Атгам™
Инструкция
-
русский
-
қазақша
Саудалық атауы
Атгам™
Халықаралық патенттелмеген атауы
Жоқ
Дәрілік түрі
Инъекцияға арналған ерітінді, 50 мг/мл, 5 мл
Құрамы
Бір миллилитр препараттың құрамында:
белсенді зат – лимфоцитарлық иммуноглобулин, антитимоцитарлық глобулин (жылқы) 50,0 мг;
қосымша заттар: глицин, натрий гидроксидінің 10 % ерітіндісі, хлорсутек қышқылының 10 % ерітіндісі, инъекцияға арналған су
Сипаттамасы
Түссіз немесе сәл-қызғылттан қоңыр түске дейінгі және мүлдем иісі жоқ, мөлдір, сәл бұлыңғыр ерітінді. Сақтаған кезде аздаған түйіршікті немесе тұзды шөгінді түзілуі мүмкін, бұл белсенділікке әсер етпейді.
Фармакотерапиялық тобы
Антинеопластикалық және иммуномодуляциялайтын препараттар.
Иммуносупрессанттар. Селективтік иммуносупрессанттар.
Антилимфоцитарлық иммуноглобулин (жылқы)
ATХ коды L04AA03
Фармакологиялық қасиеттері
Фармакокинетикасы
Таралуы
Тәулігіне 10–15 мг/кг дозаны инфузиялау барысында қан плазмасындағы жылқы иммуноглобулинінің шектік деңгейі 5 күн емдегеннен кейін байқалады. Қан плазмасында препараттың орташа ең жоғары концентрациясы 727 мкг/мл ± 310 мкг/мл құрайды.
Метаболизмі және элиминациясы
Жылқы иммуноглобулинінің жартылай шығарылу кезеңі антитимоцитарлық иммуноглобулинді (жылқының) инфузиялағаннан кейін 5,7 күнді ± 3,0 күнді құрайды. Препараттың жартылай шығарылу диапазоны 1,5–12 күнді құрайды.
Фармакодинамикасы
Антитимоцитарлық глобулин (жылқының) құрамында лимфоциттер беткейінде ақуыздардың кең ауқымын байланыстыратын антиденелер бар. Бұдан бөлек, антитимоцитарлық глобулин (жылқының) дәрілік препаратының құрамына кіретін антиденелер гранулоциттермен, тромбоциттермен және сүйек кемігі жасушаларымен байланысады. Антитимоцитарлық глобулин (жылқының) туғызатын иммуносупрессия механизмі анықталмаған. Жарияланған деректер препараттың әсер ету механизмінің негізінде айналымдағы лимфоциттер элиминациясы жатқанын білдіреді, бұл ретте көп дәрежеде Т-лимфоциттер саны азаяды. Лимфоциттер элиминациясы комплемент-тәуелді лизиспен және/немесе активациялық-индукцияланған апоптозбен байланысты болуы мүмкін. Бұдан бөлек, иммуносупрессия антиденелердің лимфоциттермен байланысуына қатысты болуы мүмкін, бұл Т-лимфоциттердің ішінара активациялануына және энергиясының индукциялануына әкелуі мүмкін.
Антитимоцитарлық глобулиннің (жылқының) емдік әсері апластикалық анемия кезінде оның иммуносупрессиялық әсерімен байланысты. Бұдан бөлек, антитимоцитарлық глобулин (жылқының) гемопоэтикалық діңді жасушалардың өсуін тікелей көтермелейді және интерлейкин-3 пен гранулоциттік-макрофагтық колониестимуляциялайтын фактор сияқты гемопоэтикалық өсу факторының босап шығуын көтермелейді.
Қолданылуы
- Орташа және ауыр дәрежедегі апластикалық анемия
- Бүйрек аллотрансплантаттарының реципиенттері. Трансплантаттың қабылданбай ажырауы кезінде стандартты еммен енгізу трансплантаттың жедел қабылданбай ажырауы көрінісі кезінде сәтті аяқталу жиілігін арттырады. Антитимоцитарлық глобулинді (жылқының), сондай-ақ, трансплантаттың қабылданбай ажырауының алғашқы көрінісінің туындауын кідірту мақсатында басқа иммуносупрессиялық еммен бірге енгізеді.
Қолдану тәсілі және дозалары
Препарат вена ішіне инфузиялау түрінде енгізіледі.
Ересек пациенттер
Апластикалық анемия
Ұсынылатын доза 8-14 күн бойы 10–20 мг/кг құрайды.
Бұдан әрі препаратты пациент барлығы 21 дозаны қабылдағанға дейін 14 күн бойы күнара қосымша тағайындауға болады.
Бүйрек аллотрансплантаттарының реципиенттері
Ұсынылатын доза 14 күн бойы күнделікті 10–15 мг/кг құрайды, бұдан әрі пациент 28 күн ішінде барлығы 21 дозаны қабылдағанға дейін күнара енгізіледі.
Трансплантаттың қабылданбай ажырауының алғашқы көрінісінің туындауын кідірту мақсатында тағайындаған кезде емді ағзаны салғанға дейін немесе салғаннан кейін 24 сағат ішінде бастау керек. Қабылданбай ажырауын емдеу үшін емді қабылданбай ажырауының алғашқы көрінісі білінген сәтте бірден бастау керек.
Егде жастағы пациенттер (≥ 65 жас)
Жалпы, егде жастағы пациенттер препараттың дозасын сақтықпен таңдаулары тиіс және емдеуді әдетте ең төменгі дозадан бастаған жөн.
Енгізу жөніндегі нұсқаулық
Ерітіндіні дайындау
Препараттың парентеральді түрлерін механикалық қосылыстардың бар-жоғына және ерітінді мен құты болған жағдайда үнемі енгізер алдында түсінің өзгеруін көзбен шолып тексеріп алу қажет. Антитимоцитарлық глобулиннің (жылқының) стерильді ерітіндісі түссіз немесе сәл-қызғылттан қоңыр түске дейінгі және мүлдем иіссіз, мөлдір, сәл бұлыңғыр ерітінді болып табылады. Сақтаған кезде аздаған түйіршікті немесе тұзды шөгінді түзілуі мүмкін, бұл белсенділігіне әсер етпейді.
Антитимоцитарлық глобулин (жылқының) ампуласын (сұйылтқанға дейін немесе кейін) сілку ұсынылмайды, себебі көп мөлшерде көбік түзілуі және/немесе ақуыздың денатурациялануы түзілуі мүмкін. Антитимоцитарлық глобулиннің (жылқының) стерильді ерітіндісін сұйылтылған препарат ішіндегі ауамен жанаспайтындай етіп, стерильді сұйықтықпен төңкерілген құтыда инфузия алдында сұйылту керек. Антитимоцитарлық глобулиннің (жылқының) жалпы тәуліктік дозасын антитимоцитарлық глобулиннің (жылқының) 1 мл стерильді ерітіндісіндегі препараттың концентрациясы 4 мг-ден аспайтындай етіп стерильді еріткішке қосады. Сұйылтылған ерітіндіні абайлап шайқайды немесе мұқият араластыру үшін айналдырады.
Енгізу
Инфузия жүргізер алдында сұйылтылған антитимоцитарлық глобулинді (жылқының) бөлме температурасына дейін қыздыру керек. Антитимоцитарлық глобулинді (жылқының) тамыр анастомозына, артерия-веналық шунтқа немесе орталық венаға жоғары жылдамдықтағы қан ағымымен тесігінің диаметрі 0,2–1,0 микрон ендірілген сүзгі арқылы тиісінше енгізеді. Ендірілген сүзгіні сақтаған кезде препаратта түзілуі мүмкін қандай да бір ерімейтін бөлшектердің енгізілуін болдырмау үшін антитимоцитарлық глобулиннің (жылқының) барлық инфузияларын жүргізген кезде пайдалану керек. Жоғары жылдамдықтағы қан ағымымен венаға енгізу жергілікті флебиттің және тромбоздың туындау жиілігін азайтады. Антитимоцитарлық глобулин (жылқының) дозасы инфузиясының ұзақтығы 4 сағаттан кем болмауы тиіс. Пациентті ықтималды аллергиялық реакциялардың туындауына қатысты инфузия жүргізген уақыт бойына үздіксіз бақылап отыру керек.
Антитимоцитарлық глобулин (жылқының) мына еріткіштерде: инъекцияға арналған натрий хлоридінің 0,9 % ерітіндісінде, инъекцияға арналған натрий хлоридінің 0,225 % ерітіндісіндегі 5 % декстроза ерітіндісінде және инъекцияға арналған натрий хлоридінің 0,45 % ерітіндісінде 5 % декстроза ерітіндісінде сұйылтқаннан кейін 4 мг/мл дейінгі концентрацияда физикалық және химиялық тұрғыдан 24 сағат бойы тұрақты екені анықталды.
Егер антитимоцитарлық глобулин (жылқының) ерітіндісі инфузияға дейін алдын ала дайындалған болса, оны тоңазытқышта сақтау ұсынылады. Тоңазытқышта сақтаған кезде де препаратты сұйылтқан сәттен бастап жалпы сақтау уақыты 24 сағаттан аспауы тиіс (инфузия уақытын қоса).
Пайдаланылмаған препаратты немесе материалдардың қалдықтарын жергілікті талаптарға сәйкес утилизациялау керек.
Жағымсыз әсерлері
Атгам™ препаратын қолданған кезде жағымсыз әсерлер тіркелген, олар мына түрде көрініс беру жиілігі бойынша жіктелген: жиі ( ≥ 1/100-ден < 1/10 дейін); жиі емес ( ≥ 1/1000-нан < 1/100 дейін); сирек ( ≥ 1/10 000-нан < 1/1000 дейін); өте сирек (< 1/10 000) және белгісіз (қолда бар деректер негізінде анықтау мүмкін емес).
Өте жиі
- тромбоцитопения, лейкопения
- бөртпе
- артралгия
- пирексия, қалтырау
Жиі
- инфекция
- лимфаденопатия
- бас ауыруы, бас айналу
- брадикардия, тахикардия
- тромбофлебит, артериялық гипертензия, артериялық гипотензия
- диспноэ
- жүрек айнуы2, құсу2, диарея, іштің жоғарғы тұсының ауыруы
- есекжем2, қышыну
- арқаның ауыруы2
- кеуде қуысының ауыруы2, инфузия орнының ауыруы, ісіну
- артерия-веналық фистула тромбозы
Жиі емес
- қарапайым герпес
- сарысу құю ауруы, анафилаксиялық реакция
- гипергликемия
- үрейлі қозу
- құрысулар, энцефалит, парестезия
- бүйрек артериясының тромбозы, мықын венасының окклюзиясы
- плевралық жалқық, ларингоспазм, өкпенің ісінуі
- стоматит, ықылық2
- түнгі тершеңдік, аллергиялық дерматит, периорбитальді ісіну, уытты эпидермальді некролиз
- протеинурия
- астения, дімкәстік
- бүйрек функциясының биохимиялық көрсеткіштерінің қалыптан ауытқуы, бауыр функциясының биохимиялық көрсеткіштерінің қалыптан ауытқуы
- жараның ажырауы
Белгісіз
- вирустық гепатит1, жайылған инфекция1, жергілікті инфекция1
- анемия1, аплазия1, гранулоцитопения1, гемолиз1, гемолиздік анемия1, нейтропения1, панцитопения1, эозинофилия1
- васкулит1
- сананың шатасуы1, бағдардан жаңылу1, дискинезия1, тремор1, естен тану1
- іркілісті жүрек жеткіліксіздігі1
- терең веналар тромбозы1, асқазан-ішектен қан кету1
- апноэ1, жөтел1, мұрыннан қан кету1
- іштің ауыруы1, асқазан-ішектің тесілуі1, ауыздың ауыруы1, ауызжұтқыншақтың ауыруы1
- бүйірдің ауыруы1, бұлшықеттің қатаюы1, миалгия1, аяқ-қолдың ауыруы1
- бүйректің ұлғаюы1, жедел бүйрек жеткіліксіздігі1, бүйректің жарылуы1
- инфузия орнындағы эритема1, инфузия орнының ісінуі1, гипергидроз1, ауыру1
1 Жиілігі белгісіз (қолда бар деректер негізінде анықтау мүмкін емес)
2 «Жағымсыз әсерлері» тиісті терминімен бір реакция ретінде ескерілген жағымсыз әсерлер үшін (мысалы, жүрек айнуы/құсу), жағдайлардың жалпы санын есептеген кезде әрбір жеке терминге сәйкес келетін саны ескерілді.
Болжамды жағымсыз реакциялар туралы мәліметтерді хабарлау
Дәрілік препаратты тіркегеннен кейін анықталған болжамды жағымсыз реакциялар туралы мәліметтерді хабарлаудың маңызы зор. Бұл дәрілік препараттың пайдасы мен қаупінің арақатынасына мониторинг жүргізуді жалғастыруға мүмкіндік береді.
Медицина қызметкерлері мен пациенттерден медициналық қолдану жөніндегі осы нұсқаулықтың соңында көрсетілген мекенжай бойынша кез келген жағымсыз реакциялар туралы хабарлауды сұрайды.
Қолдануға болмайтын жағдайлар
- антитимоцитарлық глобулинді (жылқының) немесе жылқының гамма-глобулинінің кез келген басқа препаратын бұрын енгізген кезде ауыр жүйелі реакция (мысалы, анафилаксиялық реакция)
- жүйелі реакциялар (жайылған бөртпе, тахикардия, ентігу, артериялық гипотензия, анафилаксия)
- жүктілік
Дәрілермен өзара әрекеттесуі
Кортикостероидтардың немесе басқа да иммуносупрессанттардың дозасын төмендеткен кезде антитимоцитарлық глобулинге (жылқының) бұрын жасырын болған реакциялары көрініс беру қаупі бар. Осы жағдайларды ескере отырып, антитимоцитарлық глобулинмен (жылқының) емдеген кезде пациенттерді өте мұқият бақылап отыру керек.
Айрықша нұсқаулар
Атгам™ препаратымен емді иммуносупрессиялық ем жүргізуден тәжірибесі бар дәрігер тағайындауы тиіс. Антитимоцитарлық глобулин (жылқының) қабылдаған пациенттер тиісті зертханалық және медициналық жабдықпен қамтылған бөлімшелерде емделуі және оларды жиынтықталған білікті персоналдар емдеуі тиіс. Анафилаксия немесе ауыр және тұрақты тромбоцитопения немесе лейкопения дамыған жағдайда емдеуді тоқтату керек.
Иммундық-байланысқан реакциялар
Сирек жағдайларда антитимоцитарлық глобулинді (жылқының) пайдаланған кезде күрделі иммундық-байланысқан реакциялар тіркелген. Анафилаксияға, инфузияға қатысты басқа да реакцияларға байланысты клиникалық белгілер, сондай-ақ сарысу ауруы тіркелген. Антитимоцитарлық глобулиннің (жылқының) әсер ету механизмін ескере отырып, цитокиндердің босап шығуы синдромының потенциалды даму қаупі бар.
Жайылған бөртпе, тахикардия, ентігу, артериялық гипотензия немесе анафилаксия сияқты жүйелі реакциялар антитимоцитарлық глобулинді (жылқының) әрі қарай қолдануды жоққа шығарады.
Инфекция
Пациенттерде қатар жүретін инфекция белгілерінің пайда болуын қадағалап отыру керек. Кейбір зерттеулерде Атгам™ препаратын қабылдаған пациенттерде цитомегаловирустық инфекцияның туындау жиілігінің артуы туралы болжам айтылған. Кейбір дәрігерлердің деректері бойынша бұл қауіпті Атгам™ препаратымен бір мезгілде тағайындалуы мүмкін басқа да иммуносупрессиялық препараттардың дозасын төмендету арқылы азайтуға болады.
Антитимоцитарлық глобулинді (жылқының), сондай-ақ адамның қанынан алынған басқа да препараттарды немесе оның тазартылған компоненттерін тағайындаған кезде кейбір инфекциялық аурулар қоздырғыштарының берілу қаупі бар.
Тері тестілері
Жүйелік анафилаксияның жоғары даму қаупі бар пациенттерді анықтау үшін емді бастар алдында потенциалды реципиенттерге тері тестілерін жасау қатаң түрде ұсынылады. Консервативтік дәстүрлі тәсіл кезінде бірінші сұйылтылмаған антитимоцитарлық глобулинмен (жылқының) теріге тест жасалады (тесі арқылы сынама). Егер пациентте теріні тескеннен кейін он минут ішінде күлдіреуік белгілері байқалмаса, тері ішіне 1:1000 % концентрацияда (көлем/көлем) натрий хлоридінің физиологиялық ерітіндісінде сұйылтылған 0,02 мл антитимоцитарлық глобулинді (жылқының) енгізеді, осыған ұқсас көлемде физиологиялық ерітіндіні басқа жерге бақылап отырып жеке енгізеді. Нәтижесін 10 минуттан соң бағалайды. Антитимоцитарлық глобулинді (жылқының) енгізген жерде натрий хлоридінің физиологиялық ерітіндісі бақылау инъекциясының (немесе тесу арқылы тері үстіне тест жүргізу оң нәтижесі) орнындағы күлдіреуік диаметрінен 3 мм-ге және одан үлкен күлдіреуіктің пайда болуы препаратқа жоғары сезімталдық болуын және оны вена ішіне енгізген кезде жүйелік аллергиялық реакцияның даму ықтималдығы артқанын білдіреді.
Бұл тесттің болжамды құндылығы клиникалық тұрғыдан анықталмаған. Анафилаксия сияқты аллергиялық реакциялар тері тестілерінің теріс нәтижесі бар пациенттерде кездескен. Бұдан бөлек жоғарыда көрсетілгендей жүргізілген тері тестісі препаратты енгізгеннен кейін жекелеген кезеңде сарысу құю ауруының даму ықтималдығын анықтауға мүмкіндік бермейді. Антитимоцитарлық глобулинге (жылқының) жергілікті тері сынамасы оң болған жағдайда баламалы емдеу түрлерінің мүмкіндігін қарастыру қажет. Егер жергілікті аллергиялық тері сынамасы оң нәтиже берген жағдайда антитимоцитарлық глобулинмен (жылқының) ем жүргізуге шешім қабылданса, препарат өмірге қауіп төндіретін аллергиялық реакцияларды емдеу тәжірибесі бар дәрігердің қатысуымен жедел қарқынды ем жүргізу және реанимациялық шаралар қолдану мүмкіндігін қамтамасыз ететін жағдайларда енгізілуі тиіс.
Бүйрек немесе бауыр функциялары бұзылған пациенттер
Апластикалық анемиясы және басқа да гематологиялық аурулары бар антитимоцитарлық глобулин (жылқының) қабылдаған пациенттерде бауыр және бүйрек функцияларының биохимиялық көрсеткіштерінің ауытқуы байқалған.
Тірі вирустық вакцина
Иммуноглобулиннен кейін вакцинаны енгізген кезде тірі вирустық вакциналардың белсенділігі жеткіліксіз вирустық репликациясы және гуморальді иммундық жауаптың әлсіреуі байқалуы мүмкін. Тірі вирустық вакциналарды бұлшықетішілік иммуноглобулиндермен емді аяқтағаннан кейін мүмкіндігінше алты айдан кейін және вена ішіне енгізуге арналған иммуноглобулиндермен емді аяқтағаннан кейін алты айдан кейін қабылдау керек.
Пациент балалар популяциясы
Балаларда қолдану тәжірибесі шектеулі.
Егде жастағы пациенттер популяциясы
Егде жастағы пациенттердің (≥ 65 жас) шектеулі санында клиникалық қолдану тәжірибесінде егде жастағы және жас пациенттер арасында емге жауапта ерекшеліктер анықталмады. Жалпы, егде жастағы пациенттерге препарат дозасын сақтықпен таңдау керек және бауыр, бүйрек немесе жүрек функцияларының бұзылуы, сондай-ақ қатар жүретін аурулардың жиілігі жоғары болуына немесе осы жас тобына басқа дәрілік препараттарды қолдануға байланысты емдеуді де әдетте ең төменгі дозадан бастау керек.
Жүктілік
Жүкті әйелдерде антитимоцитарлық глобулинді (жылқының) қолдану туралы деректер шектеулі немесе жоқ.
Атгам™ препаратын шарана үшін қаупі анасы үшін күтілетін пайдадан төмен болған жағдайдан бөлек жүктілік кезінде қолдануға болмайды.
Лактация кезеңі
Препараттың емшек сүтіне өтетін-өтпейтіні белгісіз. Көптеген дәрілік препараттар емшек сүтіне бөлініп шығатындықтан, сондай-ақ емшек еметін жаңа туған нәрестелер мен сәбилерде күрделі жағымсыз реакциялар дамуының потенциалды қаупіне байланысты бала үшін емшек емізу маңыздылығын және анасы үшін емдеу маңыздылығын назарға ала отырып, не емшекпен қоректендіруді тоқтату немесе Атгам™ препаратымен емдеуден бас тарту/тоқтату туралы шешім қабылдау керек.
Дәрілік заттың көлік құралын немесе потенциалды қауіпті механизмдерді басқару қабілетіне әсер ету ерекшеліктері
Препараттың көлік құралын басқару немесе механизмдермен жұмыс істеу қабілетіне әсер етуі бойынша зерттеулер жүргізілген жоқ. Осы дәрілік затты қабылдаған кезде жағымсыз реакциялардың (мысалы, бас айналу, құрысулар, сананың шатасуы, естен тану) даму мүмкіндігін ескере отырып, автокөлік құралдарын басқарған кезде және механизмдермен жұмыс істегенде сақ болу керек.
Артық дозалануы
Антитимоцитарлық глобулиннің (жылқының) ең жоғары көтерімді дозасы препараттың биологиялық шығу тегіне байланысты түрлі пациенттерде ерекшеленетін болады. Бүйрек трансплантациясынан кейін пациент қабылдаған препараттың ең жоғары белгілі бір реттік тәуліктік дозасы 7 000 мг құрады және натрий хлоридінің физиологиялық ерітіндісінің шамамен 10 мг/мл концентрациясында енгізілді, бұл ретте ол ұсынылатын жалпы дозадан және инфузияға арналған ерітінді концентрациясынан жеті есе артты. Аталған пациентте антитимоцитарлық глобулин (жылқының) қолдану жедел уыттанудың қандай да бір белгілерінің пайда болуына немесе кеш асқынулардың дамуына әкелген жоқ.
Антитимоцитарлық глобулиннің (жылқының) ең жоғары емдік дозасы анықталмаған, сондықтан препарат үшін артық дозалануды дәл анықтау мүмкін емес. Кейбір пациенттер бүйрек трансплантациясынан кейін 4 ай бойы препаратты 50 дозаға дейін қабылдаған, ал кейбіреуі 21 дозадан 28-күндік курстар қабылдады, оның артынан жедел қабылданбай ажырауын емдеу үшін қажет етілген тағы 3 курс қабылдады. Пайдаланылған сызбалардың ешбірінде уытты көріністердің туындау жиілігі артқан жоқ, алайда пациенттердің жай-күйіне мұқият мониторинг жүргізу ұсынылады.
Шығарылу түрі және қаптамасы
Бөлетін сызығы бар ЕФ* немесе АҚШФ бойынша I типті мөлдір түссіз шыныдан жасалған ампулаға 5 мл препараттан құйылған.
Пенополистиролдан жасалған контейнерге 5 ампуладан салынған.
1 контейнерден медициналық қолдану жөніндегі мемлекеттік және орыс тілдеріндегі нұсқаулықпен бірге картон қорапшаға салынады.
Сақтау шарттары
2 °C-ден 8 °C-ге дейінгі температурада сақтау керек.
1 мг/мл, 2 мг/мл немесе 4 мг/мл 0,9 % физиологиялық ерітіндіде концентрацияға дейін, 0,225 % физиологиялық ерітіндіде 5 % декстроза ерітіндісімен немесе 0,45 % физиологиялық ерітіндіде 5 % декстроза ерітіндісімен сұйылтылған препарат 24 сағат бойы бөлме температурасында химиялық және физикалық тұрғыдан төзімді.
Балалардың қолы жетпейтін жерде сақтау керек!
Сақтау мерзімі
3 жыл
Жарамдылық мерзімі өткеннен кейін қолдануға болмайды.
Босатылу шарттары
Рецепт арқылы
Өндіруші және қаптаушы
Фармация және Апджон Кампани ЭлЭлСи, АҚШ
7000 Портейдж Роуд,
Каламазу, Мичиган 49001, АҚШ
Тіркеу куәлігінің иесі
Пфайзер Эйч Си Пи Корпорэйшн, Нью-Йорк, АҚШ
Қазақстан Республикасы аумағында тұтынушылардан дәрілік заттардың сапасына қатысты шағымдарды (ұсыныстарды) қабылдайтын және дәрілік заттың тіркеуден кейінгі қауіпсіздігін қадағалауға жауапты ұйымның атауы, мекенжайы және байланыс деректері (телефон, факс, электронды пошта):
Қазақстан Республикасындағы Филиалы арқылы әрекет ететін Pfizer Export B.V. (Пфайзер Экспорт Би.Ви.) компаниясы
Қазақстан Республикасы, Алматы қаласы, 050000, Медеу ауданы, Фурманов к-сі, 100/4 үй.
тел.: +7 (727) 250 09 16
факс: +7 (727) 272 04 06
электронды пошта: PfizerKazakhstan@pfizer.com