Юнифен (Ибупрофен)

Юнифен

Ибупрофен

Дәрілік түрі, дозасы

желатинді капсулалар 200 мг, 400 мг

Сүйек-бұлшықет жүйесі. Қабынуға қарсы және ревматизмге қарсы препараттар. Қабынуға қарсы және ревматизмге қарсы стероидты емес препараттар. Пропион қышқылының туындылары. Ибупрофен.

АТХ коды М01АЕ01

Ересектер мен егде жастағыларға:

- ауыр емес артрит, ревматизмдік немесе бұлшықет ауыруы, арқаның ауыруы, невралгия, бас сақинасы, бас ауыруы, тіс ауыруы, дисменорея, қызба, суық тию және тұмау белгілерін жеңілдету үшін.

Қолдануды бастағанға дейін қажетті мәліметтер тізбесі

- ибупрофенге немесе 6.1 тармағында корсетілген препарат компоненттерінің кез келгеніне жоғары сезімталдық

- ибупрофен, ацетилсалицил қышқылы немесе басқа қабынуға қарсы стероидты емес препараттарды қабылдау арқылы туындаған анамнездегі аса жоғары сезімталдық реакциялары (атап айтқанда, бронх демікпесі, ринит, Квинке ісінуі немесе есекжем)

- асқыну/ойық жарадан қан кету сатысындағы ойық жара ауруы немесе анамнездегі ойық жарадан қан кету көріністері /ойық жара ауруының болуын көрсету (ойық жара ауруының немесе ойық жарадан қан кетудің екі және одан да көп расталған көріністері)

- анамнезінде ҚҚСП қолданумен туындаған асқазан-ішек жолынан қан кету немесе тесілуі

- бауырдың ауыр жеткіліксіздігі

- ауыр бүйрек жеткіліксіздігі

- ауыр жүрек жеткіліксіздігі

- жүктілік және лактация кезеңі

- 18 жасқа дейінгі балалар мен жасөспірімдер.

Қолданған кездегі қажетті сақтық шаралары

Бүйрек функциясының бұзылуы: бүйрек функциясының жеңіл немесе орташа айқын төмендеуі бар пациенттерге симптомдарды бақылау және бүйрек функциясын бақылау үшін қажетті ең қысқа уақыт кезеңі ішінде барынша төмен доза тағайындалуы тиіс, бүйрек функциясының ауыр жеткіліксіздігі бар пациенттер үшін препаратты қолдануға болмайды.

Бауыр функциясының бұзылуы: бауыр функциясының жеңіл немесе орташа айқын төмендеуі бар пациенттерге симптомдарды бақылау және бүйрек функциясын бақылау үшін қажетті ең қысқа уақыт кезеңі ішінде барынша төмен дозаны тағайындау керек, бауырдың ауыр жеткіліксіздігі бар пациенттер үшін препаратты қолдануға болмайды.

Егде жастағы пациенттер: егде жастағыларға жағымсыз реакциялардың даму қаупінің жоғарылауына байланысты препаратты қабылдау ұсынылмайды. Егер оларға препаратты қабылдау қажет болса, ең төменгі тиімді доза және емдеудің ең аз мерзімі тағайындалуы тиіс. Емдеу кезеңінде АІЖ қан кетуді бақылау үшін пациент дәрігердің бақылауында болуы керек. Бүйрек немесе бауыр функциясының бұзылуында доза жеке белгіленеді.

Басқа дәрілік препараттармен өзара әрекеттесуі

Ибупрофенді және келесі заттарды бір мезгілде қабылдаудан аулақ болу керек

Ацетилсалицил қышқылы (аспирин): жағымсыз әсерлердің ықтималды күшеюіне байланысты ибупрофен мен ацетилсалицил қышқылын бір мезгілде қабылдау әдетте ұсынылмайды.  Ибупрофенді тұрақты, ұзақ уақыт қолданғанда аспириннің төмен дозаларының кардиоқорғағыш әсерінің төмендеуін жоққа шығаруға болмайды.

Басқа ҚҚСП: жағымсыз әсерлердің (асқазан-ішектің ойық жаралары мен қан кетулердің) даму қаупінің ықтималды артуына байланысты ҚҚСП тобынан екі және одан да көп препараттарды бір мезгілде қолданудан аулақ болу керек.

Қанның ұюын төмендететін препараттар (мысалы, варфарин, гепарин): олардың әсерін күшейтуге болады.

Метотрексат: оның әсерінің күшеюі және уытты әсерлері дамуы мүмкін.

Юнифенді келесі препараттармен бірге сақтықпен қабылдау керек

Дигоксин, фенитоин және литий: дигоксинмен, фенитоинмен немесе литий препараттарымен бір мезгілде қолдану олардың әсерін күшейтуі мүмкін.

Қан қысымын төмендетуге арналған препараттар, бета-блокаторлар және несеп айдайтын дәрілер: олардың әсері төмендеуі мүмкін, несеп айдайтын препараттар Юнифен препаратының әсерін күшейтуі мүмкін. Бүйрек функциясы төмендеген кезде (мысалы, сусыздану кезінде немесе егде жастағы адамдарда бүйрек ауруы кезінде) АӨФ тежегіштерін, бета-блокаторларды немесе ангиотензин II антагонистерін бір мезгілде қабылдау бүйрек функциясының одан әрі нашарлауына, жедел бүйрек жеткіліксіздігіне дейін әкелуі мүмкін. Әдетте бұл процесс қайтымды. Бұл біріктіруді әсіресе қарт адамдарда сақтықпен қолдану керек. Сондай-ақ, сұйықтықты жеткілікті мөлшерде қабылдау керек және біріктірілген ем басталғаннан кейін бірден бүйрек жұмысы көрсеткіштерін үнемі бақылау керек.

Калий жинақтаушы несеп айдайтын дәрілермен немесе АӨФ тежегіштерімен бір мезгілде қабылдаған кезде қандағы калий деңгейі жоғарылауы мүмкін, бұл қандағы калий деңгейін бақылауды қажет етуі мүмкін.

Каптоприл: ибупрофен организмнен натрийдің бөлінуінің жоғарылауы бойынша каптоприлдің әсеріне қарсы тұра алады.

Аминогликозидтер: аминогликозидтер әсерінің күшеюі және олардың уытты әсерінің дамуы мүмкін.

Серотонинді кері қармайтын селективті тежегіштер: асқазан-ішектен қан кету қаупі артады.

Циклоспорин: бүйрек жұмысы бұзылуы мүмкін.

Холестирамин: бір мезгілде қолданған кезде Юнифен препаратының әсері әлсіреуі мүмкін, сондықтан дәрілік препараттарды кемінде бір сағат аралықпен қабылдау қажет.

Такролимус: такролимустен туындаған бүйрек жұмысы бұзылуы мүмкін.

Зидовудин: зидовудинмен қан түзу процесі бәсеңдеуі мүмкін (қан құрамының бұзылуымен). Гемофилиясы бар АИТВ-оң пациенттерде буындар қуысына қан құйылудың және қанталаудың даму қаупінің жоғарылауы туралы деректер бар. Қолдануды бастағаннан кейін 1-2 аптадан соң жалпы қан талдауын бақылау ұсынылады.

Ритонавир: Юнифен препаратының әсері күшеюі мүмкін.

Мифепристон: мифепристон әсері төмендеуі мүмкін. 

Пробенецид немесе сульфинпиразон: ибупрофеннің шығарылуының кідіруіне әкелуі мүмкін, пробенецид немесе сульфинпиразонның әсері төмендеуі мүмкін.

Шөп экстрактілері: Гинкго билоба қан кету қаупін арттыруы мүмкін.

Вориконазол, флуконазол: Юнифен препаратының әсері күшеюі мүмкін. Юнифен препаратының және вориконазолдың немесе флуконазолдың үлкен дозаларын бір мезгілде тағайындаған кезде Юнифен препаратының дозасын төмендету қажеттілігі туындауы мүмкін.

Хинолон қатарының антибиотиктері: құрысулар дамуы мүмкін.

Сульфонилмочевина: қандағы глюкоза деңгейінің айқын төмендеуі түрінде сульфонилмочевина әсері күшеюі мүмкін. Бір мезгілде емдеу жағдайында қандағы глюкоза деңгейін бақылау ұсынылады.

Гормональді препараттар (глюкокортикостероидтар): ойық жара немесе асқазан-ішектен қан кету қаупі артады.

Тромбоциттердің агрегациясына кедергі келтіретін препараттар (мысалы, клопидогрель және тиклопидин): асқазан-ішектен қан кету қаупін арттырады.

Спирт, бисфосфонаттар және окспентифиллин (пентоксифлин): АІЖ тарапынан жағымсыз әсерлердің күшеюі және қан кету мен ойық жара қаупі болуы мүмкін.

Баклофен: баклофеннің уытты әсерінің дамуы мүмкін.

Арнайы ескертулер

Ойық жараның немесе қан кетудің даму қаупінің жоғары болуына байланысты ибупрофенді циклооксигеназа-2 селективті тежегіштерін қоса, басқа ҚҚСП-мен бір мезгілде қолданудан аулақ болу керек.

Симптомдарды бақылау үшін қажетті ең қысқа уақыт ішінде ең төмен тиімді дозаны қолдану арқылы жағымсыз әсерлерді барынша азайтуға болады. ҚҚСП ұзақ уақыт қабылдайтын пациенттер жағымсыз әсерлерін анықтау үшін тұрақты медициналық бақылаудан өтуі тиіс.

Төменде ибупрофен пайда/қауіп оң арақатынасы қатаң сақталған жағдайда ғана тағайындалуы тиіс жағдайлар келтірілген:

- жүйелі қызыл жегі (ЖҚЖ) немесе дәнекер тіннің аралас аурулары кезінде

- пигменттік алмасудың туа біткен бұзылуы кезінде

- жүктіліктің бірінші және екінші триместрінде

- лактация кезінде.

Келесі жағдайларда ерекше сақ болу керек:

-ішектің созылмалы қабыну ауруларын (ойық жаралы колит, Крон ауруы) қоса, асқазан-ішек жолы ауруларында

- жүрек жеткіліксіздігі және артериялық гипертония кезінде

- бүйрек функциясы төмендеген кезде

- бауыр функциясының бұзылуында

- қан түзудің бұзылуында

- қан ұюының бұзылуында

- аллергия, пішен қызбасы, мұрын шырышты қабығының созылмалы ісінуі, аденоидтар, тыныс алу жолдарының созылмалы обструктивті ауруы немесе бронх демікпесі кезінде

- күрделі хирургиялық араласулардан кейін бірден.

Асқазан-ішектен қан кету, ойық жаралануы және тесілуі: кез-келген емдеу кезеңінде барлық ҚҚСП қабылдаған кезде, алдын-алу симптомдарымен немесе онсыз, бұрын асқазан-ішектің күрделі жағымсыз әсерлерімен, асқазан-ішектен қан кету, өлімге әкелуі мүмкін ойық жаралану немесе тесілулер туралы хабарланды. Асқазан-ішектен қан кету, ойық жаралануы немесе тесілу қаупі ҚҚСП дозасын арттырған кезде, бұрын ойық жарасы бар пациенттерде, әсіресе егер ол қан кетумен немесе тесілумен асқынса және қарт адамдарда жоғары. Бұл пациенттерге емдеуді ең төменгі тиімді дозадан бастау қажет.

Осы пациенттер үшін, сондай-ақ ацетилсалицил қышқылының төмен дозаларын немесе асқазан-ішек қаупін арттыруы мүмкін басқа дәрілік препараттарды бір мезгілде қабылдауды талап ететін пациенттер үшін қорғаныс құралдарымен (мысалы, мизопростолмен немесе протонды помпа тежегіштерімен) біріктірілген ем тағайындау мүмкіндігін қарастыру қажет.

Анамнезінде асқазан-ішек жолы тарапынан уытты көріністері бар пациенттер, әсіресе егде жастағы адамдар, әсіресе емдеудің бастапқы кезеңдерінде іштегі кез келген ерекше симптомдар (әсіресе асқазан-ішектен қан кету) туралы хабарлауы тиіс.

Пероральді кортикостероидтар, антикоагулянттар (мысалы, варфарин немесе гепарин), серотонинді кері қармайтын селективті тежегіштер немесе ацетилсалицил қышқылы сияқты тромбоцитке қарсы дәрілер сияқты ойық жаралардың немесе қан кетулердің пайда болу қаупін арттыруы мүмкін препараттарды бір мезгілде қабылдайтын пациенттерге сақтықпен қарау қажет.

Юнифен қабылдайтын пациенттерде асқазан-ішектен қан кету немесе ойық жара пайда болған кезде емдеуді тоқтату қажет.

Бұрын асқазан-ішек жолдарының аурулары (ойық жаралы колит, Крон ауруы) бар пациенттерге ҚҚСП сақтықпен тағайындау керек, өйткені олардың жағдайы өршуі мүмкін.

Егде жастағы адамдар: егде жастағы адамдарда ҚҚСП-да жағымсыз реакциялардың, әсіресе асқазан-ішектен қан кету және тесілулердің даму жиілігі жоғары, олар сирек жағдайларда өлімге әкелуі мүмкін.

Жүрек-қантамыр және цереброваскулярлық әсерлер: артериялық гипертензиясы және/немесе орташа айқын іркілісті жүрек жеткіліксіздігі бар пациенттер үшін тиісті бақылау және дәрігердің кеңесі қажет, өйткені ҚҚСП қолдануға байланысты сұйықтықтыңитежелуі, гипертензия және ісінулер туралы хабарламалар келіп түсті.

Клиникалық зерттеулер ибупрофенді, әсіресе үлкен дозаларды (күніне 2400 мг) қолдану артериялық тромбоз (мысалы, миокард инфарктісі немесе инсульт) қаупінің аздап жоғарылауын тудыруы мүмкін деп көрсетеді. Жалпы, жүргізілген зерттеулер ибупрофеннің төмен дозалары (мысалы, күніне ≤ 1200 мг) артериялық тромбоздың жоғары қаупін тудырады деп болжамайды.

Бақыланбайтын артериялық гипертензиясы, іркілісті жүрек жеткіліксіздігі, жүректің ишемиялық ауруы, шеткері артерия аурулары және/немесе ми қан тамырлары аурулары бар пациенттерді ибупрофенмен тек дәрігердің кеңесінен кейін емдеу қажет және оларда жоғары тәуліктік дозалардан (күніне 2400 мг) аулақ болу керек.

Жүрек-қан тамырлары ауруларының қауіп факторлары бар пациенттерде (мысалы, артериялық гипертензия, қандағы липидтер деңгейінің жоғарылауы, қант диабеті, темекі шегу) ұзақ емдеуді бастамас бұрын, әсіресе ибупрофеннің жоғары тәуліктік дозалары (күніне 2400 мг) қажет болса, дәрігердің кеңесі қажет.

Ауыр тері реакциялары: эксфолиативтік дерматитті, Стивенс-Джонсон синдромын және ҚҚСП қолданумен байланысты уытты эпидермальді некролизді қоса, кейбіреуі өлімге әкеп соққан күрделі тері реакциялары туралы өте сирек хабарланған. Мұндай реакциялар дамуының едәуір жоғары қаупіне пациенттер емнің басында (бірінші айда) ұшырауы мүмкін. Құрамында Ибупрофен бар препараттарды қолданған кезде де жедел жайылған экзантематозды пустулездің дамуы туралы хабарланды. Тері бөртпесі, шырышты қабықтың зақымдануы немесе аса жоғары сезімталдықтың кез келген басқа белгілері алғаш пайда болған кезде Юнифен препаратын қабылдауды тоқтатып, шұғыл түрде дәрігерге қаралу қажет.

Ерекше жағдайларда желшешек тері мен жұмсақ тіндердің күрделі инфекциялық асқынуларына себеп болуы мүмкін. Бүгінгі күні осы инфекциялардың өршуіндегі ҚҚСП рөлін жоққа шығаруға болмайды, сондықтан Юнифен препаратын желшешек кезінде қолданудан аулақ болу ұсынылады.

Инфекциялар: ибупрофен инфекциялық аурудың белгілерін бүркемелеуі және қажетті емнің басталуын кешіктіріп, оның ағымын қиындатуы мүмкін. Бұл өкпенің қабынуында және желшешектің іріңді асқынуларында байқалды. Егер амбулаториялық емдеу кезінде аурудың симптомдары сақталса немесе күшейсе, шұғыл түрде дәрігерге қаралу керек.

Бүйрекке әсері: бұрын бүйрек аурулары байқалмаған пациенттерде ибупрофеннің әсерінен организмде натрий, калий және сұйықтықтың іркілуі байқалуы мүмкін. Сезімтал пациенттерде бұл ісінуді тудыруы мүмкін немесе тіпті жүрек жеткіліксіздігіне немесе қан қысымының жоғарылауына әкелуі мүмкін. Ибупрофенді басқа ҚҚСП сияқты ұзақ уақыт бойы енгізу бүйректің әртүрлі ауруларына, оның ішінде несепте қан, ақуыз және ісінудің пайда болуымен бүйректің жедел қабыну ауруының дамуына әкелуі мүмкін, бұл әсіресе бүйрек ауруы, жүрек жеткіліксіздігі, бауыр жеткіліксіздігі бар пациенттерге, диуретиктер мен АӨФ тежегіштерін қабылдаушыларға, сондай-ақ қарттарға тән.

Бауыр жеткіліксіздігі: бауыр функциясының ауыр бұзылуында қолданылмайды.

ЖҚЖ және дәнекер тіннің аралас ауруы: жүйелі қызыл жегі (ЖҚЖ) және дәнекер тіннің аралас аурулары бар пациенттерде асептикалық менингиттің жоғары қаупі болуы мүмкін.

Асептикалық менингит: мойынның сіресуі, бас ауыруы, жүрек айнуы, құсу, қызба немесе бағдардан жаңылу сияқты асептикалық менингит симптомдары байқалды.

Ибупрофен қабылдайтын пациенттерде сирек жағдайларда асептикалық менингит байқалды. Бұл жүйелі қызыл жегі және дәнекер тіннің аурулары бар пациенттер үшін ықтималдығы зор болса да, созылмалы аурумен ауырмайтын пациенттерде де кездеседі.

Басқа сақтық шаралары: өте сирек аса жоғары сезімталдықтың ауыр жедел реакциялары байқалды (мысалы, анафилаксиялық шок). Ибупрофенді қабылдағаннан / енгізгеннен кейін аса жоғары сезімталдық реакциясының алғашқы белгілері кезінде емдеуді шұғыл тоқтату және қажетті (симптомдардың айқындылығына байланысты) медициналық іс-шараларды қабылдау қажет.

Бұрын бронх демікпесі, созылмалы ринит, синусит, мұрын полиптері, аденоидтар немесе аллергиялық аурулары бар немесе болған пациенттерде бронх түйілуі, есекжем немесе ангионевроздық ісіну дамуы мүмкін.

Ибупрофен инфекцияның белгілерін немесе симптомдарын (қызба, ауырсыну және ісіну) бүркемелеуі мүмкін.

Бас ауыруынан кез-келген ауырсынуды басатын дәріні ұзақ уақыт қолдану оны күшейтуі мүмкін. Егер мұндай жағдай туындаса немесе күдік туындаса, емдеуді тоқтатып, дәрігерге қаралу керек.  Дәрілерді шамадан тыс қолданған кезде бас ауыруы диагнозын бас ауыруынан дәрілік препараттарды үнемі қабылдауға қарамастан (немесе салдарынан) жиі немесе күнделікті басы ауыратын пациенттерден күдіктену керек. Әдетте, анальгетиктерді әдеттегідей қабылдау, әсіресе әртүрлі анальгетиктерді біріктіру бүйректің қайтымсыз зақымдалуына және бүйрек жеткіліксіздігінің (анальгетиктердің нефропатиясы) қаупін тудыруы мүмкін.

Ибупрофен тромбоциттер агрегациясын уақытша бәсеңдетуі және қан кету уақытын ұзартуы мүмкін, сондықтан қан ұюы бұзылған немесе антикоагулянттық ем алатын пациенттер мұқият қадағалауда болуы тиіс.

Ибупрофенмен ұзақ мерзімді емдеу жағдайында бауыр мен бүйрек функциясын мерзімді бақылау, сондай-ақ, әсіресе қаупі жоғары пациенттерде қан талдау қажет.

Алкогольді ішуден аулақ болу керек, өйткені бұл ҚҚСП жағымсыз әсерлерін күшейтуі мүмкін, әсіресе егер олар асқазан-ішек жолына немесе орталық жүйке жүйесіне әсер етсе.

Ибупрофен қабылдайтын пациенттер асқазан-ішек жолының ойық жарасының немесе қан кетуінің белгілері немесе симптомдары, көрудің анық еместігі немесе көз тарапынан басқа да симптомдар, тері бөртпесі, салмақтың артуы немесе ісіну туралы өз дәрігеріне хабарлауы тиіс.

Балалар: балалар мен жасөспірімдерде сусыздану кезінде бүйрек жеткіліксіздігінің даму қаупі бар, препарат 18 жасқа дейінгі балалар мен жасөспірімдерде қолданылмайды.

Жүктілік немесе лактация кезінде

Ибупрофенді жүктіліктің ерте кезеңінде қолданғанда, мерзімінен бұрын босану және жүрек пен алдыңғы құрсақ жақтауы ақауларының даму қаупі жоғарылауы мүмкін, олардың жиілігі көбінесе препарат дозасының ұлғаюына және емдеу ұзақтығына байланысты болады. Егер Юнифен препаратын жүкті болуға тырысатын әйел немесе жүктіліктің бірінші немесе екінші триместрінде қабылдаса, дозасы мен емдеу ұзақтығы мүмкіндігінше төмен болуы тиіс.

Жүктіліктің соңғы үш айында шарананың жүрек, өкпе және бүйрек жұмысы айтарлықтай нашарлауы мүмкін. Анасында қан кету уақытының ұзаруы, босанудың кідіруі және ұзағырақ өтуі мүмкін, сондықтан Юнифен препаратын жүктіліктің үшінші триместрінде қолдануға болмайды.

Ибупрофен емшек сүтімен шығарылады, бірақ қысқа емдеу курсында және емдік дозаларда оның нәрестеге әсер ету қаупі екіталай. Алайда, егер Юнифен препаратымен неғұрлым ұзақ емдеу тағайындалса, емшек емізуді тоқтату мүмкіндігін қарастыру қажет.

Ибупрофенді қолдану фертильділікті нашарлатуы мүмкін және жүкті болуға тырысатын әйелдерге ұсынылмайды. Ұрықтанумен қиындықтары бар немесе бедеулікке байланысты тексеруден өткен әйелдер Юнифен препаратын тоқтату мүмкіндігін қарастыруы қажет.

Препараттың көлік құралын немесе қауіптілігі зор механизмдерді басқару қабілетіне әсер ету ерекшеліктері

ҚҚСП қабылдағаннан кейін бас айналу, ұйқышылдық, қажу және көру қабілетінің бұзылуы дамуы мүмкін. Бұл әсер алкогольді бір мезгілде қолданғанда күшейеді. Мұндай жағдайларда көлік құралын басқаруға немесе қауіптілігі зор механизмдермен жұмыс істеуге болмайды.

Қолдану жөніндегі нұсқаулар

Дозалау режимі

Жағымсыз реакциялардың даму қаупін азайту үшін Юнифен препаратын симптомдарды жеңілдету үшін қажетті ең аз қысқа уақыт кезеңі ішінде ең аз тиімді дозада қолданады. Егер препаратқа қажеттілік 10 күннен астам уақытқа созылса немесе аурудың белгілері сақталса немесе нашарласа, дәрігермен кеңесу керек.

Ересектерге: 1 капсуладан (200 - 400 мг), қажет болған жағдайда күніне үш рет қабылдау керек. Дозаларды қабылдау арасында кем дегенде 4 сағат өту керек. 24 сағат ішінде 1200 мг артық қабылдауға болмайды.

Енгізу әдісі мен жолы

Қолдану тәсілі

Ішке қабылдау үшін. Капсуланы сумен іше отырып, тұтастай жұту керек. 

Артық дозаланған жағдайда қабылдануы тиіс шаралар

Симптомдары: жүрек айну, құсу, эпигастрий аумағының ауыруы немесе, сирек, диарея дамуы мүмкін. Сондай-ақ, нистагм, көрудің бұлыңғырлануы, құлақтың шуылдауы, бас ауыруы және асқазан-ішектен қан кетуі мүмкін. Неғұрлым ауыр уыттану кезінде бас айналу, жүрістің бұзылуы, ұйқышылдық, кейде қозу және бағдардан жаңылу, сананың тұмандануы немесе санадан айрылу түрінде орталық жүйке жүйесіне уытты әсері көрінеді, кейде (көбінесе балаларда) құрысулар дамуы мүмкін.  Ауыр уыттану кезінде зат алмасудың ауыр бұзылуы, дене температурасының төмендеуі, қандағы калий деңгейінің және қан ұю көрсеткіштерінің жоғарылауы (протромбин уақыты/ХҚҚ) дамуы мүмкін. Жедел бүйрек жеткіліксіздігінің дамуы, бауырдың зақымдануы, қан қысымының төмендеуі, тыныс алудың бәсеңдеуі және цианоз дамуы мүмкін.

Емі: емдеу симптоматикалық және демеуші болуы тиіс және тыныс алу жолдарының өткізгіштігін, жүрек және басқа да өмірлік маңызды функцияларды тұрақтандыру мен бақылауды қамтуы керек. Егер пациенттің салмағына шаққанда 400 мг астам дозаны ішке қабылдағаннан кейін шамамен бір сағат өтсе, асқазанды шаю немесе белсендірілген көмірді пероральді енгізу қолданылады. Егер ибупрофен әлдеқашан сіңірілген болса, қышқыл ибупрофеннің несеппен шығарылуына ықпал ететін сілтілі заттарды енгізу қажет. Егер құрысулар жиі немесе ұзақ болса, диазепам немесе лоразепам вена ішіне енгізіледі. Демікпе кезінде бронходилататорларды тағайындау керек. Спецификалық антидот жоқ.

Симптомдары: әдетте артық дозалану симптомдары 4-6 сағат ішінде жүрек айну, құсу, іштің ауыруы, енжарлық және ұйқышылдық түрінде көрінеді. Орталық жүйке жүйесіне әсер ету бас ауыруы, құлақтың шуылдауы, бас айналу, құрысулар және естен тануды қамтиды. Сондай-ақ, көз алмасының бақыланбайтын ырғақты қозғалысы, қандағы бұзылулар, дене температурасының төмендеуі, бүйрек жұмысының бұзылуы, асқазан-ішектен қан кету, тыныс алудың бәсеңдеуі, жиі сұйық нәжіс болуы мүмкін.  Бағдардан жаңылу, қозу, естен тану, қан қысымының төмендеуі, жүректің жиырылу жиілігінің бұзылуы (жиі немесе сирек) туралы хабарланды. Айқын артық дозалану жағдайында бүйрек жеткіліксіздігі және бауырдың зақымдануы дамуы мүмкін.

Емі: шұғыл түрде дәрігерге бару керек, өйткені емдеу және бақылау қажет болуы мүмкін. Өмірге қауіпті дозаны қабылдағаннан кейін бір сағат ішінде белсендірілген көмірді ішке қабылдау немесе ересектерде асқазанды шаю қолданылады. Несептің жеткілікті бөлінуін қамтамасыз ету, бауыр мен бүйректің жұмысын мұқият бақылау ұсынылады. Уытты дозаларды қабылдағаннан кейін жағдайды бақылау кемінде төрт сағат жүргізілуі тиіс.

Дәрілік препаратты қолдану тәсілін түсіндіру үшін медицина қызметкеріне кеңес алуға жүгіну бойынша ұсынымдар

Дәрілік препаратты қолдану тәсілін түсіндіру үшін медицина қызметкерінен кеңес алу ұсынылады

ДП стандартты қолданған кезде байқалатын жағымсыз реакциялардың сипаттамасы және осы жағдайда қабылдауға тиісті шаралар

Өте жиі

- асқазан-ішек бұзылулары, мысалы, қыжыл, диспепсия, іштің ауыруы, жүрек айну, құсу, метеоризм, диарея, іш қату.

Жиі

- бас ауыруы, ұйқышылдық, бас айналуы, шаршау, қозу, жүрістің бұзылуы, ұйқысыздық, ашушаңдық

-асқазан-ішек жолдарының ойық жаралары, кейде қан кетумен және тесілумен, анемияға, меленаға, қан аралас құсуға, ойық жаралы стоматитке, колитке, ішектің қабыну ауруының өршуіне, жуан ішектің дивертикулалары асқынуына (тесілу, жыланкөз) әкелуі мүмкін жасырын қан жоғалту.

Жиі емес

- есекжем, қышыну, пурпура және экзантема сияқты аса жоғары сезімталдық реакциялары, сондай-ақ демікпе ұстамалары (кейде гипотониямен)

- көру қабілетінің бұзылуы, ринит, бронх түйілуі, жарыққа сезімталдық

- гастрит

- ісінудің дамуы, әсіресе артериялық гипертензиясы немесе бүйрек жеткіліксіздігі, нефротикалық синдромы, бүйрек жеткіліксіздігінен туындауы мүмкін интерстициальді нефриті бар пациенттерде.

Сирек

- қызыл жегі синдромы

- депрессия, сананың шатасуы, елестеулер

- уытты оптикалық нейропатия

- бүйректің папиллярлық некрозы (ұзақ қолданғанда)

- қандағы мочевина азотының, сарысулық трансаминазалардың, сілтілі фосфатазаның жоғарылауы, гемоглобин мен гематокрит көрсеткіштерінің төмендеуі, тромбоциттер агрегациясының бәсеңдеуі, қан кету уақытының ұзаруы, қан сарысуындағы кальцийдің төмендеуі, қан сарысуындағы несеп қышқылының жоғарылауы.

Өте сирек

- қан түзудің бұзылуы (анемия, лейкопения, тромбоцитопения, панцитопения, агранулоцитоз)

 - алғашқы симптомдар мыналар болуы мүмкін: қызба, тамақтың ауыруы, ауыздағы беткейлік ойық жаралар, тұмау симптомдары, қатты шаршау, мұрыннан және теріден қан кету

- беттің ісінуін, тілдің ісінуін, тыныс алу жолдарының тарылуымен көмейдің ішкі ісінуін, ентігуді, тахикардияны, артериялық қысымның өмірге қауіп төндіретін шокқа дейін төмендеуін қамтитын аса жоғары сезімталдықтың ауыр реакциялары

- асептикалық менингит

- құлақтың шуылдауы

- жүректің соғуы, жүрек жеткіліксіздігі, миокард инфарктісі, өкпенің жедел ісінуі, ісінулер, артериялық гипертензия

- эзофагит, панкреатит, ішек стриктуралары

- бауыр функциясының бұзылуы, бауырдың зақымдануы (әсіресе ұзақ қолданғанда), бауыр жеткіліксіздігі, жедел гепатит, сарғаю

- тері реакцияларының ауыр түрлері (мультиформалы эритема, эксфолиативті дерматит, Стивенс-Джонсон синдромын қоса буллездік реакциялар, уытты эпидермальді некролиз, алопеция, некроздайтын фасциит).

Белгісіз (қолда бар деректер негізінде бағалау мүмкін емес)

- мазасыздық, дімкәстік, көру жүйкесінің невриті, есту қабілетінің төмендеуі, парестезиялар

- эозинофилиямен және жүйелі симптомдармен дәрілік реакция, жедел жайылған экзантематозды пустулез.

Жағымсыз дәрілік реакциялар туындаған кезде медицина қызметкеріне, фармацевтика қызметкеріне немесе дәрілік препараттардың тиімсіздігі туралы хабарламаны қоса, дәрілік препараттарға жағымсыз реакциялар (әсерлер) бойынша ақпараттық деректер базасына тікелей жүгіну қажет

Қазақстан Республикасы Денсаулық сақтау министрлігі Медициналық және фармацевтикалық бақылау комитетінің «Дәрілік заттар мен медициналық бұйымдарды сараптау ұлттық орталығы» ШЖҚ РМК

http://www.ndda.kz

Қосымша мәліметтер

Дәрілік препараттың құрамы

Бір таблетканың құрамында

белсенді зат - ибупрофен 200 мг немесе 400 мг,

қосымша заттар: полиэтиленгликоль 600, калий гидроксиді, тазартылған су,

Қабықтың құрамы: желатин 160 блюм, сорбит сұйықтығы (ішінара сусызданған), Понсо 4 R (Е124) (200 мг доза үшін), тазартылған су.

Сыртқы түрінің, иісінің, дәмінің сипаттамасы

Құрамында мөлдірден ашық қызыл түске дейінгі сұйықтық бар, сопақша пішінді, қызыл түсті мөлдір жұмсақ желатинді капсулалар (200 мг доза үшін).

Құрамында мөлдір түссіз сұйықтық бар, сопақша пішінді, мөлдір, түссіз жұмсақ желатинді капсулалар (400 мг доза үшін).

Шығарылу түрі және қаптамасы

Алюминий фольгадан және ПВХ үлбірден жасалған пішінді ұяшықты қаптамада 10 капсуладан.

1 пішінді ұяшықты қаптамадан медициналық қолдану жөніндегі қазақ және орыс тілдеріндегі нұсқаулықпен бірге картон қорапшаға салынған.

2 жыл (200 мг доза үшін)

3 жыл (400 мг доза үшін)

Жарамдылық мерзімі өткеннен кейін қолдануға болмайды!

Түпнұсқалық қаптамада 25°С-ден аспайтын температурада сақтау керек.

Балалардың қолы жетпейтін жерде сақтау керек!

Рецепт арқылы

Өндіруші туралы мәліметтер

Olive Healthcare, 163/2, Mahatma Gandhi Udyog Nagar, Dabhel Village, Nani Daman, Daman, Union Territory – Daman & Diu – 396210, Үндістан.

Тел: 91-22-66888888

Факс: 91-22-2408 4323

E-mail: customer.care@olivehealthcare.co.in

Тіркеу куәлігінің ұстаушысы

NEO UNIVERSE LLP.,  Юнит 18, 53 Норман Роуд, Гринвич Центр Бизнес Парк, Лондон, Ұлыбритания, SE10 9QF

тел.: +44 203 598 2050

Email: info@neouniverse.co.uk

Қазақстан Республикасы аумағында тұтынушылардан дәрілік заттардың сапасына қатысты шағымдарды (ұсыныстарды) қабылдайтын және  дәрілік заттың тіркеуден кейінгі қауіпсіздігін қадағалауға жауапты ұйымның атауы, мекенжайы және байланыс деректері (телефон, факс, электронды пошта)

"Cepheus Medical "ЖШС (Цефей Медикал), 050000, Қазақстан Республикасы, Алматы қ., Панфилов к-сі, 98, "OLD SQUARE" БО

Тел: +7 (727) 300 69 71, +7 777 175 00 99 (тәулік бойы)

E-mail: drugsafety@evolet.co.uk