Ноксафил® (100 мг)

МНН: Позаконазол
Производитель: Н.В. Органон
Анатомо-терапевтическо-химическая классификация: Posaconazole
Номер регистрации в РК: № РК-ЛС-5№122091
Период регистрации: 04.03.2016 - 04.03.2021

Инструкция

Саудалық атауы

Ноксафил

Халықаралық патенттелмеген атауы

Позаконазол

Дәрілік түрі

Ішекте еритін қабықпен қапталған таблеткалар, 100 мг

Құрамы

Бір таблетканың құрамында

белсенді зат – 100.0 мг микрондалған позаконазол

қосымша заттар: гипромеллоза ацетатының сукцинаты (түйіршіктер), гипромеллоза ацетатының сукцинаты (ұнтақ), микрокристалды целлюлоза, гидроксипропилцеллюлоза, кремнийдің қостотығы, натрий кроскармеллозасы, магний стеараты

қабықтың құрамы: Opadry® II Yellow 85F92209: ішінара гидролизденген поливинил спирті, макрогол 4000, титанның қостотығы (Е171), тальк, темірдің (III) сары тотығы (Е172).

Сипаттамасы

Сары түсті үлбірлі қабықпен қапталған, капсула пішінді, таблетканың бір жақ бетінде «100» саны ойып жазылған таблеткалар.

Фармакотерапиялық тобы

Зеңге қарсы жүйелі пайдалануға арналған препараттар. Триазол туындылары. Позаконазол

АТХ коды J02AC04

Фармакологиялық қасиеттері

Фармакокинетикасы

Фармакокинетиканың/фармакодинамиканың өзара байланысы.

Дәрілік заттың «концентрация-уақыт» қисығы астындағы ауданының (AUC) позаконазолдың ең төмен тежегіш концентрациясына MIC (AUC/MIC) жалпы экспозициясы мен клиникалық нәтижесі арасында өзара байланыс байқалды. Аспергиллезі бар пациенттер үшін шектік арақатынас ~ 200 құрады. Аспергиллезі бар пациенттерде қан плазмасында позаконазолдың ең жоғары концентрацияға жетуін қамтамасыз ету аса маңызды.

Сіңірілуі. Позаконазол таблеткалары орта есеппен алғанда 4-5 сағат ішінде (Tmax) сіңіп, 300 мг-ға дейінгі дозадағы позаконазолдың таблетка түрін бір- немесе көп реттік қабылдаудан кейін фармакокинетикасы дозаға байланысты болады. Позаконазолдың 300 мг дозадағы таблетка түрін құрамында май мөлшері жоғары тамақтан соң бір реттік қабылдаудан кейін AUC0-72 сағ және Cmax мәндері, дені сау еріктілерде ашқарынға қабылдаумен салыстырғанда, сәйкесінше, 51% және 16%-ға жоғары болды.

Кейбір пациенттерде таблеткалардағы позаконазолдың плазмалық концентрациясы уақыт өте жоғарылауы мүмкін. Мұндай уақытқа тәуелділіктің себебі толық зерттелмеген.

Таралуы. Позаконазолдың таблетка түрінің болжамды орташа көлемі 394 л (42%) құрайды, ал дені сау еріктілерде ол 294-тен 583 л-ге дейінгі ауқымда ауытқып отырады. Позаконазолдың қан плазмасы ақуыздарымен (> 98%), көбіне қан сарысуының альбуминімен байланысу қабілеті жоғары болады.

Метаболизмі. Позаконазол айналымда белсенді метаболиттер түзбейді, оның концентрациясының СҮР450 цитохромы тежегіштерінің әсерімен өзгеру мүмкіндігі екіталай. Айналымдағы метаболиттердің ішінен негізгі массаны позаконазолдың глюкуронидтік конъюгаттары және аздаған бөлігін тотыққан (СҮР450 арқылы) метаболиттер құрайды. Метаболиттердің бүйрек және ішек арқылы шығарылуы радиоизотоппен таңбаланған енгізілген дозаның шамамен 17-ын құрайды.

Шығарылуы. Позаконазол таблеткалары организмнен баяу шығарылады, жартылай шығарылуының орташа кезеңі (t1/2) 29 (26-31) сағатты, көзге көрінетін клиренсі орта есеппен 7.5 - 11 л/сағ. құрайды. Препарат көбіне ішек арқылы (77%) шығарылады, мұндайда негізгі бөлігі белсенді заттың үлесіне (66%) тиеді. Бүйректік клиренсі элиминацияның аздаған бөлігін құрайды, енгізілген дозаның шамамен 14%-ы несеппен бірге шығарылады (белсенді зат 0.2%-дан азды құрайды). Тәулігіне 1 рет 300 мг доза позаконазол тұрақты концентрациясына 6-шы Күні жетеді (препараттың дозасы 1-ші Күні екі рет қабылданады).

Пациенттердің ерекше санаттарындағы фармакокинетикасы

18 жасқа толмаған балалар. Қазіргі таңда позаконазолдың таблетка түрін педиатрияда қолдану тәжірибесі жоқ. Педиатриядағы позаконазолдың фармакокинетикасы ішуге арналған суспензияны қолданған кезде алынған деректер негізінде анықталды. Инвазиялық зең инфекцияларын емдеген кезде позаконазолды тәулігіне 800 мг дозада қабылдағаннан кейін 8-ден 17 жасқа дейінгі 12 бала мен жасөспірімдерде (776 нг/мл) және 18-ден 64 жасқа дейінгі 194 ересектерде (817 нг/мл) позаконазол концентрациясы осыған ұқсас деңгейде болатындығы анықталды. Қазіргі таңда 8 жасқа толмаған балаларда препараттың фармакокинетикасы жөнінде деректер жоқ. 13-17 жастағы 10 жасөспірімде позаконазолдың орташа тепе-тең концентрациясы (Cav) 18 жастан асқан ересектердегі Cav шамасына ұқсас болды.

Жынысы. Еркектер мен әйелдерде позаконазолдың таблетка түріндегі фармакокинетикасы ұқсас.

Егде жастағы пациенттер. Жас және егде жастағы пациенттер арасында позаконазолдың таблетка түріндегі фармакокинетикасы ұқсас. Жас және егде жастағы адамдарда позаконазолдың қауіпсіздік бейіні ұқсас. Сондықтан жасқа байланысты дозаны түзетудің қажеті жоқ.

Нәсіл. Нәсілге байланысты позаконазолдың таблетка түрін қолдану жөнінде деректер қазіргі таңда жеткіліксіз.

Ішке қабылдауға арналған позаконазолдың суспензиясын қолданғаннан кейін африкалық нәсіл өкілдерінде еуропеоидтық нәсіл өкілдерімен салыстырғанда AUC және Cmax аздап (16%) төмендегені байқалды. Екі нәсіл өкілдерінің де жалпы қауіпсіздік бейінінде айырмашылық болған жоқ дерлік.

Дене салмағы. Таблетка түріндегі позаконазолдың экспозициясы дене салмағы 120 кг-ден астам болатын пациенттерде біршама төмен болды. Мұндай пациенттерді емдегенде зең инфекциясының дамуы мүмкін болғандықтан, емдеудің тиімділігіне өте мұқият бақылау жасау қажет. Позаконазолды гемопоэздік дің жасушаларын трансплатациялағаннан кейін қабылдап жүрген және дене салмағы төмен (<60 кг) пациенттерде позаконазолдың плазмалық концентрациясының жоғарылауына бейімділігі үлкен болады. Сондықтан олардың жағдайы жағымсыз реакцияларды анықтау үшін қадағалануы тиіс.

Бүйрек функциясының жеткіліксіздігі. Бүйрек функциясының ауырлығы жеңіл және орташа дәрежеде жеткіліксіздігі бар пациенттерде (n=18, креатинин клиренсі КК 20 мл/мин/1.73 м2) позаконазолды суспензия түрінде бір реттік қолдану препараттың фармакокинетикасына ықпалын тигізбейді, сондықтан дозаны түзетудің қажеті жоқ. Бүйрек функциясының ауыр дәрежедегі жеткіліксіздігі бар пациенттерде (n=6, КК <20 мл/мин/1.73 м2) позаконазолдың AUC шамасы, бүйрек функциясының аз білінетін жеткіліксіздігі бар пациенттермен салыстырғанда (ауытқу коэффициенті 40%), қатты ауытқыды (ауытқу коэффициенті 96%). Алайда позаконазолдың бүйректік клиренсі мардымсыз болғандықтан, дозаны түзету қажет емес. Позаконазол гемодиализ кезінде шығарылмайды. Позаконазолдың экспозициясы бүйрек функциясының ауыр жеткіліксіздігі бар пациенттерде тұрақты емес, сондықтан мұндай пациенттерді емдеген кезде, зең инфекциясының таралуы мүмкін болғандықтан, емдеу тиімділігін өте мұқият бақылау қажет.

Позаконазолдың таблетка түрін қолдану жөнінде жекелеген зерттеулер пациенттердің осы тобында жүргізілген жоқ.

Бауыр жеткіліксіздігі. Бауыр функциясының ауырлығы жеңіл (Чайлд-Пью бойынша А класы), орташа (Чайлд-Пью бойынша В класы), немесе ауыр (Чайлд-Пью бойынша С класы) дәрежедегі жеткіліксіздігі бар пациенттерде (әрбір топта n=6) позаконазолдың суспензиясын бір реттік қабылдаудан кейін орташа AUC, бауыр функциясы қалыпты пациенттердегі тиісті көрсеткіштермен салыстырғанда 1.3–1.6 есе жоғары болды.

Байланыспаған заттардың концентрациялары анықталған жоқ, және байланыспаған позаконазол концентрациясының артуы, тіркелген жалпы AUC шамасының 60% артуына қарағанда, үлкен болатындығын жоққа шығаруға болмайды. Тиісті топтарда t1/2 шамамен 27 сағаттан 43 сағатқа жуыққа ұзарды. Бауыр функциясының жеңілден ауыр дәрежеге дейінгі жеткіліксіздігі бар пациенттер үшін дозаны түзету қажет етілмейді, бірақ қан плазмасында концентрация жоғарылауы мүмкін болғандықтан сақтық танытқан жөн. Позаконазолдың таблетка түрін қолдануға жекелеген зерттеулер қазір жүргізілмегенмен, нұсқаулар позаконазолдың таблеткасында да ұқсас.

Фармакодинамикасы

Әсер ету механизмі. Ноксафил® препаратының белсенді заты – позаконазол эргостеролдың биосинтезінің маңызды сатысын катализдейтін фермент ланостерол - 14-деметилазаны тежейді.

Микробиология. Позаконазол зерттеулерде келесі микроорганизмдерге in vitro белсенді: Aspergillus (A. fumigatus, A. flavus, A. terreus, A. nidulans, A. niger, A. ustus), Candida түрі (C. albicans, C. glabrata, C. krusei, C. parapsilosis, C. tropicalis, C. dubliniensis, C. famata, C. inconspicua, C. lipolytica, C. norvegensis, C. pseudotropicalis), Coccidioides immitis, Fonsecaea pedrosoi, Fusarium, Rhizomucor, Mucor, Rhizopus түрлері. Микробиологиялық деректер Rhizomucor, Mucor және Rhizopus түрлеріне белсенді екендігін айғақтайды, алайда қазіргі таңда клиникалық деректер шектеулі және позаконазолдың осы микроорганизмдерге қатысты деректеріне тиімділігін ақырына дейін бағалауға мүмкіндік бермейді.

Резистенттілігі. Позаконазолға сезімталдығы төмендеген жеке изоляттар анықталды. Резистенттілігінің негізгі механизмі ақуыз-CYP 51 нысананы алмастыру болды.

Aspergillus spp үшін шектік эпидемиологиялық мәндер. (Жабайы штаммдарды жүре келе пайда болған резистенттілігі бар изоляттардан микробтарға қарсы препараттардың сезімталдығын тестілеу жөніндегі EUCAST Еуропалық комитет әдістемесі бойынша ажыратытын позаконазолдың шектік эпидемиологиялық мәндері.

Aspergillus flavus: 0.5 мг/л

Aspergillus fumigatus: 0.25 мг/л

Aspergillus nidulans: 0.5 мг/л

Aspergillus niger: 0.5 мг/л

Aspergillus terreus: 0.25 мг/л

Aspergillus spp.үшін клиникалық шектік мәндерін анықтау үшін күні бүгін деректер жеткіліксіз. Шектік эпидемиологиялық мәндер шектік клиникалық мәндерге баламалы болып табылмайтынын ескерген жөн.

Шектік мәндер. EUCAST деректері бойынша позаконазолдың MIC шектік мәндері (сезімтал— S, резистентті — R):

Candida albicans: S ≤0.06 мг/л, R >0.06 мг/л

Candida tropicalis: S ≤0.06 мг/л, R >0.06 мг/л

Candida parapsilosis: S ≤0.06 мг/л, R >0.06 мг/л

Бүгінгі күні Candida тектестіктерінің басқа түрлері үшін клиникалық шектік мәндерді анықтау үшін деректер жеткіліксіз.

Зеңге қарсы басқа дәрілермен біріктірілімі. Қазіргі таңда біріктірілген емді қолданудың қосымша артықшылығын айғақтайтын клиникалық деректер жоқ. Зеңге қарсы біріктірілген емді тағайындау позаконазолдың да, зеңге қарсы басқа препараттардың да тиімділігін төмендетпеуі тиіс деп болжам жасалады.

Қолданылуы

- инвазиялық зең инфекцияларының профилактикасы:

- жедел миелогендік лейкозды немесе инвазиялық зең инфекциялары дамуының жоғары қаупімен ұзақ нейтропенияға әкеп соғуы мүмкін миелодисплазиялық синдромды емдеген кезде ремиссияны индукциялау үшін химиотерапияда

- инвазиялық зең инфекциялары дамуының жоғары қаупімен «иесіне қарсы трансплантат» реакциясына жол бермеу үшін иммунодпрессанттардың жоғары дозаларын қабылдап жүрген, гемопоэздік дің жасушалары трансплантаттарының реципиенттерінде

- ересектердегі зең инфекцияларын емдеу:

- В амфотерицинге, итраконазолға немесе вориконазолға резистентті пациенттерде немесе осы препараттар жақпайтын пациенттердегі инвазиялық аспергиллезде

- B амфотерицинге резистенттілігі бар пациенттердегі немесе В амфотерицин жақпайтын пациенттердегі фузариозда

- итраконазолға резистенттілігі бар немесе итраконазол жақпайтын пациенттердегі хромобластомикоз бен мицетомада

- В амфотерицинге, итраконазолға немесе флуконазолға резистенттілігі бар немесе бұл препараттар жақпайтын пациенттердегі кокцидиоидомикозда.

Төзімділігі инфекцияның өршуі немесе зеңге қарсы кем дегенде 7 күн емдеуден кейін жақсарудың болмауымен анықталады.

Орофарингеальді кандидозды емдеу жөнінде нұсқау үшін позаконазол, ішуге арналған суспензиясының медициналық қолдану жөніндегі нұсқаулығын қараңыз.

Қолдану тәсілі және дозалары

Таблеткалар мен ішілетін суспензиялар арасында өзара алмастырушылық жоқ. Ішке қабылдауға арналған Ноксафил® таблеткалары мен суспензиясы дозалану нұсқаларында айырмашылықтар болуы салдарынан өзара алмастырылатын дәрілік түрлерге жатпайды. Сондықтан әрбір дәрілік түр үшін режим-дозалау жөніндегі нұсқауларға сүйену қажет.

Емді жоғары қауіп тобындағы пациенттерде зең инфекцияларын емдеуде немесе профилактикасында тәжірибесі бар дәрігер жүргізуі тиіс.

Дозасы. Ноксафил® препараты сондай-ақ ішуге арналған дозасы 40 мг/мл суспензия түрінде де шығарылады. Ішуге арналған суспензияны тағайындаған кездегіге қарағанда, позаконазолдың таблетка түрін тағайындаған кезде қан плазмасында оңтайлы концентрацияларға жақсырақ жетеді. Бұдан басқа, таблетка түрін тағайындаған кезде препарат жоғарырақ концентрацияларға жетеді. Препараттың дозалануы жөніндегі нұсқаулар 1-кестеде келтірілген.

1 кесте. Көрсетілімдеріне сай ұсынылған дозалар

Көрсетілімі

Дозасы және емдеу ұзақтығы

Төзімді инвазиялық зең инфекциялары/зеңге қарсы бірінші желілі препараттар жақпайтын пациенттер

1 Күні 300 мг (3 таблетка 100 мг-ден) тәулігіне 2 рет, содан кейін 300 мг-ден (3 таблетка 100 мг-ден) тәулігіне 1 рет. Таблеткаларды тамақ ішуге қарамай-ақ қабылдай беруге болады.

Емдеу ұзақтығы ауру аясының барысына, иммуносупрессиялық емнен кейін қалпына келуіне және емге клиникалық жауабына байланысты.

Инвазиялық зең инфекцияларының профилактикасы

Емнің 1 Күні 300 мг (3 таблетка 100 мг-ден) тәулігіне 2 рет, содан кейін 300 мг-ден (3 таблетка 100 мг-ден) тәулігіне 1 рет. Таблеткаларды тамақ ішуге қарамай-ақ қабылдай беруге болады. Емдеу ұзақтығын нейтропенияны емдеудің немесе иммунитетті қалпына келтірудің табысты болуына қарай анықтайды. Жедел миелогендік лейкозы немесе миелодисплазиялық синдромы бар пациенттер үшін Ноксафил® препаратымен профилактикалық емдеуді күтілетін нейтропенияға дейін бірнеше күн ішінде бастаған және нейтрофилдер саны 1 мм3 шаққанда >500 жасушаға артқаннан кейін 7 күн бойы жалғастырған жөн.

Пациенттердің ерекше топтары

Бүйрек жеткіліксіздігінде қолданылуы. Бүйрек функциясының бұзылуы позаконазолдың фармакокинетикалық көрсеткіштерінің өзгеруіне себеп болады деп күтілмейді, сондықтан препарат дозасын түзетудің қажеті жоқ.

Бауыр жеткіліксіздігінде қолданылуы. Позаконазолдың фармако-кинетикасына бауыр жеткіліксіздігінің (бауырдың созылмалы жеткіліксіздігінің Чайлд-Пью бойынша С классын қоса) ықпалы жөнінде аздаған деректер бар, бұл бауыр функциясы қалыпты пациенттермен салыстырғанда, бауыр функциясы бұзылған пациенттерде қан плазмасында соңғысының мөлшерінің артқанын көрсетеді, бірақ дозаны түзету қажет деп санауға негіз болмайды. Қан плазмасында препарат деңгейінің жоғарылауы мүмкін екендігін ескеріп, сақтық таныту ұсынылады.

Педиатрияда қолданылуы. Ноксафил® препаратын қолданудың қауіпсіздігі мен тиімділігі 18 жасқа толмаған балаларда анықталған жоқ. Дозалауға қатысты нұсқаулар жоқ болғанмен, педиатриялық пациенттер жөнінде қолда бар мәлімдемелер «Фармакологиялық қасиеттері» бөлімінде берілген. Қазіргі таңда таблетка түрін қолдану жөнінде деректер жоқ.

Қолдану тәсілі. Ішке қабылдау үшін. Ішекте еритін қабықпен қапталған 100 мг Ноксафил® таблеткаларын, тамақтануға тәуелсіз қабылдауға болады. Таблетканы ұсатпай, шайнамай және сындырмай тұтастай жұту және сумен ұрттау қажет.

Жағымсыз әсерлері

Қауіпсіздігі жөніндегі деректер ішке қабылдауға арналған позаконазол суспензиясын клиникалық зерттеу барысында алынды.

Позаконазолдың таблетка түріне жүргізілген клиникалық зерттеулерге жедел миелогендік лейкозы, миелодисплазиялық синдромы бар, және дің жасушаларын трансплантациялағаннан кейін, «иесіне қарсы трансплантат» реакциясы диагнозы қойылған немесе даму қаупі бар болатын пациенттер қатысты.

Таблетка түрі экспозициясының ең жоғары ұзақтығы ішуге арналған суспензиямен салыстырғанда аз болды. Таблетка түрін қабылдағаннан кейін позаконазолдың концентрациясы ішуге арналған суспензияны қабылдаудан кейінгіге қарағанда жоғары болды. Сондықтан жағымсыз реакциялардың өте жоғары жиілігін жоққа шығаруға болмайды.

Қауіпсіздігінің жалпы бейіні

Ноксафил® ішекте еритін қабықпен қапталған таблеткалары. Базалық клиникалық зерттеулер позаконазолдың таблетка түрінің 230 пациентте қауіпсіз болғанын анықтады. Пациенттер зең инфекцияларының профилактикасы үшін позаконазолдың таблетка түрінің фармакокинетикасы және қауіпсіздігі салыстырылмайтын зерттеулерге қатысты. Пациенттердің иммунитеті гематологиялық қатерлі ісікті, химиотерапиядан кейінгі нейтропенияны, «иесіне қарсы трансплантат» реакциясының болуын, және гемопоэздік дің жасушаларының трансплантациясын бастан кешуді қоса, негізгі аурулардың болуымен әлсіреді. Препарат орта есеппен 28 күн бойы тағайындалды. Емдеу барысында 20 пациент позаконазолды тәулігіне 200 мг дозада және 210 пациент тәулігіне 300 мг дозада қабылдады (емнің 1 Күні пациенттер екі қабылдауға бөлінген доза алды).

Ішке қабылдауға арналған Ноксафил® ішекте еритін қабықпен қапталған таблеткалары және суспензиясы. Клиникалық зерттеулер және постмаркетингтік бақылаулар ˃ 2400 пациентте және дені сау еріктілерде ішуге арналған позаконазол суспензиясының қауіпсіздігін анықтады. Ең жиі жағымсыз әсерлері мыналар болды: жүректің айнуы, құсу, диарея, дене температурасының және билирубин деңгейінің жоғарылауы. 336 пациентке және дені сау еріктілерге жүргізілген клиникалық зерттеулерде позаконазолдың таблетка түрінің және ішуге арналған суспензияның қауіпсіздігі бейінінің бірдей екендігін анықтады.

Жағымсыз реакциялар* біліністердің жиілігі бойынша орналастырылды: өте жиі (˃1/10), жиі (1/100, <1/10), жиі емес (≥1/1 000, <1/100), сирек (≥1/10 000, <1/1 000), өте сирек (<1/10 000), белгісіз (қолда бар деректермен анықтау мүмкін емес).

Өте жиі (˃1/10)

  • жүректің айнуы

Жиі (1/100, <1/10)

  • нейтропения, электролиттік теңгерімнің бұзылуы, анорексия, тәбеттің төмендеуі, гипокалиемия, гипомагниемия

  • парестезиялар, бас айналу, ұйқышылдық, бас ауыру, дисгевзия

  • артериялық гипертензия

  • құсу, іштің ауыруы, диарея, диспепсия, ауыз ішінің құрғауы, метеоризм, іш қату, аноректальді аймақта жайсыздық

  • бауыр энзимдері (АЛТ, АСТ, билирубин, сілтілік фосфатаза, гамма-глутаминтрансфераза) деңгейлерінің жоғарылауы

  • бөртпе, қышыну

  • дене температурасының жоғарылауы (қызба), астения, қажу

Жиі емес (≥ 1/1 000, <1/100)

  • тромбоцитопения, лейкопения, анемия, эозинофилия, лимфаденопатия, көкбауыр инфарктісі

  • аллергиялық реакциялар

  • гипергликемия, гипогликемия

  • патологиялық түс көрулер, сананың шатасуы, ұйқының бұзылыстары

  • құрысулар, нейропатия, гипестезия, тремор, афазия, ұйқысыздық

  • затты анық көрмеу, жарықтан қорқу, көру жітілігінің нашарлауы

  • QT§ аралығының ұзаруы, ЭКГ өзгеруі, жүректің қағуы, брадикардия, қарыншаүстілік экстрасистолия, тахикардия

  • артериялық гипотензия, васкулит

  • жөтел, мұрыннан қан кету, ықылық, мұрынның шырышты қабығының ісінуі, кеуде қуысында плевралық ауыру, тахипноэ

  • панкреатит, іштің кебуі, энтерит, эпигастрийде жайсыздық, кекіру, гастроэзофагеальді рефлюкс ауруы, ауыз қуысының ісінуі

  • гепатоцеллюлярлық зақымданулар, гепатит, сарғаю, гепатомегалия, холестаз, гепатоуыттылық, бауыр функциясының бұзылуы

  • ойық жаралы стоматит, алопеция, дерматит, эритема, петехиялар

  • бұлшықет-қаңқаның ауыруы, арқа аймағының, мойынның және аяқ-қолдардың ауыруы

  • бүйрек функциясының жедел жеткіліксіздігі, бүйрек функциясының жеткіліксіздігі, креатинин деңгейінің артуы

  • етеккір оралымының бұзылуы

  • ісіну, ауыру, қалтырау, дімкәстік, кеуде қуысы аймағында жайсыздық, дәрілік заттардың жақпаушылығы, үрейленушілік, шырышты қабықтардың қабынуы

  • дәрілік заттар деңгейінің өзгеруі, гипофосфатемия, кеуде қуысының рентенологиялық көрінісінің өзгеруі

Сирек (≥1/10 000, <1/1 000)

  • гемолиздік-уремиялық синдром, тромбоздық тромбоцитопениялық пурпура, панцитопения, коагулопатия, геморрагиялар

  • аса жоғары сезімталдық реакциялары

  • бүйрек үсті безі функциясының жеткіліксіздігі, гонадотропин деңгейінің төмендеуі

  • психикалық бұзылыстар, депрессия

  • ми қан айналымының жедел бұзылуы, энцефалопатия, шеткері нейропатия, естен тану

  • диплопия, скотома

  • естудің нашарлауы

  • қарыншалық тахикардия, қарыншалық тахикардияның torsade de pointes типі, кенеттен болған өлім синдромы, тыныс алу-жүрек функциясының жеткіліксіздігі, жүрек жеткіліксіздігі, миокард инфарктісі

  • өкпе эмболиясы, тереңдегі веналар тромбозы

  • өкпе гипертензиясы, интерстициальді пневмония, пневмонит

  • гастроинтерстициальді геморрагиялар, ішек бітелісі

  • бауыр функциясының жеткіліксіздігі, холестаздық гепатит, гепатоспленомегалия, бауыр тұсының ауыруы, астериксис

  • Стивенс-Джонсон синдромы, везикулярлы бөртпелер

  • бүйрек өзекшелерінің ацидозы, интерстициальді нефрит

  • сүт бездерінің ауыруы

  • тіл мен беттің ісінуі

* Жағымсыз реакциялар жөніндегі деректер позаконазолдың ішке қабылдауға арналған суспензиясын, ішекте еритін қабықпен қапталған таблеткаларын, және инфузияға арналған ерітіндісін қолданған кезде алынды.

§ «Айрықша нұсқаулар» бөлімін қараңыз

Гепатобилиарлық жүйе тарапынан бұзылулар

Позаконазолды пероралдық суспензия түрінде қабылдауды постмаркетингтік бақылау барысында өлімге соқтыратын бауырдың ауыр зақымдануы туралы хабарланды.

Қолдануға болмайтын жағдайлар

  • әсер етуші затқа немесе қосымша заттардың кез келгеніне аса жоғары сезімталдық

  • қастауыш алкалоидтарымен бір мезгілде қолдану

  • CYP3A4 субстраттарымен: терфенадинмен, астемизолмен, цизапридпен, пимозидпен немесе хинидинмен бір мезгілде қолдану, өйткені осы дәрілік заттардың жоғары плазмалық концентрациялары QT аралығының ұзаруына және, өте сирек - қарыншалық тахикардияның «пируэт» (torsades de poіntes) типінің дамуына әкеп соғуы мүмкін

  • ГМГ-КоА-редуктаза тежегіштерімен: симвастатинмен, ловастатинмен және аторвастатинмен бір мезгілде қолдану

Дәрілермен өзара әрекеттесуі

Басқа дәрілік препараттардың позаконазолдың фармакокинетикасына әсер етуі

Ноксафил® препараты УДФ (ІІ фазаның ферменттік реакциясы) глюкурондау жолымен метаболизденеді және р-гликопротеинмен (Р-gp) in vitro шығару үшін субстрат болып табылады. Демек, метаболизмнің осындай жолдарының тежегіштері (мысалы, верапамил, циклоспорин, хинидин, кларитромицин, эритромицин, және басқалар) немесе индукторлары (мысалы, рифампицин, рифабутин, кейбір спазмолитиктер және басқалар) плазмада Ноксафил® препаратының концентрациясын, сәйкесінше, арттыруы немесе төмендетуі мүмкін.

Рифабутин (300 мг тәулігіне 1 рет) Ноксафил® препаратының Сmax және AUC мәндерін, сәйкесінше, 57%-ға және 51%-ға төмендетті. Ноксафил® препараты мен рифабутинді және ұқсас индукторларды (мысалы, рифампицин), оларды қолданудың пациент үшін артықшылығы қаупінен басым жағдайлардан басқасында, бір мезгілде қолдануға жол бермеген жөн (төменде рифабутиннің плазмалық деңгейіне позаконазолдың ықпалы жөніндегі ақпаратты қараңыз).

Эфавиренз (тәулігіне 1 рет 400 мг) Ноксафил® препаратының Сmax және AUC мәндерін, сәйкесінше, 45%-ға және 50%-ға төмендетті. Егер қолданудың пациент үшін артықшылығы қаупінен басым болмаса, Ноксафил® препараты мен эфавирензді бір мезгілде қолдануға жол бермеген жөн.

Фосампренавир. Фосампренавирді Ноксафил® препаратымен бірге қолдану қан плазмасында Ноксафил® препаратының концентрациясының төмендеуіне әкеп соғуы мүмкін. Фосампренавирді Ноксафил® препаратымен бірге қолдану қажет болған жағдайда зең инфекцияларының таралуы мүмкін болғандықтан, емдеу тиімділігін өте мұқият бақылау қажет.

Фосампренавир дозасын (10 күн бойы тәулігіне 2 рет 700 мг) қайталап енгізу Ноксафил® препаратының (1 Күні ішуге арналған суспензияны тәулігіне 1 рет 200 мг, 2 Күні ішуге арналған суспензияны тәулігіне 2 рет 200 мг, содан кейін ішуге арналған суспензияны тәулігіне 2 рет 400 мг 8 күн бойы) Сmax және AUC мәндерін, сәйкесінше, 21%-ға және 23%-ға төмендетеді. Фосампренавирді ритонавирмен бірге қолданғанда позаконазолдың фосампренавирдің деңгейіне ықпалы қазіргі таңда анықталған жоқ.

Фенитоин (тәулігіне 1 рет 200 мг) Ноксафил® препаратының Сmax және AUC мәндерін, сәйкесінше, 41%-ға және 50%-ға төмендетті. Егер қолданғанда пациент үшін артықшылығы қаупінен басым болмаса, Ноксафил® препаратын және фенитоинды және соған ұқсас индукторларды (мысалы, карбамазепин, фенобарбитал, примидон сияқты) бір мезгілде қолдануға жол бермеген жөн.

H2-гистаминдік рецепторларының антагонистері, протонды помпа тежегіштері (ППТ)және антацидтер. Ноксафил® препаратының таблетка түрін антацидтермен, H2-рецепторының антагонистерімен немесе протонды помпа тежегіштерімен бірге тағайындағанда клиникалық тұрғыдан маңызды әсерлер байқалған жоқ, сондықтан дозаны түзету қажет емес.

Позаконазолдың басқа дәрілік препараттарға әсері

Позаконазол CYP3A4 күшті тежегіші болып табылады. Позаконазолды CYP3A4 субстраттарымен (такролимуспен, сиролимуспен, атазанавирмен және мидазоламмен) бір мезгілде тағайындау соңғысының әсерін едәуір күшейтуі мүмкін. Позаконазолды вена ішіне (в/і) CYP3A4 субстраттарымен абайлап тағайындаған жөн; CYP3A4 субстраттарының дозасын төмендету қажет болуы мүмкін. Позаконазолды кейбір пероральді CYP3A4 субстраттарымен бірге қабылдағанда соңғысының плазмалық концентрациясының артқаны байқалады, ол қолайсыз жағымсыз реакциялардың дамуымен қатар жүруі мүмкін. Мұндай жағдайда CYP3A4 субстраттарының плазмалық концентрацияларының және/немесе жағымсыз реакциялардың бақылануын қамтамасыз ету, және қажет болғанда дәрілік препараттың дозасын түзету қажет.

Дені сау еріктілерде позаконазолдың концентрациясы позаконазол қабылдап жүрген науқастардан жоғары болды. Сондықтан науқастарда позаконазолдың CYP3A4 субстраттарына әсері, дені сау еріктілерге қарағанда, біршама төмен болуы мүмкін, және әртүрлі пациенттерде позаконазол экспозициясының құбылмалылығы есебінен айырмашылықтары болуы ықтимал. Позаконазолмен бірге енгізудің CYP3A4 субстраттарының плазмалық деңгейлеріне ықпалы қолдану саласына байланысты өзгеріп отыруы мүмкін.

Терфенадин, астемизол, цизаприд, пимозид, галофантрин және хинидин (CYP3A4 субстраттары). Позаконазол мен терфенадинді, астемизолды, цизапридті, пимозидті, галофантринді немесе хинидинді бірге тағайындауға болмайды. Бірге енгізу осы дәрілік заттардың плазмалық концентрацияларының артуына әкелуі мүмкін, ол QT аралығының ұзаруына және сирек жағдайларда torsades de pointes дамуына әкеп соғады.

Қастауыш алкалоидтары. Ноксафил® препараты қастауыш алкалоидтарының (эрготамин және дигидроэрготамин) плазмалық концентрацияларын арттыруы мүмкін, ол эрготизмді туындатуы мүмкін. Қастауыш алкалоидтары мен Ноксафил® препаратын бір мезгілде қолдануға болмайды.

CYP3A4 арқылы алғаш метаболизденетін ГМГ-КоА-редуктаза тежегіштері (мысалы, симвастатин, ловастатин және аторвастатин). Ноксафил® препараты CYP3A4 метаболизденетін ГМГ-КоА-редуктаза тежегіштерінің плазмалық деңгейін айтарлықтай арттыруы мүмкін. ГМГ-КоА-редуктазасының осы тежегіштерін пайдаланып емдеуді позаконазолмен ем жүргізу кезінде тоқтатқан жөн, өйткені жоғары деңгейлер жедел рабдомиолиздің дамуына әкеп соғуы мүмкін.

Қабіршөп алкалоидтары. Ноксафил® препараты қабіршөп алкалоидтарының (мысалы, винкристиннің және винбластиннің) плазмалық концентрацияларын арттыруы мүмкін, ол нейроуыттық реакцияларды туындатуы мүмкін. Сондықтан, егер тек біріктірілген емнің пациент үшін артықшылығы қаупінен басым болмаса, Ноксафил® препараты мен қабіршөп алкалоидтарын бір мезгілде қолдануға жол бермеген жөн. Осы препараттарды бір мезгілде қолдану қажет болған жағдайда қабыршөп алкалоидтарының дозасын түзету ұсынылады.

Рифабутин. Ноксафил® препараты рифабутиннің Сmax және AUC мәндерін, сәйкесінше, 31%-ға және 72%-ға арттырды. Егер қолданғанда пациенттер үшін артықшылығы қаупінен басым болмаса, Ноксафил® препараты мен рифабутинді бір мезгілде қолдануға жол бермеген жөн (сондай-ақ жоғарыдағы рифабутиннің плазмадағы позаконазол деңгейіне әсер етуіне қатысты ақпаратты қараңыз). Осы препараттарды бір мезгілде қолданғанда қан формуласын және рифабутин концентрациясының жоғарылауымен байланысты жағымсыз әсерлердің (мысалы, увеиттің) дамуын мұқият бақылау ұсынылады.

Сиролимус. Ноксафил®, ішуге арналған суспензиясының қайталанған (16 күн бойы тәулігіне 2 рет 400 мг) дозасын енгізу сиролимустың (бір реттік дозасы - 2 мг) Сmax және AUC мәндерін орта есеппен, сәйкесінше, 6.7 есеге және 8.9 есеге (3.1 - 17.5 есе ауқымда) арттырды. Қазіргі таңда позаконазолдың экспозициясының жекелей құбылмалылығына байланысты өзгеріп отырады деп болжам жасалса да, позаконазолдың сиролимусқа әсері жөнінде деректер жоқ. Позаконазол мен сиролимусты бірге тағайындау ұсынылмайды және, мүмкіндігінше, оған жол бермеген жөн. Егер мұндай тағайындауға жол бермеу мүмкін болмаса, онда позаконазолмен емдеуді бастаған кезде сиролимустың дозасын едәуір төмендету ұсынылады. Сондай-ақ позаконазолмен бірге емдеуге дейін, емдеу кезінде және емдеуден кейін қандағы сиролимустың ең төмен концентрациясын ұдайы бақылау және сиролимустың дозасына тиісінше түзету жүргізу қажет. Позаконазолмен бірге тағайындаған кезде қан плазмасында сиролимустың ең төмен концентрациясы мен AUC арақатынасы өзгеруі мүмкін. Осылай тағайындаудың нәтижесінде әдетте емдік шекте болатын сиролимустың ең төмен концентрациясы емдік жауап беру үшін жеткіліксіз болуы мүмкін. Сондықтан сиролимустың ең төмен концентрациясын емдік шектің жоғарғы шегіне жеткізуге ерекше көңіл бөлу қажет. Клиникалық белгілер мен симптомдарды, зертханалық көрсеткіштерді және тіндердің биопсиясын бақылау қажет.

Циклоспорин. Жүрегін ауыстырып салған және циклоспориннің тұрақты дозасын қолданып жүрген пациенттерде, Ноксафил®, ішуге арналған суспензиясын тәулігіне 1 рет 200 мг дозада қанда циклоспорин концентрациясын арттырды, бұл соңғысының дозасын төмендетуді қажет етті. Клиникалық зерттеулерде нефроуыттылыққа әкеп соққан циклоспорин деңгейінің жоғарылауы салдарынан ауыр жағымсыз реакциялардың даму жағдайлары және өліммен аяқталған лейкоэнцефалопатияның 1 жағдайы орын алды. Ноксафил® препаратын циклоспоринді қабылдап жүрген пациенттерге қолдануды бастар алдында соңғысының дозасын (мысалы, нақты дозаның 3/4 бөлігіне дейін) төмендету керек. Ноксафил® препаратымен емдеу кезінде және оны аяқтағаннан кейін қандағы циклоспорин концентрациясын, қажет болғанда циклоспорин дозасын түзете отырып, мұқият бақылаған жөн.

Такролимус. Ноксафил® препараты такролимустың (бір ретік доза – дене салмағының әр кг шаққанда 0.05 мг) Сmax және AUC мәндерін, сәйкесінше, 121%-ға және 358%-ға арттырды. Ауруханаға жатқызуды және/немесе Ноксафил® препаратын тоқтатуды қажет ететін клиникалық тұрғыдан маңызды дәрілік өзара әрекеттесу жағдайлары белгілі. Ноксафил® препаратын такролимусты қабылдап жүрген пациенттерге қолдануды бастар алдында, соңғысының дозасын (мысалы, нақты дозаның 1/3 бөлігіне дейін) төмендету қажет. Ноксафил® препаратымен емдеу кезеңінде және оны аяқтағанда қандағы такролимус концентрациясын, қажет болғанда такролимус дозасын түзете отырып, мұқият бақылау керек.

АИТВ-протеаза тежегіштері. АИТВ-протеаза тежегіштері CYP3A4 субстраты болып табылатындықтан, Ноксафил® препараты плазмада АИТВ-протеаза тежегіштерінің деңгейін арттырады деп күтіледі. Ноксафил®, ішуге арналған суспензиясын (дені сау пациенттерде 7 күн бойы тәулігіне 2 рет 400 мг) қолдану атазанавирдің (7 күн бойы тәулігіне 1 рет 300 мг) Сmax және AUC мәндерін орта есеппен, сәйкесінше, 2.6 және 3.7 есеге (1.2 - 26 есе ауқымында) арттырады. Ноксафил®, ішуге арналған суспензиясын (7 күн бойы тәулігіне 2 рет 400 мг) бірге тағайындағаннан кейін ритонавирмен бір мезгілде қолданғанда (7 күн бойы тәулігіне 1 рет 300 мг атазанавир + 100 мг ритонавир) атазанавирдің Сmax және AUC мәндері орта есеппен, сәйкесінше, 1.5 және 2.5 есеге (0.9-4.1 есе ауқымында) жоғарылайды. Позаконазолды атазанавирмен немесе атазанавир + ритонавирмен емдеуге қосу қан плазмасында билирубин деңгейінің жоғарылауына әкелді. CYP3A4 цитохромы арқылы метаболизденетін антиретровирустық препараттарды Ноксафил® препаратымен бірге қолданған жағдайда ықтимал жағымсыз және/немесе уытты реакцияларды дер кезінде анықтау мақсатында мұқият бақылау жүргізу ұсынылады.

Мидазолам және CYP3A4 изоферментімен метаболизденетін бензодиазепиндер. Ішке қабылдауға арналған (10 күн бойы тәулігіне 2 рет 200 мг) позаконазол суспензиясына жүргізілген бір зерттеу мидазолам (0.05 мг/кг в/і) AUC экспозициясының 83%-ға артқанын көрсетті. Басқа клиникалық зерттеуде дені сау еріктілерде позаконазолдың қайталанған дозасын (7 күн бойы тәулігіне 2 рет 200 мг) енгізу мидозоламның Сmax және AUC мәндерін (бір реттік доза - 0.4 мг в/і) орта есеппен, сәйкесінше, 1.3 және 4.6 есеге арттырды (1.7-6.4 есе ауқымында). Ноксафил®, ішуге арналған суспензиясын 7 күн бойы тәулігіне 2 рет 400 мг дозада қолдану мидазоламның Сmax және AUC мәндерін (оның в/і енгізгенде), сәйкесінше, 1.6 және 6.2 есеге (1.6-7.6 есе ауқымда) арттырды. Ноксафил® препаратын дозалаудың екі режимі де мидазоламның (бір реттік доза – ішке 2 мг) Сmax және AUC мәндерін, сәйкесінше, 2.2 және 4.5 есеге арттырды. Ноксафил®, ішуге арналған суспензиясын (200 мг немесе 400 мг) миадазоламмен бір мезгілде қолданғанда мидазоламның жартылай шығарылу кезеңін шамамен 3 - 4 сағаттан 8 - 10 сағатқа дейін ұзартады.

CYP3A4 изоферментімен метаболизденетін бензодиазепиндермен (мысалы, мидазолам, триазолам, алпразолам) бірге тағайындағанда, ұзақ әсерлі седативтік әсерінің қаупіне байланысты, дозаны түзету ұсынылады.

CYP3A4 изоферментімен метаболизденетін кальций өзектерінің блокаторлары (мысалы, дилтиазем, верапамил, нифедипин, нисолдипин). Ноксафил® препаратымен бір мезгілде қолданғанда кальций өзектерінің блокаторларын қолданумен байланысты жағымсыз және/немесе уытты реакцияларға жиі мониторинг жүргізу және қажет болғанда олардың дозасын түзету ұсынылады.

Дигоксин. Басқа азолдарды енгізу дигоксин деңгейінің жоғарылауымен байланысты болды. Позаконазол қан плазмасында дигоксиннің концентрациясын арттыруы мүмкін, сондықтан позаконазолмен емдеуге түрткі болғанда немесе тоқтатқанда дигоксиннің деңгейін тексерген жөн.

Сульфонилмочевина туындылары. Кейбір дені сау еріктілерде позаконазолды глипизидпен бір мезгілде енгізген кезде глюкоза концентрациясының төмендегені байқалды. Қант диабеті бар науқастарда глюкоза деңгейіне мониторинг ұсынылады.

Балалар. Дәрілік өзара әрекеттесуіне зерттеулер тек ересектерде ғана жүргізілді.

Айрықша нұсқаулар

Аса жоғары сезімталдық. Қазіргі таңда позаконазол мен зеңге қарсы азолдар тобына жататын басқа да препараттар арасында айқаспалы сезімталдыққа қатысты ақпараттар жоқ. Позаконазолды басқа азолдарға аса жоғары сезімталдығы бар пациенттерге қолданғанда сақтық танытқан жөн.

Бауыр жеткіліксіздігі. Бауыр тарапынан реакциялар (мысалы, АЛТ, АСТ, сілтілік фосфатаза белсенділігінің әлсіз немесе орташа жоғарылауы, қан сарысуындағы жалпы билирубин мөлшерінің жоғарылауы, және/немесе клиникалық тұрғыдан айқын гепатит) әдетте емді тоқтатқаннан кейін қайтымды. Кейбір жағдайларда функциональді көрсеткіштердің қалыпқа келуі емдеуді тоқтатпай-ақ жүреді. Бауыр тарапынан өліммен аяқталған ауыр бұзылулар өте сирек туындады. Ноксафил® препаратын бауыр функциясы бұзылған пациенттерде, клиникалық тәжірибесінің шектеулі болуына байланысты және мұндай пациенттерде плазмадағы позаконазол деңгейлері жоғары болуы мүмкін болғандықтан, абайлап пайдаланған жөн.

Бауыр функциясына мониторинг. Позаконазолмен емдеуді бастағанда және емдеу барысында бауыр функциясын тексеру қажет. Тестілер деректерінің ауытқуы бауырдың өте ауыр зақымдалуының даму дабылы болуы мүмкін, сондықтан бауыр тестілерінде өзгерістері бар пациенттердің жағдайын ұдайы бақылау қажет. Емдеу барысында, бауыр сынамаларын және билирубин деңгейін бақылауды қоса, бауыр функциясына зертханалық талдама жүргізу қажет. Егер клиникалық белгілер мен симптомдар бауыр ауруының бар екендігін көрсетсе, Ноксафил® препаратымен емдеуді тоқтату мүмкіндігін қарастыру қажет.

QT аралығының ұзаруы. Кейбір азолдар QT аралығының ұзаруына әкелді. Позаконазолды CYP3A4 субстраттары болып табылатын және QT аралығын ұзартатын препараттармен бірге қолданбаған жөн. Ноксафил® препаратын жүрек ырғағының бұзылу қаупі жоғары пациенттерге қолданғанда сақтық танытқан жөн, атап айтқанда:

- QT аралығының туа біткен немесе жүре келе ұзаруында

- кардиомиопатия бар болғанда, әсіресе жүрек функциясының жеткіліксіздігімен бірге

- синустық брадикардияда

- диагностикаланған симптоматикалық аритмияда

- QT аралығын ұзартатын дәрілік заттарды пайдаланғанда

Электролиттік теңгерімді, әсіресе қан сарысуындағы калий, магний және кальций мөлшерін бақылаған және, қажет болғанда, Ноксафил® препаратымен емдеуді бастар алдында және емдеу кезінде тиісті түзету жүргізген жөн. Позаконазол CYP3A4 тежегіші болып табылады және CYP3A4 изоферментімен метаболизденетін басқа дәрілік заттармен емдеу кезіндегі көрсетілімдері бойынша белгілі бір жағдайларда ғана пайдаланылуы тиіс.

Асқазан-ішек жолы (АІЖ) тарапынан бұзылулар. Қазіргі таңда диареяны қоса, АІЖ бұзылулары бар пациенттерде фармакокинетикасы жөнінде деректер жеткіліксіз. Сондықтан ауырлығы ауыр дәрежедегі диареясы немесе құсу орын алған пациенттердің жағдайын зең инфекцияларын анықтау үшін бақылау қажет.

Бактерияларға қарсы рифампицин препараттары (рифампицин, рифабутин), құрысуға қарсы кейбір препараттар (фенитоин, карбамазепин, фенобарбитал, примидон) және эфавиренз. Осы препараттармен бірге тағайындаған кезде позаконазолдың концентрациясы едәуір төмендеуі мүмкін, сондықтан пациент үшін пайдасы қаупінен басым болған жағдайларды қоспағанда, осы препараттарды позаконазолмен бірге қолдануға жол бермеген жөн.

Мидазолам және CYP3A4 цитохромы арқылы метаболизденетін басқа да бензодиазепиндер. Ұзақ седативтік әсердің дамуы және тыныс орталығының тежелу қаупінің дамуы мүмкін болғандықтан, позаконазолды CYP3A4 цитохромы арқылы метаболизденетін бензодиазепамдармен (мысалы, мидазолам, триазолам, алпразолам) бірге тағайындау көрсетілімдер бойынша ғана мүмкін болады. CYP3A4 қатысуымен метаболизденетін бензодиазепиндердің дозаларын түзету мүмкіндігін қарастыру қажет.

Қан плазмасындағы позаконазолдың концентрациясы. Позаконазолдың таблетка түрін қабылдағаннан кейін қан плазмасындағы позаконазолдың мөлшері позаконазол суспензиясынан кейінгіге қарағанда жоғары болды. Кейбір пациенттерде позаконазолдың таблетка түрін қабылдағаннан кейін позаконазолдың концентрациясы уақыт өте келе артуы мүмкін. Қазіргі таңда позаконазолдың таблетка түрінің жоғарырақ дозаларының қауіпсіздігі жөніндегі деректер шектеулі.

Жүктілік және лактация кезеңі

Қазіргі таңда позаконазолды жүкті әйелдерге қолдану жөнінде ақпарат жеткіліксіз. Жануарларға жүргізілген зерттеулер тұқым өрбітуге уыттылығын көрсетті. Адамдар үшін зор қаупі белгісіз. Бала туа алатын жастағы әйелдер ем кезінде тиімді контрацепцияны пайдалануы тиіс. Позаконазол, пайдасы шарана үшін қаупінен басым болатын жағдайлардан басқасында, жүктілік кезінде қолданылмауы тиіс.

Позаконазол лактациядағы егеуқұйрықтарда сүтпен бірге бөлініп шығады. Позаконазолдың емшек сүтіне бөлініп шығуы зерттелген жоқ. Позаконазолмен ем тағайындаған кезде емшекпен қоректендіру тоқтатылуы тиіс.

Көлік құралын немесе қауіпті механизмдерді басқару қабілетіне дәрілік заттың ықпал ету ерекшеліктері

Ноксафил® препаратын сақтықпен тағайындаған жөн, өйткені позаконазолды қабылдаған кезде байқалған кейбір жағымсыз реакциялар (мысалы, бас айналу, ұйқышылдық және т.б.) автомобильді және механизмдерді басқару қабілетіне ықпалын тигізуі мүмкін.

Артық дозалануы

Позаконазолдың таблетка түрінің артық дозалануына қатысты деректер қазіргі таңда жоқ.

Позаканазол, ішуге арналған суспензиясына жүргізілген клиникалық зерттеулерде ішке тәулігіне 1600 мг-ге дейін қабылдағанда төменірек дозаларды енгізген кезде байқалғаннан айырмашылығы бар жағымсыз құбылыстар анықталған жоқ. Байқаусызда артық дозалану позаконазолды 3 күн бойы тәулігіне 2 рет 1200 мг-ден қабылдаған 1 пациентте тіркелді. Жағымсыз реакциялар анықталған жоқ.

Емі. Препарат гемодиализ жолымен шығарылмайды. Позаконазолдың артық дозалануының спецификалық емі жоқ. Симптоматикалық ем тағайындау мүмкіндігін қарастырған жөн.

Шығарылу түрі және қаптамасы

Поливинилхлоридті үлбірден және алюминий фольгадан жасалған пішінді ұяшықты қаптамаға 24 таблеткадан салынған.

1 пішінді ұяшықты қаптамадан медициналық қолдану жөніндегі мемлекеттік және орыс тілдеріндегі нұсқаулықпен бірге картон қорапшаға салынған.

Сақтау шарттары

25 ºС-ден аспайтын температурада сақтау керек.

Балалардың қолы жетпейтін жерде сақтау керек.

Сақтау мерзімі

2 жыл

Жарамдылық мерзімі өткеннен кейін қолдануға болмайды.

Дәріханалардан босатылу шарттары

Рецепт арқылы

Өндіруші

Н.В. Органон, Нидерланды

Қаптаушы

Шеринг-Плау Лабо Н.В., Бельгия

Тіркеу куәлігінің иесі

Шеринг-Плау Сентрал Ист АГ, Швейцария

Қазақстан Республикасы аумағында тұтынушылардан дәрілік заттың сапасына қатысты шағымдарды (ұсыныстарды) қабылдайтын және дәрілік заттың тіркеуден кейінгі қауіпсіздігін қадағалауға жауапты ұйымның мекенжайы:

Шеринг-Плау Сентрал Ист АГ компаниясының Қазақстандағы өкілдігі, Алматы қ., Достық даңғылы, 38, "Кең Дала" бизнес орталығы, 3-қабат

тел. +7 (727) 330-42-66, +7 (727) 259-80-84

факс +7 (727) 259-80-90

e-mail: dpoccis2@merck.com, pharmacovigilance.ukraine&cis@merck.com

Прикрепленные файлы

689438041477976268_ru.doc 217.5 кб
366204411477977466_kz.doc 64.59 кб

Отправить прикрепленные файлы на почту

Источники

Национальный центр экспертизы лекарственных средств, изделий медицинского назначения и медицинской техники