Кларидол (10 мг)

• русский
• қазақша

• Скачать инструкцию медикамента

Саудалық атауы

Кларидол

Халықаралық патенттелмеген атауы

Лоратадин

Дәрілік түрі

10 мг таблеткалар

Құрамы

Бір таблетканың құрамында

белсенді зат – 10 мг лоратадин,

қосымша заттар: лактоза, крахмал, натрий кроскармелозасы, коллоидальді сусыз кремнийдің қостотығы, магний стеараты.

Сипаттамасы

Ақ түстен ақ дерлік түске дейінгі, жиектері қиғашталған және бір жақ бетінде бөлетін сызығы бар дөңгелек, жалпақ таблеткалар

Фармакотерапиялық тобы

Жүйелі әсер ететін антигистаминдік препараттар.

АТЖ коды R06AX13

Фармакологиялық қасиеттері

Фармакокинетикасы

Ішке қабылдағаннан кейін препарат асқазан-ішек жолынан тез және толық сіңеді. Лоратадин бауырдан алғаш өту кезінде CYP3A4 және аз дәрежеде CYP2D6 изоферменттерімен экстенсивті метаболизмге ұшырап, фармакологиялық тұрғыдан белсенді метаболит – дезкарбоэтоксилоратадин түзеді. Лоратадин және дезкарбоэтоксил-оратадин плазмада ең жоғары концентрацияға препаратты қабылдағаннан кейін, тиісінше, 1,3 сағаттан және 2,5 сағаттан соң жетеді. Таблетканы қолданған кезде ас қабылдау ең жоғары концентрацияға жету уақытын, орта есеппен, 1 сағатқа баяулатады. Лоратадиннің және дезкарбоэтоксилоратадиннің ең жоғары концентрациясы ас қабылдауға тәуелді емес. Ең жоғары концентрация егде жастағы емделушілерде, бүйрек қызметінің созылмалы жеткіліксіздігі бар немесе бауыры алкогольден зақымданған науқастарда артады.

Лоратадиннің плазма ақуыздарымен байланысуы – 97%, дезкарбоэтоксилоратадинде – 75%. Гематоэнцефалдық тосқауыл арқылы өтпейді. Лоратадин және оның белсенді метаболиті тепе-тең концентрацияға қолданудың 5-ші күні жетеді.

Лоратадиннің жартылай шығарылу кезеңі 3-20 сағатты (орта есеппен 8,4 сағатты) құрайды, дезкарбоэтоксилоратадинде – 8,8-92 сағат (орта еспепен 28 сағатқа жуық). Лоратадин несеппен және өтпен бірге шығарылады. Егде жастағы емделушілерде лоратадиннің жартылай шығарылу кезеңі 6,7-37 сағатты (орта есеппен 18,2 сағатты) құрайды, дезкарбоэтоксилоратадинде – 11-38 сағат (орта есеппен 17,5 сағат). Бауырдың алкогольдік зақымында жартылай шығарылу кезеңі аурудың ауырлығына пропорционалды түрде артады. Дозаның шамамен 27%-ы несеппен бірге алғашқы 24 сағат ішінде шығарылады. Дозаның 40%-ға жуығы несеппен бірге және 42%-ы нәжіспен бірге 10 күндік кезең ішінде, негізінен, байланысқан метаболиттер түрінде шығарылады.

Бүйрек қызметінің созылмалы жеткіліксіздігі бар емделушілерде және гемодиализ жүргізген кезде лоратадиннің фармакокинетикасы тіпті өзгермейді.

Лоратадин және оның белсенді метаболиті емшек сүтімен бірге бөлініп шығады.

Фармакодинамикасы

Ұзақ әсер ететін гистаминді Н1-рецепторлар бөгегіші. Гистаминнің және С4 лейкотриеннің толық жасушалардан босап шығуын тежейді. Аллергиялық реакциялардың дамуына жол бермейді және барысын жеңілдетеді. Аллергияға қарсы, қышуға қарсы, экссудатқа қарсы әсер етеді. Капиллярлардың өткізгіштігін азайтады, тіндердің ісінуінің алдын алады, тегіс бұлшықеттердің түйілуін қайтарады. Орталық жүйке жүйесіне ықпалын тигізбейді (ұйқышылдықты тудырмайды, психомоторлы қызметке, зейінге, жұмыс қабілетіне, ойлау қабілетіне ықпалын тигізбейді) және дағдылануды тудырмайды (гематоэнцефалдық тосқауыл арқылы өтпейтін болғандықтан).

Аллергияға қарсы әсері 30 минуттан кейін дамиды, ең жоғары шегіне 8-12 сағаттан кейін жетеді және 24 сағат бойы жалғасады.

Қолданылуы

• маусымдық және жыл бойғы аллергиялық ринитте және осы ауруға байланысты симптомдарды – түшкіруді, мұрынның шырышты қабығының қышуын, ринореяны жоюға

• аллергиялық конъюнктивитте

• поллинозда

• есекжемде (соның ішінде созылмалы идиопатиялық есекжемде)

• аллергиялық қышитын дерматоздарда.

Қолдану тәсілі және дозалары

Препаратты ішке қолданады.

Ересектерге (соның ішінде егде жастағыларға) және 12 жастан асқан балаларға тәулігіне 1 рет 10 мг-нан (1 таблетка) тағайындайды. Тәуліктік дозасы – 10 мг.

2 жастан 12 жасқа дейінгі, дене салмағы <30 кг балаларға тәулігіне 1 рет 5 мг-нан (1/2 таблетка) тағайындайды. Тәуліктік дозасы – 5 мг.

2 жастан 12 жасқа дейінгі, дене салмағы >30 кг балаларға тәулігіне 1 рет 10 мг-нан (1 таблетка) тағайындайды. Тәуліктік дозасы – 10 мг.

Бауыр қызметі бұзылған емделушілерге Кларидолды, лоратадиннің клиренсі бұзылуы мүмкін болғандықтан, тәулігіне бастапқыда 5 мг дозада тағайындаған жөн.

Жағымсыз әсерлері

• бас ауыру, қатты қажығыштық, бас айналу, ұйқышылдық, қозғыштық

• ауыз ішінің құрғауы, жүректің айнуы, құсу, гастрит, бауыр қызметінің бұзылуы

• жүректің лүпілдеу сезімі, тахикардия

• аллергиялық реакциялар (соның ішінде бөртпе, анафилаксия), жөтел, алопеция

Қолдануға болмайтын жағдайлар

• препараттың қандай да бір компонентіне сезімталдық жоғары болғанда

• жүктілікте

• лактацияда (емшек емізу кезінде)

• 2 жасқа дейінгі балаларға.

Дәрілермен өзара әрекеттесуі

Кларидолды эритромицинмен, циметидинмен, кетоконазолмен бір мезгілде қолданғанда қан плазмасында лоратадиннің концентрациясы артуы мүмкін (мұның клиникалық маңызы жоқ және ЭКГ-ге ықпалын тигізбейді).

Микросомальді тотығу индукторлары (фенитоин, барбитураттар, зиксорин, рифампицин, фенилбутазон, трициклді антидепрессанттар) және этанол лоратадиннің тиімділігін төмендетеді.

Айрықша нұсқаулар

Бүйрек қызметінің жеткіліксіздігінде Кларидолды абайлап тағайындаған жөн. Бауыр немесе бүйрек қызметтері бұзылған (бүйректік клиренсі < 30 мл/мин) науқастарда емнің басында дозаны төмендету керек.

Кларидолда лактоза бар. Галактоза жақпаушылығының тұқым қуалаған мәселелері сирек кездесетін, Лаппа лактаза тапшы немесе глюкозы-галактоза малабсорбциясы бар емделушілер осы препаратты қабылдамауы тиіс.

Кларидолды қабылдау қалай болғанда да теріге тест жүргізуден 48 сағат бұрын тоқтатылуы тиіс, өйткені антигистаминдік препараттар терінің реактивтілігі индексіне оң реакциясын қолданбай-ақ, болдырмауы немесе қысқартуы мүмкін.

Жүктілік және лактация.

Кларидолды, оны пайдаланудың ана үшін пайдасы ұрық үшін болуы мүмкін қаупінен басым болған кезде ғана қолданған жөн. Емшек сүтіне өтеді, сондықтан препаратты қабылдауды тоқтатудың немесе емшек емізуді тоқтатудың біреуіне таңдау жасаған жөн.

Дәрілік заттың көлікті және қауіпті механизмдерді басқару қабілетіне ықпал ету ерекшеліктері

Емдеу кезеңінде зейінді жұмылдыруды және психомоторлы реакциялардың шапшаңдығын қажет ететін қауіпті қызмет түрлерімен айналысуды тоқтата тұрған жөн.

Артық дозаланғанда

Симптомдары: ұйқышылдық, тахикардия, бас ауыру.

Емдеу: асқазанды шаю, құсуды индуцирлеу, белсенділендірілген көмір тағайындау. Қажет болған кезде симптоматикалық ем жүргізеді.

Шығарылу түрі және қаптамасы

Поливинилхлоридті үлбірден және баспалы алюминий фольгадан жасалған пішінді ұяшықты қаптамада 7 таблеткадан. Пішінді 1 қаптама медицинада қолданылуы жөнінде мемлекеттік және орыс тілдеріндегі нұсқаулықпен бірге картон қорапқа салынған.

Сақтау шарттары

Құрғақ жерде, 25 оС-ден аспайтын температурада сақтау керек.

Балалардың қолы жетпейтін жерде сақтау керек!

Сақтау мерзімі

3 жыл

Жарамдылық мерзімі өткеннен кейін қолдануға болмайды!

Дәріханадан босатылу шарттары

Рецептісіз

Өндіруші

Шрея Лайф Саенсиз Пвт. Лтд. (Shreya Life Sciences Pvt. Ltd.)

Shreya House, 301/A, Pereira Hill Road, Adheri (E), Mumbai – 400 099, India

Тіркеу куәлігінің иесі

Шрея Лайф Саенсиз Пвт. Лтд. (Shreya Life Sciences Pvt. Ltd.)

Shreya House, 301/A, Pereira Hill Road, Adheri (E), Mumbai – 400 099, India

Тұтынушылардан өнім (тауар) сапасы жөнінде шағымдарды Қазақстан Республикасы аумағында қабылдайтын ұйымның мекенжайы

Алматы қ-сы, Жангелдин к-сі, 31, кеңсе 105

Тел./факс: (727) 278 59 53, 278 59 51

e-mail: zh_kanat@mail.ru