Синэстрол-Биофарма (0,1%)

• русский
• қазақша

• Скачать инструкцию медикамента

Саудалық атауы

Синэстрол-Биофарма

Халықаралық патенттелмеген атауы

Гексэстрол

Дәрілік түрі

Инъекцияға арналған 0,1% және 2% 1 мл майлы ерітінді

Құрамы

1 мл ерітіндінің құрамында

белсенді зат – құрғақ затқа шаққанда 1 мг немесе 20 мг гексэстрол,

қосымша зат – рафинадталған зәйтүн майы.

Сипаттамасы

Ашық-сарыдан жасыл-сарғыш түске дейінгі мөлдір майлы сұйықтық

Фармакотерапиялық тобы

Жыныс гормондары және жыныс жүйесінің модуляторлары. Эстрогендер. Синтетикалық эстрогендер.

АТХ коды G03СВ

Фармакологиялық қасиеттері

Фармакокинетикасы

Сіңуі – жоғары, бауыр арқылы алғашқы өту әсері бар. Бүйрекпен шығарылады.

Фармакодинамикасы

Гексэстрол – стероидты емес құрылымның синтетикалық эстрогенді препараты , стильбен туындысы. Эстрогендік белсенділігі бойынша табиғи эстрогенге тең. Өзіндік эстрогенді әсер етеді: эндометрия пролиферациясы үдерісін белсендіреді, жатырдың және әйелдердің екіншілік жыныстық белгілерін олар толық жетілмегенде дамуын көтермелейді, климактериялық кезеңде немесе гинекологиялық операциялардан кейін жыныс бездері функциясы жеткіліксіздігіне байланысты әйел организмінде туындайтын жалпы бұзылыстарды бәсеңдетеді әрі жояды және остеопороз дамуының алдын алады.

Қолданылуы

- функция жеткіліксіздігімен байланысты гипогенитализмде

- алғашқы және екіншілік аменореяда, олигоменореяда, дисменореяда

- жыныс мүшелері гипоплазиясында

- климактериялық бұзылыстарда

- 60 жастан асқан әйелдердегі сүт безінің обыры (кешенді ем құрамында)

- ерлердегі қуық асты безінің обыры (кешенді ем құрамында).

Қолдану тәсілі және дозалары

Ересектерге қолданылады. Препараты бар ампуланы пайдаланар алдында су бұлауында сәл қыздырады (30-40ºС-ге дейін). Кристалдар шөккен жағдайда ампуланы толық еріп кеткенше қайнаған бұлауда қыздырады. Бұлшықет ішіне енгізеді.

Аналық без функциясы жеткіліксіздігімен байланысты гипогенитализм және жатыр толықтай жетілмеген кезде – 1-2 мг-ден күн сайын (1 - 2 мл) 4-6 апта және одан асатын уақыт бойы (0,1 % ерітінді).

Салдарлы аменореяда – күніне 1-2 мг-де 15-20 күн бойы.

Гипоолигоменореяда – 1 мг-ден етеккіраралық кезеңнің алғашқы жартысы бойына күн сайын немесе күнара бұлшықет ішіне.

Бұлшықет ішіне енгізуге арналған жоғары доза: бір реттік 2 мг (2 мл) 0,1 % ерітінді, тәуліктік доза – 3 мг (3 мл) 0,1 % ерітінді.

60 жастан асқан әйелдердегі сүт безінің обырында тәуліктік дозаны 100 мг-ге (5 мл) дейін біртіндеп арттыра отырып, күн сайын 20 мг-ден (1 мл) 2% ерітінді енгізеді. Мұқият қадағалай отырып, ұзақ уақыт бойы енгізілетін ұтымды дозаны белгілейді.

Қуық асты безінің обырында 2 ай бойына бұлшықет ішіне 60-80 мг-ден (3-4 мл) 2% ерітінді, сосын 10-20 мг-ден (0,5-1 мл) 2% ерітінді. Жалпы доза мен емдеу ұзақтығы қуық асты безіндегі өзгерістерге, метастаздардың болуына немесе болмауына, жалпы жай-күйге және феминизация дәрежесіне байланысты.

Қатерлі жаңа түзілімдерді емдегенде бұлшықет ішіне енгізуге арналған жоғары доза:

бір реттік – 3 мл (60 мг) 2% ертінді, тәуліктік -5 мл (100 мг) 2% ерітінді.

Жағымсыз әсерлері

- жүрек айнуы, құсу, диарея, метеоризм, холестаз, гепатит, панктреатит

- бас айналуы, бас ауыруы

- тромбоэмболия, тромбоз

- жанаспалы линзалар жақпаушылығы

- шеткергі ісінулер (үлкен дозаны қолданған кезде болуы мүмкін)

- эндометрийдің шамадан тыс пролиферациясы және қан кетулер, сүт бездерінің аурушаңдығы, сезімталдығы және көлемінің ұлғаюы, сүт бездерінің ісіктері, әйелдердегі либидоның жоғарылауы

- ерлердегі айқын феминизация (жыныстық функцияның төмендеуі, сүт бездерінің ісіп кетуі, үрпілердің пигменттенуі, аталық бездер көлемінің кішіреюі)

Қолдануға болмайтын жағдайлар

- гексэстролға және зәйтүн майына аса жоғары сезімталдық

- жүктілік, лактация кезеңі

- бауыр және бүйрек ауруы (СБЖ, созылмалы гепатиттер, бауыр циррозы)

- мастопатия, эндометриоз, жатырлық қан кетулерде

- қан жүйесінің жоғары ұю деңгейімен байланысты сырқаттар (өткізілген хирургиялық араласу аясындағы гиперкоагуляция, тромбофлебит, алғашқы тромбофилия)

- 60 жасқа дейінгі әйелдердегі қатерлі және қатерсіз жаңа түзілімдер

- гиперэстрогенияның әр түрі (аналық бездік, бүйрекүстілік, аралас)

- қант диабеті

- 18 жасқа дейінгі балалар мен жасөспірімдерге

Дәрілермен өзара әрекеттесуі

Прогестеронмен, прегнинмен бірге тағайындайды.

Бедеулікті емдеу үшін қолданылатын эстрогенге қарсы дәрілер (климофен және басқалар) эстрогендік рецепторларды бөгеуге және эстрогендердің әсерін әлсіретуге қабілетті. Фолий қышқылы және қалқанша без препараттары гексэстрол әсерін күшейтеді. Гексэстрол гиполипидемиялық және аритмияға қарсы дәрілік заттардың тиімділігін күшейтеді; ерлердің жыныс гормондарының, диуретиктердің, антикоагулянттардың әсерлерін әлсіретеді.

Айрықша нұсқаулар

Препаратты қолдану дәрігердің ұқыпты қадағалауымен жүргізілуге тиіс. Ұзақ уақыт пайдалану жатырлық қан кетулердің дамуына, эндометрий гиперплазиясына, эндометрий ісіктерінің өршуіне әкелуі мүмкін. Отбасылық гиперлипопротеинемиясы, панкреатиті, өт қалтасының аурулары бар (әсіресе, холелитиаздар), сыртартқысында алдыңғы жүктілік кезіндегі сарғаюы, бауыр порфириясы, лейкомиомасы, сүт безі обырымен астасқан метастаздарымен сүйектегі гиперкальциемиясы бар емделушілерде препаратты абайлап қолданады. Сүт безінің және қуық асты безінің обырын емдеуде: препаратты коронарлық және церебральді тамырларының аурулары, белсенді тромбофлебиті және тромбоэмболиялық аурулары бар емделушілерде қолданғанда ерекше сақ болу қажет, өйткені эстрогендердің жоғары дозалары миокард инфарктісінің, өкпе тамырлары тромбоэмболиясы мен тромбофлебиттің даму қаупін арттырады.

Педиатрияда қолданылуы

Препарат 18 жасқа дейінгі балаларға қолданылмайды.

Жүктілік және лактация кезеңі

Препаратты жүктілік кезінде қолдануға болмайды және емдеу кезеңінде бала емізуді тоқтата тұрған жөн.

Дәрілік заттың көлік құралдарын немесе қауіптілігі зор механизмдерді басқару қабілетіне әсер ету ерекшеліктері

Зерттелмеген.

Артық дозалануы

Деректер жоқ.

Шығарылу түрі және қаптамасы

Инъекцияға арналған 1 мл ерітіндіден шыны ампулада немесе сындыру сақинасы бар шыны ампулар.

Препарат 10 ампуладан медициналық қолдану жөніндегі мемлекеттік және орыс тілдеріндегі нұсқаулықпен және ампулаларды ашуға арналған кескіш керамика дискімен бірге ампулаларды салуға әрі бекітуге арналған поливинилхлоридті үлбірден жасалған полимер жапсырмасы бар қораптық картон қорапшаға салынады.

Немесе 1 мл препараттан сындыру сақинасы бар көлемі 1 мл шыны ампулада.

Препаратты 5 ампуладан алюминий фольгамен жабылатын ПВХ үлбірден жасалған пішінді ұяшықты қаптамаға салады. 2 пішінді ұяшықты қаптамадан медициналық қолдану жөніндегі мемлекеттік және орыс тіліндегі нұсқаулықпен бірге қораптық (хром-эрзац) картон қорапшаға салынады. Қорапшалар топтамалық ыдысқа салынады және топтамалық заттаңба жапсырылады.

Сақтау шарттары

Жарықтан қорғалған жерде, 15ºС-ден 25ºС-ге дейінгі температурада сақтау керек.

Балалардың қолы жетпейтін жерде сақтау керек!

Сақтау мерзімі

5 жыл

Қаптамасында көрсетілген жарамдылық мерзімі өткеннен кейін пайдалануға болмайды.

Дәріханалардан босатылу шарттары

Рецепт арқылы

Өндіруші«Биофарма» ЖАҚ

Мекенжай: 03680, Киев қ., Н. Амосов к-сі, 9, Украина, тел.: + 38 (044) 277-36-10,275-91-50,521-15-39

Өндірістік қуаттың орналасқан жері: 09100, Киев обл.,

Белая Церковь қ., Киевская к-сі, 37

тел.:+38 (044) 277-36-10

Тіркеу куәлігінің иесі

«Биофарма» ФЗ» ЖШҚ

Қазақстан Республикасы аумағында тұтынушылардан өнім сапасына қатысты шағымдар қабылдайтын ұйымның мекенжайы:

ЖК Тлеубергенова Г.С., 010000, Ақмола обл., Астана қ.,

Бозінген к-сі, 8 үй

aldokinakbar@mail.ru