Индапамид SR (Индапамид)

Индапамид SR

Индапамид

Дәрілік түрі, дозалануы

Босап шығуы ұзаққа созылатын, қабықпен қапталған таблеткалар, 1.5 мг

Жүрек-қантамыр жүйесі. Диуретиктер. Орташа айқын белсенділігі бар диуретиктер, тиазидтерді қоспағанда. Сульфонамидтер, қарапайымдар. Индапамид.

ATХ коды C03BA11

Ересектерде эссенциалдық гипертензияны емдеуде

Қолданудың басталуына дейінгі қажетті мәліметтер тізбесі

• индапамидке, сульфонамидтерге немесе қосымша заттардың кез келгеніне аса жоғары сезімталдық

• бүйректің ауыр жеткіліксіздігі

• бауыр энцефалопатиясы немесе бауыр функциясының басқа ауыр бұзылуы

• гипокалиемия

• тұқым қуалайтын галактоза жақпаушылығы, Lapp (ЛАПП)-лактаза ферментінің тапшылығы, глюкоза-галактоза мальабсорбциясы бар пациенттер

• жүктілік және бала емізу кезеңі.

• балалар мен 18 жасқа дейінгі жасөспірімдік жас.

Қолдану кезіндегі қажетті сақтандыру шаралары

Бауыр жеткіліксіздігі

Бауыр жеткіліксіздігі бар пациенттерде тиазид тәрізді диуретик дәрілік препараттар бауыр энцефалопатиясының дамуын, әсіресе электролиттік алмасу бұзылғанда туындатуы мүмкін. Диуретик препараттарды қолдануды бауыр энцефалопатиясының симптомдары пайда болғанда дереу тоқтату керек.

Фотосезімталдық

Тиазидтік диуретиктер және әсері ұқсас басқа препараттарды қолданумен байланысты фотосенсибилизация оқиғалары сипатталған. Егер фотосенсибилизация реакциясы емделу уақытында пайда болса дәрілік препаратты тоқтату ұсынылады. Егер диуретикті қайта қолдану қажеттілігі туындаса, күн сәулесінің немесе жасанды ультракүлгін сәулеленудің әсеріне ұшыраған тері беткейін қорғау ұсынылады.

Су-электролиттік теңгерім

Плазмадағы натрий мөлшері

Препаратпен емді бастар алдында, сосын жүйелі уақытша аралықтарда плазмадағы натрий концентрациясын бақылау қажет. Диуретиктермен кез келген ем гипонатриемияға, кейде оның күрделі салдарына әкелуі мүмкін. Плазмадағы натрий мөлшерінің төмендеуі бастапқы кезеңде симптомсыз болуы мүмкін, сондықтан егде жастағы пациенттерде немесе бауыр циррозы бар пациенттерде жиірек тұрақты бақылау талап етіледі. Барлық диуретик препараттар кейде ауыр салдарларға әкелетін гипонатриемияны туындатуы мүмкін. Гипонатриемия және гиповолемия сусыздануға және ортостаздық гипотензияға әкелуі мүмкін. Хлор иондарын қатарлас жоғалту салдарлы компенсацияланған метаболизмдік алкалозға әкелуі мүмкін; бұл әсердің кездесу жиілігі және айқындық дәрежесі әдетте елеулі емес.

Плазмадағы калий мөлшері

Емдеу барысында плазмадағы калий концентрациясын тұрақты бақылау қажет. Калий мөлшерінің төмендеуі және гипокалиемия тиазидтік және тиазид тәрізді диуретиктерді қолдану кезіндегі негізгі қауіп болып табылады. Әсіресе кейбір қаупі жоғары топтағы пациенттерде, мысалы, егде жастағы пациенттер, жүдеген пациенттер, бір уақытта көп дәрілік препараттар алатын пациенттер, бауыр циррозы бар пациенттер, ісінуі және асциті бар пациенттер, жүректің ишемиялық ауруы және жүрек жеткіліксіздігі бар пациенттерде гипокалиемия (<3,4 ммоль/л) дамуының алдын алу керек. Гипокалиемия жағдайында оймақгүл препараттарының кардиоуыттылығының қауіптілігі және жүрек ырғағы бұзылуының пайда болу қаупі жоғарылайды.

Қауіп тобында сондай-ақ бұл бұзылыстың туа біткен немесе ятрогенді екендігіне қарамастан, QT аралығы ұзарған пациенттер бар. Гипокалиемия да, брадикардия сияқты, жүрек ырғағының күрделі бұзылуының дамуына, әсіресе тахикардияның өлімге апаратын түрі – torsade de pointes ықпал етеді.

Жоғарыда көрсетілген барлық жағдайларда плазмадағы калий мөлшерін жиірек мониторингілеу қажет. Плазмадағы калий деңгейін алғашқы анықтауды емдеудің бірінші аптасында орындау қажет. Гипокалиемия пайда болғанда калий тапшылығының орнын толтыру қажет.

Гипокалиемияның анықталуы оны түзетуді қажет етеді. Қан сарысуындағы магний концентрациясының төмен болуына байланысты анықталған гипокалиемия, егер қан сарысуындағы магний деңгейіне түзету енгізілмесе, емделуі қиын болуы мүмкін.

Плазмадағы магний мөлшері

Тиазидтер және олармен байланысты диуретиктер, индапамидті қоса, магнийдің несеппен шығарылуын арттыратыны көрсетілген, бұл гипомагниемияға әкелуі мүмкін.

Плазмадағы кальций мөлшері

Tиазидтік және тиазид тәрізді диуретиктер аздаған транзиторлық гиперкальциемия тудыра отырып, кальцийдің несеппен шығарылуын төмендетуі мүмкін. Айқын гиперкальциемия анықталмаған гиперпаратиреоздың салдары болуы мүмкін. Мұндай жағдайда емді тоқтату және пациенттің қалқанша маңы безінің функциясына бағалау жүргізу қажет.

Қандағы глюкоза мөлшері

Қант диабеті бар пациенттерде, әсіресе қатарлас гипокалиемиясы бар пациенттерде қандағы глюкоза деңгейіне мониторинг жүргізу қажет.

Несеп қышқылы

Гиперурикемиясы бар пациенттерде подагра ұстамалары жиілігінің ұлғаюына әкелу үрдісі бар.

Бүйрек функциясы және диуретиктер

Tиазидтік және тиазид тәрізді диуретиктер бүйрек функциясы қалыпты немесе оның аздаған бұзылуы (креатинин деңгейі 25 мг/л төмен, яғни ересектерде 220 мкмоль/л) жағдайында ғана тиімді. Креатинин концентрациясының негізінде бүйрек функциясын бағалай келе, пациенттің жасын, жынысын және дене салмағын ескеру қажет.

Емнің басында диуретиктер туындатқан судың және натрийдің жойылуымен байланысты гиповолемия шумақтық сүзілістің төмендеуіне әкеледі. Бұл қандағы мочевина және плазмадағы креатинин мөлшерінің жоғарылауына әкелуі мүмкін. Мұндай транзиторлық функционалдық бүйрек жеткіліксіздігі бүйрек функциясы қалыпты пациенттерде салдарсыз өтеді, алайда бұрыннан бар бүйрек жеткіліксіздігін өршітуі мүмкін.

Спортшылар

Препарат спортшыларда допингке қарсы тесттің оң нәтижелерін тудыруы мүмкін.

Хориоидальді жалқық, жедел миопия және салдарлы жабық бұрышты глаукома

Құрамында сульфонамид немесе сульфонамид туындылары бар препараттар көру өрісінің жоғалуымен хориоидальді жалқығына, өтпелі миопияға және жедел жабық бұрышты глаукомаға әкелетін идиосинкразия реакциясын тудыруы мүмкін. Симптомдар көру өткірлігінің жедел төмендеуі немесе көз ауруын қамтиды, бұл әдетте препаратты қабылдаған сәттен бастап бірнеше сағаттан бір аптаға дейін байқалады. Емдеусіз қалдырылған жедел жабық бұрышты глаукома қайтымсыз көрмей қалуға әкелуі мүмкін. Бастапқы емдеу дәрілік затты қабылдауды жедел тоқтатудан тұрады. Көзішілік қысым бақыланбаған кезде, шұғыл медициналық немесе хирургиялық шаралар қабылдануы мүмкін. Анамнездегі сульфонамидке немесе пенициллинге аллергия жедел жабық бұрышты глаукоманың даму қаупі факторларының бірі болуы мүмкін.

Басқа дәрілік препараттармен өзара әрекеттесуі

Ұсынылмайтын біріктірілімдер

Литий

Тұзы төмен диета жағдайындағыдай артық дозалану симптомдарымен плазмадағы литий деңгейінің жоғарылауы келеді (литийдің несеппен аз шығаралуы). Егер литий тұздары мен диуретиктік препаратты бір уақытта қолдану қажет болса, плазмадағы литий мөлшерін бақылау және тиісінше дозаны түзету қажет.

Пайдалану кезінде сақтықты талап ететін біріктірілімдер

Torsade de pointes типі бойынша аритмия тудыратын препараттар

• Ia класты аритмияға қарсы препараттар (хинидин, гидрохинидин, дизопирамид);

• III класты аритмияға қарсы препараттар (амиодарон, соталол, дофетилид, ибутилид);

• кейбір психозға қарсы препараттар:

• фенотиазин туындылары (хлорпромазин, циамемазин, левомепромазин, тиоридазин, трифторперазин);

• бензамид туындылары (амисульпирид, сульпирид, сультоприд, тиаприд);

• бутирофенон туындылары (дроперидол, галоперидол);

• басқа препараттар: бепридил, цизаприд, дифеманил, эритромицин (вена ішіне енгізгенде), галофантрин, мизоластин, пентамидин, спарфлоксацин, моксифлоксацин, винкамин (вена ішіне енгізгенде).

Қарыншалық аритмияның, әсіресе torsade de pointes жоғары қаупі (гипокалиемия бейім фактор болып табылады). Аталған біріктірілімдерді тағайындар алдында гипокалиемияға қатысты мониторинг жүргізу және қажет болса электролиттік теңгерімді түзету қажет. Клиникалық жағдайға, плазма электролиттеріне және электрокардиография (ЭКГ) мониторинг жүргізу керек.

Гипокалиемия анықталған жағдайда, torsade de pointes қаупін тудырмайтын дәрілік препараттарды қолдану керек.

Қабынуға қарсы стероидты емес дәрілік препараттар (ішке және/немесе парентеральді қабылдау үшін), оның ішінде циклооксигеназа-2 (ЦОГ-2) селективті тежегіштері және салицилаттардың жоғарғы дозалары (≥3 г/тәулік)

Индапамидтің гипертензияға қарсы әсері төмендеуі мүмкін.

Пациенттердің сусыздану жағдайында жедел бүйрек жеткіліксіздігінің қаупі жоғарылайды (шумақтық сүзілістің төмендеуі). Ем басталғаннан бастап пациенттің гидратация жағдайын бақылау және бүйрек функциясына мониторинг жүргізу керек.

Ангиотензин-өзгертуші ферменттің (АӨФ) тежегіштері

Гипонатриемиясы бар пациенттерге АӨФ тежегіштерін тағайындау (әсіресе бүйрек артериясының стенозы бар пациенттерде) кенеттен болатын артериялық гипотензияның қаупімен және жедел бүйрек жеткіліксіздігінің даму қаупімен байланысты.

Гипертензия жағдайында, егер диуретикпен бұрын жүргізілген емдеу натрий жеткіліксіздігіне әкелуі мүмкін болса, мыналар қажет:

• немесе диуретикті қабылдауды АӨФ тежегішімен емдеуді бастағанға дейін 3 күн бұрын тоқтату және қажет болған жағдайда калий жинақтамайтын диуретикті қабылдауды қайта бастау;

• немесе АӨФ тежегішінің аз дозасынан қабылдауды бастаңыз және оның дозасын біртіндеп арттырыңыз.

Іркілісті жүрек жеткіліксіздігінде емді, мүмкіндігінше калий жинақтамайтын диуретик дозасын төмендеткеннен кейін АӨФ тежегіштерінің ең төменгі дозаларынан бастау керек.

Барлық жағдайларда АӨФ тежегіштерімен емдеудің алғашқы аптасында бүйрек функциясына мониторинг (креатинин мөлшері) жүргізу қажет.

Гипокалиемия тудыратын басқа да дәрілік препараттар: амфотерицин B (вена ішіне енгізгенде), глюкокортикостероидтар және минералокортикостероидтар (жүйелі қолдану үшін), тетракозактид, перистальтиканы көтермелейтін іш жүргізетін дәрілік препараттар

Гипокалиемияның жоғары даму қаупі (аддитивті әсер). Қан плазмасындағы калий деңгейіне, әсіресе оймақгүл препараттарымен бір мезгілде емдеу кезінде мұқият мониторинг жүргізу және қажет болса оны уақытылы толықтыру қажет. Ішек перистальтикасын көтермелемейтін іш жүргізетін дәрілерді қабылдау ұсынылады.

Баклофен

Индапамидтің гипертензияға қарсы әсерін күшейтеді. Пациенттің адекватты гидратациясын қамтамасыз ету және емнің басында бүйрек функциясын бақылау қажет.

Оймақгүл препараттары

Гипокалиемия және / немесе гипомагнемия оймақгүл қолданғаннан кейін уыттылық симптомдарының дамуына бейімдейтін фактор болып табылады, сондықтан қан плазмасындағы калий, магний деңгейін бақылау және ЭКГ жүргізу, қажет болса емді модификациялау қажет.

Ерекше сақтықты талап ететін біріктірілімдер

Аллопуринол

Индапамидпен бір мезгілде қолдану аллопуринолға жоғары сезімталдық реакцияларының жиілігін арттырады.

Назар аударылуы тиіс біріктірілімдер

Калий жинақтаушы диуретиктер (амилорид, спиронолактон, триамтерен)

Кейбір пациенттер үшін пайдалы осы препараттардың рационалды біріктірілімі гипокалиемияның (әсіресе қант диабеті немесе бүйрек жеткіліксіздігі бар пациенттердің жағдайында) немесе гиперкалиемияның даму қаупін жоққа шығармайды. Плазмадағы калий деңгейін және ЭКГ көрсеткіштерін бақылау, қажет жағдайда емдеу тәсілін қайта қарау қажет.

Метформин

Диуретиктерді, әсіресе ілмектік диуретиктерді қолдану нәтижесінде бүйрек функциясының ықимал бұзылуымен байланысты метформин туындатқан лактоацидоздың даму қаупі жоғарылайды. Егер сарысудағы креатинин концентрациясы еркектерде 15 мг/л (135 мкмоль/л) және әйелдерде 12 мг/л (110 мкмоль/л) асса метформин қабылдау керек емес.

Құрамында йод бар рентгенконтрастылы дәрілер

Диуретиктер туындатқан сусыздану жағдайында, әсіресе құрамында йод бар рентгеноконтрастылы дәрілерді жоғары дозаларын пайдаланғанда жедел бүйрек жеткіліксіздігінің жоғары даму қаупі бар. Мұндай дәріні пайдалану алдында пациенттің тиісті гидратациясын қатамасыз ету қажет.

Трициклдік антидепрессанттар, нейролептиктер

Гипертензияға қарсы әсердің күшеюі және ортостаздық гипотензияның (аддитивті әсер) пайда болу қаупі.

Кальций (кальций тұздары)

Кальцийдің бүйрекпен шығарылуының төмендеуі нәтижесіндегі гиперкальциемия қаупі.

Циклоспорин, такролимус

Циклоспорин деңгейінің өзгеруінсіз, тіпті егер гиповолемия және гипонатриемия байқалмаса да плазмадағы креатинин мөлшерінің жоғарылау қаупі.

Кортикостероидтар, тетракозактид (жүйелі қолдану үшін)

Гипотензиялық әсердің төмендеуі (кортикостероидтер әсерінің салдарынан натрий мен судың іркілуі).

Арнайы сақтандырулар

Педиатрияда қолдану

Қауіпсіздікке және тиімділікке қатысты деректердің жоқтығын ескеріп, препаратты балалар мен 18 жасқа дейінгі жасөспірімдерде қолданбаған жөн.

Қосымша заттарға қатысты айрықша нұсқаулар

Дәрілік препараттың құрамында лактоза бар және сирек кездесетін тұқым қуалайтын галактоза жақпаушылығы, Lapp (Лапп)-лактаза ферментінің тапшылығы, глюкоза-галактоза мальабсорбциясы бар пациенттерде қолданылмауы тиіс.

Жүктілік немесе лактация кезінде

Жүкті әйелдерде индапамидті қолдану жөніндегі деректер жоқ немесе шектеулі (жүктіліктің 300-ден кем нәтижесі). Жүктіліктің үшінші триместрінде тиазидтерге ұзақ әсер еткенде анадағы қан плазмасы көлемінің, сондай-ақ жатыр-плаценталы қан ағымының төмендеуі мүмкін, бұл фетоплаценталы ишемияның дамуына және ұрық дамуының іркілуіне әкелуі мүмкін.

Сақтық шарасы ретінде жүктілік кезінде индапамидті қолданудан аулақ болған жөн.

Индапамидтің және оның метаболиттерінің ана сүтіне енуі туралы ақпарат жеткіліксіз. Сульфонамид туындыларына және гипокалиемияға жоғары сезімталдық туындауы мүмкін.

Дәрілік заттың көлік құралын және қауіптілігі зор механизмдерді басқару қабілетіне әсер ету ерекшеліктері

Индапамид SR дәрілік препаратын қолдану уақытында, әсіресе емнің басында немесе басқа гипертензияға қарсы дәрілік препаратты қосымша қолдану кезінде артериялық қысымның төмендеуімен байланысты симптомдар пайда болуы мүмкін. Мұндай жағдайда көлік құралдарын басқару және механизмдерді жөндеу қабілеті бұзылуы мүмкін.

Қолдану жөніндегі нұсқаулар

Дозалау режимі

Тәулігіне бір рет 1 таблеткадан препаратты таңертең қабылдаған дұрыс.

Таблетканы тұтастай, сумен іше отырып және шайнамай жұту керек.

Дозаны жоғарылату индапамидтің гипертензияға қарсы әсерінің ұлғаюына әкелмейді, бірақ несеп айдайтын әсерін күшейтеді.

Пациенттердің ерекше топтары

Бүйрек жеткіліксіздігі бар пациенттер

Бүйректің ауыр жеткіліксіздігінде (креатинин клиренсі 30 мл/мин.) препаратты қолдануға болмайды. Тиазидтік диуретиктер және тиазид тәрізді дәрілік препараттар бүйрек функциясы қалыпты немесе егер бүйрек функциясы аздаған дәрежеде бұзылған болса анағұрлым тиімді.

Егде жастағы пациенттер

Егде жастағы пациенттерде плазмадағы креатинин мөлшерін бағалағанда жасты, дене салмағын және жынысты ескеру керек. Егер бүйрек функциясы бұзылмаған немесе аз ғана дәрежеде бұзылған болса, егде жастағы пациенттерде Индапамид SR препаратын қолдануға болады.

Бауыр функциясы бұзылған пациенттер

Бауыр функциясының ауыр бұзылу жағдайларында дәрілік препаратты қолдануға болмайды.

Енгізу әдісі және жолы

Ішке қабылдауға арналған

Артық дозалану жағдайында қабылдау қажет болатын шаралар

Симптомдары

40 мг дейінгі дозада, яғни емдік дозадан шамамен 27 есе асатын дозада индапамидтің уытты әсері расталмаған.

Жедел улану симптомдары су-электролиттік теңгерімнің бұзылуымен (гипонатриемия, гипокалиемия) байланысты туындайды. Жүрек айнуы, құсу, артериялық қысымның төмендеуі, бұлшықет түйілуі, бас айналуы, ұйқышылдық, бағдарсыздық, полиурия, анурияға әкелетін (гиповолемия салдарынан) олигурия байқалуы мүмкін.

Емі

Артық дозалану жағдайында асқазанды шаю немесе белсендірілген көмір тағайындау, сондай-ақ стационар жағдайында су-электролиттік теңгерімді қалпына келтіру қажет.

Дәрілік препараттың бір немесе бірнеше дозасын өткізіп алу кезіндегі қажетті шаралар

Қабылданбай қалған дозаның орнын толтыру үшін қосарлы дозаны қабылдамаңыз.

Дәрілік препаратты қолдану тәсілін түсіндіру үшін медицина қызметкерінен кеңес алуға жүгіну бойынша ұсынымдар

Дәрілік препаратты қолданар алдында дәрігерге кеңес алу үшін жүгініңіз.

ДП стандартты қолдану кезінде көрініс беретін жағымсыз реакциялар сипаттамасы және осы жағдайда қабылдау керек шаралар

Жиі

• гипокалиемия

• жоғары сезімталдық реакциясы, макулопапулезді бөртпе

Жиі емес

• гипонатремия, гипокалиемиямен калий мөлшерінің төмендеуі, әсіресе жоғары қауіп тобындағы тұрғындардың кейбір топтарында елеулі

• құсу

• пурпура

• эректильді дисфункция

Сирек

• гипохлоремия, гипомагнемия

• бас айналуы, ұйқышылдық, бас ауруы, парестезия

• жүрек айнуы, іш қатуы, ауыз құрғауы

Өте сирек

• aгранулоцитоз, аплазиялық анемия, гемолизистік анемия, лейкопения, тромбоцитопения

• гиперкальциемия

• аритмия

• гипотензия

• панкреатит

• бауыр функциясының бұзылуы

• ангионевроздық ісіну, есекжем, уытты эпидермальді некролиз, Стивенс Джонсон синдромы

• бүйрек жеткіліксіздігі

Белгісіз (қолда бар деректер негізінде бағалау мүмкін емес)

• естен тану

• гипонатриемия

• миопия, бұлыңғыр көру, көрудің бұзылуы, хориоидальді жалқық, жедел жабықбұрышты глаукома

• полиморфты қарыншалық «пируэт» типті тахикардия (өліммен аяқталуы мүмкін)

• бауыр жеткіліксіздігі жағдайында бауыр энцефалопатиясының даму мүмкіндігі, гепатит

• ЭКГ-де QT аралығының ұзаруы, қанда глюкоза деңгейінің жоғарылауы. Қанда несеп қышқылы деңгейінің жоғарылауы, бауыр ферменттері белсенділігінің жоғарылауы

Жағымсыз дәрілік реакциялар туындағанда медициналық қызметкерге, фармацевтикалық қызметкерге немесе, дәрілік препараттардың тиімсіздігі туралы хабарламаларды қоса, дәрілік препараттарға болатын жағымсыз реакциялар (әсерлер) жөніндегі ақпараттық деректер базасына тікелей хабарласу керек,

Қазақстан Республикасы Денсаулық сақтау министрлігі Медициналық және фармацевтикалық бақылау комитетінің «Дәрілік заттар мен медициналық бұйымдарды сараптау ұлттық орталығы» ШЖҚ РМК

http://www.ndda.kz

Қосымша мәліметтер

Дәрілік препарат құрамы

Бір таблетканың құрамында

белсенді зат - индапамид 1.53 мг (100 % затқа шаққанда) (1.50 мг),

қосымша заттар: сусыз лактоза, гипромеллоза, микрокристалды целлюлоза,

сусыз коллоидты кремнийдің қостотығы, магний стеараты,

қабық құрамы: Қабығы OPADRY® QX ақ:

полиэтиленгликоль/макрогол, тальк, титанның қостотығы (Е171), глицерол монокаприлокапрат, поливинил спирті

Сыртқы түрінің, иісінің, дәмінің сипаттамасы

Қабықпен қапталған, ақ немесе ақ дерлік түсті, дөңгелек, бетінде аздап бұдыры бар екі беті дөңес таблеткалар

Шығарылу түрі және қаптамасы

10 таблеткадан поливинилхлоридті/поливинилденхлоридті (ПВХ/ПВДХ) үлбірден және алюминий фольгадан жасалған пішінді ұяшықты қаптамаға салынады.

3 пішінді ұяшықты қаптамадан медициналық қолдану жөніндегі бекітілген қазақ және орыс тілдеріндегі нұсқаулықпен бірге картон қорапшаға салынады.

Дәрілік препараты бар қорапшаларды картон қораптарға салады.

Пішінді ұяшықты қаптамаларды (қорапшаға салмай) картон қораптарға салуға рұқсат етіледі. Медициналық қолдану бойынша қазақ және орыс тілдерінде бекітілген нұсқаулықтардың саны қаптамалардың саны бойынша салынады.

4 жыл

Жарамдылық мерзімі өткеннен кейін қолдануға болмайды!

Түпнұсқалық қаптамасында, құрғақ жерде 25 ºС-ден аспайтын температурада

сақтау керек.

Балалардың қолы жетпейтін жерде сақтау керек!

Рецепт арқылы

Өндіруші туралы мәліметтер

«Химфарм» АҚ, Қазақстан Республикасы, Шымкент қ., Рашидов к-сі, 81,

Телефон нөмірі +7 7252 (610151)

Автожауапбергіш нөмірі +7 7252 (561342)

Электронды пошта: complaints@santo.kz

Тіркеу куәлігінің ұстаушысы

«Химфарм» АҚ, Қазақстан Республикасы, Шымкент қ., Рашидов к-сі, 81,

Телефон нөмірі +7 7252 (610151)

Автожауапбергіш нөмірі +7 7252 (561342)

Электронды пошта: complaints@santo.kz

Қазақстан Республикасы аумағында тұтынушылардан дәрілік заттар сапасына қатысты шағымдар (ұсыныстар) қабылдайтын және дәрілік заттың тіркеуден кейінгі қауіпсіздігін қадағалауға жауапты ұйымның атауы, мекенжайы және байланыс деректері (телефон, электронды пошта)

«Химфарм» АҚ, Қазақстан Республикасы, Шымкент қ., Рашидов к-сі, 81

Телефон нөмірі +7 7252 (610150); +7 7252 (610151)

Автожауапбергіш нөмірі +7 7252 (561342)

Электронды пошта: phv@santo.kz

11