ФЛУТИЭЙР-S 250

• русский
• қазақша

• Скачать инструкцию медикамента

Саудалық атауы

ФЛУТИЭЙР-S 250

Халықаралық патенттелмеген атауы

Жоқ

Дәрілік түрі

Ингаляцияға арналған ұнтақпен капсулалар ингалятормен жиынтықта.

Құрамы

Бір дозасының құрамында

белсенді заттар: 72.64 мкг сальметерол ксинафоаты, 50.00 мкг сальметеролға баламалы, 250.00 мкг флутиказон пропионаты

қосымша заттар: лактоза, лактоза моногидраты,

капсула корпусы мен қақпақшасының құрамы: темірдің (III) қызыл тотығы (Е172), темірдің (III) сары тотығы (Е172), титанның қостотығы (Е171), гидроксипропилметилцеллюлоза.

Сипаттамасы

Мөлдір корпусы және ақшыл-карамель түстес қақпақшасы бар, өлшемі

№ 3, қақпақшасында қара түсті «3SF 250» жазуы бар қатты желатинді капсулалар. Капсулалардың ішіндегісі – ақтан ақ дерлік түске дейінгі ұнтақ.

Фармакотерапиялық тобы

Тыныс жолдарының обструкциялық ауруларын емдеуге арналған басқа препараттармен біріктірілген симпатомиметиктер.

Тыныс жолдарының обструкциялық ауруларын емдеуге арналған басқа препараттармен біріктірілген сальметерол.

АТХ коды R03AK06

Фармакологиялық қасиеттері

Фармакокинетикасы

Сальметерол мен флутиказон пропионатын бір мезгілде ингаляциялық енгізу бұл заттардың әрқайсысының фармакокинетикасына әсер етпейді. Плазмадағы ең жоғарғы концентрацияларына жету уақыты флутиказон үшін 1-2 сағатты, және сальметерол үшін – 5 минутты құрайды.

Сальметерол

Сальметерол өкпе деңгейінде жергілікті әсер етеді, осылайшы оның плазмадағы деңгейінен емдік әсері анықталмайды. Сальметеролдың фармакокинетикасы жөніндегі мәліметтер шектеулі, өйткені препаратты емдік дозаларында ингаляциялық жолмен енгізгеннен кейін, оның плазмадағы өте төмен концентрацияларын техникалық тұрғыдан анықтау қиын. Ингаляциялық сальметерол ксинафоатын жүйелі қолданғанда жүйелі қан ағымында 100 нг/мл дейінгі концентрациялардығы гидроксинафтой қышқылы анықталады, бұдан препаратты обструкциясы бар емделушілерге ұзақ уақыт (12 айдан астам) қолданғандағы жағымсыз әсері анықталмаған.

In vitro зерттеулер, сальметеролдың көбінесе P450 3A4 (CYP3A4) цитохромының көмегімен ά-гидроксисальметеролға дейін метаболизденетінін көрсеткен.

Флутиказон пропионаты

Ингаляцялық енгізуден кейін флутиказон пропионатының абсолюттік биожетімділігі препараттың жеткізілу жүйесіне байланысты, шамамен 10.9% құрайды. Демікпесі және өкпенің созылмалы обструкциялық ауруы (ӨСОА) бар емделушілерде флутиказон пропионатының ингаляциялық енгізудегі анағұрлым жүйелі әсері байқалады.

Жүйелі сіңірілуі көбінесе өкпеде жүреді. Ішке тартылатын дозасының бір бөлігі жұтылып кетуі мүмкін, бірақ оның жүйелі әсері бауыр арқылы бірінші өтуіндегі қарқынды метаболизмі салдарынан өте төмен. Флутиказон пропионатының ішке қабылдағандағы биожетімділігі 1%-дан азды құрайды. Флутиказон пропионатының ингаляцияланған дозасының шамасы мен жүйелі әсері арасында тікелей тәуелділік бар.

Флутиказон пропионатының плазмалық клиренсі жоғары (1150 мл/мин).

Флутиказон пропионаты, негізінен Р450 цитохромы жүйесінің CYP3А4 ферментінің көмегімен белсенді емес туындысына дейін биоөзгеріске түсуі салдарынан жүйелі қан ағымынан жылдам сіңіріледі. Флутиказон пропионаты мен CYP3А4 ферментінің тежегіштерін бір мезгілде тағайындағанда сақ болу керек, өйткені флутиказон пропионатының жүйелі әсері артуы мүмкін.

Флутиказон үшін жартылай шығарылу кезеңі 5.33-тен 7.65 сағатқа дейінді құрайды: сальметерол үшін мәліметтер жоқ.

Фармакодинамикасы

Флутиэйр-S 250 - ингаляциялық жолмен қолдануға арналған біріктірілген препарат, оның құрамына екі белсенді компонент: сальметерол және флутиказон пропионаты кіреді, олардың әсер ету механизмдері әр түрлі. Флутиэйр-S 250, β-адренорецепторлары агонистері тобының препараттары мен ингаляциялық глюкокортикостероидтарды (ГКС) бір мезгілде қабылдап жүрген емделушілер үшін емдеудің анағұрлым ыңғайлы режимін қамтамасыз етеді.

Сальметерол

Сальметерол - ұзақ әсер ететін (12 сағат)β2-адренорецепторлардың селективті агонисі. Сальметеролдың молекуласының бүйірлік тізбегі ұзын, ол рецептордың сыртқы бөлігімен байланысады. Сальметерол гистамин индукциялаған бронх түйілуінің алдын алуда тиімді, бронх дилатациясын туғызады, бронхтардың аса жоғары белсенділігін азайтады. Өкпе тіндеріндегі гистамин, лейкотриендер және простагландин D2 сияқты жуан жасушалар медиаторларының босап шығуын ұзақ уақыт бойы тежейді.

Ішке тартылатын аллергендерге реакцияның әуелгі және кейінгі сатысын бәсеңдетеді. Бір дозасын енгізгеннен кейін кейінгі сатысының бәсеңдеуі 30 сағатқа дейін ұзарады.

Флутиказон пропионаты

Флутиказон пропионаты жергілікті әсер ететін ГКС тобына жатады және ұсынылатын дозаларында ингаляциялық жолмен енгізгенде өкпеге қабынуға қарсы әсер береді, бұл симптомдарының айқындығының азаюына және демікпе өршулерінің төмендеуіне алып келеді. Ұсынылатын дозаларында тағайындалған флутиказон пропионатының әсері жүйелі ГКС-ға тән жағымсыз әсерлермен қатар жүрмейді.

Ингаляциялық флутиказон пропионатының ең жоғарғы ұсынылатын дозаларында қолданғанда, бүйрекүсті безі қыртысы гормондарының тәуліктік сөлінісі ересектерде де, балаларда да қалып шегінде қалады. Басқа ингаляциялық ГКС қабылдап жүрген емделушілерді флутиказон пропионатын қабылдауға көшіргеннен кейін бүйрекүсті безі қыртысы гормондарының тәуліктік сөлінісі, ГКС бұрын ішке қабылданғанына қарамастан біртіндеп қалыпқа түседі. Бұл флутиказон пропионатын ингаляциялық жолмен қолдану аясында бүйрекүсті безі функциясының қалпына келетінін көрсетеді. Флутиказон пропионатын ұзақ уақыт қолданғанда бүйрекүсті безі қыртыстарының резервтік функциясы да қалып шегінде қалады, бұдан сәйкесінше стимуляцияға жауап ретінде кортизол өндірілуінің қалыпты артқаны көрінеді (алдыңғы емнен туындаған адреналдық резервтің қалдықтық төмендеуі, ұзақ уақыт сақталуы мүмкін екендігін ескеру қажет).

Қолданылуы

- ересектер мен 12 жастан асқан балаларда бета-2 агонист пен кортикостероидты біріктіру қажет жағдайда бронх демікпесін емдеуде

- ересектердегі өкпенің созылмалы обструкциялық ауруының (ӨСОА) ауыр түрлерін емдеуде

Қолдану тәсілі және дозалары

Бронх демікпесі

Ересектер мен 12 жастан асқан балаларға

Флутиэйр -S 250 ұнтағының бір ингаляциясы тәулігіне екі рет. Дозасы демікпе симптомдарын оңтайлы бақылауда ұстап тұратын ең төменгі тиімді дозасына жеткенге дейін титрленуі тиіс. Препаратты тәулігіне екі рет қабылдаған кездегі бақылануына жеткен кезде, препаратты күніне бір рет қабылдауға көшу үшін дозасын ары қарай титрлеу қажет.

Флутиэйр-S 250-дің бастапқы дозасы флутиказон пропионатының аталған ауырлық дәрежесіндегі ауруды емдеу үшін ұсынылатын дозасының негізінде таңдалуы тиіс.

ГКС ингаляциялық түрлерін ғана қолданғанда аурудың бақылануы талапқа сай болмаса, ГКС дозасына баламалы дозадағы Флутиэйр-S 250-ге көшу демікпе симптомдары бақылануының жақсаруына алып келуі мүмкін. Ингаляциялық ГКС-мен демікпе симптомдарының бақылануы талапқа сай болатын емделушілерде Флутиэйр-S 250-ге көшу кортикостероидтардың қажетті дозасын төмендетуі мүмкін.

Өкпенің созылмалы обструкциялық ауруы (ӨСОА):

Флутиэйр-S 250 ұнтағының бір ингаляциясы тәулігіне екі рет.

Емделушілердің жекелеген топтары: егде жастағы немесе бүйрек пен бауыр функциясының бұзылуы бар емделушілерде дозасын түзету қажет емес.

Ішінде ингаляцияға арналған ұнтақ бар капсуланы қалай пайдалану керек

Ішінде ингаляцияға арналған ұнтақпен капсуласы бар SAVA ИНГАЛЯТОРЫН қалай ашу керек

1. SAVA ИНГАЛЯТОРЫН тік қалпында ұстаңыз. Қорғағыш қақпақшасын ашыңыз (1 сурет).

2. Капсула бөлігін ашу: Капсуланы SAVA ИНГАЛЯТОРЫНА салу үшін, сұқ саусақпен «PUSH» белгісін басып тұрып, капсула бөлігін итеру керек (2 сурет).

3. Капсуланы салу: Открыть SAVA ИНГАЛЯТОРЫН ашып, капсулаға арналған ұяшықтың ішіне капсуланы салыңыз (3 сурет).

Капсуланың ұяшыққа дұрыс салынғанына көз жеткізу қажет (4 сурет).

4. Капсула бөлігін жабу: SAVA ИНГАЛЯТОРЫН тік қалыпта ұстап, капсулаға арналған бөлікті кері бағытқа бұраңыз (5 сурет). Сонымен қатар, капсулаға арналған бөлік жабылғанда, «сырт» еткен дыбыс етілуі тиіс.

5. Капсуланы тесу: Бас бармақты негізге алып, және ортаңғы және сұқ саусақтарды – мүштектің екі үстіңгі бөлігінде ұстай отырып, (6 сурет) SAVA ИНГАЛЯТОРЫН тік қалпында ұстаңыз.

Мүштекті, бағыттағыш белгісі толығымен жабылғанша басып тұрыңыз

(7 сурет), сосын мүштекті босатыңыз.

Осылайша, капсула тесіледі және оның ішіндегісін деммен ішке тартуға болады.

Назар аударыңыз: Егер 5 сатыны қайталау қажет болса, капсуланың ұяшықта дұрыс орналасқанын тағы бір тексеру керек.

8. Ингаляцияға дайындалыңыз, ол үшін толық дем шығарыңыз (8 сурет).

Ингаляция

Мүштекті ерніңізбен қысып тұрып, жылдам терең дем алыңыз (9 сурет).

Демді ішке тарту кезінде ұнтақ дисперсиясы кезіндегі капсуланың бөлік ішіндегі вибрациясынан туындаған дірілдеген дыбыс естіледі.

Назар аударыңыз: Ингаляция кезінде ингаляторды, мүштектің екі жағындағы ауа жолдары бітеліп қалмайтындай қылып ұстау қажет. Бұл ингалятордың ішіне ауаның кіруіне және капсуланың қозғалуының қиындауына және дәрілік заттың босап шығуына кедергі келтіруі мүмкін.

Сондай-ақ ингаляция кезінде мүштекті жаншуға болмайды, өйткені бұл капсуланың қозғалуын қиындатады.

Препараттың ингаляциядан кейінгі әсер ету уақыты

Ингаляциядан кейін деміңізді 10 секундқа іркіңіз және осы кезде ингаляторды алып тастаңыз. Сосын қалыпты тыныс алуды қайта жаңғыртыңыз. Бұл препараттың тыныс жолдарында таралуына мүмкіндік береді. Егер ингаляция кезінде препарат жеткілікті түспесе, 6-8 сатыларды қайталауға болады.

Пайдаланғаннан кейін капсулаға арналған бөлікті ашып, капсуланың бос қақпақтарын шығарып алыңыз SAVA ингаляторы құрғақ және таза күйінде қалуы үшін бөлікті жауып тастаңыз.

Жағымсыз әсерлері

Жиі (100-ден ≥ 1)

- ауыз қуысы мен жұтқыншақ кандидозы, дауыстың қарлығуы

- пневмония (ӨСОА бар емделушілерде)

- бұлшықет құрысулары, артралгия

Жиі емес (1000-нан ≥ 1)

- ауызжұтқыншақтың шырышты қабығының тітіркенуі

- терінің аллергиялық реакциялары, эритематоздық бөртпе

- ентігу

- катаракта

- гипергликемия

- қорқу сезімі, ұйқының бұзылуы

- тремор

- жүректің қағуы, жүрекшелердің фибрилляциясы

Сирек (10000-нан ≥ 1)

- анафилактикалық реакциялар, ангионевротикалық ісіну (әсіресе бет пен ауызжұтқыншақтың ісінуі), парадоксальді бронх түйілуі

- глаукома

- мінез-құлық өзерістері, жоғары белсенділік пен ашушаңдыты қоса (әсіресе балаларда)

- жүрек ырғағының бұзылуы (жыпылықтағыш аритмияны, суправентрикулярлық тахикардияны, экстрасистолияны қоса)

- Кушинг синдромы, бүйрекүсті бездері функциясының бәсеңдеуі

- балалар мен жасөспірімдердегі өсудің тежелуі

- сүйек тінінің минералдық тығыздығының төмендеуі

Қолдануға болмайтын жағдайлар

- препараттың кез-келген ингредиентіне жоғары сезімталдық

- сальметерол мен флутиказон пропионатының біріктірілімі демікпе статусының бастапқы емі үшін немесе бронх демікпесінің басқа жедел ұстамаларына қарқынды ем жүргізу қажет кезде қарсы көрсетілімді

- 12 жасқа дейінгі балаларға

Дәрілермен өзара әрекеттесуі

Емделушіге аса қажет жағдайларды қоспағанда, селективті емес және селективті бета-адреноблокаторлардың қолданылуын болдырмау керек.

Әдеттегі жағдайларда флутиказон пропионатының ингаляциялары қарқынды метаболизмі салдарынан ішек пен бауырдағы «бірінші» өтуі және жоғары жүйелі клиренсі кезінде Р450 CYP3А4 цитохромының әсерінен оның плазмадағы төмен концентрацияларымен қатар жүреді. Осының арқасында флутиказон пропионатының қатысуымен клиникалық маңызды өзара әрекеттесулерінің ықтималдығы аз.

Дәрілермен өзара әрекеттесулерін зерттеулер, ритонавирдің (Р450 CYP3А4 цитохромының белсенділігі жоғары тежегіші) флутиказон пропионатының қан плазмасындағы концентрациясын едәуір арттыруы мүмкін, соның нәтижесінде кортизолдың сарысудағы концентрациясы елеулі төмендейді. Флутиказон пропионаты мен ритонавирді бір мезгілде қабылдаған емделушілердегі клиникалық маңызды өзара әрекеттесулері туралы хабарлар бар. Бұл өзара әрекеттесулер, Кушинг синдромы және бүйрекүсті безі функциясының бәсеңдеуі сияқты жағымсыз әсерлерді туғызған. Бұл мәліметтерді ескере отырып, емделуші үшін күтілетін пайдасы ГКС жүйелі жағымсыз әсерлерінің қаупінен асып түсетін жағдайлардан басқа, флутиказон пропионаты мен ритонавирдің бір мезгілде қолданылуын болдырмау керек.

P450 CYP3A4 цитохромының басқа тежегіштері плазмадағы флутиказон пропионаты мөлшерінің өте аз (эритромицин) және (кетоконазол) іс жүзінде эндогендік кортизолдың концентрациялары төмендемейтін елеусіз жоғарылауын туғызады. Осыған қарамастан, флутиказон пропионаты мен P450 CYP3A4 цитохромының күшті тежегіштерін (мысалы, кетоконазолды) бір мезгілде қолданғанда сақ болу ұсынылады, өйткені мұндай біріктірілім флутиказон пропионатының жүйелі әсерлерін арттыруы мүмкін.

Кетоканазол сальметеролдың қан плазмасындағы жүйелі әсерінің жоғарылауын туғызуы және QT аралығының ұзаруына алып келуі мүмкін.

Жүйелі кетоканазолды құрамына сальметерол кіретін препараттармен бірге қолдану QT аралығының ұзаруына алып келуі мүмкін. CYP3A4 тежегіштерімен бірге тағайындағанда сақ болу керек.

Айрықша нұсқаулар

Емделушілерге, әсері оңтайлы болуы үшін сальметерол мен флутиказон пропионатының біріктірілімін, тіпті ауру симптомдары айқын емес немесе жоқ болған жағдайларда да күн сайын қолдану керектігі туралы айту керек.

Флутиэйр-S 250 жылдам- және қысқа әсері бар ингаляциялық бронходилататорды (мысалы, сальбутамол) қолдану керек кездегі жедел симптомдарды қайтаруға арналмаған. Емделушілерге жедел симптомдарды басуға арналған препаратты үнемі өзінде ұстау керектігі туралы хабарлау керек.

Қысқа әсер ететін бронходилататорларды симптомдарын жеңілдету үшін жиірек қолдану аурудың бақылануының нашарлағанын көрсетеді, және мұндай жағдайларда емделуші тез арада дәрігерге қаралуы тиіс. Бронхоспастикалық синдромның күрт және үдемелі нашарлауы өмірге үлкен қауіп төндіруі мүмкін және мұндай жағдайларда емделуші кідітпей дәрігерге қаралуы тиіс. Дәрігердің ГКС жоғарырақ дозасын тағайындау мүмкіндігі жоққа шығарылмайды. Егер Флутиэйр-S 250 тағайындалған дозасы аурудың талапқа сай бақылануын қамтамасыз етпесе, онда емделуші дәрігерге қаралуы тиіс, дәрігер жұқпа дамыған жағдайда, қосымша ГКС пен антибиотиктерді тағайындауы мүмкін.

Өршудің даму қаупіне байланысты, демікпесі бар емделушілерге Флутиэйр-S 250 препаратымен емдеуді күрт тоқтатуға болмайды; препараттың дозасын біртіндеп, дәрігердің қадағалауымен төмендету керек. ӨСОА науқастарда препаратты тоқтату декомпенсация симптомдарымен қатар жүруі мүмкін және дәрігердің қадағалауын қажет етеді.

Құрамында кортикостероидтар бар басқа ингаляциялық препараттар сияқты, Флутиэйр-S 250-ді өкпенің белсенді немесе жасырын туберкулезі емделушілерге сақтықпен тағайындау қажет.

Флутиэйр-S 250-ді тиреотоксикозы бар емделушілерге сақтықпен тағайындау керек.

Симпатомиметикалық дәрілерді, әсіресе ұсынылғанынан жоғары дозаларда қолданғанда, систолалық қысым жоғарылауы мүмкін, соған байланысты Флутиэйр-S 250-ді жүрек-қантамыр аурулары бар емделушілерге тағайындағанда сақ болу керек.

Флутиэйр-S 250 сарысудағы калий деңгейінің төмендеуіне бейімділігі бар емделушілерге сақтықпен тағайындау керек.

Кез-келген ингаляциялық ГКС, әсіресе жоғары дозаларын ұзақ уақыт қолданғанда жүйелі әсерлерді туғызуы мүмкін; алайда, пероральді ГКС-мен емдеуге қарағанда, мұндай симптомдардың туындау ықтималдығы анағұрлым төмен екендігін айта кету керек. Болуы мүмкін жүйелі әсерлеріне Кушинг синдромы, кушингоидтық белгілер, бүйрекүсті безі функциясының бәсеңдеуі, балалар мен жасөспірімдердегі өсудің тежелуі, сүйек тінінің минералдық тығыздығының төмендеуі, катаракта және глаукома жатады. Сондықтан, емдік әсеріне жеткен кезде, ингаляциялық ГКС дозасы ауру ағымын бақылауда ұстайтын ең төменгі тиімді дозасына дейін төмендетілуі әсіресе маңызды.

Стресс тудыруға қабілетті шұғыл және жоспарлы жағдайларда бүйрекүсті бездерінің бәсеңдеу мүмкіндігін үнемі есте сақтау және ГКС қолдануға дайын болу қажет.

Ингаляциялық ГКС-мен ұзақ уақыт емделіп жүрген балалардың өсуін ұдайы бақылап отыру ұсынылады.

Ингаляциялық флутиказон пропионатымен емдеуді бастағаннан кейін жүйелі ГКС біртіндеп тоқтату керек, және мұндай емделушілер өздерімен бірге стресс жағдайларында қосымша ГКС енгізу қажет болуы мүмкіндігі көрсетілген арнайы картаны алып жүруі тиіс.

Бүйрекүсті безінің бәсеңдеу мүмкіндігіне байланысты, пероральді ГКС-дан флутиказон пропионатымен ингаляциялық емге көшірілген емделушілерді ерекше сақтықпен емдеу және олардың бүйрекүсті безі қыртыстарының функциясын ұдайы бақылап отыру керек.

Ингаляциялық препараттар парадоксальді бронх түйілуін туғызуы мүмкін, оны тез арада жылдам әсер ететін ингаляциялық бронходилататордың көмегімен басу керек. Флутиэйр-S 250 дереу тоқтатып, емделушіні тексеру және баламалы ем тағайындау керек.

Ритонавир (Р450 CYP3А4 цитохромының тежегіші) флутиказон пропионатының қан плазмасындағы концентрациясын едәуір арттыруы мүмкін, бұл Кушинг синдромын және бүйреккүсті безі функциясының бәсеңдеуін қоса жүйелі әсерлердің дамуына алып келуі мүмкін. Сондықтан, егер емделуші үшін күтілетін пайдасы ГКС жүйелі жағымсыз әсерлерінің қаупінен асатын болса ғана, флутиказон пропионаты мен ритонавирді бір мезгілде қолдануға болады.

Дауыстың қарлығуы және ауыз қуысы мен жұтқыншақ кандидозы туындаса немесе алдын алу үшін, ингаляциядан кейін ауыз бен тамақты сумен шайып жіберу ұсынылады.

4 жастан 12 жасқа дейінгі балалар

4 жастан 12 жасқа дейінгі балалар үшін белсенді заттарының дозасы азайтылған Флутиэйр-S 100 қолданылады.

Жүктілік және лактация кезеңі

Препаратты жүктілік және лактация кезінде қолдану, анасы үшін күтілетін пайдасы ұрық немесе бала үшін болуы мүмкін кез-келген қауіптен асып түсетін жағдайда ғана ақталған.

Флутиэйр-S 250 препаратын ингаляциялық жолмен ұсынылған дозаларында енгізгенде оның плазмадағы концентрациясы өте төмен болғандықтан, сальметерол мен флутиказонның емшек сүтіндегі концентрациялары да елеусіз деп шамаланады, алайда бұл мәліметтерге клиникалық дәлелдер жоқ.

Дәрілік заттың көлік құралдарын және қауіптілігі зор механизмдерді басқару қабілетіне әсер ету ерекшеліктері

Ұсынылған дозада препарат көлік немесе қауіптілігі зор механизмдерді басқару қабілетіне әсер етпейді.

Артық дозалануы

Флутиэйр -S 250 препаратының артық дозалануы туралы ақпараттар жоқ.

Сальметерол мен флутиказон пропионатының жекелеген препараттарының артық дозалануы жөніндегі мәліметтер келтірілген.

Симптомдары: сальметеролдың артық дозалануы тремормен, бас ауыруымен, тахикардиямен, систолалық қысымның төмендеуімен және гиперкалиемиямен білінеді.

Флутиказон пропионатының ұсынылғанынан асатын дозалардағы ингаляциялары гипоталамус-гипофиз-бүйрекүсті безі жүйесінің уақытша бәсеңдеуіне алып келуі мүмкін. Бұл құбылыс дереу араласуды қажет етпейді, өйткені бүйрекүсті бездерінің функциясы бірнеше күн ішінде қалпына келеді.

Ұсынылатын дозаларынан ұзақ уақыт асыру бүйрекүсті бездері функциясының едәуір бәсеңдеуіне алып келуі мүмкін.

Емі: арнайы у қайтарғысы жоқ. Оңтайлы у қайтағылары кардиоселективті бета1-адреноблокаторлар болып табылады, бірақ оларды сыртартқысында бронх түйілуі бар емделушілерде сақтықпен қолдану керек. Егер Флутиэйр -S 250-ді сальметеролдың артық дозалануына байланысты тоқтатуға тура келсе, емделушіге сәйкесінше орынбасушы стероидты ем тағайындау қажет. Флутиказон пропионаты артық дозаланғанда Флутиэйр-S 250-мен емдеуді емдік әсерін ұстап тұру үшін жеткілікті дозаларда жалғастыра беруге болады.

Шығарылу түрі және қаптамасы

30 капсуладан ақ түсті пластик құтыларға салынған.

1 құты салынған картоннан жасалған жеке пәшкені медицинада

қолданылуы жөніндегі мемлекеттік және орыс тілдеріндегі нұсқаулықпен және №30 фасовкаға арналған ингалятормен бірге картоннан жасалған

пәшкеге салады.

2 құтыдан медицинада қолданылуы жөніндегі мемлекеттік және орыс тілдеріндегі нұсқаулықпен бірге картоннан жасалған пәшкеге салынады. 2 құтыдан препаратпен және ингалятормен бірге №60 фасовкаға арналған картоннан жасалған пәшкеге салады.

Сақтау шарттары

Құрғақ, жарықтан қорғалған жерде, 30 °С-ден аспайтын температурада сақтау керек.

Балалардың қолы жетпейтін жерде сақтау керек!

Сақтау мерзімі

2 жыл

Препаратты қаптамасында көрсетілген жарамдылық мерзімі өткеннен кейін пайдалануға болмайды.

Дәріханалардан босатылу шарттары

Рецепт арқылы

Өндіруші

«Sava Mediсa Ltd», Үндістан

At: 508, G.I.D.C Estate, Wadhwan City-363 035, Dist. Surendranagar, Gujarat.

Тіркеу куәлігінің иесі

«Sava Mediсa Ltd», Үндістан

Қазақстан Республикасы аумағында тұтынушылардан өнім (тауар) сапасына қатысты шағымдарды қабылдайтын ұйымның мекенжайы:

TOO «Forhealth Pharmaceuticals»

050010, Қазақстан Республикасы, Алматы қ., Толе би к-сі, 23А үй