Экстенциллин®

• русский
• қазақша

• Скачать инструкцию медикамента

Саудалық атауы

Экстенциллин

Халықаралық патенттелмеген атауы

Бензатин бензилпенициллині

Дәрілік түрі

Инъекция үшін суспензия дайындауға арналған 2,4 млн.ХБ ұнтақ

Құрамы

белсенді зат - бензатин бензилпенициллині (летицинсіз сусыз түрінде) 2.0175мг (1.836 немесе 2400000 ХБ),

қосымша заттар: натрий кроскармеллозасы, натрий цитраты (буфер, рН 7), повидон.

Сипаттамасы

Ақ түстен крем реңді түске дейінгі ұнтақ

Фармакотерапеиялық тобы

Бактерияларға қарсы бета-лактамды препараттар. Пенициллиназаға сезімтал пенициллиндер. Бензатин бензилпенициллині.

АТХ коды J01CE08

Фармакологиялық қасиеттері

Фармакокинетикасы

Таралуы

Б/і терең инъекциядан кейін бензатин бензилпенициллині баяу гидролизге ұшырап, бензилпенициллин босап шығады. Инъекциядан кейін 12 - 24 сағат өткен соң сарысуда ең жоғары концентрацияға жетеді. Плазмадан жартылай шығарылу кезеңінің ұзақтығы сарысуда пенициллиннің тұрақты деңгейін ұзақ уақыт бойы қамтамасыз етеді. Б/і 2 400 000 ХБ инъекциясынан кейін 14-ші күні сарысудағы концентрациясы 0,12 мкг/мл құрайды. 1 200 000 ХБ инъекциядан кейін 21-ші күні 89,0 – 97,4% науқаста сарысудағы концентрация 0,06 мкг/мл (1 ХБ = 0,6 мкг) құрайды.

Зат организмнің сұйықтықтарына кеңінен таралады, сонда да, тіндік таралуы төмен. Плазма ақуыздарымен байланысуы – 40 - 60%.

Метаболизмі

Биотрансформациясы төмен

Шығарылуы

Дәрілік зат организмнен негізінен бүйректер арқылы шығарылады.

Фармакодинамикасы

Бензатин бензилпенициллині, G пенициллин, бета-лактамдық топтың антибиотигі болып табылады. Инъекцияға арналған бензатин бензилпенициллині бір рет енгізілгеннен кейін-ақ қанда пенициллиннің тиімді деңгейін ұзақ уақыт бойы қамтамасыз етеді.

Бактерияларға қарсы белсенділігінің ауқымы

Кейбір биологиялық түрлерде жүре келе болған төзімділіктің басым болуы географиялық орналасу жағдайына және уақытқа байланысты өзгеруі мүмкін. Демек, орналасқан жерде төзімділіктің таралуы жөнінде, әсіресе ауыр жұқпаларды емдеген кезде, ақпараттың болуы пайдалы.

Қолданылуы

Емдік көрсетілімдер бензатин бензилпенициллинінің бактерияларға қарсы белсенділігіне және фармакокинетикалық қасиеттеріне негізделген. Осы дәрілік препаратпен жүргізілген клиникалық зерттеулер де, сондай-ақ оның бактерияларға қарсы дәрілердің қазіргі таңда бірқатар қолданылу жағдайы да есепке алынған.

Қолданылуы сезімтал микроорганизмдерден болған жұқпалармен шектеледі, атап айтқанда:

• ревматизм ұстамаларының қайталануының алдын алумен

• мерезді және фрамбезияны (тропикалық спирохетозды) емдеумен

Бактерияларға қарсы дәрілердің тиісті қолданылуы жөніндегі ресми нұсқауларға назар аударған жөн.

Қолдану тәсілі және дозалары

Дозасы

Ревматизм ұстамаларының қайталануының алдын алу

Әрбір 2 апта сайын бұлшықетішілік (б/і) 1 инъекция:

- ересектер үшін 2 400 000 ХБ,

- балалар үшін, жасына байланысты, 600 000 – 1 200 000 ХБ. 12 жасқа дейінгі немесе дене салмағы 30 кг-ға дейінгі балаларға – 600 000 ХБ, 12 жастан асқан және дене салмағы 30 кг-нан асатын балаларға – 1 200 000 ХБ.

Трепонематозды емдеу

Құрамында 2 400 000 ХБ бар 1 б/і инъекция, аптасына бір рет. Балаларда мерезді (соның ішінде іштен туа болған мерезде) емдеуде – бір реттік 50 000 ХБ/кг доза түрінде, бірақ ең жоғары доза 2 400 000 ХБ-дан аспайды.

Енгізу тәсілдері

Бұлшықет ішіне терең инъекция жасауға ғана арналған. Көктамыр ішіне енгізуге болмайды.

Қолдану, жұмыс жасау және жою жөнінде ерекше нұсқаулар

Ерітіндіні 1,2 немесе 2,4 млн. бірлік доза алу үшін, құтыға инъекцияға арналған 4 мл немесе 8 мл су қоса отырып, асептикалық жағдайда дайындаған жөн. Енгізер алдында әбден сілкілеп араластыру керек.

Суспензия түріндегі бензатин бензилпенициллині тоңазытқышта 24 сағаттан аспайтын мерзім ішінде сақтала алады.

Жағымсыз әсерлері

Жиілігі белгісіз:

• аллергиялық реакциялар: есекжем, эозинофилия, ангионевротикалық ісіну (Квинке ісінуі), тыныстың тарылуы және төтенше жағдайларда анафилактикалық шок

• шығу тегі аллергиялық және аллергиялық емес макулопапулёзді тері бөртпесі

• асқазан-ішектік бұзылулар, мысалы, жүректің айнуы, диарея

• кандидоз

• шығу тегі иммундық немесе аллергиялық, сирек байқалған басқа да симптомдар: қанда трансаминаза деңгейінің орташа және уақытша жоғарылауы; қайтымды анемия, лейкопения, тромбоцитопения; жедел интерстициальді нефрит

• жалған жарғақшалы колиттің бірнеше жағдайлары

• бета-лактамдық антибиотиктерді жоғары дозаларын, атап айтқанда бүйрек қызметінің жеткіліксіздігі бар науқастарға енгізу энцефалопатияны (сананың нашарлауы, патологиялық қимыл-қозғалыс, құрысу ұстамалары) тудыруы мүмкін.

Қолдануға болмайтын жағдайлар

• бета-лактамдық антибиотиктерге (пенициллиндерге және цефалоспориндерге) аллергия. Цефалоспориндермен айқаспалы аллергия болуы мүмкін екендігін ескерген жөн.

Дәрілермен өзара әрекеттесуі

Бактерияларға қарсы ем қабылдап жүрген науқастарда ішу арқылы қабылданатын антикоагулянттар жоғары белсенділік танытқан көптеген жағдайлар тіркелді. Жұқпаның немесе қабынудың ауырлығы, науқастың жасы және жалпы денсаулық жағдайы қауіп факторлары болып табылады. Мұндай жағдайларда, бір мезгілде тағайындағанда ХНҚ-ға (халықаралық нормаға келтірілген қатынас) мұқият мониторинг жүргізу керек.

Айрықша нұсқаулар

Сақтандыру

Аллергиялық реакциялар пайда болған жағдайда антибиотиктермен емдеуді тоқтатқан және тиісті ем жүргізген жөн (соның ішінде оксигенотерапия жүргізілетін, көктамыр ішіне кортикостероидтарды, адреналинді енгізілетін және қажет болғанда тыныс алу жолдарының өткізгіштігін қалпына келтірілетін шұғыл жәрдем).

Жоғары сезімталдықтың ерекше ауыр жағдайлары, ал кейде өліммен аяқталатын реакциялар (анафилаксия) тіркелді.

Демек, пенициллинді енгізуден бұрын науқастан сұрақ-жауап алынуы тиіс. Сыртартқысында осындай препараттарға тән аллергия бар болған жағдайда абсолютті түрде қолдануға болмайды.

Пенициллинге аллергия 5-10% жағдайларда цефалоспориндерге айқаспалы аллергиямен қатараласа жүреді. Бұл егер науқастарда цефалоспоринге аллергия бар екені белгілі болса, пенициллинді қолдануға болмайтынын көрсетеді.

Сыртартқысында бронх демікпесі, есекжем, пішен қызбасы сияқты белгілі аллергиялық бұзылулар бар науқастарға препаратты тағайындағанда аса сақтық керек.

Сақтық шаралары

Бүйрек қызметінің жеткіліксіздігінде дозаны креатинин клиренсіне байланысты түзету қажет.

Препаратта натрий бар. Натрийдің мөлшері дозада 1 ммольден аз, яғни «натрийсіз».

Жүктілік

Клиникаға дейінгі зерттеулер тератогендік әсерді дәлелдеген жоқ. Жануарларда тератогендік әсер жоқ болғандықтан, адамда кемістіктер пайда болады деп күтілмейді. Бүгінгі күні екі биологиялық түрге жүргізілген зерттеулерде адамда кемістіктің пайда болуына жауапты заттар жануарлар үшін тератогенді болып табылатыны дәлелденді.

Клиникалық іс-тәжірибеде жүктілік кезіндегі экспозицияның көп бөлігіне жүргізілген талдамада бензатин бензилпенициллині әсерінен ешқандай да ерекше кемістіктің немесе фетоуытты әсердің пайда болғаны байқалған жоқ. Осыған қарамастан, тек эпидемиологиялық зерттеулер қауіптің жоқтығын айғақтауға мүмкіндік береді.

Осылайша, жүктілік кезінде бензатин бензилпенициллині қажет болған жағдайда тағайындалуы мүмкін.

Лактация

Бензатин бензилпенициллинінің тек аздаған мөлшері ғана емшек сүтіне өтіп, нәрестенің организміне емдік дозадан едәуір аз мөлшерде түседі. Демек, осы антибиотиктермен емделу кезінде емшек емізілуі мүмкін.

Сонда да, емшек емізуді (немесе препарат қабылдауды) емшектегі нәрестеде диарея, кандидоз немесе тері бөртпесі пайда болған кез келген жағдайда тоқтату керек.

Дәрілік заттың көлікті немесе қауіпті механизмдерді басқару қабілетіне ықпал ету ерекшеліктері

Көлік жүргізу немесе құралдарды басқару қабілетінің нашарлағанына нұсқаулар жоқ.

Артық дозалануы

Симптомдары: Бета-лактамдық антибиотиктерді әсіресе бүйрек қызметінің жеткіліксіздігінде жоғары дозаларда қолдану энцефалопатияны (сананың нашарлауы, қимыл-қозғалыстың бұзылуы, құрысулар) туындатуы мүмкін.

Емдеу: симптоматикалық.

Шығарылу түрі және қаптамасы

Ұнтақтар, резеңке тығынмен тұмшаланып тығындалған, алюминий қалпақшамен қаусырылған, сыйымдылығы 15 мл, түссіз шыны (ІІІ тип) құтыға салынған.

50 құты медицинада қолданылуы жөнінде мемлекеттік және орыс тілдеріндегі нұсқаулықпен бірге картон пәшкеге салынған.

Сақтау шарттары

Жарықтан қорғалған жерде, 25°С-ден аспайтын температурада сақтау керек.

Балалардың қолы жетпейтін жерде сақтау керек!

Сақтау мерзімі

4 жыл

Қаптамасында көрсетілген жарамдылық мерзімі өткеннен кейін қолдануға болмайды!

Дайындалған суспензияны тоңазытқышта сақтау 24 сағаттан аспауы керек.

Босатылу шарттары

Рецепт арқылы

Өндіруші

Сандоз ГмбХ, Австрия

Орналасқан мекенжайы: SANDOZ GmBH, Biochemiestrasse 10, 6250 KUNDL, Tyrol, AUSTRIA

Тіркеу куәлігінің иесі

Санофи-авентис Франция, Франция

Тұтынушылардан өнім (тауар) сапасы жөнінде шағымдарды Қазақстан Республикасы аумағында қабылдайтын ұйымның мекенжайы

«Санофи-авентис Қазақстан» ЖШС

Қазақстан Республикасы, 050016, Алматы, Қонаев к-сі, 21Б

телефон: 8-727-244-50-96

факс: 8-727-258-25-96

e-mail: quality.info@sanofi.com