Цитогем (200 мг)
Инструкция
-
русский
-
қазақша
Саудалық атауы
Цитогем
Халықаралық патенттелмеген атауы
Гемцитабин
Дәрілік түрі
Инфузия үшін ерітінді дайындауға арналған лиофилизацияланған 200 мг ұнтақ
Құрамы
1 құтының ішінде
белсенді зат – 227.705 мг гемцитабин гидрохлориді (гемцитабинге баламалы) 200.000 мг
қосымша заттар: маннитол, натрий ацетаты, натрий гидроксиді, инъекцияға арналған су.
Сипаттамасы
Шелпек түріндегі лиофилизацияланған ақ немесе ақ түсті дерлік ұнтақ, немесе кеуекті масса немесе еркін сусымалы ұнтақ.
Фармакотерапиялық тобы
Ісікке қарсы дәрі. Пиримидин аналогтары
ATЖ коды L01BC05
Фармакологиялық қасиеттері
Фармакокинетикасы
Гемцитабин фармакокинетикасы дозаға тәуелді.
Көктамыр ішіне енгізгеннен кейін гемцитабин организмнің барлық жеріне тез таралады, плазма ақуыздарымен байланысуы мардымсыз (10%-дан аз). Таралу көлемі инфузия жылдамдығына (қысқа уақыттық енгізген кезде – 50 л/м2, ұзақ уақыт енгізген кезде – 370 л/м2) және жынысына байланысты. Еркектерде таралу көлемі 15.6 л/м2 , әйелдерде 11.3 л/м2 құрайды.
Қысқа уақыттық инфузиядағы жартылай шығарылу кезеңі, науқастың жасына және жынысына байланысты, 32 минуттан 94 минутқа дейінді, ұзақ уақыттық инфузияда 245–638 минутты құрайды. Белсенді метаболиттің терминальді сатысының жартылай шығарылу кезеңі (шеткергі қанның мононуклеарлы жасушаларынан) - 1,7 – 19,4 сағат.
Бауыр, бүйрек, қан жасушаларында цитидиндеаминаза ферментімен урацилдің белсенді емес метаболиті (2’-дезокси-2’, 2’-дифторуридин) түзілгенше сатылап метаболизденеді.
Осы метаболит Сmax мәніне инфузиядан кейін 30 минуттан соң жетеді.
Бүйректер арқылы урацил метаболиті түрінде (92 – 98%), 1%-дан азы нәжістермен бірге шығарылады; өзгермеген күйінде бүйректер арқылы дозаның 1%-ы шығарылады.
Фармакодинамикасы
Фармакологиялық әсері – ісікке қарсы. Гемцитабиннің цитоуыттық әсері нуклеозидкиназаның қатысуымен жасуша ішінде биотрансформация нәтижесінде түзілетін оның белсенді метаболиттері – ди- және трифосфатты нуклеозидтердің біріктірілген әсерімен жүзеге асады.
Гемцитабин дифосфаты ДНҚ синтезі үшін қажетті дезоксинуклеозидтрифосфаттардың түзілу реакцияларын катализдейтін рибонуклеотидредуктазаны тежейді. Гемцитабин трифосфаты ДНҚ-ға қосылады, және оның әрі қарай синтезі тоқтайды, мұндайда ДНҚ репарациясының болуы мүмкін емес. Т-лимфобластты жасушаларда гемцитабин жасушалардың тіршілігін жоюды бағдарлайтын факторлардың бірі болып табылатын интернуклеосомальді ДНК-фрагментацияны индукциялайды.
Өзіне тән фазалық әсер ету ерекшелігі бар: S-фазада жасушалардың тіршілігін тоқтатады және G1/S-фазада жасушалардағы ісіктің үдеуін бөгейді.
Қолданылуы
- өкпенің уақ жасушалы емес обырында
- қуықтың обырында
- ұйқы безінің обырында
- сүт безінің обырында
- жатыр мойнының обырында
Гемцитабин монотерапия түрінде немесе ісікке қарсы басқа да дәрілермен біріктіріліп де өкпенің жергілікті таралған уақ жасушалы обырында, аталық бездің жергілікті таралған рефрактерлі обырында және өт шығару жолдарының обырында белсенділік танытады.
Қолдану тәсілі және дозалары
Гемцитабин көктамыр ішіне 30 минут бойы тамшылатып енгізіледі.
Өкпенің уақ жасушалы емес обырында (жергілікті таралған немесе метастатикалық). Монотерапия. Препараттың ұсынылатын дозасы – әрбір 28 күндік циклдің 1, 8 және 15-күндері 1000 мг/м2
Біріктірілген ем. Препараттың ұсынылатын дозасы – әрбір 21 күндік циклдің 1 және 8-күндері 1250 мг/м немесе әрбір 28 күндік циклдің 1, 8 және 15-күндері 1000 мг/м'. Цисплатин гипергидратация аясында гемцитабин инфузиясынан кейін циклдің 1-ші күні 70 мг/м дозада енгізіледі.
Сүт безінің обыры (жергілікті таралған немесе метастатикалық). Монотерапия. Емдеудің антрациклиндерді қамтитын алғашқы желісінен кейін ауру үдеген кезде оларға қарсы көрсетілімдері жоқ болғанда. Препараттың ұсынылатын дозасы – әрбір 28 күндік циклдің 1, 8 және 15-күндері 1000-1200 мг/м2.
Біріктірілген ем. Антрациклиндерді қамтитын адъювантты және/немесе адъювантты емес емнен кейін ауру үдеген кезде емдеудің алғашқы желісі ретінде. Препараттың ұсынылатын дозасы – 1250 мг/м2 дозасын 1 және 8 күндері паклитакселмен біріктіріп, ол гемцитабиннен кейін әрбір 21 күндік циклдің 1-ші күнінде көктамыр ішіне 175 мг/м" дозада шамамен 3 сағат бойы тамшылатып енгізіледі.
Қуықтың обыры (жергілікті таралған, метастатикалық және беткейлік). Монотерапия. Препараттың ұсынылатын дозасы - әрбір 28 күндік циклдің 1, 8 және 15-күндері 1250 мг/м2.
Біріктірілген ем. Препараттың ұсынылатын дозасы - 1000 мг/м2 1, 8 және 15-ші күндері цисплатинмен біріктіріп, ол 70 мг/м2 дозада гемцитабин инфузиясынан кейін бірден, әрбір 28 күндік циклдің 1-ші немесе 2-ші күндері енгізіледі.
Қуықішілік химиотерапия. Препараттың ұсынылатын дозасы - 2000 мг. Инстилляцияға арналған ерітінді алу үшін препаратты 100 немесе 50 мл 0,9% натрий хлориді ерітіндісінде 20 мг/мл-ден 40 мг/мл концентрацияға дейін ерітеді. Препараттың экспозициясы 60 минутты құрайды. 6 апта ішінде аптасына бір рет енгізіледі. Ерітіндінің концентрациясы 40 мг/мл-ден аспауы тиіс.
Аналық бездердің эпителиальді обыры (жергілікті таралған немесе метастатикалық). Монотерапия. Препараттың ұсынылатын дозасы - әрбір 28 күндік циклдің 1, 8 және 15-ші күндері 800-1250 мг/м2.
Біріктірілген ем. Препараттың ұсынылатын дозасы - 1000 мг/м2 1 және 8-ші күндері карбоплатинмен AUC 4,0 мг/мл/мин болатын дозада біріктіріп, ол әрбір 21 күндік циклдің 1-ші күні гемцитабин инфузиясынан кейін бірден енгізіледі.
Ұйқы безінің обыры (жергілікті жайылған немесе метастатикалық).Монотерапия. Препараттың ұсынылатын дозасы – 1000 мг/м2, 7 апта ішінде аптасына бір рет, кейін апталық үзіліс жасайды. Содан кейін препарат әрбір 28 күндік циклдің 1, 8 және 15-ші күндерінде енгізіледі.
Жатыр мойнының обыры (жергілікті таралған немесе метастатикалық).Біріктірілген ем. Жергілікті жайылған обырда кейіннен химиялық сәулемен емдеу кезінде (неоадъювантты) және метастатикалық обырда гемцитабин әрбір 21 күндік циклдің 1 және 8-ші күндері 1250 мг/м2 дозада енгізіледі. Цисплатин гипергидратация аясында циклдің 1-ші күні гемцитабинді енгізгеннен кейін 70 мг/м2 дозада енгізіледі. Жергілікті жайылған обырда химиялық сәулемен бір мезгілде емдеген кезде гемцитабин сәулемен емдеуді бастаудан 1-2 сағат бұрын аптасына 1 рет 125 мг/м2 дозада енгізіледі, кейін (гемцитабинді енгізгеннен кейін) цисплатинді 40 мг/м2 дозада енгізіледі.
Гемцитабинді әрбір енгізу алдында қандағы тромбоциттер, лейкоциттер және гранулоциттер мөлшерін бақылап отыру қажет. Сүйек кемігі қызметінің тежелу белгілерінде емдеуді тоқтатып, дозаны түзету қажет.
Бауыр және бүйрек қызметтері бұзылған емделушілерде гемцитабинді абайлап қолданған жөн, өйткені емделушілердің осы тобында препаратты қолдануға зерттеулер жүргізілген жоқ.
Бүйрек қызметінің ауырлығы жеңіл немесе орташа жеткіліксіздігі (КК 30-80 мл/мин) гемцитабиннің фармакокинетикасына елеулі ықпалын тигізбейді.
65 жастан асқан емделушілерде препараттың дозасын түзету қажет емес.
Гемцитабинді балаларға қолдану зерттелген жоқ.
Инфузиялық ерітіндіні дайындау ережесі
Цитогем ерітіндісін дайындау үшін тек консервантсыз 0.9% натрий хлориді ерітіндісін ғана қолданған жөн. 200 мг гемцитабинді еріту үшін құтыға кем дегенде 5 мл еріткіш қосып, лиофилизат толық ерігенше сілкілеп араластырады. Гемцитабиннің ең жоғары концентрациясы 40 мг/мл-ден аспауы тиіс. Гемцитабиннің концентрациясы 40 мг/мл-ден асатын ерітінділерінде толық ерімеуі мүмкін.
Препараттың керек дозасы бар дайындалған ерітіндіні енгізер алдында 30 минут бойы к/і енгізу үшін 0.9% натрий хлориді ерітіндісінің жеткілікті мөлшерімен сұйылтады. Енгізуден бұрын ерітіндіде жүзіп жүрген бөлшектердің жоқтығына көз жеткізген жөн.
Парентеральді түрде енгізер алдында дайындалған ерітіндіде механикалық қоспалардың бар-жоқтығын және түсінің өзгерген-өзгермегендігін көзбен қарап шығу қажет.
Жағымсыз әсерлері
Жекелеген жағдайларға қарағанда жиі кездескен жағымсыз реакциялар келесі градацияларға сәйкес берілген: өте жиі (> 10%); жиі (> 1%,< 10%); кейде (> 0,1%, < 1%); сирек (>0,01%, <0,1%); өте сирек (<0,01%).
Қан түзу ағзалары тарапынан: жиі – лейкопения, тромбоцитопения, анемия; өте сирек – тромбоцитоз.
Ас қорыту жүйесі тарапынан: өте жиі – жүректің айнуы, құсу, бауыр трансаминазасы, сілтілік фосфатаза деңгейлерінің жоғарылауы; жиі – анорексия, диарея, іш қату, стоматит, билирубин деңгейінің жоғарылауы.
Несепжыныс жүйесі тарапынан: өте жиі – жеңіл протеинурия және гематурия; сирек – бүйрек қызметінің жеткіліксіздігі, гемолитикалық-уремиялық синдромына ұқсас клиникалық белгілер және симптомдар (гемоглобин деңгейінің төмендеуі, тромбоцитопения, қан сарысуында билирубин, креатинин, мочевина және/немесе лактатдегидрогеназа деңгейлерінің артуы).
Тері және тері қосалқылары тарапынан: жиі – тері бөртпелері, терінің қышуы, алопеция.
Тыныс жүйесі тарапынан: өте жиі – ентігу, жиі – жөтел, ринит: кейде – бронхтың түйілуі, интерстициальді пневмония, өкпенің ісінуі; сирек – жедел респираторлы дистресс-синдром.
Жүрек-қантамыр жүйесі тарапынан: сирек – артериялық қысымның төмендеуі, миокард инфарктісі, жүрек жеткіліксіздігі, аритмия.
Жүйке жүйесі тарапынан: жиі – бас ауыру, ұйқышылдық, ұйқысыздық.
Басқалар: өте жиі – тұмауға ұқсас синдром, шеткергі ісінулер; жиі – дене температурасының жоғарылауы, қалтырау, астения, арқаның ауыруы, миалгия; кейде – беттің ісінуі; өте сирек – анафилактикалық реакциялар.
Қолдануға болмайтын жағдайлар
- препарат компоненттеріне асқын сезімталдық
- миелосупрессия
- жүктілік және лактация
- балалар және 18 жасқа дейінгі жасөспірімдер
Бауыр және/немесе бүйрек қызметі бұзылғанда, сүйек кемігінің қан түзуі тежелгенде (соның ішінде қатар жүргізілген сәулемен немесе химиялық емдеу аясында), бір мезгілде сәулемен емдеу жүргізілгенде, шығу тегі вирустық, зеңдік немесе бактериялық жұқпалы ауруларда (соның ішінде желшешек, белдемелі теміреткі) сақтықпен қолданған жөн.
Дәрілермен өзара әрекеттесуі
Гемцитабиннің радиосенсибилиздеуші әсері бар, осыған байланысты препаратты сәулемен емдеу аясында қолданғанда сәуле реакциясының күшейетінін күтуге болады.
Белсенділігі жойылған немесе тірі вакциналарды бір мезгілде қолданған кезде антиденелердің жасалуын төмендетеді және жағымсыз әсерлерді күшейтеді (дәрілік заттарды қолдану арасындағы аралық 3 айдан 12 айға дейін болуы тиіс).
Айрықша нұсқаулар
Гемцитабинмен емдеуді ісікке қарсы химиялық емдеуді қолдану тәжірибесі бар дәрігердің бақылауымен жүргізуге болады.
Емдеуді бастар алдында гранулоциттердің абсолюттік мөлшері кем дегенде 1500/мкл, тромбоциттер мөлшері кем дегенде 100000/мкл болуы тиіс.
Гематологиялық емес уыттылықты анықтау үшін науқасқа жүйелі тексеру жүргізу және бауыр мен бүйрек қызметтеріне баға беру қажет. Уыттылық дәрежесіне байланысты дозаны әрбір цикл барысында немесе жаңа сатыны бастағанда сатылап төмендетуге болады.
Препараттың келесі енгізілуін кейінге қалдыру мәселесі уыттылық динамикасына дәрігердің берген клиникалық бағасына негізделуі тиіс.
Инфузия ұзақтығын және енгізу жиілігін арттыру уыттылығының артуына әкеледі. Бауыр метастазасында, сыртартқыда гепатит және маскүнемдік болғанда, сондай-ақ бауыр циррозында гемцитабинді енгізу бауыр қызметінің жеткіліксіздігінің пайда болу қаупін арттырады. Гемолитикалық-уремиялық синдромның алғашқы белгілері пайда болғанда гемцитабинмен емдеуді тоқтатқан жөн.
Өкпенің обыры немесе метастазалары бар науқастарда тыныс жүйесі тарапынан жағымсыз әсерлердің пайда болу қаупі жоғары болады.
Пневмониттің алғашқы белгілері немесе өкпелерде инфильтраттар пайда болған кезде гемцитабинмен емдеуді тоқтатқан жөн.
Әйелдер мен еркектер гемцитабинмен емделу кезінде және, кем дегенде, емдеуден кейінгі 6 ай ішінде контрацепцияның сенімді тәсілдерін қолданғандары жөн.
Цитогемді қолдануды инъекциялық ерітінділерді (бір реттік қолғаптар мен бет перделерді пайдалана отырып, стерильді боксте) дайындаған, сұйылтқан кезде және инелерді, еккіштерді, құтыларды, ампулаларды және пайдаланылмаған препарат қалдығын құртуды кәсіби маманданған медициналық қызметкер, белгіленген шараларды сақтай отырып, жүргізуі тиіс.
Цитогем кездейсоқ теріге және шырышты қабыққа тиіп кеткен жағдайда зақымданған жерді дереу сабындап жуып-шаю немесе судың күшті ағынымен мұқият шаю қажет.
Дәрілік заттың көлікті немесе қауіпті механизмдерді басқару қабілетіне ықпал ету ерекшеліктері
Гемцитабинмен емдеу кезеңінде автокөлікті жүргізгенде және зейінді жұмылдыруды және психомоторлы реакциялардың шапшаңдығын қажет ететін қауіпті қызмет түрлерімен айналысқан кезде сақ болған жөн.
Артық дозалануы
Симптомдары: жоғарыда көрсетілген жағымсыз құбылыстардың күшеюі.
Емдеу: артық дозаданғанына күдіктенген кезде емделуші ұдайы дәрігердің бақылауында болып, қан көрсеткіштері мұқият тексерілуі тиіс. Қажет болған кезде – симптоматикалық ем. У қайтарғысы белгісіз.
Шығарылу түрі және қаптамасы
Б тізімі. Белсенді заты тиісті 200 мг мөлшерінде болатын препарат резеңке қоспадан жасалған бромбутил тығынмен нығыздап жабылған және алюминий қалпақпен көмкерілген АҚШФ I типті, сыйымдылығы 10 мл шыны құтыларға салынған. Құтыға қағаздан жасалған заттаңба жапсырылған.
1 құты медицинада қолданылуы жөнінде мемлекеттік және орыс тілдеріндегі нұсқаулықпен бірге картон пәшкеге салынған.
Картон қорапқа 3 пәшкеден салынған.
Сақтау шарттары
Құрғақ, жарықтан қорғалған жерде, 250С-ден аспайтын температурада сақтау керек. Мұздатып қатыруға болмайды
Балалардың қолы жетпейтін жерде сақтау керек!
Сақтау мерзімі
2 жыл
Жарамдылық мерзімі өткеннен кейін қолдануға болмайды.
Дәріханадан босатылу шарттары
Рецепт арқылы
Өндіруші
«Д-р Редди’с Лабораторис Лимитед»
7-1-27 Амиирпет, Хайдерабад – 500 016, А.П., Үндістан
Тіркеу куәлігі иесінің атауы: «Д-р Редди’с Лабораторис Лимитед», Үндістан
Тұтынушылардан өнім сапасы жөнінде шағымдарды Қазақстан Республикасы аумағында қабылдайтын ұйымның мекенжайы
Қазақстан Республикасындағы «Д-р Редди’с Лабораторис Лимитед» компаниясының өкілдігі:
050057 Алматы қ-сы, 22 линия к-сі 45
Абонент жәшігі 7,
тел: 8(727)3941688
факс: 8(727)3941294