Викс Актив СимптоМакс Плюс
Инструкция
-
русский
-
қазақша
Саудалық атауы
Викс Актив СимптоМакс Плюс
Халықаралық патенттелмеген атауы
Жоқ
Дәрілік түрі
Ішу үшін ерітінді дайындауға арналған ұнтақ
Құрамы
Бір пакеттің ішінде
белсенді заттар: 500 мг парацетамол
200 мг гвайфенезин
10 мг фенилэфрин гидрохлориді
қосымша заттар: сахароза, лимон қышқылы, қымыздық қышқылы, натрий цикламаты, натрий цитраты, аспартам (Е 951), калий ацесульфамы (Е 950), лимон дәмді қоспа 8476, лимон шырыны дәмдік қоспасы, табиғи ментол ұнтағы 876026, хинолинді сары (Е 104).
Сипаттамасы
Ірі бөлшектер мен агрегаттардан бос, цитрус-ментол иісі бар, түсі ақ дерлік ұнтақ.
Фармакотерапиялық тобы
Суық тию симптомдарын жоюға арналған препараттардың басқа да біріктірілімі.
АТХ коды R05Х
Фармакологиялық қасиеттері
Фармакокинетикасы
Құрамында белсенді зат ретінде парацетамол, гвайфенезин, фенилэфрин гидрохлориді болатын біріктірілген препарат.
Парацетамол асқазан-ішек жолынан жылдам және іс жүзінде толық сіңіріледі. Қан плазмасында ішке қабылдағаннан кейін шыңдық концентрациясына 10- 60 минуттан соң жетеді. Жартылай ыдырау кезеңі
1-3 сағатты құрайды. Парацетамол 3 механизм: глюкоронидация, сулифирлеу, оксидация бойынша негізінен бауырда метаболизмге ұшырайды. Глюкуронид және сульфатты конъюгаттар түрінде несеппен шығарылады.
Гвайфенезин ішке қабылдағаннан кейін асқазан-ішек жолынан жылдам сіңіріледі. Қан плазмасының ең жоғары концентрациясына қабылдағаннан кейін 15 минут ішінде жетеді, жартылай ыдырау кезеңі бір сағатты құрайды.
Несеппен бөлінетін β-(2 метокси- фенокси) сүт қышқылына тотығу жолымен бүйректе метаболизденеді.
Ішке қабылдағаннан кейін фенилэфрин гидрохлориді биожетімділігі төмен болады, осыған байланысты моноаминооксидаза қатысуымен бауырда метаболизмге ұшырай отырып, асқазан-ішек жолынан біркелкі сіңірілмейді. Қан плазмасында шыңдық концентрацисы 1-2 сағаттан кейін байқалады, жартылай ыдырау кезеңі 2-3 сағатқа жуықты құрайды. Сульфатты конъюгат түрінде несеппен толық шығарылады.
Фармакодинамикасы
Біріктірілген препарат, ыстық түсіретін, қабынуға қарсы, ауыруды басатын, ісінуге қарсы, қақырық түсіретін әсерге ие.
Препарат ыстықты түсіретін, қабынуға қарсы және ауыруды басатын әсерлеріне байланысты, құрамына кіретін парацетамол орталық жүйке жүйесінде простагландиндер синтезін басады.
Препараттың қақырық түсіретін әсері өз кезегінде тыныс алу жолдары сұйықтығының рефлекторлық секрециясына түрткі болады, сонысымен бронхты бөліністер көлемі мен тұтқырлығын төмендетеді, бұл шырыштың шығуын жеңілдетеді және тыныс алу жолдары шырышты қабығының тітіркенуін төмендетеді.
Фенилэфрин гидрохлориді негізінен α-адренергиялық белсенділігін иелене отырып, тікелей α-адреноргиялық рецепторларға әсер етеді, бұл мұрын шырышты қабығы тамырларының тарылуына әкеледі және оның ісінуін азайтады. Ұсынылатын дозаларда орталық жүйке жүйесіне айтарлықтай көтермелейтін әсер бермейді.
Қолданылуы
Қалтырау, жоғары температура, бас және бұлшықеттің жеңіл және орташа ауыруымен, тамақтың ауыруымен, мұрынның бітелуі мен кеуде өнімді жөтелмен қатар жүретін «суық тию» және тұмауды қысқа мерзімдік симптоматикалық емдеу.
Қолдану тәсілі және дозалары
Ішке. Бір пакеттің ішіндегісін 1 стақан қайнаған (бірақ қайнап жатқан емес) суда ерітеді. Жылы күйінде қолдану керек.
Ересектер мен 18 жастан асқан жасөспірімдер: қабылдауға бір пакет (доза), қажет болғанда қайталау дозасын әрбір 4 сағат сайын қабылдауға болады, бірақ 24 сағат ішінде 4 дозадан (пакеттер) асырмау керек.
Тәуліктің кез келген уақытында Викс Актив СимптоМакс Плюс қолдануға болады, бірақ препаратты ұйықтар алдында, түнге қарай қабылдау анағұрлым тиімді. Егер препарат қабылдауды бастағаннан кейінгі 5 күн ішінде симптомдардың жеңілденуі байқалмаса, дәрігерге қаралу қажет.
Жағымсыз әсерлері
Жағымсыз әсерлер пайда болуының жиілігі әдетте төмендегі критерийлер бойынша жіктеледі: өте жиі (≥1/10), жиі (≥1/100 бастап ≤1/10 дейін), жиі емес (≥1/1000 бастап ≤1/100 дейін), сирек (>1/10000 бастап ≤1/1000 дейін), өте сирек (≤1/10000), белгісіз (қолда бар деректер негізінде жиілігін бағалау мүмкін емес).
Жиі (≥1/100 бастап ≤1/10 дейін):
- жүрек айну, құсу, анорексия
Сирек (>1/10000 бастап ≤1/1000 дейін):
- тахикардия, жүрек соғуының жиілеуі, артериялық қысымның жоғарылуы
- ұйқының бұзылуы, күйгелектік, үрей, мазасыздық, сананың шатасуы, ашушаңдық, бас айналу, бас ауыру, тремор
- диарея, метеоризм
- аллергиялық реакциялар болуы мүмкін (бөртпе, қышыну, есекжем, анафилаксия, бронх түйілуі)
- бауыр функциясының бұзылуы (бауыр трансаминазалары деңгейінің жоғарылауы)
Өте сирек (≤1/10000):
Парацетамол болуын ескере отырып: қан жүйесінің бұзылуы (анемия, тромбоцитопения, лейкопения, агранулоцитоз, гемолитикалық анемия, нейтропения, метгемоглобинемия, панцитопения)
Белгісіз (қолда бар деректер негізінде жиілігін бағалау мүмкін емес):
- препараттың жоғары дозаларын қолданудан кейінгі панкреатит
- препараттың жоғары дозаларын ұзақ қабылдаудан кейінгі интерстициальді нефрит
Қолдануға болмайтын жағдайлар
- препарат компоненттерінің қайсы біріне жоғары сезімталдық
- ауыр дәрежелі жүрек аурулары, гипертензия
- бауыр аурулары немесе ауыр бүйрек аурулары, бүйрек жеткіліксіздігі
- қант диабеті
- жабық бұрышты глаукома
- гипертириоз
- порфирия
- үшциклді антидепрессанттарды қолдану
- алдыңғы 2 аптада моноаминооксидаза тежегіштерін қолдану
- фенилкетонурия
- фруктозаны көтере алмаушылық, глюкоза-галактоза мальабсорбциясы, сахароза-изомальтоза ферменті тапшылығы
- β- бөгегіш дәрілерді қолдану
- алкоголизм
- гепатит, панкреатит
- темекі шегумен байланысты тұрақты немесе созылмалы жөтел, созылмалы бронхит, бронх демікпесі, өкпе эмфиземасы
- жүктілік, лактация кезеңі
- 18 жасқа дейінгі балалар.
Несеп іркілу мүмкіндігімен байланысты қуық асты безі гипертрофиясы бар емделушілерде препаратты сақтықпен қолданған жөн. Рейно синдромы бар емделушілерге сақтықпен қолдану керек.
Дәрілермен өзара әрекеттесуі
Моноамнооксидаза тежегіштерін қабылдағанда препарат қабылдаудан тартына тұрған жөн. Парацетамолдың гепатоуытты әсер ету қаупі үшциклді антидепрессанттар, барбитураттар, дифенин, карбамазепин, рифампицин, зидовудин және басқа да бауыр микросомальді ферменттерін, сондай-ақ алкогольді бір мезгілде тағайындағанда жоғарылайды. Антидепрессанттар, паркинсонға қарсы және антипсихотикалық дәрілер, фенотиазин туындылары парацетамол мен фенилэфриннің гепатоуытты әсерінің даму қаупін арттырады, сондай-ақ фенилэфринмен өзара әрекеттесу кезінде несептің іркілуіне, ауыздың құрғауы мен іштің қатуына әкеледі.
Метоклопромид парацетамолдың сіңірілу жылдамдығын арттырады, холестирамин керісінше, оның сіңірілу жылдамдығын төмендетеді. Изониазид парацетамол клиренсін, бауырда оның метаболизмін бәсеңдету арқылы төмендетеді, сонысымен соңғысының уытты әсерін күшейтеді. Пробенецид парацетамол клиренсінің, оның глюкурон қышқылымен конъюгациясын бәсеңдетіп, 2 есе төмендеуін туындатады, осыған байланысты парацетамол дозасын төмендетуді қарастыру ұсынылады. Салицилаттар, оның ішінде ацетилсалицил қышқылы парацетамолдың жартылай шығарылу кезеңін ұзартуы мүмкін.
Варфарин және басқа да кумарин туындыларының антикоагулянтты әсері парацетамолды ұзақ уақыт ұдайы қолданғанда күшейеді, бұл қан кетудің даму қаупін арттырады. Парацетамолды ұзақ қолдану зидовудиннің әсерін төмендетуі мүмкін, бұл нейтропенияның даму қаупін жоғарылатады. Парацетамол ламотригиннің биожетімділігін, соңғысының әсерін төмендете отырып, кемітеді. Парацетамол несептегі фосфат тестісі мен қандағы қант тестісі көрсеткіштерін бұзуы мүмкін.
Оймақгүл алкалоидтары симпатомиметикалық препараттармен бір мезгілде қолданғанда соңғылардың әсеріне миокард сезімталдығын арттыруы мүмкін.
Айрықша нұсқаулар
Бауырдың зақымдануын болдырмас үшін препаратты алкоголь ішімдіктерімен, құрамында парацетамол бар басқа препараттармен, жөтелге қарсы препараттармен, сондай-ақ қиын тыныс алуды емдеуге арналған басқа да дәрілермен біріктірмеген жөн. Оймақгүл алкалоидтары, β-адренобөгегіш дәрілер, метилдопа, фенотиазиндер мен антигипертензиялық дәрілер қабылдайтын емделушілердің препаратты сақтықпен қабылдағандары жөн.
Несеп іркілуі мүмкіндігіне байланысты қуық асты безі гипертрофиясы бар емделушілерде препаратты сақтақпен қолданған жөн. Рейно синдромы бар емделушілерде сақтықпен қолдану керек.
Препаратты ұзақ қолдану ұсынылмайды. Егер препарат қабылдауды бастағаннан кейінгі 5 күн ішінде жеңілдеу симптомдары байқалмаса, дәрігерге қаралу қажет. Зақымданған пакеттегі дәрілік препаратты пайдаланбаған жөн.
Дәрілік заттың көлік құралын немесе қауіптілігі зор механизмдерді басқару қабілетіне әсер ету ерекшеліктері
Препаратты қабылдаған кезде бас айналу, сананың шатасуы сияқты жағымсыз әсерлердің байқалу мүмкіндігіне байланысты автомобильді немесе басқа механизмдерді басқару ұсынылмайды.
Артық дозалануы
Симптомдары: бозару, жүрек айну, құсу, анорексия, эпигастрий аумағының ауыруы, үрейлі қозу, бас айналу, бас ауыру, қан айналудың бұзылуы, артериялық қысымның жоғарылауы, брадикардия, аритмия, сананың шатасуы, тыныс алудың бәсеңдеуі, гепатоуытты және нефроуытты әсері, гематурия, протеинурия, ауыр жағдайларда бауыр жеткіліксіздігі, энцефалопатия, гипогликемия, мидың ісінуі, коматозды жағдай дамиды. Сондай-ақ панкреатит жағдайлары да хабарланған.
Емі: үлкен дозаны қабылдағаннан кейін 1 сағаттың ішінде асқазанды шаю, белсендірілген көмір, N- ацетилцистеинмен емдеу артық дозаланудан кейін 24 сағатқа дейін қолданылуы мүмкін, бірақ жоғары әсері болуы үшін оны алғашқы 8 сағатта енгізген дұрыс. Жоғары қан қысымын басу үшін α- рецепторлары антагонистерін қолданады. Симптоматикалық ем.
Шығарылу түрі және қаптамасы
Препарат көп қабатты материалдан: тығыздығы төмен полиэтилен/ алюминий фольга/ этилен/метакрил кополимерінен жасалған пакеттерде.
5 немесе 10 пакет медицинада қолданылуы жөніндегі мемлекеттік және орыс тілдеріндегі нұсқаулықпен бірге картон қорапқа салынады.
Сақтау шарттары
+25 0С-ден аспайтын температурада сақтау керек.
Балалардың қолы жетпейтін жерде сақтау керек!
Сақтау мерзімі
3 жыл
Жарамдылық мерзімі өткеннен кейін препаратты пайдалануға болмайды.
Дәріханалардан босатылу шарттары
Рецептісіз
Өндіруші-ұйымның атауы мен елі
Wrafton Laboratories Limited, Ұлыбритания
Тіркеу куәлігі иесінің атауы және елі
Teva Pharmaceutical Industries LTD, Израиль
Қаптаушы ұйымның атауы мен елі
Wrafton Laboratories Limited, Ұлыбритания
Қазақстан Республикасы аумағында тұтынушылардан өнім сапасына қатысты шағымдарды қабылдайтын ұйымның мекенжайы
«ратиофарм Қазақстан» ЖШС
Алматы қ., Әл-Фараби д-лы 19,
«Нұрлы- Тау» БО 1Б блок, № 603 кеңсе
Телефон, факс: (727) 311-09-15; 311-07-34
E-mail: teva@teva.co.il