• русский
• қазақша

• Скачать инструкцию медикамента

Дәрілік препаратты медициналық қолдану жөніндегі

НҰСҚАУЛЫҚ

ЭЛПИДА

Саудалық атауы: ЭЛПИДА

Халықаралық патенттелмеген атауы: элсульфавирин

Дәрілік түрі: капсулалар

Құрамы:

1 капсула құрамында

белсенді зат – 20.0 мг элсульфавирин (20.7 мг натрий элсульфавирині түрінде);

қосымша заттар: лактоза моногидраты, натрий кроскармеллозасы, повидон-К30, магний стеараты;

қатты желатин капсула: титанның қостотығы (Е171), қанқызыл бояғыш [Понсо 4R] (Е124), темірдің қызыл тотығы (Е172), желатин.

Сипаттамасы

Корпусы ақ түсті және қақпақшасы қызыл түсті, қатты желатин капсулалар № 1. Капсулалардың ішінде – ақ немесе ақ дерлік түсті ұнтақ.

Фармакотерапиялық тобы

Жүйелі қолдануға арналған инфекцияға қарсы препараттар. Жүйелі қолдануға арналған вирусқа қарсы дәрілер. Тікелей әсер ететін вирусқа қарсы препараттар.  Нуклеозид еместер – кері транскриптаза тежегіштері.

АТХ коды: J05AG

Фармакологиялық қасиеттері

Фармакокинетикасы

Сіңуі

Ішке қабылдаудан кейін Элпида препараты жүйелі қан ағымына жылдам сіңеді. Элпида препаратын 20 мг дозада бір рет қабылдағанда белсенді метаболитінің ең жоғарғы концентрациясы (Cmax), орта есеппен, 98 нг/мл құрайды және оған 3,5 сағат ішінде жетеді. Элпида препаратын тәулігіне 20 мг дозада бірнеше рет қабылдағанда белсенді метаболитінің қан плазмасындағы Cmax 164 нг/мл құрайды және оған 7-8 күн ішінде жетеді.

Ас ішудің сіңуіне әсері

Ас ішу Элпида препаратының сіңірілу дәрежесін төмендетеді, бұл белсенді метаболитінің Сmах 4-5 есе және «концентрация-уақыт» қисығы астындағы ауданы (AUC) көрсеткіші үшін ауытқу коэффициентінің 1,5-2 есе азаюына алып келеді. Сонымен қатар, ең жоғарғы концентрациясына (Тmах) жету уақытының 2 есе ұзаруы сіңуінің баяулағанын көрсетеді. Осыған байланысты, Элпида препаратын аш қарында, тамаққа дейін 15 минут бұрын қабылдау ұсынылады.

Таралуы

Белсенді метаболиті қанның пішінді элементтерінде жинақталады, онда оның мөлшері плазмадағысына қарағанда едәуір жоғары. Қанның пішінді элементтеріндегі белсенді метаболитінің Сmax мәні 1041 нг/мл құрайды және оған Элпида препаратын тәулігіне 20 мг дозада 6 күн қабылдаудан соң жетеді.

Метаболизмі

Элсульфавириннің бауыр микросомаларындағы метаболизмдік тұрақтылығы едәуір төмен ретінде бағаланған, S9 фракциясында элсульфавирин белсенді метаболитіне жылдам өзгерген.

Белсенді метаболитінің бауыр микросомаларындағы метаболизмдік тұрақтылығы айтарлықтай жоғары деп бағаланды, бұл оның метаболизмінің мардымсыз деңгейін көрсетеді. Гепатоциттерде оның негізгі метаболиттері кейіннен глюкуронданатын гидроксилдену өнімдері, сондай-ақ, қышқыл және аминосульфонамид болды.

Элпида препараты іс жүзінде адамның бауыр микросомаларындағы > 50 мкмоль концентрацияларында Р450 цитохромының изоформаларына (CYP1A2, CYP2C9, CYP2C19, CYP2D6, CYP2E1, CYP3A4) тежеу әсерін көрсетпейді.

Элпида препараты CYP2B6 және CYP3A4 изоферменттерінің мРНҚ экспрессия индукторы болып табылады, сондай-ақ, CYP3A4 белсенділігін күшті индукциялайды. Белсенді метаболитінің CYP3A4 ферменті мен мРНҚ экспрессиясын индукциялау дәрежесі эфавиренз бен рифампициннің индукциялау әсерінен айтарлықтай жоғары. Элпида препаратының белсенді метаболитінің 0,1 мкмоль концентрациясында CYP3A4-ке ең жоғарғы индукциялау әсері 10 мкмоль концентрациядағы эфавирензбен және рифампицинмен салыстырмалы болды.

Осыған байланысты, оны метаболизмі Р450 цитохромының CYP2B6 және CYP3A4 изоформаларының қатысуымен жүретін дәрілік заттармен бірге сақтықпен қолдану керек.

Шығарылуы

Элпида препараты көбінесе өтпен, метаболит глюкуронидтері түрінде шығарылады. Белсенді метаболитінің қан плазмасынан жартылай шығарылу кезеңі (T1/2) 7-9 күн құрайды.

Пациенттердің айрықша топтарындағы фармакокинетикасы

Бауыр функциясының бұзылуы

Бауыр функциясының бұзылуы бар пациенттерде Элпида препаратының фармакокинетикасы зерттелмеген.

Бүйрек функциясының бұзылуы

Шумақтық сүзіліс жылдамдығы (ШСЖ) 60 мл/минуттан аз пациенттерде Элпида препаратының фармакокинетикасы зерттелмеген.

Жыныстық және нәсілдік ерекшелік

Ерлер мен әйелдерде, сондай-ақ, түрлі нәсілге жататын пациенттерде фармакокинетикалық параметрлерінің ұқсастығы байқалды.

Егде жастағы пациенттер

65 жастан асқан пациенттерде Элпида препаратының фармакокинетикасы зерттелмеген.

Балалар

18 жасқа толмаған пациенттерде фармакокинетикасы зерттелмеген.

Фармакодинамикасы

Натрий элсульфавирині бауырда адамдағы 1 типті иммунтапшылығы вирусының (АИТВ-1) кері транскриптазасының нуклеозидтік емес тежегіші (КТНЕТ) болып табылатын белсенді метаболитінің түзілуімен жылдам метаболизденеді. Белсенді метаболит АИТВ-1 кері транскриптазасын тежейді және АИТВ-2 кері транскриптазасы мен адам жасушаларының ДНҚ-полимеразасын (α, β, γ және δ) тежемейді.

Вирусқа қарсы белсенділігі

Жабайы типті АИТВ-1 кері транскриптазасының (АИТВ-КТ) рекомбинантты ферменті (HXB2 штаммы) белсенділігінің 50% тежелуі байқалатын белсенді метаболит концентрациясы (ТК50) 1,2 нмоль құрайды. Басқа КТНЕТ-ке резистентті рекомбинантты АИТВ-КТ негізгі мутациялары (L100I, K103N, V106A, E138K, Y181C, G190A, M230L, L101I/K103N, K103N/Y181C, V179F/Y181C) Элпида препаратына сезімтал болды. АИТВ-1 жұқтырылған MT-4 жасушалары өсірінділерінде АИТВ-КТ генін кодтайтын бөлігіндегі мутациялары (V106A, G190A) бар төрт мутанттық вирус және қосарлы мутанттар (L100I/K103N және K103N/Y181C) үшін сәйкесті ТК50 мәндері жабайы типті АИТВ-1 (HXB2 штаммы) үшін алынғандарына ұқсас болды. V106A, G190A, L100I/K103N және K103N/Y181C мутанттары репликациясының тежелуі үшін HXB2-ден ығысу жиілігінің орташа көрсеткіші 1,0-ден аспаған.

Адам сарысуы ақуыздарының белсенді метаболиттің вирусқа қарсы белсенділігіне әсері құрамында 40% адам сарысуы бар МТ-4 жасушаларының өсінідісінде анықталды. Жабайы типті АИТВ-1 (HXB2 штаммы) репликациясы белсенді метаболит әсерінен бәсеңдеген, сонымен қатар, стандартты өсірінділік ортадағы ТК50 орташа мәні 1,3 нмоль құрады; құрамында 40% адам сарысуы бар ортада ТК50 орташа мәні 13,8 нмоль құрады, бұл оның 10,6 есе артуына сәйкес келеді.

Резистенттілігі

Жабайы типті АИТВ-1 (HXB2D штаммы) жұқтырылған МТ-4 жасушалар өсірінділерінде вирустың Элпида препаратына сезімталдығы төмен нұсқалары бөліп алынды. Анағұрлым жиі кездескені V106I/A + F227C қосарлы мутациясы болды, ол да вирустың тіршілікке қабілеттілігін күшті (94%) төмендетті. Аталған біріктірілім көбінесе бір немесе бірнеше A98G, V108I, E138K, M230L, P236L қосымша мутациялармен қатар жүрген. Басқа жиі кездесетін біріктірілімі, көбінесе бір немесе бірнеше L100I, E138K, Y181C қосымша мутацияларымен V106I + Y188L қосарлы мутациясы болды.

Элпида препаратында, басқа КТНЕТ-пен салыстырғанда, резистенттіліктің пайда болуына генетикалық кедергі жоғарырақ. Элпида препаратына елеулі резистенттілік болуы үшін, бір мутация емес, кемінде екі, көбіне үш немесе одан да көп мутациялардың біріктірілімі қажет.

Айқаспалы резистенттілік

Элпида препаратының вирусқа қарсы белсенділігі АИТВ инфекциясын жұқтырған және бұрын КТНЕТ негізіндегі антиретровирустық емдеу (АРЕ) курстарынан өткен пациенттердің плазма үлгілерінен алынған 50 рекомбинантты вирустан тұратын панельде анықталды. Зерттеліп отырған, 50 вирустан тұратын панельде қолданылатын КТНЕТ-ке резистенттілік туындауымен байланысты АИТВ-КТ генінің бірізділігін кодтайтын мутациялардың кездесу жиілігі АИТВ-КТ гені бойынша деректер базаларының ағымдағы нұсқаларында анықталған мәндермен ұқсас болды. Бұл панельде анағұрлым жиі кездескендер K103N (54%), Y181C (41%), G190A (41%), K101E (17%), A98G/S (37%), V108I (24%), L100I (9%), P225H (9%), V179I (15%), K103R (11%), K103S, G190S, V179D, V106A, V106I, Y188L (4-7%) және M230L (2%) мутациялары болды. 50 вирустың барлығында эфавиренздің тежеу әсеріне төзімділік жоғары болған. Элпида препараты эфавиренз әсеріне төзімді, ТК50 мәндері 10 нмольден төмен 50 вирустың 46-сының репликациясын тежеген. 40% адам сарысуы болғанда ақуыздармен байланысуының түзетулерін ескерсек, Элпида препараты тестіленген, ТК50 мәндері 100 нмольден төмен вирустардың 92% репликациясын тежеген. Керісінше, референстік қосылыстар эфавиренз бен этравирин тестіленген, ТК50 мәндері 10 нмольден төмен вирустардың сәйкесінше 0% мен 62%-ның репликациясын тежеген.

Элпида препаратының түрлі штаммдарға және АИТВ инфекциясының клиникалық, соның ішінде басқа КТНЕТ-ке төзімді изоляттарына вирусқа қарсы бселсенділік ауқымы кең.

Элпида препараты АИТВ-КТ in vitro, соның ішінде V106A, G190A, L100I/K103N және K103N/Y181C мутацияларымен ДНҚ-полимеразалық белсенділігін спецификалық тұрғыдан тежейді. Элпида препаратының басқа КТНЕТ-пен айқаспалы резистенттілігі байқалмаған.

Қолданылуы

Ересектердегі АИТВ-1 инфекциясын емдеу үшін біріктірілген антиретровирустық ем құрамында.

Қолдану тәсілі және дозалары

Элпида препараты ішке қабылданады. Препаратты аш қарында, тамаққа дейін 15  минут бұрын қабылдау ұсынылады. Капсуланы шайнамай, тұтастай, жеткілікті мөлшердегі сумен ішіп жұтады.

Элпида препаратымен емді АИТВ инфекциясын емдеу тәжірибесі бар дәрігер тағайындауы тиіс.

Элпида препараты басқа антиретровирустық препараттармен біріктіріп тағайындалуы тиіс.

Ересектер

Элпида препараты тәулігіне 1 рет 20 мг дозада басқа антиретровирустық препараттармен біріктіріп тағайындалады.

Препараттың кезекті дозасын өткізіп алған жағдайда

Егер пациент Элпида препаратын дағдылы уақытында қабылдамаса және белгіленген қабылдау уақытынан 6 сағаттан аз уақыт өтсе, өткізіп алған капсуланы барынша тезірек қабылдау керек. Келесі капсуланы белгіленген уақытта қабылдау керек.

Егер белгіленген қабылдау уақытынан 6 сағаттан артық уақыт өтіп кетсе, қабылдауды келесі күні белгіленген уақытта жалғастыру керек.

Дозаларын түзету

Элпида препаратының дозаларын немесе қатарлас емді түзету қарастырылмаған.

Бүйрек функциясының бұзылуы бар пациенттер

Элпида препаратын бүйрек функциясының орташа және ауыр дәрежелі бұзылуы бар (ШСЖ < 60 мл/мин) пациенттерге қолдануға болмайды.

Бауыр функциясының бұзылуы бар пациенттер

Элпида препаратын бауыр функциясының орташа немесе ауыр дәрежедегі бұзылуы бар пациенттерге қолдануға болмайды (Чайлд-Пью бойынша B және C класы).

Сақтықпен:

- ауыр анемиясы және панцитопениясы бар пациенттер

- метаболизмі Р450 цитохромының CYP2B6 және CYP3A4 изоферменттерінің қатысуымен жүретін препараттармен бір мезгілде қабылдау

- бауыр функциясының жеңіл дәрежелі бұзылуы (Чайлд-Пью бойынша А класы) бар пациенттер.

Жағымсыз әсері

Жағымсыз дәрілік реакциялардың ағзалар мен жүйелер бойынша жиілігі Дүниежүзілік денсаулық сақтау ұйымының (ДДҰ) жіктемесіне сәйкес және АИТВ инфекциясы бар, жүргізілген клиникалық зертттеулер шеңберінде Элпида препаратымен ем қабылдаған пациенттердің жалпы қауымының көлемін ескерумен келтірілген: өте жиі (≥ 1/10) –10-нан астам жағдай; жиі (≥ 1/100, < 1/10) – 2-ден 10 дейінгі жағдай, жиі емес (≥ 1/1000, < 1/100) – бірлі-жарым жағдай, сирек (≥ 1/10000, < 1/1000) – қарастырылмаған, өте сирек (< 1/10000) – қарастырылмаған.

Өте жиі

- бас ауыру

- гамма-глутамилтрансфераза (ГГТ) белсенділігінің жоғарылауы

Жиі

- қарапайым герпес

- лейкопения, нейтропения

- гениталий герпесі

- ауыз қуысының герпесі

- зеңдік инфекция

- ұйқы бұзылысы

- депрессия жағдайлары (жабыққан көңіл-күй)

- үрейлену

- апатия

- ашушаңдық

- бас айналу

- әдеттен тыс түстер көру

- ұйқышылдық

- жүрек айну

- диарея

- ауыздың құрғауы

- құсу

- бөртпе

- қышыну

- жеңіл дәрежелі протеинурия

- полиурия

- астения

- әлсіздік

- тәбеттің төмендеуі

- дене температурасының көтерілуі

- аланинаминотрансфераза (АЛТ) белсенділігінің жоғарылауы

- креатинфосфокиназа (КФК) белсенділігінің жоғарылауы

- қандағы глюкоза деңгейінің жоғарылауы

Жиі емес

- аутоиммундық тиреоидит

- озбырлық

- көңіл-күйдің өзгеруі

- зейін қоюдың бұзылуы

- маза бермейтін ойлар

- түнгі қорқыныштар

- зейін қоюдың төмендеуі

- жады бұзылуы

- ұйқысыздық

- ұйы сапасының төмендеуі

- дәм сезудің бұзылуы

- парестезия

- гиперакузия

- құлақтағы шуыл

- жөтел

- ентігу

- ауыз-жұтқыншақтың ауыруы

- ринорея

- иіс сезудің бұзылуы

- іштегі жайсыздық

- іш ауыруы

- кекіру

- глоссалгия

- колит

- шаштың түсуі

- фурункулез

- артралгия

- уролитиаз

- лейкоцитурия

- етеккір кідірісі

- полименорея

- сексуалдық дисфункция

- кеуденің ауыруы

- аспартатаминотрансфераза (ACT) белсенділігінің жоғарылауы

- артериялық қысымның көтерілуі

- салмақ төмендеуі

 

Егер нұсқаулықта көрсетілген жағымсыз әсерлердің кез келгені ушықса немесе Сіз нұсқаулықта көрсетілмеген кез келген басқа жағымсыз әсерді байқасаңыз, ол туралы дәрігерге хабарлаңыз.

 

Қолдануға болмайтын жағдайлар

- натрий элсульфавириніне немесе препараттың кез келген басқа компонентіне жоғары сезімталдық

- лактоза жақпаушылығы, лактаза тапшылығы және глюкоза-галактоза мальабсорбциясы синдромы (препарат құрамында лактоза бар)

- 18 жасқа дейінгі балаларға

- жүктілік және бала емізу кезеңі

- бүйрек функциясының орташа және ауыр дәрежедегі бұзылуы бар (ШСЖ < 60 мл/мин) пациенттер

- бауыр функциясының орташа және ауыр дәрежедегі бұзылуы (Чайлд-Пью бойынша B және C класы) бар пациенттер

Дәрілермен өзара әрекеттесулері

Антиретровирустық препараттар

Элпида 2 КТНТ – тенофовир мен эмтрицитабиннің бекітілген біріктірілімімен кешенді АРЕ құрамында қолданылды. Препараттардың осы біріктірілімінің пациенттерде жағымдылығы жақсы болды.

Дәрілер арасындағы өзара әрекеттесуін бағалау мақсатында Элпида препаратын АИТВ протеазасы тежегіштері - дарунавир және ритонавирмен, сондай-ақ, интеграза тежегіші - ралтегравирмен біріктіріп қолдану зерттелді. Тұтас алғанда, препараттарды бірге қабылдаудың жағымдылығы жақсы болды. Дәрілік препараттардың фармакокинетикалық параметрлері мен экспозиция өзгерістері елеусіз және аталған препараттардың стандартты дозалау режимін өзгертуді қажет етпейді. Элпида препаратымен емдеу аяқталғаннан кейін атазанавир тағайындау асқазан-ішек жолы тарапынан атазанавирге тән ауыр жағымсыз реакциялардың (жүрек айну, құсу) дамуына алып келді.

Басқа дәрілік препараттар

Элпида препараты CYP2B6 және CYP3A4 изоферменттерінің белсенділігін индукциялайды және аталған изоферменттердің субстраттары болып табылатын дәрілік препараттардың плазмадағы концентрациясын төмендетуі және, сәйкесінше, белсенділігін азайтуы мүмкін. Аталған препараттарды бірге қабылдау сақтықпен жүргізілуі тиіс.

Элпида препаратымен бірге қабылданғанда белсенділігі төмендеуі мүмкін CYP2B6 және CYP3A4 изоферменттерінің субстраттары

CYP2B6 және CYP3A4 субстраттары:

Иммуносупрессорлар (циклоспорин, такролимус, сиролимус).

Химиялық ем препараттары (доцетаксел, тамоксифен, паклитаксел, циклофосфамид, доксорубицин, эрлотиниб, этопозид, ифосфамид, тенипозид, винбластин, винкристин, виндезин, иматиниб, сорафениб, сунитиниб, вемурафениб, темсиролимус, анастрозол, генфатиниб).

Зеңге қарсы азол препараттары (кетоконазол, итраконазол).

Макролидтер (кларитромицин, эритромицин, телитромицин; азитромициннен басқа).

Трициклды антидепрессанттар (амитриптилин, кломипрамин, имипрамин, циклобензаприн).

Серотонинді кері қармаудың селективті тежегіштері (циталопрам, норфлуоксетин, сертралин).

Басқа антидепрессанттар (миртазапин, нефазодон, ребоксетин, венлафаксин, тразодон).

Антипсихотиктер (галоперидол, арипипразол, рисперидон, зипрасидон, пимозид).

Апиындық анальгетиктер (алфентанил, бупренорфин, кодеин, фентанил, гидрокодон, метадон, левацетилметадол, трамадол).

Бензодиазепиндер (алпрозолам, мидазолам, триазолам, диазепам).

Ұйықтататын дәрілер (зопиклон, залеплон, золпидем).

Статиндер (правастатин мен розувастатиннен басқа, аторвастатин, ловастатин, симвастатин, церивастатин).

Кальций өзекшелерінің блокаторлары (дилтиазем, фелодипин, нифедипин, верапамил, амлодипин, лерканидипин, нитрендипин, нисолдипин, бепридил).

Аритмияға қарсы дәрілер (амиодарон, дронедарон, хинидин).

Фосфодиэстераза-5 тежегіштері (силденафил, тадалафил).

Жыныс гормондарының агонистері мен антагонистері (финастерид, эстрадиол, прогестерон, этинилэстрадиол, тестостерон, торемифен, бикалутамид).

Н1-рецепторлар антагонистері (терфенадин, астемизол, хлорфенамин).

АИТВ протеазасы тежегіштері (индинавир, ритонавир, саквинавир, нелфинавир).

Кейбір глюкокортикостероидтар (будесонид, гидрокортизон, дексаметазон).

CYP2B6 басқа субстраттары

Бупропион, вальпрой қышқылшы, метоксетамин, пропофол, эфавиренз.

CYP3A4 басқа субстраттары

Апрепитант, буспирон, варфарин, дапсон, домперидон, донепезил, кофеин, клопидогрел, лидокаин, монтелукаст, натеглинид, невирапин, омепразол, ондансетрон, пропранолол, салметерол, цизаприд, эплеренон, қастауыш алкалоидтары (эрготамин, дигидроэрготамин, эргоновин, метилэргоновин).

 

Айрықша нұсқаулар

Пациенттерге заманауи антиретровирустық препараттардың АИТВ инфекциясын емдемейтінін және АИТВ инфекциясының басқа адамдарға қанмен немесе жыныстық қатынастармен берілуінің алдын алмайтынын ескерту қажет. Элпида препаратымен емделу кезінде пациенттер тиісті сақтық шараларын қадағалауды жалғастыруы тиіс.

Элпида препараты АИТВ инфекциясын емдеу үшін монотерапия ретінде (вирус төзімділігінің дамуына алып келуі мүмкін) немесе тиімсіз емге қосылған жалғыз препарат ретінде қолданылмайды. Емді АИТВ инфекциясын емдеуде жеткілікті тәжірибесі бар дәрігер жүргізуі тиіс.

Белсенді метаболиттің қанның пішінді элементтеріне троптылығын ескере отырып, ауыр анемиясы мен панцитопениясы бар пациенттерге Элпида препаратын сақтықпен тағайындау қажет.

Қатарлас АРЕ

Егер біріктірілген АРЕ құрамындағы қандай да бір антиретровирустық препаратты қабылдау жақпаушылығына күдік туындауына байланысты тоқтатылса, антиретровирустық препараттардың барлығын бір мезгілде тоқтату мүмкіндігін қарастыру қажет. Тоқтатылған барлық антиретровирустық препараттарды қабылдау жақпаушылық симптомдары жойылған соң бірден қайта басталуы тиіс. Емдеуге резистентті вирустың пайда болу ықтималдығының жоғарылауына байланысты, үзік-үзік монотерапия және антиретровирустық препараттарды бірінен соң бірін қайталап тағайындау ұсынылмайды.

Ас ішудің әсері

Ас ішу Элпида препаратының сіңу кинетикасына әсер етіп, оның сіңірілу дәрежесін айтарлықтай төмендетеді, сондықтан, Элпида препаратын аш қарында қабылдау ұсынылады.

Аллергиялық реакциялар

Жүргізілген клиникалық зерттеулерде Элпида препаратын қабылдағанда аллергиялық реакциялар тіркелмеген.

Иммунитеттің қалыпқа келу синдромы

АИТВ инфекциясын жұқтырған, біріктірілген APЕ басында ауыр иммунтапшылығы бар пациенттерде симптомсыз немесе қалдықтық оппортунистік инфекциялар қоздырғыштарының белсенуіне жауап ретінде қабыну реакциясы пайда болуы мүмкін, ол ауыр клиникалық жағдайларға немесе симптоматикасының күшеюіне әкеп соқтырады. Әдетте, осындай реакциялар кешенді APT басталуынан кейінгі алғашқы апталар немесе айлар ішінде туындайды. Әдеттегі мысалдары цитомегаловирустық ретинит, жайылған және/немесе ошақтық микобактериялық инфекция және Pneumocystis jiroveci (P. Carinii) туғызған пневмония болып табылады. Кез келген қабыну симптомдарының пайда болуы тексеруді, және қажет болған жағдайда емдеуді талап етеді. Аутоиммундық аурулар (Грейвс ауруы сияқты) иммунитеттің қалпына келуі аясында да байқалды, алайда, бастапқы көріністерінің уақыты ауытқып отырды және ауру емдеу басталғаннан кейін бірнеше айдан соң туындауы мүмкін болды.

Дене салмағы және метаболизмдік параметрлер

Жүргізіліп отырған APЕ аясында дене салмағының артуын және қандағы глюкоза мен липидтер концентрациясының жоғарылауын байқауға болады. Аталған өзгерістер ішінара аурудың өзімен және өмір салтымен байланысты болуы мүмкін. Кейбір жағдайларда жүргізілген емнің липидтер концентрациясының жоғарылауына әсері дәлелденген, бірақ емнің дене салмағының артуына әсер ететінін көрсететін нақты мәліметтер жоқ. Қандағы глюкоза мен липидтер концентрациясына мониторинг, АИТВ инфекциясын емдеу жөніндегі ұсынымдарды басшылыққа ала отырып жүргізу керек. Липидтер алмасу бұзылуларын клиникалық қажеттілігі болған жағдайда түзету қажет.

Липодистрофия және метаболизмдік бұзылулар

Біріктірілген АРЕ АИТВ инфекциясы бар пациенттерде денедегі тері асты шелмайының қайта таралуымен (липодистрофия) астасады. Бұл құбылыстың кейін білінетін зардаптары әзірге белгісіз және оның даму механизмі жеткілікті зерттелмеген. Висцеральді липоматоздың АИТВ протеазасы тежегіштерін қолданумен және липоатрофияның КТНТ қолданумен байланысты деген болжам жасалады. Липодистрофияның даму қаупінің артуына жас егделігі сияқты жекелеген факторлар да, ұзаққа созылған АРЕ және онымен байланысты метаболизмдік бұзылулар сияқты, препараттарды қабылдаумен байланысты факторлар да түрткі болуы мүмкін. Осыған байланысты, пациентке клиникалық тексеру жүргізу кезінде тері асты шелмайының таралуына көңіл бөліп, физикальді тексеру жүргізу, сондай-ақ, қан сарысуындағы липидтер концентрациясы мен қан плазмасында аш қарындағы глюкоза концентрациясын анықтау керек. Бұзылулар клиникалық көріністеріне сәйкес түзетілуі тиіс.

Остеонекроз

Аталған аурудың этиологиясы көп факторлы (глюкокортикостероидтар қолдануды, алкогольді шамадан тыс тұтынуды, ауыр иммуносупрессияны, дене салмағы жоғары индексін қоса) деп танылғанымен, остеонекроз жағдайлары көбінесе ұзаққа созылған АИТВ инфекциясы бар пациенттерде және/немесе ұзақ уақыт бойы біріктірілген АРЕ қабылдап жүрген пациенттерде байқалды. Буындардың ауыруы, буындар қимылының шектелуі немесе жүрген кезде қиындықтар туындаған жағдайда, пациенттер дереу дәрігерге жүгінуі тиіс. Элпида препаратының клиникалық зерттеулерінде аталған реакциялар тіркелмеген.

Бауыр аурулары бар пациенттер

Бауыр функциясының бұзылуы бар пациенттерде Элпида препаратының фармакокинетикасы зерттелмеген. Элпида препаратын бауыр функциясының орташа және ауыр дәрежедегі бұзылуы (Чайлд-Пью бойынша В және С класы) бар пациенттерге қолдануға болмайды. Элпида препаратының метаболизмі Р450 цитохромы жүйесі арқылы жүретіндіктен және препараттың клиникада бауырдың созылмалы аурулары бар пациенттерде қолдану тәжірибесінің шектеулі екеніне орай, Элпида препаратын бауырдың ауырлығы жеңіл дәрежедегі аурулары (Чайлд-Пью бойынша А класы) бар пациенттерге тағайындағанда сақтық таныту керек. Сонымен қатар, әсіресе, жүйке жүйесі тарапынан дозаға тәуелді жағымсыз реакцияларды дер кезінде анықтау үшін пациенттер қадағалауда болуы тиіс. Сондай-ақ, белгілі бір уақыт аралықтары сайын бауырдың жағдайын бағалау үшін зертханалық талдаулар жасау керек.

Шығу тегі кез келген бауыр циррозы бар пациенттерде Элпида препаратының қауіпсіздігі мен тиімділігі расталмаған. АИТВ-1 және В және/немесе С гепатиті вирустарымен ко-инфекциясы бар пациенттерде Элпида препаратына зерттеулер жүргізілмеген. Созылмалы В немесе С гепатиті бар, біріктірілген АРЕ қабылдап жүрген пациенттер бауыр тарапынан өлімге әкеп соқтыруы мүмкін ауыр жағымсыз реакциялар дамитын қауіп тобына жатады. Анамнезінде, созылмалы гепатитті қоса, бауыр функциясының бұзылуы болған пациенттерде біріктірілген АРЕ кезінде бауыр функциясы бұзылуларының даму жиілігі артады, сондықтан ондай пациенттер стандартты кестеге сәйкес қадағалауда болуы тиіс. Бауыр ауруының ағымы нашарлаған немесе сарысудағы аминотрансфераза белсенділігінің қалыптың жоғарғы шегінен 5 еседен артық тұрақты жоғарылауы бар пациенттерде, Элпида препаратымен емдеуді жалғастырудың пайдасы гепатоуыттылығының туындауына қатысты болуы мүмкін қауіппен салыстырылуы тиіс. Ондай пациенттерге қатысты АРЕ үзе тұру немесе тоқтатудың талапқа сай болу мәселесін қарастыру керек. Гепатоуыттылығы белгілі басқа дәрілік препараттарды бір мезгілде қолданғанда, сарысудағы аминотрансферазалар белсенділігіне бақылау жүргізу ұсынылады.

Бүйрек жеткіліксіздігі бар пациенттер

Элпида препаратын зерттеулерге ШСЖ < 60 мл/минут пациенттер қатыстырылмады. Бүйрек жеткіліксіздігі бар пациенттерде Элпида препаратының фармакокинетикасы зерттелмеген, алайда, бүйрек функциясының бұзылуы шығарылуына елеулі әсер етпеуі тиіс. Элпида препаратын бүйректің орташа және ауыр жеткіліксіздігі бар пациенттерде қолдану тәжірибесі болмаған, соған байланысты, препаратты ондай пациенттерде қолдану қарсы көрсетілімді.

Ко-инфекциясы бар пациенттер

АИТВ-1 ко-инфекциясы және В, С гепатиті вирустары және/немесе туберкулезі бар пациенттерде Элпида препаратына зерттеу жүргізілмеген.

Егде жастағы пациенттер

Егде жастағы пациенттерде Элпида препаратына зерттеу жүргізілмеген.

Балалар

18 жасқа дейінгі балаларда Элпида препаратына зерттеу жүргізілмеген.

Жүктілік және лактация кезеңі

Элпида препаратын жүктілік және бала емізу кезінде қолдануға болмайды.

Қазіргі уақытта Элпида препаратын жүкті әйелдерде қолдану жөнінде мәліметтер жоқ. Элпида препаратымен емделу кезінде жүкті болып қалудан сақтану керек. Басқа әдістермен бірге, бөгеттік контрацепцияның сенімді әдістерін пайдалану қажет. Элпида препаратының жартылай шығарылу кезеңі ұзақ болғандықтан, препаратпен емдеуді тоқтатқан соң 12 апта бойына контрацепцияның сенімді әдістерін пайдалану қажет. Элпида препаратымен емделуді бастар алдында бала тууға қабілетті әйелдер жүктілікті анықтау тестісінен өтуі тиіс. Элпида препаратын анасы үшін ықтимал пайдасы шарана үшін болуы мүмкін қауіптен асып түсетін және басқа баламалы емдеу әдістері жоқ болған жағдайларда болмаса, жүктілік кезінде тағайындамаған жөн. Егер әйел Элпида препаратын жүктіліктің бірінші триместрі кезінде қабылдаса немесе жүктілік препаратты қолдану кезінде басталса, оған шарана үшін ықтимал қаупі туралы ескертілуі тиіс.

Бала емізу кезеңі

Элпида препаратының емшек сүтімен бөліну-бөлінбеуі белгісіз. Лактация кезінде Элпида препаратын қабылдап жүрген әйелдерге бала емізу ұсынылмайды. АИТВ инфекциясының берілуін болдырмау үшін АИТВ инфекциясын жұқтырған аналарға кез келген жағдайда бала емізуге болмайды.

Дәрілік препараттың көлік құралын немесе қауіптілігі зор механизмдерді басқару қабілетіне әсер ету ерекшеліктері

Элпида препаратының көлік құралдарын, механизмдерді басқару қабілетіне әсерін бағалау үшін зерттеулер жүргізілмеген. Пациенттерге, егер оларда ұйқысыздық, бас айналу және ОЖЖ тарапынан басқа жағымсыз реакциялар пайда болса, көлік құралдарын, механизмдерді басқарудан бас тартуы керектігін ескерту қажет.

 

Артық дозалануы

Элпида препаратын тәулігіне 40 мг дозада қабылдау жүйке жүйесі мен психика тарапынан жағымсыз реакциялардың жиірек (ұсынылған дозасымен салыстырғанда) дамуына, сондай-ақ, тері тарапынан реакциялардың (бөртпе) пайда болуына алып келген.

Артық дозаланған жағдайда емдеу препараттың сіңуін азайту (асқазанды шаю, адсорбенттер қабылдау), өмірлік маңызды көрсеткіштерді және негізгі ағзалар мен жүйелердің жай-күйін бақылау шараларын қолданудан тұруы тиіс. Сіңірілмеген препараттың шығарылуын жеделдету үшін, белсендірілген көмір пайдалануға болады. Арнайы антидоты жоқ.

 

Шығарылу түрі және қаптамасы

30 капсуладан, ылғалсіңіргіші бар және бірінші ашылуы бақыланатын қақпақпен тығындалған полиэтилен құтыға салады.

1 құты медициналық қолдану жөніндегі мемлекеттік және орыс тілдеріндегі нұсқаулықпен бірге картоннан жасалған қорапшаға салынады.

 

Сақтау шарттары

25ºC-ден аспайтын температурада сақтау керек.

Балалардың қолы жетпейтін жерде сақтау керек.

Сақтау мерзімі

1 жыл.

Жарамдылық мерзімі өткеннен кейін қолдануға болмайды.

 

Дәріханалардан босатылу шарттары

Рецепт арқылы

Тіркеу куәлігінің ұстаушысы

«Вириом» ЖШҚ, Ресей

121205, Мәскеу қ., «Сколково» инновациялық орталығының аумағы, Нобель к-сі, 5 үй, 1 қабат, 1 бөлме

 

Өндіруші:

«Әртүрлі химиялық зерттеу институты» Акционерлік қоғамы, Ресей

Мәскеу обл., Химки қ.а., Химки қ., Рабочая к-сі, 2А үй, 1Б құр.

 

Қазақстан Республикасы аумағында тұтынушылардан дәрілік заттың сапасы жөніндегі шағымдарды (ұсыныстарды) қабылдайтын және тіркеуден кейін дәрілік заттың қауіпсіздігін бақылауға жауапты ұйымның атауы, мекенжайы және байланыс жасау деректері (телефон, факс, электронды пошта):

ЖК Жолдыбалина Д.М., Алматы қ., «Ақсай-2» ықшамауданы, 62 үй, 28 пәтер. +7(705)507-44-98,

a.m.dinara@mail.ru