Флузол (Флуконазол)

Флузол

Флуконазол

Дәрілік түрі, дозасы

капсулалар, 150 мг

Жүйелі қолдануға арналған инфекцияға қарсы препараттар. Жүйелі қолдануға арналған зеңге қарсы препараттар. Триазол туындылары. Флуконазол

ATХ коды J02AC01

Емдеу мақсатында ересек пациенттерде қолданылады:

• Криптококктік менингит

• Кокцидиоидомикоз

• Инвазиялық кандидоз

• Шырышты қабық кандидозы, оның ішінде ауызжұтқыншақ, өңеш кандидозы, кандидурия, созылмалы тері-шырыш кандидозы

• Ауыз қуысының гигиенасы жеткіліксіз немесе жергілікті емдеу жеткіліксіз болған кезде тіс протездерін тағуға байланысты ауыз қуысының созылмалы атрофиялық кандидозы

• Жергілікті емдеу мүмкін болмайтын жедел немесе қайталанатын қынаптық кандидоз

• Жергілікті терапия қолданылмайтын кандидозды баланит

• Дерматомикоз, оның ішінде табан дерматофитиясы (tinea pedis), тегіс тері дерматофитиясы (tinea corporis), шап дерматофитиясы (tinea cruris), кебек тәрізді теміреткі (tinea versicolor) және терінің кандидозды инфекциясы, жүйелі емдеу қажет болғанда

• Басқа препараттармен емдеуге болмайтын, тырнақ дерматофитиясы (онихомикоз)

Флузол профилактика үшін ересектерде тағайындалады:

• қайталанудың даму қаупі жоғары пациенттерде криптококктік менингиттің қайталануы

• қайталанудың даму қаупі жоғары АИТВ жұқтырған пациенттерде ауыз қуысының, жұтқыншақтың немесе өңештің шырышты кандидозының қайталануы

• қынаптық кандидоздың қайталану жиілігін (жылына 4 немесе одан да көп эпизодтар) төмендету үшін

• ұзаққа созылатын нейтропениясы бар пациенттерде кандидозды инфекциялар (мысалы, химиотерапиядан өтетін гематологиялық қатерлі ісіктері бар пациенттерде немесе гемопоэздік дің жасушаларының трансплантациясын өткерген пациенттерде.

Зеңге қарсы препараттарды дұрыс пайдалану туралы ресми нұсқауларды қарастырған жөн.

Қолдануды бастағанға дейін қажетті мәліметтер тізбесі

- әсер етуші затқа, құрылымы флуконазолға ұқсас азольді заттарға немесе қосымша заттардың кез келгеніне жоғары сезімталдық;

- жүктілік және лактация кезеңі;

- балалар мен 18 жасқа дейінгі жасөспірімдер (капсула қабығында балаларда қолдануға тыйым салынған бояғыш бар!);

- тәулігіне 400 мг және одан астам дозада флуконозолды көп рет қолданғанда терфенадинді бір мезгілде қабылдау;

- QT аралығын ұзартатын және цизаприд, астемизол, пимозид, хинидин, амиодарон және эритромицин сияқты CYP3A4 изоферментінің көмегімен метаболизденетін препараттармен бір мезгілде қолдану;

- препаратты құрамында эритрозин болуына байланысты қалқанша безінің патологиясы бар пациенттерге тағайындауға және қолдануға болмайды-

құрамында тартразиннің болуына байланысты аллергиялық реакциялар тудыруы мүмкін;

-тұқым қуалайтын галактоза жақпаушылығы, Lapp (ЛАПП) ферментінің тапшылығы, глюкоза-галактоза мальабсорбциясы бар адамдарға, өйткені Флузол капсулалары құрамында лактоза бар.

Қолдану кезіндегі қажетті сақтық шаралары

Егер зеңдік инфекция емдеуге келмесе, Флузол препаратын қабылдау алдында дәрігеріңізбен сөйлесіңіз, зеңге қарсы баламалы ем қажет болуы мүмкін.

Бастың түкті бөлігінің дерматофитиясы

Препарат тиімділігі жағынан гризеофулвиннен басым емес; тиімділігі 20% құрайды, сондықтан Флузолды бастың түкті бөлігінің дерматофитиясын емдеу үшін қолдануға болмайды.

Криптоккоз

Флузолдың басқа аумақтағы криптококкозды (мысалы, өкпе және тері криптококкозын) емдеудегі тиімділігі туралы дәлелді деректер жеткіліксіз, сондықтан препаратты дозалау жөнінде нұсқаулар беру мүмкін емес.

Терең эндемиялық микоздар

Паракокцидиоидомикоз, тері-лимфа споротрихозы және гистоплазмоз сияқты эндемиялық микоздардың басқа түрлерін емдеуде Флузолдың тиімділігі туралы дәйекті деректер шектеулі, соның салдарынан дозалауға қатысты қандай да бір нұсқаулар беру мүмкін емес.

Бүйрек функциясының бұзылуы

Флузолды бүйрек функциясы бұзылған пациенттерге сақтықпен қолдану керек.

Бүйрек үсті безінің жеткіліксіздігі

Кетоконазол бүйрек үсті безінің жеткіліксіздігін тудыратыны белгілі және бұл флуконазолды қолданғанда да байқалуы мүмкін. Бүйрек үсті безінің жеткіліксіздігі преднизолонмен қатар емдеумен байланысты «Басқа препараттармен өзара әрекеттесуі» бөлімін қараңыз.

Бауыр мен өт шығару жолдары функциясының бұзылуы

Флузолды бауыр функциясы бұзылған пациенттерге сақтықпен қабылдау керек.

Сирек жағдайларда флуконазолды қолдану бауырдың уытты өзгерістерімен, оның ішінде өліммен аяқталуымен, негізінен күрделі қатар жүретін аурулары бар пациенттерде жүрді. Флуконазолмен байланысты гепатоуыттылық жағдайларында жалпы тәуліктік дозамен, емдеу ұзақтығымен, пациенттердің жынысымен немесе жасымен қандай да бір айқын өзара байланыс байқалған жоқ. Флуконазолдың гепатоуыттылығы әдетте қайтымды сипатта болды және емдеу тоқтатылғаннан кейін өтті.

Флуконазолмен емдеу кезінде бауыр функциясының зертханалық көрсеткіштерінің ауытқулары бар пациенттер бауырдың анағұрлым ауыр зақымдануының алдын алу мақсатында тұрақты бақылауда болуы тиіс.

Бауыр үшін ауыр салдарларға тән симптомдар келесідей болуы мүмкін: астения, анорексия, тұрақты жүрек айнуы, құсу және сарғаю. Флуконазолды қабылдауды дереу тоқтатып, дәрігерге көріну керек.

Жүрек-қантамыр жүйесі

Кейбір азолдарды, оның ішінде флуконазолды қолданғанда электрокардиограммада QT аралығының ұзаруы жағдайлары орын алды. Тіркеуден кейінгі бақылау барысында флуконазолды қабылдаған пациенттерде QT аралығы ұзаруының және полиморфты қарыншалық тахикардияның өте сирек жағдайлары тіркелді. Осы жағдайлардың ішінде көптеген қауіпті факторлары бар ауыр науқастанған пациенттер туралы хабарламалар болды, мысалы, жүректің құрылымдық ауруы, электролиттік бұзылулар және жағдайға әсер етуі мүмкін қатар жүретін препараттар.

Флузолды осындай потенциалды проаритмиялық жағдайлары бар пациенттерге сақтықпен қабылдау керек.

QT аралығын ұзартатыны және P - 450 CYP3A4 цитохромының көмегімен метаболизденетіні белгілі басқа дәрілік препараттарды бір мезгілде қолдануға болмайды.

Галофантрин

Галофантрин ұсынылған емдік дозада QT аралығын ұлғайтады және CYP3A4 субстраты болып табылады. Сондықтан флуконазол мен галофантринді бір мезгілде қолдану ұсынылмайды.

Тері реакциялары

Флуконазолмен емдеу кезінде сирек жағдайларда пациенттерде Стивенс-Джонсон синдромы және уытты эпидермальді некролиз сияқты эксфолиативті тері реакциялары дамиды. АИТВ жұқтырған пациенттер көптеген дәрілік препараттарға болатын терінің ауыр реакцияларының дамуына бейім. Беткейлік зеңдік инфекциядан ем қабылдап жүрген пациентте флуконазолдың әсеріне жатқызуға болатын бөртпе пайда болғанда осы дәрілік препаратпен емдеуді тоқтату керек. Инвазиялық/ жүйелі зеңдік инфекциялары бар пациенттерде бөртпе туындаған кезде оларды мұқият бақылау және буллездік зақымданулар немесе көп формалы эритема пайда болған кезде флуконазолды тоқтату керек.

Жоғары сезімталдық

Анафилаксиялық реакцияның сирек жағдайлары тіркелді.

P450 цитохромы

Флуконазол CYP2C9 изоферментінің күшті тежегіші және CYP3A4 изоферментінің орташа тежегіші, сондай-ақ CYP2C19 изоферментінің тежегіші болып табылады. Флузолды CYP2C9, CYP2C19 және CYP3A4 изоферменттерімен метаболизденетін терапиялық диапазоны тар дәрілік препараттармен бір мезгілде қабылдайтын пациенттерге бақылау жүргізген жөн.

Терфенадин

Флуконазолды тәулігіне 400 мг-ден аз дозада және терфенадинді бір мезгілде қолдануды емдеуші дәрігердің мұқият қадағалауымен жүргізген жөн.

Қосымша заттар

Флузол капсулалары құрамында лактоза бар. Сирек тұқым қуалайтын галактоза жақпаушылығы, Лапп лактаза тапшылығы немесе глюкоза мен галактоза мальабсорбциясы синдромы бар пациенттерге осы дәрілік препаратты қабылдауға болмайды.

Дерматологиялық реакциялар

Флуконазолды қолдану кезінде эозинофилиямен және жүйелі көріністермен (DRESS) бірге дәрілік реакцияның дамуы туралы хабарланды.

Кандидоз:

Зерттеулер Candida штамдарының инфекцияларының C. albicans-тен өзгеше екенін көрсетті. Олар көбінесе төзімділікті (мысалы, C. krusei және C. auris) немесе флуконазолға сезімталдықтың төмендеуін (C. glabrata) көрсетеді. Мұндай инфекциялар флуконазолмен тиімсіз емдеу кезінде зеңге қарсы баламалы терапияны қажет етуі мүмкін. Дәрігерлерге әр түрлі Candida түрлерінің флуконазолға резистенттілігінің таралуын ескеру ұсынылады.

Басқа дәрілік препараттармен өзара әрекеттесуі

Флуконазолды келесі препараттармен бір мезгілде қолдануға болмайды:

Цизаприд: флуконазол мен цизапридті бір мезгілде қолданғанда жүрек тарапынан жағымсыз реакциялар, оның ішінде полиморфты қарыншалық тахикардия жағдайлары болуы мүмкін. Флуконазолды тәулігіне 1 рет 200 мг дозада және цизапридті тәулігіне 4 рет 20 мг дозада бір мезгілде қолдану цизапридтің қандағы плазмалық концентрациясының айқын ұлғаюына және QT аралығының ұлғаюына әкеледі. Оларды бір уақытта қолдануға болмайды.

Терфенадин: Азольді зеңге қарсы дәрілер мен терфенадинді бір мезгілде қолданғанда QT аралығының ұлғаюы нәтижесінде жүрек аритмиясы пайда болуы мүмкін. Флуконазолды терфенадинмен тәулігіне 200 мг дозада қолдану QT аралығының ұзаруын тудырмады, бірақ флуконазолды тәулігіне 1 рет 400 мг және 800 мг дозада қолданғанда терфенадиннің плазмалық концентрациясының едәуір жоғарылауы байқалды. Терфенадин мен флуконазолды 400 мг және одан көп дозада бір мезгілде қолдануға болмайды. Терфенадин мен флуконазолды тәулігіне 1 рет 400 мг аспайтын дозада бір мезгілде қолдануды мұқият бақылаумен жүргізген жөн.

Астемизол: флуконазол мен астемизолды бір мезгілде қолдану астемизол клиренсінің төмендеуіне әкелуі мүмкін. Астемизолдың жоғары плазмалық концентрациясы QT аралығының ұзаруына және сирек жағдайларда полиморфты қарыншалық тахикардияның туындауына әкелуі мүмкін. Оларды бір уақытта қолдануға болмайды.

Пимозид: флуконазол мен пимозидті бір мезгілде қолдану пимозид метаболизмінің тежелуіне әкелуі мүмкін. Пимозидтің жоғары плазмалық концентрациясы QT аралығының ұзаруына және сирек жағдайларда полиморфты қарыншалық тахикардияның туындауына әкелуі мүмкін. Оларды бір уақытта қолдануға болмайды.

Хинидин: флуконазол мен хинидинді бір мезгілде қолдану хинидин метаболизмінің бәсеңдеуіне әкелуі мүмкін. Хинидинді қолдану кезінде QT аралығының ұзару жағдайлары және полиморфты қарыншалық тахикардияның сирек жағдайлары байқалды. Оларды бір уақытта қолдануға болмайды.

Эритромицин: флуконазол мен эритромицинді бір мезгілде қолдану кардиоуыттылықтың (QT аралығының ұзаруы, полиморфты қарыншалық тахикардия) және соның салдарынан кенеттен жүректен өлудің потенциалды қаупін арттырады. Оларды бір уақытта қолдануға болмайды.

Флуконазолмен бір мезгілде келесі дәрілік заттарды қолдану ұсынылмайды:

Галофантрин: флуконазол галофантриннің метаболизмін тежеуі мүмкін, бұл қандағы концентрацияның жоғарылауына және кардиоуытты әсерлердің дамуына (QT аралығының ұзаруы, полиморфты қарыншалық тахикардия), тіпті жүрек ұстамасына дейін және нәтижесінде кенеттен жүректен өлуге әкеледі.

Сақтықпен қолдану керек қатарлас қолданулар:

Амиодарон: флуконазол амиодаронның метаболизмін тежейді, бұл QT аралығының ұзаруына әкеледі. Егер флуконазолды және амиодаронды, әсіресе флуконазолды жоғары дозаларда (800 мг) бір мезгілде қолдану қажет болғанда сақ болу керек.

Флуконазолмен емдеу мынадай дәрілік заттармен бір мезгілде тағайындағанда дәрілік терапия дозасын түзетуді талап етуі мүмкін:

Дәрілік заттардың флуконазолға әсері:

Рифампицин: флуконазолдың фармакокинетикалық қисығы астындағы ауданды орта есеппен 20% және жартылай шығарылу кезеңін 25% азайтады. Қатарлас рифампицин алатын пациенттерде флуконазол дозасын ұлғайту туралы мәселені қарау керек.

Өзара әрекеттесу бойынша зерттеулер пероральді флуконазолды тамақпен, циметидинмен, антацидтермен бір мезгілде қабылдағанда немесе сүйек кемігін трансплантациялау үшін организмнің жалпы сәулеленуінен кейін флуконазолдың клиникалық маңызды сіңірілуінің бұзылуы болмайтынын көрсетті.

Гидрохлоротиазид: дені сау еріктілерде қан плазмасындағы флуконазол концентрациясын 40% арттырды. Мұндай шаманың әсері қатарлас диуретиктер алатын пациенттерде флуконазолды дозалау режимін өзгертуді талап етпеуі тиіс.

Флуконазолдың басқа дәрілік заттарға әсері:

Флуконазол CYP2C9 изоферментінің қуатты тежегіші және CYP3A4 және CYP2C19 цитохромы Р450 изоферменттерінің орташа тежегіші болып табылады, бұл флуконазолмен бір мезгілде қабылдаған кезде қан плазмасында CYP2C9, CYP2C19 және CYP3A4 изоферменттерінің қатысуымен метаболизденетін басқа дәрілік заттардың концентрациясының жоғарылау қаупін тудырады. Флуконазолдың тежегіш әсері ұзақ жартылай шығарылу кезеңіне байланысты препаратты тоқтатқаннан кейін 4-5 күн бойы сақталады.

Альфентанил: флуконазолды 400 мг дозада пероральді қабылдау және 20 мкг/кг дозада альфентанилді вена ішіне енгізу дені сау еріктілерде фармакокинетикалық қисықтың астындағы ауданның 2 есе артуына және альфентанил клиренсінің төмендеуіне себеп болды. Қатар алфентанил қабылдайтын пациенттерде дозаны түзету қажет болуы мүмкін.

Амитриптилин және нортриптилин: флуконазол амитриптилин мен нортриптилиннің әсерін күшейтеді. 5-нортриптилинді және/немесе S-амитриптилинді біріктірілген емнің басында және бір аптадан кейін өлшеуге болады. Қажет болса, амитриптилин/нортриптилин дозасын түзету керек.

Амфотерицин В: эксперименттік зерттеуде флуконазол мен амфотерицин В бір мезгілде қолдану мынадай нәтижелерге әкелді: C. albicans жүйелі инфекциясы кезіндегі зеңге қарсы шағын аддитивті әсер, Cryptococcus neoformans бассүйекішілік инфекциясы кезіндегі өзара әрекеттесудің болмауы және A. fumigatus жүйелі инфекциясы кезіндегі екі препараттың антагонизмі. Осы зерттеулер барысында алынған нәтижелердің клиникалық маңызы белгісіз.

Антикоагулянттар: басқа азольді зеңге қарсы препараттар жағдайындағыдай маркетингтен кейінгі тәжірибеде флуконазолды варфаринмен бір мезгілде қабылдаған пациенттерде протромбиндік уақыттың ұлғаюына байланысты қан кету жағдайлары (гематома, эпистаксис, асқазан-ішектен қан кету, гематурия және мелена) хабарланды. Флуконазолмен және варфаринмен бір мезгілде емдеу кезінде протромбиндік уақыт CYP2C9 арқылы варфарин метаболизмінің тежелуіне байланысты 2 есеге дейін артты. Флуконазолмен бір мезгілде кумаринді немесе индандионды антикоагулянттарды алатын пациенттерде протромбиндік уақытты мұқият бақылау керек. Антикоагулянт дозасын түзету қажет болуы мүмкін.

Қысқа әсер ететін бензодиазепиндер (мидазолам, триазолам): флуконазол мидазолам мен триазоламның қандағы концентрациясын олардың психомоторлық әсерін күшейте отырып арттырады. Флуконазолды 200 мг дозада және мидазоламды 7,5 мг дозада бір мезгілде қабылдау фармакокинетикалық қисық астындағы ауданды 3,7 есе және мидазоламның жартылай шығарылу кезеңін 2,2 есе ұлғайтты. Флуконазолды 200 мг дозада және триазоламды 0,25 мг дозада бір мезгілде қабылдау фармакокинетикалық қисық астындағы ауданды 4,4 есе және триазоламның жартылай шығарылу кезеңін 2,3 есе ұлғайтты. Триазоламның күшейтетін және ұзаққа созылатын әсері флуконазолмен бір мезгілде емдеу кезінде байқалды. Егер флуконазол қабылдайтын пациенттерде бензодиазепиндермен қатар емдеу қажет болса, бензодиазепин дозасын төмендету туралы мәселені қарау және пациенттерге тиісті бақылау жүргізу керек.

Карбамазепин: флуконазол карбамазепиннің метаболизмін оның қан плазмасындағы концентрациясының 30%-ға дейін артуымен тежейді. Карбамазепиннің уыттылығы даму қаупі бар. Карбамазепин дозасын түзету концентрацияны/әсерді өлшеуге байланысты қажет болуы мүмкін.

Кальций өзекшелерінің блокаторлары: флуконазол CYP3A4 изоферментінің (нифедипин, исрадипин, амлодипин, верапамил, фелодипин) қатысуымен метаболизденетін бірқатар кальций өзекшелерінің блокаторлары метаболизмінің потенциалды тежегіші болып табылады, олардың қандағы концентрациясы мен емдік әсерін арттырады. Жағымсыз реакцияларды жиі бақылау ұсынылады.

Целекоксиб: флуконазолды тәулігіне 200 мг дозада және целекоксибті 200 мг дозада бір мезгілде қолданғанда қандағы целекоксибтің фармакокинетикалық қисығы астындағы ең жоғары концентрация және аудан тиісінше 68% және 134% жоғарылады. Флуконазол мен целекоксибті бір мезгілде тағайындау қажет болған кезде целекоксиб дозасын 2 есе төмендету ұсынылады.

Циклофосфамид: флуконазолмен бір мезгілде қолданғанда қанда билирубин мен креатинин концентрациясы жоғарылайды. Біріктірілімді қан сарысуындағы билирубин мен креатинин деңгейінің жоғарылау қаупін ескере отырып қолдануға болады.

Фентанил: фентанилдің флуконазолмен ықтимал әрекеттесуіне байланысты фентанилмен уыттанудың өлім жағдайы туралы хабарланды. Оған қоса, дені сау еріктілерде флуконазол фентанилдің шығарылуын едәуір кешіктіретіні көрсетілген. Фентанилдің жоғары концентрациясы тыныс алудың бәсеңдеуіне әкелуі мүмкін. Пациенттер тыныс алудың бәсеңдеуінің ықтимал қаупі тұрғысынан мұқият бақылауда болуы тиіс. Фентанил дозасын түзету қажет болуы мүмкін.

ГМГ-КоА-редуктаза тежегіштері: флуконазол олардың жағымсыз әсерлерін күшейте отырып, CYP3A4 (аторвастатин, симвастатин) және CYP2C9 (флувастатин) изоферментінің қатысуымен метаболизденетін ГМГ-КоА-редуктаза тежегіштерінің қандағы концентрациясын арттырады. Флуконазолды және ГМГ-КоА-редуктаза тежегіштерін бір мезгілде тағайындау қажет болғанда миопатия немесе рабдомиолиз симптомдарының пайда болуын, қандағы креатинкиназа белсенділігін бақылау керек. Егер креатинкиназаның елеулі ұлғаюы байқалса немесе миопатия/рабдомиолиз диагнозы қойылса немесе күдік туындаса, ГМГ-КоА-редуктаза тежегіштерін тоқтату керек.

Ибрутиниб: флуконазол сияқты орташа CYP3A4 тежегіштері қан плазмасындағы ибрутиниб концентрациясын жоғарылатады және уыттылық қаупін арттыруы мүмкін. Егер біріктірілімді қолданудан басқа амал болмаса, тежегішті қолданудың бүкіл кезеңі ішінде күніне бір рет (екі капсула) 280 мг-ға дейін ибрутиниб дозасын азайту қажет және мұқият клиникалық мониторингті қамтамасыз ету қажет.

Ивакафтор: цистикалық фиброздың трансжарғақшалық өткізгіштік реттегішінің (CFTR) потенциаторы ивакафтормен бірге қолдану ивакафтордың әсерін 3 есе және гидроксиметил-ивакафтор (M1) экспозициясын 1,9 есе арттырды. Флуконазол және эритромицин сияқты қатар жүретін орташа CYP3A тежегіштерін қабылдайтын пациенттерге ивакафтор дозасын күніне бір рет 150 мг-ға дейін төмендету ұсынылады.

Олапариб: флуконазол сияқты CYP3A4 орташа тежегіштері қан плазмасындағы олапариб концентрациясын арттырады; бір мезгілде қолдану ұсынылмайды. Егер біріктірілімді қолданудан басқа амал болмаса, олапариб дозасын күніне екі рет 200 мг дейін шектеу қажет.

Иммуносупрессорлар (мысалы, циклоспорин, эверолимус, сиролимус және такролимус)

Циклоспорин: флуконазол циклоспориннің концентрациясын және AUC едәуір арттырады. Флуконазолды тәулігіне 200 мг дозада және циклоспоринді тәулігіне 2,7 мг/кг дозада бір мезгілде қолданғанда циклоспориннің AUC 1,8 есе артқаны байқалды. Бұл препараттарды оның концентрациясына байланысты циклоспорин дозасы төмендеген жағдайда бір мезгілде қолдануға болады.

Эверолимус: in vitro және in vivo зерттеулері жүргізілмегенімен, флуконазол СУР3А4 бәсеңдеуіне байланысты қан плазмасындағы эверолимус концентрациясын арттыруы мүмкін.

Сиролимус: флуконазол қан плазмасындағы сиролимус концентрациясын CYP3A4 ферментімен және P-гликопротеинмен сиролимус метаболизмін бәсеңдету арқылы арттырады. Бұл препараттарды концентрация деңгейіне және препараттың әсеріне байланысты сиролимус дозасын түзеткен жағдайда бір мезгілде қолдануға болады.

Такролимус: флуконазол ішектегі CYP3A4 ферментімен такролимус метаболизмінің бәсеңдеуіне байланысты оны пероральді қолданған кезде қан плазмасындағы такролимус концентрациясын 5 есеге дейін арттыруы мүмкін. Такролимусты в/і қолдану кезінде фармакокинетикада елеулі өзгерістер байқалмады. Такролимустың жоғарылаған деңгейі нефроуыттылықпен байланысты. Пероральді қолдануға арналған такролимус дозасын такролимус концентрациясына байланысты төмендету керек.

Лозартан: флуконазол лозартанның метаболизмін оның белсенді метаболитіне (Е-31 74) дейін басады, бұл лозартанды қолдану кезінде ангиотензин II рецепторларына антагонизмнің көп бөлігін тудырады. Пациенттерде АҚ тұрақты мониторингін жүзеге асыру ұсынылды.

Метадон: флуконазол метадонның қандағы концентрациясын жоғарылатуы мүмкін. Метадон дозасын түзету қажет болуы мүмкін.

Қабынуға қарсы стероидты емес препараттар (ҚҚСП)

Флуконазолмен Cmax және AUC бір мезгілде қолданғанда флурбипрофен тек флурбипрофенді қолданған кезде ұқсас көрсеткіштермен салыстырғанда тиісінше 23 және 81% жоғарылады. Осыған ұқсас флуконазолды рацемиялық ибупрофенмен (400 мг) Cmax және AUC фармакологиялық белсенді изомерімен бірге қолданғанда s-(+)-ибупрофен тек рацемиялық ибупрофенді қолданған кезде тиісті көрсеткіштермен салыстырғанда тиісінше 15 және 82% жоғарылады.

Флуконазол CYP 2C9 (мысалы, напроксен, лорноксикам, мелоксикам, диклофенак) метаболизденетін басқа ҚҚСП жүйелі экспозициясын арттыруға потенциалды қабілетті. ҚҚСП байланысты жағымсыз реакциялар мен уытты көріністердің мониторингін мезгіл-мезгіл жүзеге асыру ұсынылды. ҚҚСП дозасын түзету қажет болуы мүмкін.

Фенитоин: флуконазол фенитоиннің бауыр метаболизмін тежейді. Флуконазолды 200 мг дозада бір мезгілде қабылдау және фенитоинді 250 мг дозада вена ішіне енгізу қандағы фенитоиннің фармакокинетикалық қисығы астындағы ең жоғары концентрацияның және ауданның тиісінше 128% және 75% артуына әкелді. Бір мезгілде қолданған кезде фенитоиннің уыттылығын болдырмау үшін қан сарысуындағы фенитоин концентрациясының деңгейін бақылау керек.

Преднизон: бауыр трансплантациясынан кейін преднизон алған пациентте флуконазолмен емдеу аяқталғаннан кейін 3 айдан соң бүйрек үсті безі қыртысының жедел жеткіліксіздігі туралы хабарлама бар. Флуконазолды қабылдауды тоқтату CYP3A4 белсенділігін күшейткен сияқты, бұл преднизон метаболизмінің жоғарылауына әкелді. Флуконазолмен және преднизонмен ұзақ емде жүрген пациенттерде флуконазолмен емдеу аяқталғаннан кейін бүйрек үсті безі қыртысының функциясын мұқият мониторингілеу керек.

Рифабутин: флуконазол қандағы рифабутин концентрациясын оның фармакокинетикалық қисық астындағы ауданының 80% ұлғаюымен және жағымсыз әсерлердің даму қаупінің өсуімен (бір мезгілде қолданғанда увеит жағдайлары сипатталған) арттырады. Біріктірілген ем кезінде рифабутиннің уыттылық симптомдарын ескеру керек.

Саквинавир: флуконазол қандағы ең жоғары концентрацияны және саквинавирдің фармакокинетикалық қисығы астындағы ауданды CYP3A4 бауырындағы саквинавирдің метаболизмінің тежелуіне және Р-гликопротеиннің тежелуіне байланысты тиісінше 50% және 55% арттырады. Саквинавирдің дозасын түзету қажет болуы мүмкін.

Сульфонилмочевина туындылары: флуконазол дені сау еріктілерде сульфонилмочевина туындыларының (хлорпропамид, глибенкламид, глипизид және толбутамид) жартылай шығарылу кезеңін ұзартады, бұл қандағы глюкоза концентрациясының мониторингін және қажет болса гипогликемиялық препараттардың дозасын түзетуді талап етеді.

Теофиллин: флуконазол 14 күн бойы 200 мг дозада қабылдаған кезде теофиллин клиренсін 18% төмендетті, бұл теофиллиннің жағымсыз әсерлерінің күшеюін арттыруы мүмкін. Теофиллиннің жоғары дозаларын алатын немесе өзге де түрде теофиллиннің уыттылық қаупі жоғары пациенттер флуконазолды қабылдау кезінде теофиллиннің уыттылық белгілері тұрғысынан бақылануы тиіс. Егер уыттылық белгілері дамыса, терапияны қайта қаралуы тиіс.

Тофацитиниб: тофацитинибтің әсері тофацитинибті CYP3A4 қалыпты тежелуіне, сондай-ақ CYP2C19 күшті тежелуіне (мысалы, флуконазол) әкелетін препараттармен бір мезгілде қолданғанда күшейеді. Сондықтан тофацитиниб дозасын күніне бір рет осы препараттармен біріктірген кезде 5 мг дейін төмендету ұсынылады.

Толваптан: толваптанның әсері айтарлықтай артады (AUC бойынша 200%; Cmax бойынша 80%), толваптан, CYP3A4 субстраты флуконазолмен, орташа CYP3A4 тежегішімен бірге, жағымсыз реакциялардың, әсіресе елеулі диурездің, сусызданудың және т.б. жедел бүйрек жеткіліксіздігінің елеулі ұлғаю қаупімен бірге енгізіледі. Толваптан дозасын бір мезгілде қолданған жағдайда азайту керек, ал пациентті толваптанмен байланысты кез келген жағымсыз реакцияларға жиі бақылау керек.

Қабіршөп алкалоидтары: флуконазолды қабылдау аясында қанда винкристин мен винбластин концентрациясының жоғарылауының және CYP3A4-ке тежегіш әсерімен байланысты болуы мүмкін нейроуыттылықты туындатудың потенциалды қаупі бар.

А дәрумені: трансретин қышқылын (А дәруменінің қышқылды түрі) және флуконазолды бір мезгілде қолданған пациентте флуконазолды тоқтатқаннан кейін жоғалып кеткен мидың жалғанісігі түрінде ОЖЖ тарапынан жағымсыз реакциялар байқалғаны хабарланды. Бұл дәрілік заттарды бір уақытта қолдануға болады, бірақ орталық жүйке жүйесінің жағымсыз реакцияларының пайда болу қаупін есте ұстаған жөн.

Вориконазол (CYP2C9, CYP2C19, CYP3A4 изоферменттерінің тежегіші) – вориконазолды (1 күні 400 мг, келесі 2,5 күндері 12 сағат сайын 200 мг) және флуконазолды (1 күні 400 мг, сосын 4 күн ішінде 200 мг) бір мезгілде пероральді қабылдау дені сау еріктілерде қандағы вориконазол концентрациясының орташа 57% (90% CI: 20%, 107%) және 79% (90% CI: 40%, 128%) жоғарылауын тудырды. Бірге қолдану қажет болғанда флуконазолдан кейін вориконазолды тағайындау ұсынылады.

Зидовудин: флуконазол жағымсыз әсерлердің пайда болу қаупінің жоғарылауымен қандағы зидовудин концентрациясын арттырады. Флуконазолды зидовудинмен бір мезгілде қабылдау зидовудиннің фармакокинетикалық қисығы астындағы ең жоғары концентрацияның және ауданның тиісінше 84% және 74% артуын, оның клиренсінің 45% төмендеуін, жартылай шығарылу кезеңінің 128% ұзаруын туындатты.

Азитромицин: 18 дені сау еріктіде азитромицин мен флуконазолдың бір-бірінің фармакокинетикасына әсерін бағалау кезінде оларды 1200 және 800 мг дозада бір мезгілде пероральді бір реттік қолдану кезінде маңызды фармакокинетикалық өзара әрекеттесу анықталған жоқ.

Оральді контрацептивтер: 50 мг дозадағы флуконазол пероральді қолдануға арналған біріктірілген контрацептивтердің тиімділігіне елеулі әсер етпейді, ал 200 мг флуконазолды күнделікті қабылдаған кезде этинил эстрадиол мен левоноргестрелдің фармакокинетикалық қисығы астындағы аудан тиісінше 40% және 24% ұлғайды.

Арнайы ескертулер

Флузол препаратын қабылдағанға дейін дәрігермен сөйлесіңіз.

Егер сізде Флузол препаратын қабылдағаннан кейін қатты тері бөртпесі немесе терінің қабыршақтануы, қышу және/немесе ауыздың ойық жаралары пайда болса.

Флуконазолды қолдану кезінде эозинофилиямен және жүйелі көріністермен (DRESS) дәрілік реакцияны қоса, күрделі тері реакцияларының дамуы туралы хабарланды. Флузол препаратын қабылдауды тоқтатыңыз және егер сіз оның кез-келгенін байқасаңыз, дереу медициналық көмекке жүгініңіз. Осы ауыр тері реакцияларына байланысты симптомдар "Жағымсыз реакциялар" бөлімінде келтірілген.

Жүктілік немесе лактация кезінде

Егер сіз жүкті болсаңыз, жүкті болуды жоспарласаңыз немесе емізетін болсаңыз, дәрігер сізге бұл туралы айтпаса, Флузолды қабылдауға болмайды.

Жүктіліктің бірінші триместрінде қабылданған Флуконазол түсік тастау қаупін арттыруы мүмкін. Жүктіліктің бірінші триместрінде төмен дозаларда қабылданатын Флуконазол туа біткен сүйек және/немесе бұлшықет ақаулары бар баланың туылу қаупін аздап арттыруы мүмкін.

Обсервациялық зерттеу нәтижелері жүктіліктің бірінші триместрінде флуконазол қабылдаған әйелдерде өздігінен түсік түсіру қаупінің жоғарылағанын көрсетті.

Нәрестелерде (брахицефалияны, құлақ жарғағы дисплазиясын, алдыңғы еңбектің шамадан тыс ұлғаюын, жамбастың қисықтығын, иық-шынтақ синостозын қоса) көптеген ақаулар жағдайлары сипатталған, олардың аналары кокцидиоидомикозды емдеу үшін үш немесе одан да көп ай бойы флуконазолды жоғары дозада (күніне 400-800 мг) қабылдаған. Бұл жағдайлардың флуконазолды қабылдаумен себеп-салдарлық байланысы түсініксіз.

Флуконазол стандартты және жоғары дозаларда, қысқа мерзімді емдеу үшін де, ұзақ қолдану үшін де, өмірге қауіп төндіретін инфекциялар жағдайларын қоспағанда, жүктілік кезінде пайдаланылмауы тиіс.

Емшек емізу

Флуконазол емшек сүтіне еніп, қан плазмасына қарағанда төмен концентрацияға жетеді. Емшек емізуді флуконазолды әдеттегі дозада бір рет қолданғаннан кейін жалғастыруға болады, ол 200 мг немесе одан аз. Флуконазолды көп рет қолданғанда немесе оны жоғары дозаларда қолданғанда емшек емізу ұсынылмайды. Емшек емізудің дамуы мен денсаулығы үшін артықшылықтарын, сондай-ақ ананың флуконазолға клиникалық қажеттілігін және флуконазолды қабылдаудан немесе ананың негізгі жағдайынан емшек сүтіне кез-келген жағымсыз әсерлерді ескеру қажет.

Препараттың көлік құралын немесе қауіптілігі зор механизмдерді басқару қабілетіне әсер ету ерекшеліктері

Флуконазолдың көлік құралдарын басқару немесе басқа механизмдермен жұмыс істеу қабілетіне әсерін зерттеу жүргізілген жоқ. Пациенттерді препаратты қолдану кезінде бас айналудың немесе құрысудың даму мүмкіндігі туралы хабардар ету керек. Мұндай симптомдар дамыған кезде көлік құралдарын басқару немесе басқа механизмдермен жұмыс істеу ұсынылмайды.

Қолдану жөніндегі нұсқаулар

Дозалау режимі

Флузол препаратының тәуліктік дозасы зеңдік инфекцияның сипаты мен ауырлығына байланысты. Флуконазолды қайта қабылдауды талап ететін инфекциялар кезінде емдеуді белсенді зеңдік инфекцияның клиникалық немесе зертханалық белгілері жойылғанша жалғастыру керек. Емдеу кезеңі жеткіліксіз болған кезде зеңдік инфекцияның қайталануына әкелуі мүмкін.

Ересектер

Пациенттердің ерекше топтары

Егде пациенттер

Дозаны бүйрек функциясын ескере отырып түзету керек “Бүйрек жеткіліксіздігі” бөлімін қараңыз).

Бүйрек жеткіліксіздігі

Флузол негізінен несеппен өзгермеген белсенді зат түрінде шығарылады. Бір рет қабылдағанда дозаны түзету қажет емес. Бүйрек функциясы бұзылған пациенттерде флуконазолды көп рет қолдану қажет болғанда бастапқы доза тиісті көрсеткіш үшін ұсынылатын тәуліктік дозаға байланысты 50-400 мг құрайды. Содан кейін Флузолдың тәуліктік дозасы (көрсетілімге байланысты) келесі кестеге сәйкес анықталады:

Тұрақты диализдегі пациенттерге әрбір сеанстан кейін препаратты ұсынылған дозада 100% қабылдау қажет; диализ болмаған күндері пациенттерге креатинин клиренсінің шамасына байланысты препараттың аз дозасын қабылдау керек.

Бауыр жеткіліксіздігі

Бауыр функциясы бұзылған пациенттерде флуконазолды қолдану жөніндегі ақпарат жеткіліксіз, бауыр дисфункциясы бар пациенттерге препаратты сақтықпен қолдану керек (4.4 және 4.8 бөлімдерді қараңыз).

Балалар

Балалар мен 18 жасқа дейінгі жасөспірімдерге бұл препаратты қолдану ұсынылмайды.

Енгізу жолы және тәсілі

Ішке қабылдау үшін.

Препарат тамақтануға қарамастан тағайындалады, капсулаларды тұтасымен жұту керек.

Дәрілік препаратты қолдану тәсілін түсіндіру үшін медицина қызметкерінің кеңесіне жүгіну бойынша нұсқаулар

Дәрілік препаратты қабылдаудан бұрын дәрігерге немесе фармацевтке хабарласыңыз

ДП стандартты қолдану кезінде пайда болатын жағымсыз реакциялардың сипаттамасы және бұл жағдайда қабылдануы тиіс шаралар

Флузол препаратын қолдануды тоқтатыңыз және егер сіз келесі симптомдардың кез келгенін байқасаңыз, дереу дәрігерге қаралыңыз:

Кең таралған бөртпе, дене температурасының көтерілуі және лимфа түйіндерінің ұлғаюы (DRESS синдромы немесе дәрілік аса жоғары сезімталдық синдромы).

Жиі (≥ 1/100-ден < 1/10 дейін)

• бас ауыруы

• іштің ауыруы, диарея, жүрек айнуы, құсу

• аланин аминотрансферазаның ұлғаюы, аспартатаминотрансферазаның ұлғаюы, қандағы сілтілік фосфатазаның ұлғаюы

• тері бөртпесі

Жиі емес (≥1/1000-нан <1/100 дейін)

• анемия

• тәбеттің төмендеуі

• ұйқышылдық, ұйқысыздық

• құрысулар, парестезия, бас айналуы, дәм сезудің бұзылуы

• вертиго

• іш қату, метеоризм, ауыз қуысының шырышты қабығының құрғауы

• холестаз, сарғаю, билирубиннің жоғарылауы

• дәрілік дерматит*, есекжем, қышыну, тершеңдіктің ұлғаюы

• миалгия

• шамадан тыс шаршау, жалпы дімкәстік сезімі, астения, қызба жағдайы

Сирек (≥1/10000 < 1/1000 дейін)

• агранулоцитоз, лейкопения, нейтропения, тромбоцитопения

• анафилаксия

• гипертриглицеридемия, гиперхолестеринемия, гипокалиемия

• тремор

• полиморфты қарыншалық тахикардия, QT аралығының ұзаруы

• бауыр жеткіліксіздігі, гепатоцеллюлярлық некроз, гепатит, гепатоцеллюлярлық зақымданулар

• уытты эпидермальді некролиз, Стивенс-Джонсон синдромы, жедел жайылған экзантематозды пустулез, эксфолиативтік дерматит, ангионевроздық ісіну, беттің ісінуі, алопеция

• Белгісіз (қолда бар деректер негізінде бағалау мүмкін емес)

• Эозинофилиямен және жүйелі көріністермен жүретін дәрілік реакция (DRESS)

Жағымсыз дәрілік реакциялар туындаса медицина қызметкеріне, фармацевтика қызметкеріне немесе дәрілік препараттардың тиімсіздігі туралы хабарламаларды қоса, дәрілік препараттарға жағымсыз реакциялар (әсерлер) бойынша ақпараттық деректер базасына тікелей хабарласыңыз

Қазақстан Республикасы Денсаулық сақтау министрлігі Медициналық және фармацевтикалық бақылау комитеті «Дәрілік заттар мен медициналық бұйымдарды сараптау ұлттық орталығы» ШЖҚ РМК

http://www.ndda.kz

Қосымша мәліметтер

Дәрілік препараттың құрамы

Бір капсуланың құрамында

белсенді зат – флуконазол 150 мг

қосымша заттар: лактоза моногидраты, жүгері крахмалы, сусыз коллоидты кремнийдің қостотығы, магний стеараты, натрий лаурилсульфаты, титанның қостотығы (Е 171), эритрозин (FD&c Red № 3), тартразин (FD&C Yellow № 5), индигокармин (FD&C Blue № 2), желатин.

Сыртқы түрінің, иісінің, дәмінің сипаттамасы

Корпусы мен қақпақшасы қызыл түсті, ұзындығы 18.8 мм-ден 19.6 мм-ге дейін қатты желатинді капсулалар. Капсула ішіндегісі – ақ түсті ұнтақ.

Шығарылу түрі және қаптамасы

1 капсуладан поливинилхлоридті үлбірден және алюминий фольгадан жасалған пішінді ұяшықты қаптамаға салады.

1 немесе 2 пішінді қаптамадан медициналық қолдану жөніндегі қазақ және орыс тілдеріндегі нұсқаулықпен бірге картон қорапшаға салынған.

5 жыл

Жарамдылық мерзімі өткеннен кейін қолдануға болмайды.

Түпнұсқалық қаптамасында, 25 ºС-ден аспайтын температурада сақтау керек.

Балалардың қолы жетпейтін жерде сақтау керек!

рецепт арқылы

Өндіруші туралы мәлімет

Биофарма Илач Сан. ве Тидж. А.Ш., Түркия

Akpinar Mah. Osmangazi Cad. No: 156

34885 Sancaktepe / Стамбул

Тел.: (0216) 398 10 63

Факс: (0216) 398 10 20

Тіркеу куәлігінің ұстаушысы

Биофарма Илач Сан. ве Тидж. А.Ш., Түркия

Akpinar Mah. Osmangazi Cad. No: 156

34885 Sancaktepe / Стамбул

Тел.: (0216) 398 10 63

Факс: (0216) 398 10 20

Қазақстан Республикасы аумағында тұтынушылардан дәрілік заттардың сапасына қатысты шағымдарды (ұсыныстарды) қабылдайтын және дәрілік заттың тіркеуден кейінгі қауіпсіздігін қадағалауға жауапты ұйымның атауы, мекенжайы және байланыс деректері (телефон, факс, электронды пошта)

«“Altes Pharm” (Алтес Фарм)» ЖШС

050000, Қазақстан Республикасы, Алматы қ., Төле би көшесі, «Амбассадор» БО, 83, 777 кеңсе

Тел: 8 (727) 292 27 08

электронды пошта: pvkz@altesgroup.com