Коксибия (60 мг)

Коксибия

Эторикоксиб

Үлбірлі қабықпен қапталған таблеткалар, 60 мг, 90 мг, 120 мг

Бір таблетканың құрамында

белсенді зат - эторикоксиб 60 мг, 90 мг немесе 120 мг

қосымша заттар: кальцийдің сусыз гидрофосфаты, микрокристалды целлюлоза, повидон, магний стеараты, натрий кроскармеллозасы

үлбірлі қабықтың құрамы:

Opadry II Green 32K510002 (гипромеллоза 15 сПз (Е 464), лактоза моногидраты, титанның қостотығы (Е 171), триацетин (Е 1518), индигокармин алюминий лагы (Е 132) (11 - 14) (3 - 5 %), темірдің сары тотығы (Е 172)) – 60 мг дозалары үшін.

Opadry II White 32K580000С (гипромеллоза 15 сПз (Е 464), лактоза моногидраты, титанның қостотығы (Е 171), триацетин (Е 1518) – 90 мг дозалары үшін.

Opadry II Green 32K510003 (гипромеллоза 15 сПз (Е 464), лактоза моногидраты, титанның қостотығы (Е 171), триацетин (Е 1518), индигокармин алюминий лагы (Е 132) (11 - 14) (3 - 5 %), темірдің сары тотығы (Е 172)) – 120 мг дозалары үшін.

Қою-жасыл түсті үлбірлі қабықпен қапталған, екі жақ беті дөңес, дөңгелек пішінді таблеткалар (60 мг дозасы үшін).

Ақ түсті үлбірлі қабықпен қапталған, екі жақ беті дөңес, дөңгелек пішінді таблеткалар (90 мг дозасы үшін).

Бозғылт-жасыл түсті үлбірлі қабықпен қапталған, екі жақ беті дөңес, дөңгелек пішінді таблеткалар (120 мг дозасы үшін).

Сүйек-бұлшықет жүйесі. Қабынуға қарсы және ревматизмге қарсы препараттар. Қабынуға қарсы және ревматизмге қарсы стероидты емес препараттар. Коксибтер. Эторикоксиб

АТХ коды М01АН05

Сіңуі

Эторикоксиб ішке қабылдаған кезде тез сіңеді. Ішке қабылдаған кездегі абсолюттік биожетімділігі 100%-ға жуықты құрайды. Ересектерде препаратты ашқарынға тәулігіне бір рет 120 мг дозада қолданғанда тепе-тең жағдайға жеткенше қан плазмасындағы орташа геометриялық ең жоғары концентрациясы (Сmax) 3,6 мкг/мл құрады және шамамен 1 сағаттан кейін (Tmax) байқалды. Қисық астындағы орташа геометриялық аудан (AUC0-24сағ.) 37,8 мкг•сағ./мл құрады. Емдік доза ауқымындағы эторикоксибтің фармакокинетикасы дозаға тәуелді сипатқа ие болады.

Тамақтану кезінде (құрамында май мөлшері көп тамақ) эторикоксибті 120 мг дозада қабылдағанда сіңу дәрежесіне клиникалық тұрғыдан маңызды ықпалы байқалған жоқ. Сіңу жылдамдығы өзгерді, бұл Сmax мәнінің 36%-ға төмендеуіне және Tmax 2 сағатқа артуына әкелді. Осы нәтижелер клиникалық тұрғыдан маңызды деп саналмайды.

Таралуы

Эторикоксиб 0,05-тен 5 мкг/мл-ге дейінгі концентрацияларда адамдағы қан плазмасының ақуыздарымен шамамен 92%-ға байланысады. Тепе-тең жағдайда таралу көлемі 120 л-ге жуықты құрайды.

Эторикоксиб егеуқұйрықтарда және үй қояндарында плаценталық бөгет арқылы, сондай-ақ егеуқұйрықтарда гематоэнцефалдық бөгет арқылы өтеді.

Метаболизмі

Эторикоксиб қарқынды түрде метаболизденеді. Эторикоксибтің 1%-дан азы өзгермеген күйінде бүйрек арқылы шығарылады. Метаболизмінің негізгі жолы – цитохромдар жүйесінің ферменттерімен катализденетін 6'-гидроксиметилэторикоксибтің түзілуі. CYP3A4 изоферменті эторикоксибтің метаболизміне мүмкіндік береді. CYP2D6, CYP2C9, CYP1A2 және CYP2C19 изоферменттері сондай-ақ метаболизмнің негізгі жолын катализдеуі мүмкін, бірақ олардың сандық әсер етуі зерттелген жоқ.

Адамда 5 метаболиті анықталды. Негізгі метаболиті 6'-гидроксиметилэторикоксибтің әрі қарай тотығуының нәтижесінде түзілетін 6'-карбоксиацетилэторикоксиб болып табылады. Осы негізгі метаболиттердің еленетіндей белсенділігі жоқ, немесе циклооксигеназа-2 (ЦОГ-2) әлсіз тежегіші болып табылады. Осы метаболиттердің бірде-біреуі циклооксигеназа-1-ді (ЦОГ-1) тежемейді.

Шығарылуы

Таңбаланған радиоактивті эторикоксибті 25 мг дозада вена ішіне бір реттік енгізуден кейін эторикоксибтің 70%-ы несеппен, 20%-ы нәжіспен, көбіне метаболиттер түрінде шығарылды. 2%-дан азы өзгермеген күйінде табылады. Эторикоксиб негізінен метаболизм жолымен, кейіннен бүйрек арқылы шығарылады.

120 мг эторикоксибті күн сайын қабылдағанда жиналып қалу коэффициенті 2-ге жуық болатын тепе-тең концентрацияға 7 күннен соң жетеді, ол 22 сағатқа жуық жартылай шығарылу кезеңіне сәйкес келеді. Вена ішіне 25 мг енгізгеннен кейін плазмалық клиренсі шамамен 50 мл/мин құрайды.

Пациенттердің ерекше топтары

Егде жастағылар

Егде жастағы (65 жас және одан үлкен) пациенттерде эторикоксибтің фармакокинетикасы жас пациенттердегімен ұқсас болады.

Жынысы

Эторикоксибтің фармакокинетикасы еркектер мен әйелдерде ұқсас болады.

Бауыр функциясының бұзылуы

Эторикоксибті 60 мг дозада тәулігіне бір рет қабылдаған, бауыр функциясының ауырлығы жеңіл дәрежеде бұзылулары бар (Чайлд-Пью шкаласы бойынша 5-6 балл) пациенттерде, препаратты сол дозада қабылдаған дені сау адамдармен салыстырғанда, AUC көрсеткіші орта есеппен 16%-ға жоғары болды. Эторикоксибті 60 мг дозада күнара қабылдаған, бауыр функциясының ауырлығы орташа дәрежеде бұзылулары бар (Чайлд-Пью шкаласы бойынша 7-9 балл) пациенттерде AUC көрсеткішінің орташа мәні эторикоксибті 60 мг дозада күн сайын қабылдаған дені сау адамдардағы сияқты болды. Осы популяцияда күніне бір рет 30 мг эторикоксибті қолдану зерттелген жоқ.

Бауыр функциясының бұзылуы ауыр (Чайлд-Пью шкаласы бойынша ≥10 балл) болатын пациенттерде препаратты қолдану жөнінде деректер жоқ.

Бүйрек функциясының бұзылуы

Бүйрек функциясы орташа және ауыр дәрежеде бұзылған пациенттерде, сондай-ақ гемодиализде жүрген, бүйрек функциясының терминальді сатыдағы созылмалы жеткіліксіздігі (БСЖ) бар пациенттерде эторикоксибтің 120 мг бір реттік дозасын қолданудың фармакокинетикалық көрсеткіштерінің дені сау адамдардағы көрсеткіштерден елеулі айырмашылықтары жоқ. Шығарылуына гемодиализдің ықпалы мардымсыз (диализ клиренсі - минутына 50 мл-ге жуық).

Фармакодинамикасы

Емдік дозаларда пероральді түрде қабылданған эторикоксиб циклооксигеназа-2-нің (ЦОГ-2) селективті тежегіші болып табылады. Тәуліктік 150 мг-ге дейінгі дозада қолданғанда препарат дозаға байланысты ЦОГ-1-ні тежемей, ЦОГ-2-ні тежеді. Эторикоксиб асқазанның шырышты қабығында простагландиндердің синтезін тежемейді және тромбоциттер функциясына ықпалын тигізбейді.

Циклооксигеназа простагландиндердің түзілуіне қатысты жауап береді. Циклооксигеназа екі изоформаға: ЦОГ-1 және ЦОГ-2 бөлінген. ЦОГ-2 қабынуға қарсы әртүрлі медиаторлардың әсер етуімен индукцияланатын изофермент болып табылады және ауырудың, қабынудың және қызбаның простаноидтық медиаторларының синтезіне жауап беретін негізгі фермент ретінде қаралады. ЦОГ-2 овуляция, имплантация және артериялық ағынның жабылу, бүйрек және орталық жүйке жүйесі функцияларының реттелу үдерістеріне (қызба индукциясы, ауыруды сезіну, когнитивтік функция) қатысады. Ол сондай-ақ ойық жараның жазылу үдерісінде белгілі бір рөльді атқаруы мүмкін. ЦОГ-2 адамда асқазанның ойық жарасын қоршап жатқан тіндерден табылды, бірақ оның ойық жараны жазу үшін маңызы анықталған жоқ.

Ересектерде және 18 жастан асқан жасөспірімдерде:

• остеоартритте, ревматоидтық артритте, шорбуынданған спондилитте, сондай-ақ жедел подагралық артритпен байланысты ауыру мен қабыну симптомдарын симптоматикалық емдеу үшін

• стоматологиялық операциялармен байланысты орташа ауыруды қысқа мерзімдік емдеу үшін

ЦОГ-2 селективті тежегішін тағайындау туралы шешім пациент үшін барлық жекелей қауіптерге берілген бағаға негізделуі тиіс.

Тамақ ішуге қарамай, ішке қабылдайды. Егер препаратты тамақ ішер алдында қабылдаса, оның әсері тезірек басталады, мұны симптомдарды тезірек бәсеңдету қажет болған жағдайда ескерген жөн.

Эторикоксибті қолданған кездегі жүрек-қантамыр асқынуларының туындау қаупі дозаны және қолдану ұзақтығын арттырған кезде ұлғаятын болғандықтан, барынша ең қысқа уақыт кезеңі ішінде тиімді ең төмен дозаларды пайдалану керек. Симптоматикалық емдеу қажеттілігіне және емге жауабына, әсіресе остеоартриті бар пациенттерде, мезгіл-мезгіл баға беріп отыру керек.

Остеоартрит

Жекелеген жағдайларда симптомдарды жеңілдету жеткіліксіз болғанда эторикоксибтің өте төмен дозаларын қолданудың тиімділігін арттыру үшін тәулігіне бір рет 60 мг доза қолданылуы мүмкін. Ең жоғары тәуліктік доза 60 мг-ден аспауы тиіс. Емдік әсері болмаған жағдайда емдеудің мүмкін болатын басқа әдістері туралы мәселені қарастыру керек.

Ревматоидтық артрит (РА) және Шорбуынданған спондилит

Ұсынылатын доза тәулігіне бір рет 60 мг эторикоксибті құрайды. Жекелеген жағдайларда симптомдардың жеңілдеуі жеткіліксіз болғанда тиімділігін арттыру үшін эторикоксибтің дозасы тәулігіне бір рет 90 мг-ге дейін арттырылуы мүмкін. Клиникалық тұрақтанудан кейін эторикоксибтің дозасы тәулігіне бір рет 60 мг-ге дейін төмендетілуі мүмкін. Емдік әсері жоқ болған кезде емдеудің басқа ықтимал әдістері туралы мәселені қарастыру керек.

Қатты ауыру жағдайлары

Қатты ауыру қабаттаса жүретін жағдайларда эторикоксибті жедел симптоматикалық кезеңде ғана қолданған жөн.

Жедел подагралық артрит

Ұсынылатын доза тәулігіне бір рет 120 мг эторикоксибті құрайды. Емдеу курсы 8 күннен аспауы тиіс.

Стоматологияда операциядан кейінгі ауыру

Ұсынылатын доза 3 күннен аспайтын, тәулігіне бір рет 90 мг эторикоксибті құрайды. Кейбір пациенттерге осы кезеңде, эторикоксибтен басқа, операциядан кейінгі ауыруды сездірмеуге қосымша әрекеттер қажет болуы мүмкін.

Әрбір көрсетілім үшін қолдануға ұсынылғанннан артық дозалардың қосымша тиімділігі жоқ, немесе зерттелмеген.

Сондықтан:

• ОА-да доза тәулігіне 60 мг-ден аспауы тиіс

• РA-да және шорбуынданған спондилитте доза тәулігіне 90 мг-ден аспауы тиіс

• жедел подаграда доза тәулігіне 120 мг-ден аспауы тиіс, ал ем жүргізу 8 күннен аспайды

• стоматологиялық операциядан кейін қатты ауырғанда доза тәулігіне 90 мг-ден аспауы тиіс, ал ем жүргізу 3 күннен аспайды.

Пациенттердің ерекше топтары

Егде жастағы пациенттер

Егде жастағы пациенттер үшін дозаны түзетудің қажеттілігі жоқ. Басқа препараттарды қолданған кездегідей, егде жастағы пациенттерде сақтық танытқан жөн.

Бауыр функциясы бұзылған пациенттер

Бауыр функциясының ауырлығы жеңіл дәрежедегі бұзылулары (Чайлд-Пью шкаласы бойынша 5-6 балл) бар пациенттерде эторикоксибтің тәулігіне 1 рет 60 мг дозасын арттырмау керек. Бауыр функциясының ауырлығы орташа дәрежедегі бұзылулары бар пациенттерде препаратты қолданғанда сақтық таныту ұсынылады, өйткені препаратты пациенттердің осы тобында қолданудың клиникалық тәжірибесі шектеулі. Бауыр функциясының ауыр бұзылулары (Чайлд-Пью шкаласы бойынша ≥ 10 балл) бар пациенттерде қолданудың клиникалық тәжірибесі жоқ болғандықтан, препаратты пациенттердің осы тобына қолдануға болмайды.

Бүйрек функциясы бұзылған пациенттер

Креатинин клиренсі ≥ 30 мл/мин болатын пациенттерде препараттың дозасын түзетудің қажеттілігі жоқ. Креатинин клиренсі < 30 мл/мин пациенттерде эторикоксибті қолдануға болмайды.

Жағымсыз дәрілік реакциялардың туындау жиілігі ДДҰ жіктемесіне сәйкес белгіленген: өте жиі (>1/10), жиі (>1/100, ≤1/10), жиі емес (>1/1000, ≤1/100), сирек (>1/10000, ≤1/1000), өте сирек (1/10000-нан азырақ), жиілігі белгісіз (қолда бар деректер бойынша анықтау мүмкін емес).

Өте жиі (≥ 1/10)

• абдоминальді ауыру

Жиі ( > 1/100-ден <1/10 дейін)

• астения/қажығыштық, тұмау тәрізді симптомдар

• бас айналу, бас ауыру

• бронхтың түйілуі

• жүректің қағуы, аритмия, гипертензия

• ісінулер/сұйықтықтың іркілуі

• іш қату, метеоризм, гастрит, қыжыл/гастроэзофагеальді рефлюкс, диарея, диспепсия, эпигастрияда жайсыздық сезімі, жүректің айнуы, құсу, эзофагит, ауыз қуысында ойық жара

• альвеолярлы остеит

• АЛТ, АСТ деңгейлерінің жоғарылауы

• экхимоз

Жиі емес ( > 1/1000-нан < 1/100 дейін)

• дәмнің бұзылуы, ұйқысыздық, парестезия/гипестезия, ұйқышылдық

• үрейлену, депрессия, ақыл-ой қызметінің нашарлауы, елестеулер

• көздің анық көрмеуі, конъюнктивит

• құлақтың шуылдауы, вертиго

• жүрекшелер фибрилляциясы, тахикардия, жүрек функциясының іркілген жеткіліксіздігі, ЭКГ-де спецификалық емес өзгерулер, стенокардия, миокард инфарктісі

• ысынулар, инсульт, ми қан айналымының қатты бұзылуы, транзиторлық ишемиялық шабуыл, гипертониялық криз, васкулит

• кеуде қуысының ауыруы, жөтел, ентігу, мұрыннан қан кету

• іштің желденуі, ішек жиырылуының өзгеруі, ауыз ішінің құрғауы, гастродуоденальді ойық жаралар, пептикалық ойық жаралар, гастроинтестинальді тесілуді қоса және қан кету, тітіркенген ішек синдромы, панкреатит

• аса жоғары сезімталдық реакциялары (беттің ісінуі, қышыну, бөртпе, эритема, есекжем), бұл шұғыл медициналық жәрдемді қажет етуі мүмкін

• гастроэнтерит, тыныс алу жолдарының жоғары бөлімдерінің инфекциялары, несеп шығару жолдарының инфекциялары

• түйілулер/бұлшықет құрысулары, қаңқа-бұлшықет ауыруы /қозғала алмаушылық

• протеинурия, сарысулық креатинин деңгейінің жоғарылауы, бүйрек функциясының жеткіліксіздігі

• анемия (көбіне асқазан-ішектік қан кетулер нәтижесінде), лейкопения, тромбоцитопения

• қан мочевинасы азоты, креатинфосфокиназа деңгейлерінің жоғарылауы, гиперкалиемия, несеп қышқылы деңгейінің жоғарылауы

• тәбеттің нашарлауы немесе күшеюі, салмақ қосу

Сирек ( > 1/10000-нан < 1/1000 дейін)

• ангионевроздық ісіну, анафилаксиялық / анафилактоидтық реакциялар, шокты қоса

• Стивенс-Джонсон синдромы, уытты эпидермальді некролиз, тіркелген дәрілік эритема

• сананың шатасуы, қозу жағдайы

• гепатит, бауыр функциясының жеткіліксіздігі, сарғаю

• қанда натрий деңгейінің төмендеуі

Келесі жағымсыз реакциялар ҚҚСП қабылдаумен байланысты тіркелді, және эторикоксиб үшін де жоққа шығару мүмкін емес:

• интерстициальді нефритті қоса, нефроуыттылық және нефроздық синдром

Егер нұсқаулықта көрсетілген жағымсыз реакциялардың кез келгені өршісе немесе нұсқаулықта көрсетілмеген кез келген басқа реакциялар білінсе, мұны дәрігерге дереу мәлімдеу керек.

• әсер етуші затқа немесе препараттың құрамына кіретін кез келген басқа компонентке аса жоғары сезімталдық

• өршу сатысындағы пептикалық ойық жаралар немесе жедел асқазан-ішектік қан кету

• анамнезінде ацетилсалицил қышқылын немесе циклооксигеназа-2 (ЦОГ-2) тежегіштерін қоса, ҚҚСП қолданудан кейін болған бронхтың түйілуі, жедел ринит, назальді полиптер, ангионевроздық ісіну, есекжем және басқа да аллергиялық реакциялары бар пациенттер

• жүктілік және лактация кезеңі

• бауыр функциясының ауыр бұзылулар (қан сарысуының альбумині < 25 г/л немесе Чайлд-Пью шкаласы бойынша ≥ 10 балл)

• бүйректің анықталған кретинин клиренсі < 30 мл/мин

• 18 жасқа дейінгі балалар мен жасөспірімдерге

• ішектің қабыну аурулары

• жүрек функциясының іркілген жеткіліксіздігі (NYHA II-IV)

• бақыланбайтын, 140/90 мм. с. б.-дан жоғары тұрақты артериялық гипертензия

• жүректің анықталған ишемиялық ауруы, шеткері артериялардың аурулары және/немесе цереброваскулярлық ауру

Фармакодинамикалық өзара әрекеттесуі

Пероральді антикоагулянттар

Варфарин қабылдап жүрген пациенттерде күніне 120 доза эторикоксиб қабылдау протромбин уақытының Халықаралық қалыптасқан қатынас (ХҚҚ) мәнінің шамамен 13%-ға артуымен қоса жүрді. Пероральді антикоагулянттарды қабылдап жүрген пациенттерде, әсіресе емдеудің алғашқы бірнеше күні ішінде эторикоксибті тағайындар алдында немесе дозасын түзеткен кезде протромбин уақытының және ХҚҚ көрсеткіштерін бақылаған жөн.

Диуретиктер, ангиотензин-өзгертетін фермент (АӨФ) тежегіштері және ангиотензин II антагонистері

ҚҚСП диуретиктердің және гипертензияға қарсы басқа да препараттардың әсерін бәсеңдетуі мүмкін. Бүйрек функциясы әлсіреген кейбір пациенттерде (мысалы, дегидратациясы бар пациенттерде немесе бүйрек функциясы бұзылған егде жастағы пациенттерде) АӨФ тежегішін немесе ангиотензин II антагонисін және циклооксигеназаны тежейтін препараттарды бір мезгілде қолдану әдетте қайтымды сипатқа ие бүйрек функциясының жедел жеткіліксіздігін қоса, бүйрек функциясының әрі қарай нашарлауына әкелуі мүмкін. Сондықтан мұндай біріктірілімді әсіресе егде жастағы пациенттерге сақтықпен қолдану керек. Пациенттер адекватты түрде гидратациялануы тиіс. Біріктірілген емнің бас кезінде, сондай-ақ әрі қарай мезгіл-мезгіл бүйрек функциясына мониторинг жүргізу керек.

Ацетилсалицил қышқылы

Эторикоксибті жүрек-қантамыр ауруларының профилактикасына арналған ацетилсалицил қышқылының төмен дозаларымен бір мезгілде қолдануға болады. Тепе-тең жағдайда тәулігіне 1 рет 20 мг доза эторикоксиб төмен дозалардағы (тәулігіне 1 рет 81 мг) ацетилсалицил қышқылының антитромбицитарлық белсенділігіне ықпалын тигізген жоқ. Алайда төмен дозаларда ацетилсалицил қышқылын және эторикоксибті бір мезгілде қолдану, эторикоксибтің жалғыз өзін қабылдаумен салыстырғанда, АІЖ ойық жаралану және басқа да асқынулар жиілігінің артуына әкелуі мүмкін. Эторикоксибті жүрек-қантамыр асқынуларының профилактикасы үшін ұсынылғаннан артық дозалардағы ацетилсалицил қышқылымен, сондай-ақ басқа да ҚҚСП-пен бір мезгілде қолдану ұсынылмайды.

Циклоспорин және такролимус

Эторикоксибтің осы препараттармен өзара әрекеттесуі зерттелген жоқ, алайда ҚҚСП-ті циклоспоринмен және такролимуспен бір мезгілде қолдану осы препараттардың нефроуыттық әсерін күшейтуі мүмкін. Эторикоксибті осы препараттардың кез келгенімен бір мезгілде қолданғанда бүйрек функциясын бақылау керек.

Эторикоксибтің басқа дәрілік препараттардың фармакокинетикасына ықпалы

Литий

ҚҚСП литийдің бүйрек арқылы шығарылуын азайтады және, демек, қан плазмасындағы литий концентрациясын арттырады. Қажет болған кезде қандағы литий концентрациясына жиі бақылау жүргізеді және ҚҚСП-пен бірге қолдану кезеңінде, сондай-ақ ҚҚСП қабылдауды тоқтатқан кезде литийдің дозасын түзетеді.

Метотрексат

Эторикоксиб 60 мг және 90 мг дозаларда қан плазмасындағы концентрацияға және метотрексаттың бүйректік клиренсіне ықпалын тигізген жоқ. Метотрексатты және эторикоксибті 120 мг доза да бір мезгілде қолданғанда метотрексаттың бүйректік клиренсінің (13%-ға) төмендегені және оның плазмадағы концентрациясының (28%-ға) жоғарылағаны байқалды. Эторикоксибті және метотрексатты бір мезгілде тағайындағанда метотрексаттың уытты әсерлерінің ықтимал пайда болуы тұрғысында бақылау жүргізген жөн.

Пероральді контрацептивтер

Эторикоксибті 21 күн бойы 60 мг дозада құрамында 35 мкг этинилэстрадиол (ЭЭ) және 0,5-тен бастап 1 мг дейін норэтиндрон бар пероральді контрацептивтермен бір мезгілде қабылдау ЭЭ үшін AUC0-24сағ. мәнін 37%-ға арттырды. 120 мг доза эторикоксибті жоғарыда көрсетілген пероральді контрацептивтермен бір мезгілде немесе 12 сағ. аралықпен қабылдау ЭЭ үшін тепе-тең AUC0-24сағ. мәнін 50-60%-ға арттырды. ЭЭ концентрациясының осы артуын эторикоксибпен бір мезгілде қолдануға арналған тиісті пероральді контрацептивті таңдаған кезде ескерген жөн. Осындай факт пероральді контрацептивтерді қолданумен байланысты жағымсыз құбылыстардың (мысалы, қауіп тобындағы әйелдерде веноздық тромбоэмболиялар) дамуы жиілігінің артуына әкелуі мүмкін.

Орнын басатын гормональді ем (ОГЕ)

120 мг доза эторикоксибті құрамында конъюгацияланған эстрогендер (0,625 мг) бар орнын басатын гормональді емге арналған препараттармен бір мезгілде 28 күн бойы қабылдау конъюгацияланбаған эстронда (41%), эквилинде (76%) және 17-β-эстрадиолда (22%) тепе-тең AUC0-24сағ. орташа мәнін арттырады. Ұзақ уақыт қолдануға ұсынылған эторикоксиб (60 және 90 мг) дозаларының ықпалы зерттелген жоқ. 120 мг доза эторикоксиб осы эстрогендік компоненттердің экспозициясын (AUC0-24сағ.), құрамында конъюгацияланған эстрогендері бар препаратпен монотерапия жүргізумен салыстырғанда, соңғысының дозасын 0,625 мг-нан 1,25 мг дейін арттырған кезде екі еседен азыраққа өзгертті. Осындай жоғарылатудың клиникалық мәні белгісіз. Эторикоксибтің және құрамында конъюгацияланған эстрогендердің жоғары дозалары бар препараттың біріктірілімін қолдану зерттелген жоқ. Эстрогендер концентрациясының артатынын менопаузадан кейінгі кезеңде эторикоксибпен бір мезгілде тағайындағанда, қолдану үшін гормональді препаратты таңдағанда ескерген жөн, өйткені эстрогендердің экспозициясының артуы орнын алмастыратын гормональді еммен байланысты жағымсыз құбылыстардың даму қаупін арттыруы мүмкін.

Преднизон / преднизолон

Эторикоксиб преднизонның / преднизолонның фармакокинетикасына клиникалық тұрғыдан маңызды ықпалын тигізген жоқ.

Дигоксин

Эторикоксибті 120 мг дозада күніне бір рет 10 күн бойы дені сау еріктілерге қолданғанда тепе-тең жағдайда AUC0-24сағ. өзгерулер немесе дигоксиннің бүйрек арқылы шығарылуына ықпалы байқалған жоқ. Дигоксиннің Сmax көрсеткіштерінің (шамамен 33%-ға) артқаны білінді. Мұндай жоғарылау, әдеттегідей, пациенттердің көбісінде елеулі емес. Алайда эторикокcибті және дигоксинді бір мезгілде қолданғанда дигоксиннің уытты әсерінің даму қаупі жоғары болатын пациенттердің жай-күйін бақылаған жөн.

Сульфотрансферазалармен метаболизденетін препараттар

Эторикоксиб адамның сульфотрансфераза тежегіші, атап айтқанда, SULT1E1 болып табылады және қан сарысуында этинилэстрадиолдың концентрациясын арттыруы мүмкін. Қазіргі таңда әртүрлі сульфотрансферазалардың ықпалы жөнінде деректер жеткіліксіз алынғандықтан, ал көптеген препараттарды қолдану үшін олардың клиникалық маңыздылығы әлі зерттелмегендіктен, негізінен эторикоксибті адамның сульфотрансферазаларымен метаболизденетін басқа препараттармен (мысалы, пероральді сальбутамол және миноксидил) бір мезгілде тағайындағанда сақ болған жөн.

Эторикоксибтің цитохромдар жүйесінің изоферменттерімен метаболизденетін препараттарға ықпалы

Р450 (CYP) 1А2, 2С9, 2С19, 2D6, 2Е1 және ЗА4 цитохромы изоферменттерінің эторикоксибпен тежелуі күтілмейтіндігі анықталды. Эторикоксибті 120 мг дозада күн сайын қолдану, эритромициндік тыныс алу тестісінің нәтижелеріне сәйкес, бауырда CYP ЗА4 изоферментінің белсенділігіне ықпалын тигізген жоқ.

Басқа препараттардың эторикоксибтің фармакокинетикасына ықпалы

Эторикоксиб метаболизмінің негізгі жолы цитохромдар жүйесінің ферменттеріне байланысты. CYP3A4 изоферменті эторикоксибтің метаболизміне мүмкіндік береді. Қолда бар деректер CYP2D6, CYP2C9, CYP1A2 және CYP2CI9 изоферменттері сондай-ақ метаболизмнің негізгі жолын катализдейді деп болжам жасауға негіз болады.

Кетоконазол

Кетоконазол CYP3A4 изоферментінің күшті тежегіші болып табылады. Кетоконазолды тәулігіне бір рет 400 мг дозада 11 күн бойы қолданғанда ол эторикоксибтің 60 мг бір дозасының фармакокинетикасына клиникалық тұрғыдан маңызды ықпалын тигізген жоқ (AUC артуы 43%).

Вориконазол және миконазол

СYP3A4 изоферментінің күшті тежегіштерін (ішке қабылдауға арналған вориконазол немесе жергілікті миконазол, ішке қабылдауға арналған гель) және эторикоксибті бір мезгілде тағайындау эторикоксиб экспозициясының аздап артуын туындатты, ол жарияланған деректер негізінде клиникалық тұрғыдан маңызды деп танылған жоқ.

Рифампицин

Эторикоксибті және рифампицинді (цитохромдар жүйесінің күшті индукторы) бір мезгілде қолдану қанда эторикоксиб концентрациясының 65%-ға төмендеуіне әкелді. Осындай өзара әрекеттесу симптомдардың қайталануымен қоса жүруі мүмкін. Алайда эторикоксибті әр қолданған сайын ұсынылатыннан артық дозаларда қолдану ұсынылмайды, өйткені рифампицинді және эторикоксибті осындай дозаларда біріктіріп қолдану зерттелген жоқ.

Антацидтер

Антацидтер эторикоксибтің фармакокинетикасына клиникалық тұрғыдан маңызды әсерін тигізбейді.

Асқазан-ішек жолына ықпалы

Эторикоксиб қабылдаған пациенттерде кейде асқазан-ішек жолының (АІЖ) жоғарғы бөлімдері тарапынан асқыну жағдайлары (тесілулер, ойық жаралар немесе қан кетулер), соның ішінде өліммен аяқталу байқалды. ҚҚСП қолданған кезде АІЖ тарапынан асқынулардың даму қаупі жоғары пациенттерді, атап айтқанда бір мезгілде басқа да ҚҚСП, соның ішінде ацетилсалицил қышқылын қолданып жүрген егде жастағы пациенттерді, сондай-ақ анамнезінде ойық жара немесе асқазан-ішектік қан кету сияқты АІЖ осындай аурулары бар пациенттерді емдеген кезде сақтық таныту ұсынылады.

Эторикоксибті және ацетилсалицил қышқылын (АСҚ) тіпті төмен дозаларда бір мезгілде қолданғанда АІЖ тарапынан жағымсыз реакциялардың (асқазан-ішектің ойық жаралар немесе АІЖ тарапынан басқа да асқынулар) қосымша қаупі бар. Ұзақ мерзімдік клиникалық зерттеулерде ЦОГ-2 селективті тежегіштерін + ацетилсалицил қышқылын қолданғанда, ҚҚСП + ацетилсалицил қышқылымен салыстырғанда, АІЖ үшін қауіпсіздігіне қатысты айқын айырмашылықтар байқалған жоқ.

Жүрек-қантамыр жүйесіне ықпалы

ЦОГ-2 селективті тежегіштері тромбоздық асқынулардың (әсіресе миокард инфарктісінің және инсульттің) туындау қаупін арттыруы мүмкін. ЦОГ-2 селективті тежегіштерін қолданған кезде жүрек-қантамырлар асқынуларының туындау қаупі дозаны және қолдану ұзақтығын арттырған кезде ұлғаюы мүмкін болғандықтан, барынша ең қысқа уақыт кезеңі ішінде тиімді ең төмен тәуліктік дозаны пайдалану керек. Пациенттің симптоматикалық емді қажетсінуіне және емдеуге жауабына, әсіресе остеоартрозы бар пациенттер үшін, мезгіл-мезгіл баға беріп отыру қажет.

Жүрек-қантамыр асқынулары дамуының артериялық гипертензия, гиперлипидемия, қант диабеті, шылым шегу сияқты айқын қауіп факторлары бар пациенттерге мұқият баға бергеннен кейін ғана эторикоксибпен емдеуді тағайындау керек.

ЦОГ-2 селективті тежегіштері жүрек-қантамыр ауруларының профилактикасында ацетилсалицил қышқылының орнын алмастырушы болып табылмайды, өйткені тромбоциттерге ықпалын тигізбейді. Сондықтан антиагреганттық препараттарды қолдануды тоқтатпаған жөн.

Бүйрек функциясына ықпалы

Бүйректік простагландиндер бүйрек перфузиясын демеуде компенсаторлық рөл атқаруы мүмкін. Бүйректік перфузияға теріс ықпал ететін жағдайлар бар болған кезде эторикоксибті тағайындау простагландиндердің түзілуін азайтуы және, осылайша, бүйрек функциясын төмендетуі мүмкін. Жүрек функциясының жеткіліксіздігімен немесе циррозбен декомпенсацияланған бүйрек функциясы едәуір төмендеген пациенттер үшін осы реакциялардың дамуының ең үлкен қаупі бар. Мұндай пациенттерде бүйрек функциясын бақылауды жүзеге асыру қажет.

Сұйықтықтың іркілуі, ісінулер және артериялық гипертензия

Простагландиндер синтезін тежейтін басқа препараттарды қолданған жағдайдағы сияқты, эторикоксибті қолданып жүрген пациенттерде, сұйықтықтың іркілуі, ісіну және артериялық гипертензия байқалды. Эторикоксибті қоса, қабынуға қарсы стероидты емес препараттарды (ҚҚСП) қолдану жүрек функциясының іркілген жеткіліксіздігінің туындауымен немесе қайталануымен астасуы мүмкін. Эторикоксибті анамнезінде жүрек функциясының жеткіліксіздігі бар, сол жақ қарынша функциясы бұзылған немесе артериялық гипертензиясы бар пациенттерге, сондай-ақ кез келген басқа себептен туындаған ісінулері бар пациенттерге тағайындағанда сақтық таныту керек. Мұндай пациенттерде жағдайдың клиникалық нашарлау белгілері пайда болған кезде, эторикоксиб қолдануды тоқтатуды қоса, тиісті шаралар қабылдаған жөн.

Эторикоксибті, әсіресе жоғары дозаларда, қолдану, кейбір басқа ҚҚСП және ЦОГ-2 селективті тежегіштерін қолданған кездегіге қарағанда, көбірек жиі және ауыр артериялық гипертензиямен байланысты болуы мүмкін. Сондықтан емдеуді бастағанға дейін гипертензияны бақылау, сондай-ақ эторикоксибпен емдеу кезінде артериялық қысымды бақылауға ерекше көңіл бөлу қажет. Артериялық қысымды емдеуді бастағаннан кейін екі апта бойы және әрі қарай мезгіл-мезгіл бақылап отыру керек. Артериялық қысым едәуір жоғарылаған кезде баламалы ем жүргізуді қарастыру қажет.

Бауыр функциясына ықпалы

Эторикоксибпен ем қабылдап жүрген кейбір пациенттерде АЛТ және/немесе ACT белсенділігінің жоғарылағаны байқалқалғандықтан, бауыр функциясы бұзылуларының симптомдары және/немесе белгілері бар барлық пациенттердің, сондай-ақ бауыр функциясының патологиялық көрсеткіштері бар пациенттердің жағдайын бақылаған жөн. Бауыр функциясы жеткіліксіздігінің немесе бауыр функциясы көрсеткіштерінің тұрақты ауытқулары (жоғары қалып шегінен үш есе жоғары) байқалған жағдайда эторикоксибті қолдану тоқтатылуы тиіс.

Жалпы нұсқаулар

Егер емдеу кезінде пациентте жоғарыда көрсетілген ағзалар жүйесінен қандай да болсын функциялардың нашарлауы байқалса, тиісті шараларды қолдану және эторикоксиб қабылдауды тоқтату мәселесін қарастыру керек. Эторикоксибті егде жастағы пациенттерге және бүйрек, бауыр немесе жүрек функциялары бұзылған пациенттерге қолданғанда тиісті медициналық бақылау жүргізу қажет.

Сусыздану орын алған пациенттерде эторикоксибпен емдеуді сақтықпен бастаған жөн. Эторикоксибті қолданар алдында регидратация жүргізу ұсынылады.

Тіркеуден кейінгі бақылау кезінде ҚҚСП және ЦОГ-2 кейбір селективті тежегіштерін қолданғанда күрделі тері реакцияларының дамығаны жөнінде өте сирек мәлімделді, олардың кейбіреулері, соның ішінде эксфолиативті дерматит, Стивенс-Джонсон синдромы және уытты эпидермальді некролиз өліммен аяқталды. Пациенттерде мұндай реакциялардың даму қаупі емдеудің бас кезінде, көптеген жағдайларда емдеудің алғашқы айы ішінде өте жоғары болды. Эторикоксиб қабылдаған пациенттерде күрделі аса жоғары сезімталдық реакцияларының (анафилаксия және ангионевроздық ісіну сияқты) дамығаны туралы мәлімделді. ЦОГ-2 кейбір селективті тежегіштерін қолдану анамнезінде қандай да болсын дәрілік аллергиясы бар пациенттерде тері реакциялары дамуының жоғары қаупімен қоса жүрді. Эторикоксибті қабылдау тері бөртпесі, шырышты қабықтың зақымданулары немесе аса жоғары сезімталдықтың кез келген басқа белгісі алғаш пайда болған кезде тоқтатылуы тиіс.

Эторикоксиб қызбаның көрініс беруін немесе инфекциялардың басқа белгілерін басуы мүмкін.

Эторикоксибті және варфаринді немесе басқа да пероральді антикоагулянттарды бір мезгілде абайлап тағайындайды.

Қосымша заттар

Коксибияның құрамында лактоза моногидраты бар. Осымен байланысты осы препаратты сирек тұқым қуалайтын галактоза жақпаушылығы мәселелері, Лапп лактаза тапшылығы немесе глюкоза-галактоза мальабсорбциясы синдромы бар пациенттер қабылдамауы керек.

Жүктілік

Жүктілік кезеңінде эторикоксибті қолдану туралы клиникалық деректер жоқ. Жүктілік кезеңінде әйелдерге потенциалды қаупі белгісіз. Эторикоксибті қолдану, простагландиндер синтезін тежейтін басқа препараттар сияқты, жүктіліктің соңғы триместрінде жатыр жиырылуының бәсеңдеуіне және артериялық ағынның мезгілінен ерте жабылуына әкелуі мүмкін. Жүктілік кезеңінде эторикоксибті қолдануға болмайды. Егер емделу кезеңінде жүктілік басталса, эторикоксиб қабылдауды тоқтату қажет.

Лактация

Емшек сүтіне эторикоксибтің бөлінетін-бөлінбейтіні белгісіз. Бала емізетін әйелдер емделу кезеңінде емшек емізуді тоқтатуы керек.

Фертильділік

Эторикоксибты қолдану, ЦОГ-2 тежейтін басқа препараттар сияқты, жүкті болуды жоспарлап жүрген әйелдерге ұсынылмайды.

Көлік құралын немесе потенциалды қауіпті механизмдерді басқару қабілетіне дәрілік заттың ықпал ету ерекшеліктері

Эторикоксибті қолдану кезінде бас айналу, ұйқышылдық немесе әлсіздік жағдайлары білінетін пациенттер көлік құралдарын басқаруды және механизмдермен жұмыс жасауды тоқтата тұруы тиіс.

Симптомдары: эторикоксибті бір реттік 500 мг-ге дейінгі дозаларда қолдану немесе 21 күн бойы тәулігіне 150 мг-ге дейін көп реттік қабылдау елеулі уытты әсерлерді туындатқан жоқ. Эторикоксибтің артық дозалануы туралы мәлімделді, алайда көптеген жағдайларда жағымсыз реакциялар туралы мәлімделген жоқ. Көбірек жиі байқалатын жағымсыз реакциялар эторикоксибтің қауіпсіздік бейініне сәйкес келді (мысалы, АІЖ тарапынан реакциялар, кардиоренальді реакциялар).

Емі: артық дозалану жағдайында АІЖ-ден абсорбцияланбаған препаратты жою, клиникалық бақылау сияқты әдеттегі демеуші шараларды қолданған және, қажет болғанда, демеуші ем жүргізген жөн.

Эторикоксиб гемодиализ кезінде жойылмайды; перитонеальді диализде шығарылуы белгісіз.

Шығарылу түрі және қаптамасы

Нейлон / алюминий / поливинилхлорид фольгадан және алюминий фольгадан жасалған пішінді ұяшықты қаптамаға 7 таблеткадан салынған.

Пішінді 4 қаптамадан медициналық қолданылуы жөнінде қазақ және орыс тілдеріндегі нұсқаулықпен бірге картон қорапшаға салынған.

25ºС-ден аспайтын темературада сақтау керек.

4 жыл

Жарамдылық мерзімі өткеннен кейін қолдануға болмайды.

Рецепт арқылы

Өндіруші

Кадила Фармасьютикалс Лтд., Дхолка қ., Үндістан

Тіркеу куәлігінің ұстаушысы

ШТАДА Арцнаймиттель АГ

Штадаштрассе 2 - 18

D-61118 Бад Вилбель, Германия

телефон: + 49 6101 603-0

телефакс: + 49 6101 603-259

веб сайт: http://www.stada.de

Қазақстан Республикасы аумағында тұтынушылардан дәрілік заттың сапасына қатысты шағымдарды (ұсыныстарды) қабылдайтын және дәрілік заттың тіркеуден кейінгі қауіпсіздігін қадағалауға жауапты ұйымның атауы, мекенжайы және байланыс деректері (телефон, факс, электронды пошта)

«ДО «Нижфарм-Казахстан» ЖШС

050011, Қазақстан Республикасы,

Алматы қ., Сүйінбай даңғылы, 258В үй

тел.: (727) 2222-100

факс: (727) 398-64-95

e-mail: almaty@stada.kz