлшерімен ішіп қабылдайды.

Ересектерге күніне 2-3 рет 100-200 мг тағайындайды. Емдеу курсы 7-10 күнді құрайды және аурудың ауырлығы мен бүйрек қызметінің жағдайына байланысты болады. Қажет болса, емдеу курсын 10-15 күннен кейін қайталайды.

6 жастан асқан балаларға: тәуліктік дозасын бір реттік 3-4 дозаларға бөле отырып, 7-8 күн бойы кг дене салмағына күніне 5-8 мг, жекелеген жағдайларда несеп талдаулары қалпына түскен кезде, рецидивке қарсы емдеу үшін 3-4 апта бойы ең жоғарғы дозасының 1/2-1/3 дозасына көшеді.

Жағымсыз әсерлері

Кейде

• тәбеттің төмендеуі, жүрек айнуы;

• құсу, диарея;

• бас айналуы, ұйқышылдық, көрудің бұзылуы;

• қызба.

Сирек

• полиневропатия;

• папулездік бөртпе, қышу, есекжем, өтпелі алопеция.

Өте сирек

• ентігу, тыныс алудың жиілеуі, қақырықпен немесе қақырықсыз жөтел;

• панкреатит;

• басқа да: дене температурасының жоғарылауы, әлсіздік, жедел немесе созылмалы өкпе реакциялары;

• ангионевротикалық ісіну, эксфолиативті дерматит, Erythemamultiforme;

• агранулоцитоз, тромбоцитопения, апластикалық анемия;

• артралгия.

Жекелеген жағдайларда

• холестаздық сарғаю, гепатит, бауыр қызметінің бұзылуы

• жүрек-қантамыр жүйесінің бұзылулары: бассүйекішілік гипертензияның жеңіл дәрежесі;

• дене температурасының жоғарылауы, әлсіздік.

Жағымсыз әсерлері дамыған жағдайда дозасын азайту немесе препаратты қабылдауды тоқтату қажет. Егер препаратты тамақтан кейін мол су мөлшерімен ішіп қабылдаса, жағымсыз әсерлері азаяды.

Фурагин несепті қоңыр түске бояуы мүмкін.

Қолдануға болмайтын жағдайлар

- фурагинге, нитрофуран тобының препараттарына немесе препараттың қосымша заттарына жоғары сезімталдық;

- бүйректің ауыр жеткіліксіздігі (бүйрек клиренсі минутына 30 мл-ден аз);

- бауыр аурулары;

- полиневропатия (соның ішінде диабеттік);

- глюкозо-6-фосфатдегидрогеназа энзимінің жеткіліксіздігі (гемолиздің даму қаупі);

- жүктілік пен бала емізу;

- 6 жасқа дейінгі балалар.

Дәрілермен өзара әрекеттесуі

Несепті сілтілейтін дәрілер (мысалы, натрий гидрокарбонаты) фурагиннің емдік әсерін азайтады (фурагиннің несеппен шығарылуын жеделдетеді). Несепті қышқылдандыратын дәрілер (қышқылдар, соның ішінде аскорбин қышқылы, сондай-ақ кальций хлориді) фурагиннің несептегі концентрациясын арттырады (оның несеппен шығарылуы баяулайды), осылайша препараттың емдік әсері артады, бірақ сонымен қатар уытты құбылыстардың даму қаупі артады.

Антибиотиктер-аминогликозидтер және тетрациклин фурагиннің бактеряға қарсы әсерін күшейтеді. Хлорфениколмен және ристомицинмен біріктірілімінде гемоуытты құбылыстар қаупі артады.

Налидикс қышқылымен әсері антагонизмді (фурагиннің бактериостатикалық әсерін әлсіретеді).

Фурагин мен урикозуриялық дәрілерді (пробенецид, сульфинпиразон) бір мезгілде қолданғанда фурагиннің несеппен шығарылуы азаяды, бұл фурагиннің ағзада жинақталуына және оның уытты әсерлерінің дамуы мүмкіндігіне алып келеді

Құрамында магний трисиликаты бар антацидтермен фурагинді бір мезгілде қолданғанда фурагиннің сіңуі азаяды.

Атропин фурагиннің сіңуін баяулатады, бірақ сіңірілген препараттың жалпы мөлшері өзгермейді.

Айрықша нұсқаулар

Сақтық шаралары

Бүйрек қызметі бұзылған науқастарға, анемияда, В тобының витаминдері мен фолий қышқылы тапшылығында, өкпе ауруларында сақ болу керек (65 жастан асқан емделушілерде). Фурагинді ұзақ уақыт ішке қабылдағанда неврит дамуы мүмкін. Ұзақ уақыт емдеген жағдайда, әсіресе 65 жастан асқан емделушілерде өкпе мен бауыр қызметін бақылауда ұстау керек. Фурагинді қант диабетімен науқастарға сақтықпен қолдану керек, өйткені препарат полиневропатияның дамуына ықпал етуі мүмкін.

Фурагинді қабылдап жүрген емделушілерді зертханада несепте глюкозаның болуына зерттеулер, егер анықтау үшін мысты қалпына келтіру әдісі пайдаланылса, жалған оң реакция беруі мүмкін. Энзиматикалық әдіспен орындалған несептегі глюкозаны анықтау нәтижелеріне фурагин әсер етпейді. Фурагинды ұзақ уақыт қабылдаған жағдайда жағымсыз құбылыстарының дамуын болдырмас үшін, ауық-ауық қан лейкоциттерінің мөлшерін, сондай-ақ бауыр мен бүйрек қызметінің көрсеткіштерін бақылап отыру керек.

Тұқым қуалайтын фруктозаны көтере алмаушылығы, Lapp-лактаза ферментінің тапшылығы, глюкозы-галактоза мальабсорбциясы бар тұлғаларға қолдануға қарсы көрсетілімді.

Дәрілік заттың көлік құралдарын немесе қауіптілігі зор механизмдерді басқару қабілетіне ықпал ету ерекшеліктері

Анықталмаған

Артық дозалануы

Бүйрек қызметі бұзылған науқастарда уытты әсері болуы мүмкін.

Симптомдары: бас ауыруы, бас айналуы, депрессия, шеткергі полиневрит, аллергиялық реакциялар (есекжем, ангионевротикалық ісіну, бронх түйілуі), жүрек айнуы, құсу, гемолитикалық анемия (глюкозо-6-фосфат-дегидрогеназа жеткіліксіздігі бар тұлғаларда), мегалобластты анемия.

Емі: асқазанды шаю, инфузиялық ерітіндіні (0,9% натрий хлориді ерітіндісі) к/і енгізу. Белгілеріне қарай және демеуші ем жүргізу. Ауыр жағдайларда гемодиализ көрсетілген

Арнайы у қайтарғысы белгісіз.

Шығарылу түрі мен қаптамасы

10 таблеткадан поливинилхлоридті үлбір мен лакталған баспалы алюминий фольгадан жасалған пішінді ұяшықты қаптамаға салынады.

3 пішінді ұяшықты қаптамадан мемлекеттік және орыс тілдеріндегі медицинада қолданылуы жөніндегі нұсқаулықпен бірге картон пәшкеге салады.

Сақтау шарттары

Құрғақ, жарықтан қорғалған жерде, 25°С-ден аспайтын температурада сақтау керек.

Балалардың қолы жетпейтін жерде сақтау керек!

Сақтау мерзімі

5 жыл

Жарамдылық мерзімі өткеннен кейін қолдануға болмайды.

Дәріханалардан босатылу шарттары

Рецепт арқылы

Өндіруші

“Олайнфарм” АҚ.

Мекенжайы: Рупницу к-сі 5, Олайне, LV-2114, Латвия.

 

Тіркеу куәлігі иесі

“Олайнфарм” АҚ.

Мекенжайы: Рупницу к-сі 5, Олайне, LV-2114, Латвия.

Қазақстан Республикасы аумағында тұтынушылардан өнім сапасына қатысты шағымдарды қабылдайтын ұйымның мекенжайы:

050009 Алматы қ-сы, Абай д-лы 151/115, 807 кеңсе, телефон /факс 007 727 333 46 52, E-mail altynay1992@mail.ru