НООФЕН® (NOOPHENUM®) (250 мг)

• русский
• қазақша

• Скачать инструкцию медикамента

Саудалық атауы

НООФЕН® (NOOPHENUM®)

Халықаралық патенттелмеген атауы

Жоқ

Дәрілік түрі

Капсулалар 250 мг

Құрамы

Бір капсула құрамында

белсенді зат – фенибут 250 мг

қосымша заттар: лактоза моногидраты, картоп крахмалы, кальций стеараты.

Қатты капсула корпусының және қақпағының құрамы: титанның қостотығы (Е171), желатин.

Сипаттамасы

Ақ түсті қатты желатинді капсулалар № 0, құрамында ақтан аздап крем реңді ақ түске дейінгі ұнтақ бар.

Фармакотерапиялық тобы

Психоаналептиктер. Психостимуляторлар және ноотроптар. Психостимуляторлар және басқа ноотроптар. Фенибут.

АТХ коды N06ВX22

Фармакологиялық қасиеттері

Фармакокинетикасы

Сіңірілуі және таралуы

Ішке қабылдаудан кейін препарат асқазан-ішек жолынан жақсы сіңіріледі және организмнің бүкіл тіндеріне өтеді, гематоэнцефалдық бөгетті басып өтеді. Ми тініне препараттың енгізілген дозасының шамамен 0,1 % өтеді, жас және егде жастағы адамдарда ересектерге қарағанда көп дәрежеде болуы мүмкін. Препараттың қандағы ең жоғарғы концентрациясына 3 сағаттан соң қол жетеді. Ең үлкен байланыс бауырда (80 %) жүреді, аталған байланыс ерекше болып табылмайды.

Метаболизмі және шығарылуы

80-95 % доза бауырда фармакологиялық тұрғыдан белсенді емес метаболиттерге дейін метаболизденеді. Шамамен 5 % өзгермеген күйде бүйрекпен шығарылады. Жартылай шығарылу кезеңі 5 сағатты құрайды. Қайта енгізгенде жинақталуы байқалмады.

Фармакодинамикасы

Ноофен мидың жүйке жасушаларында метаболизмдік үдерістерге ықпал етеді. Ноофеннің әсер етуші заты – фенибутты γ-аминомай қышқылының (ГАМҚ) туындысы немесе β-фенилэтиламин туындысы ретінде қарастыруға болады. Ноофен ноотропты белсенділікке ие, ал ГАМҚ туындысы ретінде анксиолитикалық (транквилизациялаушы) әсерге ие.

Ноофен ширығудың, мазасыздықты, қорқынышты азайтады және ұйқыны жақсартады, сондықтан оны неврозды емдеу үшін және операциялар алдында қолданады. Ноофен нистагмның латентті кезеңін ұзартады және оның ұзақтығын және айқындылығын қысқартады. Ноофен астения мен вазовегетативті симптомдардың байқалуын, оның ішінде бас ауыруын, тамақтағы ауырлық сезімін, ұйқының бұзылуын, ашушаңдықты, эмоциялық ауытқуды анық төмендетеді. Препарат ақыл-оймен жұмыс істеу қабілетін арттырады. Психологиялық көрсеткіштер (назар аудару, жады, сенсорлық-моторлық реакциялардың жылдамдығы және дәлдігі) Ноофеннің ықпалымен жақсарады. Астениясы бар пациенттерде және эмоциялық ауытқуы бар пациенттерде емнің алғашқы күнінен-ақ субъективті өзін-өзі сезінуі жақсарады, қызығушылығы және бастамашылығы, қызмет мотивациясы жоғарылайды.

Қолданылуы

• Астениялық және үрейлік-невроздық жағдайлар: мазасыздық, қорқыныш, үрей; егде жастағы пациенттерде – ұйқысыздық, түнгі мазасыздық; операциялар алдындағы стресс жағдайларының профилактикасы

• Меньер ауруы және шығу тегі әр түрлі вестибулярлы анализатор дисфункциясымен байланысты бас айналуы

• Кинетоздардың профилактикасы (өзіне тән симптомдарымен вестибулярлық аппараттың спецификалық бұзылуы: жалпы дімкәстік, қозғалыстағы көлікте болумен байланысты жүрек айнуы, құсу, мысалы, қайықта немесе ұшақ)

• Балалардағы кекештенуді және тартылуды емдеу

• Алкогольдік абстиненция синдромын басу үшін кешенді емдегі қосымша дәрі

Қолдану тәсілі және дозалары

Ішке, сумен жұтып. Капсуланы шайнауға болмайды.

Ересектерге күніне 3 рет 250-500 мг тағайындайды. Жоғарғы бір реттік дозалар: ересектер үшін  750 мг, 60 жастан асқан адамдар үшін  500 мг. Емдеу курсы  2-3 апта. Қажет жағдайда курсты 4-6 аптаға дейін ұзартуға болады.

Балаларға 11 жастан 14 жасқа дейін  күніне 2-3 рет 250 мг. 14 жастан асқан балаларға  ересектерге арналған дозалар.

Алкогольдік абстиненциялық синдромды басу үшін емнің алғашқы күндерінде күні бойы 3 рет 250-500 мг және тәуліктік дозаны әдеттегі дозаға дейін біртіндеп төмендетумен түнге 750 мг қабылдайды.

Шығу тегі инфекциялық вестибулярлық анализатор дисфункциясында (отогенді лабиринтит) бас айналуын және Меньер ауруының өршу кезеңінде 5-7 күн бойы тәулігіне 3-4 рет 750 мг тағайындайды. Вестибулярлық бұзылыстардың айқындығын төмендету кезінде  5-7 күн бойы тәулігіне 3 рет 250-500 мг препараттан және сосын  5 күн бойы тәулігіне 1 рет 250 мг тағайындайды. Салыстырмалы түрде аурудың жеңіл ағымында 5-7 күн бойы тәулігіне 2 рет 250 мг, сосын 7-10 күн бойы тәулігіне 1 рет 250 мг қабылдайды.

Шығу тегі қантамырлық және жарақаттық вестибулярлық анализатор дисфункцияларында бас айналуын емдеу үшін 12 күн бойы тәулігіне 3 рет 250 мг тағайындайды.

Теңізде болу жағдайларында жүрек айнуының профилактикасы үшін болжамды жүрек айнуының басталуына дейін немесе теңіз ауруының алғашқы симптомдары пайда болған кезде бір рет 250-500 мг тағайындайды. Ноофеннің жүрек айнуына қарсы әсері препарат дозасын ұлғайтқанда күшейеді. Теңіз ауруының айқын белгілері (құсу және т.с.с.) басталғанда препарат қабылдау тіпті 750-1000 мг дозаларда да тиімділігі аз болады.

Әуе ауруының профилактикасы үшін ұшуға дейін бір сағат бұрын бір рет 250-500 мг тағайындайды.

Пациенттердің ерекше топтары

Бауыр функциясы бұзылған пациенттерде Ноофен препаратының жоғарғы дозалары гепатоуыттылық туындатуы мүмкін. Аталған топтың пациенттеріне аз тиімді дозалар тағайындалады.

Емдік дозаларды қабылдағанда Ноофен препаратының бүйрек функциясы бұзылған пациенттерге жағымсыз ықпалы туралы деректер жоқ.

Дәрілік затқа тәуелділік және дағдылану байқалмайды, «тоқтату синдромы» жоқ.

Егер қабылдауды жіберіп алсаңыз, ол туралы есіңізге түскенде препаратты бірден қабылдаңыз, бірақ келесі қабылдау уақыты болып қалса қабылдамаңыз. Ешқашан қосарлы дозаны қабылдамаңыз.

Жағымсыз әсері

Ноофен, басқа дәрілер сияқты, барлық пациенттерде байқалмайтын жағымсыз әсерлер туындатуы мүмкін. Ноофеннің әдетте жағымдылығы жақсы.

Даму жиілігі бойынша жағымсыз реакциялардың жіктеуі: өте жиі (≥ 1/10); жиі (≥ 1/100 < 1/10 дейін); жиі емес (≥ 1/1000 < 1/100 дейін); сирек (≥ 1/10 000 < 1/1000 дейін); өте сирек (< 1/10 000); байқалу жиілігі белгісіз (қолжетімді деректер бойынша анықтау мүмкін емес).

Сирек

• аллергиялық реакциялар (тері бөртпесі, қышыну)

Байқалу жиілігі белгісіз (қолжетімді деректер бойынша анықтау мүмкін емес)

• ұйқышылдық, ашушаңдықтың күшеюі, қозу, үрей (емнің басында)

• жүрек айнуы (емнің басында)

• бас ауыруы, бас айналуы (күніне 2 г артық дозаларда қабылдағанда, дозаны төмендеткенде жағымсыз әсерлердің айқындығы төмендейді)

• гепатоуыттылық (жоғарғы дозаларды ұзақ қолданғанда).

Дәрілік затты дұрыс қолданбаса балаларда эмоциялық тұрақсыздық және ұйқының бұзылуы байқалуы мүмкін екендігі туралы деректер бар.

Егер Сізде аталған нұсқаулықта көрсетілген қандай да бір жағымсыз әсерлер пайда болса немесе аталған жағымсыз әсерлердің қандай да бірі аса күшті білінсе дәрігерге қаралуды сұраймыз.

Қолдануға болмайтын жағдайлар

• препараттың әсер етуші затына немесе қосымша заттарына жоғары сезімталдық

• 11 жасқа дейінгі балалар (аталған дәрілік түрі үшін)

• жүктілік және лактация кезеңі

Дәрілермен өзара әрекеттесуі

Ноофен препаратының және онымен үйлесетін дәрілік заттардың дозасын төмендете отырып, Ноофенді психотропты препараттармен біріктіруге болады.

Ұйықтататын, есірткілік анальгетиктердің, паркинсонизмге қарсы дәрілердің, транквилизаторлардың және нейролептиктердің әсерін ұзартады және күшейтеді.

Айрықша нұсқаулар

Препараттың тітіркендіруші әсеріне байланысты асқазан-ішек жолының эрозиялық-ойықжаралы аурулары бар науқастарға сақтық таныту керек. Бұл науқастарға препараттың аз дозалары тағайындалады. Ұзақ қолданғанда бауыр функциясының көрсеткіштерін және шеткері қан көрінісін бақылау қажет.

Препараттың құрамында лактоза моногидраты бар. Сирек туа біткен галактоза жақпаушылығы, Lapp лактаза тапшылығы немесе глюкоза-галактоза мальабсорбциясы бар пациенттерге қолданбау керек.

Дәрілік заттың көлік құралын немесе қауіптілігі зор механизмдерді басқару кезіндегі ықпал ету ерекшеліктері

Ұйқышылдық, бас айналуы немесе орталық жүйке жүйесі тарапынан болатын басқа бұзылыстар байқалатын науқастарда емдеу кезінде көлік құралдарын басқаруға немесе механизммен жұмыс істеуге болмайды.

Артық дозалануы

Артық дозалану жағдайлары белгісіз. Препараттың уыттылығы аз.

Симптомдары: ұйқышылдық, жүрек айнуы, құсу, бас айналуы. Жоғарғы дозаларда ұзақ қолданғанда эозинофилия, артериялық гипотензия, бауырдың майлы дистрофиясы, бүйрек функциясының бұзылуы дамуы мүмкін.

Емі: улану кезінде асқазанды шаю, белсендірілген көмір қабылдау, демеуші және симптоматикалық ем жүргізіледі. Спецификалық антидоты жоқ.

Артық дозалануға күдік болғанда дәрігерді шақыру қажет.

Шығарылу түрі және қаптамасы

10 капсуладан поливинилхлорид үлбірден және алюминий фольгадан жасалған пішінді ұяшықты қаптамада.

2 пішінді ұяшықты қаптамадан медициналық қолдану жөніндегі мемлекеттік және орыс тіліндегі нұсқаулықпен бірге картон қорапшаға салынады.

Сақтау шарттары

Құрғақ, жарықтан қорғалған жерде, 25 °С-ден аспайтын температураса сақтау керек.

Балалардың қолы жетпейтін жерде сақтау керек.

Сақтау мерзімі

2 жыл

Қаптамасында көрсетілген жарамдылық мерзімі өткеннен кейін қолдануға болмайды.

Дәріханалардан босатылу шарттары

Рецепт арқылы

Тіркеу куәлігінің ұстаушысы/Өндіруші

«ОЛАЙНФАРМ» АҚ

Мекенжайы: Рупницу көшесі, 5, Олайне, LV-2114, Латвия.

Қазақстан Республикасы аумағында тұтынушылардан дәрілік заттардың сапасына қатысты шағымдарды (ұсыныстарды) қабылдайтын және дәрілік заттың тіркеуден кейінгі қауіпсіздігін қадағалауға жауапты ұйымның атауы, мекенжайы және байланыс деректері (телефон, факс, электрондық поштасы):

«Олайнфарм» АҚ өкілдігі

050009 Алматы қ-сы, Абай даңғылы 151/115, 807 кеңсе

Телефон / факс 007 727 333 46 52

E-mail olainfarm.instr@mail.ru