Ламифид (250мг)

• русский
• қазақша

• Скачать инструкцию медикамента

Саудалық атауы

Ламифид

Халықаралық патенттелмеген атауы

Тербинафин

Дәрілік түрі

250 мг таблеткалар

Құрамы

Бір таблетканың құрамында

белсенді зат – 281,25 мг тербинафин гидрохлориді

(250 мг тербинафинге баламалы)

қосымша заттар: гидроксипропилметилцеллюлоза, натрий крахмалы гликоляты, микрокристалды целлюлоза (102), коллоидты кремнийдің қостотығы, магний стеараты

Сипаттамасы

Дөңгелек пішінді, ақ немесе сарғыш-ақ түсті, бір жақ бетінде сызығы бар таблеткалар

Фармакотерапиялық тобы

Тері ауруларын емдеуге арналған зеңге қарсы препараттар. Жүйелі қолдануға арналған зеңге қарсы препараттар. Тербинафин

АТХ коды D01ВA02

Фармакологиялық қасиеттері

Фармакокинетикасы

«Алғаш өту» әсеріне байланысты тербинафиннің биожетімділігі 40%-ға жуықты құрайды. Тербинафинді ішке 250 мг дозада қабылдағаннан кейін қан плазмасында ең жоғары концентрацияға 2 сағаттан соң жетеді және 0,97 мкг/мл құрайды. Жартылай сіңу кезеңі 0,8 сағатты құрайды. Тербинафиннің биожетімділігіне тамақ ішудің ықпалы мардымсыз, бұл препарат дозасын түзетуді қажет етпейді. Тербинафин қан плазмасы ақуыздарымен елеулі дәрежеде (99%) байланысады, терінің дермальді қабаты арқылы тез өтеді және липофильді мүйізгекті қабатта жиналады, май бездерінің секреттеріне өтеді, бұл түкті фолликулаларда, шаштарда және май бездеріне бай теріде жоғары концентрацияның пайда болуына әкеледі.Тербинафин сондай-ақ препаратпен емдеуді бастағаннан кейін алғашқы бірнеше апта ішінде тырнақ пластинкаларына өтеді. Тербинафиннің биотрансформациялануы нәтижесінде зеңге қарсы белсенділігі жоқ метаболиттер түзіледі, метаболиттері көбіне несеппен бірге шығарылады. Жартылай шығарылу кезеңі Т1/2 – 17 сағат. Терминальді сатының Т1/2 200–400 сағатты құрайды. Препаратты ұзақ қабылдау тепе-теңдік жай-күй шарттарын сақтаған жағдайда қан плазмасындағы тербинафиннің концентрациясын өзгертпейді. Бүйрек немесе бауыр қызметтері бұзылған емделушілерде шығарылу жылдамдығы төмендетілуі мүмкін, бұл қандағы тербинафин деңгейінің жоғарылауына әкеледі.

Фармакодинамикасы

Ламифид – тербинафин зеңге қарсы әсер ету ауқымы кең аллиламин болып табылады. Төмен концентрацияларда Ламифид дерматофиттерге (Trichophyton rubrum, Т. mentagrophytes, T. verrucosum, Т. tonsurans, Т. violaceum, Microsporum canis, Epidermophyton floccosum), зеңдік және кейбір диморфты саңырауқұлақтарға фунгицидтік әсер етеді. Ламифидтің ашытқы саңырауқұлақтарға қатысты белсенділігі, олардың түріне байланысты, фунгицидтік немесе фунгистатикалық болуы мүмкін. Ламифид саңырауқұлақ жасушасында стериндер биосинтезінің ерте сатысын ерекше төмендете отырып, эргостерин тапшылығына және скваленнің жасушаішілік жиналып қалуына әкеледі, бұл саңырауқұлақ жасушасының тіршілігін жояды. Ламифидтің әсері саңырауқұлақтың жасушалық жарғақшасында скваленэпоксидаза ферментінің тежелуі арқылы жүзеге асады. Бұл фермент Р450 цитохромы жүйесіне жатпайды. Препаратты ішке тағайындағанда теріде, шаштарда және тырнақтарда фунгицидтік әсерді қамтамасыз ететін препарат концентрациялары пайда болады.

Қолданылуы

• тері саңырауқұлақтары дерматофиттер әсерінен болған онихомикозда (тырнақтардың зеңді жұқпасы)

• құрғақ теміреткіде

• тері жұқпаларында (тегіс тері трихофитиясы, шат трихофитиясы, табан трихофитиясы) және кандидомикоздық сепсисті тудыратын ашытқы жұқпаларында (Candida albicans ашытқы зеңі)

Қолдану тәсілі және дозалары

Ішке қабылдауға арналған таблеткалар.

Емдеу ұзақтығы ауру сипатына және ауырлығына байланысты белгіленеді.

Ересектерге, ас қабылдауға қарамай-ақ, тәулігіне 1 рет 250 мг-нан (1 таблетка) тағайындайды.

Онихомикоз

Қол саусақтарының онихомикозында емдеу ұзақтығы – 6 апта, табан онихомикозында емдеу ұзақтығы әдетте 12 аптаны құрайды.

Кейбір жағдайларда тырнақтар баяу өскенде емдеу курсы ұзағырақ болуы мүмкін. Емдеу ұзақтығы басқа да факторларға; науқастың жасына, қатарласқан аурулардың болуына, емдеу курсының бас кезіндегі тырнақтың күйіне байланысты болуы мүмкін. Қолайлы клиникалық әсер микологиялық айығудан және емдеуді тоқтатудан кейін бірнеше айдан соң байқалады. Бұл сау тырнақтардың өсуі үшін қажетті уақыт кезеңімен анықталады.

Тері жабындарының микоздары

Табан дерматомикоздарында (саусақаралық, табан немесе «қысқа шұлық» түріндегі) – 2-6 апта; кеуденің, аяқ-қолдардың дерматомикозында ұсынылатын емдеу ұзақтығы – 2-4 апта.

Тері кандидозында емдеу ұзақтығы 2-4 аптаны құрайды.

Бастың шашты бөлігінің зақымында (бастың шашы бар бөлігінің микоздары) емдеудің ықтимал ұзақтығы 4 аптаны құрайды, бірақ M. сanis жұқтырғанда ол ұзағырақ болуы мүмкін. (Бастың шашы бар бөлігінің микоздары әдетте балаларда кездеседі).

Жүйесіз қолдану немесе емдеуді мезгілінен бұрын тоқтату аурудың қайталануына әкеледі. Сондықтан ауру қоздырғыштарын және оның препаратқа сезімталдығын зертханалық анықтау керек. Толық клиникалық жазылуды, микологиялық зертханалық зерттеумен айғақталғаннан кейін (тері немесе тырнақ қырындыларында қоздырғыштар жоқ болатын), бірнеше апта өткен соң күтуге болады.

Бүйрек қызметінің бұзылулары айқын емделушілер (креатинин клиренсі минутына 50 мл-ден аз немесе сарысудағы креатинин концентрациясы 300 мкмоль/л-ден жоғары) препарат дозасын екі есе азайтқаны жөн – күн сайын 125 мг (1/2 таблетка).

Егде жастағы емделушілер

Егде жастағы адамдарда препаратты дозалау режимін өзгертудің керектігіне немесе оларда өте жастау емделушілерден айырмашылықтары бар жағымсыз әсерлер білінеді деуге негіздер жоқ. Осы жас тобына таблетка түріндегі препаратты қолданған жағдайда бауыр немесе бүйрек қызметінің қатарласа бұзылуы мүмкін екендігін ескерген жөн.

Жұқпалар біліністерінің толық жоғалуы микологиялық айығудан кейін бірнеше аптадан соң басталуы мүмкін.

Жағымсыз әсерлері

Өте жиі

• гастроинтестинальді симптомдар (асқазанның толу сезімі, диспепсия, жүректің айнуы, іштің орташа ауыруы, диарея)

• тері реакциясының ауыр емес түрлері (теріде бөртпелер, есекжем)

• қаңқа-бұлшықет реакциялары (артралгия, миалгия)

• көрудің бұзылуы

Жиі

• бас ауыру

Сирек

• дәмнің бұзылуы, соның ішінде дәм сезудің жоғалуы. Препаратты тоқтатқаннан кейін бірнеше аптадан соң қызметі қалпына келеді

• дәм сезудің бұзылуынан ас қабылдаудың азаюына байланысты дене салмағының төмендеуі

• холестатикалық гепатит

• лимфопения

Өте сирек

• холестаз, гепатобилиарлы қызметтің бұзылуы – негізінен, бауыр қызметінің ауыр жеткіліксіздігі аясында, кейбір өліммен аяқталатын, немесе бауырды ауыстыруды қажет ететін жағдайлар. Көптеген жағдайларда бауыр қызметінің жеткіліксіздігі бар емделушілерде организмінің жалпы жағдайы нашар болды, және Ламифидті қабылдаумен себеп-салдарлық нақты байланысы анықталған жоқ

• нейтропения, агранулоцитоз, тромбоцитопения, лимфоцитопения, панцитопения

• анафилактоидтық реакциялар (ангионевротикалық ісінуді, тері және жүйелік қызыл жегіні қоса есептегенде)

• бас айналу, парестезия, гипестезия

• ауыр тері реакциялары (Стивенс-Джонсон синдромы, уытты эпидермальді некролиз, жедел жалпы экзантематозды пустулез)

• псориазға ұқсас түйіндақтар немесе псориаздың асқынуы

• шаршау

Жиілігі анықталмаған

• шаштың түсуі

• анемия

• анафилактикалық реакциялар, сарысу құю ауруы типті реакция

• васкулит

• аносмия, соның ішінде тұрақты аносмия, гипосмия

• фотосенсибилизация (соның ішінде фотодерматоз, жарыққа сезімтал аллергиялық реакциялар және полиморфты фотодерматоз)

• панкреатит

• қаңқа бұлшықеттерінің жедел некрозы

• тұмауға ұқсас аурулар, гипертермия

• қан креатинкиназасы деңгейінің артуы

Қолдануға болмайтын жағдайлар

• тербинафинге немесе препараттың кез келген компонентіне жоғары сезімталдық

• 18 жасқа дейінгі балалар.

Дәрілермен өзара әрекеттесуі

Тербинафин метаболизмі P450 цитохромы жүйесінің ферменттерінің қатысуымен өтетін дәрілік препараттардың (мысалы, циклоспориндердің, терфенадиндердің (terphenadine), триазоламдардың, бутамидтердің немесе оральді контрацептивтердің) клиренсін арттырады немесе азайтады.

Тербинафин CYP2D6 ферментінің белсенділігін төмендетеді, бұның оны үшциклдық антидепрессанттармен, бета-адреноблокаторлармен, серотонинді қармап қалатын тежегіштермен және В типті моноаминоксидаза тежегіштерімен бір мезгілде тағайындағанда клиникалық маңызы бар.

Келесі дәрілік заттар тербинафиннің әсерін немесе плазмалық концентрациясын күшейтуі мүмкін:

Циметидин тербинафиннің клиренсін 33%-ға төмендетеді.

Флуконазол тербинафиннің және CYP2C9- және CYP3A4- тежелген ферменттің Сmax және AUC мәнінің 52%-ға және 69%-ға артуына әкеледі. CYP2C9 және CYP3A4 басқа да кетоконазол және амиодарон сияқты тежегіштері де тербинафинмен бірге қолданғанда әсерінің едәуір артуына әкелуі әбден мүмкін.

Келесі дәрілік заттар тербинафиннің әсерін немесе плазмалық концентрациясын төмендетуі мүмкін:

Рифампицин тербинафиннің клиренсін 100%-ға арттырады.

Тербинафиннің басқа дәрілік заттарға ықпалы

Тербинафин антипириннің немесе дигоксиннің клиренсіне ықпалын тигізбейді.

Тербинафин флуконазолдың фармакокинетикасына ықпалын тигізбейді.

Тербинафиннің және ко-тримоксазолдың (триметоприм және сульфаметоксазол), зидовудиннің немесе теофиллиннің өзара әрекеттесуі, потенциальді түрде бірге енгізілетін препараттар сияқты, клиникалық тұрғыдан маңызды емес.

Кейбір жағдайларда Ламифидті оральді контрацептивтермен бір мезгілде қабылдаған емделушілерде етеккір оралымының бұзылғаны тіркелді.

Тербинафин келесі заттардың әсерін немесе плазмадағы концентрациясын күшейтуі мүмкін: кофеин, варфарин, дезипрамин (82%-ға).

Тербинафин келесі заттардың әсерін немесе плазмадағы концентрациясын төмендетуі мүмкін: циклоспорин, кодеин, трамадол.

Препараттың клиникалық өзара әрекеттесуі балаларда зерттелген жоқ.

Айрықша нұсқаулар

Бүйрек немесе бауыр қызметінің жеткіліксіздігі бар емделушілерге, созылмалы маскүнемдікке шалдыққан науқастарға, сүйек кеміктік қан түзілуі тежелгенде, ісіктерде, зат алмасу ауруларында, аяқ-қол қантамырларының окклюзиялық ауруларында, сондай-ақ (жеткілікті клиникалық тәжірибенің жоқтығын ескеріп) балаларға сақтықпен қолданған жөн.

Ламифидтің жергілікті қолданылатын дәрілік түрімен салыстырғанда пероральді түрде қолданылатын таблетка түріндегісі түрлі түсті теміреткіге әсер етпейді.

Бауырдың созылмалы қатарласқан аурулары бар емделушілерге ұсынылатын дозаның жартысын тағайындаған жөн. Емдеуді бастар алдында бауыр қызметінің бастапқы көрсеткіштеріне баға беру және емдеу барысында оларды жүйелі түрде бақылап отыру керек.

Жүктілік және лактация кезеңі

Препаратты жүктілікте және лактация (емшек емізу) кезеңінде қолдануға болмайды. Егер потенциальді клиникалық пайдасы ұрық немесе нәресте үшін потенциальді қаупінен басым болса, препарат қатаң көрсетіліммен және бақылаумен ғана қолданылуы мүмкін. Препаратты лактация кезеңінде қолдану қажет болған жағдайда емшек емізуді тоқтату қажет.

Дәрілік заттың көлікті немесе қауіпті механизмдерді басқару қабілетіне ықпал ету ерекшеліктері

Ықпалын тигізбейді.

Артық дозалануы

Симптомдары: бас ауыру, жүректің айнуы, асқазанның ауыруы және бас айналу

Емі: симптоматикалық ем жүргізу

Шығарылу түрі және қаптамасы

ПВХ/ПЭ/ПВДХ үлбірден және алюминий фольгадан жасалған пішінді ұяшықты қаптамаға 14 таблеткадан салынған.

Пішінді ұяшықты 1 немесе 2 қаптама медицинада қолданылуы жөнінде мемлекеттік және орыс тілдеріндегі нұсқаулықпен бірге картон пәшкеге салынған.

Сақтау шарттары

Құрғақ, жарықтан қорғалған жерде, 25ºС-ден аспайтын температурада сақтау керек.

Балалардың қолы жетпейтін жерде сақтау керек!

Сақтау мерзімі

2 жыл

Қаптамасында көрсетілген жарамдылық мерзімі өткеннен кейін қолдануға болмайды.

Дәріханадан босатылу шарттары

Рецепт арқылы

Өндіруші

ABDI IBRAHIM

Хадымкой-Стамбул

Түркия

Тіркеу куәлігінің иесі

"ABDI IBRAHIM", Түркия

Тұтынушылардан өнім (тауар) сапасы жөнінде шағымдарды Қазақстан Республикасы аумағында қабылдайтын ұйымның мекенжайы "АБДИ ИБРАХИМ ГЛОБАЛ ФАРМ" ЖШС

Қазақстан Республикасы, Алматы қ-сы, Жандосов к-сі, 184 Г

тел: +7 (727) 309 74 07,

факс: +7 (727) 309 74 14,

e-mail: globalzavod@mail.ru