Эстрадиол

Эстрожель®

Эстрадиол

Трансдермальді гель 0,60 мг/г

1 г гельдің құрамында

белсенді зат - 0.60 мг эстрадиол гемигидраты (эстрадиолға шаққанда)

қосымша заттар: карбомер (карбопол 980 NF), троламин (триэтаноламин), этанол, тазартылған су.

Спирт иісі бар мөлдір түссіз гель.

Жыныс гормондары және жыныс жүйесінің модуляторлары. Эстрогендер. Табиғи және жартылай синтетикалық эстрогендер. Эстрадиол.

ATX коды G03CA03

Фармакологиялық әсері

Фармакокинетикасы

Сіңірілуі және таралуы.

Эстрожель эстрадиолдың спирт негізіндегі гелі болып табылады. гельді теріге жаққан кезде спирт жылда ұшып кетіп, эстрадиолдың қантамыр жүйесін енуіне мүмкіндік береді. Сонымен қатар, эстрадиолдың көп бөлігі жүйелі қан ағымына бірден түседі, ал оның біршама мөлшері теріасты шелінде кідіріп қалады және жүйелі қан ағымына біртіндеп босап шығады.

Препаратты трансдермальді қолданғанда эстрадиолдың жүйелі сіңірілуі пайдаланылған дозасының 10%-ына жуығын құрайды. Эстрадиолдың плазмадан жартылай шығарылу кезеңі (T ½) 1 сағатқа жуық. Метаболиттерінің плазмалық клиренсі күніне 650 - 900 л /м² аралығында ауытқып тұрады.

Эстрожель® гелін пайдаланғаннан кейінгі алғашқы сағаттарда эстрадиол деңгейлері дозасы мен жағылған аумағына тікелей пропорционал мәндерге жетеді.

Эстрадиолдың сарысудағы концентрациялары эксперимент түрінде 2,5 г немесе 5 г гельді 750 см² тері аумағына күнделікті қолданғаннан кейін 24 сағаттан соң анықталды және орташа алғанда, сәйкесінше 75 пг/мл және 98 пг/мл құрады. Пациенттер арасындағы жекелеген айырмашылықтар 2,5 г гель үшін 42 пг/мл-ден 122 пг/мл дейінгі аралықта және 5 г гель үшін 67 пг/мл-ден 160 пг/мл дейінгі аралықта болған. Орташа алғанда эстрадиол деңгейлері гельді күнделікті қолданғанда, соның ішінде, қатарынан алты цикл бойы пайдаланғанда 72 сағат бойы тұрақты және салыстырымды күйінде қалған.

Эстрадиолдың қандағы деңгейлері, тіпті, препаратты бірнеше ай қолданғаннан кейін де тұрақты күйі қалады (жекелеген айырмашылықтар 11%-ға жуықты құрайды).

Эстрадиолды енгізудің трансдермальді жолына бауыр арқылы алғашқы өтуі әсері кірмейді: айналымдағы эстрадиол E2 мен эстрон E1 деңгейлерінің физиологиялық арақатынасы 0,78 – 0,97 (бірлікке жуық) және менопаузаға дейін байқалған осындаймен салыстырымды болады.

Метаболизмі.

Эстрадиол негізінен бауырда, эстриолға, эстронға және олардың конъюгацияланған метаболиттеріне (глюкуронидтерге, сульфаттарға) дейін метаболизденеді. Бұл метаболиттері ішек-бауыр рециркуляциясына ұшырайды.

Емдеуді тоқтатқаннан кейін эстрадиолдың сарысудағы деңгейлері және конъюгацияланған эстрадиолдың несептегі концентрациялары шамамен 76 сағаттан соң бастапқы мәндеріне қайтып келеді.

Фармакодинамикасы

17β-эстрадиолдың тері арқылы жүйелі сіңірілуі табиғи менопаузаға ұшыраған және овариоэктомиядан кейінгі әйелдердегі эстрогендер тапшылығының орнын толтыра отырып, "қан тебулер", түнде тершеңдік, несеп-жыныс жолдарының атрофиялық өзгерістері (атрофиялық вульвовагинит, диспареуния, несепті ұстай алмау), психоэмоциональдық бұзылулар сияқты климактериялық бұзылыстардың айқындығын азайтады.

Препарат негізгі нысана-ағзаларға (аналық бездер, эндометрий, сүт бездері, гипотоламус, гипофиз, қынап эпителийі, несеп шығару өзегі, бауыр) етеккір оралымының фолликулалық фазасындағы эндогендік эстрогендердің әсеріне ұқсас эстрогендік әсер береді.

Эстрожель® препаратының менопауза симптомдарын емдеудегі клиникалық тиімділігі эстрогендерді ішке қабылдағандағы осындаймен салыстырымды.

Эстрадиол холестерин/ТЖЛП арақатынасының өзгеруінсіз, жалпы холестерин концентрациясының төмендеуіне ықпал етеді, прокоагулянттық әсер береді, қан ұюының бауырдағы К дәруменіне тәуелді факторларының (II, VII, IX, X) синтезін арттырады, антитромбин III концентрациясын төмендетеді.

Эстрадиол табиғи менопаузамен немесе овариэктомиямен байланысты сүйек массасы жоғатылуының алдын алады. Менопаузадан кейінгі кезеңдегі эстрогендер тапшылығы сүйек массасының минералдық тығыздығының (СММТ) төмендеуімен астасады. Эстрогендердің СММТ-ға әсері дозасына тәуелді болып табылады және шамасы, орын басатын гормональді ем (ОГЕ) жүргізіліп жатқан кезде жалғаса береді. ОГЕ тоқтатқаннан кейін СММТ оны жүргізуді бастағанға дейінгі кезеңдегі жылдамдықпен төмендей бастайды. Рандомизацияланған плацебо-бақыланатын "Әйелдердің денсаулығы үшін көтерілген бастама" (WHI) зерттеуінің мәліметтері және клиникалық зерттеулердің мета-талдауы, менопауза кезеңінен кейін дені сау әйелдерде тек эстрогендермен немесе гестагендермен біріктірілген эстрогендермен ОГЕ ортал жіліктің, омыртқа бағанының сынуларының және басқа остеопороздық сынулардың қаупін төмендететінін көрсетті. Сонымен қатар, ОГЕ СММТ төмен және/немесе остеопороз анықталған әйелдерде сүйектердің сынуларын болдырмауы мүмкін екендігі туралы шектеулі мәліметтер бар.

• эстрогендер тапшылығы симптомдары жағдайындағы орын басатын гормональді емде (ОГЕ); табиғи немесе хирургиялық менопаузамен байланысты климактериялық синдромды емдеуде;

• остеопороз профилактикасына арналған басқа препараттарды көтере алмаған немесе қарсы көрсетілімдері болған жағдайда, сынулар қаупі жоғары әйелдерде менопаузадан кейінгі остеопороздың профилактикасы үшін.

65 жастан асқан әйелдерді емдеу тәжірибесі шектеулі.

Эстрожель® үздіксіз немесе циклдық режимде сыртқа қолданылады. Препараттың дозасы жекелей таңдалады.

Менопауза симптомдарын емдеуге арналған ең төменгі тиімді дозасы айына 21-28 күн бойы күніне 1 рет 1,25 г гельді (0,75 мг эстрадиол) құрайды. Емдеуді бастау және жалғастыру үшін, ең төменгі тиімді дозасы қысқа уақыт мерзімі ішінде қолданылуы тиіс.

Құты түріндегі гельді пайдаланғанда помпа-дозаторын бір басқанда 1,25 г гель (0,75 мг эстрадиол) босап шығады.

Орташа тәуліктік дозасы күніне 2,5 г гельді құрайды, бұл помпа-дозаторды 2 басуға (1,5 мг эстрадиолға) сәйкес келеді.

Гельді қолдану: пайдаланар алдында құтының қалпақшасын алып тастау және екінші қолыңызды гель ағуы үшін тосып тұрып, помпа-дозаторын мықтап басу қажет. Алғаш басқан кезде босап шығатын дозасы дәл болмауы мүмкін, сондықтан, оны лақтырып тастау ұсынылады. Құты 64 рет басуға есептелген. 64 рет басқаннан кейін бір басқанда босап шығатын гель мөлшері керектісінен аз болуы мүмкін, сондықтан, помпа-дозаторын 64 рет басқаннан кейін, құтыны пайдалану ұсынылмайды.

Тек жатыры алынып тасталған әйелдерде ғана, Эстрожель® препаратын гестаген қоспай қолдануға болады.

Гиперплазия және эндометрий дисплазиясы қаупінің болуы мүмкіндігіне байланысты, жатыры сақталған (интактілі) әйелдерде гестагенмен бүркемелемей эстрогендермен емдеу ұсынылмайды.

- Перименопауза кезеңіндегі әйелдерді емдеу кем дегенде үш апта қатарынан, кейіннен бір апта бойғы үзіліспен, 12-14 күнге тағайындалатын (28 күндік цикл жағдайында) пероральді прогестеронмен біріктіріліп жүргізілуі тиіс. Емдеуді айдың 1-ші күнінен 25 күніне дейін пероральді прогестеронмен біріктіріп жүргізуге де болады. Бір апталық үзіліс кезінде гормондар деңгейінің төмендеуі түрткі болған қан кетулер туындауы мүмкін. Эстрогендермен бірге пайдалануға рұқсат етілген гестагендерді ғана қолдану ұсынылады.

- менопаузадан кейінгі әйелдерде гестагендермен біріктірілген эстрогендермен емдеу үздіксіз режимде жүргізіледі.

- эстрогендермен үздіксіз режимде ұзақ уақыт бойы жүргізілетін монотерапия гистерэктомиядан кейінгі әйелдерге тағайындалады. Анамнезінде эндометриоз болмаған жағдайда, жатыры алынып тасталған әйелдерге гестагенді қосу ұсынылмайды.

Клиникалық симптоматикасына байланысты, 2-3 емдеу циклынан кейін дозасын түзету жүргізіледі:

- сүт бездерінің кернеу сезімі, іш пен жамбас тұсының кебуі, үрейлену, күйгелектік, озбырлық сияқты гиперэстрогения симптомдары пайда болса, дозасын төмендету қажет.

- қан тебулердің сақталып қалуы, қынаптың шырышты қабығының құрғауы, бас ауыруы, ұйқы бұзылулары, астения, депрессияға бейімділік сияқты гипоэстрогения симптомдары жағдайларында, дозасы арттырылуы тиіс.

Егер пациент әйел гельді дер кезінде жағуды ұмытып кетсе, оны барынша тезірек, алайда соңғы пайдаланылған сәтінен 12 сағаттан кешіктірмей жасау керек. Егер 12 сағаттан артық уақыт өтсе, кезекті қабылдануын күту керек. Препарат жүйесіз қолданылғанда (дозаларының өткізіліп алуы) жағдайда, лақылдап қан кетулер және қан аралас жұғынды бөліністер туындауы мүмкін.

Гельді пациент әйел өзі, таңертең немесе кешке, дұрысы белгілі бір уақытта - іштің, бел, иық аумағының немесе білектің таза, құрғақ, зақымданбаған терісіне жұқа қабаттап жағады.

Гель жағылған орынды уқаламау керек. Гельдің сүт бездері аймағына, сондай-ақ, вульваның немесе қынаптың шырышты қабығына тиіп кетуіне жол бермеу керек.

Егер гель 2-3 минут ішінде толықтай сіңіп кетсе, жағыуы дұрыс және тиімді деп есептеледі.

Егер жабысқақ консистенциясы жаққаннан кейін 5 минуттан астам сақталса, демек, гель терінің тым аз беткейіне жағылғаны. Келесіде гельді терінің ауқымдырақ бөлігіне жағыңыз.

Гельді жаққаннан кейін қолды бірден жуып тастау керек.

Орын басатын гормональді ем жүргізу кезінде болуы мүмкін жағымсыз реакциялар, ұнамсыз реакциялар төменде анықталу жиілігінің азаю тәртібімен атап келтірілген: жиі (>1/100 - <1/10 дейін); жиі емес (>1/1000 - <1/100 дейін):

Жиі

• күйгелектік, депрессия

• бас ауыруы

• іш тұсының ауыруы, ішек түйілуі, іштің кебуі, жүрек айнуы, құсу

• бұлшықеттердің құрысулары, аяқ-қолдардың ауыруы

• дисменорея, меноррагиялар, қан кетулер (қан аралас жұғынды бөліністер), етеккір оралымының бұзылулары, лейкорея

Жиі емес

• бас сақинасы, бас айналуы, ұйқышылдық

• беткейлік немесе терең веналардың тромбозы, тромбофлебит

• бауырдың функционалдық сынамаларының нормадан ауытқуы, бауыр аденомалары, холелитиаз

• тері бөртпесі, қышыну, хлоазма

• артралгия

• сүт бездерінің қатерсіз ісіктері, эндометрий полиптері, жатыр миомасы өлшемдерінің ұлғаюы, эндометриоз, мастодиния, эстрогенге тәуелді ісіктердің өршуі

• шеткері ісінулер, натрий іркілуі, кебу сезімі, дене салмағының өзгерістері

- эстрадиолға немесе препараттың кез келген компонентіне жоғары сезімталдық;

- сүт безінің обыры (диагнозы қойылған, күдік туғызған немесе анамнездегі);

- эстрогенге тәуелді қатерлі ісіктер (диагнозы қойылған, күдік туғызған немесе анамнездегі), мысалы, эндометрий обыры;

- жыныс жолдарынан этиологиясы түсініксіз қан кетулер;

- эндометрийдің емделмеген гиперплазиясы;

- қазіргі уақыттағы немесе анамнездегі венаның идиопатиялық тромбоэмболиясы (мысалы, терең веналар тромбозы, өкпе эмболиясы)

- қанның ұю жүйесінің диагнозы анықталған бұзылулары (мысалы, протеин С, протеин S немесе антитромбин тапшылығы)

- жедел немесе жуырда бастан өткерген артериялық тромбоэмболиялық аурулар (мысалы, стенокардия, миокард инфарктісі)

- бауырдың жедел аурулары немесе анамнездегі бауыр аурулары, егер бауырдың функционалдық сынамаларының нәтижелері қалпына оралмаса;

- порфирия

- жүктілік және лактация кезеңі.

Дәрілермен өзара әрекеттесулері

Эстрожель® препараты стандартты дозаларында бауыр ферменттерінің шамадан тыс стимуляциясын туғызбайды: липидтер теңгеріміне, ұю факторларына (фибриноген, антитромбин III белсенділігіне), рениннің және жыныстық стероидтарды байланыстыратын глобулиннің айналымдағы деңгейлеріне жағымсыз әсерін тигізбейді, соған байланысты, гипертриглицеридемиялық, диабетогендік немесе гипертензиялық әсер бермейді.

Эстрогендердің метаболизмі бауырдың микросомалық ферменттерінің, атап айтқанда, Р450 цитохромы ферменттерінің индукторларымен бір мезгілде қолданғанда жоғарылауы мүмкін, оларға құрысуға қарсы дәрілер (фенобарбитал, фенитоин, карбамазепин, мепробамат, фенилбутазон) және микробқа қарсы кейбір дәрілер (рифампицин, рифабутин, невирапин, эфавиренз) жатады.

Күшті тежегіштер болып табылатын ритонавир мен нелфинавир де, стероидтық гормондармен бірге қолданылғанда, керісінше, индукциялайтын әсер танытады.

Құрамында шілтер жапырақты шайқурай (Hypericum perforatum) бар өсімдік текстес препараттар, эстрогендер мен прогестагендердің метаболизмін индукциялауы мүмкін.

Эстрогендерді енгізудің трансдермальді жолы бауыр арқылы алғаш өтуі әсерін болдырмауға мүмкіндік береді, соның арқасында, трансдермальді эстрогендер пероральді түріне қарағанда, бауырдың микросомалық ферменттері индукторларының әсеріне аз ұшырайды.

Клиникалық тәжірибеде эстрогендер метаболизмінің жоғарылауы әсерінің төмендеуіне және жатырдан қан кетулер сипатының өзгеруіне алып келуі мүмкін.

ОГЕ тек өмір сапасына теріс әсерін тигізетін постменопауза симптомдарын емдеу үшін ғана тағайындау керек. Барлық жағдайларда жылына бір реттен сиретпей, жүргізіліп жатқан емнің пайдасы мен қаупінің арақатынасына мұқият бағалау жүргізу және ОГЕ пайдасы қауіптерінен асып тұрған кезде жалғастыра беру қажет.

Мерзімінен бұрын басталған менопаузаны емдеу мақсатында ОГЕ жүргізумен байланысты қауіптерге қатысты мәліметтер шектеулі. Алайда, ОГЕ жастау әйелдердегі абсолюттік қаупі деңгейінің төмендігін ескерсек, аталған әйелдер үшін пайдасы мен қаупінің арақатынасы жасы үлкендеу әйелдердегіге қарағанда жағымдырақ болуы мүмкін.

Медициналық тексеру және қадағалау:

ОГЕ бастаудың немесе қайта тағайындаудың алдында пациент әйелдің толық жеке және отбасылық анамнезін жинақтау және ескеру, қарсы көрсетілімдерін анықтау және препаратты қолдану кезіндегі сақтық шараларын қадағалау мақсатында медициналық тексеру жүргізу (соның ішінде, кіші жамбас ағзалары мен сүт бездерін тексеру) қажет. Емдеу кезінде жүйелі түрде тексеру жүргізу ұсынылады; жиілігі және оған кірістірілетін әдістер әрбір пациент әйел үшін жекелей анықталады.

Әйелдерге олардың, сүт бездеріндегі қандай өзгерістер туралы өзінің дәрігеріне немесе медбикеге хабарлауы тиіс екендігін айту керек.

Маммографияны қоса, зерттеулер қазіргі кезде қолданылып отырған скрининг әдістеріне сәйкес жүргізілуі және әрбір пациент әйелдің жекелеген клиникалық қажеттіліктеріне бейімделуі тиіс.

Қадағалауды қажет ететін жағдайлар

Қазіргі кезде, бұрын төмендегі жағдайлардың кез келгені болған және/немесе жүктілік немесе осының алдындағы гормональді ем кезінде осындайлар өршіген жағдайда, пациент әйел дәрігердің мұқият қадағалауында болуы тиіс. Эстрожель препаратымен емдеу кезінде келесі жағдайларда аталған жағдайлардың қайталануы немесе өршуі ықтималдығын ескеру қажет: жатыр лейомиомасы, эндометриоз, эстрогенге тәуелді ісіктердің қауіп факторларының болуы (алғашқы желілі туыстарындағы сүт безінің обыры), гипертония, бауыр ауруы (соның ішінде, бауыр аденомасы), диабеттік ангиопатиямен немесе онсыз жүретін қант диабеті, өт қалтасының аурулары (соның ішінде холелитиаз), бас сақинасы немесе қатты бас ауыруы, жүйелі қызыл жегі, анамнездегі эндометрий гиперплазиясы, эпилепсия, бронх демікпесі, отосклероз.

Гестагендермен бір мезгілде қолданғанда соңғыларының ықтимал қарсы көрсетілімдерін ескеру керек: андрогендік әсері бар прогестагендер үшін жүктілік, сүт безінің, аналық бездердің немесе эндометрийдің обыры.

Гипертония және/немесе шылым шегу жағдайында жоғарылай түсетін жүрек-қантамыр ауруларының, коронарлық артериялардың ауруларының және/немесе цереброваскулярлық аурулардың қаупі болған жағдайда, сақтықпен қолдану керек.

Сүт бездерінің пальпациясы кезінде өзгерістердің анықталуы, ем жүргізіліп жатқаннан кезде кез келген сәтте қосымша гинекологиялық тексеру жүргізуді талап етеді. Сондай-ақ, жатырдан ретсіз қан кетулер (ОГЕ циклдық режимі кезіндегі тоқтату қан кетулерінен өзге), бас ауыруы және көру бұзылыстары, аяқтардың ауырсынып ісінуі немесе абдоминальді ауыру жағдайында, пациент әйел дәрігерге қаралуы тиіс.

Емдеуді дереу тоқтату үшін негіздер

Қарсы көрсетілімдері анықталған жағдайда және келесі жай-күйлерде емдеуді тоқтату керек:

- сарғаю немесе бауыр функциясының нашарлауы;

- қан қысымының едәуір жоғарылауы;

- бас сақинасы типтес бас ауыруының жаңа ұстамалары;

- жүктілік.

Гиперплазия және эндометрий обыры

Жатыры интактілі әйелдерде эстрогендерді ұзақ уақыт бойы қолданғанда гиперплазия мен эндометрий обырының қаупі жоғарылай түседі. Қолда бар мәліметтер бойынша, тек эстрогендерді қабылдап жүрген әйелдерде эндометрий обырының даму қаупі эстрогендерді қабылдап жүрмеген әйелдермен салыстырғанда, емдеудің ұзақтығына және эстрогендердің дозасына байланысты 2- 12 есе жоғарылайды. Емдеуді тоқтатқаннан кейін қауіп жоғарылығы кемінде 10 жыл бойы сақталуы мүмкін. Жатыры алынып тасталмаған әйелдерде айдың соңғы 12 күнінде (28 күндік цикл кезінде) гестагенді қосу немесе үздіксіз біріктірілген эстроген-гестаген емі тек эстрогендермен ОГЕ-мен астасқан гиперплазия мен эндометрий обырының даму қаупін төмендетеді.

Емдеудің алғашқы айлары бойына лақылдап қан кетулер мен қан аралас жұғынды бөліністер байқалуы мүмкін. Егер лақылдап қан кетулер немесе қан аралас жұғынды бөліністер біраз уақыт емдеуден кейін пайда болса немесе емдеуді тоқтатқаннан кейін жалғаса берсе, олардың туындау себептерін анықтау мақсатында, эндометрийдің қатерлі түзілімінің бар-жоқтығын анықтауға арналған эндометрий биопсиясын қоса, зерттеу жүргізу қажет.

Тек эстрогендер қолданылатын ОГЕ эндометриоздың қалдықтық ошақтарының обыралды немесе қатерлі трансформациясына алып келуі мүмкін.

Осыған орай, эндометриозға байланысты гистерэктомияны бастан өткерген әйелдерде, әсіресе, оларда эндометриоздың резидуальді ошақтары болған жағдайда, эстрогенмен орын басатын емге гестагенді қосуды қарастыру керек.

Сүт безінің обыры

Қолда бар мәліметтер біріктірілген эстроген-гестаген препараттарын қабылдап жүрген, және құрамында тек эстроген бар ОГЕ арналған препараттарды да қабылдап жүруі мүмкін әйелдерде сүт безі обырының даму қаупінің жоғарылағанын көрсетеді. Бұл қауіп ОГЕ ұзақтығына тәуелді.

Біріктірілген эстроген – гестаген ОГЕ.

Плацебо – бақыланатын рандомизацияланған «Әйелдердің денсаулығы үшін көтерілген бастама» (WHI) зерттеуінің және эпидемиологиялық зерттеулердің нәтижелері ОГЕ арналған біріктірілген эстроген –гестаген препараттарын қабылдаған әйелдерде сүт безі обырының даму қаупінің жоғарылағанын көрсетіп отыр, ол емдеуден кейін шамамен 3 жылдан соң туындайды.

Эстрогендермен монотерапия

WHI зерттеуінде гистерэктомияны бастан өткерген және тек эстрогенмен ОГЕ қабылдаған әйелдерде сүт безі обырының даму қаупінің жоғарылағаны анықталған жоқ. Бақылау зерттеулерінде көбінесе, сүт безі обыры диагнозы анықталуының аздаған қаупі туралы хабарланған, ол біріктірілген эстроген- гестаген емін қабылдап жүрген әйелдердегіге қарағандай айтарлықтай төмен.

Қосымша қауіп бірнеше жыл емдеуден кейін туындайды және бастапқы деңгейіне қайтып келіп, әдетте, емдеуді тоқтатқаннан кейін 5 жыл ішінде бастапқы деңгейіне дейін қалыпқа түседі.

ОГЕ, атап айтқанда, біріктірілген эстроген-гестаген емі маммографиялық кескіндер тығыздығының жоғарылауына алып келеді, бұл сүт безінің обырына радиологиялық диагностика жүргізуге кедергі келтіруі мүмкін.

Аналық бездердің обыры

Аналық бездердің обыры сүт безінің обырына қарағанда, едәуір сирек кездеседі. Ірі мета-талдауды жүргізген кездегі эпидемиологиялық мәліметтер, тек эстрогенмен ОГЕ қабылдап жүрген әйелдерде қауіптің болар-болмас жоғарылағанын көрсетіп отыр немесе, біріктірілген эстроген-гестаген емі жағдайында да, 5 жыл пайдаланудың ішінде қауіп айқындала бастайды және емдеуді тоқтатқаннан кейін уақыт өте келе азая түседі.

WHI зерттеуін қоса, басқа зерттеулер, біріктірілген ОГЕ осыған ұқсас немесе аз қауіп төндіруі мүмкін екендігін көрсетеді.

Вена тромбоэмболиясы (ВТЭ)

ОГЕ вена тромбоэмболиясының, атап айтқанда, терең веналар тромбозы мен өкпе тромбоэмболиясы қаупінің 1,3-3 есе жоғарылауымен астасады. ВТЭ дамуы ықтималдығы ОГЕ кейінгі жылдарына қарағанда, алғашқы жылында анағұрлым жоғары.

Белгілі тромбофилиялық бұзылулары бар пациенттер ВТЭ дамуы қаупінің жоғарылауына ұшырайды, және ОГЕ бұл қауіпті ушықтыруы мүмкін. Осыған байланысты, аталған пациенттер үшін ОГЕ қолдануға болмайды.

ВТЭ дамуының жалпыға ортақ қауіп факторларына жеке немесе отбасылық анамнез, эстрогендерді қолдану, жас егделігі, ауқымды операциялық араласымдар, ұзаққа созылатын иммобилизация, семіздік (ДСИ> 30 кг/м2), жүктілік/ босанғаннан кейінгі кезең, жүйелі қызыл жегі (ЖҚЖ), қатерлі жаңа түзілімдер кіреді. Веналардың варикоздық ауруының ВТЭ қаупіне ықпал етуі мүмкіндігіне қатысты біржақты пікір жоқ.

Барлық пациенттер үшін операциядан кейінгі кезеңде ВТЭ болдырмау мақсатында профилактикалық шараларды қарастыру қажет. Егер жоспарлы хирургиялық араласымнан кейін ұзаққа созылатын иммобилизация орын алуы мүмкін болса, операциялық араласымға дейін 4- 6 апта бұрын ОГЕ уақытша тоқтата тұру ұсынылады. Емдеу пациенттің қозғалғыштығы толық қалпына келген сәтке дейін қайта басталмайды.

Анамнезінде ВТЭ болмаған, бірақ бірінші желілі туыстарында болған, жас кезінде тромбоздарды бастан өткерген әйелдер үшін, болуы мүмкін шектеулерге қатысты мұқият кеңес беруден кейін, скрининг жүргізу ұсынылуы мүмкін (скрининг кезінде тромбофилиялық бұзылыстардың кейбіреулері ғана анықталады).

Егер пациентте отбасы мүшелеріндегі тромбоздармен көрініс беретін тромбофилиялық бұзылыс, немесе ауыр ақау (мысалы, антитромбин, протеин S немесе протеин C тапшылығы, немесе осылардың бірігіп келуі) анықталса, ОГЕ жүргізуге болмайды.

Антикоагулянттарды ұзақ уақыт бойы қабылдап жүрген пациенттерге ОГЕ пайдасы мен қаупінің арақатынасын мұқият бағалау қажет.

Егер емдеудің басында ВТЭ дамыса, емдеуді тоқтату керек.

Пациенттерге тромбоэмболияның ықтимал симптомдары (аяқтың ауырсынып ісінуі, кеуденің кенеттен ауыруы, тыныстың тарылуы) пайда болған жағдайда, дереу дәрігермен хабарласу қажеттілігін айту қажет.

Жүректің ишемия ауруы (ЖИА)

Рандомизацияланған бақыланатын зерттеулер барысында мәліметтер алынған жоқ, біріктірілген эстроген-гестаген препараттарымен немесе тек эстрогендермен ОГЕ ЖИА бар немесе онсыз әйелдерде миокард инфарктісіне қатысты профилактикалық әсер береді.

Біріктірілген эстроген-гестаген емі

Біріктірілген эстроген-гестаген емін пайдаланғанда, ЖИА салыстырмалы қаупінің болар-болмас жоғарылағаны білінеді.

ЖИА дамуының абсолюттік қаупі елеулі дәрежеде жас шамасына тәуелді болғандықтан, жас шамасы менопауза басталуына жуықтаған әйелдердегі біріктірілген эстроген-гестаген емін қолдану түрткі болған ЖИА қосымша жағдайларының саны өте аз, алайда, жас ұлғая келе арта түседі.

Эстрогендермен монотерапия

Рандомизацияланған бақыланатын зерттеулерден гистерэктомияны бастан өткерген және құрамында тек эстрогендер бар ОГЕ қолданған әйелдерде ЖИА қаупінің жоғарылағаны туралы мәліметтер алынған жоқ.

Ишемиялық инсульт

Біріктірілген эстроген-гестаген препараттарымен және тек эстрогендермен ОГЕ ишемиялық инсульттің даму қаупінің 1,5 есе дерлік жоғарылауымен байланыстырылады. Салыстырмалы қаупі жас ұлғая келе және менопаузаның басталу уақытына байланысты өзгермейді. Алайда, инсульт дамуының бастапқы қаупі елеулі дәрежеде жас шамасына тәуелді болғандықтан, ОГЕ қабылдап жүрген әйелдерде инсульттің жалпы қаупі жас ұлғая келе арта түседі.

Басқа жағдайлар

- Эстрогендер организмде сұйықтықтың іркілуін туғызуы мүмкін, сондықтан, жүрек немесе бүйрек жеткіліксіздігі бар пациент әйелдер мұқият қадағалауда болуы тиіс.

- гипертриглицеридемиямен әйелдерге ОГЕ тағайындағанда мұқият қадағалау жүргізу қажет, өйткені, аталған топтағы пациент әйелдерде эстрогендерді қолдану аясында қан плазмасындағы триглицеридтер деңгейінің панкреатит дамуына алып келетін күрт жоғарылауының сирек жағдайлары сипатталған.

- эстрогендер тироксинбайланыстырғыш глобулиннің (ТБГ) деңгейін арттырады, бұл айналымдағы қалқанша без гормондарының жалпы концентрациясының жоғарылауына алып келеді. Бос Т4 және Т3 концентрациялары өзгермейді.

Қан сарысуында басқа ақуыздардың, мысалы, кортикостероид-байланыстыратын глобулиннің (КБГ), жыныс гормондарын байланыстыратын глобулиннің (ЖГБГ) концентрациялары жоғарылауы мүмкін, бұл сәйкесінше, айналымдағы кортикостероидтар мен жыныстық стероидты гормондар концентрациясының жоғарылауына алып келеді. Бос немесе биологиялық белсенді гормондардың концентрациялары өзгермейді. Қан плазмасындағы басқа ақуыздардың (ангиотензиноген (ренин субстраты), α-1-антитрипсин, церулоплазмин) деңгейі жоғарылауы мүмкін.

- ОГЕ когнитивтік функцияларды жақсартпайды. Біріктірілген ОГЕ немесе тек эстрогендермен емді 65 жастан кейін пайдалана бастаған әйелдерде деменция қаупінің жоғарылауы мүмкіндігіне бірқатар дәлелдер бар.

Жүктілік және лактация кезеңі

Эстрожел® жүктілік кезінде тағайындалмайды. Жүктілік басталып кетсе, егер ондай болжам болса, емдеуді дереу тоқтату керек. Түсік қаупі және лактацияның бәсеңдеуі эстрогендерді тағайындау үшін көрсетілім болып табылмайды.

Эпидемиологиялық зерттеулердің көпшілігінің нәтижелері эстрогендердің емдік дозаларының әсеріне байқаусызда ұшыраған әйелдерде тератогендік немесе фетоуыттылық әсерінің жоқтығын растайды.

Эстрожель® бала емізу кезеңінде тағайындалмайды.

Дәрілік заттың автокөлік және қауіптілігі зор механизмдерді басқару қабілетіне әсер ету ерекшеліктері

Эстрожель көлік құралын басқару және қауіптілігі зор механизмдермен жұмыс жасау қабілетіне әсер етпейді.

Симптомдары: сүт бездерінің ауыруы, қан кету, ашушаңдық.

Симптомдары, әдетте, жағылатын гельдің көлемін азайтқан кезде жоғалып кетеді.

Шығарылу түрі және қаптамасы

Полипропиленнен жасалған, помпа-дозаторы және полипропилен қақпағы бар құтыда 80 г препараттан. Құты медициналық қолдану жөніндегі мемлекеттік және орыс тілдеріндегі нұсқаулықпен бірге картон қорапшаға салынады.

25 ºС-ден аспайтын температурада сақтау керек.

Балалардың қолы жетпейтін жерде сақтау керек!

3 жыл

Жарамдылық мерзімі өткеннен кейін қолдануға болмайды.

Дәріханалардын босатылу шарттары

Рецепт арқылы.

Безен Мэньюфекчуринг Белджиум СА, Бельгия

Гроот Бийгаарденстраат 128, 1620, Дрогенбос, Бельгия

Тіркеу куәлігін ұстаушысының атауы және елі

Безен Хелскеа СА, Бельгия

Авеню Луис 287

1050 Брюссель, Бельгия

Қазақстан Республикасы аумағында тұтынушылардан дәрілік заттың сапасына қатысты шағымдарды (ұсыныстарды) қабылдайтын және дәрілік заттың тіркеуден кейінгі қауіпсіздігін қадағалауға жауапты ұйымның атауы, мекенжайы және байланыс деректері (телефон, факс, электронды пошта)

«Қазақстандағы Безен Хелскеа Чехия сро» компаниясының өкілдігі

Алматы қ., Самал-2, 77 А, 3/2 кеңсе +7 701 720 38 16

ashalmanova@besins-healthcare.com