Диаформин (500 мг)

• русский
• қазақша

• Скачать инструкцию медикамента

Саудалық атауы

Диаформин

Халықаралық патенттелмеген атауы

Метформин

Дәрілік түрі

500 мг және 850 мг таблеткалар

Құрамы

Бір таблетканың құрамында:

белсенді зат: метформин гидрохлориді - 500 мг және 850 мг

қосымша заттар: 500 мг таблеткалар: картоп крахмалы, микрокристалды целлюлоза, повидон, полиэтиленгликоль (макрогол 4000), магний стеараты;

850 мг таблеткалар: картоп крахмалы, лактоза моногидраты, микрокристалды целлюлоза, повидон, полиэтиленгликоль (макрогол 4000), кальций стеараты.

Сипаттамасы

Дөңгелек пішінді, беткейі жалпақ цилиндр тәрізді, ақ немесе ақ дерлік түсті, сызығы және ойығы бар (500 мг доза үшін) таблеткалар. Ұзынша пішінді, екі беті дөңес, ақ немесе ақ дерлік түсті, сызығы бар немесе сызықсыз (850 мг доза үшін) таблеткалар.

Фармакотерапиялық тобы

Ішу арқылы қабылдауға арналған қантты төмендететін препараттар. Бигуанидтер. Метформин.

АТХ коды А10ВА02

Фармакологиялық қасиеттері

Фармакокинетикасы

Ішке қабылдағаннан кейін метформин асқазан-ішек жолынан толығымен дерлік сіңіріледі, нәжісте дозасының 20-30 %-ы анықталады. Абсолюттік биожетімділігі 50-ден 60 %-ға дейін құрайды. Бір мезгілде ас ішкенде метформиннің сіңірілуі төмендейді және баяулайды.

Метформин тіндерде тез таралады, плазма ақуыздарымен мүлдем байланыспайды деуге болады.

Метформин метаболизмге аз ұшырайды және бүйрекпен шығарылады. Дені сау адамдардағы клиренсі минутына 440 мл құрайды (креатининге қарағанда 4 есе жоғары), бұл өзекшелік сөлінісінің белсенділігін көрсетеді. Жартылай шығарылу кезеңі 9-12 сағатқа жуықты құрайды. Бүйрек жеткіліксіздігі кезінде ол артады, препараттың жинақталу қаупі пайда болады.

Фармакодинамикасы

Метформин гипергликемияны төмендетеді, гипогликемияның дамуына алып келмейді. Сульфонилмочевинаға қарағанда, инсулин сөлінісін көтермелемейді және дені сау адамдарда гипогликемиялық әсерін туғызбайды. Метформин шеткергі рецепторлардың инсулинге сезімталдығын және глюкозаның бұлшықет жасушаларымен утилизациялануын арттырады. Бауырдағы глюконеогенезді тежейді. Көмірсулардың ішекте сіңуін кідіртеді. Липидтер метаболизміне оң әсерін тигізеді: жалпы холестерин, тығыздығы төмен липопротеидтер мен триглицеридтер құрамын төмендетеді.

Қолданылуы

- емдәммен емдеу тиімсіз болған жағдайда, ересектердегі 2 типті қант диабетінде (әсіресе семіздіктен зардап шегетін науқастарда).

Қолдану тәсілі және дозалары

Препараттың дозасын дәрігер қандағы глюкоза деңгейіне байланысты жекелей белгілейді. Ересектерге арналған бастапқы дозасы тәулігіне 500-1000 мг құрайды. 10-15 күн қолданғаннан кейін ары қарай дозасын гликемия деңгейімен салыстырмалы түрде біртіндеп арттыруға болады. Препараттың демеуші дозасы тәулігіне 1500-2000 мг құрайды. Ең жоғарғы тәуліктік дозасы 3000 мг құрайды. Асқазан-ішек жолы тарапынан болатын жағымсыз құбылыстарды азайту үшін дозасын 2-3 қабылдауға бөлу керек.

Инсулинмен біріктіріп II типті қант диабетінде, әсіресе инсулинге салдарлы резистенттілікпен қатар жүретін семіздіктің айқын дәрежесінде. Қандағы глюкоза деңгейін жақсы бақылау нәтижесіне жету үшін метформин мен инсулинді біріктірілген ем түрінде қолдануға болады. Қандағы глюкоза деңгейін өлшеу нәтижесіне сай инсулин дозасын таңдаған cияқты Диаформин препаратының әдеттегі бастапқы дозасы тәулігіне 2-3 рет 500 мг және 850 мг құрайды.

Таблетканы тамақтану кезінде немесе тамақтанғаннан кейін шайнамастан қабылдау керек.

Емдеу ұзақтығын дәрігер аурудың ауырлығы мен ағымына байланысты анықтайды.

Жағымсыз әсерлері

- жүрек айнуы, құсу, ауыздың темір татуы, тәбеттің болмауы, метеоризм, диарея, іштің ауыруы. Бұл симптомдар, әсіресе емдеудің басында жиі туындайды және әдетте, өздігінен басылады. Аталған симптомдар антацидтерді, атропин туындыларын немесе спазмолитиктерді тағайындағанда азаяды. Бұл жағымсыз әсерлердің дамуын болдырмас үшін, Диаформинді күніне 2-3 рет ас ішу кезінде немесе соңында тағайындау қажет. Егер диспепсиялық симптомдар тұрақты болса, Диаформинмен емдеуді тоқтату керек

- терідегі бөртпелер

- лактоацидоз (емдеуді тоқтатуды қажет етеді)

- ұзақ уақыт емдеуде - В12 гиповитаминозы (сіңуінің бұзылуы).

Жекелеген жағдайларда

- мегалобластты анемия

Қолдануға болмайтын жағдайлар

- метформин гидрохлоридіне немесе кез-келген қосымша затына жоғары сезімталдық

- диабеттік кетоацидоз, диабеттік кома алдындағы жағдай, кома

- бүйрек жеткіліксіздігі немесе бүйрек қызметінің бұзылуы (креатинин клиренсі деңгейі минутына 60 мл аз)

- бауыр жеткіліксіздігі

- бүйрек қызметінің бұзылуына алып келуі мүмкін организмнің сусыздануы, ауыр жұқпа, гипогликемиялық шок

- тіндік гипоксияның дамуына алып келуі мүмкін (тыныс алу жеткіліксіздігі, жүрек жеткіліксіздігі, жедел миокард инфарктісі, ми қанайналымының жедел бұзылуы) жедел және созылмалы аурулардың айқын клиникалық көріністері

- күрделі хирургиялық операциялар және жарақаттар (инсулинмен емдеу жүргізу көрсетілген кезде)

- созылмалы маскүнемдік және этанолмен қатты улану

- лактатацидоз (соның ішінде, сыртартқысындағы)

- құрамында йод бар контрастылы дәрілерді енгізе отырып, радиоизотоптық немесе рентгенологиялық зерттеулерді жүргізгенге дейін кемінде 2 күн бұрын және жүргізгеннен кейін 2 күн бойы

- гипокалориялы емдәм ұстану (тәулігіне < 1000 ккал)

• жүктілік, лактация кезеңі

Препаратты жасы 60-тан асқан, ауыр дене еңбегімен шұғылданатын емделушілерде қолдану ұсынылмайды, бұл оларда сүтқышқылды ацидоздың даму қаупінің жоғарылауымен байланысты.

Дәрілермен өзара әрекеттесуі

Диаформин препаратын даназолмен бір мезгілде қолданғанда гипергликемиялық әсері дамуы мүмкін. Даназолмен емдеу қажет болса және оны қабылдауды тоқтатқаннан кейін, гликемия деңгейін бақылауға ала отырып, Диаформиннің дозасын түзету қажет болады.

Диаформин препаратын алкогольмен және құрамында этанол бар препараттармен бір мезгілде қолданғанда алкогольмен жедел уыттану кезінде, әсіресе ашыққанда немесе калориясы төмен емдәм ұстанғанда, сондай-ақ бауыр жеткіліксіздігі кезінде лактатацидоздың даму қаупі артады.

Хлорпромазин жоғары дозаларда (тәулігіне 100 мг) инсулиннің босап шығуын азайтады және қандағы глюкоза деңгейін арттырады. Нейролептиктермен бір мезгілде қолданғанда және оларды қабылдауды тоқтатқаннан кейін гликемия деңгейін бақылай отырып, Диаформиннің дозасын түзету қажет болады.

Глюкокортикостероидтар (жүйелі және жергілікті қолдануға арналған) глюкозаға толеранттылықты төмендетеді және кей жағдайларда, кетоз тудыра отырып, қандағы глюкоза деңгейін арттырады. Мұндай біріктірілімді қолдану қажет болса және глюкокортикостероидтарды қабылдауды тоқтатқаннан кейін қандағы глюкоза деңгейін бақылай отырып, Диаформиннің дозасын түзету қажет болады.

«Ілмектік» диуретиктер мен Диаформинді бір мезгілде қолданғанда, бүйректің функционалдық жеткіліксіздігінің пайда болу мүмкіндігіне байланысты лактатацидоздың даму қаупі бар. Егер креатинин клиренсі минутына <60 мл болса, Диаформинді тағайындамау керек.

Диаформинді рентгеноконтрастылы дәрілерді пайдалана отырып рентгенологиялық зерттеу жүргізерден 48 сағат бұрын (соның ішінде урография, көктамырішілік ангиография) және жүргізгеннен кейін 48 сағат ішінде тоқтату керек.

β2-симпатомиметиктерді қолданғанда β2-адренорецепторлардың көтермеленуіне байланысты, Диаформиннің емделуші организміне фармакологиялық әсері айтарлықтай төмендейді. Бұл жағдайда қандағы глюкоза деңгейін бақылауға алу және қажет болса, инсулинді тағайындау керек. АӨФ тежегіштері мен басқа антигипертензивтік препараттар қандағы глюкоза деңгейін төмендетуі мүмкін. Қажет болса, метформиннің дозасын түзету керек.

Диаформинді сульфонилмочевина туындыларымен, инсулинмен, акарбозамен және салицилаттармен бір мезгілде қолданғанда гипогликемиялық әсері күшеюі мүмкін.

Айрықша нұсқаулар

Емделушіге құсу, іштің ауыруы, бұлшықет ауырулары, жалпы әлсіздік және қатты дімкәстану пайда болған жағдайда, препаратты қабылдауды тоқтату және дәрігерге қаралу қажеттілігі туралы ескерту керек. Бұл симптомдар басталып келе жатқан лактатацидоздың белгісі болуы мүмкін. Диаформинді рентгеноконтрастылы дәрілерді пайдалана отырып рентгенологиялық зерттеу жүргізерден 48 сағат бұрын (соның ішінде урография, көктамырішілік ангиография) және жүргізгеннен кейін 48 сағат ішінде тоқтату керек.

Диаформин препаратын қолдану аясында алкоголь қабылдаудан бас тарту керек.

Құрамында 850 мг диаформин бар таблеткаларда лактоза болады, сондықтан галактозаны көтере алмаушылықтың сирек тұқым қуалайтын түрлері, лактаза жеткіліксіздігі немесе глюкоза-галактоза мальабсорбциясы синдромы бар емделушілер препаратты мұндай дозада қолданбауы тиіс.

Педиатрияда қолданылуы

Балаларды емдеу үшін қолданылмайды.

Дәрілік заттың көлік құралын немесе қауіптілігі зор механизмдерді басқару қабілетіне әсер ету ерекшеліктері

Автокөлік басқаруда немесе басқа механизмдермен жұмыс жасау кезінде реакция жылдамдығына әсер етпейді.

Артық дозалануы

Симптомдары: метформинді 85 г дозада қолданғанда гипогликемия байқалған жоқ, алайда лактатацидоз дамығаны білінген. Лактатацидоздың ерте білінетін симптомдары жүрек айнуы, құсу, диарея, дене температурасының жоғарылауы, іштің ауыруы, бұлшықеттердің ауыруы болып табылады, ары қарай тыныс алудың жиілеуі, бас айналуы, сананың шатасуы, кома дамуы мүмкін.

Емі: Диаформинді дереу тоқтату, шұғыл түрде ауруханаға жатқызу, қандағы лактат концентрациясын анықтау; қажет болса симптоматикалық ем жүргізеді. Организмнен лактат пен метформинді шығару үшін анағұрлым тиімдісі гемодиализ.

Шығарылу түрі және қаптамасы

10 таблеткадан поливинилхлоридті түссіз үлбір мен баспалы лакталған алюминий фольгадан жасалған пішінді ұяшықты қаптамаға салады.

3 немесе 6 пішінді қаптама медицинада қолданылуы жөніндегі мемлекеттік және орыс тілдеріндегі нұсқаулықпен бірге картоннан жасалған пәшкеге салынады.

Сақтау шарттары

Жарықтан қорғалған жерде, 25 °С-ден аспайтын температурада сақтау керек.

Балалардың қолы жетпейтін жерде сақтау керек!

Сақтау мерзімі

3 жыл

Препаратты қаптамасында көрсетілген жарамдылық мерзімі өткеннен кейін қолдануға болмайды.

Дәріханалардан босатылу шарттары

Рецепт арқылы

Өндіруші

"Фармак" ЖАҚ, Украина, 04080, Киев қ., Фрунзе к-сі, 63.

Тіркеу куәлігінің иесі

"Фармак" ЖАҚ, Украина

Қазақстан Республикасы аумағында тұтынушылардан өнім (тауар) сапасына қатысты шағымдарды қабылдайтын ұйымның мекенжайы

Қазақстан Республикасы, 050009 Алматы қ., Абай к-сі 157, 5 кеңсе

Тел/факс: +7 (727) 250 66 23, электронды поштасы: Djatlova88@mail.ru