Роаккутан

• русский
• қазақша

• Скачать инструкцию медикамента

Саудалық атауы

Роаккутан

Халықаралық патенттелмеген атауы

Изотретиноин

Дәрілік түрі

20 мг капсулалар

Құрамы

20 мг бір капсуланың құрамында

белсенді зат – 20 мг изотретиноин,

қосымша заттар: соя бұршақтарының майы, сары балауыз, гидрогенизацияланған соя бұршақтарының майы, ішінара гидрогенизацияланған соя бұршақтарының майы

капсуланың құрамы: желатин, глицерол 85%, Карион 83 70% раствор, титанның қостотығы (Е 171), темірдің қызыл тотығы (Е 172), баспалық қара сия.

Сипаттамасы

Сопақша пішінді, жарты бөлігі қоңыр-қызыл түсті, екінші жарты бөлігі ақ түсті «ROA20» деген жазуы бар, ұзындығы 12.4-14.2 мм, диаметрі 7.3-9.1 мм мөлдір емес желатинді жұмсақ капсулалар. Капсуланың ішіндегісі – біртекті қою-сары суспензия

Фармакотерапиялық тобы

Безеуді емдеу үшін жүйелі қолдануға арналған ретиноидтар

АТЖ коды D10ВА01

Фармакологиялық қасиеттері

Фармакокинетикасы

Изотретиноинның және оның метаболиттерінің кинетикасы дозаға байланысты болғандықтан, емдеу барысында оның плазмадағы концентрациясын бір реттік қолданудан кейін алынған деректердің негізінде айтуға болады. Препараттың осы қасиеті оның дәрілік заттың метаболизміне қатысатын бауыр ферменттерінің белсенділігіне ықпал етпейтіндігін де көрсетеді.

Сіңуі

Изотретиноинның асқазан-ішек жолынан сіңуі өзгеріп отырады. Изотретиноинның толық биожетімділігі анықталған жоқ, өйткені препараттың адам көктамыры ішіне қолдануға арналған түрі шығарылмайды. Акне өршіген науқастарда плазмадағы ең жоғары қанығу деңгейі 80 мг изотретиноинды ашқарынға қабылдағаннан кейінгі тепе-тең жағдайда 310 нг/мл (188-473 нг/мл) құрайды және оған 2-4 сағаттан кейін жетеді. Изотретиноинның эритроциттерге енуі нашар болғандықтан, изотретинионның плазмадағы концентрациясы, қандағы концентрациясынан шамамен 1,7 есе жоғары болады. Изотретиноин аспен бірге қабылданған кезде биожетімділікті, ашқарынға қабылдаумен салыстырғанда, 2 есе арттырады.

Таралуы

Изотретиноин плазма ақуыздарымен толық дерлік (99,9%), негізінен, альбуминдермен, байланысады және тіпті емдік қанығу деңгейінің ауқымды аралығында препараттың бос фракциясының (фармакологиялық тұрғыдан белсенді) мөлшері оның жалпы мөлшерінің 0,1%-ын құрайды.

Изотретиноинның адамдағы таралу көлемі анықталған жоқ, өйткені оның көктамыр ішіне енгізуге арналған дәрілік түрі жоқ.

Изотретиноинның қандағы тепе-тең концентрациялары акненің өршуі ауыр, препаратты 40 мг-нан тәулігіне 2 рет қабылдаған науқастарда 120-дан 200 нг/мл-ге дейін өзгерді. Бұл науқастардағы 4-оксо-изотретиноинның концентрациялары осындай изотретиноиндікінен 2,5 есе басым түсті. Изотретиноинның адам тініне енуі туралы деректер жеткіліксіз. Изотретиноинның эпидермистегі концентрациясы сарысудағыдан екі есе төмен.

Метаболизмі

Ішке қабылдағаннан кейін плазмадан негізгі үш метаболит табылады: 4-оксо-изотретиноин, третиноин (толығымен транс-ретиной қышқылы) және 4-оксо-ретиноин. Негізгі метаболит – 4-оксо-изотретиноин, оның плазмадағы деңгейі тепе-тең жағдайда бастапқы препараттың концентрациясынан 2,5 есе жоғары. Изотретиноинның 4-оксо-изотретиноинға және третиноинға айналуына цитохром жүйесінің бірнеше ферменттері: СҮР2С8, СҮР2С9, СҮР2В6 және мүмкін, СҮР3А4, сондай-ақ СҮР2А6 және СҮР2Е1 қатысады. Маңыздылығы азырақ метаболиттер де, оның ішінде глюкуронидтер, табылды, алайда олардың құрылымы анықталған жоқ.

Изотретиноинның метаболиттерінің, бірнеше зертханалық тестілерде анықталғандай, биологиялық белсенділігі жоғары болады. Науқастарда препараттың клиникалық әсерлері изотретиноинның және оның метаболиттерінің фармакологиялық белсенділігінің нәтижесінде болуы мүмкін. Изотретиноинның адамдағы фармакокинетикасында оның энтерогепатикалық айналымы елеулі рөл атқаруы мүмкін.

Шығарылуы

Изотретиноинді ішке қабылдағаннан кейін несепте және нәжісте шамамен бірдей мөлшерде табылады. Акнесі бар науқастарда өзгермеген препарат үшін терминальды сатының жартылай шығарылу кезеңі, орта есеппен, 19 сағатты құрайды. 4-оксо-изотретиноинның терминальды сатысының жартылай шығарылу кезеңі көбірек - орта есеппен 29 сағат.

Изотретиноин табиғи (физиологиялық) ретиноидтарға жатады. Ретиноидтардың эндогенді қанығу деңгейлері Роаккутанды қабылдауды аяқтағаннан кейін шамамен 2 аптадан соң қалпына келеді.

Фармакодинамикасы

Изотретиноин, Роаккутанның белсенді заты толығымен транс-ретиной қышқылының (третиноинның) стереоизомері болып табылады.

Роаккутанның әсер етуінің толық механизмі әлі анықталған жоқ, алайда акненің ауыр түрлерінің клиникалық көрінісінің жақсаруы май бездері белсенділігінің төмендеуімен және олардың мөлшерінің гистологиялық тұрғыдан айғақталғандай, азаюымен байланысты. Изотретиноинның терінің қабынуына қарсы әсері айғақталған.

Түкті буылтық және май бездері эпителийінің жасушасының гиперкератозы без ағысына корнеоциттердің аршылуына және соңғысының кератинмен және май бөліністерінің артық мөлшерімен бітелуіне әкеледі. Бұдан кейін комедонның түзіледі, бірқатар жағдайларда қабыну үдерісі қосылады. Роаккутан себоциттердің пролиферациясын басады және өршіген акнеге әсер етіп, жасушалардың дифференциалдануының қалыпты үдерісін қалпына келтіреді. Тері майы – Propionibacterium acnes өсуі үшін негізгі субстрат, сондықтан тері майының түзілуінің азаюы ағыстағы бактерияның шоғырлануын төмендетеді.

Қолданылуы

• акненің ауыр түрлерінде (түйінді-кистозды, конглобатты акне немесе тыртық түзілу қауіпі бар акне), сондай-ақ акнені емдеудің стандартты түрлері тиімсіз болған жағдайда (жүйелі антибактериялды және жергілікті).

Қолдану тәсілдері және дозасы

Роаккутанның емдік тиімділігі және оның жағымсыз әсерлері әр түрлі науқастарда әр түрлі болатын дозаға байланысты. Сондықтан емдеу барысында дозаны жекелей таңдау маңызды.

Роаккутанмен емдеуді тәулігіне 0,5 мг/кг дозадан бастаған жөн. Науқастардың көпшілігінде доза дене салмағының әр келісіне шаққанда тәулігіне 0,5-тен 1,0 мг дейін өзгереді. Аурудың ауыр түрлеріне шалдыққан немесе тұлабойының акнесі бар науқастарға өте жоғары тәуліктік дозалар - дене салмағының әр келісіне шаққанда 2,0 мг-ға дейін қажет болуы мүмкін. Емдеудің күшті нәтижелеріне және аурудың қайталануының алдын алуға дене салмағының әр келісіне шаққанда жинақталған 120 мг дозада жететіндігі айғақталған (емдеу курсына). Сондықтан әрбір науқастағы емнің ұзақтығы тәуліктік дозаға байланысты. Акненің толық қайтуына 16-24 апта емдегеннен кейін қол жеткізуге мүмкіндік туады. Тиісті дозаны өте нашар көтеретін науқастарда емдеуді аз тәуліктік дозада жалғастыруға болады, алайда оны ұзағырақ жүргізу керек.

Науқастардың көпшілігінде ауру бір реттік емдеу курсынан кейін кетеді. Айқын қайталанған кезде емдеуді Роаккутанның тәуліктік және жиынтық дозасында емдеу курсын, алғашқыдағыдай етіп, қайталайды. Жақсару препаратты қабылдауды тоқтатқаннан кейін 8 аптаға дейін жалғасуы мүмкін болғандықтан, қайталанатын курсты осы мерзімнің аяқталуынан ерте тағайындамаған жөн.

Капсулаларды тамақтану кезінде, тәулігіне бір немесе екі рет қабылдайды.

Ерекше жағдайларда дозалануы

Бүйрек қызметінің ауыр жеткіліксіздігіне шалдыққан науқастарда емдеуді аз дозадан (мысалы, тәулігіне 10 мг-ден) бастаған жөн және оны жағымдылығына қарай әр адамға жекелей тағайындау керек.

18 жасқа толмаған адамдарға зерттеулер жүргізілмеді, сондықтан осы топқа дозалау тәртібі анықталған жоқ.

Жағымсыз әсерлері

Роаккутанның жағымсыз әсерлерінің көпшілігі дозаға байланысты болады. Әдеттегідей, тиісті дозаларды тағайындаған кезде пайдасы мен қаупінің қатынасы, аурудың ауырлығын ескергенде, науқас үшін тиімді.

• терінің құрғақтығы, бөртпе, қышу, бет эритемасы, тершеңдік, пиогенді гранулема, паронихиялар, ониходистрофиялар, түйіршікті тіндердің өсуінің күшеюі, шаштардың тұрақты жұқаруы, шаштың қайтымды түсуі, акненің фульминантты түрлері, гирсутизм, гиперпигментация, фотосенсибилизация, фотоаллергия, терінің жеңіл жарақаттанушылығы. Емдеудің басында кеселдің өршуі бірнеше апта бойы ушығады.

• сарысудағы креатинфосфатокиназаның (КФК) деңгейі артатын немесе онсыз бұлшық ет ауырулары, буындардың ауыруы, гиперостоздар, артриттер, байламдар мен шеміршектердің беріштенуі, сүйектердің басқа өзгерулері, тендиниттер.

• мінез-құлықтың өзгеруі, күйзелу, бас ауыруы, бассүйекішілік қысымның жоғарылауы, құрысу талмалары

• мұрыннан қан кету, дауыстың қарлығуы, бронхтың түйілуі (көбінесе сыртартқысында бронх демікпесі бар науқастарда)

• жүректің айнуы, колит, илеит, қан кету; панкреатит (әсіресе гипертриглицеридемия 800 мг/дл жоғары)

• бауыр трансаминазасы белсенділігінің өтпелі жоғарылауы.

• Көптеген осы өзгеру жағдайлары қалыпты шектен шыққан жоқ және емделу барысында бастапқы қалпына оралды, алайда кейбір жағдайларда дозаны азайту немесе Роаккутанды тоқтату қажеттілігі пайда болды

• нейтропения, анемия, гематокриттің төмендеуі, тромбоциттер санының артуы немесе азаюы, эритроциттердің тұну жылдамдығының жоғарылауы

• гипертриглицеридемия, гиперхолестеринемия, гиперурикемия, тығыздығы жоғары липопротеидтер деңгейінің төмендеуі, сирек - гипергликемия; Роаккутанды қабылдау барысында алғаш анықталған қант диабеті жағдайы тіркелген.

• грамоң қоздырғыштардан (Staphylococcus aureus) болған жергілікті немесе жүйелі жұқпалар

• лимфаденопатия, гематурия, протеинурия, васкулит (Вегенер гранулематозы), аллергиялық васкулит, асқын сезімталдықтың жүйелі реакциялары, гломерулонефрит.

Сирек

• • жарықты қабылдаудың бұзылуы (препаратты тоқтатқаннан кейін жоғалады)

  • лентикулярлы катаракта, кератит, конъюнктивит, мөлдір қабықтың қайтымды бұлыңғырлануы және жанаспалы линзалардың жақпайтындығы, белгілі бір дыбыс жиіліктерінде естудің бұзылуы

  • панкреатиттің өліммен аяқталуы

  • гипергликемия

Жекелеген жағдайларда

• көру өткірлігі бұзылуы, жарықтан қорқу, қараңғыға бейімделудің бұзылуы (қараңғыда көру өткірлігінің төмендеуі)

• гепатит

• кейбір науқастарда, әсіресе күшті дене жүктемесімен айналысатын, сарысуда КФК белсенділігі жоғарылауының жекелеген жағдайларының болғаны айтылған.

Қолдануға болмайтын жағдайлар

• препаратқа және оның компоненттеріне жоғары сезімталдықта

• тетрациклиндермен қатар емдегенде

• бауыр қызметінің жеткіліксіздігінде

• А гипервитаминозында

• айқын гиперлипидемия

• 18 жасқа дейінгі балалар мен жасөспірімдерге

• Жүктілікте, лактация кезеңінде

Дәрілермен өзара әрекеттесуі

А гипервитаминозының белгілерінің күшеюі мүмкін болғандықтан, Роаккутанды және құрамында А витамині бар препараттарды бір мезгілде тағайындауға болмайды.

Тетрациклиндер де бас сүйекішілік қысымды арттыратындықтан, оларды Роаккутанмен бірге қолдануға болмайды.

Роаккутан прогестерон препараттарының тиімділігін әлсіретуі мүмкін, сондықтан прогестеронның дозасы аз контрацептивті препараттарды қолданбаған жөн.

Айрықша нұсқаулар

Роаккутанды тек дәрігер ғана, дұрысы жүйелі ретиноидтарды қолдану жөнінде тәжірибесі бар және препараттың тератогенділік қаупін білетін дерматологтар, тағайындауға тиіс. Емделушіге арналған ақпарат бар брошюралардың көшірмесін әйел, сондай-ақ еркек емделушілерге беріп қою қажет.

Роаккутанды қабылдап жүрген немесе оны қабылдағанына көп уақыт (1 ай) болмаған науқастардан донор ретінде, басқа адамдардың организміне препараттың кездейсоқ әсерін болдырмау үшін, қан алуға болмайды.

Бауыр қызметін емделгенге дейін, оны бастағаннан кейін 1 айдан соң, ал содан кейін әрбір 3 ай сайын бақылап отыру керек. Егер бауыр трансаминазасының деңгейі қалыптағыдан артып кетсе, препарат дозасын азайту немесе оны қабылдауды тоқтату қажет.

Сондай-ақ емдеуге дейін, емді бастағаннан кейін 1 айдан соң және емдеу курсының соңында ашқарынға сарысудағы липидтердің деңгейін де анықтаған жөн. Әдетте липидтердің концентрациялары дозаны азайтқаннан кейін немесе препаратты қабылдауды тоқтатқаннан кейін, сондай-ақ емдәмді қадағаласа, қалыпқа келеді. Триглицеридтер деңгейінің клиникалық тұрғыдан маңызды жоғарылауын бақылау қажет, өйткені оларды 800 мг/дл аса көтеру жедел панкреатиттің дамуымен қоса қабаттасуымен қатар, өлім-жітіммен аяқталуы да мүмкін. Тұрақты гипертриглицеридемияда немесе панкреатит симптомдарында Роаккутанды қабылдауды тоқтатқан жөн.

Сирек жағдайларда Роаккутан қабылдаған науқастарда көңіл-күйдің төмендеуі, психотикалық белгілер және өзіне өзі қол жұмсау әрекеттері болғаны айтылған. Олардың препаратты қолданумен байланыстылығы анықталмаса да, сыртарқысында депрессиясы бар науқастарға ерекше сақ болу және барлық емделушілерде препаратпен емдеу барысында депрессияның пайда болуын бақылау қажет, қажет болған кезде оларды тиісті маманға жіберу керек.

Дискератозды емдеу үшін үлкен дозаларда Роаккутанды қолданғаннан соң бірнеше жыл өткеннен кейін сүйек өзгеруі, оның ішінде өсудің эпифизарлы өсу аймағының мезгілінен бұрын жабылуы дамыды, сондықтан препаратты кез келген науқасқа тағайындаған кезде болуы мүмкін пайдасы мен қаупінің арақатынасына мұқият баға берген жөн.

Роаккутанды қабылдау кезінде бұлшықеттердің және буындардың ауыруы мүмкін, олар қарқынды дене жүктемесін көтеруінің төмендеуімен қоса қабаттасуы мүмкін.

Роаккутан қабылдап жүрген науқастарға, сондай-ақ емдеу аяқталғаннан кейін 5-6 ай ішінде өзге жерлерде тыртықтану күшеюі мүмкін болғандықтан, терең дермоабразия жүргізуге болмайды. Роаккутанмен емдеу барысында және одан кейін 5-6 ай бойы, тыртықтану қаупіне байланысты, балауызды аппликациялау арқылы эпиляция жүргізуге болмайды.

Кейбір науқастарда, кейде сақталатын және емдеуді аяқтағаннан кейін түнде көру өткірлігінің төмендегені байқалатындықтан, науқастарды осындай жағдайдың болатындығынан хабардар етіп, түнде автомобиль жүргізген кезде сақ болу керектігін айту керек. Көру өткірлігінің жағдайын мұқият бақылау керек.

Көз конъюнктивасының құрғауы, көздің мөлдір қабығының бұлыңғырлануы, түнде көрудің нашарлауы және кератит әдетте препаратты қабылдауды тоқтатқаннан кейін кетеді. Конъюнктивасы құрғақ науқастарда кератиттің дамуы мүмкін екендігіне байланысты бақылау жасау қажет. Көруіне шағымданған науқастарды көз дәрігеріне жіберген және Роаккутанды тоқтату жөніндегі мәселені қарастырған жөн.

Роаккутанды ішегінің қабыну ауруы бар науқастарға сақтықпен тағайындайды. Айқын геморрагиялық іш өтуі бар науқастарда Роаккутанды дереу тоқтату қажет.

Бұдан бұрын ретиноидтарды сыртқа қолданғаннан кейін ғана пайда болған анафилактикалық реакцияның сирек жағдайлары туралы айтылған. Ауыр аллергиялық реакциялар препаратты тоқтату және науқастарды мұқият бақылау қажеттілігін көрсетеді.

Қаупі жоғары топтағы (қант диабетіне, семіздікке, созылмалы маскүнемдікке шалдыққан немесе май алмасу бұзылған) науқастарға Роаккутанмен емдеу кезінде глюкоза мен липидтер деңгейіне зертханалық бақылауды жиірек жүргізу қажет етіледі. Диабет бар болған кезде немесе оған күдіктенгенде гликемияны өте жиірек анықтап отыру керек.

Жүктілік және лактация кезеңі

Роаккутан – тератогендік әсері күшті препарат. Егер жүктілік әйел Роаккутанды ішке қабылдаған кезеңде пайда болса (кез келген дозада және тіпті ұзақ уақыт емес), дамуы кеміс нәрестенің туу қаупі өте үлкен болады. Бала туу жасындағы әйелдерге Роаккутанды төменде көрсетілген белгілер орындалған кезде ғана қабылдауына болады:

• емдеудің әдеттегідей әдісіне төзімді акненің ауыр түрінде;

• дәрігердің нұсқауларын нақты түсінгенде және орындағанда

• Роаккутанмен емделу барысында және одан кейін бір ай ішінде жүкті болып қалудың қауіпті болатындығын дәрігер айтқанда

• контрацепция дәрілерінің тиімсіздігінің болуы мүмкін екендігін түйсінгенде; контрацепцияның тиімді әдістерін Роаккутанмен емдегенге дейін, емдеу кезінде және оны аяқтағаннан кейін бір ай бойы үздіксіз қолданғанда

• жүктілікті анықтауға жасалған тесттің теріс нәтижесі препаратты қабылдаудан кем дегенде 11 күн бұрын алынғанда. Емдеу кезінде жүктілікке жасалған тестіні табанды түрде ай сайын жүргізу керек.

• Роаккутанмен емдеуді кезекті қалыпты етеккір айналымының 2-3-күні ғана бастайды

• аурудың қайталануына байланысты емдеген кезде: контрацепцияның тиімді әдістерін Роаккутанмен емдеуді бастамастан бір ай бұрын, емделу кезінде және оны аяқтағаннан кейін бір ай бойы, сондай-ақ жүктілікке жасалатын сенімді тестті емдеудің алғашқы курсындағыдай, мерзімінде жасағанда контрацепцияның тиімді әдістерін қолдану

• әйел сақтық шараларының қажеттілігін толық түсінгенде және дәрігер айтқан контрацепцияның сенімді әдістерін қолдануға өзінің ниетін нақтылағанда.

Ұрықтануға қарсы дәрілерді жоғарыда көрсетілгендей, изотретиноинмен емдеу кезінде қолдануды әдетте бедеуліктен контрацепция әдістерін қолданбайтын (гистерэктомияны бастан өткерген емделушілерді қоспағанда) немесе жыныстық қатынассыз өмір сүретіндігін айтқан әйелдерге ұсынған жөн. Дәрігерге және науқастарға Роаккутанның ұрыққа әсер ету қаупі болдырмау үшін өндіруші компания препараттың тератогендігін ескеру және бала туу жасындағы әйелдердің контрацепцияның сенімді шараларын міндетті түрде толық қолдану керектігін түсіндіретін «Жүктіліктен сақтану бағдарламасын» жасады. Бағдарламада келесі материалдар бар:

• емделушіге арналған ақпараттық кітапша

• жүктіліктен сақтану жөніндегі кітапша

• емделушіге арналған ақпараттық келісім түрі

• препаратты тағайындау жөнінде дәрігердің нұсқауы

• әйелдерге препаратты тағайындау жөнінде дәрігерлерге арналған жадынамалар

Жүктілікті болдырмау жөніндегі ақпаратты ауызша да, жазбаша да беру қажет.

Егер, қабылданған сақтық шараларынан қарамастан, Роаккутанмен емделу кезінде немесе оны аяқтағаннан кейінгі ай ішінде бәрібір жүктілік басталған болса, ұрықтың өте ауыр түрде кеміс туу қаупі жоғары болады (атап айтқанда, орталық жүйке жүйесі, жүрек және ірі қан тамырлар тарапынан). Бұдан басқа, өздігінен түсік тастау қаупі артады. Жүктілік басталған кезде дәрігер және емделуші оны сақтау-сақтамауды талқыға салуға тиіс.

Адамда Роаккутанды тағайындауға байланысты ұрықтың іштен туа ауыр кемістігінің, оның ішінде гидроцефалия, микроцефалия, сыртқы құлақтың аномалиясы (микротия, тарылу немесе сыртқы есту жолының жоқ болуы), микрофтальмия, жүрек-қан тамыр аномалиясы, беттің, айырша бездің даму кемістігінің дамуы, қалқанша маңы безінің патологиясы, мишықтың даму кемістігі құжатпен дәлелденген.

Дәрілік заттың көлік құралдарын немесе әлеуетті қауіпті механизмдерді басқару қабілетіне әсер ету ерекшеліктері

Кейбір науқастарда, кейде сақталатын және емдеуді аяқтағаннан кейін түнде көру өткірлігінің төмендегені байқалатындықтан, науқастарды осындай жағдайдың болатындығынан хабардар етіп, түнде автомобиль жүргізген кезде сақ болу керектігін айту керек.

Артық дозалануы

Белгілері: А гипервитаминозының белгілері, мысалы, терінің, еріннің, мұрын қуысының шырышты қабықтарының құрғауы (қанағыштығы), жұтқыншақ көмейдің (дауыстың қарлығуы), көздің (конъюнктивит, көздің мөлдір қабығының қайтымды бұлдырауы және жанаспалы линзалардың жақпауы) құрғауы және басқалар.

Емдеу: Артық дозаланғаннан кейін алғашқы бірнеше сағат өткен соң асқазанды шаю қажет болуы мүмкін.

Шығарылу түрі және қаптамасы

Алюминий фольгадан жасалған пішінді ұяшықты қаптамада 10 капсуладан. 3 пішінді ұяшықты қаптамадан мемлекеттік және орыс тілдерінде жазылған қолданылуы жөніндегі нұсқаулықпен бірге картон пәшкеге салынған.

Сақтау шарттары

Құрғақ, жарықтан қорғалған жерде, 25оС-ден аспайтын температурада сақтау керек.

Балалардың қолы жетпейтін жерде сақтау керек!

Сақтау мерзімі

3 жыл

Қаптамасында көрсетілген жарамдылық мерзімі өткеннен кейін пайдалануға болмайды.

Дәріханалардан босату шарттары

Рецепт арқылы

Өндіруші ұйымның атауы мен елі        

Р.П.Шерер ГмбХ & Ко. КГ, Германия

Өндірушінің заңды мекен-жайы:

Р.П.Шерер ГмбХ & Ко. КГ, Гаммелсбахерштрассе 2, Д-69412 Эбербах/Баден, Германия

R.P.Scherer GmbH & Co. KG, Gammelsbacherstrasse 2, D-69412 Eberbach/Baden, Germany

Тіркеу куәлігінің иесінің елі мен атауы

Ф.Хоффманн-Ля Рош Лтд., Швейцария,

Қаптаушы ұйымның атауы мен елі        

Ф.Хоффманн-Ля Рош Лтд., Швейцария,

Тұтынушылардан тауардың сапасы бойынша шағымдарды Қазақстан Республикасының аумағында қабылдайтын ұйымның мекенжайы:

Қазақстандағы «Хоффманн-Ля Рош Лтд» компаниясының өкілдігі

050000, Алматы қаласы, Абай даңғылы, 52

Тел.: +7 (727) 334 19 19

Факс: + 7 (727) 334 19 20

e-mail: aliya.arynova@roche.com