Кутипин (200 мг)

• русский
• қазақша

• Скачать инструкцию медикамента

Саудалық атауы

Кутипин

Халықаралық патенттелмеген атауы

Кветиапин

Дәрілік түрі

Үлбірлі қабықпен қапталған 100 мг, 200 мг, 300 мг таблеткалар

Құрамы

Бір таблетканың құрамында

белсенді зат: 115.12 мг, 230.24 мг, 343.36 мг кветиапин фумараты (кветиапинге баламалы) - 100.00, 200.00, 300.00

қосымша заттар: силикондалған микрокристалды целлюлоза (Prosolv SMCC 90), кросповидон (Полипласдон XL-10), сусыз коллоидты кремнийдің қостотығы, полисорбат 80, сусыз лимон қышқылы, кремнийдің қостотығы (Syloid 244 FP), магний стеараты, опадри ақ II 33F58617, опадри сары II 33F82557.

Қабықтың құрамы: опадри ақ II 33F58617: лактоза моногидраты, гипромеллоза, полиэтиленгликоль/макрогол, титанның қостотығы (Е 171);

опадри сары II 33F82557: лактоза моногидраты, гипромеллоза, полиэтиленгликоль/макрогол, титанның қостотығы (Е 171), темірдің сары тотығы (Е 172).

Сипаттамасы

Дөңгелек пішінді, екі беті дөңес, бір жағында сызығы бар, сары түсті үлбірлі қабықпен қапталған таблеткалар (100 мг доза үшін).

Дөңгелек пішінді, екі беті дөңес, бір жағында сызығы бар, ақ түсті үлбірлі қабықпен қапталған таблеткалар (200 мг доза үшін).

Капсула пішінді, бір жағында сызығы бар, ақ немесе ақ дерлік түсті үлбірлі қабықпен қапталған таблеткалар (300 мг доза үшін).

Фармакотерапиялық тобы

Психотропты препараттар. Нейролептиктер. Дибензодиазепиндер және олардың туындылары. Кветиапин.

АТХ коды N05AH04

Фармакологиялық қасиеттері

Фармакокинетикасы

Ішу арқылы қолданғанда кветиапин асқазан-ішек жолынан жақсы сіңеді және бауырда белсенді метаболизденеді. Ас ішу кветиапин биожетімділігіне елеулі әсер етпейді. Шамамен 83% кветиапин қан плазмасы ақуыздарымен байланысады. N-дезалкил кветиапин белсенді метаболитінің тепе-тең молярлық концентрациясы кветиапиннің осындайынан 35% құрайды. Кветиапин мен N-дезалкил кветиапиннің жартылай шығарылу кезеңі, тиісінше, 7 және 12 сағатқа жуық құрайды. Кветиапин және N-дезалкил кветиапин фармакокинетикасы дозаға байланысты, ерлер мен әйелдердегі фармакокинетикалық көрсеткіштерінде айырмашылық байқалмайды.

Егде жастағы емделушілердегі кветиапиннің орташа клиренсі 18-ден 65 жасқа дейінгі емделушілердегіден 30-50% аз.

Кветиапиннің орташа плазмалық клиренсі бүйрек жеткіліксіздігі ауыр емделушілерде (креатинин клиренсі 30 мл/мин/1,73м2 аз) шамамен 25% төмендейді. Бауыр жеткіліксіздігі (компенсацияланған алкоголь циррозы) бар емделушілерде кветиапиннің орташа плазмалық клиренсі шамамен 25% төмендеген. Кветиапин бауырда қарқынды метаболизденетіндіктен бауыр жеткіліксіздігі бар емделушілерде кветиапиннің плазмалық концентрациясы жоғарылауы мүмкін, бұл дозаны түзетуді талап етеді.

Плазмадағы бос кветиапин мен N-дезалкил кветиапин фракциясының орташа 5%-дан аз молярлық дозасы несеппен шығарылады. Кветиапиннің шамамен 73% несеппен және 21% нәжіспен шығарылады. 5%-дан аз кветиапин метаболизмге ұшырамайды және өзгеріссіз күйде бүйрекпен немесе нәжіспен шығарылады.

Фармакодинамикасы

Кветиапин – ми нейротрансмиттерлік рецепторларының көп санына антагонистік әсерлер көрсететін атиптік антипсихоздық препарат. Кветиапин және оның белсенді метаболиті - норкветиапин серотониндік (5-HT1A және 5-HT2), допаминдік D1 және D2, гистаминдік (H1) және адренергиялық α1 және α2-рецепторлармен тектес болып келеді. Допаминдік D1 және D2- рецепторларға қарағанда, 5-HT2-рецепторларының өте күшті тежегіші болып табылады. Кветиапиннің гистаминдік (H1) және α1–адренорецепторлармен де тектестігі жоғары, ал α2–адренорецепторлармен тектестігі төмен. М-холинорецепторлармен және бензодиазепиндік рецепторлармен тектес емес. Кветиапиннің әсер ету механизмі, басқа да антипсихоздық дәрілер сияқты, белгісіз. Препараттың антипсихоздық және сирек экстрапирамидалық әсерлері рецепторларға антагонистік әсер ететін ерекше біріктіріліммен байланыстылығы болжанады. Кветиапин қабылдау кезінде ұйқышылдықтың дамуын оның гистаминдік (H1) рецепторлармен жоғары тектестігімен түсіндіруге болады. Кветиапин қабылдау кезінде ортостатикалық гипотензияның дамуы оның α1-адренорецепторлармен тектестігінің жоғары екенімен түсіндіріледі.

Стандартты тестілерде кветиапин антипсихоздық белсенділік танытады.

Ұзақ уақыт енгізілгенде кветиапин дофаминдік D2-рецепторларға аса жоғары сезімталдықты оятпайды және қан плазмасындағы пролактин деңгейінің ұзағырақ артуын туғызбайды.

Қолданылуы

- шизофренияны емдеуде

Қолдану тәсілі және дозалары

Ересектер

Кутипинді ас ішуге байланыссыз қолдануға болады.

Кутипин таблеткаларын күніне екі немесе үш рет қабылдаған жөн.

Кутипинді, әдетте, күніне екі рет 25 мг бастапқы дозада қабылдау керек. Емнің алғашқы 4 күніндегі тәуліктік дозасы: 1-ші тәулікте – 50 мг, 2-ші тәулікте – 100 мг, 3-ші тәулікте – 200 мг, 4-ші тәулікте – 300 мг құрайды.

4-ші тәуліктен бастап доза, әдетте, тәулігіне 300-ден 450 мг дейінгі шектегі тиімді дозасына дейін таңдалуы тиіс. Клиникалық тиімділігіне және емделушідегі жеке көтерімділігіне қарай, доза тәулігіне 150-ден 750 мг дейінгі шекте ауытқуы мүмкін. Ең жоғары ұсынылатын тәуліктік дозасы 750 мг құрайды.

Егде жастағылар

Егде жастағы емделушілерде Кутипиннің бастапқы дозасы 25 мг/тәулік құрайды. Дозаны жас емделушілердегіден азырақ болуы ықтимал тиімді дозасына жеткенше күн сайын 25-50 мг арттыру керек.

Бүйрек жеткіліксіздігі бар емделушілер

Дозаны түзету қажет емес.

Бауыр жеткіліксіздігі бар емделушілер

Кветиапин бауырда қарқынды метаболизденеді. Сондықтан бауыр және бүйрек жеткіліксіздігі бар емделушілерде, әсіресе, емнің басында Кутипин қолданғанда сақ болған дұрыс. Кутипинмен емдеуді 25 мг/тәулік дозадан бастап, тиімді дозаға жеткенше күн сайын дозаны 25-50 мг арттыру ұсынылады.

Педиатрияда қолдану

Қауіпсіздігі мен тиімділігі анықталмаған​​.

Жағымсыз әсерлері

Өте жиі (>10%):

- ұйқышылдық, бас айналу, бас ауыру

- ауыздың кеберсуі

- триглицеридтер, жалпы холестерин (ең алдымен, тығыздығы төмен липопротеидтер холестерині – ТТЛП) концентрацияларының жоғарылауы

- тығыздығы жоғары липопротеидтер холестерині (ТЖЛП) концентрациясының төмендеуі

- «тоқтату»синдромы

- денеге салмақ қосу

- гемоглобин концентрациясының төмендеуі

- экстрапирамидалық симптомдар

Жиі (≥1% және <10%):

- лейкопения, нейтропения, эозинофилия

- гиперпролактинемия

- әдеттен тыс және шым-шытырық түстер көру, ашушаңдық

- дизартрия

- тахикардия, жүрек қағу, ортостатикалық гипотензия

- анық көрмеу

- іш қату, диспепсия, құсу, тәбеттің артуы

- айқындылығы әлсіз астения

- шеткергі ісінулер

- аланинаминотрансфераза (АЛТ) белсенділігінің жоғарылауы

- гаммаглутамилтрансфераза (ГГТ) белсенділігінің жоғарылауы

- жалпы және бос Т4 концентрациясының төмендеуі

- жалпы Т3 концентрациясының төмендеуі

- ТТГ концентрациясының жоғарылауы

- гипергликемия

- ентігу

- қызба

Жиі емес (≥0,1% - <1%):

- аса жоғары сезімталдық реакциялары

- құрысулар, мазасыз аяқтар синдромы, кешеуілді дискинезия, естен тану

- ринит

- дисфагия

- аспартатаминотрансфераза (АСТ) белсенділігінің жоғарылауы

- тромбоцитопения

- бос Т3 концентрациясының төмендеуі

Сирек (≥0,01 - <0,1%):

- сарғаю

- приапизм, галакторея

- қатерлі нейролептикалық синдром, гипотермия

- креатинфосфокиназа белсенділігінің жоғарылауы

- сомнамбулизм және ұқсас құбылыстар

Өте сирек (<1/10000):

- анафилактикалық реакциялар

- қант диабеті

- гепатит

- ангионевротикалық ісіну, Стивенс-Джонсон синдромы

QT аралығының ұзаруы, қарыншалық аритмия, кенет өлім, жүректің тоқтауы және екі бағытты қарыншалық тахикардия нейролептиктерге тән жағымсыз әсерлер болып саналады.

Қолдануға болмайтын жағдайлар

- препарат компоненттерінің кез келгеніне жоғары сезімталдық

- азолдар тобының зеңге қарсы препараттары, эритромицин, кларитромицин және нефазодон сияқты Р450 цитохромының тежегіштерімен, сондай-ақ протеаза тежегіштерімен бірге қолдану

- 18 жасқа дейінгі балалар мен жасөспірімдерге

Сақтықпен: кардиоваскулярлық және цереброваскулярлық аурулары немесе артериялық гипотензияға бейімдейтін басқа да жай-күйлері бар емделушілерде, егде жас, бауыр жеткіліксіздігі, сыртартқыдағы құрысу ұстамалары.

Дәрілермен өзара әрекеттесуі

Кутипинді орталық жүйке жүйесіне әсер ететін басқа препараттармен, сондай-ақ алкогольмен біріктіріп қолданғанда сақ болу керек.

Р450 (CYP) цитохромының 3А4 изоферменті Р450 цитохромы жүйесі арқылы жүзеге асатын Кутипин метаболизміне жауап беретін негізгі изофермент болып табылады. Дені сау еріктілердегі зерттеуде Кутипиннің (25 мг дозадағы) CYP3A4 тежегіші - кетоконазолмен бірге тағайындау Кутипиннің «концентрация-уақыт» қисығы астындағы ауданының (AUC) 5-8 есе ұлғаюына алып келді. Сондықтан Кутипин мен CYP3A4 цитохромы тежегіштерін бірге тағайындау қарсы көрсетілімді. Сонымен қатар, кветиапинді грейпфрут шырынымен бірге қабылдау ұсынылмаған.

Фармакокинетикалық зерттеуде әр түрлі дозаланған Кутипинді карбамазепин қабылдауға дейін және онымен бір мезгілде тағайындау, Кутипинді карбамазепинсіз қабылдаумен салыстырғанда, Кутипин клиренсінің едәуір жоғарылауына, тиісінше, AUC орташа 13% азаюына алып келді. Кейбір емделушілерде AUC төмендеуі одан да көп айқын көрініс берді. Осындай өзара әрекеттесу плазмадағы Кутипин концентрациясының төмендеуімен қатар жүреді және Кутипинмен емдеу тиімділігін төмендетуі мүмкін. Кутипинді бауырдың микросомалық жүйесінің басқа индукторы - фенитоинмен бірге тағайындау Кутипин клиренсінің одан да айқын жоғарылауымен (шамамен 450%) қатар жүрген. Кутипинді бауырдың ферменттік жүйесінің индукторларын алатын емделушілерге, егер Кутипинмен емдеуден күтілетін пайда бауыр ферменттерінің индуктор-препаратын тоқтатумен байланысты қатерден артық болған жағдайда ғана, тағайындауға болады. Микросомалық ферменттердің индуктор-препараттарының дозасын өзгерту біртіндеп атқарылуы тиіс. Қажет болса, оларды микросомалық ферменттерді индукциялайтын препараттармен (мысалы, вальпрой қышқылы препараттарымен) алмастыруға болады.

Кутипин фармакокинетикасы имипрамин (CYP2D6 тежегіші) немесе флуоксетин (CYP3A4 және CYP2D6 тежегіші) антидепрессантын бір мезгілде тағайындағанда елеулі өзгермейді.

Кутипин фармакокинетикасы антипсихоздық дәрілік заттар – рисперидонмен немесе галоперидолмен бір мезгілде тағайындағанда елеулі өзгермейді. Алайда, бір мезгілде Кутипин мен тиоридазин қабылдау Кутипин клиренсінің шамамен 70% жоғарылауына алып келді. Тәулігіне 2 рет 250 мг дозада Кутипин қабылдау аясында бір рет 2 мг лоразепам қабылдағанда лоразепам клиренсі шамамен 20% төмендейді.

Литий препараттарының фармакокинетикасы бір мезгілде Кутипин тағайындалғанда өзгермейді. Вальпроат семинатрий және кветиапин бірге тағайындалғанда вальпрой қышқылы мен кветиапин фармакокинетикасында клиникалық мәнді өзгерістер болмаған.

Кутипин мен электролиттік теңгерім бұзылуын және QTc аралығының ұзаруын туындатуға қабілетті препараттарды біріктіріп қолданғанда сақтық шарасын қадағалау керек.

Айрықша нұсқаулар

Ұйқышылдық

Кутипинмен емделу кезінде ұйқышылдық және онымен байланысты симптомдар, мысалы, седация болуы мүмкін. Айқын ұйқышылдық дамығанда биполярлық бұзылыстар құрылымындағы депрессияға шалдыққан емделушілердің ұйқышылдық пайда болған сәттен бастап 2 апта бойы және симптомдар айқындылығы азайғанша дәрігерге жиірек қаралуы талап етіледі. Кейбір жағдайларда Кутипинмен емдеуді тоқтату қажет болуы мүмкін.

Жүрек-қантамыр аурулары бар емделушілер

Жүрек-қантамырлық және цереброваскулярлық аурулары және гипотензияға беймдейтін басқа да ахуалдары бар емделушілерге Кутипин тағайындалғанда сақ болу керек. Кутипинмен емделу аясында, әсіресе, емнің басында дозаны титрлеу кезінде ортостатикалық гипотензия пайда болуы мүмкін. Ортостатикалық гипотензия туындағанда дозаны азайту немесе оны едәуір баяу титрлеу қажет болуы ықтимал.

Дисфагия

Кутипин препаратымен емдеу кезінде дисфагия мен аспирация байқалды. Аспирациялық пневмония пайда болуының Кутипин препаратын қабылдаумен себеп-салдарлы байланысы анықталмаған. Алайда, препаратты аспирациялық пневмонияның пайда болу қаупі бар емделушілерге тағайындағанда сақ болу керек.

Құрысу ұстамалары

Кутипин немесе плацебо қабылдаған емделушілерде құрысулардың даму жиілігіндегі айырмашылық анықталмаған. Дегенмен, басқа да антипсихоздық дәрілік заттармен ем кезіндегідей, сыртартқысында құрысу ұстамалары болған емделушілерді емдегенде сақ болу ұсынылады.

Экстрапирамидалық симптомдар

Биполярлық бұзылыстар құрылымындағы депрессияға шалдыққан ересек емделушілерде депрессиялық көріністерге орай Кутипин қабылдағанда, плацебомен салыстырғанда, ЭПС пайда болуы көп жиілеген.

Кешеуілді дискинезия

Кешеуілді дискинезия симптомдары дамыған жағдайда препарат дозасын азайту немесе оны біртіндеп тоқтату ұсынылады.

Қатерлі нейролептикалық синдром

Антипсихоздық препараттар, соның ішінде Кутипин қабылдау аясында қатерлі нейролептикалық синдром дамуы мүмкін. Синдромның клиникалық көріністері өзінде гипертермия, ментальді статус өзгерісін, бұлшықет сіресуін, вегетативтік жүйке жүйесінің құбылуын, креатинфосфокиназа белсенділігінің жоғарылауын қамтиды. Мұндай жағдайларда Кутипинді тоқтатып, тиісті ем жүргізу қажет.

Айқын нейтропения

Айқын нейтропения жағдайларының көпшілігі Кутипинмен емдеу басталғаннан кейін бірнеше айдан соң пайда болды. Дозаға тәуелді әсері анықталмаған. Лейкопения және/немесе нейтропения Кутипинмен емдеу тоқтатылғаннан кейін басылды. Нейтропенияның пайда болуы болжанатын қауіп факторы осының алдында лейкоциттер санының төмендеуі мен сыртартқыдағы дәрілермен индукцияланған нейтропения жағдайлары болып табылады. Нейтрофильдер саны <1,0 х 109 /л болатын емделушілерде Кутипин қабылдауды тоқтату керек. Емделушіні жұқпаның болжамды симптомдарын анықтау үшін қадағалап, нейтрофильдер деңгейін (1,5 х 109 /л деңгейінен асып кеткенше) бақылап отыру қажет.

Гипергликемия

Кутипин қабылдау аясында гипергликемияның дамуы немесе сыртартқысында қант диабеті бар емделушілерде қант диабетінің өршуі мүмкін. Қант диабеті бар емделушілерге және қант диабетін дамытатын қауіп факторлары бар емделушілерге клиникалық қадағалау ұсынылады.

Липидтер деңгейі

Кутипин қабылдау аясында триглицеридтер мен холестерин концентрацияларының жоғарылауы, сондай-ақ ТЖЛП концентрациясының төмендеуі мүмкін. Сондықтан липидтер деңгейін бақылау керек.

Метаболикалық бұзылулар

Кейбір емделушілерде денеге салмақ қосу, қандағы глюкоза мен липидтер концентрациясының жоғарылауы метаболикалық бейіннің нашарлауына әкелуі мүмкін, бұл тиісінше бақылауды талап етеді.

QT аралығының ұзаруы

Кутипин қабылдау мен QT аралығының абсолютті шамасының арасындағы өзара байланыс анықталмаған. Алайда QT аралығының ұзаруы препарат артық дозаланғанда білінді. Кутипин, басқа да антипсихоздық препараттар сияқты, жүрек-қантамыр аурулары бар және бұрын QT аралығының ұзаруы болған емделушілерге тағайындалғанда сақ болу керек. Сонымен қатар, Кутипин бір мезгілде QTс аралығын ұзартатын препараттармен, басқа нейролептиктермен тағайындалғанда, әсіресе, егде жастағы тұлғаларда, туа біткен QT аралығының ұзару синдромы, созылмалы жүрек жеткіліксіздігі, миокард гипертрофиясы, гипокалиемия немесе гипомагниемиясы бар емделушілерде сақ болу қажет.

Препаратты тоқтатумен байланысты жедел реакциялар

Кутипин күрт тоқтатылғанда мынадай жедел реакциялар («тоқтату» синдромы) – жүрек айну, құсу, ұйқысыздық, бас ауыру, бас айналу және ашушаңдық байқалуы мүмкін. Психоздық симптомдардың оралуы болуы мүмкін, сондай-ақ еріктен тыс қимыл-қозғалыс бұзылыстарының (акатизия, дистония және дискинезия сияқты) пайда болуы хабарланған. Сондықтан препаратты, кем дегенде, бір немесе екі апта ішінде біртіндеп тоқтату ұсынылады.

Деменциясы бар егде жастағы емделушілер

Кутипин деменциямен байланысты психоздарды емдеу үшін көрсетілмеген.

Кейбір атиптік нейролептиктер рандомизацияланған плацебо-бақыланатын зерттеулерде деменциясы бар емделушілердегі цереброваскулярлық асқынулардың даму қаупін шамамен 3 есе арттырды. Кутипин инсульттің даму қаупі бар емделушілерде абайлап пайдаланылуы тиіс. Егде жастағы емделушілердегі деменциямен байланысты психоздарды емдеу үшін атиптік нейролептиктердің пайдаланылуын талдау осы топтағы препараттарды алған емделушілер тобында, плацебо тобымен салыстырғанда, өлімге көп ұшырау деңгейін анықтады. Осы емделушілерде білінген өліммен аяқталу себептері осы қауым үшін күтілуімен сәйкес болды. Кутипинмен емдеу және деменциясы бар егде емделушілердегі өлімге көп ұшырау қаупінің арасындағы себеп-салдарлы байланыс анықталмаған.

Суицид/суицидтік ойлар немесе клиникалық нашарлау

Биполярлық бұзылыстар кезіндегі депрессия суицидтік ойлардың, өзіне-өзі зақым келтіру мен суицидтің (суицидпен байланысты оқиғалардың) пайда болу қаупінің жоғарылауымен байланысты. Осы қатер айқын ремиссия басталатын сәтке дейін сақталады. Емделушінің ахуалы жақсарғанша емдеудің басынан бірнеше апта немесе одан көп уақыт өтуі мүмкін екеніне орай, емделушілер жақсару басталғанша жіті медициналық қадағалауда болуы тиіс. Жалпы қабылданған клиникалық тәжірибе деректері бойынша, суицид қатері ремиссия басталған ерте сатыларда артуы мүмкін. Емдеу үшін Кутипин тағайындалатын басқа психикалық бұзылыстар да суицидпен байланысты оқиғалар қаупінің жоғарылауымен байланысты. Бұдан басқа, мұндай жай-күйлер депрессиялық көрініспен коморбидті болуы мүмкін. Осылайша, депрессиялық көрінісі бар емделушілерді емдеуде қолданылатын алдын-ала сақтандыру шаралары басқа психикалық бұзылыстарға шалдыққан емделушілерді емдегенде де қабылдануы тиіс. Сыртартқысында суицидтік оқиғалар болған емделушілер, сондай-ақ ем басталар алдында суицидтік ойларын ашық айтатын емделушілер суицидтік ниеттер мен суицидтік әрекеттер қаупі жоғары топқа жатады және емдеу үдерісінде мұқият қадағалануы тиіс.

Жүктілік және лактация кезеңі

Кутипиннің жүкті әйелдердегі қауіпсіздігі мен тиімділігі анықталмаған, талапқа сай және жақсы бақыланған зерттеулер жоқ. Кутипинді жүктілік кезінде, егер әлеуетті пайдасы ұрыққа төнетін зор қатерді ақтайтын жағдайда ғана, пайдалануға болады.

Кветиапиннің ана сүтімен бөлініп шығуы жөнінде жарияланған деректер бар, алайда, сыртқа шығарылу дәрежесі анықталмаған. Әйелдерге Кутипин қабылдау кезінде бала емізбеуге кеңес беру қажет.

Дәрілік заттың көлік құралын немесе қауіптілігі зор механизмдерді басқару қабілетіне әсер ету ерекшеліктері

Кутипин ұйқышылдық туғызуы мүмкін, сондықтан емделу кезеңінде емделушілерге қауіпті болып саналатын механизмдермен жұмыс істеуге кеңес берілмейді, соның ішінде көлік құралдарын басқару ұсынылмайды.

Артық дозалануы

Симптомдары: ұйқышылдық, седация, тахикардия және артериялық қысымның төмендеуі.

Емі: арнайы у қайтарғысы жоқ. Тыныс алу және жүрек-қантамыр жүйесінің функциясын қолдауға бағытталған шаралар жасау, талапқа сай оксигенация мен желдету ұсынылады. Асқазанды шаю (егер емделуші есінен танып қалса, интубациядан кейін) және белсендірілген көмір мен іш жүргізгіш дәрілер тағайындау сіңірілмеген кветиапиннің шығарылуына ықпал етеді, дегенмен осы шаралардың тиімділігі зерттелмеген. Жіті медициналық қадағалау емделушінің жағдайы жақсарғанша жалғасуы тиіс.

Шығарылу түрі және қаптамасы

10 таблеткадан алюминий фольгадан және поливинилхлоридтен жасалған пішінді ұяшықты қаптамаға салады.

3 пішінді қаптамадан медицинада қолданылуы жөніндегі мемлекеттік және орыс тілдеріндегі нұсқаулықпен бірге кар­тон пәшкеге салынады.

Сақтау шарттары

30 0С-ден аспайтын температурада сақтау керек.

Балалардың қолы жетпейтін жерде сақтау керек!

 

Сақтау мерзімі

3 жыл

Қаптамасында көрсетілген жарамдылық мерзімі өткеннен кейін қолдануға болмайды.

Дәріханалардан босатылу шарттары

Рецепт арқылы

Өндіруші

Sun Pharmaceutical Industries Ltd., Үндістан

Қаптаушы ұйымның атауы және елі:

Sun Pharmaceutical Industries Ltd., Үндістан

Тіркеу куәлігінің иесі

Sun Pharmaceutical Industries Ltd., Үндістан

Қазақстан Республикасы аумағында тұтынушылардан өнім (тауар)

сапасына қатысты шағымдар қабылдайтын ұйымның мекенжайы:

050004, Алматы қ., Төлебаев к-сі, 38, 5 қабат

Тел. (727) 250-92-35, факс (727) 250-33-64

sunreports@intelsoft.kz, sunalmaty@intelsoft.kz