Аллергостоп® 4% (Спрей назальный)
Инструкция
-
русский
-
қазақша
Саудалық атауы
АЛЛЕРГОСТОП®
Халықаралық патенттелмеген атауы
Кромоглиций қышқылы
Дәрілік түрі
4% мұрын спрейі
Құрамы
100 мл ерітіндінің құрамында
белсенді зат - 4.00 г натрий кромогликаты,
қосымша заттар: бензалконий хлориді, инъекцияға арналған су.
Сипаттамасы
Мөлдір немесе сәл бозаңданатын, түссізден сарғыш түске дейінгі сұйықтық.
Фармакотерапиялық тобы
Жергілікті қолдануға арналған деконгестанттар және басқа мұрын препараттары. Аллергияға қарсы препараттар.
АТЖ коды R01АС01
Фармакологиялық қасиеттері
Фармакокинетикасы
Мұрын ішіне қолданғаннан кейін <7% доза мұрын қуысынан сіңіріліп, жүйелі қан ағымына түседі. Препараттың емдік әсерін қамтамасыз ететін негізгі фактор жергілікті қолданғаннан кейін нысана-мүшеде қол жеткізілетін натрий кромогликатының концентрациясы болып табылады. Жартылай шығарылу кезеңі (T1/2) - 80 мин. Ең жоғары аллергияға қарсы әсері қолданғаннан кейін алғашқы 2 сағатта, әсер ету ұзақтығы 4-6 сағатқа дейін білінеді.
Натрий кромогликаты липидтерде нашар ериді, сондықтан да биологиялық жарғақшалар арқылы, соның ішінде гематоэнцефалдық кедергі арқылы өтпейді, метаболизденбейді.
Препарат ағзадан несеппен және өтпен тең мөлшерлерде 24 сағат ішінде өзгермеген күйде шығарылады.
Фармакодинамикасы
Жасушалық жарғақшаны тұрақтандыру жолымен жуан жасушалардың түйіршіксізденуін бәсеңдете отырып, натрий кромогликаты аллергия медиаторлары - гистаминнің, брадикининнің, простагландиндердің, лейкотриендердің, соның ішінде «баяу белгі беретін субстанциялардың» және басқа биологиялық белсенді заттардың бөлініп шығуын болдырмайды. Фосфодиэстеразаның белсенділігін бәсеңдетеді және жасуша ішіндегі цАМФ концентрациясын арттырып, кальций иондарының цитозолдарға енуін бөгейді. Бұл әсер ету механизмі барлық шырышты қабықтар үшін әмбебап болып табылады.
Ең көп емдік тиімділігіне спрейді алдын ала қолданған кезде қол жеткізіледі. Сондықтан оны аллергия нышандары білінуінен біраз бұрын (бұл маусымдық аллергия жағдайларына қатысты) қолдана бастаған дұрыс.
Клиникалық әсері бірнеше күн өткенде, ал ең жоғары әсері – қабылдағаннан кейін 15 күн өткен соң байқала бастайды.
Аллергостоп® аллергия белгілерінің көп бөлігін тиімді жеңілдетеді немесе толықтай басады, маусымдық немесе жыл бойғы ринитте басым белсенділік танытады.
Аллергостоп® шырышты қабық тамырларының жоғары өткізгіштігін де азайтып, аллергеннің және айрықша белгісі жоқ стимулдардың жуан жасушаларға жетуін шектеуі мүмкін.
Қолданылуы
- аллергиялық этиологиядағы маусымдық немесе жыл бойғы риниттің, поллиноздың («пішен қызбасының») алдын алу және емдеу
- ластанған қоршаған ортаға және тұрмыстық химия заттарына, түтін, тозаңдану, еріткіштердің және басқа химия заттардың булары сияқты кәсіби зиянды заттарға, өсімдіктерге және үй жануарларына аллергиялық реакциялармен байланысты мұрын қуысы шырышының тітіркенуін жеңілдету және басу үшін
Қолдану тәсілі және дозалары
Ересектерге және 5 жастан асқан балаларға әдетте тәулігіне 4 рет әр танауға спрейдің 1 дозасын тағайындайды.
Қажет болғанда, тәуліктік дозаны арттыруға болады, бірақ препаратты енгізу жиілігі тәулігіне 6 рет әр танауға спрейдің 1 дозасынан аспауға тиіс.
Енгізулер арасындағы аралықтарды емдік әсерге қол жеткізілгеннен кейін белгілер жоғалғанша арттыруға болады.
Аллергостоп® ұзақ уақыттық емге арналған. Жеделге жуық және созылмалы үдерістерді алдын ала емдеуді аллергенмен жанасуға дейін бастау керек. Емдеуді науқас аллергендердің әсеріне (тозаңдар, үй тозаңы, зең споралары, тағамдық аллергендер) ұшыраған кезең бойына жалғастыру қажет. Созылмалы ауруларда қолдану ұзақтығы сырқаттың клиникалық ағымына қарай белгіленеді. Тиімді ем әсерін ұдайы бағалаған жөн, және де, қажет жағдайда, дозаны азайту ұсынылады.
Жағымсыз әсерлері
Жиі
- мұрынның шырышты қабығының тітіркенуі немесе ашытуы, эпистаз, түшкіру, жөтелу, ринорея
Сирек
- тамақтың жеңіл кеберсуі, тыныс алудың қиындауы, мұрыннан қан кету
- бас ауыруы, бас айналуы, бас сақинасы
Өте сирек
- бөрту, есекжем, терінің қышынуы, экзантема, ентігу, бронх түйілуі, беттің, еріннің, тілдің, қабақтың ангионевротикалық ісінуі, анафилактикалық реакциялар, артралгия
- дәм сезудің өзгеруі, дисфагия, жүрек айнуы, іштің ауыруы
- артериялық гипотензия
Қолдануға болмайтын жағдайлар
- препараттың құрамдас бөліктеріне жекеше жоғары сезімталдықта
- мұрын қуысындағы полиптерде
- 5 жасқа дейінгі балалық кезеңде
Дәрілермен өзара әрекеттесуі
Натрий кромогликатын басқа препараттармен бір мезгілде қолданған кездегі теріс дәрілік өзара әрекеттесуі жөнінде деректер жоқ.
Аллергостоп® гистаминге қарсы препараттардың, β-адреномиметиктердің, глюкокортикостероидтар мен теофиллиннің әсерін күшейтуі мүмкін.
Айрықша нұсқаулар
Құтының бүтіндігіне нұқсан келсе, сондай-ақ ерітінді тұманданса, препаратты пайдалануға болмайды.
Жедел қабынуда және созылмалы үдерістің асқыну кезеңінде препаратты қысқа кезең ішінде гистаминге қарсы дәрілермен немесе кортикостероидтармен қосып қолдану керек. Емделуші препаратты ұдайы қолдану қажет екені жөнінде ескертілуге тиіс. Емдеуді аллергенмен жанасуға дейін бастайды және аллерген әсерінің бүкіл кезеңінде жалғастырады.
Аллергостоп® препаратын қолдануға дейін 2-3 күн бойы әсерді жеделдету үшін мұрынға арналған ісінуге қарсы дәрілерді қолдануға болады.
Педиатрияда қолданылуы
5 жасқа дейінгі балаларда дәрілік заттың тиімділігі мен қауіпсіздігі жөнінде деректер жоқ.
Жүктілік және лактация кезеңі
Натрий кромогликаты емшек сүтімен болымсыз мөлшерде бөлініп шығады, сондықтан препаратты емшек емізу кезеңінде қолданғанда жас балаларға зиянды әсер ету қаупі тым аз немесе мүлде жоқ.
Препаратты жүктілік кезінде немесе лактация кезеңінде қолдану емнен күтілетін пайда ұрыққа немесе сәбиге төнетін зор қатерден артық болған жағдайларда ғана ұсынылады.
Дәрілік заттың автокөлікті және қауіптілігі зор механизмдерді басқару қабілетіне әсер ету ерекшеліктері
Препараттың жағымсыз әсерлерін және ОЖЖ тарапынан ұнамсыз реакциялардың пайда болуы мүмкін екенін ескеріп, көлік құралын басқаруды немесе басқа қауіптілігі зор механизмдермен жұмыс істеуді уақытша қоя тұру керек.
Артық дозаланғанда
Препаратты жергілікті қолданған кезде артық дозалану жағдайларының ықтималдығы аз және сипатталмаған.
Шығарылу түрі және қаптамасы
10 мл-ден полиэтиленді спрей-құтыларда.
1 спрей-құтыдан медицинада қолданылуы жөніндегі мемлекеттік және орыс тілдеріндегі нұсқаулықпен бірге алғашқы ашылуы бақыланатын картон пәшкеде.
Сақтау шарттары
Жарықтан қорғалған жерде, 15 оС-ден 25 оС-ге дейінгі температурада сақтау керек.
Ашылғаннан кейін тығыз жабылған қаптамада сақтап, 4 апта ішінде пайдалану керек.
Балалардың қолы жетпейтін жерде сақтау керек!
Сақтау мерзімі
3 жыл
Жарамдылық мерзімі өткеннен кейін қолдануға болмайды.
Дәріханалардан босатылу шарттары
Рецептісіз
Өндіруші
«ЛеКос» ЖШС
050000, Алматы қ., Қабанбай батыр к-сі, 114-13.
Тіркеу куәлігінің иегері
«ЛеКос» ЖШС, Қазақстан
Қазақстан Республикасы аумағында тұтынушылардан өнім сапасына қатысты шағымдар қабылдайтын ұйымның мекенжайы:
050000, Алматы қ., Қабанбай батыр к-сі, 114-13, тел./факс: 223-13-62.
e-mail: lecos1@mail.ru