Элетриптана гидробромид (Элетриптан)
Инструкция
-
русский
-
қазақша
«Қазақстан Республикасы
Денсаулық сақтау министрлігі
Тауарлар мен көрсетілетін
қызметтердің сапасы мен
қауіпсіздігін бақылау
комитеті» РММ төрағасының
20_ ж. «____» ___________
№ _____ бұйрығымен
БЕКІТІЛГЕН
Дәрілік затты медициналық қолдану
жөніндегі нұсқаулық (Қосымша парақ)
Саудалық атауы
Элетриптан гидробромиді
Халықаралық патенттелмеген атауы
Элетриптан
Үлбірлі қабықпен қапталған таблеткалар, 40 мг
Жүйке жүйесі. Анальгетиктер. Бас сақинасына қарсы препараттар. Серотониндік рецепторлардың селективті (5НТ1) агонистері. Элетриптан.
ATХ коды N02CC06
Қолданылуы
- ересектердегі аурамен немесе аурасыз жүретін бас сақинасы ұстамалары кезінде бас ауыруының жедел фазасын емдеу
Қолдануды бастағанға дейін қажетті мәліметтер тізбесі
Қолдануға болмайтын жағдайлар
- элетриптан гидробромидіне немесе қосымша заттарының кез келгеніне аса жоғары сезімталдық
- бауыр функциясының ауыр бұзылуы
- бүйрек функциясының ауыр бұзылуы
- орташа немесе ауыр артериялық гипертензия, немесе арнайы ем тағайындалмаған жеңіл артериялық гипертензия
- жүректің расталған коронарлық ауруы, соның ішінде жүректің ишемиялық ауруы (стенокардия, анамнездегі миокард инфарктісі немесе расталған симптомсыз ишемия); коронарлық түйілуі бар (Принцметал стенокардиясы бар), жүректің ишемиялық ауруының объективті немесе субъективті симптомдары бар пациенттер
- елеулі аритмиялар немесе жүрек жеткіліксіздігі
- шеткері қантамырлардың ауруы
- анамнездегі ми қанайналымының жедел бұзылуы (МҚЖБ) немесе транзиторлық ишемиялық шабуыл (ТИШ)
- элетриптанмен емдеуге дейін немесе емдеуден кейін 24 сағат ішінде эрготаминді немесе оның туындыларын (метисегридті қоса) қолдану
- элетриптанды 5-НТ1 рецепторлардың басқа агонистерімен бір мезгілде қабылдау
- балалар мен 18 жасқа дейінгі жасөспірімдер (құрамында бояғыш болуына байланысты)
Қолдану кезіндегі қажетті сақтық шаралары
Элетриптан гидробромиді препаратын кетоконазол, итраконазол, эритромицин, кларитромицин, джозамицин және протеаза тежегіштері сияқты (ритонавир, индинавир және нелфинавир) CYP3A4 ферментінің күшті тежегіштерімен бір мезгілде қабылдауға болмайды
Басқа дәрілік препараттармен өзара әрекеттесуі
Басқа дәрілік препараттардың элетриптанға әсері
Элетриптанның клиникалық зерттеулерінде оның бета-блокаторлармен, трициклдық антидепрессанттармен, серотонинді кері қармаудың селективті тежегіштерімен және флунаризинмен өзара әрекеттесуі туралы деректер алынған жоқ, алайда элетриптанның аталған дәрілік препараттармен өзара әрекеттесуі мақсатты түрде зерттелген жоқ (пропранололдан басқалары).
Бета-адреноблокаторлар, трициклдық антидепрессанттар, серотонинді кері қармаудың селективті тежегіштері, гормональді орын басушы емге арналған құрамында эстроген бар препараттар, құрамында эстроген бар оральді контрацептивтер және кальций өзекшелерінің блокаторлары сияқты дәрілік препараттар элетриптанның фармакокинетикалық қасиеттеріне әсер етпеуі ықтимал екендігін көрсетті.
Элетриптан моноаминоксидазаның (МАО) субстраты болып табылмайды, сондықтан, элетриптан мен МАО тежегіштері арасында өзара әрекеттесу күтілмейді. Бұл препараттар арасындағы өзара әрекеттесуді мақсатты түрде зерттеу жүргізілген жоқ.
Пропранололды (160 мг дозада), верапамилді (480 мг дозада) және флуконазолды (100 мг дозада) элетриптанпен бірге қолданғанда, оның Cmax сәйкесінше 1,1, 2,2 және 1,4 есе артты. Элетриптанның AUC көрсеткіші сәйкесінше 1,3, 2,7 және 2,0 есе артты. Бұл әсерлері клиникалық тұрғыдан маңызды болып саналмайды, өйткені элетриптанды аталған препараттармен бірге қолданғанда, артериялық қысым мен жағымсыз құбылыстардың жиілігінде элетриптанмен монотерапия кезіндегі осындайдан айырмашылық болған жоқ.
CYP3A4 ферментінің спецификалық және күшті тежегіштері эритромицинді (1000 мг дозада) және кетоконазолды (400 мг дозада) элетриптанмен бір мезгілде қолданғанда, оның Cmax және AUC 2 және 2,7 есе, және сәйкесінше 3,6 және 5,9 есе артқаны байқалды. Бұл көрсеткіштердің жоғарылауы элетриптанның t1/2 эритромицинмен қабылдағанда 4,6 сағаттан 7,1 сағатқа дейін және кетоконазолмен қабылдағанда 4,8 сағаттан 8,3 сағатқа дейін ұзаруымен қатар жүрді. Осы себепті, элетриптан препаратын кетоконазол, итраконазол, эритромицин, кларитромицин, джозамицин және протеаза тежегіштері (ритонавир, индинавир және нелфинавир) сияқты CYP3A4 ферментінің күшті тежегіштерімен бірге қабылдамау керек.
Элетриптанды қабылдағаннан кейін 1 және 2 сағаттан соң құрамында кофеин және эрготамин бар препаратты ішке қабылдағанда, пациенттерде артериялық қысымның болар-болмас қосымша жоғарылауы байқалды, мұны екі препараттың да фармакологиялық қасиеттеріне қарап күтуге болады. Осыған байланысты, элетриптанды қолданғаннан кейінгі 24 сағат ішінде құрамында эрготамин немесе эрготаминге ұқсас заттар (мысалы, дигидроэрготамин) бар препараттарды қабылдамаған дұрыс. Және керісінше, құрамында эрготамин бар препаратты қабылдау мен элетриптанды қабылдаудың арасында кемінде 24 сағат өтуі тиіс.
Элетриптанның басқа дәрілік препараттарға әсері
Элетриптанның клиникалық дозаларда (және солармен байланысты концентрацияларында) CYP3A4 ферментін метаболиздейтін препаратты қоса, P450 цитохромы тектес ферменттерді тежейтінін немесе индукциялайтынын көрсететін деректер жоқ. Осыған байланысты, элетриптанның аталған ферменттер түрткі болған әсерін қоса, басқа препараттармен клиникалық тұрғыдан маңызды өзара әрекеттесу ықтималдығы аз болып саналады.
Серотонинді кері қармаудың селективті тежегіштері (СКҚСТ)/ серотонин мен норадреналинді кері қармаудың тежегіштері (СНКҚСТ) және серотониндік синдром
Серотонинді кері қармаудың селективті тежегіштері (СКҚСТ) немесе серотонин мен норадреналинді кері қармаудың тежегіштері (СНКҚТ) мен триптандарды бір мезгілде қолданғаннан кейін пациенттерде серотониндік синдромға сәйкес келетін (психикалық жағдайдың өзгерістерін, вегетативтік жүйке жүйесінің бұзылысын және жүйке-бұлшықет бұзылуларын қоса) симптомдарды сипаттайтын хабарламалар келіп түскен.
Арнайы ескертулер
Элетриптан гидробромиді препаратының құрамында лактоза бар. Сондықтан, сирек тұқым қуалайтын галактоза жақпаушылығы, Лапп лактаза тапшылығы немесе глюкоза мен галактоза мальабсорбциясы синдромы бар пациенттер бұл дәрілік препаратты қабылдамағаны жөн.
Элетриптан гидробромиді препаратының құрамында сондай-ақ FD&C Сары №6 Алюминий лагы («күн батар түстес сары») бояғышы бар, ол аллергиялық реакцияларды туғызуы мүмкін және балаларға қолдануға тыйым салынған.
Элетриптан гидробромиді препаратын тек, бас сақинасы диагнозы нақты қойылған жағдайда ғана қолдану керек. Элетриптан гидробромиді препараты гемиплегиялық, офтальмоплегиялық немесе базилярлық бас сақинасын емдеу үшін көрсетілмеген.
Элетриптан гидробромиді препаратын «атипиялық» бас ауыруын, яғни күрделілігі зор жағдай (инсульт, аневризманың үзілуі) түрткі болуы мүмкін бас ауыруын емдеу үшін қолданбау керек, вазоконстрикция ол кезде зиянды болуы мүмкін.
Элетриптанды қолдану кеуде қуысының ауыруы мен қысылу сезімін қоса, уақытша симптомдармен қатар жүруі мүмкін, олар қарқынды болуы және тамаққа жайылуы мүмкін. Егер ондай симптомдар жүректің ишемиялық ауруын білдіреді деп есептелсе, препараттың ары қарайғы дозаларын қабылдамау керек және тиісінше бағалау жүргізу қажет.
Жүрек жеткіліксіздігі бар пациенттер
Элетриптан препаратын анықталмаған жүрек ауруы болуы мүмкін пациенттерге, немесе жүректің ишемиялық ауруының (ЖИА) даму қаупі бар (мысалы, артериялық гипертензиясы, қант диабеті бар пациенттер, шылымқорлар немесе никотин орын басушы емін қабылдайтын пациенттер, 40 жастан асқан еркектер, менопаузадан кейінгі әйелдер және отбасылық ЖИА анамнезі ауыр пациенттер) пациенттерге алдын-ала бағалап алмай тағайындамау керек. Жүрек функциясының бағалануы жүрек ауруы бар барлық пациенттерді анықтап бермеуі мүмкін; аса сирек жағдайларда 5-HT1 агонистерін қолданғанда, жүрек-қантамыр аурулары жоқ пациенттерде жүрек тарапынан күрделі құбылыстар дамыған. ЖИА анықталған пациенттерге Элетриптан гидробромидін тағайындамау керек. 5-HT1 рецепторлары агонистерін қолдану коронарлық түйілумен байланысты болды. Сирек жағдайларда 5-HT1 рецепторының агонистерін қолданғанда миокард ишемиясы немесе миокард инфарктісі байқалған.
Жағымсыз әсерлер триптандар мен құрамында шайқурай (шілтерлі шайқурай) бар өсімдіктен алынған препараттарды бірге қолданғанда жиілеуі мүмкін.
Элетриптанды 60 мг немесе одан көп дозада қолданғанда артериялық қысымның аздаған және уақытша жоғарылауы байқалды. Алайда, бұл жоғарылау клиникалық асқынуларды туғызған жоқ. Гипертензиялық әсері бүйрек функциясы бұзылған пациенттер мен егде жастағы адамдарда айтарлықтай айқынырақ болды. Бүйрек функциясы бұзылған пациенттерде систолалық артериялық қысымның ең жоғарғы жоғарылауының орташа ауқымы 14 - 17 мм сын. бағ. және диастолалық артериялық қысым - 14-21 мм сын. бағ. құрады. Егде жастағы пациенттерде систолалық артериялық қысымның ең жоғарғы орташа жоғарылауы ересек, жастау пациенттердегі 13 мм сын. бағ. салыстырғанда, 23 мм сын. бағ. құрады. Бұдан өзге, тіркеуден кейін элетриптанның 20 және 40 мг дозаларын қабылдайтын пациенттерде, сондай-ақ, бүйрек функциясы қалыпты пациенттерде және жастау пациенттерде артериялық қысымның жоғарылағаны туралы хабарламалар алынды.
Дәрілік препараттарды шамадан тыс қабылдаған кездегі бас ауыруы (ДПШТҚБА)
Бас ауыруы кезінде кез келген ауыруды басатын дәрілерді ұзақ уақыт бойы пайдалану ауыруды күшейтіп жіберуі мүмкін. Егер аталған жағдай байқалса немесе болжам жасалса, дәрігермен кеңесу және емдеуді тоқтату қажет. Бас ауыруын басуға арналған препараттарды жүйелі түрде пайдаланатындығына қарамастан (немесе пайдалануына байланысты) жиі немесе күн сайын басы ауыратын пациенттерде ДПШТҚБА диагнозынан күдіктенуге болады.
Серотониндік синдром
Триптандар мен серотонинді кері қармаудың селективті тежегіштерін (СКҚСТ) немесе серотонин мен норадреналинді кері қармаудың тежегіштерін (СНКҚСТ) бір мезгілде қабылдағаннан кейін, серотониндік синдром жағдайлары (психикалық жағдайдың өзгерістерін, вегетативтік жүйке жүйесінің бұзылысы мен жүйке-бұлшықет бұзылуларын қоса) туралы хабарланды. Бұл реакциялар өте ауыр болуы мүмкін. Егер клиникалық тұрғыдан, элетриптан мен СКҚСТ немесе СНКҚСТ бір мезгілде қабылдау қажет болса, әсіресе емдеудің басында, дозасын арттырған кезде немесе басқа серотонинергиялық препаратты қосқан кезде пациентке қадағалау жүргізу ұсынылады.
Жүктілік кезінде
Элетриптанның жүктілік кезінде қолданылуы жөнінде клиникалық деректер жоқ. Элетриптанды тек, анасы үшін күтілетін пайдасы шарана үшін болуы мүмкін қауіптен асып түсетін жағдайларда ғана тағайындау керек.
Лактация
Элетриптан емшек сүтімен бөлініп шығады. Препаратты бала емізетін әйелдердің қолдануына сақтықпен қарау керек. Препараттың жаңа туған сәбиге әсер ету қаупін препаратты қабылдағаннан кейін 24 сағат бойы бала емізуді уақытша тоқтата тұру арқылы азайтуға болады.
Дәрілік заттың көлік құралын немесе қауіптілігі зор механизмдерді басқару қабілетіне әсер ету ерекшеліктері
Элетриптан автокөлік құралдарын немесе қауіптілігі зор механизмдерді басқару қабілетіне әсері орташа. Бас сақинасы немесе оны элетриптанмен емдеу кейбір пациенттердегі ұйқышылдыққа немесе бас айналуына себеп болуы мүмкін. Бас сақинасы ұстамалары кезінде және Элетриптан гидробромиді препаратын қабылдағаннан кейін пациенттерге өзінің күрделі істерді атқару, мысалы көлік жүргізу қабілетіне өздігінен баға беру ұсынылады.
Қолдану жөніндегі нұсқаулар
Дозалау режимі
Элетриптан гидробромиді таблеткаларын бас сақинасы түріндегі бас ауыруы пайда болғаннан кейін барынша ертерек қабылдау керек, алайда ол бас сақинасы ұстамасы кезіндегі неғұрлым кейінгі сатыларында қабылдағанда да тиімді.
Элетриптан гидробромиді препаратының аура фазасы кезінде қабылдағанда бас сақинасы түріндегі бас ауыруын баспайтыны анықталған, сондықтан оны тек бас ауыруы фазасы кезінде қабылдау керек.
Элетриптанды профилактикалық мақсатта қабылдамау керек.
Ересек пациенттер (18-65 жас)
Ұсынылатын бастапқы дозасы 40 мг құрайды.
Бас ауыруы 24 сағат ішінде қайта пайда болған жағдайда
Бас сақинасы түріндегі бас ауыруы бастапқы әсер етуінен кейін 24 сағат ішінде қайта басталған жағдайда, Элетриптан гидробромиді препаратының дәл сондай дозадағы екінші дозасы қайталанған ұстаманы тиімді баса алатыны көрсетілген. Екінші дозасын қолдану қажет болған жағдайда, оны алғашқысын қабылдағаннан кейінгі 2 сағат ішінде қабылдамау керек.
Препаратты қабылдаудың әсерінің болмауы
Элетриптанның алғашқы дозасын қабылдағаннан кейін 2 сағат ішінде бас ауыруы сақталып қалған жағдайда, оны дәл сол ұстаманы басу үшін қайталап қабылдамау керек. Препарат бас сақинасы ұстамасы кезінде тиімсіз болған жағдайда, келесі ұстамасын емдеу әлі де сәтті болуы мүмкін.
40 мг дозасын сәйкесінше сынама түрінде қолданғаннан кейін қанағаттанарлық тиімділігіне қол жеткізілмеген пациенттерде (мысалы, көтерімділігінің жақсы болуы және 3 ұстаманың 2-еуінде жауаптың болмауы), бас сақинасының кейінгі ұстамаларын 80 мг дозасымен (тәулігіне екі рет 40 мг) тиімді емдеуге болады. 80 мг екінші дозасын келесі 24 сағат ішінде қабылдамау керек.
Препараттың ең жоғарғы тәуліктік дозасы 80 мг аспауы тиіс.
Егде жастағы пациенттер
Элетриптанның 65 жастан асқан пациенттердегі қауіпсіздігі мен тиімділігі, клиникалық зерттеулерде бұл жастағы адамдар санының аздығы салдарынан жүйелі түрде зерттелген жоқ. Осы себепті Элетриптан гидробромиді препаратын егде жастағы пациенттерде қолдану ұсынылмайды.
Бала жастағы пациенттер
Жасөспірімдер (12-17 жас)
Элетриптанның 12-17 жас аралығындағы жасөспірімдердегі тиімділігі анықталған жоқ.
Балалар (6-11 жас)
Элетриптанның 6-11 жас аралығындағы балалардағы қауіпсіздігі мен тиімділігі анықталмаған.
Бауыр функциясы бұзылған пациенттер
Бауыр функциясы жеңіл немесе орташа дәрежеде бұзылған пациенттерде препараттың дозасын түзету қажет емес. Элетриптанның бауыр функциясы ауыр бұзылған пациенттерде қолданылуы жөнінде деректердің жоқтығына байланысты, оны ондай адамдарға тағайындауға болмайды.
Бүйрек функциясы бұзылған пациенттер
Бүйрек функциясының бұзылуы кезінде элетриптанның артериялық қысымға әсерінің айқын болатындығына байланысты, бүйрек функциясы жеңіл немесе орташа бұзылған пациенттер үшін ұсынылатын бастапқы дозасы 20 мг құрайды. Препараттың ең жоғарғы тәуліктік дозасы 40 мг аспауы тиіс. Элетриптан гидробромиді препаратын бүйрек функциясы ауыр бұзылған пациенттерге тағайындауға болмайды.
Енгізу жолы және тәсілі
Таблеткаларды тұтастай, сумен ішіп жұту керек.
Артық дозалану жағдайында қабылдануы қажет шаралар
Симптомдары: элетриптанды 120 мг дозада бір рет қабылдағанда күрделі жағымсыз реакциялар байқалған жоқ.
Мына симптомдар білінген: артериялық гипертензия немесе басқа, жүрек-қантамыр жүйесі тарапынан болатын анағұрлым күрделі бұзылулар.
Емі: қажет болған жағдайда стандартты симптоматикалық шаралар жүргізіледі. Элетриптанның жартылай шығарылу кезеңі шамамен 4 сағатқа тең, және сондықтан да, элетриптанмен артық дозаланудан кейін пациенттердің жағдайын қадағалау мен жалпы демеуші ем жүргізуді кемінде 20 сағат бойы немесе белгілері мен симптомдары жойылғанша жалғастыру керек.
Гемодиализ немесе перитонеальді диализдің элетриптанның сарысудағы концентрациясына әсері белгісіз.
ДП стандартты қолдану кезінде көрініс табатын жағымсыз реакциялардың сипаттамасы және осы жағдайда қабылдануы керек шаралар
Жағымсыз реакциялар нормативтік-құқықтық қызметтің медициналық сөздігінің (MedDRA) терминдері және олардың туындау жиілігі бойынша топтастырылған: өте жиі (≥1/10); жиі (≥1/100, бірақ <1/10); жиі емес (≥1/1000, бірақ <1/100); сирек (≥1/10000, бірақ < 1/1000); өте сирек (<1/10000), жиілігі белгісіз (қолда бар деректер негізінде анықтау мүмкін емес).
Жиі
- фарингит, ринит
- ұйқышылдық, бас ауыруы, бас айналуы, шаншу немесе әдеттен тыс сезінулер, гипертензия, гипестезия, миастения
- вертиго
- жүрек қағуын сезіну, тахикардия
- гиперемия
- тамақтың қысылу сезімі
- іштің ауыруы, жүрек айнуы, ауыздың құрғауы, диспепсия
- тершеңдік
- арқаның ауыруы, миалгия
- ысыну сезімі, астения, кеуде қуысы аймағындағы симптомдар (ауыру, қысылу және жаншылу сезімі), қалтырау және ауырсыну
Жиі емес
- анорексия
- патологиялық ойлау, қозу, сананың шатасуы, өзін-өзі танымау, эйфория, депрессия, ұйқысыздық
- тремор, гиперестезия, атаксия, гипокинезия, сөйлеудің бұзылуы, мелшию, дәм сезудің бұрмалануы
- көрудің бұзылуы, көздің ауыруы, көз қарығуы, көз жасы ағуының бұзылуы
- құлақтың ауыруы, құлақтағы шуыл
- шеткері артериялардың ауыруы
- ентігу, тыныс алудың бұзылуы, есінеу
- диарея, глоссит
- бөртпе, қышыну
- буынның ауыруы, артроз, сүйектердің ауыруы
- несеп шығару жиілігінің артуы, несеп шығару жолдарының ауыруы, полиурия
- дімкәстану, беттің ісінуі, шөлдеу, ісіну, шеткері ісіну
Сирек
- жоғарғы тыныс жолдарының инфекциялары
- лимфаденопатия
- көңіл-күйдің құбылмалылығы
- конъюнктивит
- брадикардия
- шок
- бронх демікпесі, дауыстың өзгеруі
- іштің қатуы, эзофагит, тілдің ісінуі, кекіру
- гипербилирубинемия, АСТ деңгейінің жоғарылауы
- терінің зақымдануы, есекжем
- артрит, миопатия, құрысумен жүретін тартылулар
- кеуденің ауыруы, меноррагия
Тіркеуден кейін қолданылуы кезінде келесі жағымсыз әсерлері анықталды:
- аллергиялық реакциялар (кей жағдайларда күрделі болуы мүмкін, соның ішінде ангионевроздық ісіну)
- серотониндік синдром, сирек жағдайларда естен тану, ми қанайналымының жедел бұзылуы
- артериялық гипертензия
- миокард ишемиясы немесе инфарктісі, коронарлық түйілу
- кейбір басқа 5-НТ1B/1D агонистерін қолданғандағы сияқты, ишемиялық колиттің, құсудың сирек жағдайлары туралы хабарламалар алынды
Жағымсыз дәрілік реакциялар туындаса медицина қызметкеріне, фармацевтика қызметкеріне немесе дәрілік препараттардың тиімсіздігі туралы хабарламаларды қоса, дәрілік препараттарға жағымсыз реакциялар (әсерлер) бойынша ақпараттық деректер базасына тікелей хабарласыңыз
Қазақстан Республикасы Денсаулық сақтау министрлігі Тауарлар мен көрсетілетін қызметтердің сапасы мен қауіпсіздігін бақылау комитеті «Дәрілік заттар мен медициналық бұйымдарды сараптау ұлттық орталығы» ШЖҚ РМК
Қосымша мәліметтер
Бір таблетканың құрамында
белсенді зат – 48.460 элетриптан гидробромиді 40 мг элетриптанға баламалы,
қосымша заттар: микрокристалды целлюлоза, лактоза моногидраты, натрий кроскармеллозасы, магний стеараты,
қабық құрамы Аквариус ВТ13202 Қызғылт-сары: гипромеллоза 2910 (6 cps), триацетин, титанның қостотығы (Е171), лактоза моногидраты, FD&C Сары №6 Алюминий лагы (Е110); тазартылған су.
Сыртқы түрінің, иісінің, дәмінің сипаттамасы
Дөңгелек пішінді, екі беті дөңес, қызғылт-сары түсті қабықпен қапталған, бір жағында сындыру сызығымен бөлінген «Е» және «L» және екінші жағында «40» нақыштамасы бар таблеткалар.
Шығарылу түрі және қаптамасы
6 таблеткадан поливинилхлорид/поливинилденхлоридті үлбірден және алюминий фольгадан жасалған пішінді ұяшықты қаптамаға салынады.
1 пішінді ұяшықты қаптамадан медициналық қолдану жөніндегі қазақ және орыс тілдеріндегі нұсқаулықпен бірге картон қорапшаға салынады.
Сақтау мерзімі
2 жыл
Жарамдылық мерзімі өткеннен кейін қолдануға болмайды!
Сақтау шарттары
Құрғақ, жарықтан қорғалған жерде, 25 0С-ден аспайтын температурада сақтау керек.
Балалардың қолы жетпейтін жерде сақтау керек!
Дәріханалардан босатылу шарттары
Рецепт арқылы
Өндіруші туралы мәлімет/ Тіркеу куәлігінің ұстаушысы
Aurobindo Pharma Limited
Unit-X, Plot No. 16, APIIC Multi Products SEZ, Менакуру Виллидж, Naidupeta Mandal, S.P.S.R Nellore District, Andhra Pradesh, Үндістан.
Тел. +914066725000/1200, +914023736370, факс +914067074059, +914023747340, электронды пошта info@aurobindo.com
Қазақстан Республикасы аумағында тұтынушылардан дәрілік заттардың сапасына қатысты шағымдарды (ұсыныстарды) қабылдайтын ұйымның атауы, мекенжайы және байланыс деректері (телефон, факс, электронды пошта)
Rogers Pharma ЖШС, Қазақстан, 050043, Алматы қ., Мирас ы/а, 157/732
Тел. (727) 311-81-96/97, e-mail: office.secretary@rogersgroup.in
Қазақстан Республикасы аумағында дәрілік заттың тіркеуден кейінгі қауіпсіздігін қадағалауға жауапты ұйымның атауы, мекенжайы және байланыс деректері (телефон, факс, электронды пошта)
Канумуру И. Г., Қазақстан, 050043, Алматы қ., Мирас ы/а, 157/732
Тел. (727) 311-81-96/97, e-mail: irina.volovnikova@gmail.com