Солкосерил (Гель глазной)
Инструкция
-
русский
-
қазақша
Саудалық атауы
Солкосерил
Халықаралық патенттелмеген атауы
Жоқ
Дәрілік түрі
Көзге арналған гель, 5 г
Құрамы
1 г гельдің құрамында
белсенді зат – (Воs Tаurus) жаңа туылған бұзаулардың қанынан депротеинделген гемодериват, химиялық және биологиялық стандартталған, 8,3 мг,
қосымша заттар: бензалконий хлориді, натрий карбоксиметилцеллюлозасы, натрий эдетат дигидраты, 70% сорбитол, инъекцияға арналған су, натрий гидроксиді ерітіндісі 27 % (рН түзету үшін).
Сипаттамасы
Түссізден сәл сарғыш түске дейінгі сәл бозаңданатын аққыш гель, іс жүзінде иісі жоқ
Фармакотерапиялық тобы
Көз ауруларын емдеуге арналған препараттар
Көз ауруларын емдеуге арналған басқа да препараттар
АТХ коды S01XA
Фармакологиялық қасиеттері
Фармакокинетикасы
Басқа да биологиялық стандартталған препараттар сияқты Солкосерил көзге арналған гель препараты - депротеинделген гемодериваттың белсенді компонентінің сіңірілуі, таралуы және элиминациясы әдеттегі фармакокинетикалық әдістермен зерттеле алмайды. Бұдан бөлек, жаңа туылған бұзаулардың қанындағы депротеинделген гемодериват құрамында қалыптыда организмде болатын қан жасушалары мен сарысуының төмен молекулярлы компоненттері болады.
Фармакодинамикасы
Солкосерил көзге арналған гелі препаратының белсенді компоненті диализ және ультрасүзу (номинальді өлшемі 5000 Да) арқылы (Воs tаurus) жаңа туылған бұзаулардың қанынан алынған химиялық және биологиялық стандартталған депротеинделген гемодериват болып табылады. Солкосерил құрамында жаңа туылған бұзаулардың қан сарысуынан және жасушасынан алынған төмен молекулярлы компоненттердің көп мөлшері: электролиттер, амин қышқылдары, нуклеотидтер, нуклеозидтер, олигопептидтер және көмірсу мен май алмасу аралық өнімдері бар. Препараттың клиникалық тиімділігі Солкосерилдің барлық компоненттерінің синергизміне негізделген.
Солкосерил:
- жасушалардағы жоғары энергетикалық фосфаттар тапшылығын толтыра отырып, аэробты метаболизм және тотықтырғыш фосфорлау үдерістерін демейді және қайта қалпына келтіреді, оттегінің утилизациясын жақсартады және гипоксияға бейім метаболизмдік әлсіреген жасушалар мен тіндердегі глюкоза тасымалдануын жылдамдатады
- зақымдалған және/немесе әлсіреген тіндердегі регенерация үдерістерін жылдамдатады
- қайтымды зақымдалған жасушалардағы екіншілік дегенерацияның және патологиялық өзгерістердің туындау қаупін төмендетеді және алдын алады
- коллаген синтезі үдерісін жылдамдатады және жасушалардағы пролиферация және миграция үдерістерін көтермелейді.
Солкосерил көзге арналған гелі тіндерді гипоксиядан және/немесе қоректік заттар тапшылығынан қорғайды, қайтымды зақымданған тіндердің қалыпты функциялануының қалпына келуіне ықпал етеді және бір уақытта жазылу сапасын жақсарта отырып, зақымданулардың жазылу үдерісін жылдамдатады. Солкосерил көзге арналған гелі мөлдір қабық пен конъюктива зақымдануларын емдеу үшін арнайы дайындалған дәрілік түрі болып табылады, себебі ол тіндердің регенерациясына ықпал етеді және тыртықтардың пайда болу қаупін төмендетеді. Препарат құрамында карбоксиметилцеллюлоза натрий тұзының болуымен негізделген өзінің гель тәрізді консистенциясының арқасында Солкосерил жақсы адгезивті қасиеттерге ие және мөлдір қабық пен конъюктиваның бірқалыпты және ұзақ уақытқа жабылуын қамтамасыз етеді, соның нәтижесінде белсенді зат зақымдалған тінге үздіксіз өтеді.
Қолданылуы
Кешенді емдеудегі адьювантті терапия:
- мөлдір қабықтың шығу тегі әртүрлі ойық жарасында
- мөлдір қабықтың зақымдалуы
- cілті немесе қышқылдардан болған мөлдір қабықтың күюі
- мөлдір қабық пен конъюктиваның дегенеративті өзгерістері
- буллезді кератитте
Қолдану тәсілі және дозалары
Ересектер мен 8 жастан асқан балаларға конъюнктивалық қапқа 1 тамшы көзге арналған гельден күніне 3-4 рет тамызу керек.
Жағымсыз әсерлері
- қысқа мерзімдік әлсіз күйдіру (бұл препаратты тоқтатуға себеп болып табылмайды)
- аллергиялық реакциялар, кейде қайталап пайдаланғанда
Қолдануға болмайтын жағдайлар
- препарат компоненттеріне жоғары сезімталдық
- 8 жасқа дейінгі балаларға
Дәрілермен өзара әрекеттесуі
Бірнеше офтальмологиялық препараттарды бір уақытта пайдаланғанда көзге арналған гельді басқа дәрілік затты қолданғаннан кейін 15 минуттан соң тамызу керек.
Солкосерил көзге арналған гелі препаратының табиғи метаболиттері Ацикловир немесе Идоксуридин сияқты жергілікті қолданылатын антинуклеозидтік виростатиктер тиімділігін төмендетуі мүмкін.
Айрықша нұсқаулар
Тамызған кезде түбектің ұшына қол тигізуге болмайды.
Препаратты пайдаланғаннан кейін бірден түбекті жабу керек.
Солкосерил көзге арналған гелі препаратымен емделген кезде гельдің жанаспалы линзалардың беткейіне жабысып қалуы салдарынан жанаспалы линзаларды тағуға болмайды.
Көз жұқпаланған жағдайда Солкосерил көзге арналған гелін бір ғана дәрілік зат ретінде қолдану ұсынылмайды.
Препараттың педиатрияда қолданылуы
8 жастан асқан балаларды емдеу үшін препаратты дәрігердің тағайындауымен қолдануға болады.
Жүктілік және лактация кезеңі
Жүктілік және лактация кезеңінде Солкосерил көзге арналған гелінің клиникалық зерттеулері жүргізілген жоқ. Егер күтілетін пайдасы ұрық пен бала үшін қауіптен асатын болса, препарат жүкті және бала емізетін әйелдерді емдеуге дәрігердің тағайындауымен қолданылуы мүмкін.
Дәрілік заттың көлік құралын немесе қауіптілігі зор механизмдерді басқару қабілетіне әсер ету ерекшеліктері
Көру арқылы қабылдау нақтылығының уақытша төмендеуіне байланысты көзге арналған гельді қолданғаннан кейінгі 20 минут бойы емделушілерге қауіптілігі зор қызмет түрлерімен (автокөлік жүргізу, механизмдермен жұмыс істеу және т.б.) айналысуды тоқтата тұру керек
Артық дозалануы
Анықталмаған
Шығарылу түрі және қаптамасы
5 г препараттан аппликаторы және бұрандалы қалпақшасы бар алюминий сықпаларға салынған.
1 сықпадан медициналық қолдану жөніндегі мемлекеттік және орыс тілдеріндегі нұсқаулықпен бірге картон қарапшаға салынған.
Сақтау шарттары
25 °С-ден аспайтын температурада сақтау керек.
Балалардың қолы жетпейтін жерде сақтау керек!
Сақтау мерзімі
3 жыл
Сықпаны ашқаннан кейін қолдану кезеңі – 25 °С-ден аспайтын температурада 4 апта.
Жарамдылық мерзімі өткеннен кейін қолдануға болмайды.
Дәріханалардан босатылу шарттары
Рецепт арқылы
Өндіруші
Легаси Фармасьютикалс Швейцария ГмбХ
Рюрбергштрассе 21, 4127 Бирсфельден, Швейцария
Тіркеу куәлігінің иесі
МЕДА Фарма ГмбХ, Австрия
Қазақстан Республикасы аумағында тұтынушылардан өнім сапасына қатысты шағымдарды қабылдайтын ұйымның мекенжайы
Қазақстан Республикасындағы «МЕДА Фармасьютикалз Швейцария ГмбХ» өкілдігі: Алматы қ., Достық даңғылы 97, 8 кеңсе, тел. 264-17-94, тел./факс 264-17-71
Электронды поштасы: info.safety@meda-cis.com