Ревекард

Ревекард

Алтеплаза

Вена ішіне инфузия үшін ерітінді дайындауға арналған лиофилизацияланған ұнтақ 50 мг, еріткішімен – инъекцияға арналған сумен жиынтықта

Лиофилизаты бар 1 құтының ішінде

белсенді зат – алтеплаза (rtPA) 50.0 мг,

қосымша заттар: аргинин, полисорбат 80, 2 М ортофосфор қышқылының ерітіндісі

Еріткіш – инъекцияға арналған су құтыларда 50 мл-ден.

Дайындалған 1 мл ерітіндінің құрамында 1.0 мг алтеплаза бар.

Ақтан сәл сарғыш реңді ақ түске дейінгі лиофилизат.

Қалпына келтірілген ерітінді  мөлдір немесе аздап бозаңданатын, түссіз немесе сәл сарғыш түсті ерітінді

Еріткіш  инъекцияға арналған су  мөлдір түссіз сұйықтық.

Қан және қан түзу ағзалары. Тромбозға қарсы  препараттар. Ферментті  препараттар. Алтеплаза.

АТХ коды В01АD02

Фармакокинетикасы

Алтеплаза қан ағымынан жылдам шығарылады және, ең алдымен, бауырда метаболизденеді (плазмалық клиренсі 550-680 мл/мин құрайды). Қан плазмасынан елеулі жартылай шығарылу кезеңі (T1/2α) 4-5 минут құрайды. Бұл 20 минут өткенде плазмада препараттың бастапқы мөлшерінің 10%-дан азы қалатынын білдіреді. Препараттың қалған мөлшері үшін T1/2β 40 минутқа жуық құрайтыны көрсетілген.

Фармакодинамикасы

Ревекард препаратының белсенді компоненті – алтеплаза плазминогеннің плазминге айналуын тікелей белсендіретін плазминогеннің тіндік рекомбинантты белсендіргіші – гликопротеин болып табылады. Вена ішіне енгізуден кейін алтеплаза айналым жүйесінде салыстырмалы түрде белсенді емес күйде қалады. Фибринмен байланысқанда ол белсендіріліп, плазминогеннің плазминге айналуын индукциялайды, бұл фибрин ұйындысының еруіне әкеледі.

Фибринге қатысты салыстырмалы спецификалығының салдарынан, алтеплазаны қолдану айналымдағы фибриногеннің, плазминогеннің және альфа-2-антиплазминнің деңгейінің орташа азаюына әкеледі, ол 24 сағатқа қарай, әдетте, 80%-дан астамға дейін жоғарылайды. Айналымдағы фибриноген деңгейінің айқын әрі ұзақ уақыт төмендеуі сирек жағдайларда ғана байқалған.

Алтеплаза жедел миокард инфарктісі кезінде (алғашқы 6-12 сағатта енгізген кезде) өлім санын азайтады, жедел ишемиялық инсультте (алғашқы 3-4.5 сағатта енгізген кезде) болжамды жақсартады және өкпе артериясының жедел тромбоэмболиясында емдік әсер көрсетеді.

• жедел миокард инфарктісінің тромболизистік емі:

• 90 минуттық (жеделдетілген) дозалау режимі: симптомдар дамуынан кейін емдеуді 6 сағат ішінде бастауға болатын пациенттер үшін;

• 3 сағаттық дозалау режимі: симптомдар дамуынан кейін емдеуді 6 және 12 сағат аралығында бастауға болатын пациенттер үшін; Ревекард препаратын қолдану жедел миокард инфарктісі бар пациенттерде 30 күн ішінде өліммен аяқталу санының қысқаруына әкеледі.

• тұрақсыз гемодинамикамен қатар жүретін өкпе артериясының жедел ауқымды эмболиясының тромболизистік емі. Бұл диагноз, мысалы, өкпе артериясының ангиографиясымен немесе инвазиялық емес әдістермен, мысалы, өкпе томографиясымен, мүмкіндігінше, жан-жақты расталуы тиіс.

• жедел ишемиялық инсульттің тромболизистік емі. Егер инсульт симптомдарының дамуынан кейін алғашқы 4,5 сағат ішінде басталған жағдайда және егер тиісті көріністеу әдістерінің, мысалы, мидың компьютерлік томографиясының (КТ) көмегімен бассүйек ішіне қан құйылуы (геморрагиялық инсульт) жоққа шығарылса ғана қолданылады. Жүргізілген емнің әсері уақытқа байланысты: емдеуді барынша ерте бастау оң нәтижелі аяқталу ықтималдығын арттырады.

Ревекард препаратын мынадай аурулардың симптомдары басталған уақыттан бастап мүмкіндігінше ертерек қолдану керек:

Миокард инфарктісі

а) симптомдар пайда болғаннан кейін емдеуді 6 сағат ішінде бастауға болатын, миокард инфарктісі бар пациенттер үшін 90 минуттық (жеделдетілген) дозалау режимі: 15 мг – вена ішіне сорғалатып, содан соң 50 мг – вена ішіне тамшылатып 30 минут бойы, ізінше 35 мг инфузиямен 60 минут бойы ең жоғарғы 100 мг дозаға жеткенше.

Дене салмағы 65 кг-ден аз пациенттерде жиынтық дозаны дене салмағын ескере отырып түзетеді: 15 мг - вена ішіне сорғалатып, содан соң 0,75 мг/кг (ең көбі 50 мг) вена ішіне тамшылатып 30 минут бойы, ізінше 0,5 мг/кг (ең көбі 35 мг) инфузиямен 60 минут бойы;

б) симптомдар дамуынан кейін емдеуді 6 және 12 сағат аралығында бастауға болатын пациенттер үшін 3 сағаттық дозалау режимі: 10 мг - вена ішіне сорғалатып, содан соң 50 мг - вена ішіне тамшылатып алғашқы сағат бойы, ізінше вена ішіне 10 мг инфузиямен 30 минут бойы, 3 сағаттың ішінде ең жоғарғы 100 мг дозаға жеткенше.

Дене салмағы 65 кг-ден аз пациенттерде жиынтық доза 1,5 мг/кг-ден аспауы тиіс. Жедел миокард инфарктісінде ұсынылатын Ревекард препаратының ең жоғары дозасы - 100 мг.

Қосымша ем:

SТ сегментінің көтерілуімен миокард инфарктісі бар пациенттерге, қолданыстағы халықаралық нұсқауларға сәйкес тромбозға қарсы қосымша ем қолданылады.

Өкпе артериясының тромбоэмболиясы

100 мг құрайтын жиынтық доза 2 сағат ішінде мынадай режимде енгізілуі тиіс:

10 мг вена ішіне сорғалатып 1-2 минут бойы, содан соң 90 мг вена ішіне тамшылатып 2 сағат бойы.

Дене салмағы 65 кг-ден аз пациенттерде жиынтық доза 1,5 мг/кг-ден аспауы тиіс.

Қосымша ем:

Ревекард препаратын қолданғаннан кейін, ішінара белсендірілген тромбопластин уақытының (ІБТУ) мәндері жоғарғы қалып шегінен екі еседен аз асып кеткен жағдайда гепаринді инфузиялық енгізу басталуы (немесе жалғастырылуы) тиіс. Гепарин дозасы ІБТУ 50-70 секунд аралығында болуын қамтамасыз етуі тиіс (мәндері бастапқыдан 1,5-2,5 есе асуы тиіс).

Ишемиялық инсульт (жедел кезең)

Емдеу нейроваскулярлы ауруларды емдеу тәжірибесі бар және арнайы оқытып-үйретілген дәрігердің бақылауымен ғана жүргізілуі тиіс. Ұсынылатын 0,9 мг/кг (ең жоғары 90 мг) доза жиынтық дозаның 10% шамасын құрайтын препарат дозасын бастапқы вена ішіне сорғалатып енгізуден кейін 60 минут бойы тамшылатып енгізіледі.

Ем симптомдар пайда болған соң 4,5 сағат ішінде, мүмкіндігінше ертерек басталуы тиіс. Емдік әсері емнің басталу уақытына байланысты, яғни, емдеу неғұрлым ерте басталса, оң нәтиженің ықтималдығы артады.

Қосымша ем:

Симптомдардың пайда болуынан кейінгі алғашқы 24 сағат ішінде гепаринмен және ацетилсалицил қышқылымен біріктіріп қолданылатын емнің жоғарыда көрсетілген режимінің қауіпсіздігі мен тиімділігі жеткіліксіз зерттелген. Осыған байланысты, Ревекард препаратымен ем басталған соң алғашқы 24 сағатта ацетилсалицил қышқылын қолданудан немесе гепаринді вена ішіне енгізуден аулақ болу керек. Егер басқа көрсетілімдер бойынша гепарин қолдану қажет болса (мысалы, терең веналар тромбозы профилактикасы үшін), оның дозасы күніне 10000 ХБ-дан аспауы тиіс, бұл орайда препарат тері астына енгізіледі.

Ерітіндіні дайындау

Инфузияға арналған ерітіндіні дайындау асептикалық жағдайларда жүргізілуі тиіс.

Құрамында 1,0 мг/мл алтеплаза бар инфузияға арналған ерітіндіні алу үшін лиофилизат бар құтының ішіндегісін (50 мг) қоса берілген еріткіштің (инъекцияға арналған су, 50 мл) толық көлемінде асептика ережелерін сақтай отырып ерітеді. Ұнтақ толық ерігенге дейін құтыны абайлап шайқайды және пайда болған көбіктің шөгуі үшін 5 минутқа жуық ұстайды. Ерітіндінің сыртқы көрінісін көзбен қарап бағалайды. Ол мөлдір, түссіз немесе сарғыш түсті болуы және құрамында көрінетін механикалық қосындылар болмауы тиіс. Дайындалған ерітіндіні дайындаған соң дереу пайдалану керек.

Егер инфузия әлдебір себептермен кейінге қалдырылса, дайындалған ерітіндіні, егер ерітіндіні дайындау асептикалық жағдайларда жүргізілсе, 2-ден 8°С дейінгі температурада – мұздатып-қатырусыз 24 сағаттан асырмай, 15-тен 25°С дейінгі температурада – 8 сағаттан асырмай сақтауға жол беріледі.

Дайындалған ерітіндіні инъекцияға арналған натрий хлоридінің стерильді 0,9% ерітіндісімен қосымша сұйылтуға болады, бұл орайда алтеплазаның ең аз мөлшері 0,2 мг/мл құрауы тиіс.

Назар аударыңыз! Препараттың дайындалған ерітіндісін инъекцияға арналған сумен немесе инфузияға арналған көмірсулар негізіндегі, мысалы, декстроза ерітінділерімен сұйылтуға, сондай-ақ басқа дәрілік заттармен (оның ішінде, гепаринмен) инфузияға арналған құтыда да, вена ішіне енгізуге арналған жалпы жүйеде де араластыруға болмайды.

Дайындалған ерітінді бір рет қолдануға ғана арналған. Пайдаланылмаған ерітіндіні немесе қалдықтарды жергілікті талаптарға сәйкес утилизациялау керек.

Ем кезінде пайда болуы мүмкін жағымсыз реакциялар жиілігі мынадай градация түрінде берілген: өте жиі (>1/10); жиі (>1/100, <1/10); жиі емес (>1/1 000, <1/100); сирек (>1/10 000, <1/1 000); өте сирек (<1/10 000); жиілігі белгісіз (қолда бар деректер негізінде бағалау мүмкін емес).

Ревекард препаратын қолданумен байланысты ең жиі жағымсыз реакция гематокриттің және/немесе гемоглобиннің төмендеуіне әкелетін қан кетулер (>1/100, <1/10: ауқымды қан кетулер; >1/10: кез келген қан кетулер) болып табылады.

Қан құйылу дененің кез келген бөлігінде немесе қуысында жүзеге асуы және өмірге қауіп төндіретін жағдайға, еңбекке уақытша жарамсыздыққа немесе өлімге әкеліп соғуы мүмкін. Алтеплазаны қолдану кезінде жүйелер мен ағзалар тарапынан болатын бұзылулардың көпшілігі қан кетулердің көрінісі немесе салдары болып табылады.

Бассүйекішілік қан құйылулардан (инсульт кезіндегі жағымсыз әсер ретінде) және реперфузиялық аритмиялардан (миокард инфарктісі кезіндегі жағымсыз әсер ретінде) тыс, өкпе артериясы эмболиясы және жедел ишемиялық инсульт немесе миокард инфарктісі кезінде оны қолданған жағдайда алтеплазаның жағымсыз әсерлер спектрінде сапалық және сандық айырмашылықтарды жорамалдауға клиникалық негіздер жоқ.

Қан және лимфа жүйесі тарапынан бұзылулар:

Жиі емес: анемия.

Туа біткен, тұқым қуалайтын немесе генетикалық бұзылулар:

Жиі емес: артерия-веналық мальформацияның жарылуы ми гематомасымен.

Көру ағзасы тарапынан бұзылулар:

Сирек: көз алмасына қан құйылу.

Есту ағзасы тарапынан бұзылулар:

Жиі емес: есту ағзасына геморрагиялар.

Асқазан-ішек жолы тарапынан бұзылулар:

Жиі: асқазан-ішектік қан кетулер (асқазаннан қан кету, асқазанның ойық жарасынан, тік ішектен қан кету, қан аралас құсу, мелена (қара май тәрізді нәжіс), ауыз қуысынан қан кету, қызыл иектерден қан кету сияқтылар).

Жиі емес: өңештің кеуде бөлігіндегі ойық жарадан қан кету, құсу.

Сирек: ішперде артындағы қан кету (мысалы, ішперде артындағы гематома), жүрек айну.

Жүрек айну және құсу миокард инфарктісінің симптомдары болуы да мүмкін.

Жалпы бұзылыстар және енгізген жердегі бұзылулар:

Жиі: пункция орнынан немесе инъекция орнынан қан кетулер (мысалы, катетер қойылған жердегі гематома, катетер қойылған жерден қан кету).

Жиі емес: жалпы әлсіздік, төс астының шаншып ауыруы.

Иммундық жүйе тарапынан бұзылулар:

Жиі емес: аллергиялық дерматит.

Сирек: аса жоғары сезімталдық реакциялары / анафилактоидтық реакциялар: аллергиялық реакциялар, бөртпені, есекжемді қоса, бронх түйілуі, ангионевроздық ісіну, гипотензия, шок немесе кез келген басқа аллергиялық реакциялар.

Өте сирек: күрделі анафилаксиялар.

Сирек жағдайларда алтеплазаға антиденелердің (төмен титрлерде) транзиторлы түзілуі байқалған, бірақ бұл феноменнің клиникалық маңыздылығы анықталмаған.

Осы реакциялар дамыған жағдайда жалпыға мәлім аллергияға қарсы ем қолданылуы тиіс. Осындай реакциялары бар пациенттердің салыстырмалы түрде басым бөлігінде ангиотензин өзгертуші ферменттің тежегіштері бір мезгілде қолданылғаны анықталды. Алтеплазаны қолдану кезіндегі анафилаксиялық реакциялар (осы ұғымның қатаң түрдегі мағынасында, яғни, IgЕ байланысты) белгісіз.

Жүйке жүйесі тарапынан бұзылулар:

Өте сирек: көбінесе қатарлас ишемиялық немесе геморрагиялық цереброваскулярлы бұзылумен біріккен жүйке жүйесінің бұзылуымен байланысты жай-күйлер (эпилепсия ұстамасы, құрысу, афазия, сөйлеудің бұзылуы, делирий, жедел ми синдромы, қозу, сананың шатасуы, депрессия, психоз).

Дәрілік затты қолданумен байланысты емшаралар салдарынан болатын зақымданулар, уытты құбылыстар және асқынулар

Белгісіз: сәйкес ағзалардың зақымдануына әкелуі мүмкін май эмболиясы (холестерин кристалдарымен эмболизация).

Хирургиялық және медициналық емшаралар:

Белгісіз: трансфузиялардың қажеттілігі.

Зертханалық және аспаптық деректер:

Жиі: АСТ белсенділігінің жоғарылауы.

Жиі емес: АЛТ белсенділігінің жоғарылауы, тромбоцитопения.

Белгісіз: дене температурасының жоғарылауы.

Бүйрек және несеп шығару жолдары тарапынан бұзылулар:

Жиі: урогенитальді қан кетулер (гематурия, несеп-жыныс жолынан қан кетулер сияқты).

Тыныс алу жүйесі, кеуде қуысы және көкірек ортасы ағзалары тарапынан бұзылулар:

Жиі емес: тыныс жолдарынан қан кетулер (жұтқыншақ аймағынан қан кетулер, қан түкіру, мұрыннан қан кету), гемоторакс, диспноэ.

Тері және теріасты тіндері тарапынан бұзылулар:

Жиі: экхимоздар.

Тамырлар тарапынан бұзылулар:

Өте жиі: зақымданған қантамырлардан қан кету (гематомалар, бірлі-жарым немесе әр жерде орналасқан көптеген гематомалар).

Жиі емес: артериялық гипотензия.

Сирек: перикардиальді қан кету, эмболиялар, олар әсер еткен ішкі ағзалар тарапынан сәйкес салдарлармен қатар жүруі мүмкін, паренхиматозды ағзаларға қан кетулер (мысалы, бауырдан қан кетулер).

Миокард инфарктісінде қолдану

Жүрек тарапынан бұзылулар:

Өте жиі: қайталанған ишемия/стенокардия, гипотензия, жүрек жеткіліксіздігі / өкпенің ісінуі.

Жиі: кардиогенді шок, жүрек қызметінің тоқтауы, қайталанған инфаркт.

Жиі емес: реперфузиялық аритмиялар (аритмия, экстрасистолия, жүрекшелер фибрилляциясы, брадикардия, пароксизмалық қарыншалық тахикардия, қарыншалық аритмия, қарыншалар фибрилляциясы, қарыншалық тахикардия), I дәрежеден толық блокадасына дейін атриовентрикулярлы блокада, электромеханикалық диссоциация [EMD], Гис шоғырының оң жақ тармақшасының блокадасы, Гис шоғырының сол жақ тармақшасының артқы бұтағының блокадасы, инфарктен кейінгі ерте стенокардия, жүректің созылмалы жеткіліксіздігі ағымының нашарлауы, митральді жеткіліксіздік, өкпе артериясының тромбоэмболиясы, басқа да жүйелі эмболиялар/церебральді эмболия, қарыншааралық қалқа ақауы.

Реперфузиялық аритмиялар жүректің тоқтауына әкелуі, өмірге қауіп төндіруі және жалпыға мәлім аритмияға қарсы ем қолдануды қажет етуі мүмкін.

Миокард инфарктісінде және өкпе артериясының эмболиясында қолдану

Жүйке жүйесі тарапынан бұзылулар:

Жиі: бассүйекішілік қан құйылулар (миға қан құйылу, церебральді гематома, геморрагиялық инсульт, геморрагиялық инсульт трансформациясы, бассүйекішілік гематома, субарахноидальді қан құйылу сияқтылар).

Ишемиялық инсультте қолдану (жедел кезеңі)

Жүйке жүйесі тарапынан бұзылулар:

Өте жиі: негізгі жағымсыз құбылыс симптоматикалық айқын бассүйекішілік қан құйылулар болды (олардың жиілігі 10%-ға жетті). Асқынулардың немесе жалпы өлімге ұшырау жиілігінің артуы анықталмаған.

Ревекардты әсер етуші затқа (алтеплазаға) немесе препараттың қосымша заттарының кез келгеніне белгілі аса жоғары сезімталдықта қолдануға болмайды.

Ревекард қан кетудің жоғары даму қаупі болатын жағдайларда қолданылмайды:

Препаратты жедел миокард инфарктісін және өкпе артериясы эмболиясын, жедел ишемиялық инсультті емдеуге қолданған жағдайда мынадай қарсы көрсетілімдер бар:

- қазіргі уақыттағы немесе алдыңғы 6 ай ішіндегі ауқымды қан кету, геморрагиялық диатез;

- ішуге арналған антикоагулянттармен, мысалы, варфаринмен бір мезгілдегі тиімді емдеу (халықаралық қалыптасқан қатынас >1,3);

- анамнездегі орталық жүйке жүйесінің аурулары (соның ішінде ми немесе жұлындағы жаңа түзілімдер, аневризма, хирургиялық араласу);

- қазіргі уақыттағы немесе анамнездегі бассүйекішілік (соның ішінде субарахноидальді) қан құйылу, геморрагиялық инсульттің болуына күдіктену;

- бақыланбайтын ауыр артериялық гипертензия;

- алдыңғы 3 ай ішіндегі ауқымды хирургиялық араласу немесе елеулі жарақаттану, таяуда болған бассүйек-ми жарақаты;

- ұзаққа созылған немесе жарақаттық жүрек-өкпе реанимациясы (> 2 мин), алдыңғы 10 күн ішіндегі босану; қысылмайтын қан тамырына (мысалы, бұғанаастылық немесе бұғаналық венаға) таяуда жасалған пункция;

- бауырдың ауыр аурулары, соның ішінде бауыр жеткіліксіздігі, цирроз, портальді гипертензия (соның ішінде өңеш веналарының варикозды кеңеюі) және белсенді гепатит;

- бактериялық эндокардит, перикардит;

- жедел панкреатит;

- соңғы 3 ай ішінде расталған асқазанның немесе он екі елі ішектің ойық жара ауруы;

- артериялық аневризмалар, артериялардың немесе веналардың даму ақаулары;

- қан кетудің жоғары даму қаупімен жаңа түзілім.

Препаратты жедел миокард инфарктісін және өкпе артериясы эмболиясын емдеуге қолданған жағдайда, жоғарыда аталғандардан тыс, мынадай қарсы көрсетілімдер бар:

- геморрагиялық инсульт немесе анамнездегі шығу тегі белгісіз инсульт;

- соңғы 6 ай ішіндегі ишемиялық инсульт немесе транзиторлы ишемиялық шабуыл, 4,5 сағат ішінде болатын ағымдағы жедел ишемиялық инсультті қоспағанда.

Препаратты жедел ишемиялық инсультті емдеуге қолданған жағдайда, жоғарыда аталғандардан тыс, мынадай қарсы көрсетілімдер бар:

- мидың КТ деректері бойынша бассүйекішілік қан құйылу белгілері және мидың КТ қалыпты болғандағы қан бассүйекішілік құйылудың клиникалық симптомдары;

- инфузияның басталуынан 4,5 сағаттан астам уақыт бұрын ишемиялық инсульт симптомдарының пайда болуы немесе симптомдардың басталу мерзімі жөнінде нақты мәліметтердің болмауы;

- жедел ишемиялық инсульт кезіндегі жай-күйдің жылдам жақсаруы немесе инфузияның басталу қарсаңында симптомдардың әлсіз білінуі;

- ауыр өтетін инсульт (клиникалық деректер негізіндегі, мысалы, егер NIHSS (National Institutes of Health Stroke Scale) көрсеткіші > 25 болса немесе тиісті визуализация әдістерінің – компьютерлік томографияның немесе магнитті-резонанстық томографияның нәтижелері бойынша);

- инсульт басталған кездегі құрысулар;

- алдыңғы 3 ай ішінде бастан өткерген инсульт немесе бастың күрделі жарақаты жөніндегі мәліметтер;

- қант диабеті бар пациенттерде анамнезінде кез келген этиологиялы инсульттің болуы;

- инсульттің басталуына дейін 48 сағат ішінде гепарин қолдану, егер осы сәтте ішінара белсендірілген тромбопластин уақыты (ІБТУ) ұзарған болса;

- 100 000/мкл-ден аз тромбоциттер саны;

- 185 мм сын. бағ. жоғары систолалық артериялық қысым немесе 110 мм сын. бағ. жоғары диастолалық артериялық қысым немесе артериялық қысымды осы шектерге дейін төмендетуге арналған қарқынды ем (препараттарды вена ішіне енгізу) қолдану қажеттілігі.

- қандағы глюкоза мөлшерінің <2,77 немесе >22,20 ммоль/л болуы.

Ревекард препараты балаларда және 18 жасқа дейінгі жасөспірімдерде және 80 жастан асқан пациенттерде жедел инсультті емдеуге қолданылмайды.

Жедел миокард инфарктісінде әдетте қолданылатын басқа дәрілік препараттармен алтеплазаның өзара әрекеттесуіне арнайы зерттеу жүргізілмеген.

Қан ұюына ықпал ететін немесе тромбоциттер функциясын өзгертетін кумарин туындылары, ішуге арналған антикоагулянттар, тромбоциттер агрегациясының тежегіштері, фракцияланбаған гепарин немесе төмен молекулалық гепарин сияқты дәрілік заттарды қолдану (алтеплазамен емнің басталуына дейін, ем кезінде немесе одан кейін алғашқы 24 сағат ішінде) қан кету қаупін арттыруы мүмкін.

АӨФ тежегіштерін бір мезгілде қолдану анафилактоидтық реакциялар қаупін арттыруы мүмкін.

Бір мезгілде IIb/IIIa гликопротеин антагонистерін қолдану қан кету қаупін арттырады.

Ревекард препаратымен емдеуді тромболизистік ем жүргізу тәжірибесі және оның тиімділігін бақылау мүмкіндігі бар дәрігер жүргізуі тиіс. Ревекард препаратын қолданғанда, басқа да тромболизистік препараттар сияқты, стандартты реанимациялық құрал-жабдықты және тиісті дәрілік заттарды қол астында ұстау ұсынылады.

Аса жоғары сезімталдық

Алтеплазаның бір реттік инфузиясынан кейін адамның рекомбинантты тіндік плазминоген активаторына антиденелердің тұрақты түзілуі байқалған жоқ. Сирек жағдайларда (0,1%-дан аз) препаратқа антиденелердің (төмен титрлерде) транзиторлы түзілуі байқалды, бірақ бұл феноменнің клиникалық маңыздылығы анықталмаған.

Алтеплазаны қайталап қолданудың жүйеленген тәжірибесі жоқ. Алтеплазаны қолданумен байланысты анафилактоидты реакциялар сирек пайда болады және препараттың әсер етуші затына немесе қосымша заттарының кез келгеніне аса жоғары сезімталдықтан туындауы мүмкін. Анафилактоидтық реакция дамыған жағдайда инфузияны тоқтатып, тиісті ем тағайындау керек. АӨФ тежегіштерін бір мезгілде қабылдайтын пациенттер ерекше назар аударуды қажет етеді («Жағымсыз әсерлері» бөлімін қараңыз).

Қан кету

Алтеплазамен емнің ең жиі асқынуы қан кету болып табылады, оған гепаринді бір мезгілде қолдану себеп болуы мүмкін. Алтеплаза фибринді ерітетіндіктен, жақында пункция жасалған орындардан қан кетуі пайда болуы мүмкін. Сондықтан тромболизистік ем ықтимал қан кету аймақтарын (катетерді енгізу орындарын, артериялық немесе веналық пункцияларды, инъекцияларды немесе тіліктерді қоса) мұқият бақылауды қажет етеді. Ревекард препаратымен емдеу кезінде қатты катетерлерді, бұлшықет ішіне инъекцияларды және негізделмеген инвазиялық манипуляцияларды пайдаланудан аулақ болу керек.

Ауыр қан кету туындаған жағдайда, әсіресе, церебральді, фибринолизистік ем, сондай-ақ гепаринді қолдану дереу тоқтатылуы тиіс.

Жартылай шығарылу кезеңі қысқа және жүйелі ұю факторларына әсері тым аз болғандықтан, коагуляциялық орын басу емі қажет емес. Қан кету болған пациенттердің көпшілігінде жүргізіледі: тромболизистік және антикоагулянттық емді тоқтата тұру, айналымдағы қан көлемін қалпына келтіру және қан кетуді тоқтату шараларын қолдану.

Егер қан кету басталғанға дейін 4 сағат ішінде гепарин қолданылса, оны протамин сульфатымен алмастырудың мақсатқа сай болу мәселесін қарастыру керек.

Жоғарыда көрсетілген консервативтік шаралар тиімсіз болып, қан кету жалғасатын сирек жағдайларда қан препараттарын құю қолданылуы мүмкін. Криопреципитатты, жаңа мұздатып қатырылған плазманы және тромбоцитарлы массаны енгізуді әр енгізуден кейін қайта анықталған клиникалық және зертханалық көрсеткіштерге сәйкес тағайындауға болады. Криопреципитат инфузиясын 1 г/л фибриноген концентрациясына жеткенше жүргізген дұрыс. Фибринолизге қарсы дәрілер қолдану мүмкіндігін қарастыруға болады.

Бассүйекішілік қан құйылу қаупі егде жастағы пациенттерде артуы мүмкін. Егде жастағы пациенттерде пайда-қауіп арақатынасын мұқият бағалау қажет.

Басқа тромболитиктер пайдалану кезіндегідей, Ревекард препаратын тағайындау кезінде болжамды пайдасы мен қан кетудің ықтимал қаупінің дәрежесін мына жағдайларда мұқият бағалау керек:

• Таяуда жасалған бұлшықетішілік инъекция немесе биопсия, ірі тамырлар пункциясы, реанимация кезіндегі жүрекке массаж сияқты таяуда жасалған шағын араласулар.

• Қан кету қаупі жоғарылаған (қарсы көрсетілімдер тізімінде аталмаған) жағдайлар.

Ішу арқылы антикоагулянттық ем алатын пациенттер

Егер дозалау режимі немесе антикоагулянттарды соңғы қабылдаудан кейінгі уақыт қан ұю жүйесіне клиникалық мәнді әсерін тигізбейтін дәрілік заттардың антикоагулянттық белсенділігіне тиісті тестілер көмегімен антикоагулянттармен емдеудің қалдық тиімділігін растауға мүмкіндік бермесе (мысалы, К дәрумені антагонистері үшін ХҚҚ <1,3 немесе басқа ішуге арналған антикоагулянттарға арналған өзге де тиісті тестілер жоғарғы қалып шектерінде болса), Ревекард препаратын қолдануды қарастыруға болады.

Жедел миокард инфарктісін емдегенде қосымша келесі айрықша сақтандырулар және алдын ала сақтану шаралары ескерілу керек:

Аритмиялар

Коронарлы тромболизис реперфузиямен байланысты аритмияға әкелуі мүмкін. Реперфузиялық аритмиялар кейбір жағдайларда жүректің тоқтауына әкелуі, өмірге қауіп төндіруі және жалпыға мәлім аритмияға қарсы ем қолдануды қажет етуі мүмкін.

Тромбоэмболиялар

Тромболизистік дәрілерді қолдану жүректің сол жақ бөліктерінің тромбозы бар пациенттерде, мысалы, митральді стенозда немесе жүрекшелер фибрилляциясында тромбоэмболия қаупін арттыруы мүмкін.

Жедел миокард инфарктісін және өкпе артериясының жедел эмболиясын емдегенде қосымша келесі айрықша сақтандырулар және алдын ала сақтану шаралары ескерілу керек:

Бассүйекішілік қан құйылудың жоғары қаупіне байланысты 100 мг-ден асатын дозада Ревекард препаратын қолдануға болмайды. Сондықтан «Қолдану тәсілі және дозалары» бөлімінде баяндалған дозалау режимін қадағалау маңызды.

Систолалық артериялық қысым сын. бағ. > 160 мм болатын пациенттерде болжанатын пайдасы мен ықтимал қауіп дәрежесі мұқият бағалану керек

IIb/IIIa гликопротеин антагонистері

IIb/IIIa гликопротеин антагонистерін бір мезгілде қабылдау қан кетудің даму қаупін арттырады.

Жедел ишемиялық инсультті емдеуде келесі айрықша сақтандырулар және алдын ала сақтану шаралары қосымша ескерілу керек.

Емдеуді нейровизуализациялық зерттеулердің бүкіл кешенін жүргізу мүмкіндігі бар мамандандырылған бөлім жағдайында қарқынды неврологиялық көмек көрсету біліктері мен тәжірибесі бар дәрігер жүргізуі тиіс.

Жедел ишемиялық инсультте препаратты 90 мг-ден асатын дозада қолданбау керек, өйткені бассүйекішілік қан құйылу қаупі жоғарылайды.

Жедел ишемиялық инсульт бар пациенттерде Ревекард препаратын қолдану, осы препаратты басқа көрсетілімдер бойынша пайдаланумен салыстырғанда, жоғары бассүйекішілік қан құйылу қаупінің байқалуымен қатар жүреді, өйткені қан кету көбінесе некроздық аумақта жүреді. Бұл келесі жағдайларда ерекше ескерілу керек:

• «Қолдануға болмайтын жағдайлар» бөлімінде аталған барлық жай-күйлер және жалпы жоғары қан кету қаупімен сипатталатын барлық жағдайлар;

• церебральді тамырлардың аздаған симптомсыз аневризмаларының болуы;

• емдеудің инсульт симптомдарының даму уақытынан кеш басталуы клиникалық әсерін төмендетеді және, бұрын ем алған пациенттермен салыстырғанда, жоғары бассүйекішілік қан құйылу қаупімен және өліммен аяқталумен байланысты болуы мүмкін. Осылайша, Ревекард препаратын енгізуді кейінге қалдыруға болмайды;

• бұрын ацетилсалицил қышқылымен немесе басқа да антиагреганттық дәрілермен ем жүргізілген пациенттерде, әсіресе, егер Ревекард препаратын қолдану кешірек мерзімдерде басталса, миішілік қан құйылу қаупі жоғары болуы мүмкін.

Ревекард препаратын енгізу кезінде және ол аяқталған соң 24 сағат бойы артериялық қысымды (АҚ) бақылау қажет. Систолалық АҚ 180 мм сын. бағ. жоғары немесе диастолалық АҚ 105 мм  сын. бағ. жоғары көтерілгенде вена ішіне гипертензияға қарсы препараттар енгізу ұсынылады. Емдік әсері бұрын инсульт өткерген пациенттерде немесе бақыланбайтын қант диабеті болғанда төмендейді. Ондай пациенттерде пайда/қауіп арақатынасы, пайдасы қаупінен бәрібір жоғары да, қолайлылығы азырақ болып саналады.

Ауырлығы жеңіл дәрежедегі инсульті бар пациенттерде қауіп күтілетін пайдасынан асып кетеді, сондықтан Ревекард препаратын қолдану ұсынылмайды.

Инсульттің ауыр түрі бар пациенттерде бассүйекішілік қан құйылу және өліммен аяқталу қаупі жоғары, бұл жағдайларда Ревекард препаратын қолданбау керек.

Ауқымды ми инфарктілерін алған пациенттерде жайсыз аяқталу, соның ішінде миішілік айқын қан құйылу және өліммен аяқталу қаупі жоғары болады. Ондай жағдайларда ем жүргізу қаупі мен пайдасын мұқият таразылау керек.

Инсультте емдеу нәтижесінің қолайлы болу ықтималдығы жас ұлғаюымен, сондай-ақ инсульттің ауырлық дәрежесінің артуына қарай және қандағы глюкоза мөлшері жоғарылағанда азаяды.

Препаратты 80 жастан асқан пациенттерге, ауыр инсульт жағдайында (клиникалық деректер бойынша немесе визуализациялық зерттеулердің деректері бойынша) және қандағы глюкозасы мөлшерінің бастапқы мәндері <2,77 ммоль/л немесе >22,20 ммоль/л құрайтын жағдайларда қолдануға болмайды.

Басқа да айрықша нұсқаулар

Ишемиялық аумақ реперфузиясы инфаркт аймағында ми ісінуіне әкелуі мүмкін. Жоғары геморрагия қаупіне орай, антиагреганттарды алтеплаза препараты көмегімен тромболизис жүргізуден кейінгі алғашқы 24 сағат ішінде тағайындауға болмайды.

Педиатрияда қолдану

Балаларда Ревекард препаратын қолдану тәжірибесі жоқ.

Фертильділік

Клиникаға дейінгі зерттеулерде алтеплазаның фертильділікке қолайсыз ықпалы анықталмаған. Алтеплазаның фертильділікке ықпалы туралы клиникалық деректер жоқ.

Жүктілік және лактация кезеңі

Жүктілік кезеңінде алтеплазаны қолдану туралы деректер өте шектеулі.

Клиникаға дейінгі зерттеулерде алтеплаза адамда тағайындалуынан асып кететін дозаларда пайдаланылғанда препараттың фармакологиялық белсенділігіне қатысты екіншілік шарананың жетілмеуі және/немесе эмбриоуыттылық көрініс берді. Алтеплазаның тератогендік қасиеттері бар деп қарастырылмайды.

Өмірге тікелей қатер төндіретін ауруларда пайда мен әлеуетті қауіп арасындағы арақатынасты саралау қажет.

Алтеплазаның емшек сүтіне өту мәселесі зерттелмеген.

Осыған байланысты Ревекард препаратын жүктілікте және лактация кезеңінде қолдану ұсынылмайды.

Дәрілік заттың көлік құралын немесе қауіптілігі зор механизмдерді басқару қабілетіне ықпал ету ерекшеліктері

Қолданылмайды.

Симптомдары: алтеплазаның фибринге салыстырмалы спецификалығына қарамастан, артық дозалану фибриноген деңгейінің және қан ұюдың басқа факторларының клиникалық мәнді төмендеуіне әкелуі мүмкін.

Емі: көпшілік жағдайларда Ревекард препаратын енгізуді тоқтату және осы факторлардың физиологиялық қалпына келуін күту жеткілікті. Алайда, егер күрделі қан кету дамыса, жаңа мұздатып қатырылған плазманың немесе жаңа алынған қанның инфузиялары ұсынылады; қажет болса, фибринолизге қарсы синтетикалық дәрілер тағайындауға болады.

Шығарылу түрі және қаптамасы

Вена ішіне 50 мг инфузия үшін ерітінді дайындауға арналған лиофилизацияланған ұнтақ, еріткішімен – инъекцияға арналған сумен жиынтықта.

Препарат 50 мг-ден лиофильді резеңке тығындармен тығындалған алғашқы ашылуы бақыланатын алюминий-пластик (flip-off) қалпақшалармен қаусырылған I гидролитикалық кластағы шыны құтыларда.

Еріткіш (инъекцияға арналған су) 50 мл-ден резеңке тығындармен тығындалған алғашқы ашылуы бақыланатын алюминий-пластик (flip-off) қалпақшалармен қаусырылған I гидролитикалық кластағы шыны құтыларда.

Препараты бар әрбір құтыға және еріткіші бар құтыға өздігінен желімделетін заттаңбалар жапсырылады.

Препараты бар 1 құты және еріткіші бар 1 құты медициналық қолдану жөніндегі қазақ және орыс тілдеріндегі нұсқаулықпен бірге картон бөлгіші бар картон қорапшаға салынған. Қақпақтың және қорапша түбінің алдыңғы және артқы жақтарымен түйіскен жерлеріне алғашқы ашылуын бақылау үшін өздігінен желімделетін таңбаланбаған заттаңбалар жапсырылады.

25°С-ден аспайтын температурада, жарықтан қорғалған жерде сақтау керек.

Мұздатып қатыруға болмайды.

Балалардың қолы жетпейтін жерде сақтау керек.

Лиофилизатты – 2 жыл, еріткішті – 2 жыл 6 ай.

Жарамдылық мерзімі өткеннен кейін қолдануға болмайды.

Дәріханадан босатылу шарттары

Рецепт арқылы

Өндіруші

«Қарағанды фармацевтикалық кешені» ЖШС

Қазақстан Республикаcы

100009, Қарағанды қ., Ғазалиев к-сі, 16

Тел./факс: (7212) 908051, e-mail: kphk@kphk.kz, сайт: www.kphk.kz.

Тіркеу куәлігінің ұстаушысы

«Қарағанды фармацевтикалық кешені» ЖШС, Қазақстан Республикаcы

Қазақстан Республикасы аумағында тұтынушылардан дәрілік заттардың сапасына қатысты шағымдарды (ұсыныстарды) қабылдайтын және дәрілік заттың тіркеуден кейінгі қауіпсіздігін қадағалауға жауапты ұйымның атауы, мекенжайы және байланыс деректері

«Қарағанды фармацевтикалық кешені» ЖШС

Қазақстан Республикаcы

100009, Қарағанды қ., Ғазалиев к-сі, 16

Тел (7212)90-80-43, факс (7212)90-80-51, e-mail medinfo@kphk.kz

Сайт: www.kphk.kz