Фамотидин-АКОС (0.02 г)
Инструкция
-
русский
-
қазақша
Саудалық атауы
ФАМОТИДИН-АКОС
Халықаралық патенттелмеген атауы
Фамотидин
Дәрілік түрі
Қабықпен қапталған 0,02 г және 0,04 г таблеткалар
Құрамы
Бір таблетканың құрамында
белсенді зат – фамотидин 0,02 г және 0,04 г,
қосымша заттар: лактоза, кросповидон, тальк, кальций стеараты, гипромеллоза, жүгері крахмалы,
қабықтың құрамы: гипромеллоза, титанның қостотығы (Е 171), макрогол 4000, пропиленгликоль, тальк
Сипаттамасы
Үлбірлі қабықпен қапталған, сұрғыш реңді ақ түсті, дөңгелек, екі жақ беті дөңес таблеткалар. Көлденең кесіндісінде екі қабат көрінеді, ішкі қабаты ақ түсті дерлік.
Фармакотерапиялық тобы
Ойық жараға қарсы препараттар және гастроэзофагеальді рефлюксті (GORD) емдеуге арналған препараттар. Н2–гистаминдік рецепторлар бөгегіштері
АТХ коды А02ВА03
Фармакологиялық қасиеттері
Фармакокинетикасы
Препаратты ішу арқылы қабылдаған кезде плазмада фамотидин ең жоғары деңгейге 1-3.5 сағаттан соң жетеді, мұндайда бір рет қабылданатын 40 мг дозаны қабылдағаннан кейін бұл ең жоғары дегенде 0.070-0.100 мг/л-ге жуықты құрайды. Фамотидиннің биологиялық жетімділігі 43%-ға жуықты құрайды және тағамға байланысты емес. Плазма ақуыздарымен байланысуы – 15-20%. Ең жоғары концентрацияға жету үшін қажетті уақыты – 1-3 сағат. Жұлын сұйықтығына, плацентарлы бөгет арқылы және емшек сүтіне өтеді.
Жартылай шығарылу кезеңі – 2.5 - 3.5 сағат; бүйрек қызметінің жеткіліксіздігі ауыр (креатинин клиренсі минутына 10 мл-ден төмен) емделушілерде 20 сағатқа дейін артады (дозаны түзету қажет етіледі). Препараттың 30–35%-ы бауырда метаболизденіп, S-оксид түзеді.
Шумақтық сүзілу және өзекшелік секреция жолымен бүйректер арқылы шығарылады. Ішке қабылданған дозаның 25–30%-ы несептен өзгермеген күйінде табылады.
Фармакодинамикасы
Фамотидин-АКОС ІІІ буынды Н2-гистаминдік рецепторлардың бөгегіші болып табылады. Базальді және гистаминмен, гастринмен және ацетилхолинмен стимуляцияланған тұз қышқылының өндірілуін басады. Тұз қышқылы өнімінің төмендеуімен және рН мәнінің артуымен бір мезгілде пепсиннің белсенділігі де төмендейді.
Асқазанның шырышты қабығының қорғаныш механизмін асқазан шырышының түзілуі мен ондағы гликопротенидер мөлшерінің артуы, сондай-ақ гидрокарбонат секрециясының стимуляциясын және онда Рg эндогендік синтезін күшейтеді, оның зақымдарының (соның ішінде стрестік ойық жаралардың тыртықтануы) жазылуына және асқазан-ішектік қан кетудің тоқтауына мүмкіндік жасайды. Бауырда Р450 цитохромының оксидазалық жүйесін аздап басады.
Бір рет қабылдаған кезде препараттың әсер ету ұзақтығы дозаға байланысты болады және 12 сағаттан 14 сағатқа дейінді құрайды.
Қолданылуы
- асқазан мен он екі елі ішектің ойық жара ауруын емдеуге және алдын алуға
- асқазан-ішек жолының (АІЖ) операциядан кейінгі стрестік ойық жарасында
- эрозиялық гастродуоденитте
- асқазанның секреторлық қызметінің жоғарылауымен астасқан, функциональді диспепсияда
- рефлюкс-эзофагитте
- Золлингер-Эллисон синдромында
- асқазан-ішек жолының жоғары бөлімдерінен қан кету қайталанғанда
- жалпы анестезия арқылы операция жасалатын науқастарда асқазан сөлі аспирациясының алдын алуға (Мендельсон синдромында)
Қолдану тәсілі және дозалары
Ішке. Асқазан мен 12-елі ішектің ойық жара ауруы асқынғанда – ұйқыға жатар алдында 40 мг-дан тәулігіне 1 рет немесе 20 мг-дан тәулігіне 2 рет. Қажет болған кезде тәуліктік дозаны 80-160 мг-ға дейін арттыруға болады. Емделу курсы – 4-8 апта.
Асқазанның секреторлық қызметінің жоғарылауына байланысты болатын диспепсияларда 20 мг-дан тәулігіне 1-2 рет тағайындайды. Ойық жаралардың қайталануының алдын алу үшін ұйқыға жатар алдында 20 мг-дан тәулігіне 1 ретке тағайындайды. Рефлюкс-эзофагитте 6-12 апта ішінде тәулігіне екі рет 20-40 мг. Золлингер-Эллисон синдромында препарат дозасын және емдеу курсының ұзақтығын әр адамда жекелей белгілейді. Бастапқы дозасы әдетте әрбір 6 сағат сайын 20 мг құрайды және әрбір 6 сағат сайын 160 мг-ға дейін арттырылуы мүмкін. Жалпы анестезияда асқазан сөлінің аспирациясының алдын алу үшін операция алдында кешке және/немесе таңертең 40 мг тағайындайды. Фамотидин таблеткаларын шайнамай, судың мол мөлшерімен ішіп жұтқан жөн.
Бүйрек қызметінің жеткіліксіздігінде, егер креатинин клиренсі минутына 30 мл-ден төмен немесе қан сарысуында креатинин мөлшері 3 мг/100 мл-ден астам болса, препараттың тәуліктік дозасын 20 мг-ға дейін азайту қажет.
Балаларға қолданылуы
Осы препараттың балаларға қолданудың қауіпсіздігі және тиімділігі анықталған жоқ.
Жағымсыз әсерлері
Кейде
- есекжем, тері бөртпесі, қышыну
- бронхтың түйілуі, терінің құрғақтығы
- ауыз ішінің құрғауы, жүректің айнуы, құсу, тәбеттің төмендеуі, іштің ауыруы, іш қату, диарея
- ұйқышылдық, ұйқысыздық
- үлкен дозаларды ұзақ уақыт қабылдағанда потенцияның және либидоның төмендеуі
Сирек
- ангионевротикалық ісіну, көп пішінді эритема, эксфолиативті дерматит, Стивенс-Джонсон синдромы, уытты эпидермальді некролиз, анафилактикалық шок
- алопеция, гинекомастия
- гепатоцеллюлярлық, холестатикалық немесе аралас гепатит, жедел панкреатит
- бас ауыру, астения, шаршағыштық, мазасыздық, депрессия, күйгелектік, психоз, бас айналу, сананың шатасуы, елестеулер
- гипертермия
- артериялық қысымның төмендеуі, брадикардия, атриовентрикулярлы бөгеліс, аритмия
- васкулит
- нейтропения, гемолитикалық анемия
- құлақ ішінің шуылдауы
- артралгия, миалгия
Өте сирек
- «бауыр» трансаминазасы белсенділігінің жоғарылауы, сарғаю
- лейкопения, тромбоцитопения, агранулоцитоз, панцитопения
Қолдануға болмайтын жағдайлар
- препарат компоненттеріне әр адамның жекелей асқын сезімталдығы
- балалар және жасөспірімдер (18 жасқа дейін)
- тұқым қуалаған галактоза жақпаушылығы, лактаза жеткіліксіздігі немесе глюкоза-галактоза мальабсорбциясы
- жүктілік және лактация кезеңі
Дәрілермен өзара әрекеттесуі
Фамотидин-АКОС амоксициллиннің және клавулан қышқылының сіңуін арттырады. Антацидтер және сукральфат сіңуін баяулатады. Итраконазолдың және кетоконазолдың сіңуін азайтады. Сүйек кемігінің қызметін төмендететін дәрілік заттар нейтропенияның пайда болу қаупін арттырады.
Айрықша нұсқаулар
Сақтықпен: асқазан карциномасына байланысты симптомдарды жасыруы мүмкін, сондықтан емдеуді бастар алдында қатерлі жаңа түзілімдердің бар-жоқтығын анықтау қажет. Кенеттен тоқтатқан кезде «рикошет» синдромының пайда болу қаупіне байланысты препаратты біртіндеп тоқтатады.
Бауыр және/немесе бүйрек қызметінің жеткіліксіздігі, портожүйелік энцефалопатиясы (сыртартқысында) бар бауыр циррозы, иммунитет тапшылығы.
12 елі ішектің ойық жаралы ауруының симптомдары 1-2 аптаның ішінде жоғалуы мүмкін, емдеуді тыртықтануы эндоскопиялық немесе рентгенологиялық зерттеу деректерімен айғақталғанша жалғастырған жөн.
Әлсіз науқастарды, сондай-ақ күйзелісте ұзақ уақыт емдеген кезде асқазанда бактериялық зақымдану болуы мүмкін, ол жұқпаның таралуына ұласады.
Н2-гистаминдік рецепторлардың бөгегіштерін итраконазолдың немесе кетоконазолды қабылдағаннан кейін, олардың сіңуінің елеулі азаюына жол бермеу үшін, 2 сағаттан соң қабылдаған жөн.
Пентагастриннің және гистаминнің асқазанның қышқыл түзетін қызметіне ықпал етуіне қарсы әсер етеді, сондықтан 24 сағат ішінде мұның алдындағы тесттегі Н2-гистаминдік рецепторлар бөгегіштерін қолдануға болмайды.
Гистаминге тері реакциясын басып, осылайша, жалғантеріс нәтижелерге әкеп соғады (дереу типтегі аллергиялық тері реакцияларын анықтау үшін диагностикалық тері сынамаларын жүргізер алдында Н2-гистаминдік рецепторлар бөгегіштерін қолдануды тоқтату керек).
Емделу кезінде асқазанның шырышты қабығын тітіркендіретін тағамдық өнімдерді, сусындарды және басқа да дәрілік заттарды қолданбаған жөн.
Препараттың асқазанда қышқылдың түнгі секрециясын тежеу тиімділігі темекі тарту нәтижесінде төмендеуі мүмкін.
Күйік шалған науқастарда клиренсінің жоғарылауы салдарынан препарат дозасын арттыру қажет етілуі мүмкін.
Дәрілік заттың көлікті немесе қауіпті механизмдерді басқару қабілетіне ықпал ету ерекшеліктері
Фамотидин-АКОС препаратын қолданған кезде мыналар пайда болуы мүмкін: бас айналу, сананың шатасуы, елестеулер, ұйқышылдық, осыған байланысты, емделу кезінде көлікті немесе қауіпті механизмдерін басқаруды тоқтата тұрған жөн.
Артық дозалануы
Симптомдары: құсу, қимыл-қозғалыс қозуы, діріл, артериялық қысымның төмендеуі, тахикардия, коллапс.
Емдеу: ішу арқылы қабылдаған кезде құсуды индукциялау немесе/және асқазанды шаю, симптоматикалық және демеуші ем.
Шығарылу түрі және қаптамасы
Қабықпен қапталған 0,02 г және 0,04 г таблеткалар.
Поливинилхлоридті үлбірден және алюминий фольгадан жасалған пішінді ұяшықты қаптамада 10 таблеткадан.
Пішінді ұяшықты 2 қаптама қолданылуы жөнінде мемлекеттік және орыс тілдеріндегі нұсқаулықпен бірге картон пәшкеге салынған.
Сақтау шарттары
Құрғақ, жарықтан қорғалған жерде, 25С-ден аспайтын температурада сақтау керек.
Балалардың қолы жетпейтін жерде сақтау керек!
Сақтау мерзімі
3 жыл
Жарамдылық мерзімі өткеннен кейін пайдалануға болмайды.
Дәріханадан босатылу шарттары
Рецепт арқылы
Өндіруші
«Синтез» ААҚ.
Ресей Федерациясы, 640008, Қорған қ-сы, Конституция даңғылы, 7.
тел./факс (3522) 48-16-89
Тіркеу куәлігінің иесі
"Синтез" ААҚ, Ресей Федерациясы
Тұтынушылардан өнім сапасы жөнінде шағымдарды Қазақстан Республикасы аумағында қабылдайтын ұйымның мекенжайы
«СТОФАРМ» ЖШС, 000100, Қазақстан Республикасы,
Қостанай облысы, Қостанай қ-сы, Уральская к-сі, 14
тел. 714 228 01 79