Промедол (2% по 1 мл, Здоровье народу Харьковское фармацевтическое предприятие ООО)

• русский
• қазақша

• Скачать инструкцию медикамента

ПРОМЕДОЛ

Саудалық атауы

Промедол

Хақықаралық патенттелмеген атауы

Тримеперидин

Дәрілік түрі

Инъекцияға арналған 2% ерітінді

Құрамы

1 мл ерітіндінің құрамында

белсенді зат - 20 мг тримеперидин,

қосымша зат - инъекцияға арналған су

Сипаттамасы

Мөлдір түссіз сұйықтық.

Фармакотерапиялық тобы

Аналгетиктер. Апиындар. Фенилпиперидин туындылары.

АТХ коды N02AB

Фармакологиялық қасиеттері

Фармакокинетикасы

Кез келген тәсілмен енгізгенде қанға тез сіңеді. Плазма ақуыздарымен байланысуы 40%-ға жетеді. Гидролиздену арқылы метаболизденіп, меперидин және нормеперидин қышқылдарын түзіп, әрі қарай конъюгацияланады. Өзгермеген күйінде аздаған мөлшері бүйрек арқылы шығарылады.

Фармакодинамикасы

Апиындық рецепторлардың синтетикалық агонисі. Ауруды басатын және орташа деңгейдегі шокқа қарсы, ұйықтатын және спазмолитикалық айқын қасиеттері бар, жатырдың жиырылу белсенділігін арттырады.

Әсер ету механизмі апиындық рецепторлардың мю-, дельта- және каппа-түрлерінің белсенділігінің стимуляциялануы арқылы жүзеге асады. Мю-рецепторларына ықпалы супраспинальді анальгезияны, эйфорияны және физикалық тәуелділікті туғызады, тынысты тарылтады, кезеген жүйкенің орталығын қоздырады. Каппа-рецепторлардың стимуляциялануы жұлындық анальгезияны, тыныштандырғыш әсерді, миозды тудырады.

Афферентті жолдың орталық бөлігінде нейронаралық ауыру импульсінің берілуін тежеп, ауыруға эмоционалдық тұрғыдан баға беруді нашарлатады. Физикалық тәуелділікті және дағдылануды туындатуы мүмкін.

Морфинмен салыстырғанда ауруды басатын әсері төмен және аз уақытқа созылады. Мұндайда тыныс орталығының қызметін аз тежейді, сондай-ақ кезеген жүйке орталығының және құсу орталығының қызметін аздап қоздырады, тегіс бұлшықеттердің түйілуін тудырмайды (миометрийден басқасында). Морфинге қарағанда промедолдың жағымдылығы жақсы.

Тері астына және бұлшықет ішіне енгізгенде әсері 10-20 минуттан кейін басталып, 3-4 сағатқа және одан да астам уақытқа созылады.

Қолданылуы

• наркоз кезінде шокқа қарсы дәрі ретінде

• нейролептаналгезия үшін (нейролептиктермен біріктіріп)

• қатерлі жаңа түзілімдердегі, күйіктердегі, жарақаттардағы айқын ауыру синдромында

• операцияға дайындықта (премедикация)

• операциядан кейінгі кезеңде

• ішкі ағзалардың тегіс бұлшықеттерінің түйілуінде, оның ішінде асқазанның және он екі елі ішектің ойық жара ауруында, ішектік, бауырлық және бүйректік шаншуларда

• миокард инфарктінде

• кардиогендік шокта

• тұрақсыз стенокардияда

• жедел невриттерде

• қуықта, тік ішекте, уретрада бөгде заттар болғанда, парафимозда, жедел простатитте

Қолдану тәсілі және дозалары

Ересектерге 20 мг/мл (10-30 мг тримеперидин) ерітіндіні тері астына және бұлшықет ішіне 0,5–1,5 мл-ден енгізеді. Ересектерге арналған жоғары дозалар: бір реттік – 20 мг/мл ерітіндінің 2 мл (40 мг), тәуліктік – 20 мг/мл ерітіндінің 8 мл (160 мг).

Дозаны қартайған шақтағы және психикалық жағдайы бұзылған емделушілерде және бауыр мен бүйрек қызметінің жеткіліксіздігі бар науқастарда төмендету керек. Промедол онкологиялық ауруларда таңдап алынатын апиын болып табылады. Тиісті дозаны ауырудың біліну дәрежесіне байланысты әрбір 12-24 сағат сайын тағайындайды.

2 жастан асқан балаларға жасына қарай: 2–3 жастағы балаларға бір реттік доза 20 мг/мл ерітіндінің 0,15 мл (3 мг тримеперидин), тәуліктік ең жоғары доза – 0,6 мл (12 мг); 4–6 жастағылар үшін: бір реттік доза – 0,2 мл (4 мг), тәуліктік ең жоғары доза – 0,8 мл (16 мг); 7–9 жастағылар үшін: бір реттік – 0,3 мл (6 мг), тәуліктік ең жоғары доза – 1,2 мл (24 мг); 10–12 жастағылар үшін бір реттік доза – 0,4 мл (8 мг), тәуліктік ең жоғары доза – 1,6 мл (32 мг); 13–16 жастағылар үшін: бір реттік доза – 0,5 мл (10 мг), тәуліктік ең жоғары доза – 2 мл (40 мг).

Жағымсыз әсерлері

• апиындардың жоғары дозасын қолдану тыныс депрессиясына және кома жағдайына әкеп соғуы мүмкін

• балаларда құрысулар болуы мүмкін

• жоғары дозаларда қолданған кезде бүйрек қызметінің жеткіліксіздігі өршуі мүмкін

• қарашық кеңеюі мүмкін, бұл гипоксияның пайда болғанын айғақтайды

• жүректің айнуы, құсу, іш қату

• анорексия

• АІЖ тітіркенуі

• ішектің қабыну ауруларында — ішектің салданып бітелісі және уытты мегаколон (іш қату, метеоризм, жүректің айнуы, асқазанның түйілуі, гастралгия, құсу)

• гепатоуыттылық (несептің қараюы, бозғылт нәжіс, склераның және тері жабындарының сарғыштануы)

• сананың бұзылуы

• әлсіздік, ұйқышылдық

• көру сезімінің айқын болмауы, диплопия

• діріл, бұлшықеттің еріксіз тартылуы

• өт шығару жолдарының спазмы, әрі қарай бауыр энзимдерінің өзгеруіне және антипиретикалық әсерге ұласуы

• ауыз ішінің құрғауы

• елестеулер

• бас айналу, бас ауыру

• брадикардия, тахикардия, жүрек ырғағының бұзылуы, ортостатикалық гипотензия

• көңіл-күйдің өзгеруі

• миоз болуы ықтимал

• либидоның нашарлауы

• кейбір емделушілерде бассүйекішілік қысым жоғарылауы мүмкін

• бұлшықеттің сіресуі (әсіресе тыныс алу бұлшықеттерінің)

• эйфория, жайсыздық, күйгелектік, шаршау

• түнгі қорқыныштар, әдеттен тыс түс көру, мазасыз ұйқы, құрысулар

• депрессия

• балаларда — әдеттен тыс қозу, мазасыздық

• құлақ ішінің шуылдауы

• психомоторлы реакциялар жылдамдығының баяулауы, бағыттан адасу

• АҚ төмендеуі

• АҚ жоғарылауы

• диурездің нашарлауы, несепағардың түйілуі (несептің бөлініп шығуының қиындауы және ауыруы, несепті жиі шығарғысы келу)

• аллергиялық реакциялар: бронхоспазм, ларингоспазм, ангионевротикалық ісіну; тері бөртпесі, терінің қышуы, беттің ісінуі

• жергілікті реакциялар: гиперемия, ісіну, инъекция жасаған жердің ашуы

• терлеудің күшеюі

• дағдылану

• дәріге тәуелділік

Қолдануға болмайтын жағдайлар

• тыныс орталығының тежелуі салдарынан тыныстың нашарлауы

• жалпы жүдеу

• этиологиясы анық емес іштің ауыруы (диагноз қойылғанға дейін)

• алкогольдік жедел уыттану

• 2 жасқа дейінгі балалар

• моноаминоксидаза тежегіштерімен бір мезгілде емдеу (оның ішінде оларды қолданғаннан кейін 21 күн ішінде)

• тримеперидинге жекелей жоғары сезімталдық

• 65 жастан асқанда

• босану мерзімінің алдындағы соңғы 3 сағат

• жұқпалар (жұқпаның ОЖЖ еніп кету қаупі)

• цефалоспориндердің, линкозамидтердің, пенициллиндердің әсерінен пайда болған жалған жарғақшалы колит аясындағы диарея

• уытты диспепсия (уыттың шығарылуының баяулауы және осыған байланысты диареяның өршуі және ұзаққа созылуы)

Дәрілермен өзара әрекеттесуі

Орталық жүйке жүйесіне депрессиялық әсер ететін басқа препараттармен бір мезгілде қолданғанда әсерлері өзара күшеюі мүмкін. Барбитураттарды (әсіресе фенобарбиталды) немесе есірткілік аналгетиктерді ұзақ уақыт қолдану айқаспалы төзімділіктің пайда болуын туындатады.

Промедол нейролептиктермен (галоперидолмен, дроперидолмен), холинолитиктермен, миотропты спазмолитиктермен, антигистаминдік дәрілермен үйлеседі.

АҚ төмендететін ДЗ (соның ішінде ганглиоблокаторлардың, диуретиктердің) гипотензивтік әсерін күшейтеді.

Антихолинергиялық белсенділігі бар ДЗ, диареяға қарсы ДЗ (соның ішінде лоперамид) іш қатудың пайда болу қаупін ішек бітелісіне, несептің кідіруіне және ОЖЖ тежелуіне дейін арттырады.

Антикоагулянттардың әсерін күшейтеді (плазма протромбинін бақылаған жөн).

Бупренорфин (соның ішінде бұған дейінгі емде) басқа апиындық анальгетиктердің әсерін төмендетеді; мю-апиындық рецепторлар агонистерінің жоғары дозаларын қолдану аясында тыныстың тежелуін төмендетеді, ал мю- немесе каппа-апиындық рецепторлар агонистерінің төмен дозаларын қолдану аясында — күшейтеді; дәріге тәуелділік аясында мю-апиындық рецепторлар агонистерін қабылдауды тоқтатқан кезде «тоқтату синдромы» симптомдарының пайда болуын жылдамдатады, оларды кенеттен тоқтатқан кезде осы симптомдардың айқындылығын ішінара төмендетеді.

МАО тежегіштерімен бір мезгілде қолданған кезде гипер- немесе гипотензивтік криздердің пайда болуымен шамадан тыс қозуының немесе ОЖЖ қызметінің тежелуінің мүмкін болуына байланысты ауыр реакциялар пайда болуы мүмкін (МАО тежегіштерін қабылдау кезінде, сондай-ақ оларды қабылдауды аяқтағаннан кейін 14-21күн ішінде тағайындамаған жөн).

Налоксон тыныс алуды қалпына келтіреді, апиындық анальгетиктердің әсерін, сондай-ақ олардың әсерінен тыныстың және ОЖЖ тежелуін төмендетеді; басқа апиындардың жағымсыз әсерлерін жою үшін тағайындалған буторфанолдың, налбуфиннің және пентазоциннің әсерлерін нивелирлеу үшін үлкен дозалар қажет болуы мүмкін; есірткіге тәуелділік аясында «тоқтату синдромы» симптомдарының пайда болуын жылдамдатуы мүмкін.

Налтрексон есірткіге тәуелділік аясында «тоқтату синдромы» симптомтомдарының пайда болуын жылдамдатады (симптомдар препаратты енгізгеннен кейін 5 минуттан соң пайда болуы мүмкін, 48 сағатқа созылады, тұрақтылығымен және оларды жоюдың қиындығымен сипатталады); апиындық анальгетиктердің әсерін төмендетеді (анальгетикалық, диареяға қарсы, жөтелге қарсы); гистаминді реакциядан болатын симптомдарға ықпалын тигізбейді.

Метоклопрамидтің әсерін төмендетеді.

Айрықша нұсқаулар

Препараттың жоғары дозаларын әсіресе қартаң жастағы науқастарға қолдану тыныс депрессиясының пайда болуына, циркуляторлы жеткіліксіздік және коматозды жағдай пайда болатын гипотензияға әкеп соғуы мүмкін.

Тыныс алу қызметінің жеткіліксіздігі респираторлық демеу шараларын жүргізуді және антагонист – налоксонды енгізуді қажет етеді, бірақ есірткіге тәуелді субъектілерге налоксонды қолдану тоқтату синдромының пайда болуына әкеп соғуы мүмкін. Демеуші ем респираторлы демеуге және налоксонды енгізу арқылы науқасты шок жағдайынан шығаруға бағытталған. Препаратты енгізу жиілігі тыныс алу қызметінің жеткіліксіздігі дәрежесіне және коматозды жағдайдың дәрежесіне байланысты.

Жағымсыз реакциялардың пайда болуы апиындық рецепторларға әр адамның жекелей сезімталдығына байланысты. 2 жастан асқан балаларда құрысулар пайда болуы мүмкін, үлкен дозаларда қолданған кезде бүйрек қызметінің жеткіліксіздігі өршуі мүмкін.

Коматозды жағдай қарашықтың тарылуымен, тыныс алу депрессиясымен білінеді, бұл артық дозалануды айғақтауы мүмкін. Қарашықтың кеңеюі гипоксияның пайда болғанын дәлелдейді. Артық дозаланғаннан кейін өкпелердің ісінуі өлімнің жалпы себепшісі болып табылады.

Қайталап қолданған кезде дағдылану және дәріге тәуелділік пайда болуы мүмкін. Эйфория болуы мүмкін.

Тегіс бұлшықет түйілуінен болған ауыруларда (бауыр, бүйрек, ішек шаншуларында) науқастың жағдайын жан-жақты бақылауға ала отырып, тримеперидинді атропин тәрізді және спазмолитикалық ДЗ-мен біріктіріп қолданған жөн.

Бауыр және бүйрек қызметтері бұзылғанда, гипотиреозда, простата гипертрофиясында, импотенцияда, шокта, миастенияда, асқазан-ішек жолының қабыну ауруларында, сондай-ақ 60 жастан асқан емделушілерге, АІЖ-ға, несеп шығару жүйесінде хирургиялық араласымдарда, бронх демікпесінде, ӨСОА, құрысуларда, аритмияларда, артериялық гипотензияларда, ЖСЖ, бауыр және/немесе бауыр қызметінің жеткіліксіздігінде, микседемада, гипотиреозда, бүйрекүсті безі қызметінің жеткіліксіздігінде, ОЖЖ қызметі тежелгенде, бассүйекішілік гипертензияларда, БМЖ, қуықасты безінің гиперплазиясында, суицидальді бейімділікте, көңіл-күйдің құбылмалылығында, есірткіге тәуелділікте (соның ішінде сыртартқыда), ішектің ауыр қабыну ауруларында, несепті бөліп шығару өзекшелерінің стриктураларында, ауыр науқастарға, әлсіз науқастарға, кахексияда, балаларға сақтықпен қолдану керек.

Алкогольді қолдануға болмайды.

Жүктілік және лактация кезеңі

Препаратты жүктілік және бала емізу кезеңінде қолдануға болмайды.

Педиатрияда қолданылуы

Препаратты 2 жасқа дейінгі балаларға қолданбау керек.

Дәрілік заттың автокөлікті немесе қауіпті механизмдерді басқару қабілетіне ықпал ету ерекшеліктері

Промедолмен емделу барысында автокөлікті басқармаған және психомоторлы реакциялардың шапшаңдығын қажет ететін басқа да қауіпті қызмет түрлерімен айналыспаған жөн.

Артық дозалануы

Симптомдары: ерте білінетін және қауіпті көріністері - тыныс алу орталығы жұмысының тежелуі.

Емдеу: жалпы реанимациялық шаралар, апиындық рецепторлар антагонистерін және агонист-антагонистерді (налоксон, налорфин) тағайындау және симптоматикалық ем жүргізу.

Налоксон есірткілік аналгетиктердің әсерінен болған тыныс алудың тежелуін және аналгезияны жояды. Налорфин есірткілік аналгетиктердің ауыруды сездірмейтін әсері сақталған жағдайда олардың әсерінен болған тыныс алу депрессиясын жояды.

Шығарылу түрі және қаптамасы

Шыны ампулаларда 1 мл-ден.

Поливинилхлоридті үлбірден және баспалы лакталған алюминий фольгадан жасалған пішінді ұяшықты қаптамада 5 ампуладан. Пішінді 20 қаптама медицинада қолданылуы жөнінде мемлекеттік және орыс тілдеріндегі нұсқаулықтармен және кесетін керамикалық дискімен немесе ампулалық керамикалық пышақпен бірге картон қорапқа салынған.

Сақтау шарттары

Жарықтан қорғалған жерде, 25 оС-ден аспайтын температурада сақтау керек.

Балалардың қолы жетпейтін жерде сақтау керек!

Сақтау мерзімі

3 жыл

Қаптамасында көрсетілген жарамдылық мерзімі өткеннен кейін қолдануға болмайды.

Дәріханадан босатылу шарттары

Рецепт арқылы

Өндіруші

«Харьков фармацевтикалық кәсіпорны «Здоровье народу»» ЖШҚ.

Украина, 61013, Харьков қ-сы, Шевченко к-сі, 22.

Тіркеу куәлігінің иесі

«Харьков фармацевтикалық кәсіпорны «Здоровье народу»» ЖШҚ.

Украина, 61013, Харьков қ-сы, Шевченко к-сі, 22.

Тұтынушылардан өнім (тауар) сапасы жөнінде шағымдарды Қазақстан Республикасы аумағында қабылдайтын ұйымның мекенжайы

Мекенжайы: «Харьков фармацевтикалық кәсіпорны «Здоровье народу»» ЖШҚ.

Украина, 61013, Харьков қ-сы, Шевченко к-сі, 22.

Телефон: (057) 757-07-77

Факс: (057) 757-07-77

Электронды поштасы: office@zn.kharkov.ua