Спирива®
Инструкция
-
русский
-
қазақша
Саудалық атауы
СПИРИВА
Халықаралық патенттелмеген атауы
Тиотропий бромиді
Дәрілік түрі
Ингаляцияға арналған 18 мкг ұнтағы бар капсулалар ХандиХалер ингаляторымен жиынтықта
Құрамы
Бір капсуланың құрамында
белсенді зат – 22,5 мкг тиотропий бромидінің моногидраты (18 мкг тиотропийге баламалы)
қосымша заттар: лактоза моногидраты 200 М, лактоза моногидраты
капсула құрамы
қақпағы: индигокармин Е 132, титанның қостотығы Е 171, темірдің (III) сары тотығы Е 172, полиэтиленгликоль, желатин.
корпусы: индигокармин Е 132, титанның қостотығы Е 171, темірдің (III) сары тотығы Е 172, полиэтиленгликоль, желатин.
қара сия Опакод S-1-8152 HV (No. 10.12): көпіршітпейтін D 1510, өндірістік метилденген спирт, 74 ОР, темірдің (II,III) қара тотығы Е172, бутанол, шеллак, соя лецитині,
қара сия Текпринт SW-9008 HV (No. 10.14): аммоний гидроксиді, этил спирті, темірдің (II,III) қара тотығы Е172, 2-пропанол, бутанол, калий гликолі, пропиленгликоль, шеллак, тазартылған су.
Сипаттамасы
Компания таңбасы және «ТI 01» жазуы қара сиямен түсірілген, ұзындығы 15.6-дан 16.2 мм дейін, қақпақша диаметрі 5.7-ден 5.9 мм дейін, мөлдір емес, ашық жасылдау-көгілдір түсті корпусы мен қақпақшасы бар қатты желатин капсулалар, өлшемі №3.
Капсуланың ішінде – иіссіз ақ ұнтақ.
Фармакотерапиялық тобы
Тыныс алу жолдарының обструкциялық ауруларын емдеуге арналған басқа да ингаляциялық препараттар. Холиноблокаторлар. Тиотропий бромиді.
ATХ коды R03BB04
Фармакологиялық қасиеттері
Фармакокинетикасы
Тиотропий – суда орташа еритін хиральді емес төрттік аммоний қосылысы.
Сіңуі. Ингаляциялық енгізу тәсілінде тиотропий абсолютті биожетімділігі 19.5% құрайды, бұл препараттың өкпеге жететін фракциясының жоғары биожетімділігін айғақтайды. Ішу арқылы қолданылатын тиотропий ерітіндісінің абсолютті биожетімділігі 2-3% құрайды. Осыған орай тиотропий асқазан-ішек жолынан нашар сіңеді. Сол себепті ас ішу тиотропий сіңірілуіне ықпал етпейді.
Қан плазмасында тиотропий ең жоғары концентрациясына ингаляциядан кейін 5-7 минуттан соң жетеді. Өкпенің созылмалы обструкциялық ауруы (ӨСОА) бар пациенттерде тұрақты жағдайда қан плазмасындағы тиотропийдің жоғары шектегі концентрациясы 12.9 пг/мл құрап, тез төмендеген. Оның кезекті дозасын қабылдаудың тура алдында тиотропий концентрациясы 1.71 пг/мл жетті.
Таралуы. Препараттың қабылданған дозасынан 72 % плазма ақуыздарымен байланысады және таралу көлемі 32 л/кг құрайды. Өкпеде жергілікті концентрациясы белгісіз, бірақ қолдану тәсілін ескергенде өкпедегі аса жоғары концентрациясы жорамалданады. Тиотропий қандай да бір елеулі көлемде гематоэнцефалдық бөгет арқылы өтпейді.
Биотрансформация. Биотрансформация дәрежесі болымсыз. Өзгермеген заттан 74% несеппен бөлінеді. Тиотропий мускариндік рецепторлармен байланыспайтын N-метилскопин спирті мен дитиенилгликол қышқылына дейін ферменттік емес тәсілмен ыдырайды.
Препарат Р450 цитохромымен метаболизденеді, бұл үдеріс оксидацияға және одан кейінгі әртүрлі метаболиттер түзілетін глютатионмен конъюгацияға байланысты. Метаболизм бұзылуы СҮР450 2D6 және 3А4 тежегіштерін (хинидин, кетоконазол және гестоден) пайдалану кезінде орын алуы мүмкін. Осылайша, СҮР450 2D6 және 3А4 препарат метаболизміне қосылады. Тиотропий тіпті ең жоғары емдік концентрацияларында да адамның бауыр микросомаларында Р450, 1А1, 1А2, 2В6, 2С9, 2С19, 2D6, 2Е1 немесе 3А цитохромдарын тежемейді.
Шығарылуы. Тиотропий жартылай ыдырауының тиімді кезеңі дені сау адамдарда және ӨСОА бар пациенттерде 27-45 сағат аралығында ауытқиды. Дені сау жас еріктілерге тиотропий көктамыр ішіне енгізілген соң жалпы клиренс 880 мл/мин құрады. Көктамыр ішіне енгізілген тиотропий негізінен өзгермеген күйде несеппен шығарылады (74%). ӨСОА бар пациенттерде тұрақты жағдайда құрғақ ұнтақ ингаляциясынан кейін тиотропий 7% несеппен 24 сағат ішінде шығарылады. Әдетте, ішекте сіңірілмеген препарат түрінде болатын қалдық нәжіспен шығарылады.
ӨСОА бар пациенттер күнделікті ингаляциядан кейін фармакокинетикалық тепе-теңдікке 7-ші күні жетеді, бұл орайда әріқарай жинақталуы байқалмайды.
Пациенттердің арнайы топтары
Егде жастағы науқастар
Егде жастағы пациенттерде тиотропий қолдану оның бүйректік клиренсінің төмендеуіне (65 жасқа толмаған ӨСОА бар пациенттерде 326 мл/минуттан 65 жастан асқан ӨСОА бар пациенттерде 271 мл/минутқа дейін) байланысты.
Бүйрек функциясы бұзылған пациенттер
Бүйрек жеткіліксіздігінің орташа дәрежесіндегі (креатинин клиренсі 50-80 мл/мин) ӨСОА бар пациенттерде тұрақты жағдайда тиотропийдің күнделікті бір реттік ингаляциясы, бүйрек функциясы қалыпты (КК > 80 мл/мин) пациенттермен салыстырғанда, AUC0-6,ss мәнінің артуына (1,8-30%) және Cmax,ss ұқсас мәніне әкеледі.
Бүйрек функциясының орташа немесе айқын дәрежедегі төмендеуімен (КК < 50 мл/мин) ӨСОА бар науқастарда тиотропий көктамыр ішіне енгізілген соң, бүйрек функциясы қалыпты ӨСОА бар пациенттерге қатысты Cmax мәнімен салыстырғанда, оның қан плазмасындағы концентрациясының екі еселенуі (AUC0-4 82% артуы) және 52% ұлғаюы байқалады.
Бауыр функциясы бұзылған пациенттер
Бауыр жеткіліксіздігі тиотропий фармакокинетикасына елеулі ықпалын тигізбейді деп болжанады, өйткені тиотропий негізінен несеппен шығарылады және фармакологиялық белсенді емес метаболиттер түзілуі энзим үдерісімен байланысты емес.
Фармакодинамикасы
СПИРИВА – клиникалық тәжірибеде антихолинергиялық дәрі болып жиі аталатын әсер етуі ұзақ антимускариндік препарат. Оның мускариндік рецепторлардың М1-ден М5 дейінгі әртүрлі қосалқы түрлерімен тектестігі бірдей. Тыныс жолдарында М3-рецепторлардың тежелу нәтижесі тегіс бұлшықеттер босаңсуы болып табылады. Бронх кеңейтетін әсері дозаға байланысты және кем дегенде 24 сағат сақталады. Әсерінің едәуір ұзаққа созылуы, ипратропиуммен салыстырғанда, М3-рецепторлардан өте баяу диссоциациялануымен байланысты. Тиотропий N-төрттік антихолинергиялық дәрі ретінде ингаляциялық тәсілмен енгізілгенде жергілікті таңдамалы әсер көрсетеді, бұл орайда емдік дозаларда жүйелі антихолинергиялық жағымсыз әсерлер тудырмайды. М2-рецепторлардан диссоциациялануы М3-тен тезірек жүреді. Рецепторларға жоғары тектестігі және баяу диссоциациясы өкпенің созылмалы обструкциялық ауруына шалдыққан пациенттерде айқын және ұзаққа созылатын бронх кеңейту әсерін кепілдейді.
Тиотропий ингаляциясынан кейінгі бронходилятация жүйелік әсердің емес, жергілікті әсер салдарынан болады.
СПИРИВА бір реттік дозасын қабылдаудан кейін 30 минут өткен соң өкпе функциясын (қарқынды дем шығарудың 1 секундтық көлемін (ҚДШ1), өкпенің тіршілік сыйымдылығын (ӨТС) 24 сағат бойы арттырады. Фармакодинамикалық тепе-теңдікке алғашқы апта ішінде жеткен, ал айқын бронх кеңейту әсері 3-ші күні байқалды.
Ұзақ уақыт СПИРИВА қабылдау қолданудың бүкіл кезеңі бойына қол жеткізілген ҚДШ1 жақсару көрсеткіштерін сақтайды, алайда ҚДШ1 төмендеуінің жылдық орташа жиілігін өзгертпейді.
СПИРИВА науқастар өлшейтін таңертеңгі және кешкі дем шығару легінің жоғары шекті жылдамдығын арттырады.
СПИРИВА бронх кеңейту әсерінің жыл бойғы бағалануында төзімділік көріністері анықталмаған.
СПИРИВА ӨСОА өршу санын азайтады және плацебомен салыстырғанда және сальметеролмен салыстырғанда алғашқы өршу сәтіне дейінгі кезеңді ұзартады.
СПИРИВА өмір сапасын арттырады. Бұл жақсару емдеудің бүкіл кезеңі бойына байқалады.
СПИРИВА ӨСОА өршуіне байланысты ауруханаға жатқызу жағдайларының санын азайтатыны және ауруханаға алғаш жатқызу сәтіне дейінгі уақытты ұзартатыны көрсетілген.
СПИРИВА емі кезінде өлім қаупінің 16% төмендеуі байқалады. Тиотропий қолдану тыныс алу жеткіліксіздігінің даму қаупін 19% төмендетеді.
Кардиоэлектрофизиология
Дені сау 54 еріктінің қатысуымен QT аралығын арнайы зерттеу барысында
12 күн бойы 18 мкг және 54 мкг СПИРИВА (яғни үш реттік емдік дозасы) қолдану электрокардиограммада QT аралықтарын ұзартпаған.
Қолданылуы
ӨСОА (өкпенің созылмалы обструкциялық ауруы) бар пациенттердегі симптомдарды жеңілдетуге арналған демеуші емде
Қолдану тәсілі және дозалары
Препарат ХандиХалер жеткізу құрылғысымен ингаляция жасауға ғана арналған.
Тиотропий бромидінің ұсынылған дозасы тәулігіне бір рет белгілі бір уақытта ХандиХалер жеткізу құрылғысын қолданумен бір капсуланың ішіндегі бір ингаляцияны құрайды.
Ұсынылатын дозасынан асыруға болмайды.
Препараты бар капсуланы ішу арқылы қабылдауға, сумен ішуге болмайды!
Пациенттердің арнайы топтары
Егде жастағы пациенттер СПИРИВА препаратын ұсынылатын дозаларда пайдалана алады.
Бүйрек функциясы бұзылған пациенттердің ұсынылатын дозаларда СПИРИВА пайдалануына болады. Бүйрек жеткіліксіздігі орташадан ауыр дәрежеге дейінгі пациенттерде (креатинин клиренсі ≤50 мл/мин) бүйрек функциясы бұзылуының төмендеуімен қан плазмасында концентрация ұлғаятындықтан, тиотропий бромидін күтілетін пайдасы ықтималды қаупінен асып түсетін жағдайда ғана қолдануға болады. Бүйрек жеткіліксіздігінің ауыр дәрежесіндегі пациенттерде ұзақ уақыт қолдану тәжірибесі жоқ.
Бауыр функциясы бұзылған пациенттер ұсынылатын дозаларында СПИРИВА қолдана алады.
Жаңа туған нәрестелер мен балаларда СПИРИВА қолдану жөнінде деректер жоқ, осы жас тобында препаратты қолдану ұсынылмайды.
СПИРИВА препаратын қолдану жөніндегі нұсқаулар
Бұл нұсқаулықты оқып шығып, оны мұқият қадағалауды өтінеміз.
Пішінді қаптаманы ашу
-
Пішінді қаптама жолағын бір-бірінен тесілген сызық бойымен ажыратыңыз.
-
Пішінді қаптама жолағын бір капсула ғана толық көрінетіндей етіп, тура пайдаланар алдында ашыңыз. Егер екінші капсула абайсызда ашылып қалған жағдайда (ауаның әсері болса), оны тастау керек.