Цефяпс (1,5г)

МНН: Цефуроксим
Производитель: Балканфарма-Разград АД
Анатомо-терапевтическо-химическая классификация: Cefoxitin
Номер регистрации в РК: № РК-ЛС-5№022343
Информация о регистрации в РК: 22.08.2016 - 22.08.2021

Инструкция

Саудалық атауы

Цефяпс

Халықаралық патенттелмеген атауы

Цефуроксим

Дәрілік түрі

Инъекция үшін ерітінді дайындауға арналған 750 мг және 1.5 г ұнтақ

Құрамы

Бір құтының ішінде

белсенді зат - натрий цефуроксимі 789 мг немесе 1.578 мг

(750 мг немесе 1,500 мг цефуроксимге баламалы).

Сипаттамасы

Ақтан бозғылт-крем түске дейінгі ұнтақ

Фармакотерапиялық тобы

Жүйелі пайдалануға арналған бактерияға қарсы препараттар. Бета-лактамдық бактерияға қарсы басқа да препараттар. Екінші буын цефалоспориндері. Цефуроксим.

АТХ коды J01DC02

Фармакологиялық қасиеті

Фармакокинетикасы

Сіңуі

Препаратты бұлшықет ішіне енгізген кезде цефуроксимнің Сmax инъекциядан кейін 30-45 минуттан соң жетеді.

Таралуы

Плазма ақуыздарымен байланысуы 33 %-дан 50 %-ға дейінді құрайды (өлшеу әдісіне байланысты). Ең төменгі бәсеңдететін концентрациядан асатын цефуроксим концентрациясы көптеген микроорганизмдер үшін сүйек тінінде, синовиальді және көзішілік сұйықтықтарда болады. Цефуроксим гематоэнцефалдық бөгет арқылы өтеді.

Метаболизмі

Цефуроксим метаболизденбейді және шумақтық сүзілу және өзекшелік секреция жолымен бүйрек арқылы шығарылады.

Шығарылуы

Цефуроксимнің жартылай шығарылу кезеңі парентеральді енгізгеннен кейін шамамен 70 минутты құрайды.

Жаңа туған нәрестелерде өмірінің алғашқы апталарында цефуроксимнің жартылай шығарылуы ересектерге қарағанда 3-5 есеге ұзақтау болуы мүмкін.

Парентеральді енгізгеннен кейін 24 сағат бойы цефуроксим іс жүзінде толық (85 - 90 %) өзгермеген күйде несеппен шығарылады, бұл орайда препараттың көп бөлігі алғашқы 6 сағат ішінде шығарылады.

Пробенецидті бәсекелес тағайындағанда цефуроксимнің шығарылуы баяулайды, бұл плазма сарысуында оның деңгейінің жоғарылауына әкеледі.

Цефуроксимнің сарысулық деңгейлері диализ кезінде төмендейді.

Фармакодинамикасы

Цефяпс - ІІ буынның цефалоспориндік антибиотигі. Әсер ету ауқымы кең. Көптеген β-лактамазалар әсеріне төзімді, сондықтан ампициллин-резистентті немесе амоксициллин-резистентті штаммдарға қатысты белсенді. Бактерицидті әсер етеді, негізгі нысана-ақуыздармен байланысу нәтижесінде бактериялардың жасушалық жақтаулары синтезін бұзады.

Штаммдардың төзімділігі географиялық орналасу орнына байланысты, ауыр инфекцияларды емдеу үшін тағайындағанда төзімділігі бойынша жергілікті деректерді пайдалану қажет.

Цефуроксим төмендегі микроорганизмдерге қатысты тиімді

Аэробтық грамоң бактериялар: Streptococcus pyogenes, Beta-hemolytic streptococci.

Аэробтық грамтеріс бактериялар: Haemophilus influenzae (ампициллин-резистентті штаммдарды қоса), Haemophilus parainfluenzae, Moraxella catarrhalis, Neisseria gonorrhoea (пенициллиназаны өндіретін және өндірмейтін штаммдарды қоса).

Анаэробтық грамоң бактериялар: Peptostreptococcus spp., Propionibacterium spp., Спирохеттер, Borrelia burgdorferi

Цефуроксимге ықтималды төзімділігі бар организмдер

Аэробтық грамоң бактериялар:Staphylococcus spp., S. aureus қоса (тек метициллинге сезімтал изоляттар), Streptococcus pneumonia.

Аэробтық грамтеріс бактериялар: Citrobacter spp. (C. Freundii қоспағанда), Enterobacter spp. (E. aerogenes және E. Cloacae қоспағанда), Escherichia coli, Klebsiella spp. (Klebsiella pneumoniae қоса), Proteus mirabilis, Proteus spp. (P. penneri және P. Vulgaris қоспағанда), Providencia spp.

Анаэробтық грамоң бактериялар: Clostridium spp., C. Difficile қоспағанда.

Анаэробтық грамтеріс бактериялар: B. Fragilis, Fusobacterium spp қоспағанда, Bacteroides spp.

Цефуроксимге төзімді

Enterococcus spp.( E. faecalis және E. Faecium қоса), Listeria monocytogenes, Acinetobacter spp., Burkholderia cepacia, Campylobacter spp., Citrobacter freundii, Enterobacter aerogenes, Enterobacter cloacae, Morganella morganii, Proteus penneri, Proteus vulgaris, Pseudomonas spp. (Pseudomonas aeruginosa қоса), Serratia spp., Stenotrophomonas maltophilia, Clostridium difficile, Chlamydia species, Mycoplasma species, Legionella species, Bacteroides fragilis.

Қолданылуы

Препаратқа сезімтал қоздырғыштар туғызған ересектер мен балалардағы ауруларды емдеу үшін:

- ЛОР ағзалар, жоғарғы және төменгі тыныс алу жолдарының инфекцияларында

- пиелонефритті қоса, несеп шығару жолдарының инфекцияларында

- тері және жұмсақ тіндер инфекцияларында

- сүйек пен буын инфекцияларында

- асқазан-ішек жолына (өңешті қоса), ортопедияда, жүрек-қантамыр жүйесі ағзаларына және гинекология мен акушерлікте хирургиялық араласулар кезінде инфекциялық асқынулардың профилактикасы үшін

Қолдану тәсілі мен дозалары

Қолдану тәсілі: бұлшықет ішіне немесе көктамыр ішіне.

Көктамыр ішіне баяу енгізіледі, 3 - 5 минут бойы, тамшылатып немесе сорғалатып инфузия түрінде (30-60 минут бойы) немесе бұлшықет ішіне тереңдетіп енгізуге болады. Препаратпен емдеу ұзақтығы аурудың ауырлығымен және оның ағымының динамикасымен анықталады.

Ересектер мен дене салмағы 40 кг-ден жоғары балалар: бұлшықет ішіне немесе көктамыр ішіне тәулігіне 3 рет 750 мг. Барынша ауыр жағдайларда препарат көктамыр ішіне тәулігіне 3 рет 1.5 г дозада енгізіледі. Қажет болғанда Цефяпс препараты әр 6 сағат сайын енгізілуі мүмкін, ал тәуліктік дозасы 3-тен 6 г-ге дейінді құрауы мүмкін. Кейбір инфекцияларда Цефяпс препаратын тәулігіне 2 рет 750 мг немесе 1.5 г дозада тағайындаған тиімді (бұлшықет ішіне немесе көктамыр ішіне).

Дене салмағы 40 кг-ден төмен балалар: тәулігіне 30-100 мг/кг 3-4 енгізілімге. Көптеген инфекциялар үшін тиімді доза тәулігіне 60 мг/кг құрайды.

Жаңа туған сәбилер: тәулігіне 30-100 мг/кг 2-3 енгізілімге.

Соз

1.5 г бір рет (түрлі инъекциялық орындарға, мысалы, екі бөксе бұлшықетіне 750 мг-ден екі доза бұлшықет ішіне)

Менингит

Препарат сезімтал штаммдар туғызған бактериялық менингитті емдеу үшін монотерапия ретінде қолданылуы мүмкін.

Ересектер мен дене салмағы 40 кг-ден жоғары балалар: әр 8 сағат сайын көктамыр ішіне 3 г.

Дене салмағы 40 кг-ден төмен балалар: көктамыр ішіне тәулігіне 150-250 мг/кг 3-4 енгізілімге.

Жаңа туған нәрестелер (1 айға дейінгі): көктамыр ішіне тәулігіне 100 мг/кг.

Операциядан кейінгі асқынулар профилактикасы

Ересектер: құрсақ қуысы ағзаларына, жамбасқа жасалатын операцияларда және ортопедиялық араласуларда Цефяпс препараты 1.5 г дозада кіріспе анестезия кезінде көктамыр ішіне енгізіледі. Операциядан кейін 8 және 16 сағаттан соң қосымша Цефяпс препараты 750 мг-ден бұлшықет ішіне енгізілуі мүмкін. Жүрекке, өкпеге, өңешке және тамырларға операциялар жасағанда кіріспе анестезия кезінде Цефяпс препараты көктамыр ішіне 1.5 г дозада енгізіледі, содан соң 24-48 сағат бойы бұлшықет ішіне тәулігіне 3 рет 750 мг-ден енгізіледі.

Ересектердегі сатылы емдеу

Пневмония: 48-72 сағат бойы тәулігіне 2-3 рет 1.5 г (көктамыр ішіне немесе бұлшықет ішіне), әрі қарай 7-10 күн бойы тәулігіне 2 рет 500 мг дозада пероральді дәрілік түрдегі цефуроксимге көшеді.

Созылмалы бронхиттің өршуі: 48-72 сағат бойы тәулігіне 2-3 рет 750 мг Цефяпс (көктамыр ішіне немесе бұлшықет ішіне), әрі қарай 5-10 күн бойы тәулігіне 2 рет 500 мг дозада пероральді дәрілік түрдегі цефуроксимге көшеді.

Әр кезеңнің ұзақтығы (парентеральді емдеу және ішке қабылдау) инфекцияның ауырлығымен және пациенттің жалпы жай-күйімен анықталады.

Бүйрек жеткіліксіздігі: Цефуроксим бүйрек метаболизмі арқылы шығарылады. Бүйрек жеткіліксіздігінде Цефяпс препаратының дозасын төмендету ұсынылады. Креатинин клиренсі 20 мл/мин. жоғары науқастарда препараттың стандартты дозасын (тәулігіне 3 рет 750 мг-1.5 г ) төмендету қажет емес.

Ересектердегі бүйрек жеткіліксіздігі кезінде Цефяпс препаратының дозасын түзету

Креатинин клиренсі

Цефяпс дозасы

>20 мл/мин

тәулігіне 3 рет 750 мг-1.5 г

10-20 мл/мин

тәулігіне 2 рет 750 мг

< 10 мл/мин

тәулігіне 750 мг

Гемодиализдегі пациенттер

750 мг қосымша дозаны әр диализ сеансынан кейін көктамыр ішіне немесе бұлшықет ішіне енгізу керек.

Егде жастағылар: бұлшықет ішіне немесе көктамыр ішіне енгізгеннен кейін егде жастағы пациенттерде цефуроксимнің сіңуі, таралуы және шығарылуы бүйректің баламалы функциясы бар жасырақ пациенттердегі көрсеткіштермен ұқсас. Егде жастағы пациенттерде бүйрек функциясының бұзылу ықтималдығы жоғары болғандықтан, оларда дозаны анықтау ерекше сақтықпен жүргізілуі тиіс және бүйрек функциясын бақылау ұсынылады.

Бауыр жеткіліксіздігі: цефуроксим негізінен бүйрек арқылы шығарылатындықтан, бауырдың бұзылған функциясының цефуроксимнің фармакокинетикасына әсері күтілмейді.

Инъекция үшін ерітіндіні дайындау

Суспензияның түсі ақтан бозғылт-сары түске дейін, препараттың ерітіндісі – бозғылт-сарыдан күңгірт-сары түске дейін. Препараттың түсі оның тиімділігі мен қауіпсіздігіне байланысты емес.

Бұлшықет ішіне енгізу үшін: 750 мг-ден Цефяпс құтысының ішіндегісін - 3 мл, 1,5 г - инъекцияға арналған 6 мл стерильді суда немесе 1 % лидокаин гидрохлоридінде немесе инъекцияға арналған ерітіндіде сұйылтады. Мөлдір емес суспензия алғанға дейін шайқайды.

Лидокаин педиатриялық практикада еріткіш ретінде пайдаланылмайды.

Көктамыр ішіне енгізу үшін: Цефяпс 750 мг құтысының ішіндегісін инъекцияға арналған кемінде 6 мл стерильді суда ерітеді, толық ерігенге дейін шайқайды. Цефяпс 1,5 г құтысының ішіндегісін инъекцияға арналған 15 мл стерильді суда ерітеді.

Инфузиялық енгізу үшін: құтының ішіндегісін алдын ала инъекцияға арналған 15 мл суға еріту керек, содан соң 50-100 мл үйлесімді ерітіндіні қосу қажет. Алынған ерітіндіні тікелей көктамырға немесе инфузияға арналған жүйеге енгізуге болады.

Мүмкіндігінше дайындалған ерітіндіні дайындағаннан кейін бірден енгізген дұрыс. Егер бұл мүмкін болмаса, ерітінді мен суспензияны 2-ден 8С-ге дейінгі температурада (тоңазытқышта) 24 сағатқа дейін сақтауға болады!

Жағымсыз әсерлері

- экссудативтік мультиформалы эритема, (соның ішінде Стивенс-Джонсон синдромы), уытты эпидермальді некролиз (Лайелл синдромы), тері бөртпесі, (соның ішінде уртикарлы), терінің қышынуы

- дәрілік қызба, бронх түйілуі, сарысу құю ауруы, анафилаксиялық шок

- ауыз қуысының және қынаптың кандидозы (ұзақ уақыт қолданғанда)

- жүрек айнуы, құсу, диарея, құрсақ қуысының түйілулері және ауыруы, жалған жарғақшалы колит

- эозинофилия, лейкопения, нейтропения, тромбоцитопения, агранулоцитоз, гемолиздік анемия

- құрысулар

- естудің төмендеуі

- креатинин және/немесе мочевина азоты деңгейінің жоғарылауымен және креатинин клиренсінің төмендеуімен бүйрек функциясының бұзылуы, шаттың қышынуы, вагинит

- "бауыр" ферменттері (аланинаминотрансфераза, аспарагинаминотрансфераза, сілтілік фосфатаза, лактатдегидрогеназа, гипербилирубинемия) белсенділігінің жоғарылауы, жалған-оң Кумбс тесті

- бұлшықетішілік енгізу орнының ауыруы, тітіркенуі және инфильтрат, флебит, тромбофлебит (көктамыр ішіне енгізгенде)

Қолдануға болмайтын жағдайлар

- препараттың белсенді компонентіне немесе басқа да цефалоспориндік антибиотиктерге аса жоғары сезімталдық, басқа да бета-лактамды бактерияға қарсы препараттарға (мысалы, пенициллиндерге, монобактамдарға немесе карбапенемдерге) анамнезде ауыр аса жоғары сезімталдық реакцияларының болуы (мысалы, анафилаксиялық реакция).

- лактация кезеңі.

Дәрілермен өзара әрекеттесуі

Басқа антибиотиктердегідей Цефяпс препараты эстрогендер резорбциясының төмендеуіне және оральді контрацептивтердің тиімділігінің төмендеуіне әкеле отырып, ішек флорасына әсер етуі мүмкін.

Цефяпс препараты ферменттік әдістерге негізделген глюкозурияны анықтау жөніндегі тестілерге әсер етпейді.

Бенедикт, Фехлинг және Клинитест әдістері көрсеткіштерінің төмендеуіне елеусіз әсер етуі байқалған, дегенмен жалған оң реакциялар байқалған жоқ.

Гексокиназаны немесе глюкозоксидазаны пайдаланумен қандағы глюкоза деңгейін анықтаған жағдайда пациенттер цефуроксим қолданатыны туралы хабарлауы тиіс.

Цефяпс алкалин пикратының көмегімен креатининді сандық анықтауға әсер етпейді.

Ерітінділердің үйлесімділігі

Цефяпс құрамында 1 %-ға дейін лидокаин гидрохлориді бар сулы ерітінділермен үйлесімді. Цефяпс препараты өте кең қолданылатын инфузиялық ерітінділермен үйлесімді. Төмендегі ерітінділермен араластырған кезде препарат бөлме температурасында 24 сағатқа дейін тұрақты: 0.9 % натрий хлоридінің ерітіндісі, 5 % инъекцияға арналған декстроза ерітіндісі, 0.18 % натрий хлоридінің ерітіндісі және 4 % инъекцияға арналған декстроза ерітіндісі, 5 % декстроза ерітіндісі және 0.9 % натрий хлоридінің ерітіндісі, 5 % декстроза ерітіндісі және 0.45 % натрий хлоридінің ерітіндісі, 5 % декстроза ерітіндісі және 0.225 % натрий хлоридінің ерітіндісі, 10 % инъекцияға арналған декстроза ерітіндісі, Рингер ерітіндісі, Рингер лактат ерітіндісі, Хартман ерітіндісі.

Цефяпс препаратының 0.9 % натрий хлоридінің ерітіндісіндегі және 5 % декстроза ерітіндісіндегі тұрақтылығы гидрокартизон натрий фосфаты болғанда бұзылмайды.

Келесі ерітінділермен Цефяпс препараты үйлесімді және бөлме температурасында 24 сағат бойы тұрақты:

- гепарин (10 ӘБ/мл және 50 ӘБ/мл) 0.9 % натрий хлоридінің ерітіндісі;

- калий хлориді (10 мЭк/л және 40 мЭк/л) 0.9 % натрий хлоридінің ерітіндісінде.

Айрықша нұсқаулар

Аса жоғары сезімталдық реакциялары

сондай-ақ, басқа да бета-лактамды антибиотиктерді қолданған кезде цефуроксимді қолданғаннан кейін ауыр және кейде фатальді аса жоғары сезімталдық реакциялары туралы мәліметтер бар. Ауыр аса жоғары сезімталдық реакциялары дамыған кезде Цефяпс препаратымен емдеуді дереу тоқтату және қажетті жедел емдеу шараларын қабылдау керек.

Препаратты тағайындау алдында цефуроксимге, басқа цефалоспориндерге немесе басқа да бета-лактамды антибиотиктерге анамнезде ауыр аса жоғары сезімталдық реакциялары бар-жоғын анықтау керек.

Күшті әсер ететін диуретиктермен немесе аминогликозидтермен бір мезгілде емдеу

Цефалоспориндік антибиотиктердің жоғары дозаларын бір мезгілде күшті әсер ететін диуретиктермен (фуросемид сияқты) немесе аминогликозидтермен ем қабылдайтын пациенттерде сақтықпен қолдану керек. Осы біріктірілімдерді қолданған кезде бүйрек функциясының бұзылуы туралы хабарламалар бар. Егде жастағы пациенттерде және бүйрек патологиясы болғанда бүйрек функциясының жай-күйін бақылап отыру керек.

Сезімтал емес микроорганизмдердің шамадан тыс өсуі

Цефяпс препаратын қолдану Candida-ның шамадан тыс өсуіне әкелуі мүмкін. Ұзақ қолдану басқа да сезімтал емес микроорганизмдердің (мысалы, энтерококктар мен Clostridium difficile) шамадан тыс өсуіне әкелуі мүмкін, бұл препаратты қабылдауды тоқтатуды қажет етуі мүмкін. Цефуроксимді қолданумен байланысты жалған жарғақшалы колит туралы хабарламалар бар. Ол жеңіл дәрежедегі ауырлықтан өмірге қауіп төндіретін жай-күйге дейін құбылуы мүмкін. Бұл диагноздан Цефяпс препаратымен емдеу барысында немесе емдегеннен кейін пайда болған сұйық нәжісі бар пациенттерде күдіктенуге болады. Мұндай жағдайларда Цефяпс препаратымен емдеуді тоқтатып, Clostridium difficile қарсы тиімді арнайы препараттарды тағайындау керек. Перистальтиканы бәсеңдететін дәрілік препараттарды пайдалануға болмайды.

Құрсақішілік инфекциялар

Белсенділік спектрін ескере отырып, цефуроксим грамтеріс бактериялардың жекелеген түрлерінен туындаған инфекцияларды емдеуге келмейді.

Диагностикалық тестілер нәтижесіне әсері

Цефалоспориндер антибиотиктер класына жатады, олар эритроциттер жарғақшаларының беткейінде сіңіріледі және препараттың әсер етуші затына антиденелермен өзара әрекеттеседі, бұл Кумбстың жалған оң реакциясына немесе гемолиздік анемияға әкелуі мүмкін. Цефяпс препаратын қолданумен байланысты Кумбс сынамасының оң нәтижесі қан құйғанда үйлесімділікке айқаспалы сынама нәтижесіне әсер етуі мүмкін. Мыс редукциясын зертханалық диагностикалау әдістерін (Benedict, Fehling, Clinitest) пайдаланған кезде елеусіз ауытқулар болуы мүмкін. Бұл кейбір басқа цефалоспориндерді қолданған кезде байқалуы мүмкін жалған оң нәтижелерге әкелмейді. Цефяпс препаратын қабылдайтын пациенттерде қандағы/плазмадағы глюкоза деңгейін анықтағанда глюкооксидазалық немесе гексокиназалық тестілерді пайдалану ұсынылады, себебі феррицианидтік тест жалған теріс нәтижелер беруі мүмкін.

Қосымша заттар туралы маңызды ақпарат

Цефяпс инъекция үшін ерітінді дайындауға арналған ұнтақтың құрамында натрий бар. Мұны натрий қабылдауға шектеу қойылған пациенттерге тағайындағанда ескеру керек.

Цефяпс препаратымен менингитті емдеген кезде кейбір балаларда жеңіл және орташа ауырлық дәрежесіндегі естудің төмендеуі байқалған, бұл ретте 18-36 сағат емдегеннен кейін ми-жұлын сұйықтығында Haemophilus influenzae өсіріндісі бөлінген. Осыған ұқсас құбылыстар басқа антибиотиктерді қолданғанда да байқалған, бірақ олардың клиникалық мәні белгісіз.

Бұлшықет ішіне енгізгеннен кейін ауыру жоғары дозаны енгізген кезде жиі туындайды, бірақ бұл емдеуді тоқтатуға себеп болмауы тиіс.

Жүктілік және лактация кезеңі

Препараттың шаранаға эмбриоуытты және тератогенді әсері байқалған жоқ, бірақ Цефяпс препаратын жүктіліктің алғашқы триместрінде сақтықпен қолдану керек.

Цефуроксим емшек сүтімен бөлініп шығады, сондықтан препаратты бала емізетін аналарға тағайындаған кезде сақ болу керек.

Дәрілік заттың көлік құралын немесе қауіптілігі зор механизмдерді басқару қабілетіне әсер ету ерекшеліктері

Деректер жоқ.

Артық дозалануы

Симптомдары: құрысулар мен команың дамуымен ми қыртысы қозуының жоғарылауы.

Емі: симптоматикалық. Гемодиализ және перитонеальді диализ тиімді.

Шығарылу түрі және қаптамасы

Цефуроксимге шаққанда 750 мг немесе 1.5 г белсенді заттан ІІІ типті гидролитикалық түссіз шыныдан жасалған 8 H (750 мг доза үшін) немесе 20 Н (1.5 г доза үшін) құтыларға салады, І типті резеңке тығынмен тығындайды және алюминий қалпақшалармен жабады.

5 құтыдан медициналық қолдану жөніндегі мемлекеттік және орыс тілдеріндегі нұсқаулықпен бірге картон қорапшаға салынған.

Сақтау шарттары

Түпнұсқалық қаптамада, 25 С-ден аспайтын температурада сақтау керек.

Препарат сұйылтылғаннан кейін (2 - 8) °C температурада сақталған жағдайда тәулік ішінде тұрақты.

Балалардың қолы жетпейтін жерде сақтау керек!

Сақтау мерзімі

2 жыл

Жарамдылық мерзімі өткеннен кейін қолдануға болмайды.

Дәріханалардан босатылу шарттары

Рецепт арқылы

Өндіруші

Balkanpharma-Razgrad AD, Разград, Болгария

Қаптаушы

Balkanpharma-Razgrad AD, Разград, Болгария

Тіркеу куәлігінің иесі

Spey Medical Ltd., Лондон, Ұлыбритания

Қазақстан Республикасы аумағында дәрілік заттың тіркеуден кейінгі қауіпсіздігін қадағалауға жауапты ұйымның атауы, мекенжайы және байланыс деректері (телефон, факс, электронды пошта)

«Cepheus Medical» (Цефей Медикал) ЖШС: 050000, Қазақстан Республикасы, Алматы қ., Панфилов к-сі 98, «OLD SQUARE» БО, 807 кеңсе, телефон: +7 (727) 300 69 71, эл. поштасы: cepheusmedical@gmail.com

Прикрепленные файлы

287854071477976157_ru.doc 102 кб
899304161477977447_kz.doc 116.5 кб

Отправить прикрепленные файлы на почту

Источники

Национальный центр экспертизы лекарственных средств, изделий медицинского назначения и медицинской техники