Вистабель

• русский
• қазақша

• Скачать инструкцию медикамента

 

Дәрілік препаратты медициналық қолдану жөніндегі нұсқаулық (Қосымша парақ)

Дәрілік препарат атауы

Вистабель, 100 ӘБ, инъекция үшін ерітінді дайындауға арналған ұнтақ

Халықаралық патенттелмеген атауы

Жоқ

Фармакотерапиялық тобы

Сүйек-бұлшықет жүйесі. Миорелаксанттар. Шеткері әсер ететін миорелаксанттар. Шеткері әсер ететін басқа да миорелаксанттар. Ботулиндік токсин.

АТХ коды M03AX01.

 

Қолданылуы

Вистабель препараты сырт келбетті уақытша түзетуге арналған:

• қабақты қатты шытқанда (қасаралық әжімдер) байқалатын қас арасындағы орташа және айқын білінетін тігінен әжімдерді

• барынша қатты күлімсірегенде байқалатын орташа және айқын білінетін латеральді периорбиталық әжімдерді («қазтабан» типті әжімдер)

• қасты барынша көтергенде байқалатын айқындылығы орташа және айқын маңдай әжімдері

ересек пациенттерде бет әжімдерінің айқындылық дәрежесі елеулі психологиялық жайсыздықты туындататын жағдайларда.

Қолдануды бастағанға дейін қажетті мәліметтер тізбесі

Қолдануға болмайтын жағдайлар

• әсер етуші затқа (заттарға) немесе қосымша заттардың кез келгеніне аса жоғары сезімталдық

• миастения гравис немесе Итон—Ламберт синдромы

• ұсынылатын инъекция орнындағы инфекциялық процесс

Қолдану кезіндегі қажетті сақтық шаралары

Препаратты дайындау және қолдану кезінде, сондай-ақ пайдаланылмаған ерітінді қалдықтарының белсенділігін жою және утилизациялау кезінде ерекше сақтық шараларын сақтаған жөн.

Басқа дәрілік препараттармен өзара әрекеттесуі

Теориялық тұрғыдан ботулиндік токсиннің әсері аминогликозидтер тобының бактерияға қарсы препараттарымен, спектиномицинмен немесе нейробұлшықет берілісіне әсер ететін басқа дәрілік заттармен (мысалы, миорелаксанттармен) бір мезгілде қолданғанда күшеюі мүмкін.

Ботулиндік нейротоксиннің әртүрлі серотиптерін бір мезгілде немесе бірнеше ай аралықпен енгізу әсері белгісіз. Бұрын енгізілген ботулиндік токсиннің әсері басылғанға дейін басқа ботулиндік токсинін енгізу кезінде айқын нейробұлшықет әлсіздігі күшейе түсуі мүмкін.

Басқа дәрілік препараттармен өзара әрекеттесуін бағалау бойынша зерттеулер жүргізілген жоқ. Дәрілік өзара әрекеттесудің клиникалық маңызды жағдайлары туралы хабарламалар жоқ.

Арнайы ескертулер

Бұл препараттың құрамында бір дозада 1 ммольден аз натрий (23 мг) бар, яғни іс жүзінде құрамында натрий жоқ.

Вистабель препаратын қолданар алдында алдыңғы хирургиялық араласымдармен байланысты жеке анатомиялық ерекшеліктер мен өзгерістерді ескеру қажет; препаратты осал анатомиялық құрылымдарға енгізуден аулақ болу керек.

Вистабель препаратын енгізудің ұсынылған дозалары мен жиілігін асырмау керек.

Өте сирек жағдайларда ботулиндік токсинді енгізгеннен кейін анафилаксиялық реакция дамуы мүмкін. Осыған байланысты түзету жүргізу кезінде эпинефрин (адреналин) немесе анафилаксиялық реакцияны басуға ықпал ететін кез келген басқа дәрілер болуы қажет.

А типті ботулотоксиннің ұсынылған дозаларын енгізген кезде білінбеген нейробұлшықет бұзылулары бар пациенттер ауыр дисфагияны және тыныс алудың бұзылуын қоса алғанда, клиникалық маңызды жүйелік әсерлердің даму қаупі жоғары болуы мүмкін. Осындай кейбір жағдайларда дисфагия бірнеше айға созылды және энтеральді тамақтану үшін асқазан зондын орнатуды қажет етті.

Сонымен қатар, пациентте бүйірлік амиотрофиялық склероз немесе шеткері нейробұлшықет бұзылулары болған кезде сақтық таныту керек.

Ботулотоксиннің инъекция орнынан алыс аймақтарға таралуымен ықтимал байланысты жағымсыз реакциялардың даму жағдайлары өте сирек байқалады. Препаратты емдік дозаларда қабылдайтын пациенттерде бұлшықет әлсіздігі байқалуы мүмкін. Жұтынудың қиындауы мен тыныс алудың қиындауы жағымсыз құбылыстар болып табылады және өлімге әкелуі мүмкін. Анамнезінде дисфагиясы және аспирациясы бар пациенттерде Вистабель препаратын қолдану ұсынылмайды.

Жұтыну, сөйлеу немесе тыныс алу бұзылған жағдайда пациенттер немесе күтуші адамдар дереу медициналық көмекке жүгінуі тиіс.

Тым жиі енгізу немесе шамадан тыс дозаларды қолдану кезінде препаратқа антиденелердің пайда болу қаупі артуы мүмкін. Антиденелердің пайда болуы ботулиндік токсин А типі, оның ішінде басқа көрсетілімдер бойынша қолданудың тиімсіздігіне әкелуі мүмкін.

Кез-келген инъекциялық емшара кезіндегідей, препаратты енгізу орнында жергілікті ауырсыну, қабыну, парестезия, гипестезия, терінің сезімталдығы, пастоздық/ісіну, эритема, оқшауланған инфекция, инъекцияға байланысты қан кету және (немесе) көгеру болуы мүмкін.

Емшарамен байланысты ауырсыну және (немесе) үрей транзиторлы симптоматикалық гипотензия мен естен тануды қоса, вазовагальді реакциялардың дамуына әкелуі мүмкін.

Вистабельді инъекцияның болжамды орындарында қабыну процесі болған кезде, сондай-ақ нысана бұлшықеттерінің әлсіздігі немесе атрофиясы кезінде сақтықпен қолдану керек.

Қабақты қатты шытқанда байқалатын қасаралық әжімдерді, барынша қатты күлімсірегенде байқалатын «қазтабан» типті әжімдерді, сондай-ақ қасты барынша көтергенде байқалатын маңдай әжімдерінде Вистабель препаратын қантамырға енгізуді болдырмау үшін сақтық таныту қажет.

Түзетуден кейін блефароптоздың даму қаупі бар; осы қауіпті мейлінше азайтуға бағытталған шаралар препаратты енгізу жөніндегі нұсқаулықтарда сипатталған.

Педиатрияда қолдану

Вистабель препаратын 18 жасқа дейінгі пациенттерде қолдану ұсынылмайды. 65 жастан асқан пациенттерде Вистабель препаратын қолдану туралы III фазаның клиникалық зерттеулерінің деректері шектеулі.

Жалпы нұсқаулар

Бірінші түзету емшарасының тиімсіздігі, яғни инъекциядан кейін бір айдан соң бастапқы жағдаймен салыстырғанда айтарлықтай жақсару болмаған жағдайда мыналар ұсынылады:

• тиімсіздік себептерін талдау, мысалы, препаратты нысаналы емес бұлшықеттерге енгізу, инъекцияның дұрыс емес техникасы, ботулотоксинді бейтараптандыратын антиденелердің түзілуі, жеткіліксіз доза;

• А типті ботулиндік токсинді қолданудың орындылығын қайта бағалау.

Бірінші емшарамен байланысты қандай да бір жағымсыз құбылыстар болмаған кезде екінші реттік емшара жүргізіледі (бірақ үш айдан ерте емес).

Егер қатты қабақ шытқанда байқалатын қасаралық әжімдерді түзету кезінде препараттың дозасы жеткіліксіз болса, жалпы дозаны 40 немесе 50 бірлікке дейін ұлғайта отырып және алдыңғы түзетудің тиімсіздігін талдау нәтижелерін ескере отырып, емшараны қайтадан жүргізеді.

Вистабель препаратын қайталап инъекциялаудың тиімділігі мен қауіпсіздігі бір жылдан астам уақыт бойы анықталмаған.

Жүктілік немесе лактация кезеңі

Жүкті әйелдерде А типті ботулиндік токсинді қолдану туралы деректер жоқ. Адам үшін ықтимал қаупі белгісіз. Вистабель препаратын жүктілік кезеңінде, сондай-ақ контрацепцияның сенімді әдістерін пайдаланбайтын ұрпақты болу функциясы сақталған әйелдерде қолдану ұсынылмайды.

Вистабель препаратының емшек сүтіне бөлінетіні белгісіз. Вистабель препаратын бала емізу кезеңінде қолдану ұсынылмайды.

Препараттың көлік құралын немесе қауіптілігі зор механизмдерді басқару қабілетіне әсер ету ерекшеліктері

Препараттың көлік құралдарын басқару және механизмдермен жұмыс істеу қабілетіне тигізер ықпалына зерттеу жүргізілген жоқ. Алайда, Вистабель препаратын қолданғаннан кейін астения, бұлшықет әлсіздігі, бас айналуы және көрудің бұзылуы дамуы мүмкін, бұл көлік құралдарын басқару және механизмдермен жұмыс істеу қабілетіне әсер етуі мүмкін.

 

Қолдану бойынша ұсынымдар

Дозалау режимі

Төменде келтірілген әрбір көрсетілім бойынша айрықша ұсынымдарды қараңыз.

Ботулиндік токсиннің бірліктері басқа препараттардың бірліктерімен өзара алмастырылмайды. «Аллерган» компаниясының ұсынылған дозалау бірліктері басқа ботулотоксиндердің бірліктерінен ерекшеленеді.

Қабақты қатты шытқанда пайда болатын қасаралық әжімдерді түзету жөніндегі нұсқаулықтар

Қалпына келтірілген Вистабель препаратының инъекциясы (50 ӘБ/1,25 мл немесе 100 ӘБ/2,5 мл) өлшемі 30 G стерильді инемен орындалады. Препарат 5 инъекция нүктесінің әрқайсысына 0,1 мл (4 бірлік) көлемінде енгізіледі (1-суретті қараңыз): қабақты шытатын әрбір бұлшықетке 2 инъекция және паңдану бұлшықетіне 1 инъекция (жалпы доза 20 ӘБ).

Инъекция жасамас бұрын, экссудацияны болдырмас үшін бас бармақты немесе сұқ саусақты көзұяның шетіндегі теріні қысып басу керек. Инъекция жасау кезінде инені жоғары қарай және медиальді түрде бағыттау керек. Блефароптоздың даму қаупін төмендету мақсатында инъекцияның әрбір нүктесі үшін ең жоғары дозадан (4 бірлік), сондай-ақ осындай нүктелердің санынан асырмау керек. Бұдан басқа, препаратты жоғарғы қабақты көтеретін бұлшықетке, әсіресе қасты түсіретін (depressor supercilii), айқын бұлшықеті бар пациенттерде енгізуден аулақ болу керек. Қабақты шытатын бұлшықетке жасалатын инъекциялар осы бұлшықеттің орталық бөлігіне, қастың доғасынан кем дегенде 1 см жоғары болуы керек.

Қабақты қатты шытқанда байқалатын қасаралық әжімдер айқындылығының төмендеуі, әдетте, емшара жүргізілгеннен кейін бір апта ішінде болады. Әсері 4 айға дейін сақталады.

Барынша күлімсірегенде байқалатын «қазтабан» типті әжімдерді түзету жөніндегі нұсқаулықтар

Қалпына келтірілген Вистабель препаратының инъекциясы (50 ӘБ/1,25 мл немесе 100 ӘБ/2,5 мл) өлшемі 30 G стерильді инемен орындалады. Препарат беттің әр жағынан 3 инъекция нүктесінің әрқайсысына 0,1 мл (4 бірлік) көлемінде енгізіледі, көздің дөңгелек бұлшықетінің латеральді бөлігіне жалпы алғанда 6 инъекция жасалады; жалпы доза 24 бірлікті құрайды (жалпы көлемі 0,6 мл), яғни әр жағынан 12 бірліктен.

Блефароптоздың даму қаупін төмендету мақсатында инъекцияның әрбір нүктесі үшін ең жоғары дозадан (4 бірлік), сондай-ақ осындай нүктелердің санынан асырмау керек. Бұдан басқа инъекцияларды көзұя шетінен латеральді жаққа қарай самай маңына жақын тұсқа жасаған жөн, бұл жоғарғы қабақты көтеріп тұратын бұлшықеттен қауіпсіз қашықтықты қамтамасыз етеді.

Инъекция кезінде иненің қимасын көзден жоғары және көзден шетке қарай бағытталады. Бірінші инъекция (А) көздің сыртқы бұрышынан латеральді жаққа қарай 1,5–2,0 см қашықтықта және көзұяның шетінен сәл латеральді жаққа қарай жасалады. Егер «қазтабан» типті әжімдер көздің сыртқы бұрышынан жоғары және төмен орналасса, түзету 2-суретте көрсетілген схемаға сәйкес жасалады. Керісінше, егер «қазтабан» типті әжімдер негізінен көздің сыртқы бұрышынан төмен орналасса, түзету 3-суретте көрсетілген схемаға сәйкес жасалады.

Барынша қатты күлімсірегенде байқалатын «қазтабан» типті әжімдерді және қабақты қатты шытқанда байқалатын қасаралық әжімдерді бір мезгілде түзету кезінде жалпы доза 1,1 мл жалпы көлемде 44 бірлікті құрауы тиіс: 24 бірлік — «қазтабан» типті әжімдерді түзету және 20 бірлік — қасаралық әжімдерді түзету үшін (қасаралық әжімдерді түзету жөніндегі нұсқаулықты және 1-суреттті қараңыз).

Зерттеушінің бағалауы бойынша барынша қатты күлімсірегенде байқалатын «қазтабан» типті әжімдердің айқындылығының төмендеуі емшара жүргізілгеннен кейін бір апта ішінде байқалды. Әсер ету ұзақтығының медианасы 4 айды құрады.

Қасты қатты көтергенде байқалатын маңдай әжімдерін түзету жөніндегі нұсқаулықтар

Қалпына келтірілген Вистабель препаратының инъекциясы (50 ӘБ/1,25 мл немесе 100 ӘБ/2,5 мл) өлшемі 30 G стерильді инемен орындалады. Препарат маңдай бұлшықет аймағындағы 5 инъекция нүктесінің әрқайсысына 0,1 мл (4 бірлік) көлемінде жалпы 20 бірлік дозада және 0,5 мл жалпы көлемде енгізіледі (4-суретті қараңыз).

Маңдай әжімдерін түзету кезінде қолданылатын жалпы доза (20 бірлік) қасаралық әжімдермен (20 бірлік) бірге 40 бірлік/1,0 мл құрайды.

Инъекция нүктелерінің орналасуын анықтау кезінде пациент маңдайының жалпы өлшемін және маңдай бұлшықеттің жиырылу белсенділігінің ерекшеліктерін бағалау керек.

Маңдай аймағын тыныштық күйінде нәзік пальпациялау арқылы және қасты барынша көтеру кезінде түзетудің келесі көлденең шегі анықталады:

• маңдай бұлшықеттің жиырылу белсенділігінің жоғарғы шегі: белсенді мимика нәтижесінде пайда болған маңдайдағы ең жоғарғы көлденең қатпардан шамамен 1 см жоғары;

• төменгі түзету сызығы: маңдай бұлшықет пен қастың белсенділігінің жоғарғы шекарасы арасында, бірақ қастан кемінде 2 см-ге жоғары;

• жоғарғы түзету сызығы: маңдай бұлшықет белсенділігінің жоғарғы шекарасы мен төменгі түзету сызығының ортасында.

Инъекцияның бес нүктесі мынадай тігінен бағдарлармен көлденең түзету сызықтарының қиылысында орналасуы тиіс:

• түзетудің төменгі сызығының бағыты бойынша беттің ортаңғы сызығымен қиылысу нүктесі, сондай–ақ әрбір жағынан пальпацияланатын уақытша сызықтан (самай қырынан) 0,5-1,5 см медиальді орналасқан екі нүкте анықталады;

• жоғарғы түзету сызығының бағыты бойынша төменгі қатардың орталық және бүйір нүктелерінің ортасында орналасқан екі нүкте анықталады.

Қасты барынша көтергенде бақыланатын маңдай бұлшықетінің айқындылық деңгейі емшара жүргізілгеннен кейін бір апта ішінде азаяды. Түзету әсері инъекциядан кейін шамамен 4 айға созылады.

Маңдай әжімдерін қасаралық әжімдермен және «қазтабан» типті әжімдермен бір мезгілде түзету кезінде жалпы доза 64 бірлікті құрайды (20 бірлік - маңдай әжімдерін түзету үшін, 20 бірлік - қасаралық әжімдерді түзету үшін) (қасаралық әжімдерді түзету жөніндегі нұсқаулықты және 1-суретті қараңыз) және 24 бірлік - «қазтабан» типті әжімдерді түзету үшін («қазтабан» типті әжімдерді түзету жөніндегі нұсқаулықты, 2 және 3-суретті қараңыз).

Пациенттердің ерекше топтары

Балалар

Вистабель препаратының қауіпсіздігі мен тиімділігі қабақты қатты шытығанда байқалатын қасаралық әжімдерді, барынша қатты күлімсірегенде байқалатын «қазтабан» типті әжімдерді немесе қастарды барынша көтергенде байқалатын маңдай әжімдерін түзету кезінде 18 жасқа толмаған адамдарда зерттелмеген. Вистабель препаратын 18 жасқа дейінгі пациенттерде қолдану ұсынылмайды.

Егде жастағы пациенттер

Вистабель препаратын 65 жастан асқан пациенттерде қолдану туралы III фазаның клиникалық зерттеулерінің деректері шектеулі. Егде жастағы пациенттерде қолдану кезінде дозаны түзету талап етілмейді.

Енгізу әдісі мен жолы

Бұлшықет ішіне енгізуге арналған.

Вистабель препаратын енгізуді қажетті жабдықтарды пайдалана отырып, емдеудің осы түрін жүргізу үшін арнайы дайындықтан өткен, тиісті біліктілігі бар дәрігерлер ғана жүзеге асыруы тиіс.

Қалпына келтірілген Вистабель препаратын бір пациентте тек бір ғана инъекция (инъекциялар) емшарасын орындау үшін пайдалану қажет. Препаратты дайындау және қолдану кезінде, сондай-ақ пайдаланылмаған ерітінді қалдықтарының белсенділігін жою және утилизациялау кезінде ерекше сақтық шараларын сақтаған жөн.

Бір нүктеге бұлшықет ішіне енгізуге арналған препараттың ұсынылған көлемі 0,1 мл құрайды.

Қабақты қатты шытқанда байқалатын тігінен әжімдерді (қасаралық әжімдер), барынша қатты күлімсірегенде байқалатын латеральді периорбиталық әжімдерді («қазтабан» типті әжімдер) немесе қасты барынша көтергенде байқалатын маңдай әжімдерін түзету кезінде Вистабель препаратын қантамырға енгізбеу үшін сақ болу қажет.

Емшаралар арасындағы аралықтар кем дегенде үш айды құрауы керек.

Артық дозалану жағдайында қабылдануы қажет шаралар

Вистабель препаратының артық дозалануы салыстырмалы ұғым болып табылады және дозаға, енгізу орнына және тиісті тіндердің қасиеттеріне байланысты. А типті ботулиндік токсинді кездейсоқ енгізумен байланысты жүйелі уытты әсер ету жағдайлары байқалған жоқ. Артық дозаларды қолдану жергілікті немесе қашықтан, жайылған және терең нейробұлшықеттік салданудың дамуына әкелуі мүмкін. А типті ботулиндік токсинді ішке қабылдау жағдайлары белгісіз.

Артық дозалану белгілері инъекциядан кейін бірден пайда болмайды. Препаратты кездейсоқ енгізгеннен немесе жұтып қойғаннан кейін пациент жалпы әлсіздік пен бұлшықет салдануының белгілері мен симптомдарын анықтау үшін бірнеше күн бойы медициналық бақылауда болуы керек. А типті ботулиндік токсинмен улану симптомдары бар пациенттерге (жайылған әлсіздік, птоз, диплопия, жұтыну және сөйлеу бұзылыстары немесе тыныс алу бұлшықеттерінің парезі) ауруханаға жатқызу мүмкіндігі берілуі керек.

Дәрілік препаратты қолдану тәсілін түсіндіру үшін медициналық қызметкер кеңесіне жүгіну жөніндегі нұсқаулар

Сізде осы дәрілік препаратты қолдану бойынша қандай да бір қосымша сұрақтар туындаған жағдайда, өз дәрігеріңізге немесе фармацевтке жүгініңіз.

ДП стандартты қолдану кезінде пайда болатын жағымсыз реакциялардың сипаттамасы және бұл жағдайда қабылдануы тиіс шаралар

Қасаралық әжімдерді түзету

Төменде салыстырмалы жасырын плацебо-бақыланатын клиникалық зерттеулер барысында тек қасаралық әжімдерді түзету үшін 20 ӘБ дозада Вистабель препаратын енгізгеннен кейін байқалған жағымсыз реакциялар көрсетілген:

 

«Қазтабан» типті әжімдерді қасаралық әжімдерді түзетумен бірге немесе онсыз түзету

Төменде салыстырмалы жасырын плацебо-бақыланатын клиникалық зерттеулер барысында «қазтабан» типті әжімдерді түзетумен бірге немесе онсыз да Вистабель препаратын енгізгеннен кейін байқалған жағымсыз реакциялар көрсетілген:

* емшарамен байланысты жағымсыз реакциялар

«Қазтабан» типті немесе онсыз әжімдерді түзетумен ұштастыра отырып, маңдай әжімдері мен қасаралық әжімдерді түзету

Төменде салыстырмалы жасырын плацебо-бақыланатын клиникалық зерттеулер барысында «қазтабан» типті немесе онсыз әжімдерді түзетумен ұштастыра отырып, маңдай және қасаралық әжімдерді бір мезгілде түзету үшін Вистабель препаратын енгізгеннен кейін байқалған жағымсыз реакциялар көрсетілген:

1 Түзетуден кейін блефароптоздың дамуына дейінгі уақыттың медианасы 9 күнді құрады.

2 Түзетуден кейін қас птозының дамуына дейінгі уақыттың медианасы 5 күнді құрады.

* емшарамен байланысты жағымсыз реакциялар

Бірнеше рет қолданған кезде препарат қауіпсіздігінің жалпы бейінінде өзгерістер болған жоқ.

 

Тіркеуден кейінгі бақылау деректері (жиілігі белгісіз)

Қасаралық әжімдерді, «қазтабан» типті әжімдерді түзету үшін және басқа клиникалық көрсетілімдер бойынша қолданылатын препаратты сатудың барлық кезеңінде келесі жағымсыз реакциялар немесе клиникалық маңызды жағымсыз құбылыстар тіркелді:

 

Ботулотоксиннің енгізу орнынан алыс аймақтарға таралуымен ықтимал байланысты жағымсыз реакциялар өте сирек байқалады (мысалы, өліммен аяқталуы мүмкін бұлшықет әлсіздігі, дисфагия, іш қату немесе аспирациялық пневмония).

Жағымсыз дәрілік реакциялар туындағанда медициналық қызметкерге, фармацевтикалық қызметкерге немесе дәрілік препараттардың тиімсіздігі туралы хабарламаларды қоса, дәрілік препараттарға болатын жағымсыз реакциялар (әсерлер) бойынша ақпараттық деректер базасына тікелей хабарласу керек

Қазақстан Республикасы Денсаулық сақтау министрлігі Медициналық және фармацевтикалық бақылау комитеті «Дәрілік заттар мен медициналық бұйымдарды сараптау ұлттық орталығы» ШЖҚ РМК

http://www.ndda.kz

Қосымша мәліметтер

Дәрілік препараттың құрамы

Бір құтының ішінде

белсенді зат – ботулиндік токсин А типі – гемагглютинин кешені, 100 ӘБ,

қосымша заттар: натрий хлориді, сарысулық адам альбумині.

Сыртқы түрінің, иісінің, дәмінің сипаттамасы

Ақ дегидрацияланған ұнтақ.

Шығарылу түрі және қаптамасы

100 ӘБ препараттан хлор-бутил тығынмен тығындалған және «flip-off» типті полипропилен қақпағы бар алюминий қалпақшамен қаусырылған сыйымдылығы 10 мл I типті мөлдір боросиликатты шыныдан жасалған құтыларда.

1 құтыдан картон қосымша парақта медицинада қолданылуы жөніндегі қазақ және орыс тілдеріндегі нұсқаулықпен бірге картон қорапшаға салынады.

Сақтау мерзімі

3 жыл

Ерітіндіні қалпына келтірілгеннен кейін бірден пайдалану ұсынылады. Ерітінді 24 сағат ішінде 2-ден 8 °C-ге дейінгі температурада тұрақты.

Жарамдылық мерзімі өткеннен кейін қолдануға болмайды!

Сақтау шарттары

2-ден 8ºС - ге дейінгі температурада тоңазытқышта немесе -5-тен -20 ºС-ге дейінгі температурада мұздатқышта сақтау керек.

Балалардың қолы жетпейтін жерде сақтау керек!

Дәріханалардан босатылу шарттары

Рецепт арқылы

Өндіруші туралы мәлімет

Аллерган Фармасьютикалз Айэрлэнд,

Каслбар Роуд, Вестпорт, Мейо графствосы,

Ирландия

Тел: + +353 (0)9825222

Тіркеу куәлігінің ұстаушысы

ЭббВи Лимитед,

Ситивест Бизнес Кампус, Ко Дублин 24, Ирландия

Тел: +353 (0)1 639 5722,

Электронды пошта: info@lobbying.ie

Қазақстан Республикасының аумағында тұтынушылардан дәрілік заттардың сапасы жөніндегі шағымдарды (ұсыныстарды) қабылдайтын ұйымның атауы, мекенжайы және байланыс деректері (телефон, факс, электронды пошта)

«PromoMed» ЖШС, Қазақстан Республикасы,

Алматы қ., КӨКТЕМ-1 ықшам ауданы, 50, т. е. 98

Ұялы телефон: +7 771 191 0906, е-mail: registration@promomed.kz

Қазақстан Республикасының аумағында дәрілік заттың тіркеуден кейінгі қауіпсіздігін қадағалауға жауапты ұйымның атауы, мекенжайы және байланыс деректері (телефон, факс, электронды пошта)

Жанар Сүгіралиева,

Алматы қ., Тимирязев к-сі, 28в, «Алатау Гранд»БО

Байланыс телефоны: +7 (727) 222-1481

Ұялы телефон: +7 701 098 7050

e-mail: zhanar.suguraliyeva@abbvie.com

kz_ppd_pv@abbvie.co