Эзопрал (40 мг)

• русский
• қазақша

• Скачать инструкцию медикамента

Саудалық атауы

Эзопpaл

Халықаралық патенттелмеген атауы

Эзомепразол

Дәрілік түрі

Ішекте еритін 20 мг және 40 мг капсулалар

Құрамы

Бір капсуланың құрамында

белсенді зат - 24,6 мг немесе 49,3 мг эзомепразол стронций тетрагидраты

(20 мг және 40мг эзомепразолға баламалы),

қосымша заттар: D-маннитол, микрокристалды целлюлоза, гидроксипропилцеллюлоза (L-типі),

қабығы: тальк, опадрай ақ ОY-С-7000А (гидроксипропилметилцеллюлоза, титанның қостотығы (Е 171), этилцеллюлоза, диэтилфталат),

энтеросолюбильді қабық: гипромеллоза фталаты (НР-55) 200731, диацетилденген моноглицеридтер, тальк, титанның қостотығы (Е 171) .

№4 капсуланың құрамы (20 мг доза үшін) – темірдің (III) қызыл тотығы (Е 172), титанның қостотығы (Е 171) және желатин.

№3 капсуланың құрамы (40 мг доза үшін) – бриллиантты көк FCF (Е 133), керемет қызыл АС (Е 129), күн батар түстес сары (Е 110), титанның қостотығы (Е 171) және желатин.

Сипаттамасы

20 мг капсулалар: қақпағында «НМР» және корпусында «ESM 20» таңбасы бар, ашық-қызғылт түсті № 4 қатты желатинді капсулалар, ішінде ақтан ашық-қоңыр түске дейінгі түйіршіктер бар.

40 мг капсулалар: қақпағында «НМР» және корпусында «ESM 40» таңбасы бар, қою-қызғылт түсті № 3 қатты желатинді капсулалар, ішінде ақтан ашық-қоңыр түске дейінгі түйіршіктер бар.

Фармакотерапиялық тобы

Қышқылдылық бұзылуына байланысты ауруларды емдеуге арналған препараттар. Ойық жараға қарсы препараттар және гастроэзофагальді рефлюксті (GORD) емдеуге арналған препараттар. Протонды сорғы тежегіштері. Эзомепразол.

АТХ коды А02ВС05

Фармакологиялық қасиеттері

Фармакокинетикасы

Қышқыл ортаға төзімсіз. In vivo тек эзомепразолдың аздаған бөлігі ғана R-изомерге айналады. Тез сіңеді. Т-Сmах - 1-2 сағат. Тәулігіне бір рет 20 мг дозаны қайталап қабылдағанда абсолюттік биожетімділігі – 89%. Таралу көлемі – 0,22 л/кг. Плазма ақуыздарымен байланысуы – 97%.

Р450 цитохромы жүйесінің қатысуымен толық метаболизденеді. Негізгі бөлігі арнайы полиморфты CYP2C19 изоферментінің қатысуымен метаболизденеді, мұндайда эзомепразолдың гидрокси- және деметилденген метаболиттері түзіледі. Қалған бөлігінің метаболизмі басқа арнайы CYP3A4 изоферментімен жүзеге асады: мұнда плазмадан табылған негізгі метаболит болып саналатын эзомепразолдың сульфотуындысы түзіледі. Барлық метаболиттер фармакологиялық тұрғыдан белсенді емес.

CYP2C19 изоферменті белсенді пациенттерде ("шапшаң" метаболизаторлар) жүйелік клиренс – бір рет қабылдағаннан кейін сағатына 17 литр және көп рет қабылдағаннан кейін сағатына 9 литр. Тәулігіне 1 рет дозалау режимінде жүйелік қабылдағанда Т1/2 1,3 сағатты құрайды. Көп рет қабылдау аясында AUC артады (жүйелік қабылдағанда AUC пен дозаға байланысты желілік еместігі, бұл бауыр арқылы «алғаш өту» кезінде метаболизмнің төмендеуінің салдары, сондай-ақ CYP2C19 изоферментінің эзомепразолмен және/немесе оның сульфоқұрамы бар метаболиті арқасында тежелуінен жүйелік клиренсінің төмендеуінің салдары болып табылады). Жиналып қалмайды.

Қабылданған дозаның 80%-на дейіні метаболиттер түрінде бүйректер арқылы (1%-дан азы өзгермеген күйінде), қалған мөлшері өтпен бірге шығарылады.

"Баяу" метаболизаторларда (1-2%) эзомепразолдың метаболизмі негізінен CYP3A4 қатысуымен жүзеге асады. 40 мг эзомепразолды тәулігіне 1 рет жүйелі түрде қабылдағанда орташа AUC мәні метаболизмі белсенді болатын пациенттердегі осы параметрдің мәнінен 100%-ға артып кетеді. Метаболизмі белсенді емес пациенттерде плазмадағы Сmах орташа мәні шамамен 60%-ға жоғарылаған.

Егде жастағы (71-80 жас) пациенттерде эзомепразолдың метаболизмі едәуір өзгеріске ұшырамайды.

Бауыр жеңіл және орташа жеткіліксіздігі бар пациенттерде эзомепразолдың метаболизмі бауыр функциясы қалыпты пациенттердегі осындайға ұқсас. Ауыр бауыр жеткіліксіздігінде метаболизм жылдамдығы төмендеген, ол AUC мәнінің 2 есе артуымен қатарласа жүреді.

Эзомепразолдың метаболизмі бүйрек жеткіліксіздігі бар пациенттерде өзгермейді.

Фармакодинамикасы

Ойық жараға қарсы дәрі - протонды сорғы тежегіші, омепразолдың оңға бұралатын изомері; париетальді жасушаларда протонды сорғыны арнайы тежеу жолымен асқазандағы тұз қышқылының секрециясын төмендетеді. Әлсіз негіз бола отырып және асқазанның шырышты қабығының париетальді жасушаларының секреторлы өзекшелеріндегі қышқыл ортада белсенді түрге өте отырып, белсенділенеді және протонды сорғыны – Н+/К+ АТФазаны басады. Тұз қышқылының негізгі және стимуляцияланған секрециясын басады.

20 мг немесе 40 мг ішу арқылы қабылдағаннан кейін әсері 1 сағаттан соң басталады. Препаратты бес күн бойы тәулігіне 1 рет 20 мг дозада күн сайын қабылдағанда пентагастринмен стимуляциядан кейін тұз қышқылының орташа ең жоғары концентрациясы 90%-ға төмендейді.

Эзомепразолды 40 мг дозада қабылдағанда рефлюкс-эзофагиттің жазылуы пациенттердің шамамен 78%-да 4 апта емдеуден кейін және 93%-да 8 аптадан кейін басталады.

Эзомепразолдың 20 мг дозасын тәулігіне 2 рет 1 апта бойы бактерияларға қарсы стандартты дәрілік заттармен біріктіріп емдеу пациенттердің шамамен 90%-да Helicobacter pylori эрадикациясының ойдағыдай болуына әкеледі.

Он екі елі ішектің асқынбаған ойық жарасы бар пациенттерде 1 апта эрадикациялық курстан кейін ойық жараны жазу және симптомдарды жою үшін секрецияға қарсы препараттармен монотерапия қажет болмайды.

Қолданылуы

- гастро-эзофагеальді рефлюкс ауруында (ГЭРА) (эрозивті рефлюкс-эзофагитті емдеу, рефлюкс-эзофагит жазылғаннан кейін оның қайталануына жол бермеу үшін ұзақ уақыт демеуші ем жүргізу, эзофагитсіз өтетін гастро-эзофагеальді рефлюкс ауруын симптоматикалық емдеуге)

- Helicobacter pylori эрадикациясы үшін антибиотиктердің тиісті емдеу режимімен біріктіріп (он екі елі ішектің Helicobacter pylori астасқан ойық жарасын емдеу және Helicobacter pylori астасқан ойық жарасы бар пациенттерде пептикалық ойық жараның қайталануының профилактикасында)

- ҚҚСП-мен үздіксіз емдеуді қажет ететін пациенттерге (ҚҚСП қабылдаумен байланысты асқазан ойық жарасының жазылуына, қауіпті топқа жататын пациенттерде ҚҚСП қолданумен байланысты асқазан мен он екі елі ішектің ойық жара ауруының профилактикасы)

- пептикалық ойық жарадан қан кетудің қайталануының көктамырішілік индукцияланған профилактика емінен кейін ұзақ уақыт емдеуге

- Золлингер-Эллисон синдромын емдеуге.

Қолдану тәсілі және дозалары

Капсуланы судың аздаған мөлшерімен ішіп, бүтіндей жұтқан жөн. Капсуланы шайнауға және бөлшектеуге болмайды. Жұтуға қиналатын пациенттер үшін капсуланы ашып, ішіндегі түйіршіктерін газдалмаған ½ стакан суға ерітуге болады. Басқа сұйықтықтарды пайдаланбаған жөн, өйткені қорғаныш қабығы еріп кетуі мүмкін. Түйіршіктері бар суды бірден ішу керек. Содан кейін стаканның жартысына суды қайта құйып алып, қалдығын араластырып ішкен жөн. Түйіршіктерді шайнамаған немесе бөлшектемеген жөн. Ішінде қалқып жүрген түйіршіктерді де шайнауға немесе ұнтақтауға болмайды.

Жұта алмайтын пациенттер капсуланы ашып, ішіндегісін газдалмаған суға салып, назогастральді зондты пайдалана отырып, дереу қабылдағандары жөн. Бұдан басқа, еккіш пен зондтың жарамдылығын мұқият тексеріп шығу маңызды.

Назогастральді зондты қолдану тәртібі:

1. Капсуланы ашып, ішіндегісін тиісті еккішке салыңыз. Осыдан кейін шамамен 50 мл су құйыңыз.

2. Еккіштің ішіндегісін дереу шамамен 15 секунд бойы қарқынмен араластырыңыз.

3. Еккіштің ұш жағын жоғары қарата ұстап, ұштығының бітеліп қалмағанына көз жеткізіңіз.

4. Еккішті осы күйінде ұстай отырып, еккішті зондқа жалғаңыз.

5. Еккішті сілкілеп араластырып, ұштығын төмен қарай айналдырып төңкеріңіз. Еріген препараттың 5-10 мл-ін зондқа дереу енгізіңіз. Енгізгеннен кейін еккішті бұрынғы қалпына келтіріп, шайқаңыз (ұштығының бітеліп қалуына жол бермеу үшін еккіштің ұштығын жоғары қарата ұстау керек).

6. Еккіштің ұштығын төмен қарата ұстап, тағы да 5-10 мл препаратты зондқа енгізіңіз. Еккіш босағанша осы емшараны қайталаңыз.

7. Егер еккіште қалдық қалса, еккішке 25 мл су құйыңыз да, 5 қадамды қайталаңыз.

Ересектерге

- гастро-эзофагеальді рефлюкс ауруы (ГЭРА)

эрозивті рефлюкс-эзофагитті емдеу: 4 апта бойы тәулігіне бір рет 40 мг.

Емдеудің алғашқы курсынан кейін эзофагит жазылмаған немесе симптомдары сақталған жағдайларда қосымша 4 апталық емдеу курсы белгіленеді.

Эзофагитті емдеген пациенттерге аурудың қайталануына жол бермеу үшін ұзақ уақыт демеуші ем жүргізу: тәулігіне бір рет 20 мг.

Гастро-эзофагеальді рефлюкс ауруын симптоматикалық емдеу: эзофагиті жоқ пациенттерге тәулігіне бір рет 20 мг. Егер 4 апта емдегеннен кейін симптомдар жоғалмаса, емделушіге қосымша тексеру жүргізген жөн. Симптомдар жоғалғаннан кейін, симптомдарды кейінгі бақылауға препаратты тәулігіне бір рет 20 мг дозада қабылдау арқылы қол жеткізіледі. Ересектерге, қажет болғанда, «қажет етуіне қарай емдеу» режимімен 20 мг доза препаратты тәулігіне бір рет қабылдауға болады. ҚҚСП ем қабылдап жүрген, асқазан мен он екі елі ішек ойық жарасының қаупі бар пациенттерде симптомдарды бақылауға «қажетіне қарай емдеу» режимін қолданбау керек.

Helicobacter pylori эрадикациясы үшін антибиотиктердің тиісті емдеу режимімен біріктіріп. Он екі елі ішектің Helicobacter pylori астасқан ойық жарасын емдеу және Helicobacter pylori астасқан ойық жарасы бар пациенттерде пептикалық ойық жараның қайталануының алдын алу: 20 мг Эзопрал 1 г амоксициллинмен және 500 мг кларитромицинмен біріктіру, барлық препараттар 7 күн бойы тәулігіне 2 рет қабылданады.

ҚҚСП-мен үздіксіз емдеуді қажет ететін пациенттер:

ҚҚСП қабылдаумен байланысты асқазан ойық жарасының жазылуы: әдеттегі доза тәулігіне бір рет 20 мг. Емдеу ұзақтығы 4 - 8 аптаны құрайды.

Қауіп төнген пациенттерде ҚҚСП қолданумен байланысты асқазан мен он екі елі ішектің ойық жара ауруының алдын алу: тәулігіне бір рет 20 мг.

Пептикалық ойық жарадан қан кетудің қайталануының көктамырішілік индуцирленген алдын алу емінен кейін ұзақ уақыт емдеуге: 4 апта бойы тәулігіне 1 рет 40 мг.

Золлингер-Эллисон синдромын емдеу:

Эзопралдың бастапқы белгіленген дозасы тәулігіне екі реттік 40 мг құрайды. Содан кейін дозаны әр адамға жекелей таңдаған жөн, емдеу ұзақтығы аурудың клиникалық көрінісі бойынша анықталады. Клиникалық деректердің негізінде көптеген пациенттердің жағдайын тәулігіне эзомепразолдың 80 мг-ден 160 мг-ге дейінгі дозасын қабылдау арқылы бақылауға болады. Күн сайын 80 мг-ден астам дозаларда, дозаны бөліп, тәулігіне 2 рет қабылдаған жөн.

18 жастағы немесе одан кіші жастағы балалар

Эзопрал 18 жасқа толмаған балаларға қолдануға болмайды.

Бүйрек функциясы бұзылған пациенттерде дозаны түзетудің қажеті жоқ. Ауыр бүйрек жеткіліксіздігі бар пациенттерге қолдану тәжірибесі шектеулі болғандықтан, мұндай пациенттерді емдеген кезде сақ болған жөн.

Жеңіл және орташа бауыр жеткіліксіздігі бар пациенттерде дозаны түзету қажет емес.

Ауыр бауыр жеткіліксіздігі бар пациенттерде ең жоғары тәуліктік доза 20 мг-ден аспауы тиіс.

Егде жастағы пациенттерде дозаны түзету қажет емес.

Жағымсыз әсерлері

Төменде берілген жағымсыз жанама реакциялар клиникалық зерттеулер және тіркеуден кейін бақылау барысындағы жағымсыз жанама реакциялар ретінде анықталған немесе шамамен алынған жағымсыз жанама реакциялар ретінде қарастырылған. Дозаның шамасына қандай да болсын байланыстылығы жоқ.

Жағымсыз жанама реакциялары жиілігі бойынша жіктелген. (Жиі > 1/100, <1/10; Жиі емес > 1/1000, <1/100; Сирек > 1/10000, <1/1000; Өте сирек - 1/10000)

Жиі

- бас ауыру

- панкреатит, іш тұсының ауыруы, іш қату, іш өту, флатуленция, жүректің айнуы, құсу

Жиі емес

- шеткергі ісінулер

- ұйқысыздық

- бас айалу, сезінудің нашарлауы, ұйқышылдық

-ксеростомия

- бауыр ферменттері белсенділігінің жоғарылауы

-дерматит, терінің қышынуы, бөртпе, есекжем

Сирек

- лейкопения, тромбоцитопения

- аллергиялық реакциялар: ангиоэдема, анафилактикалық шок

-гипонатриемия

-ажитация, сананың шатасуы, депрессия

-дәмнің өзгеруі, ауыз ішінің құрғауы

- лабиринттік бұзылулар, бас айналу (скотодиния)

-бронхтың тарылуы

-стоматит, асқазан-ішек жолының кандидозы

-сарғаюмен қатарласа жүретін гепатит

- шаштың түсуі, жарыққа сезімталдық

-артралгия, бұлшықеттің ауыруы

-астения, қатты терлеу

Өте сирек

-агранулоцитоз, панцитопения

-озбырлық, елестеулер

-ұйқышылдық

-стоматит

-бауыр жеткіліксіздігі, бауыр энцефалопатиясы

-полиморфты эритема, Стивенc-Джонсон синдромы, уытты эпидермальді некролиз, кейбіреуі өліммен аяқталды

- бұлшықеттердің әлсіздігі

-интерстициальді нефрит

-гинекомастия

-қызба

- құлақтың дауыл жарғағының қабынуы (мирингит)

- етеккір оралымының бұзылуы, етеккірлік ауырулар, вагинит

Бұдан басқа, Эзопрал қолданумен байланысты болған төмендегі жағымсыз құбылыстар жөнінде мәлімделді, немесе жиілігі 1%-дан аз осындай құбылыстар пайда болуы мүмкін:

- флатуленция, аллергиялық реакция, белдің ауыруы, пекталгия, төс артының ауыруы, беттің ісінуі, аяқтың ісінуі, жабырқау, ауыру, қимылсыздық

- қан кернеулер, жоғары артериялық қысым, тахикардия

- зоб

- тітіркенген ішек синдромы, іш қатудың өршуі, диспепсия, дисфагия, гастроинтестинальді дисплазия, іштің жоғарғы жағында құрсақтың ауыруы, кекіру, өңеш тарапынан бұзылулар, іш өту, гастроэнтерит, гастроинтестинальді қан кету, ықылық, мелена, ауыз қуысы және тіл тарапынан бұзылулар, тілдің ісінуі, ойық жаралы стоматит, құсу

- құлақтың ауыруы, құлақ ішінің шуылдауы

- анемия, гипохромды анемия, цервикальді лимфаденопатия, мұрыннан қан кету, лейкоцитоз

- билирубинемия, бауыр функциясының бұзылуы

- диабет, гиперурикемия, гипонатриемия, сілтілік фосфатаза деңгейінің жоғарылауы, полидипсия, В12 витаминінің жеткіліксіздігі, салмақ қосу, салмақ жоғалту

- артриттің өршуі, артропатия, гастроспазм, фибромиалгия синдромы, жарық, ревматизмдік полимиалгия, бұлшықеттің ауыруы

- тәбеттің жоғалуы, апатия, тәбеттің артуы, уақыттан және кеңістіктен адасу, депрессияның өршуі, іштен туа болған шамадан тыс миотония, мазасыздық, сезімталдықтың азаюы, эректильді дисфункция, ұйқысыздық, бас сақинасы, бас сақинасының өршуі, ұйқының бұзылуы, спазм, бас айналу, көру өрісінің кемістігі

- демікпенің өршуі, жөтел, тыныстың тарылуы, көмейдің ісінуі, фарингит, ринит, параназальді синусит

- қарапайым безеулер, артқы өтістің қышуы, қабынбалы гиперемия, эритемалы тері бөртпесі, макулопапулезді тері бөртпесі

- мирингит, паросмия, дәм сезімінің жоғалуы, дәмді сезінудің өзгеруі

- несептің бөлініп шығуының бұзылуы, альбуминурия, цистит, дизурия, микоз, гематурия, несепті ұстай алмау, кандидоз, жыныс мүшелерінің кандидозы, полиурия

- конъюнктивит, көрудің нашарлауы

- эндоскоптың жәрдемімен анықталған жағымсыз әсерлер: дуоденит, эзофагит, өңеш стенозы, өңеште ойық жараның пайда болуы, асқазан варикозы, асқазан ойық жарасы, гастрит, қан кету, қатерсіз ісік, Барретт өңеші, шырыш түсінің өзгеруі.

Қолдануға болмайтын жағдайлар

- препарат компоненттеріне немесе орнын алмастыратын бензимидазолдарға аса жоғары сезімталдық

- балалар және 18 жасқа дейінгі жасөспірімдер

- атазанавирмен бір мезгілде қабылдау (атазанавирдің плазмадағы концентрациясы төмендейді)

- лактация кезеңі

Сақтықпен

- жүктілік

Дәрілермен өзара әрекеттесуі

Эзомепразолдың басқа дәрілік заттардың фармакокинетикасына ықпал етуі.

Эзомепразолмен емдеу аясында асқазан сөлі қышқылдылығының төмендеуі ортаның қышқылдылығына байланысты сіңетін препараттардың сіңуінің өзгеруіне әкеп соғуы мүмкін. Басқа да қышқылды супрессивті дәрілер мен антацидтер тәрізді, кетоконазол мен итраконазолдың сіңуі эзомепразолмен бір мезгілде қабылдаған жағдайда азаюы мүмкін.

Эзомепразол оның метаболизміне қатысатын негізгі СYP2C19 ферментін тежейді. Тиісінше, эзомепразолды метаболизміне СYP2C19 қатысатын басқа да препараттарымен (мысалы, диазепам, циталопрам, имипрамин, кломипрамин, фенитоин және басқалар) бірге қолдану осы препараттардың плазмадағы концентрациясының жоғарылауына әкеп соғуы мүмкін және дозаны төмендету қажеттілігінің артуына әкеледі. Бұл құбылыс эзомепразолды «қажеттілігіне қарай» емдеу режимімен қолданғанда ерекше білінеді. 30 мг эзомепразолды және диазепамды бірге қабылдаған кезде фермент-субстратты кешен (СYP2C19-диазепам) клиренсі 45%-ға төмендейді.

Эпилепсиямен ауыратын науқастардың плазмасында фенитоиннің ең төмен концентрациясы оны 40 мг доза эзомепразолмен біріктіріп қолданғанда 13 %-ға артты. Осыған байланысты эзомепразолмен емдеудің бас кезінде және оны тоқтатқан кезде плазмадағы фенитоиннің концентрациясын бақылап отыру керек.

Варфаринді 40 мг доза эзомепразолмен бірге қабылдау варфаринді ұзақ уақыт қабылдап жүрген пациенттерде коагуляция уақытының өзгеруіне әкеп соқпайды. Алайда варфарин мен эмомепразолды бірге қолданғанда ХҚҚ (халықаралық қалыптағы қатынас) индексінің клиникалық тұрғыдан маңызды жоғарылауының бірнеше жағдайлары болғаны жөнінде мәлімделген. Осыған байланысты осы препараттарды бірге қолданудың басында және оның соңында пациентті бақылауға алу керек.

Эзомепразолды (тәулігіне 1 рет 20 мг) 300 мг атазанавирмен/100 мг ритонавирмен бір мезгілде қолдану атазанавир экспозициясының төмендеуіне әкеп соғады (AUC («концентрация-уақыт» қисығы астындағы аудан), Сmax және C min (плазмадағы ең жоғары және ең төмен концентрация) шамамен 75%-ға төмендейді). Атазанавир дозасын 400 мг-ға дейін арттыру атазанавир экспозициясына эзомепразолдың ықпал етуінің орнын толтыра алмайды. Эзопралды, басқа да протонды сорғы тежегіштері сияқты, атазанавирмен бірге қабылдамаған жөн.

Эзомепразолды СYP3А4 тежегіштерімен, кларитромицинмен (күніне екі рет 500 мг) бірге қолдану эзомепразолға қатысты AUC мәнінің екі есе артуына әкеп соғады. Эзомепразолдың дозасын түзетудің қажеті жоқ.

Цизапридті 40 мг доза эзомепразолмен бірге қабылдау цизапридтің фармакокинетикалық параметрлері мәндерінің: AUC – 32%-ға және Т ½ - 31%-ға артуына әкеледі, алайда цизапридтің плазмадағы концентрациясы мұнда едәуір өзгеріске ұшыраған жоқ. Цизапридпен монотерапия кезінде байқалған QT аралығының аздап ұзарғанына қарамастан, Эзопрал мен цизапридті бір мезгілде қолданғанда QT аралығының ұзаруы байқалған жоқ.

Эзопрал амоксициллиннің, хинидиннің фармакокинетикасын клиникалық тұрғыдан маңызды өзгеруін туындатқан жоқ.

Эзомепразол мен напроксенді немесе рофекоксибті бірге қолданғанда клиникалық тұрғыдан маңызды фармакокинетикалық өзара әрекеттесу байқалмады.

Эзомепразолды және біріктірілген СYP3А4 тежегішін бірге қолдану эзомепразол концентрациясының екі есе артуына әкелуі мүмкін.

Эзомепразолды және вориканозолдың біріктірілген СYP3А4 және СYP2С19 тежегіштерін бірге қолдану омепразолдың AUC мәнін 280%-ға арттырады.

Әдеттегідей, мұндай жағдайларда эзомепразолдың дозасын түзету қажет емес. Алайда эзомепразолдың дозасын түзетуді бауыр қызметінің бұзылуы ауыр пациенттерде және оны ұзақ уақыт қолданғанда жүргізген жөн.

Айрықша нұсқаулар

Эзопралды тағайындар алдында жаңа түзілімдердің бар-жоқтығын анықтап алған жөн, өйткені эзомепразолмен емдеу симптоматиканың басылуына және диагноз қоюды кейінге қалдыруға әкеп соғуы мүмкін.

Эзопралды ұзақ уақыт (әсіресе бір жыл немесе одан ұзақ) қабылдап жүрген пациенттер дәрігердің ұдайы бақылауында болуы тиіс. «Қажеттілігіне қарай» емдеу режиміндегі пациенттер симптомдардың сипаты өзгерген кезде дәрігерден кеңес алуы тиіс. Препаратты «қажеттілігіне қарай» режимімен тағайындаған кезде плазмада эзомепразол концентрациясының өзгеруіне назар аудара отырып, дәрілік өзара әрекеттесу ерекшеліктерін ескерген жөн.

Эзопралды Helicobacter pylori эрадикациялау үшін басқа дәрілік заттармен бір уақытта тағайындағанда дәрілік өзара әрекеттесудің ерекшеліктерін ескерген жөн. Эзомепразолды ұзақ уақыт қабылдаған пациенттерде энтерохромаффин тәрізді (ECL) жасушалар мөлшерінің артқаны байқалады, бұл, сірә, плазмадағы гастрин деңгейінің жоғарылауымен байланысты болуы мүмкін; антисекреторлы препараттарды ұзақ уақыт бойы қабылдап жүрген пациенттердің асқазанында қатерсіз безді кистаның түзілгені жиі білінеді. Бұл құбылыстар қышқыл секрециясының тежелуі нәтижесіндегі физиологиялық өзгерумен жүзеге асады және қайтымды сипатқа ие.

Асқазан сөлі қышқылдылығының кез келген жолмен, протонды сорғы тежегішін қоса алғанда, төмендеуі әдетте асқазан-ішек жолында болатын асқазан бактерияларының мөлшерін арттырады. Протонды сорғы тежегіштерімен емдеу асқазан-ішектік Salmonella және Campylobacter сияқты инфекциялар қаупінің аздап артуына әкелуі мүмкін.

Жүктілік кезінде қолданылуы

Эзопралдың жүктілікке әсері жөнінде қандай да бір клиникалық зерттеу деректері жоқ. Жануарларға жүргізілген зерттеу нәтижелері эмбрион/ұрықтың дамуына байланысты қандай да бір тікелей/жанама қауіпті әсерді көрсеткен жоқ. Эзопралды жүкті әйелдерге тағайындағанда өте сақ болу керек. Препаратты жүкті әйелдерге ана үшін күтілетін пайдасы ұрыққа келетін қауіптен басым болған жағдайда ғана тағайындаған жөн.

Емшек емізу кезеңінде қолданылуы

Эзопралдың емшек сүтімен бөлініп шығатын-шықпайтыны белгісіз. Лактация кезеңінде әйелдердің қатысуымен зерттеулер жүргізілген жоқ. Осыған байланысты, Эзопралды лактация кезеңінде қолдануға болмайды.

Дәрілік заттың көлікті немесе қауіпті механизмдерді басқару қабілетіне ықпал ету ерекшеліктері

Эзопралдың жағымсыз әсерлерін ескеріп, автомобиль басқарғанда және қауіпті механизмдермен жұмыс жасағанда сақ болған жөн.

Артық дозалануы

Симптомдары: жалпы әлсіздік, жағымсыз әсерлердің күшеюі, соның ішінде асқазан-ішек жолы тарапынан.

Емі: симптоматикалық және демеуші ем. Диализдің тиімділігі аз. Өзіне тән арнайы у қайтарғысы белгісіз.

Шығарылу түрі және қаптамасы

Ішекте еритін 20 мг және 40 мг капсулалар

Ылғал сіңіргіші бар және алғаш ашылуы бақыланатын қақпақпен жабылған, тығыздығы жоғары полиэтиленнен жасалған банкаларға 30 капсуладан салынған. Банканың бос кеңістігі полиэтиленнен жасалған бүктеулі үлбірлермен толтырылған.

Медициналық қолдану жөніндегі мемлекеттік және орыс тілдеріндегі нұсқаулық қоса салынады.

Сақтау шарттары

30 ºС-ден аспайтын температурада сақтау керек.

Балалардың қолы жетпейтін жерде сақтау керек!

Сақтау мерзімі

2 жыл

Қаптамасында көрсетілген жарамдылық мерзімі өткеннен кейін пайдалануға болмайды.

Дәріханадан босатылу шарттары

Рецепт арқылы

Өндіруші

Ханми Фарм Ко., Лтд, Оңтүстік Корея

Тіркеу куәлігінің иесі

Қазақстан Республикасы, «Химфарм» АҚ

Тұтынушылардан өнім (тауар) сапасы жөнінде шағымдарды Қазақстан Республикасы аумағында қабылдайтын ұйымның мекенжайы

«Химфарм» АҚ, Шымкент қ-сы, Қазақстан Республикасы,

Рашидов, к-сі 81

Телефон нөмірі 7252 (561342)

Факс нөмірі   7252 (561342)

Электронды поштасы infomed@santo.kz