Ксельжанс (Тофацитиниб)

Ксельжанс®

Тофацитиниб

Дәрілік түрі, дозасы

Үлбірлі қабықпен қапталған таблеткалар, 5 мг және 10 мг

Антинеопластикалық және иммуномодуляциялайтын препараттар.

Иммуносупрессанттар. Селективті иммуносупрессанттар. Тофацитиниб.

ATХ коды L04AA29

Ревматоидтық артрит

Ксельжанс® препараты ревматизмге қарсы бір немесе бірнеше базистік препараттарға (РҚБП) жауабы жеткіліксіз немесе олар жақпаған кезде ересек пациенттерде метотрексатпен біріктірілімде (МТТ) ауырлық дәрежесі орташа және ауыр белсенді ревматоидтық артритті (РА) емдеуге қолданылады. Ксельжанс®  препараты МТТ жақпаушылығында немесе МТТ-мен емдеу мақсатқа сай емес болған жағдайда монотерапия түрінде қолдануға болады.

Псориаздық артрит

Ксельжанс® препараты метотрексатпен (МТТ) біріктірілімде ревматизмге қарсы базистік препараттарға (РҚБП) жауабы жеткіліксіз немесе олар жақпағанда ересек  пациенттердегі белсенді псориаздық артритті (ПсА) емдеуге қолданылады.

Шорбуынданатын спондилит

Ксельжанс® препараты белсенді шорбуынданатын спондилиті (ШС) бар, стандартты емге жеткіліксіз жауап байқалатын ересек пациенттерді емдеуге қолданылады.

Ойық жаралы колит

Ксельжанс® препараты орташа және ауыр дәрежедегі белсенді ойық жаралы колиті (ОЖК) бар, стандартты терапияға немесе биологиялық препаратқа жауабы жеткіліксіз, жауап жоғалуы немесе жақпаушылығы бар ересек пациенттерді емдеуге арналған.

Ювенильді идиопатиялық артрит (ЮИА)

Ксельжанс® препараты 2 жастағы және одан асқан, РҚБП алдыңғы еміне жеткіліксіз жауабы байқалған пациенттерде белсенді полиартикулярлық ювенильді идиопатиялық артритті (серопозитивті [RF+] немесе серонегативті [RF-] полиартрит және кең таралған олигоартрит) және ювенильді псориазды артритті (ПсА) емдеу үшін көрсетілген.

Ксельжанс® препаратын метотрексатпен (МТТ) біріктірілімде немесе метотрексатқа жақпаушылық жағдайында немесе метотрексатпен емдеуді жалғастыру орынсыз болған жағдайда монотерапия түрінде тағайындауға болады.  

Қолданудың басталуына дейінгі қажетті мәліметтер тізбесі

• белсенді затқа немесе қосымша заттардың кез келгеніне аса жоғары сезімталдық

• белсенді туберкулез (БТ), сепсис сияқты ауыр инфекциялар немесе оппортунистік инфекциялар

• бауырдың ауыр дәрежедегі жеткіліксіздігі

• жүктілік және лактация кезеңі

• тұқым қуалайтын галактоза жақпаушылығы, Лапп лактаза тапшылығы немесе глюкоза-галактоза мальабсорбциясы синдромы

• балалар мен жасөспірімдер (тек 10 мг дозасы үшін)

Қолдану кезіндегі қажетті сақтандыру шаралары

65 жастағы және одан асқан пациенттерде қолдану

65 жастағы және одан асқан пациенттерде Ксельжанс® препаратын қабылдаған кезде күрделі инфекциялардың, миокард инфарктісінің және қатерлі жаңа түзілімдердің және кез келген себептен болатын өлімнің жоғары қаупін ескере отырып, осы пациенттерге Ксельжанс® препаратын қолайлы баламалы емдеу әдістері болмаған кезде ғана қолдану керек.

Ревматизмге қарсы басқа дәрілік заттармен біріктіріп қолдану

Ксельжанс® препаратын қолдану зерттелген жоқ, сондықтан ісік некрозы факторының (ІНФ) антагонистері, интерлейкин (ИЛ)-1R антагонистері, ИЛ-6R антагонистері, CD20-ға моноклондық антиденелер, ИЛ-17 антагонистері, ИЛ-12/ИЛ-23 антагонистері, антиинтегриндер, ко-стимуляцияның іріктемелі модуляторлары және белсенділігі жоғары иммуносупрессанттар, мысалы азатиоприн, 6-меркаптопурин, циклоспорин және такролимус сияқты биологиялық препараттармен біріктіріп пайдаланудан аулақ болу керек, себебі иммуносупрессия күшейген сайын одан әрі инфекцияның даму қаупінің арту мүмкіндігі бар.

Ксельжанс® препаратын МТТ-мен біріктіріп қолданған кезде, Ксельжанс® препаратын монотерапия түрінде қолданған кездегіге қарағанда жағымсыз құбылыстардың жиілігі жоғарылағаны байқалды.

Ксельжанс® препаратының 4 типтегі фосфодиэстераза тежегіштерімен біріктіріп қолданылуы зерттелмеді.

Веналық тромбоэмболия (ВТЭ)

Ксельжанс® препаратын қабылдаған пациенттерде кейбір жағдайларда өліммен аяқталған өкпе артериясының тромбоэмболиясын (ӨАТЭ), сондай-ақ терең веналардың тромбозын (ТВТ) қоса алғанда, ВТЭ күрделі құбылыстары байқалды. Ревматоидтық артритпен ауыратын 50 жастағы немесе одан асқан, жүрек-қантамыр аурулары қаупінің кем дегенде бір қосымша факторы бар пациенттерде ІНФ тежегіштерін қолданумен салыстырғанда Ксельжанс® препаратын қолданғанда ВТЭ қаупінің дозаға тәуелді жоғарылауы байқалды.

Қосымша тереңдетілген талдау нәтижелері бойынша ВТЭ қауіп факторлары белгілі пациенттерде кейінгі ВТЭ жағдайлары тофацитинибпен ем қабылдаған пациенттерде жиі байқалды, оларда 12 ай емдеуден кейін D-димер деңгейі < 2 × қалыптың жоғарғы шегі (ҚЖШ) болған пациенттерге қарағанда D-димер деңгейі ≥ 2 × ҚЖШ құрады; бұл ІНФ тежегіштерімен емделген пациенттерде айқын болмады. Талдап-түсіндіру ВТЭ құбылыстарының саны аздығынан және D-димерде талдаудың қол жетімділігі аз болуымен шектеулі (талдау тек бастапқы деңгейде, 12 айдан кейін және зерттеу соңында жүргізілді). ВТЭ болмаған пациенттерде D-димердің орташа деңгейі барлық емдеу топтарындағы бастапқы деңгейімен салыстырғанда 12 айдан кейін айтарлықтай төмендеді. Алайда, 12 айдан кейін D-димердің ≥ 2 × ҚЖШ деңгейлері ВТЭ кейінгі құбылыстары болмаған пациенттердің шамамен 30%-ында байқалды, бұл D-димерге талдаудың шектеулі ерекшелігін көрсетеді.

ВТЭ, КЖЖҚҚ және қатерлі жаңа түзілімдердің белгілі қауіп факторларымен ОЖК бар пациенттер үшін емдеудің лайықты баламалы емдеу әдістері болмаған жағдайларды қоспағанда, демеуші ем ретінде тәулігіне екі рет 10 мг дозада Ксельжанс® препаратын қолдану ұсынылмайды.

Жүрек-қантамырлық ауруларының немесе қатерлі жаңа түзілімдердің дамуының қауіп факторлары бар пациенттерде (сондай-ақ «Күрделі жағымсыз жүрек-қантамырлық құбылыстар (миокард инфарктісін қоса)» және «Қатерлі жаңа түзілімдер және лимфопролиферациялық ауру» қосалқы бөлімдерін қараңыз) Ксельжанс® тиісті баламалы емдеу әдістері болмаған жағдайда ғана қолданылуы керек.

ВТЭ дамуының қауіп факторлары бар пациенттерде, КЖЖҚҚ немесе қатерлі жаңа түзілімдердің дамуының қауіп факторларын қоспағанда, Ксельжанс® препаратын сақтықпен қолдану керек. ВТЭ қауіп факторлары,

КЖЖҚҚ қауіп факторын немесе қатерлі жаңа түзілімдерді қоспағанда, анамнезінде ВТЭ барын, пациенттерде ауқымды хирургиялық операцияны, иммобилизацияны, біріктірілген гормондық контрацептивтерді немесе гормондық орын басу емін қолдануды, қан ұюдың тұқым қуалайтын бұзылысын қамтиды. Ксельжанс® препаратымен емдеу барысында ВТЭ қаупінің өзгерістерін талдау үшін пациенттердің жағдайын қайта бағалауды кезең-кезеңмен жүргізген жөн.

Белгілі ВТЭ қауіп факторлары бар РА шалдыққан пациенттер үшін шамамен 12 ай емдеуден кейін D-димер деңгейін анықтау мүмкіндігін қарастыру керек. Егер D-димерге талдау нәтижесі ≥ 2 × ҚЖШ құраса, Ксельжанс® препаратымен емдеуді жалғастыру туралы шешім қабылдағанға дейін клиникалық пайдасы қаупінен асып түсетініне көз жеткізу керек.

ВТЭ белгілері мен симптомдары бар пациенттерге дереу тексеріс жүргізу және дозасына немесе қолданылуына қарамастан, ВТЭ-ға күдік бар пациенттерде Ксельжанс® препаратын қолдануды тоқтату қажет.

Торқабықтың веналық тромбозы (ТВТ)

Тофацитиниб қабылдаған пациенттерде торқабықтың веналық тромбозы (ТВТ) жағдайлары туралы хабарланды. Пациенттерге ТВТ бар екенін көрсететін симптомдар пайда болған жағдайда дереу медициналық көмекке жүгінуге кеңес беру керек.

Күрделі инфекциялар

Ксельжанс® препаратын қабылдаған пациенттерде бактериялық, микобактериялық, инвазиялық зеңдік, вирустық немесе басқа шартты-патогенді микроорганизмдер туындатқан күрделі және кейде өліммен аяқталған инфекциялар туралы хабарланды. Оппортунистік инфекциялардың пайда болу қаупі Азия аймақтарында тұратын пациенттерде жоғары. Глюкокортикостероидтарды қабылдайтын ревматоидтық артритке шалдыққан пациенттер инфекцияларға бейім болуы мүмкін.

Оқшауланған инфекцияларды қоса, белсенді инфекциялары бар пациенттерде Ксельжанс® препаратын қолдануды бастамау керек.

Ксельжанс® препаратын тағайындар алдында оны мына пациенттерде қолданудың қаупі мен пайдасын бағалау керек:

• қайталанған инфекциясы бар;

• анамнезінде күрделі немесе оппортунистік инфекциясы бар;

• микоздар бойынша эндемиялық аймақтарда тұратындар немесе

саяхаттайтындар;

• инфекцияның дамуына бейім болуы мүмкін қатарлас патологиялық

жай-күйлері бар.

Ксельжанс® препаратымен емдеу барысында және оны аяқтағаннан кейін пациенттерде инфекция белгілері мен симптомдарының дамуын мұқият бақылау керек. Егер пациентте ауыр инфекция, оппортунистік инфекция

немесе сепсис дамыса, Ксельжанс® препаратымен емдеуді тоқтату керек. Ксельжанс® препаратымен емдеу кезінде жаңа инфекция дамитын пациент иммунитеті әлсіреген пациенттерге жарамды жедел және толық диагностикалық тексеруден өту керек; бактерияға қарсы тиісті емді бастау керек, ал пациентті мұқият бақылау қажет.

Егде жастағы пациенттер мен қант диабетіне шалдыққан пациенттерде жалпы алғанда инфекциялардың жоғары жиілігі байқалатындықтан, мұндай пациенттерді емдеу кезінде сақ болу керек. 65 жастағы және одан асқан пациенттерді Ксельжанс® препаратымен емдеуді емнің қолайлы баламалы әдістері болмаған жағдайда ғана қарау керек.

Инфекцияның даму қаупі лимфопения дәрежесінің жоғарылауымен артуы мүмкін, пациентте инфекцияның жеке даму қаупін бағалау кезінде лимфоциттердің санына назар аудару керек. Тоқтату және лимфопенияны мониторингілеу критерийлері «Дозалау режимі» бөлімінде талқыланады.

Туберкулез

Ксельжанс® препаратын тағайындар алдында оны мына пациенттерде қолданудың қаупі мен пайдасын бағалаған жөн:

• анамнезінде туберкулезі бар;

• туберкулез бойынша эндемиялық аймақтарда тұратындар немесе

саяхаттайтындар.

Ксельжанс® препаратымен емді бастағанға дейін және ем кезінде пациенттің жай-күйіне баға беру және қолданылатын нұсқауларға сәйкес жасырын немесе белсенді инфекцияға тексеру жүргізу керек.

Жасырын туберкулезбен ауыратын, осы инфекцияға оң тексеру нәтижесі бар пациенттерге Ксельжанс® препаратымен емдеу басталғанға дейін микобактерияға қарсы стандартты ем курсынан өту керек.

Сондай-ақ туберкулезге тексерудің нәтижесі теріс, бірақ анамнезінде жасырын немесе белсенді туберкулезі бар, талапқа сай емдеу курсы расталмаған пациенттерде, сондай-ақ туберкулезге тексерудің нәтижесі теріс, бірақ туберкулездік инфекцияның даму қаупінің факторлары бар пациенттерде Ксельжанс® препаратымен қолдануды бастағанға дейін туберкулезге қарсы ем жүргізу мәселесін қарастыру керек. Нақты бір пациентте туберкулезге қарсы емді бастау мақсатқа сай ма, жоқ па деген шешім қабылдауды оңайлату үшін туберкулезді емдеу тәжірибесі бар медицина қызметкеріне жүгіну ұсынылады. Емді бастар алдында пациенттерде, оның ішінде жасырын туберкулезге теріс нәтижесі барларында туберкулездің даму белгілері мен симптомдарының бар-жоғын мұқият бақылау керек.

Вирустың реактивациясы

Ксельжанс® препаратын қабылдаған пациенттерде герпес вирусының (мысалы, белдемелі герпес) реактивациясы жағдайларын қоса алғанда, вирустық инфекциялардың реактивация жағдайлары байқалды.

Белдемелі герпестің пайда болу жиілігі, шамасы, жоғарылаған:

• Шығу тегі азиялық пациенттерде

• Лимфоциттердің саны (ЛАС) 1000 жасуша/мм3 аз болатын пациенттерде

• Ұзаққа созылған РА шалдыққан, бұрын бір немесе бірнеше биологиялық РҚБП-мен емделген пациенттерде

• Тәулігіне екі рет 10 мг қабылдаған пациенттерде

Ксельжанс® препаратының созылмалы вирустық гепатиттің реактивациясына әсері белгісіз. Ксельжанс® препаратымен емдеуді бастар алдында вирустық гепатитке клиникалық нұсқауларға сәйкес скрининг жүргізілуі тиіс.

Күрделі жағымсыз жүрек-қантамырлық құбылыстар (миокард инфарктісін қоса)

Ксельжанс® препаратын қабылдаған пациенттерде күрделі жағымсыз жүрек-қантамырлық құбылыстар (КЖЖҚҚ) байқалды.

Жүрек-қантамыр ауруларының кемінде бір қосымша қауіп факторы болған,

50 жастағы немесе одан асқан, ревматоидтық артритке шалдыққан пациенттерде ісіктер некрозы факторының (ІНФ) тежегіштерімен салыстырғанда тофацитиниб препаратын қолдану кезінде миокард инфарктісі туындауының жоғары жиілігі байқалды. 65 жастағы және одан асқан, қазіргі уақытта шылым шегіп жүрген немесе бұрын ұзақ уақыт бойына шылым шеккен, сондай-ақ анамнезінде атеросклероздық жүрек-қантамырлық аурулары немесе басқа жүрек-қантамырлық қауіп факторлары бар пациенттерге Ксельжанс® препаратын емдеудің қолайлы баламалы әдістері болмаған кезде ғана қолдану керек.

Қатерлі жаңа түзілімдер және лимфопролиферациялық ауру

Ксельжанс® препараты организмді қатерлі жаңа түзілімдерден қорғауға әсер етуі мүмкін.

Жүрек-қантамыр ауруларының кемінде бір қосымша қауіп факторы болған, 50 жастағы немесе одан асқан, ревматоидтық артритке шалдыққан пациенттерде ІНФ тежегіштерімен салыстырғанда Ксельжанс® препаратын қолданған кезде қатерлі жаңа түзілімдердің, атап айтқанда терінің меланомалы емес обыры (ТМЕО), өкпенің обыры және лимфоманың жоғары жиілігі байқалды.

Сондай-ақ Ксельжанс® препаратын қабылдаған пациенттерде ТМЕО, өкпенің обыры мен лимфома байқалды.

Ксельжанс® препаратын қабылдаған пациенттерде басқалармен қатар, сүт безі обырын, меланоманы, қуықасты безі обырын және ұйқы безі обырын қоса алғанда, басқа да қатерлі жаңа түзілімдер байқалды.

65 жастағы және одан асқан, қазір шылым шегіп жүрген және ұзақ уақыттан бері бұрыннан шылым шегетін, сондай-ақ қатерлі жаңа түзілімнің басқа қауіп факторлары бар пациенттерде (мысалы, ағымдағы қатерлі ісік немесе қатерлі жаңа түзілімдер тарихы, терінің сәтті емделген меланомалы емес обырынан басқа), Ксельжанс® препаратын емдеудің баламалы нұсқасы қолданылмайтын жағдайда ғана қолдану керек.

Барлық пациенттерге, әсіресе тері обырының даму қаупі жоғары пациенттерге теріні мезгіл-мезгіл тексеріп отыру ұсынылады.

Өкпенің интерстициалдық ауруы

Сондай-ақ, анамнезінде өкпенің созылмалы ауруы бар пациенттерде сақтық таныту ұсынылады, себебі олар инфекцияларға анағұрлым бейім болуы мүмкін. Өкпенің интерстициалдық ауру жағдайлары (олардың кейбіреуі өліммен аяқталған) Ксельжанс® препаратын қабылдаған пациенттерде тіркелді, дегенмен янус-киназа (JAK) тежелуінің бұл құбылыстардың дамуындағы рөлі белгісіз. Шығу тегі азиялық, РА бар пациенттер өкпенің интерстициалдық ауруының даму қаупіне көбірек ұшырайтыны белгілі, сондықтан бұл пациенттерді емдегенде сақтық таныту керек.

Асқазан-ішек жолының тесілуі

Ксельжанс® препаратын асқазан-ішек жолының тесілу қаупі жоғары пациенттерде (мысалы, анамнезінде дивертикулиті бар пациенттерде, кортикостероидтармен және (немесе) қабынуға қарсы стероидты емес дәрілік препараттармен қатарлас ем алатын пациенттерде) сақтықпен қолдану керек. Алғаш пайда болған абдоминальді белгілер мен симптомдар байқалған пациенттерді асқазан-ішек жолының тесілуін ерте анықтау үшін дереу тексеру керек.

Сынықтар

Ксельжанс® препаратымен ем қабылдаған пациенттерде сынықтар тіркелген. Ксельжанс® препаратын сыну қаупінің белгілі факторлары бар

пациенттерге, мысалы, көрсетіліміне және дозалау режиміне қарамастан, егде пациенттерге, әйелдер мен кортикостероидтар қабылдайтын пациенттерге сақтықпен қолдану керек.

Бауыр ферменттері

Ксельжанс® препаратымен емдеу кезінде кейбір пациенттерде бауыр ферменттері деңгейінің жоғарылағаны байқалды. Аланинаминотрансфераза (АЛТ) немесе аспартатаминотрансфераза (АСТ) деңгейі жоғары пациенттерде, әсіресе МТТ препараты сияқты әлеуетті гепатоуытты дәрілік препараттармен біріктіріп қолдануды бастаған кезде Ксельжанс® препаратымен емдеуді бастау туралы мәселеге ерекше көңіл бөліп қарау керек. Емдеу басталғаннан кейін, бауырдың дәрілік зақымдануының әлеуетті жағдайларын анықтау үшін бауыр функциясының биохимиялық көрсеткіштерін тұрақты негізде бақылауды жүзеге асыру, және бауыр ферменттері деңгейлері жоғарылауының ықтимал себептерін жылдам анықтау ұсынылады. Егер бауырдың дәрілік зақымдануына күдік туса, осы  диагноз жоққа шығарылғанға дейін  Ксельжанс® препаратымен емдеуді тоқтата тұру керек.

Аса жоғары сезімталдық

Ксельжанс® препаратын қолданумен байланысты аса жоғары сезімталдық реакцияларының даму жағдайлары жөнінде хабарланды. Ангионевроздық ісіну және есекжем сияқты аллергиялық реакциялар байқалды. Кейбір жағдайлар күрделі ретінде бағаланды. Күрделі аллергиялық немесе анафилаксиялық реакциялар туындаған жағдайда Ксельжанс® препаратын қолдануды тез арада тоқтату қажет.

Зертханалық талдау параметрлері

Лимфоциттер

Ксельжанс® препаратын қолданған кезде плацебомен салыстырғанда лимфопенияның пайда болуының анағұрлым жоғары жиілігі байқалды. Лимфоциттер санының 750 жасуша/мм3 аз деңгейге дейін төмендеуі күрделі инфекциялардың туындау жиілігінің жоғарылауымен байланысты болды. Лимфоциттердің дәлелденген саны 750 жасуша/мм3 аз пациенттерде Ксельжанс® препаратымен емді бастау немесе жалғастыру ұсынылмайды. Лимфоциттердің санын бастапқы деңгейде және содан кейін әр 3 айда бақылау керек. Лимфоциттер саны негізінде дозаны өзгерту жөніндегі нұсқауларды «Дозалау режимі» бөлімінен қараңыз.

Нейтрофилдер

Ксельжанс® препаратымен емдеу кезінде плацебоға қарағанда нейтропения туындауының анағұрлым жоғары жиілігі (2000 жасуша/мм3-тен аз) байқалды. Расталған НАС 1000 жасуша/мм3 азды құрайтын ересек пациенттерде және расталған НАС 1200 жасуша/мм3 азды құрайтын балаларда Ксельжанс® препаратымен емді бастау ұсынылмайды. НАС бастапқы деңгейде, емдеудің 4-8 аптасынан кейін, содан соң әрбір 3 ай сайын бақылануы тиіс. Дозаны НАС байланысты өзгерту жөніндегі нұсқауларды «Дозалау режимі» бөлімінен қараңыз.

Гемоглобин

Ксельжанс® препаратымен емдеу кезінде гемоглобин деңгейінің төмендеу жиілігі тым жоғары болды. Гемоглобин деңгейі 9 г/дл-ден кем ересек пациенттерде және гемоглобин деңгейі 10 г/дл-ден кем балаларда Ксельжанс® препаратымен емді бастау ұсынылмайды. Гемоглобин деңгейін бастапқы деңгейде, емдеудің 4–8 аптасынан кейін, содан кейін әр 3 ай сайын бақылау керек. Гемоглобин деңгейі негізінде дозаны өзгерту жөніндегі нұсқауларды «Дозалау режимі» бөлімінен қараңыз.

Липидтер деңгейін мониторингілеу

Ксельжанс® препаратымен емдеу кезінде жалпы холестерин, тығыздығы төмен липопротеин холестерині (ТТЛП) және тығыздығы жоғары липопротеин холестерині (ТЖЛП) сияқты липидтер деңгейінің жоғарылауы байқалды. Бұл көрсеткіштерге ең жоғары әсер әдетте 6 аптадан кейін байқалды. Липидтік көрсеткіштерді бағалауды Ксельжанс® препаратымен емдеу басталғаннан кейін шамамен 8 аптадан соң жүргізу керек. Пациенттерді емдеуді гиперлипидемияны емдеу жөніндегі клиникалық нұсқауларға сәйкес жүргізу қажет. Ксельжанс® препаратын қабылдаумен байланысты, жалпы холестериннің және ТТЛП холестерині деңгейлерінің жоғарылауын емдеудің басына дейінгі деңгейлеріне статиндермен ем арқылы төмендетуге болады.

Диабеттен емделетін пациенттердегі гипогликемия

Диабетті емдеуге арналған препараттар қабылдаған пациенттерде Ксельжанс® препаратымен емдеуді бастағаннан кейін гипогликемия жағдайлары туралы хабарланды. Гипогликемия дамыған жағдайда диабетке қарсы препараттың дозасын түзету қажет болуы мүмкін.

Вакцинация

Ксельжанс® препаратымен емдеу басталғанға дейін барлық пациенттерге, әсіресе полиартикулярлық ЮИА және ювенильді ПсА шалдыққан пациенттерге профилактикалық вакцинация жүргізу жөніндегі қолданыстағы нұсқауларға сәйкес барлық қажетті екпелерді орындау ұсынылады. Ксельжанс® препаратын қолданумен бір мезгілде тірі вакциналармен вакцинациялау ұсынылмайды. Ксельжанс® препаратымен емдеуді бастағанға дейін тірі вакциналарды қолдану туралы шешім қабылдау кезінде нақты пациентте бұрын болған иммуносупрессияны ескеру керек.

Белдемелі герпеске қарсы профилактикалық вакцинация жүргізуді вакцинация жөніндегі нұсқауларға сәйкес қарау керек. Ұзаққа созылған РА шалдыққан, бұдан бұрын екі немесе бірнеше  биологиялық РҚБП ем қабылдаған пациенттерге ерекше көңіл бөліп қараған жөн. Белдемелі герпеске қарсы тірі вакцинаны қолдану қажет болғанда оны анамнезінде желшешек бар пациенттерге ғана немесе желшешек вирусына (VZV) антиденелері бар пациенттерге енгізу керек. Егер анамнезінде желшешектің болуы туралы мәліметтер күмәнді немесе сенімсіз болып есептелсе, VZV антиденелеріне талдау жасау ұсынылады.

Тірі вакциналармен вакцинациялау иммуномодуляциялайтын дәрілік заттарды қолдануға қатысты вакцинация жөніндегі қолданыстағы нұсқауларға сәйкес, Ксельжанс® препаратымен ем басталғанға дейін кем дегенде 2 апта бұрын, бірақ дұрысы 4 апта бұрын орындалуы тиіс. Ксельжанс® препаратымен ем алатын пациенттерге тірі вакциналарды енгізу кезінде инфекцияның салдарлы берілуі туралы деректер жоқ.

Басқа дәрілік препараттармен өзара әрекеттесуі

Ксельжанс® препаратының фармакокинетикасына (ФК) басқа дәрілік препараттардың әсері

Ксельжанс® препаратының CYP3A4 метаболизденуіне байланысты оның CYP3A4 белсенділігін тежейтін немесе индукциялайтын препараттармен өзара әрекеттесу ықтималдығы бар. Ксельжанс® препаратының әсер ету деңгейі CYP3A4 күшті тежегіштерімен (мысалы, кетоконазолмен) бір мезгілде қолданғанда немесе CYP3A4 қалыпты тежелуін, сондай-ақ CYP2C19 күшті тежелуін (мысалы, флуконазолмен) туындататын бір немесе бірнеше препараттармен бір мезгілде қолданғанда артады.

Ксельжанс® препаратының әсер ету деңгейі оны CYP күшті индукторларымен (мысалы, рифампицинмен) бір мезгілде қолданғанда азаяды. Тек CYP2C19 немесе P-гликопротеин тежегіштері Ксельжанс® препаратының фармакокинетикасын айтарлықтай өзгертуі екіталай.

Ксельжанс® препаратын кетоконазолмен (CYP3A4 күшті тежегіші), флуконазолмен (CYP3A4 орташа тежегіші және CYP2C19 күшті тежегіші), такролимуспен (CYP3A4 әлсіз тежегіші) және циклоспоринмен (CYP3A4 орташа тежегіші) бір мезгілде қолдану Ксельжанс® препаратының AUC мәнінің жоғарылауына әкелді, ал оны рифампицинмен (CYP күшті индукторы) бір мезгілде қолдану Ксельжанс® препаратының AUC мәнінің төмендеуіне әкеп соқты. Ксельжанс® препаратын CYP күшті индукторларымен (мысалы, рифампицинмен) бір мезгілде қолдану емдеуге клиникалық жауаптың жоғалуына немесе төмендеуіне әкелуі мүмкін. Ксельжанс® препаратын және CYP3A4 күшті индукторларын бір мезгілде қолдану ұсынылмайды. Ксельжанс® препаратын кетоконазолмен және флуконазолмен бір мезгілде қолданғанда Ксельжанс® препаратының Cmax мәнінің жоғарылағаны байқалды, ал такролимуспен, циклоспоринмен және рифампицинмен бірге қолданғанда оның Cmax мәнінің төмендегені байқалды. Ксельжанс® препаратын МТТ-мен аптасына бір рет 15-25 мг дозада бірге қолдану РА шалдыққан пациенттерде Ксельжанс® препаратының фармакокинетикасына әсер етпеді.

Ксельжанс® препаратының басқа дәрілік препараттардың фармакокинетикасына әсері

Құрамында левоноргестрел және этинилэстрадиол бар пероральді контрацептивтермен бірге қолданған кезде Ксельжанс® препараты әйелдердегі олардың фармакокинетикасын өзгертпеді.

РА шалдыққан пациенттерде Ксельжанс® препаратын МТТ-мен аптасына бір рет 15-25 мг дозада бірге қолдану МТТ AUC және Cmax мәндерінің сәйкесінше 10 %-ға және 13 % - ға төмендеуіне әкелді. МТТ әсерінің төмендеу дәрежесі осы препараттың жеке таңдалған дозасын өзгертуді талап етпейді.

Арнайы сақтандырулар

Ксельжанс® препаратын қабылдаған, жүрек ұстамасын қоса алғанда, жүрек

кінәраттары дамыған пациенттер туралы хабарламалар болды. Сіздің дәрігеріңіз жүрек кінәраттарының даму қаупін бағалайды және Ксельжанс® препараты Сізге лайықтылығын анықтайды. Егер Сізде жүрек ұстамасының белгілері мен симптомдары, соның ішінде кеуде қысылғандай сезіну немесе қатты ауыруы (қолға, жақсүйекке, мойынға, арқаға таралуы мүмкін), ентігу, суық тер, естен тану алдындағы жағдай немесе кенеттен бас айналу пайда болса, дереу дәрігерге қаралыңыз.

Егде жастағы пациенттер

65 жастағы және одан асқан пациенттерде инфекциялардың пайда болу жиілігі анағұрлым жоғары болады, олардың кейбіреулері ауыр болуы мүмкін. Егер инфекцияның белгілері немесе симптомдары пайда болса, дәрігерге мүмкіндігінше тезірек хабарлаңыз.

65 жастағы және одан асқан пациенттерде инфекциялар, жүрек ұстамасы және обырдың кейбір түрлерінің даму қаупі жоғары болуы мүмкін. Дәрігеріңіз Ксельжанс® препараты Сізге сай келмейді деп шешуі мүмкін.

Шығу тегі азиялық пациенттер

Жапондықтар мен корейлерде белдемелі герпестің пайда болу жиілігі анағұрлым жоғары болады. Егер теріде ауырсындыратын сулы бөртпелер пайда болса, дәрігерге хабарлаңыз.

Сондай-ақ, Сізде өкпе тарапынан кейбір кінәраттар қаупі жоғары болуы мүмкін. Тыныс алу қиындықтары туындаған жағдайда дәрігерге хабарлаңыз.

Ксельжанс® препаратының құрамында лактоза бар

Бұл дәрілік препараттың құрамында лактоза бар. Сирек тұқым қуалайтын галактоза жақпаушылығы, Лапп лактаза жеткіліксіздігі немесе  глюкоза-галактоза мальабсорбциясы синдромы бар пациенттерге бұл дәрілік препаратты қабылдауға болмайды.

Ксельжанс® препаратының құрамында натрий бар

Бұл дәрілік препараттың құрамында бір таблеткаға 1 ммольден аз (23 мг) натрий бар, яғни құрамында натрий жоқ дерлік.

Педиатрияда қолдану

Ксельжанс® препаратының қауіпсіздігі мен тиімділігі 2 жасқа толмаған балаларда әлі анықталған жоқ

Жүктілік немесе лактация кезінде

Сақтық шарасы ретінде Ксельжанс® препаратын жүктілік кезінде қолдану ұсынылмайды.

Ксельжанс® препаратының әйелдің емшек сүтіне өту қабілеті анықталмаған. Емшек еметін бала үшін қаупін жоққа шығаруға болмайды. Сақтық шарасы ретінде Ксельжанс® препаратын бала емізу кезінде қолдану ұсынылмайды.

Бала туу жасындағы әйелдер/әйелдердегі контрацепция

Бала туу жасындағы әйелдерге Ксельжанс® препаратымен емдеу кезінде және препараттың соңғы дозасын қабылдағаннан кейін кемінде 4 апта бойы контрацепцияның тиімді әдістерін қолдану ұсынылады.

Препараттың көлік құралын немесе қауіптілігі зор механизмдерді басқару қабілетіне әсер ету ерекшеліктері

Ксельжанс® препараты автокөлік құралдарын басқару және механизмдермен жұмыс істеу қабілетіне әсер етпейді немесе оған елеусіз дәрежеде әсер етеді.

Қолдану жөніндегі нұсқаулар

Ксельжанс®  препаратымен емдеуді Ксельжанс® препараты көрсетілген жағдайларды диагностикалау мен емдеу тәжірибесі бар дәрігер тағайындауы және бақылауы тиіс.

Дозалау режимі

Ревматоидтық артрит және псориаздық артрит

Препараттың ұсынылатын дозасы тәулігіне екі рет 5 мг (үлбірлі қабықпен қапталған бір таблетка) құрайды. Ұсынылатын дозадан асырмаған жөн.

Дозаны түзету*

МТТ-мен біріктірілімде қолданғанда препараттың дозасын түзету талап етілмейді.  

Шорбуынданатын спондилит

Тофацитиниб препаратының ұсынылатын дозасы тәулігіне екі рет 5 мг құрайды.

Ойық жаралы колит

Индукциялық ем

Ұсынылатын доза индукция үшін 8 апта бойы тәулігіне екі рет пероральді 10 мг құрайды.

8-ші аптада жеткілікті емдік әсерге жетпеген пациенттер препаратты индукциялық режимде (тәулігіне екі рет 10 мг) қабылдауды тағы 8 апта (яғни, барлығы 16 апта бойы) жалғастыруына болады, содан кейін препаратты демеуші ем ретінде тәулігіне екі рет 5 мг дозада қабылдауға ауысады. 16-аптаға қарай емдік әсердің белгілері байқалмаған пациенттерге тофацитинибпен индукциялық емді тоқтату керек.

Демеуші ем

Демеуші ем үшін тофацитинибтің ұсынылатын дозасы ішке тәулігіне екі рет 5 мг құрайды.

Веналық тромбоэмболияның (ВТЭ), күрделі жағымсыз жүрек-қантамырлық құбылыстардың (КЖЖҚҚ) және қатерлі жаңа түзілімдердің белгілі қауіп факторларымен ОЖК бар пациенттерге, емдеудің лайықты баламалы емдеу әдістері болмаған жағдайларды қоспағанда, демеуші ем ретінде тәулігіне екі рет 10 мг дозада тофацитинибті қолдану ұсынылмайды («Қолдану кезіндегі қажетті сақтандыру шаралары» бөлімінен қараңыз).

Күніне екі рет 5 мг дозадағы тофацитинибке жауабының төмендеуі байқалған және ісік некрозы факторының тежегіштерімен (ІНФ тежегіштері) емдеу сияқты ойық жаралы колитті емдеудің балама әдістерімен емге жауабы жоқ, және ВТЭ, КЖЖҚҚ және қатерлі жаңа түзілімдердің даму қаупі жоғары емес ОЖК бар пациенттерге («Қолдану кезіндегі қажетті сақтандыру шаралары» бөлімінен қараңыз) тофацитинибті күніне екі рет 10 мг дозада пероральді тағайындау мүмкіндігін қарастыруға болады. Тофацитинибті демеуші ем ретінде тәулігіне екі рет 10 мг дозада мүмкіндігінше қысқа уақыт мерзімі ішінде қолдану керек. Жауапты сақтап тұру үшін қажетті ең төмен тиімді дозаны қолдану керек.

Тофацитинибпен емдеуге жауап берген пациенттерге дозаны азайтуға және (немесе) кортикостероидтарды қолдануды стандартты емге сәйкес тоқтатуға болады.

ОЖК емдеудің қайталанатын курсы

Емдеу үзілген жағдайда тофацитинибпен емдеуді қайта бастау мүмкіндігін қарастыруға болады. Жауап жоғалған жағдайда тәулігіне екі рет 10 мг дозада тофацитинибпен индукциялық емді қайталау қарастырылуы мүмкін. Клиникалық зерттеулерде емдеудің үзіліс кезеңі 1 жылға дейін созылды. Тиімділігін тәулігіне екі рет 10 мг дозада қолдану арқылы 8 апталық емнен кейін қалпына келтіруге болады.

Препаратты қолдануды уақытша тоқтату және оны тоқтату

Күрделі инфекция туындаған жағдайда, Ксельжанс® препаратымен емдеуді инфекцияны бақылау орныққанға дейін тоқтата тұру қажет.

Зертханалық параметрлердің дозаға тәуелді ауытқулары кезінде, оның ішінде лимфопенияны, нейтропенияны және анемияны емдеу үшін препаратты қолдануды уақытша тоқтату қажет болуы мүмкін. Препаратты қолдануды уақытша тоқтату немесе тоқтату туралы, төмендегі 1, 2 және 3 кестелерде көрсетілген нұсқаулар зертханалық көрсеткіштер нәтижелерінің қалыптан ауытқуының ауырлығы негізінде әзірленген.

Лимфоциттердің абсолюттік саны (ЛАС) 750 жасуша/мм3 аз болатын пациенттерде препаратпен емді бастау ұсынылмайды.  

1-кесте. Лимфоциттердің абсолюттік аз саны

Нейтрофилдердің абсолютті саны (НАС) 1000 жасуша/мм3 аз ересек пациенттерде препаратпен емді бастау ұсынылмайды.

Нейтрофилдердің абсолютті саны (НАС) 1200 жасуша/мм3 аз балаларда препаратпен емді бастау ұсынылмайды.

2-кесте. Нейтрофилдердің абсолюттік аз саны

Гемоглобиннің деңгейі 9 г/дл-ден кем болғанда ересек пациенттерде препаратпен емді бастау ұсынылмайды. Гемоглобиннің деңгейі 10 г/дл-ден кем болғанда балаларда препаратпен емді бастау ұсынылмайды.

3-кесте. Гемоглобиннің төмен деңгейі

Пациенттердің ерекше топтары

Балалар

Полиартикулярлық ЮИА және ювенильді ПсА (2-ден 18 жасқа дейінгі балалар жасындағы пациенттер)

Тофацитиниб монотерапия ретінде немесе МТТ біріктірілімде қолданылуы мүмкін.

2 жастағы және одан асқан пациенттерге ұсынылатын доза келесі салмақ санаттарына негізделген:

4-кесте: Полиартикулярлық ювенильді идиопатиялық артритке және ювенильді ПсА шалдыққан екі жастағы және одан асқан пациенттерге арналған тофацитиниб дозасы

Тәулігіне екі рет ішуге арналған 5 мл ерітінді түріндегі тофацитиниб қабылдаған дене салмағы ≥ 40 кг пациенттерді тәулігіне екі рет үлбірлі қабықпен қапталған 5 мг-ден таблеткалар түріндегі тофацитинибке ауыстыруға болады. Дене салмағы < 40 кг пациенттерді ішуге арналған ерітінді түріндегі тофацитинибтен басқа түріне ауыстыруға болмайды.

Егде жастағы пациенттер

65 жастағы және одан асқан пациенттерде дозаны түзету талап етілмейді. Препаратты 75 жастағы және одан асқан пациенттерде қолдану туралы деректер шектеулі.

Бүйрек жеткіліксіздігі бар пациенттер

Бүйректің жеңіл (креатинин клиренсі 50–80 мл/мин) немесе орташа (креатинин клиренсі 30–49 мл/мин) дәрежелі жеткіліксіздігі бар пациенттерде препарат дозасын түзету талап етілмейді. Бүйректің ауыр (креатинин клиренсі <30 мл/мин) дәрежелі жеткіліксіздігі бар пациенттерде (гемодиализдегі пациенттерді қоса) препараттың дозасы тәулігіне бір рет 5 мг-ге дейін төмендетілуі тиіс. Бүйрек жеткіліксіздігінің ауыр дәрежесі бар пациенттер бүйректің қалыпты функциясы кезінде көрсетілген доза тәулігіне екі рет 5 мг құраса тәулігіне бір рет 5 мг төмендетілген дозаны қабылдауды жалғастыруы тиіс, сондай-ақ, бүйректің қалыпты функциясы кезінде ұсынылған доза тәулігіне екі рет 10 мг құраса препарат дозасы тәулігіне екі рет 5 мг дейін төмендетілуі тиіс. Бүйректің ауыр дәрежедегі жеткіліксіздігі бар пациенттер тіпті гемодиализден кейін де препараттың төмендетілген дозасын қабылдауды жалғастыруы тиіс.

Бауырдың жеткіліксіздігі бар пациенттер

Бауырдың жеңіл дәрежелі жеткіліксіздігі (Чайлд-Пью жіктеуі бойынша А класы) бар пациенттерде препарат дозасын түзету талап етілмейді. Бауырдың орташа дәрежелі жеткіліксіздігі (Чайлд-Пью жіктеуі бойынша В класы) бар пациенттерде препараттың дозасын тәулігіне бір рет 5 мг дейін төмендету керек, бұл кезде бауырдың қалыпты функциясы кезінде көрсетілген доза тәулігіне екі рет 5 мг құрайды. Сонымен қатар бауырдың орташа дәрежелі жеткіліксіздігі бар пациенттерде (Чайлд — Пью жіктеуі бойынша В класы) препараттың дозасын тәулігіне екі рет 5 мг дейін төмендету керек, бұл кезде бауырдың қалыпты функциясы кезінде көрсетілген доза тәулігіне екі рет 10 мг құрайды.

Ксельжанс® препараты бауырдың ауыр дәрежелі жеткіліксіздігі (Чайлд — Пью жіктеуі бойынша С класы) бар пациенттерде қолданылмауы тиіс.

Дәрілік өзара әрекеттесулер

P450 3A4 цитохромының (CYP) күшті тежегіштерін (мысалы, кетоконазол) қабылдайтын пациенттерде және CYP3A4 орташа тежелуін де, CYP2C19 күшті тежелуін де тудыратын (мысалы, флуконазол) бір немесе бірнеше қатарлас препараттарды қабылдайтын пациенттерде Ксельжанс® препара-тының дозасы төмендегідей екі есе азайтылуы тиіс:

• Тәулігіне екі рет 5 мг дозаны алатын пациенттерге тофацитинибтің дозасын тәулігіне бір рет 5 мг дейін азайту керек (ересек пациенттер және балалар).

• Тәулігіне екі рет 10 мг дозаны алатын пациенттерге тофацитинибтің дозасын тәулігіне екі рет 5 мг дейін азайту керек (ересек пациенттер).

Тек балалар жасындағы пациенттерде:

Қолда бар деректер Ксельжанс® препаратымен емдеу басталғаннан кейін 18 апта ішінде клиникалық жақсару байқалады деп болжауға мүмкіндік береді. Егер пациентте осы кезең ішінде клиникалық жақсарулар байқалмаса, емдеуді жалғастыру туралы мәселені мұқият қарастыру керек.

ШС кезінде қабылдауды тоқтату

Қолда бар деректер Ксельжанс® препаратымен емдеу басталғаннан кейін 16 апта ішінде ШС кезінде клиникалық жақсару байқалады деп болжауға мүмкіндік береді. Осы уақыт кезеңі ішінде клиникалық жақсаруы байқалмаған пациенттерді емдеуді жалғастырудың мақсаттылығын мұқият қарастырған жөн.

Енгізу әдісі мен жолы

Ксельжанс® препараты пероральді қолдануға арналған.

Ксельжанс® препараты тамақ ішуге байланыссыз ішке қабылданады.

Жұтынуға қиналатын пациенттер таблеткаларды сындырып, сумен іше алады.   

Қабылдау уақытының көрсетілуімен қолдану жиілігі

Таблеткаларды күн сайын бір уақытта (таңертең бір таблетка және кешке бір таблетка) қабылдауға тырысыңыз.

Ксельжанс® препаратының таблеткаларын сындырып, су ішіп қабылдауға болады.

Егер Сізде бауыр немесе бүйрек кінәраттары болса немесе басқа дәрілік препараттарды қабылдайтын болсаңыз, дәрігер препараттың дозасын азайтуы мүмкін. Егер қан талдауында лейкоциттер немесе эритроциттер санының азаюы байқалса, дәрігер емдеуді уақытша тоқтата алады немесе толығымен тоқтатады.

Артық дозалану жағдайында қабылдау қажет болатын шаралар

Егер Сіз қажет болғаннан көп таблетка қабылдаған болсаңыз, ол туралы дәрігерге дереу хабарлаңыз. Артық дозаланған жағдайда пациентті жағымсыз реакциялар белгілері мен симптомдарының бар-жоғына бақылау ұсынылады. Ксельжанс® препаратының артық дозалануын емдеуге спецификалық антидот жоқ. Симптоматикалық және демеуші емді қолдану керек.

Дәрілік препараттың бір немесе бірнеше дозасын өткізіп алу кезіндегі қажетті шаралар

Жіберіп алған таблетканы қабылдаудың орнын толтыру үшін екі есе дозасын қабылдамаңыз. Келесі таблетканы әдеттегі уақытта қабылдаңыз және емдеуді бұрынғыдай жалғастырыңыз.

Тоқтату симптомдары қаупінің болуына нұсқау

Сізге емдеуші дәрігермен кеңеспей, Ксельжанс® препаратын қабылдауды тоқтатпау керек.

Дәрілік препаратты қолдану тәсілін түсіндіру үшін медицина қызметкеріне кеңес алу үшін жүгіну жөніндегі нұсқаулар

Егер Сізде осы препаратты қолдану туралы қосымша сұрақтар туындаса, кеңес алу үшін емдеуші дәрігерге жүгініңіз.

ДП стандартты қолдану кезінде көрініс беретін жағымсыз реакциялар сипаттамасы және осы жағдайда қабылдау  керек шаралар

Бұл препарат, барлық басқа дәрілік заттар сияқты, жағымсыз реакцияларды туғызуы мүмкін, әйтсе де пациенттердің барлығында емес.

Олардың кейбіреулері ауыр болып, медициналық көмекті талап етуі мүмкін.

Ювенильді псориаздық артрит пен полиартикулярлық ағымы бар ювенильді идиопатиялық артритке шалдыққан пациенттердегі жағымсыз реакциялар ювенильді идиопатиялық артритке шалдыққан балаларда жиі кездесетін кейбір инфекцияларды (тұмау, фарингит, синусит, вирустық инфекция) және асқазан-ішектік немесе жалпы бұзылыстарды (іштің ауыруы, жүрек айну, құсу, қызба, бас ауыруы, жөтел) қоспағанда, ревматоидтық артритке шалдыққан ересек пациенттерде байқалатын жағымсыз әсерлерге сәйкес келді.

Ықтимал күрделі жағымсыз реакциялар

Сирек жағдайларда инфекциялар өмірге қауіп төндіруі мүмкін.

Өкпе обыры, лейкоз және жүрек ұстамасы туралы да хабарланды.

Егер төменде көрсетілген күрделі жағымсыз реакциялардың кез келгені пайда болса, ол туралы Сіз дереу дәрігерге хабарлауыңыз керек.

Жиі

• пневмония

• тұмау

• белдемелі герпес

• несеп шығару жолдарының инфекциясы

• синусит

• бронхит

• назофарингит

• фарингит

• лимфопения

• анемия

• бас ауыру

• артериялық гипертензия

• жөтел

• іштің ауыруы

• құсу

• диарея

• жүрек айну

• гастрит

• диспепсия

• бөртпе

• акне

• артралгия

• шеткері ісіну

• қандағы креатинфосфокиназа деңгейінің жоғарылауы

Жиі емес

• туберкулез

• дивертикулит

• пиелонефрит

• тері асты шелмайының қабынуы

• қарапайым герпес

• вирустық гастроэнтерит

• вирустық инфекция

• өкпе обыры

• терінің меланомалы емес обыры

• лейкопения

• нейтропения

• дислипидемия

• гиперлипидемия

• сусыздану

• ұйқысыздық

• парестезия

• миокард инфарктісі

• веналық тромбоэмболия**

• ентігу

• мұрынның қосалқы қойнауларының бітелуі

• майлы гепатоз

• бауыр ферменттері деңгейінің жоғарылауы

• трансаминазалар деңгейінің жоғарылауы

• гамма-глутамилтрансфераза деңгейінің жоғарылауы

• эритема

• қышыну

• буындардың ісінуі

• тендинит

• пирексия

• аса шаршағыштық

• қандағы креатинин деңгейінің жоғарылауы

• қандағы холестерин деңгейінің жоғарылауы

• тығыздығы төмен липопротеиндер деңгейінің жоғарылауы

• дене салмағының жоғарылауы

• байламдардың созылуы

• бұлшықеттің созылуы

Сирек

• сепсис

• уросепсис

• диссеминацияланған туберкулез

• бактериемия

• Pneumocystis jirovecii туындатқан пневмония

• пневмококктық пневмония

• бактериялық пневмония

• цитомегаловирустық инфекция

• бактериялық артрит

• лимфома

• бауыр функциясының биохимиялық көрсеткіштерінің қалыптан ауытқуы

• қаңқа-бұлшықет ауыруы

Өте сирек

• орталық жүйке жүйесінің туберкулезі

• криптококктық менингит

• некроздық фасциит

• энцефалит

• стафилококктық бактериемия

• Mycobacterium avium кешені туындатқан инфекция

• атипиялы микобактериялық инфекция

Жиілігі белгісіз

• аса жоғары сезімталдық реакциясы*

• ангионевроздық ісіну*

• есекжем*

* Өздігінен келіп түскен хабарламалардан алынған деректер.

** Веналық тромбоэмболия ӨАТЭ, ТВТ және торқабықтың веналық тромбозын қамтиды.

Жалпы алғанда, Ксельжанс® препаратымен монотерапия кезінде ревматоидтық артрит кезінде метотрексатпен біріктіріп қолданғанға қарағанда жағымсыз әсерлері азырақ байқалды.

Жағымсыз дәрілік реакциялар туындағанда медицина қызметкеріне, фармацевтикалық қызметкерге немесе, дәрілік препараттардың тиімсіздігі туралы хабарламаларды қоса, дәрілік препараттарға болатын жағымсыз реакциялар (әсерлер) жөніндегі ақпараттық деректер базасына тікелей хабарласу керек

Қазақстан Республикасы Денсаулық сақтау министрлігі Медициналық және фармацевтикалық бақылау комитеті «Дәрілік заттар мен медициналық бұйымдарды сараптау ұлттық орталығы» ШЖҚ РМК

http://www.ndda.kz

Қосымша мәліметтер

Дәрілік препараттың құрамы

Ксельжанс®, 5 мг, үлбірлі қабықпен қапталған таблеткалар

Бір таблетканың құрамында

белсенді зат - тофацитиниб цитраты 8.078 мг (5.0 мг тофацитинибке

баламалы),  

қосымша заттар: микрокристалды целлюлоза, лактоза моногидраты, натрий кроскармеллозасы, магний стеараты;

қабығы: опадрай® II ақ 33G28523: гипромеллоза 6 сР (Е 464), титанның қостотығы (Е 171), лактоза моногидраты, макрогол (ПЭГ 3350), триацетин (глицерол триацетаты).

Ксельжанс®, 10 мг, үлбірлі қабықпен қапталған таблеткалар

Бір таблетканың құрамында

белсенді зат - тофацитиниб цитраты 16.155 мг (10.0 мг тофацитинибке баламалы),

қосымша заттар: микрокристалды целлюлоза, лактоза моногидраты, натрий кроскармеллозасы, магний стеараты;

қабығы: опадрай® II көгілдір 33G90988: гипромеллоза 6 сР (Е 464), титанның қостотығы (Е 171) , лактоза моногидраты, макрогол (ПЭГ 3350),

триацетин (глицерол триацетаты), FD&C Blue #2/Индиго карминді алюминий лагы (Е132), FD&C Blue #1/Бриллиантты көк FCF алюминий лагы (Е133).

Сыртқы түрінің, иісінің, дәмінің сипаттамасы

Ксельжанс®, 5 мг, үлбірлі қабықпен қапталған таблеткалар

Дөңгелек пішінді, ақ түсті үлбірлі қабықпен қапталған, бір жағында «Pfizer» және басқа жағында «JKI 5» өрнегі бар таблеткалар.

Ксельжанс®, 10 мг, үлбірлі қабықпен қапталған таблеткалар

Дөңгелек пішінді, көгілдір түсті үлбірлі қабықпен қапталған, бір жағында «Pfizer» және басқа жағында «JKI 10» өрнегі бар таблетка.

Шығарылу түрі және қаптамасы

14 таблеткадан поливинилхлорид жабыны бар алюминий фольгадан/ алюминий фольгадан жасалған пішінді ұяшықты қаптамаға салынады.

4 қаптамадан медициналық қолдану жөніндегі қазақ және орыс тілдеріндегі нұсқаулықпен бірге картон қорапшаға салынады. Картон қорапшада алғашқы ашылуын бақылау белгісінің болуына рұқсат етіледі.

4 жыл.

Жарамдылық мерзімі өткеннен кейін қолдануға болмайды!

30 ºС-ден аспайтын температурада сақтау керек.

Препаратты балалардың қолы жетпейтін жерде сақтау керек!

Рецепт арқылы

Өндіруші туралы мәліметтер

Пфайзер Мануфактуринг Дойчланд ГмбХ

Бетриебштатте Фрайбург,

Мусвалдалле 1

79090 Фрайбург, Германия

Тел: +49 761 5180

Факс: +49 761 518-3070

Тіркеу куәлігінің ұстаушысы

Пфайзер Эйч Си Пи Корпорэйшн

235 Ист 42 Стрит, Нью-Йорк, Нью-Йорк штаты 10017-5755

Тел: 212-573-2323

Факс: 212-573-1895

Қазақстан Республикасы аумағында тұтынушылардан дәрілік заттар сапасына қатысты шағымдар (ұсыныстар) қабылдайтын және дәрілік заттың тіркеуден кейінгі қауіпсіздігін қадағалауға жауапты ұйымның атауы, мекенжайы және байланыс деректері (телефон, факс, электрондық пошта)

Pfizer Export B.V. (Пфайзер Экспорт Би.Ви.) компаниясының Қазақстан Республикасындағы филиалы

Қазақстан Республикасы, Алматы қ., 050000, Медеу ауданы, Н. Назарбаев даңғ., 100/4 үй

Тел.: +7 (727) 250 09 16

Факс: +7 (727) 250 42 09     

электрондық пошта: PfizerKazakhstan@pfizer.com