Тессирон®
Инструкция
-
русский
-
қазақша
Саудалық атауы
Тессирон®
Халықаралық патенттелмеген атауы
Клопидогрел
Дәрілік түрі
Үлбірлі қабықпен қапталған 75 мг таблеткалар
Құрамы
Бір таблетканың құрамында
белсенді заттар – 97.857 мг клопидогрел бисульфаты
(75 мг клопидогрел негізіне баламалы),
қосымша заттар: кремнийдің коллоидты сусыз қостотығы, төмен орын басу дәрежесімен гидроксипропилцеллюлоза, сусыз лактоза, натрий кроскармеллозасы, глицерол дибегенаты,
қабықтың құрамы: Опадрай II сары 31K32672**, құрамында: гипромеллоза 2910 түрі, лактоза моногидраты, титанның қостотығы (Е 171), триацетин, темірдің сары тотығы (E 172), тазартылған су
Сипаттамасы
Дөңгелек пішінді, екі жақ беті дөңес, сары түсті үлбірлі қабықпен қапталған таблеткалар.
Фармакотерапиялық тобы
Тромбоциттер агрегациясының тежегіштері.
АТЖ коды B01A C04
Фармакологиялық қасиеттері
Фармакокинетикасы
75 мг дозада ішке қабылдағаннан кейін клопидогрел асқазан-ішек жолынан (АІЖ) жылдам сіңеді. Биожетімділігі - жоғары. Дегенмен клопидогрелдің қан плазмасындағы концентрациясы төмен және қабылдағаннан кейін 2 сағаттан соң-ақ ол сандық анықталу шегінен төмен болады (0,025 мкг/л). Сіңуі клопидогрел метаболиттерінің бүйректік сөлінісінің деректері бойынша кемі 50 % құрайды.
Клопидогрел және оның негізгі метаболиті қан плазмасының ақуыздарымен қайтымсыз байланысады (тиісінше 98 % және 94 %).
Клопидогрел бауырда белсенді метаболизденеді. Негізгі метаболиті – фармакологиялық тұрғыда белсенді емес – карбоксил қышқылының туындысы, қан плазмасында айналысқа түсетін заттың 85 %-ға жуығын құрайды, 75 мг дозада ішке қайталап қабылдағаннан кейін ең жоғарғы концентрациясына жету уақыты (ТСmax) 1 сағаттан соң жүзеге асады (ең жоғарғы концентрациясы - 3 мг/л-ге жуық).
Клопидогрел – ізашар дәрі, белсенді метаболит, тиол туындысы, клопидогрелдің 2-тотық-клопидогрелге дейін тотығып, әріқарай гидролизденуі арқылы түзіледі. Клопидогрелдің тотығуы тікелей Р450 цитохромының 2В6 және 3А4 изоферменттерінің және аз дәрежеде – 1А1, 1А2 және 2С19 изоферменттерінің көмегімен жүреді. Іn vitro бөлініп шыққан белсенді тиол метаболиті тромбоциттердің рецепторларымен, олардың агрегациясын бәсеңдете отырып, жылдам және қайтымсыз байланысады. Бұл метаболит қан плазмасында анықталмайды. Клопидогрелдің 50-150 мг аралығындағы дозалар кеңдігінде негізгі метаболиттің фармакокинетикасы дозаға байланысты болып табылады (қан плазмасындағы концентрациялары дозаға пропорционал арта түседі).
Ішке қабылдағаннан кейін қабылданған дозаның 50 %-ға жуығы бүйрекпен және 46 %-ы ішек арқылы 120 сағат ішінде шығарылады.
Ішке бір рет және қайталап қабылдағаннан кейінгі негізгі метаболиттің (T1/2) жартылай шығарылу кезеңі - 8 сағат. Бүйрекпен бөлініп шығатын метаболиттерінің концентрациялары – 50 %.
Ерекше клиникалық жағдайлардағы фармакокинетикасы
Негізгі метаболиттің қан плазмасындағы концентрациясы 75 жастан асқан емделушілерде, дені сау жас адамдардағы осындай көрсеткішпен салыстырғанда, айтарлықтай жоғары. Дегенмен қан плазмасындағы едәуір жоғары концентрациялар тромбоциттер агрегациясындағы және қан кету ұзақтығындағы өзгерістермен қатар жүрмейді.
Қан плазмасындағы негізгі метаболиттің концентрациясы препаратты тәулігіне 75 мг дозада қабылдағаннан кейін ауыр дәрежелі бүйрек жеткіліксіздігі бар (креатинин клиренсі (КК) 5-15 мл/мин) емделушілерде, орташа ауырлық дәрежесіндегі бүйрек жеткіліксіздігі бар (КК минутына 30-дан 60 мл-ге дейін) емделушілермен салыстырғанда, төмен. АДФ-тәуелді тромбоциттер агрегациясының тежелуі, дені сау еріктілердегі осындай көрсеткішпен салыстырғанда, төмен (25 %) болса да, қан кету ұзақтығы дәл клопидогрелді тәулігіне 75 мг дозада алатын дені сау еріктілердегідей дәрежеде ұзарады.
Фармакодинамикасы
Агрегантқа қарсы дәрі; тромбоциттер агрегациясының ерекше және белсенді тежегіші; коронарлық дилатациялайтын әсер көрсетеді. Тессирон® аденозиндифосфаттың (АДФ) тромбоциттердің бет қабатында орналасқан рецепторлармен байланысуын және IIb/IIIа кешенінің GP кешенінің белсенділенуін іріктеп бөгейді, осылайша, тромбоциттер агрегациясын бәсеңдетеді. Сонымен қатар бұл басқа факторлардың ықпал етуімен тромбоциттер агрегациясының тежелуіне әкеледі; әрбір белсенділенген тромбоцитте өндірілетін АДФ әсері төмендейді, әрі қалған тромбоциттердің агрегациясы көтермеленеді. Препарат фосфодиэстеразаның белсенділігіне ықпал етпейді. Тессирон® тромбоциттер бүкіл өмір бойына қызмет атқарусыз қалып, ал қалыпты қызметтің жаңғыруы тромбоциттер жаңарғаннан кейін (шамамен 7 күннен соң) жүретініне байланысты тромбоциттердің АДФ-рецепторларын қайтымсыз өзгертеді. Тромбоциттер агрегациясының статистикалық маңызды және дозаға тәуелді тежелуі Тессиронның® бір реттік дозасын ішке қабылдағаннан кейін 2 сағаттан соң байқалады. 75 мг дозаны қайталап қабылдау тромбоциттер агрегациясының едәуір тежелуіне әкеледі. Тиімді әсері үдемелі күшейеді, тұрақтанған ахуалға да 3-7 күннен соң қол жеткізіледі. Осы орайда 75 мг дозаның әсер етуімен агрегация тежелісінің орташа деңгейі 40-60 % құрайды. Тромбоциттер агрегациясы және қан кету уақыты Тессиронды® қабылдауды тоқтатқаннан кейін, орташа алғанда, 7 күннен соң бастапқы деңгейге оралады.
Қолданылуы
Мыналардағы атеротромботикалық асқынулардың алдын алу:
- миокард инфарктісін (бірнеше күннен 35 күнге дейінгі уақыттан бергі), ишемиялық инсультті (7 күннен 6 айға дейінгі уақыттан бергі) өткерген емделушілерде немесе аяқ қан тамырларының облитерациялық атеросклерозында
- жедел коронарлық синдромы бар емделушілерде (ацетилсалицил қышқылымен біріктіріп):
- ST сегментінің көтерілуінсіз (тұрақсыз стенокардия немесе Q тісінің қалыптасуынсыз миокард инфарктісі), тері арқылы коронарлық араласу кезінде стенттеу жүргізілген емделушілерді қоса
- ST сегментінің көтерілуімен (жедел миокард инфарктісі) дәрі-дәрмекпен емдегенде және тромболитикалық ем жүргізу мүмкіндігінде
Қолдану тәсілі және дозалары
Ересектер мен 75 жастан асқан емделушілер:
Тессирон® ас ішуге байланыссыз ішке қабылдайды.
Миокард инфарктісінде, ишемиялық инсультте және аяқ қан тамырларының облитерациялық атеросклерозында: препаратты тәулігіне бір рет 75 мг-ден қабылдайды.
Жедел коронарлық синдромда:
ST сегментінің көтерілуінсіз (тұрақсыз стенокардия немесе Q тісінсіз миокард инфарктісі) Тессирон® препаратымен емдеуді 300 мг (4 таблетка) жүктеу дозасын бір дүркін қабылдаудан бастап, сосын препаратты тәулігіне бір рет 75 мг дозада (тәулігіне 75-100 мг дозадағы ацетилсалицил қышқылымен қосып) қабылдауды жалғастырған жөн. Ацетилсалицил қышқылының жоғарырақ дозаларын қолдану жоғары қан кету қаупімен байланысты болғандықтан, ацетилсалицил қышқылының ұсынылған дозасы 100 мг-ден аспауға тиіс. Ең жоғарғы емдік әсері емдеудің үшінші айына қарай дамиды. Емдеу курсы - 1 айға дейін.
ST сегментінің көтерілуімен (ST сегментінің көтерілуімен жедел миокард инфарктісі): Тессирон® тромболитикалық дәрілермен қосылған немесе онсыз ацетилсалицил қышқылымен біріктірілген жүктеу дозасынан бастап, тәулігіне бір дүркін 75 мг дозада қолданылады. 75 жастан асқан емделушілерді Тессиронмен® емдеу жүктеу дозасын қабылдамай-ақ басталуға тиіс. Біріктірілген ем аурудың белгілері білінгеннен кейін мүмкіндігінше ертерек басталып, кем дегенде, төрт апта жалғасуға тиіс. Тессирон® мен ацетилсалицил қышқылын 4 аптадан артық біріктіріп қолданудың тиімділігі мен қауіпсіздігі зерттелген жоқ.
Жағымсыз әсерлері
Жиі (≥1/100 - <1/10)
- диарея, іштің ауыруы, диспепсия, асқазан-ішектік қан кетулер
- гематома, қанталаулар
- қан аралас қақырық
Жиі емес (>1/1000, <1/100)
- бас ауыруы, бас айналуы, парестезиялар, бассүйекішілік қан құйылулар (өлім-жітімді бірнеше жағдайлар жөнінде хабарламалар бар)
- гастрит, құсу, жүрек айнуы, іш қату, метеоризм, асқазанның және он екі елі ішектің ойық жаралары
- лейкопения, нейтропения және эозинофилия
- тері бөртпесі, қышыма, терілік қан құйылулар (пурпура)
- гематурия
Сирек (≥1/10000 - <1/1000)
- ішперде сыртындағы қан кетулер
- буллездік дерматит (уытты эпидермалық некролиз, Стивенс-Джонсон синдромы, мультиформалы эритема), ангионевротикалық ісіну, эритематоздық бөрту, есекжем, экзема, жалпақ теміреткі
- қаңқа-бұлшықеттік қан кету (гемартроздар), артрит, артралгия, миалгия
- гломерулонефрит, қандағы креатинин концентрациясының артуы
- дене температурасының көтерілуі
Өте сирек (<1/10000)
- елестеулер, сананың шатасуы
- дәм сезудің бұрмалануы, стоматит, асқазан-ішектік және ішперде сыртындағы өлім-жітімді қан кетулер, панкреатит, колит (соның ішінде ойық жаралы немесе лимфоцитарлық)
- бауыр қызметі көрсеткіштерінің бұзылуы, гепатит (жұқпалы емес), жедел бауыр жеткіліксіздігі
- геморрагиялар, операциядан кейінгі жаралардың қанағыштығы, васкулит, артериялық қысымның айқын төмендеуі
- айқын тромбоцитопения (тромбоциттер саны 30 х 109/л-ден аз), агранулоцитоз, гранулоцитопения, апластикалық анемия/панцитопения, анемия
- сарысу құю ауруы, анафилактикалық реакциялар
- тыныс алу жолдарынан қан кету (қан қақыру, өкпеден қан кету), бронх түйілуі, интерстициальді превмонит
Қолдануға болмайтын жағдайлар
- белсенді затқа және препараттың басқа құрамдас бөліктеріне жоғары сезімталдықта
- айқын бауыр жеткіліксіздігінде
- жедел қан кету немесе жоғары қан кету қаупі, геморрагиялық инсультті және АІЖ-ның белсенді ойық жаралы зақымдануларын қоса
- сирек тұқым қуалайтын галактозаны көтере алмаушылық, лактаза тапшылығы және глюкоза-галактоза мальабсорбциясы синдромында
- геморрагиялық диатезде
- жүктілік және лактация кезеңде
- 18 жасқа дейінгі балалық кезеңде
Сақтықпен: орташа бауыр және/немесе бүйрек жеткіліксіздігінде; қан кетудің даму қаупін арттыратын патологиялық ахуалдарда (соның ішінде жарақат, хирургиялық араласулар); қан кетудің дамуына бейімділік болатын ауруларда (әсіресе, асқазан-ішектік немесе көзішілік); қабынуға қарсы стероидтық емес препараттарды, варфаринді, гепаринді және IIb/IIIa гликопротеинінің тежегіштерін бір мезгілде қабылдауда (циклоксигеназа-2 (ЦОГ-2) тежегіштерін қоса)
Дәрілермен өзара әрекеттесуі
Варфарин: Тессиронмен® бір мезгілде қабылдау қан кету қарқынын арттыруы мүмкін, сондықтан бұл біріктірілімді қолдану ұсынылмайды. Гликопротеин IIb/IIIa тежегіштері: гликопротеин IIb/IIIa тежегіштерін Тессиронмен® бірге қолдану жоғары қан кету қаупі бар емделушілерде сақ болуды талап етеді (жарақаттануда және хирургиялық араласуларда немесе басқа патологиялық ахуалдарда).
Ацетилсалицил қышқылы (АСҚ): ацетилсалицил қышқылы тромбоциттердің Тессиронмен® АДФ-индукцияланған агрегациясының тежелуіне әсерін тигізбейді, бірақ Тессирон® тромбоциттердің ацетилсалицил қышқылымен коллаген-индукцияланған агрегациясына АСҚ-ның әсерін көтермелейді. Соның өзінде, АСҚ-ын 500 мг дозада бір күннің ішінде тәулігіне екі рет бір мезгілде қабылдау Тессиронды® қабылдаудан туындайтын қан кету уақытын аса ұзартпайды. Тессирон® мен АСҚ арасында жоғары қан кету қаупіне әкелетін фармакодинамикалық өзара әрекеттесу болуы мүмкін. Осыны ескеріп, бұл препараттарды бір мезгілде қабылдағанда сақ болған дұрыс.
Гепарин: Тессирон® мен гепаринді бір мезгілде қолдану соңғысының дозасын реттеуді қажет етпейді және Тессиронның® агрегантқа қарсы әсеріне ықпал етпейді, дегенмен мұндай біріктірілімнің қауіпсіздігі әлі анықталған жоқ, яғни бұл препараттарды бір мезгілде қолдану сақ болуды талап етеді.
ҚҚСП: Тессирон® мен ҚҚСП-ның бір мезгілде тағайындалуы асқазан-ішек жолы ойық жараларының және ойық жаралы қан кетулердің даму қаупін арттырады. Сондықтан ЦОГ-2-ні қоса, ҚҚСП бір мезгілде қолданылғанда сақтық шарасын қадағалау керек.
Басқа препараттармен бір мезгілде қабылдау
Атенололмен, ангиотензинді өзгертуші фермент (АПФ) тежегіштерімен, гиполипидемиялық дәрілермен, нифедипинмен, дигоксинмен, фенобарбиталмен, циметидинмен, эстрогендермен, немесе теофиллинмен бір мезгілде қолданғанда болатын клиникалық елеулі өзара әрекеттесулер анықталған жоқ.
Тессирон® Р450 цитохромы жүйесі CYР2C9 изоферментінің белсенділігін осы изоферменттің (фенитоин, толбутамин) қатысуымен метаболизденетін препараттармен бір мезгілде қолданғанда тежейді, олардың қан плазмасындағы концентрацияларының артуы мүмкін. Антацидтер Тессиронның® сіңуіне ықпал етпейді.
Айрықша нұсқаулар
Тессиронмен® емдегенде, әсіресе емнің алғашқы апталары кезінде және/немесе инвазивтік кардиологиялық емшаралардан/хирургиялық араласулардан кейін емделушілерге қан кету, әсіресе оның жасырын нышандарының бар-жоғын тексеру тұрғысынан мұқият қадағалау жүргізу қажет.
Қан кетудің пайда болуына күдік тудыратын клиникалық белгілер білінгенде шұғыл клиникалық қан талдауын жасап, ішінара белсенділенген тромбопластикалық уақытты (ІБТУ) анықтау қажет; тромбоциттердің саны, тромбоциттердің қызметтік белсенділігінің көрсеткіштері және басқа қажет болатын зерттеулер.
Тессиронды® жарақаттанудан, хирургиялық араласулардан кейінгі немесе басқа патологиялық жай-күйлердің нәтижесінде жоғары қан кету қаупі бар емделушілерде, сондай-ақ АСҚ-ын, гепаринді, гликопротеин IIb/IIIa тежегіштерін немесе ҚҚСП, соның ішінде ЦОГ-2 тежегіштерін алатын емделушілерде сақтықпен қолдану қажет. Тессиронмен® емдеу жоспарланған хирургиялық араласуға дейін (стоматологиялық емшараларды қоса), ең кемі, 7 күн бұрын тоқтатылуға тиіс. Емделушілер кез келген инвазиялық операцияны өткізу алдында және кез келген жаңа препараттарды қабылдамас бұрын дәрігерлерді (соның ішінде стоматологты) Тессирон® препаратын қабылдайтыны жөнінде хабарландыруға тиіс. Тессирон® мен ішке қабылданатын антикоагулянттарды бір мезгілде қолдану, қан кету қарқынының күшеюі мүмкін болғандықтан, ұсынылмайды.
Тессирон® қан кету уақытын ұзартады, сондықтан да препарат қан кету қатері жорамалданатын аурулары бар (әсіресе, АІЖ және көзішілік) емделушілерде сақтықпен қолданылуға тиіс. Емделушілерді Тессиронды® қабылдау аясында (монотерапия түрінде немесе АСҚ-мен біріктіріп) қан кетуді тоқтатуға көбірек уақыт қажет болуы мүмкін екенін және кез келген әдеттен тыс қан кету (оқшаулығы немесе ұзақтығы бойынша) жөнінде дәрігерге хабарлауға тиіс екенін ескерту керек.
Өте сирек жағдайларда Тессиронды® қабылдау аясында (кейде тіпті ұзаққа созылмайтын) тромботикалық тромбоцитопениялық пурпура (ТТП) дамыған. ТТП неврологиялық бұзылыстармен, бүйрек қызметінің бұзылуымен немесе қызбамен қосылған тромбоцитопениямен және микроангиопатиялық гемолитикалық анемиямен сипатталады. ТТП – емделушінің өміріне зор қауіп төндіретін және плазмофорез қамтылған шұғыл емді талап ететін ахуал.
Тессиронды® жедел ишемиялық инсульттен кейінгі алғашқы 7 күн ішінде қолдану ұсынылмайды (клиникалық деректер жеткіліксіз).
Аздап кесіп кеткен (мысалы, қырынғанда) және жарақаттанған жағдайда, әдетте, қандай да бір арнайы шара қолдану талап етілмейді. Тессиронды® сирек тұқым қуалаған галактозаны көтере алмаушылығы, лактаза тапшылығы және глюкоза-галактоза мальабсорбциясы синдромы бар емделушілер қабылдамау (препарат құрамында лактоза моногидраты бар болғандықтан) керек.
Дәрілік заттың көлік құралын немесе қауіптілігі зор механизмдерді басқару қабілетіне әсер ету ерекшеліктері
Тессирон® көлік құралдарын жүргізу және жоғары зейін шоғырландыруды талап ететін механизмдермен жұмыс істеу қабілетіне айтарлықтай әсер етпейді.
Артық дозаланғанда
Белгілері: қан кетумен байланысты асқынуларға әкелуі ықтимал қан кету уақытының ұзаруы мүмкін.
Емдеу: қан кету уақытын шұғыл реттеу қажет болғанда тромбоцитарлық масса құю жүргізіледі. Клопидогрелдің фармакологиялық әсеріне арнайы у қайтарғы жоқ.
Шығарылу түрі және қаптамасы
14 таблеткадан ПВХ/ПТФХЭ/ПВХ және алюминий фольгадан жасалған пішінді ұяшықты қаптамада.
1 немесе 2 пішінді қаптамадан медицинада қолданылуы жөніндегі мемлекеттік және оырс тілдеріндегі нұсқаулықпен бірге картон пәшкеге салады.
Сақтау шарттары
Түпнұсқалық қаптамасында, жарық пен ылғалдан қорғалған жерде
15 оС-ден 25 оС-ге дейінгі температурада сақтау керек.
Балалардың қолы жетпейтін жерде сақтау керек!
Сақтау мерзімі
2 жыл
Жарамдылық мерзімі өткеннен кейін пайдалануға болмайды!
Дәріханалардан босатылу шарттары
Рецепт арқылы
Өндіруші
«Гедеон Рихтер Румыния» АҚ., Румыния
Тіркеу куәлігі иесінің атауы мен елі
«Гедеон Рихтер» ААҚ, Венгрия
Қазақстан Республикасы аумағында тұтынушылардан өнім сапасына қатысты шағымдар қабылдайтын ұйымның мекенжайы:
ҚР-дағы «Гедеон Рихтер» ААҚ өкілдігі
E-mail: richter@nursat.kz
Телефон: 8-(727)-258-26-22, 8-(727)-258-26-23
8