ПИРФЕКТ

ПИРФЕКТ

Пирфенидон

Үлбірлі қабықпен қапталған таблеткалар, 801 мг

Антинеопластикалық және иммуномодуляциялайтын препараттар. Иммуносупрессанттар. Басқа иммуносупрессанттар. Пирфенидон.

АТХ коды L04AX05

- ересек пациенттерде өкпенің ауырлығы жеңіл және орташа дәрежелі идиопатиялық фиброзында

Қолдануды бастағанға дейін қажетті мәліметтер тізбесі

• әсер етуші затына немесе қосымша заттарының кез келгеніне аса жоғары сезімталдық

• анамнездегі, пирфенидонды қабылдаудың нәтижесіндегі ангионевроздық ісіну

• флувоксаминмен бірге қолдану

• бауырдың ауыр жеткіліксіздігі немесе бауыр ауруының терминальді сатысы

• бүйректің ауыр жеткіліксіздігі (креатинин клиренсі <30 мл/мин) немесе бүйрек жеткіліксіздігінің диализ жүргізуді қажет ететін терминальді сатысы

• балалар мен 18 жасқа дейінгі жасөспірімдерге

• тұқым қуалайтын галактоза жақпаушылығы, Lapp (ЛАПП)-лактаза ферментінің тапшылығы, глюкоза-галактоза мальабсорбциясы

Қолданған кездегі қажетті сақтандыру шаралары

Бауыр функциясы

ПИРФЕКТ препаратын қабылдап жүрген пациенттерде АЛТ және АСТ деңгейлері қалыптың жоғарғы шегінен (ҚЖШ) 3 еседен артыққа дейін жоғарылағаны байқалуы мүмкін. Сирек жағдайларда ондай жоғарылаулар сарысудағы жалпы билирубиннің бір мезгілде жоғарылауымен байланысты болған. Бауырдың функционалдық сынамаларын (АЛТ, АСТ және билирубин) емдеу басталғанға дейін, содан соң емдеудің алғашқы 6 айы ішінде ай сайын, және ары қарай – әр 3 ай сайын жүргізу керек. Бауыр аминотрансферазаларының деңгейлері едәуір жоғарылаған жағдайда, төменде көрсетілген нұсқауларды басшылыққа ала отырып, препараттың дозасын төмендету немесе емдеуді толығымен тоқтату керек. Емдеу кезінде АСТ, АЛТ немесе билирубин деңгейлерінің жоғарылағаны расталған пациенттер үшін дозасын түзету қажет болуы мүмкін.

АЛТ/АСТ деңгейлері жоғарылаған жағдайдағы ұсынымдар

Емдеу басталғаннан кейін аминотрансферазалар деңгейлері ҚЖШ х >3 және < 5 есеге дейін жоғарылаған жағдайда, жүрген, ондай жоғарылауына ықпал ететін препараттарды бірге қабылдауды тоқтатып, болуы мүмкін басқа себептерін анықтау және пациентті мұқият қадағалауды бастау қажет. Клиникалық көрсетілімдері болған жағдайда, препараттың дозасын төмендетуге немесе емді тоқтатуға болады. «Бауыр» ферменттері қалыпқа түскеннен кейін, жақпаушылығы болмаған жағдайда, препараттың дозасын біртіндеп, ұсынылған тәуліктік деңгейіне дейін арттыруға болады.

Аминотрансферазалар деңгейлерінің ҚЖШ х >3 және <5 есеге дейін жоғарылауы гипербилирубинемиямен немесе бауырдың дәріден зақымдануының симптомдарымен немесе белгілерімен қатар жүретін жағдайда, препаратты қабылдауды толықтай, емді қайта бастамайтындай етіп тоқтату керек.

Егер пациентте аминотрансферазалар деңгейлерінің ҚЖШ х ≥5 есеге дейін жоғарылағаны байқалса, емді қайта бастамайтындай етіп толықтай тоқтату керек.

Бауыр жеткіліксіздігі

Бауырдың ауырлығы орташа дәрежелі жеткіліксіздігі (Чайлд-Пью бойынша B класы) бар пациенттерде, пирфенидонның жүйелі әсері 60%-ға жоғарылайды. Препаратты бауырдың ауырлығы жеңіл және орташа жеткіліксіздігі (Чайлд-Пью бойынша А және B кластары) бұрыннан бар пациенттерде сақтықпен қолдану керек. Ондай пациенттерде, әсіресе, егер пациенттер CYP1A2 тежегішін бір мезгілде қабылдап жүрсе, уытты реакциялардың дамуын мұқият қадағалау қажет. Бауырдың ауыр жеткіліксіздігі бар пациенттерде препараттың қауіпсіздігін зерттеу жүргізілмеген, сондықтан ондай пациенттерге ПИРФЕКТ препаратын тағайындауға болмайды.

Фотосенсибилизация реакциясы және бөртпе

ПИРФЕКТ препаратымен емдеу кезінде тікелей түсетін күн сәулесінің (күн сәулесі шамдарын қоса) әсерінен қорғану керек. Пациенттерге күннен қорғайтын құралдарды күнделікті пайдалануға, күннің әсерінен қорғайтын киім киюге, және фотосенсибилизация реакциясын туғызуға қабілетті басқа дәрілік препараттарды қабылдамауға кеңес беру керек. Пациенттер фотосенсибилизация реакциясы немесе бөртпе симптомдары туралы өзінің емдеуші дәрігеріне хабарлау қажеттігінен хабардар болуы тиіс. Фотосенсибилизацияның ауыр реакцияларының байқалуы жиі емес. Ауырлық дәрежесі жеңіл немесе орташа фотосенсибилизация реакциясы немесе бөртпе дамыған жағдайда, дозасын төмендету немесе емді уақытша тоқтата тұру қажеттілігі туындауы мүмкін.

Терінің ауыр реакциялары

Стивенс-Джонсон синдромы (СДС) және уытты эпидермалық некролиз (УЭН) өмірге қауіп төндіретін және өлімге соқтыруы ықтимал, олар туралы ПИРФЕКТ препаратымен емдеу кезінде маркетингтен кейінгі кезеңде хабарланды.

Осы реакцияларды көрсететін симптомдар пайда болса, ПИРФЕКТ препаратын дереу тоқтату керек. Егер пациентте ПИРФЕКТ препаратын пайдалану кезінде СДС немесе УЭН дамыса, ПИРФЕКТ препаратымен емдеуді толықтай тоқтату керек, емдеуді қайта бастауға болмайды.

Ангионевроздық ісіну

ПИРФЕКТ препаратын қабылдағанда тыныстың тарылуы немесе бронх-өкпе обструкциясы аясында беттің, еріннің және/немесе тілдің ісінуін қоса, ангионевроздық ісіну (кейде ауыр дәрежелі) дамуы мүмкін. Сондықтан, препаратты қабылдағаннан кейін ангионевроздық ісінудің белгілері немесе симптомдары дамыған пациенттер емделуді дереу тоқтатуы тиіс. Ангионевроздық ісіну симптомдарын басу медициналық көмек көрсету стандарттарына сәйкес жүргізіледі. Анамнезінде пирфенидонды қабылдаудан туындаған ангионевроздық ісіну болған пациенттерге ПИРФЕКТ препаратын тағайындамайды.

Бас айналуы

ПИРФЕКТ препаратын қабылдап жүрген пациенттер, зейін қоюды немесе қимыл-қозғалыс үйлесімін қажет ететін әрекеттерге кірісердің алдында өздерінде препаратқа реакция болатындығын есте ұстауы тиіс. Көпшілік жағдайларда бас айналуы орташа алғанда 22 күннен соң басылады. Егер бас айналуы басылмаса немесе оның симптомдары ушығып кетсе, дозасын емдеудің тоқтатылуына дейін төмендету қажет болуы мүмкін.

Қажу

Зейін қоюды немесе қимыл-қозғалыс үйлесімін қажет ететін әрекеттерге кіріспес бұрын, пациенттер өздерінде препаратқа реакция болатындығын есте ұстауы тиіс.

Салмақ жоғалту

Пациенттің салмағын бақылау және, қажет болса, егер салмақ жоғалтылуы клиникалық тұрғыдан елеулі болса, рационның калориялылығын арттыру керек.

Гипонатриемия

Пирфенидонды қабылдаған пациенттерде гипонатриемия жағдайлары туралы хабарланған. Симптом ретінде, гипонатриемия елеусіз жүруі және қатарлас аурулардың болуымен бүркемеленуі мүмкін, тиісті зертханалық көрсеткіштерді, әсіресе, жүрек айнуы, бас ауыруы немесе бас айналуы сияқты белгілер мен симптомдар болған жағдайда жүйелі түрде тексеріп отыру ұсынылады.

Қосымша заттар

Пирфект препаратының құрамында лактоза моногидраты бар. Тұқым қуалайтын галактоза жақпаушылығы, Lapp (ЛАПП)-лактаза ферментінің тапшылығы, глюкоза-галактозаның мальабсорбциясы бар адамдарға қолдануға болмайды.

Басқа дәрілік препараттармен өзара әрекеттесуі

Шамамен 70–80% пирфенидон CYP1A2 цитохромының әсерінен, CYP2C9, 2C19, 2D6 және 2E1 қоса, CYP цитохромы жүйесінің басқа изоферменттерінің болар-болмас қатысуымен метаболизденеді.

Грейпфрут шырынын ішу CYP1A2 белсенділігін тежеуі мүмкін. Сондықтан, пирфенидонмен емделу кезінде тамақтану мәзіріне грейпфрут шырынын қоспау керек.

Флувоксамин және CYP1A2 тежегіштері

ПИРФЕКТ препараты мен флувоксаминді (CYP2C9 күшті тежегішін, сондай-ақ, CYP басқа изоферменттеріне (CYP2C9, 2C19 және 2D6) тежегіштік әсер беретін) бірге қабылдау шылым шекпейтін пациенттерде пирфенидонның жүйелі экспозициясының 4 есе жоғарылауына алып келеді.

ПИРФЕКТ препаратын Флувоксаминмен бір мезгілде қолдануға болмайды. Емдеуді бастар алдында флувоксаминді қабылдауды тоқтату және емдеу кезінде флувоксаминді пайдаланбау қажет. Сонымен қатар, емдеу кезінде CYP1A2 де, пирфенидон метаболизміне қатысатын CYP бір немесе бірнеше басқа изоферменттерін де (мысалы, CYP2C9, 2C19 және 2D6) тежейтін басқа препараттарды қолданбаған дұрыс.

Іn vitro - in vivo экстраполяциялау, CYP1A2 күшті және селективті тежегіштері (мысалы, эноксацин) пирфенидонның әсерін шамамен 2-4 есе арттыруы мүмкіндігін көрсетіп отыр. Егер ПИРФЕКТ препаратын CYP1A2 күшті және селективті тежегішімен бір мезгілде қолданбауға болмайтын болса, пирфенидонның дозасын күніне 801 мг (тәулігіне үш рет 267 мг) дейін азайту керек. Пациенттерді пирфенидонмен емдеумен байланысты жағымсыз реакциялардың дамуына қатысты мұқият бақылау қажет. Қажет болған жағдайда, препаратты қабылдауды тоқтату керек.

ПИРФЕКТ препараты мен 750 мг ципрофлоксацинді (CYP1A2 орташа тежегіші) бірге қолдану пирфенидонның әсерін 81%-ға арттырды. Егер тәулігіне екі рет 750 мг ципрофлоксацинді қабылдамауға мүмкіндік болмаса, пирфенидонның дозасын мүмкіндік болмаса, пирфенидонның дозасын тәулігіне 1602 мг (тәулігіне 534 мг рет) дейін азайту керек. Ципрофлоксацин күніне бір немесе екі рет 250мг немесе 500 мг дозада қолданылып жүрген кезде ПИРФЕКТ препаратын сақтықпен қолдану керек.

CYP1A2 басқа орташа тежегіштерін (мысалы, амиодарон, пропафенонды) қабылдап жүрген пациенттерде ПИРФЕКТ препаратын сақтықпен қолдану керек.

Сонымен қатар, егер CYP1A2 тежегіштері CYP2C9 (мысалы, амиодарон, флуконазол), 2C19 (мысалы, хлорамфеникол) және 2D6 (мысалы, флуоксетин, пароксетин) сияқты пирфенидон метаболизміне қатысатын CYP басқа изоферменттерінің біреуінің немесе бірнешеуінің күшті тежегіштерімен бір мезгілде пайдаланылса, ерекше сақтық таныту керек.

Шылым шегу және CYP1A2 индукторлары

Шылым шегу бауыр ферменттерінің синтезін индукциялауға қабілетті, сол арқылы, препараттың клиренсін арттырады және оның жүйелі экспозициясын азайтады. Шылым шегу мен CYP1A2 ықтимал индукциясы арасындағы өзара байланыстылықты ескере отырып, шылым шегуді қоса, CYP1A2 күшті индукторларын бірге қолданбау керек. Пациенттерге емдеуді бастар алдында, сондай-ақ, емдеу кезінде қатаң түрде, CYP1A2 күшті индукторларын қабылдауды тоқтатуға және шылым шегуді тастауға кеңес беру керек.

CYP1A2 орташа индукторларын (мысалы, омепразолды) бірге қабылдау теориялық тұрғыдан, пирфенидонның плазмадағы деңгейінің төмендеуіне алып келуі мүмкін.

ПИРФЕКТ препаратын CYP1A2 күшті индукторлары ретінде әсер ететін дәрілік препараттармен және пирфенидон метаболизміне қатысатын CYP басқа изоферменттерін (мысалы, рифампицинді) бірге қабылдау пирфенидонның плазмадағы деңгейінің едәуір төмендеуіне алып келуі мүмкін. Мүмкіндігінше, мұндай препараттарды ПИРФЕКТ препаратымен бірге пайдаланбаған дұрыс.

Арнайы ескертулер

Жүктілік

ПИРФЕКТ препаратының жүкті әйелдерде қолданылғаны жөнінде деректер жоқ.

Жануарларда пирфенидонның және/немесе метаболиттерінің плацентадан өтуі пирфенидонның және/немесе оның метаболиттерінің қағанақ сұйықтығында жинақталуына алып келеді.

Жоғары (тәулігіне ≥1000 мг/ кг) дозаларында егеуқұйрықтарда буаздығының жалғасуы мен балаларының тіршілік ету ықтималдығы азайған.

Сақтық шарасы ретінде, ПИРФЕКТ препаратын жүктілік кезінде қабылдау ұсынылмайды.

Бала емізу

Пирфенидонның немесе оның метаболиттерінің емшек сүтімен бөлініп шығатын-шықпайтындығы белгісіз. Бала емізуді тоқтату немесе ПИРФЕКТ препаратын тағайындауды тоқтату туралы шешім емшек емудің бала үшін пайдасын және препаратпен емдеудің анасы үшін пайдасын ескере отырып қабылдануы тиіс.

Фертильділік

Клиникаға дейінгі зерттеулерде фертильділікке жағымсыз әсерлері байқалмады.

Препараттың көлік құралын немесе қауіптілігі зор механизмдерді басқару қабілетіне әсер ету ерекшеліктері

ПИРФЕКТ бас айналуы мен қажуды туғызуы, олардың автомобиль басқару және механизмдермен жұмыс істеу қабілетіне орташа ықпалы болуы мүмкін, сондықтан, егер пациенттер аталған симптомдарды сезінсе, олар көлік жүргізу немесе механизмдермен жұмыс істеу кезінде сақтық танытуы тиіс.

Қолдану жөніндегі нұсқаулар

Дозалау режимі

ПИРФЕКТ препаратымен емдеу ӨИФ диагностикасы мен емдеуде тәжірибесі бар дәрігердің қадағалауымен жүргізілуі тиіс

Дозалануы

Ересектер

Емдеу басталғаннан кейін дозасын 14 күн ішінде біртіндеп, ұсынылған, тәулігіне 2400 мг дозасына дейін келесі ретпен жоғарылату керек:

• 1 - 7 күндер аралығында: 267 мг дозасы тәулігіне үш рет (тәулігіне 801 мг)

• 8 - 14 күндер аралығында: 534 мг дозасы тәулігіне үш рет (тәулігіне 1602 мг)

• 15-інші күннен бастап: 801 мг дозасы тәулігіне 3 рет (тәулігіне 2403 мг).

ӨИФ бар пациенттерде ПИРФЕКТ препаратының ұсынылған тәуліктік демеуші дозасы тәулігіне үш рет тамақтану кезінде 801 мг, тәулігіне барлығы 2403 мг құрайды. Тәуліктік дозасын күніне 2403 мг-ден асыру ұсынылмайды (4.9 бөлімін қараңыз).

ПИРФЕКТ препаратымен емделуді қатарынан 14 немесе одан да көп күн өткізіп алған пациенттер, емделуді бастапқы 2 апталық, ұсынылған тәуліктік дозасына дейін титрлеуден қайта бастауы тиіс.

Егер препаратты қабылдаудағы үзіліс қатарынан 14 күннен азды құраса, дозаларын қабылдауды титрлеусіз, препаратты жоғарыда көрсетілген ұсынылған тәуліктік дозасында қабылдаудан қайта бастауға болады.

Асқазан-ішек жолы (АІЖ) тарапынан бұзылулар: АІЖ тарапынан жағымсыз әсерлердің себебінен ем жақпайтын пациенттерге, препаратты тамақпен бірге қабылдау қажеттігін еске салу керек. Егер симптомдары жойылмаса, пирфенидонның дозасын күніне екі-үш рет, тамақтану кезінде 267–534 мг дейін азайтып, қажеттілігіне қарай ұсынылған тәуліктік дозасына дейін қайтадан арттыруға болады. Егер симптомдары бұдан кейін де сақталса, симптомдар жойылуы үшін, пациенттерге емделуді 1-2 аптаға үзе тұруға кеңес беруге болады.

Жарыққа сезімталдық реакциясы немесе бөртпе: фотосезімталдықтың жеңіл және орташа реакциялары немесе бөртпесі бар пациенттерге күннен қорғайтын құралдарды пайдалану және күн астында болудан сақтану қажеттілігі туралы еске салу керек. Пирфенидонның дозасын тәулігіне 801 мг дейін қысқартуға болады (күніне үш рет 267 мг). Егер бөртпе 7 күннен соң басылмаса, ПИРФЕКТ препаратын 15 күнге тоқтатып, дозасын титрлеу кезеңіндегідей, ұсынылған тәуліктік дозасына дейін қайтадан арттыру керек.

Егер бөртпе 7 күннен соң басылмаса, препаратты қабылдауды күнге тоқтату керек, содан соң пациентке емдеудің басындағыдай, дозасын қайтадан ұсынылған деңгейге дейін біртіндеп арттыру курсынан өту қажет болады. Фотосенсибилизацияның ауыр реакциясы немесе бөртпе байқалған пациенттерге, дозасын қабылдауды үзе тұруын және дәрігерге жүгінуін өтіну керек. Бөртпе басылғаннан кейін препаратты қабылдауды қайта бастауға және емдеуші дәрігердің шешімі бойынша дозасын ұсынылған деңгейге дейін арттыруға болады.

Бауыр тарапынан бұзылулар: билирубиннің жоғарылауымен немесе онсыз, аланин және/немесе аспартатаминотрансферазалар (АЛТ / АСТ) едәуір жоғарылаған жағдайда, ұсынымдарға сәйкес, пирфенидонның дозасын түзету немесе емдеуді тоқтату керек.

Пациенттердің ерекше топтары

Балалар

ПИРФЕКТ препараты педиатриялық популяцияда ӨИФ көрсетілімі үшін тиісінше пайдаланылмаған.

Егде жастағы адамдар

65 жас шамасындағы және одан үлкен пациенттер үшін дозасын түзету қажет емес.

Енгізу әдісі мен жолы

Препарат пероральді қолданылады.

Жүрек айнуы мен бас айналуының пайда болуы ықтималдығын азайту үшін, таблетканы тұтастай жұтып, су немесе тамақ ішумен бірге қабылдау қажет.

Артық дозаланған жағдайда қабылдануы тиіс шаралар

Артық дозалануының клиникалық тәжірибесі шектеулі. Пирфенидонның күніне 4806 мг жалпы дозасына дейінгі бірнеше реттік дозалары дені сау ересек еріктілерге дозасын арттырудың 12 күндік мерзімі ішінде күніне үш рет 267 мг алты капсула түрінде енгізілген. Жағымсыз реакциялар жеңіл, өтпелі болды және пирфенидонға анағұрлым жиі кездескен жағымсыз реакцияларға сәйкес келді.

Артық дозалануына күдіктенген жағдайда, тіршілік көрсеткіштерін мониторингілеуді және пациенттің клиникалық статусын мұқият қадағалауды қоса, симптомдық ем жүргізу керек.

Дәрілік препаратты қолдану тәсілін түсіну үшін медицина қызметкерінен кеңес алу жөніндегі ұсынымдар

Препаратты қолдануды дәрігердің тағайындауымен жүзеге асыру қажет

ДП стандартты қолдану кезінде көрініс беретін жағымсыз реакциялардың сипаттамасы және осы жағдайда қабылдау керек шаралар

Өте жиі

• жоғарғы тыныс жолдарының инфекциясы

• салмақ төмендеуі; тәбеттің төмендеуі

• ұйқысыздық

• бас ауыруы, бас айналуы

• ентігу, жөтел

• диспепсия, жүрек айнуы, диарея, гастроэзофагеальді рефлюкс ауруы, құсу, іш қату

• бөртпе

• артралгия

• әлсіздік

Жиі

• несеп шығару жолдарының инфекциясы

• ұйқышылдық, дисгевзия, шаршау

• ысыну

• қақырық бөлінетін жөтел

• іштің кебуі, іштегі жайсыздық сезімдері, іш ауыруы, іштің жоғарғы бөлігінің ауыруы, асқазандағы жайсыздық, гастрит, метеоризм

• АЛТ, АСТ, гамма-глутамилтрансфераза деңгейлерінің жоғарылауы

• фотосенсибилизация реакциясы, қышыну, эритема, терінің құрғауы, эритемалық бөртпе, макулалық бөртпе, қышынумен жүретін бөртпе

• миалгия

• астения; кеуденің экстракардиальді ауыруы

• күнге күю

Сирек

• агранулоцитоз

• АЛТ және АСТ деңгейлерінің жоғарылауымен бірге сарысудағы жалпы билирубин деңгейлерінің жоғарылауы*, бауырдың дәріден зақымдануы

Белгісіз

• Стивенс-Джонсон синдромы*, уытты эпидермалық некролиз

Жағымсыз дәрілік реакциялар туындаған кезде медицина қызметкеріне, фармацевтика қызметкеріне немесе дәрілік препараттардың тиімсіздігі туралы хабарламаны қоса, дәрілік препараттарға жағымсыз реакциялар (әсерлер) бойынша ақпараттық деректер базасына тікелей жүгіну қажет

ҚР ДСМ Медициналық және фармацевтикалық бақылау комитеті «Дәрілік заттар мен медициналық бұйымдарды сараптау ұлттық орталығы» ШЖҚ РМК http://www.ndda.kz

Қосымша мәліметтер

Дәрілік препараттың құрамы

Бір таблетканың құрамында

белсенді зат – 801мг пирфенидон

Қосымша заттар: лактоза моногидраты, кальций карбоксиметилцеллюлозасы, натрий кроскармеллозасы, гидроксипропилцеллюлоза L, натрий стеарил фумараты, тазартылған су

Сыртқы түрінің, иісінің,дәмінің сипаттамасы

Ұзынша пішінді, ашық-сарыдан сары түске дейінгі үлбірлі қабықпен қапталған, екі беті дөңес және бір жағында сызығы бар таблеткалар.

Шығарылу түрі және қаптамасы

Мөлдір ПВХ/ПЭ/ПВДХ үлбірден және баспалы алюминий фольгадан жасалған пішінді ұяшықты қаптамаға 5 таблеткадан салынған.

Пішінді ұяшықты 18 қаптама медициналық қолдану жөніндегі қазақ және орыс тілдеріндегі нұсқаулықпен бірге, өндіруші фирманың голограммасы бар картон қорапшаға салынады.

2 жыл.

Жарамдылық мерзімі өткеннен кейін қолдануға болмайды!

Құрғақ жерде, 25°С-ден аспайтын температурада сақтау керек.

Балалардың қолы жетпейтін жерде сақтау керек!

Рецепт арқылы

Өндіруші туралы мәлімет

«Нобел Алматы Фармацевтикалық Фабрикасы» АҚ

Қазақстан Республикасы, Алматы қ., Шевченко к-сі 162 Е.

Телефон нөмірі: (+7 727) 399-50-50

Факс нөмірі: (+7 727) 399-60-60

Электронды пошта nobel@nobel.kz

Тіркеу куәлігінің ұстаушысы

«Нобел Алматы Фармацевтикалық Фабрикасы» АҚ

Қазақстан Республикасы, Алматы қ., Шевченко к-сі 162 Е.

Телефон нөмірі: (+7 727) 399-50-50

Факс нөмірі: (+7 727) 399-60-60

Электронды пошта nobel@nobel.kz

Қазақстан Республикасы аумағында тұтынушылардан дәрілік заттардың сапасына қатысты шағымдарды (ұсыныстарды) қабылдайтын және дәрілік заттың тіркеуден кейінгі қауіпсіздігін қадағалауға жауапты ұйымның атауы, мекенжайы және байланыс деректері (телефон, факс, электронды пошта)

«Нобел Алматы Фармацевтикалық Фабрикасы» АҚ

Қазақстан Республикасы, Алматы қ., Шевченко к-сі 162 Е.

Телефон нөмірі: (+7 727) 399-50-50

Факс нөмірі: (+7 727) 399-60-60

Электронды пошта nobel@nobel.kz