Дексаметазон-ЛФ (Дексаметазон)

Дексаметазон-ЛФ

Дексаметазон

Дәрілік түрі, дозаcы

Инъекцияға арналған ерітінді, 4 мг/мл

Жүйелі әсер ететін гормональді препараттар, жыныс гормондарын және инсулиндерді қоспағанда. Жүйелі пайдалануға арналған кортикостероидтар. Жүйелі қолдануға арналған кортикостероидтар, қарапайымдар. Глюкокортикостероидтар. Дексаметазон.

АТХ коды: Н02АB02

Жүйелі қолдану

Ми ісінуі (ісіктер, нейрохирургиялық араласу, ми абсцесі, бассүйек-ми жарақаты, бактериялық менингит кезінде).

Жарақаттан кейінгі шок/өкпеде болатын шок синдромының профилактикасы.

Бронх демікпесінің жедел ауыр ұстамасы.

Терінің жедел ауқымды ауыр ауруларын (эритродермия, тұрпайы сулы бөртпе, жедел экзема) бастапқы парентеральді емдеу.

Жүйелі қызыл жегі сияқты (әсіресе, висцеральді түрлері) аутоиммундық ауруларды бастапқы парентеральді емдеу.

Ауыр үдемелі ағымдағы белсенді ревматоидты артрит, мысалы, ауыр деструкциялық түрлері және/немесе буыннан тыс көріністерімен болатын түрлері.

Бір мезгілдегі инфекцияға қарсы ем кезінде ғана уытты жай-күйлері болатын ауыр инфекциялық аурулар (мысалы, туберкулез, іш сүзегі, бруцеллез).

Қатерлі ісіктердің паллиативті емі.

Тиісті емдеу сызбалары шеңберінде операциядан кейінгі құсу немесе цитостатиктер туғызған құсу профилактикасы және емдеу.

Дексаметазон-ЛФ, инъекцияға арналған 4 мг/мл ерітінді ересектер мен жасөспірімдерде (кем дегенде, 12 жасқа толған және дене салмағы 40 кг-ден кем емес) қосымша оксигенацияны талап ететін COVID-19 инфекциясын емдеуге пайдаланылады.

Жергілікті қолдану

Буынішілік инъекциялар: буындардың созылмалы қабыну ауруларын, белсендірілген артроз, иық-жауырын периартропатиясының жедел түрлерінен кейін бір немесе бірнеше буынның тұрақты қабынуы.

Инфильтрациялық ем (қатаң көрсетілімдері): бактериялық емес тендовагиниттер мен бурситтер, периартропатиялар, инсерциялық тендопатиялар.

Офтальмология: инфекциялық емес кератоконъюнктивит, склерит (некроздайтын склеритті қоспағанда), алдыңғы және аралық увеит кезінде субконъюнктивалық қолдану.

Қолданудың басталуына дейінгі қажетті мәліметтер тізбесі

- Әсер етуші затқа немесе «Қосымша заттар» бөлімінде тізбеленген қосымша заттардың кез келгеніне аса жоғары сезімталдық.

- Буынішілік инъекциялар қарсы көрсетілімді.

- Емдеуге жататын буын ішіндегі немесе оған етене жақын жердегі инфекциялар.

- Бактериялық артрит.

- Емдеуге жататын буын тұрақсыздығы.

- Қан кетулерге бейімділік (өздігінен туындайтын немесе антикоагулянттар салдарынан).

- Периартикулярлы тіндердің метастазды кальцификациялануы.

- Сүйектің аваскулярлы некрозы.

- Сіңірлердің үзілуі.

- Шарко буыны.

Препарат енгізілген жерлердегі инфекцияларда, сондай-ақ көздің вирустық, бактериялық және зеңдік инфекцияларын емдеу үшін субконъюнктивалық қолдану кезінде, инфекцияға қарсы спецификалық ем жүргізілмейтін мөлдір қабық жарақаттарында және ойық жаралы үдерістерінде препаратты тағайындау қарсы көрсетілімді.

Қолдану кезіндегі қажетті сақтандыру шаралары

Жекелеген жағдайларда препаратты қолдану кезінде қан айналу жеткіліксіздігімен, жүректің тоқтап қалуымен, аритмиялармен, бронх түйілуімен және/немесе құлап қалумен немесе артериялық қысым көтерілуімен ауыр анафилаксиялық реакциялар байқалды. Иммуносупрессия салдарынан Дексаметазон-ЛФ, инъекцияға арналған 4 мг/мл ерітінді препаратымен емдеу бактериялық, вирустық, паразиттік, шартты-патогендік және зеңдік инфекциялардың жоғары қаупіне әкелуі мүмкін. Ағымдағы немесе даму үстіндегі инфекциялар симптомдары бүркемеленген болуы мүмкін, ол диагностиканы қиындатады. Туберкулез немесе В гепатиті сияқты жасырын инфекциялар қайта белсенділенген болуы мүмкін.

Егер Дексаметазон-ЛФ препаратымен емделген уақытта ерекше стресс оқиғалары (жазатайым жағдай, хирургиялық араласу, босану және т.б.) туындаса, дозаны уақытша арттыру қажет болуы мүмкін.

Жүйелі (пероральді) кортикостероидтарды басқа себептермен қабылдап жүрген пациенттерде (мысалы, өкпенің созылмалы обструкциялық аурулары бар пациенттерде), қосымша оксигенді ем қажеттілігі болмаған жағдайда, жүйелі кортикостероидтарды тоқтатуға болмайды.

Дексаметазон-ЛФ препаратымен емдеуді тек қатаң көрсетілімдер болса ғана және, қажет болғанда, келесі көрсетілімдерде қосымша таргеттік инфекцияға қарсы еммен қатар жүргізу керек:

- жедел вирустық инфекциялар (В гепатиті, белдемелі герпес, қарапайым герпес, желшешек, герпестік кератит);

- HBsAg-оң созылмалы белсенді гепатит;

- тірі вакциналармен вакцинациялаудан шамамен 8 апта бұрын және одан кейін 2 апта өткен соң;

- жүйелі микоздар және паразитоздар (мысалы, нематодтар);

- стронгилоидоз (ұсақ аскаридаларды жұқтыру) күмән тудыратын немесе расталған пациенттерде глюкокортикостероидтар паразиттердің белсенуіне және жаппай көбеюіне әкелуі мүмкін);

- полиомиелит;

- БЦЖ екпесінен кейінгі лимфаденит;

- жедел және созылмалы бактериялық инфекциялар;

- анамнездегі туберкулезде туберкулостатикалық қорғаныспен ғана қолдану керек.

Бұдан бөлек, Дексаметазон-ЛФ препаратымен ем тек қатаң көрсетілімдер болғанда және келесі жағдайларда қосымша спецификалық ем қажет болса ғана жүргізілу керек:

- асқазан-ішек жолының ойық жаралары;

- остеопороз;

- жүректің ауыр жеткіліксіздігі;

- бақылануы қиын артериялық гипертензия;

- бақылануы қиын қант диабеті;

- психикалық бұзылыстар (оның ішінде анамнездегі), суицидтік бейімділіктерді қоса - неврологиялық немесе психиатриялық мониторинг ұсынылады;

- тар бұрышты және ашық бұрышты глаукома - офтальмологиялық мониторинг және қатар жүргізілетін ем ұсынылады;

- мөлдір қабықтың ойық жаралары және зақымданулары - офтальмологиялық мониторинг және қатар жүргізілетін ем ұсынылады;

Ішек тесілуі қаупіне орай, Дексаметазон-ЛФ препаратын тек сенімді көрсетілімдер болса ғана және мына жағдайда тиісті бақылаумен пайдалануға болады:

- тесілу қатерімен, мүмкін, ішперденің тітіркенуінсіз ауыр ойық жаралы колит;

- дивертикулит;

- энтероанастомоздар (операциядан кейін бірден).

Глюкокортикостероидтардың жоғары дозаларын қабылдап жүрген пациенттерде асқазан-ішек жолының тесілуінен кейінгі ішперденің тітіркену белгілері болмауы мүмкін. Қант диабеті бар пациенттерде препаратты қолданған уақытта инсулин немесе диабетке қарсы пероральді препараттардың қажеттілігі жоғары болуы мүмкін екенін ескеру қажет.

Препаратпен емдеу кезінде, әсіресе, жоғары дозаларын қолданғанда және бақылануы қиын артериялық гипертензия бар пациенттерде артериялық қысымды жүйелі бақылау қажет болады.

Жүрек жеткіліксіздігі ауыр пациенттер, жай-күйдің нашарлау қаупі болатындықтан, мұқият қадағалауда болуы тиіс.

Брадикардия дексаметазонның жоғары дозаларын қабылдау кезінде туындауы мүмкін.

Ауыр анафилаксиялық реакциялар болуы мүмкін.

Фторхинолондар мен глюкокортикостероидтарды бір мезгілде қолдану кезінде сіңір ауруларының, тендинит пен сіңірлер үзілуінің қаупі артады.

Дексаметазон-ЛФ препаратымен емдеу кезінде қатарлас миастения бастапқыда нашарлауы мүмкін.

Вакцинация, әдетте, белсенділігі жойылған вакциналармен жасалуы мүмкін. Алайда, кортикостероидтардың жоғарырақ дозаларында иммундық жауаптың бұзылуы және, соның салдарынан, вакцинация сәтсіз болуы мүмкін екенін атап өту керек.

Жоғары дозалар жағдайында калийдің талапқа сай тұтынылуын және натрий шектелуін қамтамасыз ету үшін сақ болу, сондай-ақ қан сарысуында калий деңгейін бақылап отыру қажет.

10 күннен артық жалғасатын препаратты қабылдауды күрт тоқтату негізгі аурудың өршуіне немесе қайталануына және бүйрек үсті безінің жедел жеткіліксіздігінің/кортизонды тоқтату синдромының туындауына әкелуі мүмкін; сондықтан, егер тоқтату жоспарланса, дозаны баяу төмендету керек.

Спецификалық вирустық аурулар (желшешек, қызылша) глюкокортикостероидтар қабылдап жүрген пациенттерде ерекше ауыр өтуі мүмкін. Бұрын желшешекпен немесе қызылшамен ауырмаған, иммундық жүйесі әлсіреген (иммуносупрессиямен) пациенттер қауіпке ұшырауға ерекше бейім. Егер осы пациенттер Дексаметазон-ЛФ препаратымен емдеу кезінде қызылшамен немесе желшешекпен науқастармен байланысқа түссе, қажет болса, профилактикалық емдеуді бастау керек.

Тіркеуден кейінгі кезеңде жүргізілген зерттеулерде дексаметазонды бөлек немесе басқа химиялық ем препараттарымен біріктірілімде қолданудан кейінгі гематологиялық қатерлі жаңа түзілімдері бар пациенттерде ісік лизисі синдромы (ІЛС) байқалды. Пролиферация жылдамдығы жоғары, ісік салмағы жоғары және цитоуытты препараттарға сезімталдығы жоғары пациенттер сияқты, ІЛС қаупі жоғары пациенттер қырағы қадағалауда болуы және тиісті алдын ала сақтану шараларын қадағалаумен емделуі тиіс.

Басқа дәрілік препараттармен өзара әрекеттесуі

Эстрогендер (мысалы, овуляция тежегіштері): глюкокортикостероидтардың жартылай шығарылу кезеңі ұзаққа созылуы мүмкін. Осылайша, емдік әсерін күшейтуге болады.

Рифампицин, фенитоин, карбамазепин, барбитураттар және примидон сияқты CYP3A4 индукциялайтын препараттар: кортикоидтар әсерлері төмендеуі мүмкін.

CYP3A4 тежегіштері (кетоконазол, итраконазол, ритонавир және кобицистатты қоса): дексаметазон клиренсін төмендетуі мүмкін, бұл әсерлерінің күшеюіне және бүйрек үсті бездерінің бәсеңдеуіне/Кушинг синдромына әкелуі мүмкін. Егер пайдасы кортикостероидтардың жүйелі жағымсыз реакцияларының жоғарылаған қаупінен артық болмаса, біріктірілімнен сақтану керек. Бұл жағдайда пациенттер кортикостероидтардың жүйелі әсерлері тұрғысынан қадағалауда болуы тиіс.

Эфедрин: глюкокортикостероидтар метаболизмін жеделдетуі мүмкін, бұл олардың тиімділігін төмендетеді.

АӨФ тежегіштері: қан құрамы өзгеруінің жоғары қаупі.

Жүрек гликозидтері: гликозидтер әсері калий тапшылығында күшеюі мүмкін.

Салуретиктер/іш жүргізетін препараттар: калий шығарылуын арттыруы мүмкін.

Диабетке қарсы препараттар: қандағы қант деңгейінің төмендеу әсері азаюы мүмкін.

Кумарин туындылары: антикоагулянттық әсері төмендеуі немесе күшеюі мүмкін. Бір мезгілде қолдану кезінде антикоагулянт дозасын түзету қажет болуы мүмкін.

Қабынуға қарсы стероидты емес препараттар (ҚҚСП) /ревматизмге қарсы препараттар, салицилаттар және индометацин: асқазан-ішек ойық жараларының және қан кетулер қаупі артады.

Жете поляризацияламайтын миорелаксанттар: бұлшықеттердің босаңсу әсері ұзағырақ созылуы мүмкін.

Атропин, антихолинергиялық басқа препараттар: бір мезгілде қолдану кезінде көзішілік қысымның қосымша көтерілуі болуы мүмкін.

Празиквантел: кортикостероидтар қандағы празиквантел концентрациясының төмендеуін тудыруы мүмкін.

Хлорохин, гидроксихлорохин, мефлохин: миопатия, кардиомиопатияның жоғары туындау қаупі болады.

Протирелин: ТТГ артуы протирелин енгізу кезінде төмендеуі мүмкін.

Иммунодепрессанттар: инфекцияларға сезімталдықтың артуы және болжамды өршуі немесе жасырын инфекциялардың көрініс беруі. Циклоспорин үшін қосымша: қандағы циклоспорин деңгейлері жоғары, церебральді құрысулардың жоғары қаупі бар.

Фторхинолондар сіңірлермен болатын кінәраттар қаупін арттыруы мүмкін.

Зерттеу әдістеріне әсері: аллергиялық сынамаларға болатын тері реакцияларының бәсеңдеуін байқауға болады.

Арнайы сақтандырулар

Феохромоцитома кризі

Кортикостероидтарды қолданудан кейін өліммен аяқталуға алып келуі мүмкін феохромоцитома кризі мәлімделді. Феохромоцитома күмән тудырған немесе диагностикаланған пациенттерде кортикостероидтарды тек қаупі мен пайдасын тиісті бағалаудан кейін ғана пайдалану керек.

Көрудің бұзылуы

Көру бұзылулары кортикостероидтарды жүйелі және жергілікті қолдану кезінде туындауы мүмкін. Егер пациентте анық көрмеу немесе көрудің басқа бұзылулары сияқты симптомдар көрініс берсе, болжамды себептерін бағалау үшін пациентті офтальмологқа жіберу мәселесін қарастыру керек; оларға, өзгелерінен тыс, катаракта, глаукома немесе жүйелі немесе жергілікті кортикостероидтарды қолданудан кейін мәлімделген орталық серозды хориоретинопатия (CSC) сияқты сирек аурулар жатады.

Вена ішіне енгізілген жағдайда инъекция баяу (2-3 минут ішінде) жасалу керек, өйткені тым жылдам енгізгенде жағымсыз шаншу немесе парестезия түрінде 3 минутқа дейін созылатын қысқа мерзімді мардымсыз жағымсыз реакциялар болуы мүмкін.

Дексаметазон-ЛФ – қысқа мерзімді қолдануға арналған препарат. Ұзақ уақыт кезеңі бойына дұрыс қолданылмаған жағдайда құрамында ұзақ уақыт қолдануға арналған глюкокортикостероидтар бар дәрілік препараттар үшін сипатталған алдын ала сақтану шараларын қадағалау қажет.

Жергілікті қолдану жағдайында болуы мүмкін жүйелі жағымсыз реакцияларды және өзара әрекеттесулерді ескеру қажет.

Глюкокортикостероидтарды буын ішіне енгізу буындар инфекцияларының қаупін арттырады. Жүк түсетін буындарға глюкокортикостероидтарды ұзақ уақыт және қайталап қолдану тозуымен байланысты буындағы өзгерісті өршітуі мүмкін. Бұл ауырсыну немесе басқа симптомдар басылған соң зақымданған буынға шамадан тыс жүк түсуімен байланысты болуы мүмкін.

Офтальмологияда жергілікті қолдану

Офтальмологиялық дексаметазонның жүйелі сіңірілуімен байланысты Кушинг синдромы және/немесе бүйрек үсті бездері функциясының бәсеңдеуі балалар мен CYP3A4 тежегіштерін (ритонавир мен кобицистатты қоса) қабылдап жүрген пациенттерді қоса, бейімділігі бар пациенттерде қарқынды немесе ұзақ емдеуден кейін туындауы мүмкін.

Егде жастағы пациенттер

Егде жастағы пациенттерде остеопороз даму қаупі жоғары екендіктен, Дексаметазон-ЛФ препаратымен емдеудің қауіп және пайда арақатынасын мұқият саралау керек.

Препаратты қолдану допинг-бақылаудың оң нәтижелеріне әкелуі мүмкін.

Дәрілік зат құрамында 1 мл ерітіндіге 16.92 мкмоль (0.393 мг) натрий бар, яғни құрамында натрий жоқ дерлік.

Педиатрияда қолдану

Шала туған нәрестелер: қолда бар деректер өкпенің созылмалы ауруы бар шала туған нәрестелерде ерте (туғаннан кейінгі < 96 сағат) жүргізілген емнен кейін күніне екі рет 0,25 мг/кг бастапқы дозаның нейрондар дамуына ұзақ мерзімді теріс әсер көрсететінін айғақтайды.

Дексаметазон-ЛФ препараты балалардағы өсу кезеңінде тағайындалғанда пайда және қауіп арақатынасын мұқият таразылау керек.

Гипертрофиялық кардиомиопатия

Шала туған нәрестелерде, дексаметазонды қоса, кортикостероидтарды жүйелі қолданудан кейінгі гипертрофиялық кардиомиопатия мәлімделді. Тіркелген жағдайлардың көпшілігінде бұл емдеуді тоқтатудан кейін қайтымды болды. Дексаметазонмен жүйелі ем алатын шала туған нәрестелерде жүрек функциясын және структураларды диагностикалық бағалау және мониторинг өткізілу керек («ДП стандартты қолдану кезінде көрініс беретін жағымсыз реакциялар сипаттамасы және осы жағдайда (қажет болғанда) қабылдау керек шаралар» бөлімін қараңыз).

Жүктілік немесе лактация кезінде

Дексаметазон плацента арқылы өтеді. Жүктілік кезінде, әсіресе, алғашқы үш айында оны тек қаупі мен пайдасын мұқият бағалаудан кейін ғана қолдану керек.

Жүктілік кезінде глюкокортикостероидтармен ұзақ уақыт емделген жағдайда шаранада өсу бұзылуларын жоққа шығаруға болмайды.

Буаз жануарларға кортикостероидтар енгізу таңдай ажырауын, жатырішілік даму кідірісін және бой өсуіне және ми дамуына әсерін қоса, шарананың даму аномалияларын туғызуы мүмкін. Кортикостероидтардың адамдарда таңдай/ерін ажырауы сияқты туа біткен аномалиялар жиілігін арттыратынына ешқандай дәлелдер жоқ.

Егер глюкокортикостероидтар жүктілік соңында тағайындалса, шаранада бүйрек үсті бездерінің қыртысы атрофиясының қаупі бар, бұл жаңа туған нәрестеде орын басу емінің қажеттілігін туындатуы мүмкін. Кейінгі айларда мерзімінен бұрын босанып қалу қаупі бар жүкті әйелдердің, дексаметазонды қоса, кортикостероидтарды қысқа мерзімді қолдануынан кейін неонатальді гипогликемия қаупі жоғары болады.

Дексаметазон емшек сүтіне өтеді. Емізулі сәбидің денсаулығына зияны туралы әзірге ештеңе белгісіз. Дегенмен де, бала емізу кезіндегі көрсетілімдері қатаң белгіленуі тиіс. Егер ауруға шалдығу себебінен жоғарырақ дозалары қажет болса, бала емізуді тоқтату керек.

Дәрілік заттың көлік құралын немесе қауіптілігі зор механизмдерді басқару қабілетіне әсер ету ерекшеліктері

Қазіргі таңда Дексаметазон-ЛФ автокөлік басқару немесе механизмдермен жұмыс істеу қабілетіне ықпал етуінің дәлелдері жоқ.

Қолдану жөніндегі нұсқаулар

Дозалау режимі

Дозалау шамасы ауру типіне және ауырлығына, сондай-ақ пациенттің емге жеке реакциясына байланысты. Әдетте жедел, ауыр түрлерінде созылмалы аурулар кезіндегісінен едәуір артық болуы тиіс салыстырмалы жоғары бастапқы дозалар қолданылады.

Егер басқаша көрсетілмесе, дозалау жөнінде келесі нұсқаулар қолданылады.

Жергілікті қолдану

Ми ісінуі. Доза аурудың себебі мен ауырлығына қарай таңдалады: алдымен вена ішіне 8-10 мг (80 мг дейін), артынан 4-8 күнге жуық вена ішіне 3-4 (6) бір реттік дозаларға бөлінген тәулігіне 16-24 мг (48 мг дейін). Сәулемен ем кезінде және операция жасалмайтын ми ісіктерінің консервативті емінде препаратты төменірек дозаларда ұзағырақ енгізу қажет болуы мүмкін.

Бактериялық менингит аясындағы ми ісінуі: 4 күн бойы әр 6 сағат сайын дене салмағына 0,15 мг/кг, балаларға 2 күн бойы әр 12 сағат сайын дене салмағына 0,4 мг/кг; антибиотиктердің бірінші дозасынан бастап.

Жарақаттанудан кейінгі шок/өкпе жарақатынан кейінгі шок профилактикасы: бастапқы доза 40-100 мг (балаларға 40 мг) вена ішіне дозаны әр 12 сағат сайын қайталаумен немесе әр 6 сағат сайын 16-40 мг 2-3 күн бойы.

Анафилаксиялық шок: адреналиннің вена ішіне бастапқы инъекциясы, артынан вена ішіне 40-100 мг (балаларға 40 мг), қажет болса, инъекцияны қайталау.

Демікпенің жедел ауыр ұстамасы: ересектер: 8-20 мг вена ішіне мүмкіндігінше тезірек, қажет болса, әр 4 сағат сайын қайталанатын 8 мг инъекциялар. Балалар: вена ішіне дене салмағына 0,15-0,3 мг/кг немесе бастапқыда болюс түрінде дене салмағына 1,2 мг/кг, артынан 0,3 мг/кг әр 4-6 сағат сайын. Аминофиллин мен секретолитиктер енгізуге де болады.

Терінің жедел аурулары: ауру түріне және дәрежесіне қарай, вена ішіне тәуліктік доза 8-40 мг, жекелеген жағдайларда 100 мг дейін. Артынан азайтылатын дозаларында пероральді емдеу.

Жүйелі ревматизмдік аурулардың белсенді фазалары: жүйелі қызыл жегі – тәулігіне 6-16 мг.

Ауыр үдемелі түрімен белсенді ревматоидты артрит: ауыр деструкциялық түрлерінде тәулігіне 12-16 мг, буыннан тыс көріністерінде тәулігіне 6-12 мг.

Ауыр инфекциялық аурулар, уыттану жай-күйлері (мысалы, туберкулез, іш сүзегі; тек инфекцияға қарсы тиісті емге қосымша ретінде): жекелеген жағдайларда вена ішіне тәулігіне 4-20 мг (мысалы, іш сүзегі) бастапқыда 200 мг дейін.

Қатерлі ісіктердің паллиативті емі: бастапқыда 8-16 мг/тәулік, ұзағырақ ем кезінде тәулігіне 4-12 мг.

Цитостатиктер туғызған құсу профилактикасы және емдеу, құсуға қарсы сызбалар құрамында: химиялық емді бастар алдында вена ішіне 10-20 мг, артынан, қажет болса, тәулігіне 4-8 мг тәулігіне 2-3 рет 1-3 күн бойы (орташа эметогенді химиялық ем) немесе 6 күнге дейін (жоғары эметогенді химиялық ем).

Операциядан кейінгі құсу профилактикасы және емдеу: операция басталуына дейін вена ішіне бір реттік доза 8-20 мг, балаларға 2 жастан бастап – дене салмағына 0,15-0,5 мг/кг (көп дегенде 16 мг).

COVID-19 ауруын емдеу үшін: ересек пациенттерге 10 күн бойы тәулігіне 1 рет вена ішіне 6 мг тағайындалады.

Балалар және жасөспірімдер

Балалар үшін (12 жастағы және одан үлкен жасөспірімдер) 10 күнге дейінгі мерзімде күніне бір рет вена ішіне 6 мг доза ұсынылады. Емдеу ұзақтығы пациенттің клиникалық жауабына және жеке қажеттіліктеріне байланысты.

Егде жастағы пациенттер, бүйрек немесе бауыр жеткіліксіздігі бар пациенттер

Дозаны түзету қажет емес.

Жергілікті қолдану

Жергілікті инфильтрациялық-инъекциялық ем, әдетте, 4-8 мг мөлшерімен жүргізіледі, ұсақ буындарға енгізу және субконъюнктивалық қолдану кезінде 2 мг жеткілікті.

Енгізу әдісі және жолы

Препарат вена ішіне баяу (2-3 минут) енгізіледі, бірақ, егер веналар ауруы орын алса және қан айналу функциясы бұзылмаған болса, оны бұлшықет ішіне де енгізуге болады. Препаратты, сонымен қатар, инфильтрациялық, буын ішіне немесе субконъюнктивалық қолдануға болады. Қолдану ұзақтығы көрсетілімдеріне байланысты. Гипотиреоз немесе бауыр циррозы жағдайында салыстырмалы төмен дозалары жеткілікті болуы мүмкін және дозаны төмендету қажет болуы мүмкін. Буынішілік инъекцияларды буындарға ашық жасалатын араласулар ретінде қарастыру және оларды тек қатаң асептикалық жағдайларда жүргізу керек. Симптомдарды сәтті жеңілдетуге, әдетте, буын ішіне бір инъекция жеткілікті. Егер тағы бір инъекция қажет болса, оны 3-4 апта өткен соң барып жасау керек. Буынға жасалатын инъекциялар саны үш-төртеуімен шектелуі тиіс. Әсіресе, қайталанатын инъекциялардан кейін буынға медициналық тексеру көрсетілген.

Инфильтрация: препарат ең қатты ауыратын аумаққа немесе сіңір бекітілімдеріне енгізіледі. Сақ болыңыз, сіңір ішіне ешқандай инъекциялар салуға болмайды! Қысқа уақыт аралықтары сайын инъекция салмау және қатаң асептикалық сақтандыру шараларын қадағалау керек.

Тек мөлдір ерітінділерді пайдалану керек. Ампуланың ішіндегісі тек бір рет қолдануға арналған. Инъекцияға арналған ерітіндінің кез келген қалдықтары жойылуы тиіс.

Инфузиялық ерітінділермен үйлесімділік

Инъекцияға арналған ерітінді келесі инфузиялық ерітінділермен (әрқайсысы 250 және 500 мл) үйлесімді және 24 сағат ішінде қабылдауға арналған:

- изотониялық тұз ерітіндісі;

- Рингер ерітіндісі;

- глюкоза ерітіндісі 5%.

Инфузиялық ерітінділермен біріктіргенде тиісті жеткізуші ұсынған өздерінің инфузиялық ерітінділері туралы үйлесімділігі, қарсы көрсетілімдері, жағымсыз реакциялары және өзара әрекеттесулері қамтылған ақпаратты қадағалау қажет. Кез келген пайдаланылмаған дәрілік препарат немесе қалдықтары жергілікті талаптарға сәйкес жойылу керек.

Артық дозалану жағдайында қабылдау қажет болатын шаралар

Жедел артық дозалану жағдайлары немесе жедел артық дозалану салдарынан болатын өлім туралы бірлі-жарым хабарламалар бар. Артық дозалану, әдетте, шамадан тыс дозаларын бірнеше апта қолданудан кейін ғана көрініс береді және «ДП стандартты қолдану кезінде көрініс беретін жағымсыз реакциялар сипаттамасы және осы жағдайда (қажет болғанда) қабылдау керек шаралар» бөлімінде көрсетілген жағымсыз реакциялардың көпшілігін, бәрінен бұрын, Кушинг синдромын тудыруы мүмкін. Белгілі спецификалық антидот жоқ. Демеуші және симптоматикалық емдеу. Дексаметазонның  организмнен шығарылуын жеделдету үшін гемодиализ тиімсіз.

Дәрілік препаратты қолдану тәсілін түсініп алу үшін кеңес алу мақсатында медициналық қызметкерге хабарласыңыз.

ДП стандартты қолдану кезінде көрініс беретін жағымсыз реакциялар сипаттамасы және осы жағдайда қабылдау керек шаралар

Жағымсыз реакциялар жиілігі дозаға және емдеу ұзақтығына байланысты.

Дексаметазонмен қысқа мерзімді емдеуге байланысты жағымсыз реакцияларға мыналар жатады.

Жиі:

- бүйрек үсті безінің өтпелі жеткіліксіздігі;

- көмірсуларға төзімділіктің төмендеуі;

- тәбеттің артуы және салмақ қосу;

- психикалық бұзылулар.

Жиі емес:

- аса жоғары сезімталдық реакциялары;

- гипертриглицеридемия;

- пептидті ойық жаралар;

- жедел панкреатит.

Дексаметазонмен ұзақ уақыт емдеуге байланысты жағымсыз реакцияларға мыналар жатады.

Жиі:

- бүйрек үсті безінің ұзақ мерзімді жеткіліксіздігі;

- балалар мен жасөспірімдерде өсудің баяулауы;

- жоғарғы дене бөлігінің семіздігі;

- терінің жұқаруы және нәзіктігі;

- бұлшықеттер атрофиясы;

- остеопороз.

Жиі емес:

- иммундық жауаптың азаюы және инфекцияларға сезімталдықтың артуы;

- катаракта;

- глаукома;

- артериялық гипертензия;

- сүйектердің асептикалық некрозы.

Дексаметазонмен емдеуге байланысты келесі жағымсыз реакциялар да туындауы мүмкін.

Жиі:

- тромбоэмболиялық асқынулар;

- моноциттер және/немесе лимфоциттер санының азаюы;

- лейкоцитоз;

- эозинофилия;

- тромбоцитопения;

- тромбоцитопениялық емес пурпура;

- бүйрек үсті бездерінің жеткіліксіздігі және атрофиясы (стреске жауап төмендеуі);

- Иценко-Кушинг синдромы;

- етеккір оралымы жүйелілігінің бұзылуы;

- гирсутизм;

- бұлшықет әлсіздігі;

- стероидты миопатия (бұлшықет тінінің катаболизмі салдарынан болатын бұлшықет әлсіздігі);

- жаралардың баяу жазылуы;

- жолақтар;

- петехиялар;

- экхимоздар;

- қатты тершеңдік;

- акне;

- аллергологиялық тестілер өткізу кезіндегі тері реакцияларының бәсеңдеуі.

Жиі емес:

- гипертониялық энцефалопатия;

- көру жүйкесі бүртіктерінің ісінуі;

- емдеуді тоқтатудан кейінгі бассүйекішілік қысым көтерілуі (мидың жалған ісігі);

- бас айналу;

- бас ауыру;

- эйфориямен, ұйқысыздықпен, ашушаңдықпен, гиперкинезиямен, депрессиямен ең көп жиі көрініс беретін тұлғалық және мінез-құлықтық өзгеру;

- жүрек айну;

- ықылықтау;

- асқазанның немесе 12 елі ішектің ойық жаралары;

- көзішілік қысым көтерілуі.

Сирек:

- бөртпе;

- бронх түйілуі;

- анафилаксиялық реакциялар;

- психоздар;

- жасырын қант диабетінің клиникалық тұрғыда манифестік түріне ұласуы;

- қант диабеті бар пациенттерде инсулинге немесе қантты төмендететін пероральді препараттарға қажеттіліктің артуы;

- натрий және су іркілісі;

- калий жоғалтудың күшеюі;

- импотенция.

Өте сирек:

- ангионевроздық ісіну;

- полифокальді қарыншалық экстрасистолалар;

- өтпелі брадикардия;

- жүрек жеткіліксіздігі;

- таяуда өткерген жедел инфарктіден кейінгі миокард жарылуы;

- құрысулар;

- гипокалиемиялық алкалоз;

- ақуыздар катаболизмі салдарынан теріс азот теңгерімі;

- эзофагит;

- ойық жараның тесілуі және асқазан-ішек жолынан қан кету (гематомез, мелена);

- панкреатит;

- өт қалтасының және ішектің тесілуі (әсіресе, тоқ ішектің созылмалы қабыну аурулары бар пациенттерде);

- омыртқа бағандарының компрессиялық сынуы;

- сіңірлер үзілуі (әсіресе, кейбір хинолондарды бірге қолданғанда);

- буын және сүйектердің шеміршек тінінің некрозы (буын ішіне жиі жасалған инъекциялар кезінде);

- аллергиялық дерматит;

- есекжем;

- экзофтальм;

- ісіну;

- терінің гипер - және гипопигментациясы;

- терінің немесе тері асты шелінің атрофиясы;

- стерильді абсцесс;

- терінің қызаруы.

Жиілігі белгісіз: шала туған нәрестелердегі гипертрофиялық кардиомиопатия («Қолдану кезіндегі қажетті сақтандыру шараларын» қараңыз).

Глюкокортикостероидтарды тоқтату синдромының белгілері мен симптомдары

Егер глюкокортикостероидтарды ұзақ уақыт қабылдап жүрген пациентте препарат дозасы тез азайтылса, бүйрек үсті бездері жеткіліксіздігінің белгілері, артериялық гипотензия, өліммен аяқталу дамуы мүмкін.

Кейбір жағдайларда тоқтату симптомдары пациенттің ем алған ауруына қатысты өршу немесе қайталану симптомдары мен белгілеріне ұқсас болуы мүмкін. Ауыр жағымсыз құбылыстар дамығанда емдеу тоқтатылуы тиіс.

Жағымсыз дәрілік реакциялар туындағанда медициналық қызметкерге, фармацевтикалық қызметкерге немесе дәрілік препараттар тиімсіздігі туралы хабарламаларды қоса, дәрілік препараттарға жағымсыз реакциялар (әсерлер) бойынша ақпараттық деректер базасына тікелей хабарласу керек

«Дәрілік заттар мен медициналық бұйымдарды сараптау ұлттық орталығы» ШЖҚ РМК

http://www.ndda.kz

Қосымша мәліметтер

Дәрілік препараттың құрамы

Препараттың бір ампуласының (1 мл) ішінде:

белсенді зат - дексаметазон фосфаты (дексаметазон натрий фосфаты түрінде) - 4 мг (4.37 мг),

қосымша заттар: креатинин, натрий цитраты, динатрий эдетаты, натрий гидроксиді 1М ерітіндісі, инъекцияға арналған су.

Сыртқы түрінің, иісінің, дәмінің сипаттамасы

Мөлдір түссіз немесе сәл қоңырлау немесе сәл сарғыш сұйықтық.

Шығарылу түрі және қаптамасы

Инъекцияларға арналған 1 мл ерітіндіден сындыру сақинасы бар І гидролитикалық класты күңгірт шыныдан жасалған ампулаларда. Ампулаға  заттаңба жапсырылады. 5 ампуладан поливинилхлоридтен жасалған пішінді ұяшықты қаптамада. 2 пішінді ұяшықты қаптамадан медициналық қолдану жөніндегі қазақ және орыс тілдеріндегі нұсқаулықпен бірге картон қорапшада.

2 жыл.

Жарамдылық мерзімі өткеннен кейін қолдануға болмайды!

Түпнұсқалық қаптамасында (жарықтан қорғау үшін) 25 °С-ден аспайтын температурада сақтау керек.

Балалардың қолы жетпейтін жерде сақтау керек!

Рецепт арқылы

Өндіруші туралы мәліметтер

«Лекфарм» ЖШБҚ,

Беларусь Республикасы, 223141, Логойск қ., Минск к-сі, 2а үй, 301 п.

Тел./факс: +375 1774 53801

www.lekpharm.by

Тіркеу куәлігінің ұстаушысы

«Лекфарм» ЖШБҚ,

Беларусь Республикасы, 223141, Логойск қ., Минск к-сі, 2а үй, 301 п.

Тел./факс: +375 1774 53801

www.lekpharm.by

Қазақстан Республикасының аумағында тұтынушылардан дәрілік заттар сапасына қатысты шағымдар (ұсыныстар) қабылдайтын және дәрілік заттың тіркеуден кейінгі қауіпсіздігін қадағалауға жауапты ұйымның атауы, мекенжайы және байланыс деректері (телефон, факс, электронды пошта)

Қазақстан Республикасындағы «Лекфарм» ЖШБҚ өкілдігі,

050000, Алматы қ., Бостандық ауданы, Әл-Фараби даңғылы 7,

«Нұрлы Тау» БО, 4а корпусы, 55 кеңсе, тел. 8 (727)-3110454,

факс 8 (727)-3110455,

электронды пошта: baikenova@lekpharm.by