Цефуроксим (0.75 г)

• русский
• қазақша

• Скачать инструкцию медикамента

Саудалық атауы

Цефуроксим

Халықаралық патенттелмеген атауы

Цефуроксим

Дәрілік түрі

Көктамыр ішіне және бұлшықет ішіне енгізу үшін ерітінді дайындауға арналған 0,75 г ұнтақ

Құрамы

Бір құтының құрамында:

белсенді зат –натрий цефуроксимі (цефуроксимге шаққанда) - 0,75 г.

Сипаттамасы

Ақ немесе сарғыш реңді ақ түсті ұнтақ, гигроскопиялы.

Фармакотерапиялық тобы

Бета – лактамдық бактерияға қарсы басқа да препараттар. Екінші буынның цефалоспориндері.

АТЖ коды JO1DС02

Фармакологиялық қасиеттері

Фармакокинетикасы

Бұлшықет ішіне 750 мг енгізгеннен кейін ең жоғарғы концентрациясына (Сmax) 15-60 минуттан кейін жетеді және 27 мкг/мл құрайды. Көктамыр ішіне 0,75 және 1,5 г енгізгенде Сmax 15 минуттан кейін 50 және сәйкесінше 100 мкг/мл құрайды. Емдік концентрациясы 5,3 және сәйкесінше 8 сағат бойы сақталады. Жартылай шығарылу кезеңі (Т1/2) к/і және б/і енгізгенде – 1,3-1,5 сағат, жаңа туған сәбилерде- 2-2,5 сағатты құрайды. Қан плазмасы ақуыздарымен байланысуы - 33-50 %. Бауырда метаболизденбейді. Көбінесе бүйрекпен шумақтық сүзілу және өзекшелік сөлініс жолымен 85-90% -ы өзгеріссіз күйде 8 сағат ішінде шығарылады (препараттың көп бөлігі бастапқы 6 сағат ішінде, несепте жоғары концентрацияларын түзе отырып шығарылады); 24 сағаттан соң толығымен шығарылады (50 %-ы - өзекшелік сөлініс, 50 %-ы – шумақталып сүзілу жолымен). Емдік концентрациялары плевралық сұйықтықта, өтте, қақырықта, миокардта, тері мен жұмсақ тіндерде тіркеледі. Цефуроксимнің микроорганизмдердің көпшілігі үшін ең төменгі бәсеңдеткіш концентрациясынан (ТБК) асатын концентрацияларына сүйек тінінде, синовиальді және көзішілік сұйықтықтарда жетеді. Менингитте гематоэнцефалдық бөгет (ГЭБ) арқылы өтеді. Плацента арқылы өтеді және емшек сүтіне енеді.

Фармакодинамикасы

Цефуроксим – парентеральді қолдануға арналған II буынның цефалоспориндік антибиотигі. Бактерицидтік әсер етеді (бактериялар жасушалары қабырғаларының синтезін бұзады). Микробқа қарсы кең ауқымды әсері бар.

Пенициллиндерге төзімді штаммдарды қоса (метициллинге резистентті штаммдардан басқа), грамоң микроорганиздерге қатысты белсенділігі жоғары Staphylococcus aureus, Streptococcus pyogenes (және басқа бета-гемолитикалық стрептококктар), Streptococcus pneumoniae, Streptococcus В тобы (Streptococcus agalactiae), Streptococcus mitis (viridans тобы), Bordetella pertussis, көпшілігі Clostridium spp.); грамтеріс микроорганизмдерге қатысты (Escherichia coli, Klebsiella spp., Proteus mirabilis, Providencia spp., Proteus rettgeri, Haemophilus influenzae, ампициллинге резистентті штаммдарды қоса; Haemophilus parainfluenzae, ампициллинге резистентті штаммдарды қоса; Moraxella catarrhalis, Neisseria gonorrhoeae, пенициллиназаны өндіретін және өндірмейтін штаммдарды қоса, Neisseria meningitidis, Salmonella spp., Borrelia burgdorferi; грамоң және грамтеріс анаэробтарды (Peptococcus spp., Peptostreptococcus spp., Fusobacterium spp., Propionibacterium spp.).

Цефуроксимге мыналар сезімтал емес: Clostridium difficile, Pseudomonas spp., Campylobacter spp., Acinetobacter calcoaceticus, Listeria monocytogenes, метициллинге төзімді штаммдар Staphylococcus aureus, Staphylococcus epidermidis, Legionella spp., Streptococcus (Enterococcus) faecalis, Morganella morganii, Proteus vulgaris, Enterobacter spp., Citrobacter spp., Serratia spp., Bacteroides fragilis.

Қолданылуы

• сезімтал микроорганизмдер туғызған жұқпалы-қабынбалы ауруларда:

• тыныс алу жолдарының жұқпаларында (бронхит, пневмония, өкпе абсцесі, плевра эмпиемасы және т.б.)

• ЛОР-мүшелердің (синусит, тонзиллит, фарингит, отит және т.б.)

• несеп шығару жолдарының (пиелонефрит, цистит, симптомсыз бактериурия, гонорея және т.б.)

• тері мен жұмсақ тіндердің (тілме, пиодермия, импетиго, фурункулез, флегмона, жара жұқпасы, эризипелоид және т.б.)

• сүйектер мен буындардың (остеомиелит, септикалық артрит және т.б.)

• кіші жамбас мүшелерінің жұқпаларында (эндометрит, аднексит, цервицит)

• сепсис

• менингит

• Лайм ауруы (боррелиоз)

• кеуде қуысы мүшелеріне жасалған операциялардағы жұқпалы асқынулардың алдын алу

• іш қуысының, жамбастың, буындардың (соның ішінде, өкпеге, жүрекке, өңешке жасалған операцияларда, жұқпалы асқынулардың қауіп дәрежесі жоғары болса, қантамырлық хирургияда, ортопедиялық операцияларда).

Қолдану тәсілі мен дозалары

Ересектерге к/і және б/і тәулігіне 3 рет 750 мг тағайындайды; ауыр ағымды жұқпаларда – дозасын тәулігіне 3-4 рет 1,5 г дейін ұлғайтады (қажет болса енгізулер аралығы 6 сағатқа дейін қысқартылуы мүмкін). Орташа тәуліктік дозасы - 3-6 г.

Балаларға тәулігіне 3-4 қабылдауға 30-100 мг/кг тағайындайды. Жұқпалардың көпшілігінде оңтайлы дозасы тәулігіне 60 мг/кг құрайды. Жаңа туған сәбилер мен 3 айға дейінгі балаларға тәулігіне 2-3 қабылдауға 30 мг/кг тағайындайды.

Гонореяда – к/і, 1500 мг (750 мг 2 инъекция түрінде, әр тұстарға, мысалы 2 жақ бөксе бұлшықетіне енгізе отырып).

Бактериялық менингитте – к/і, әр 8 сағат сайын 3 г; кіші және ересек жастағы балаларға – тәулігіне 3-4 қабылдауға 150-250 мг/кг, жаңа туған сәбилерге - тәулігіне 100 мг/кг.

Іш қуысына, кіші жамбас мүшелеріне жасалған операцияларда және ортопедиялық операцияларда - к/і, анестезияны индукциялауда 1500 мг, сосын қосымша - операциядан кейін 8 және 16 сағаттан соң б/і, 750 мг. Буынды түгел ауыстырғанда - 1500 мг ұнтақты сұйық мономерді қосар алдында полимер метил-метакрилатты цементтің әр пакетімен құрғақ күйінде араластырады.

Жүрекке, өкпеге, өңешке және тамырларға операция жасағанда - к/і, анестезияны индукциялауда 1500 мг, сосын - б/і, келесі 24-28 сағат бойы күніне 3 рет 750 мг.

Пневмонияда - к/і, тәулігіне 2-3 рет 1500 мг 48-72 сағат бойы, сосын 7-10 күн бойы тәулігіне 2 рет 500 мг-ден ішке қабылдауға көшеді.

Созылмалы бронхит өршігенде б/і немесе к/і, тәулігіне 2-3 рет 750 мг 48-72 сағат бойы тағайындайды, сосын 5-10 күн бойы тәулігіне 2 рет 500 мг ішке қабылдауға көшеді.

СБЖ-де дозалау режимін түзету қажет: креатинин клиренсі (КК) минутына 10-20 мл болғанда к/і немесе б/і тәулігіне 2 рет 750 мг, КК минутына 10 мл-ден аз болса, тәулігіне 1 рет 750 мг.

Артериовеноздық шунттау пайдаланылған немесе қарқынды емдеу бөлімшелеріндегі жылдамдығы жоғары гемофильтрацияда үздіксіз гемодиализдегі емделушілерге тәулігіне 2 рет 750 мг тағайындайды; жылдамдығы төмен гемофильтрацияда жүрген емделушілер үшін бүйрек қызметі бұзылғанда ұсынылатын дозаларын тағайындайды.

Инъекциялауға арналған ерітінді дайындау:

Б/і инъекциялауға арналған ерітінді:

750 мг Цефуроксимді инъекциялау үшін 3 мл су қосу керек. Суспензия түзілгенше сақтықпен сілкіңіз. Б/і енгізгенде Цефуроксим құрамында 1 %-ға дейін лидокаин гидрохлориді бар сулы ерітінділермен үйлесімді.

Цефуроксим 1500 мг дозада тек к/і енгізуге арналған.

К/і енгізуге арналған ерітінді:

Ерітіңіз

- 750 мг Цефуроксимді 6 мл немесе одан да көп инъекцияға арналған сумен,

- 1,5 г Цефуроксимді 15 мл немесе одан да көп инъекцияға арналған сумен.

Қысқа мерзімді к/і инфузиялар үшін (30 минутқа дейінгі) 1,5 г препаратты 50 мл инъекцияға арналған суда ерітеді. Бұл ерітінділерді тікелей көктамырға немесе инфузиялық түтікке енгізуге болады.

Цефуроксим ерітіндісі мен (15 мл инъекцияға арналған суда 1,5 г) метронидазолды араластырғанда (50 мг/100 мл) екі компоненті де 40С температурада өз белсенділігін 24 сағатқа дейін сақтайды немесе 250С-ден төмен температурада 6 сағат бойы сақтайды.

Цефуроксим к/і енгізу үшін кеңірек қолданылатын сұйықтықтармен үйлесімді.

Препарат төмендегі ерітінділермен араластырғанда, бөлме температурасында 24 сағатқа дейін тұрақты:

• натрий хлоридінің 0,9% ерітіндісі;

• 5% декстроза ерітіндісі;

• Рингер ерітіндісі;

• Хартман ерітіндісі.

Цефуроксим 0,9% натрий хлориді ерітіндісінде және 5% декстроза ерітіндісінде құрамында гидрокортизон натрий фосфаты бар болса тұрақты болып қалады.

Төмендегі ерітінділермен Цефуроксим бөлме температурасында 24 сағат бойы үйлесімді:

• гепарин (10 бірл/мл және 50 бірл/мл) 0,9% натрий хлориді ерітіндісінде;

• калий хлориді (10 мЭкв/л және 40 мЭкв/л) 0,9% натрий хлориді

ерітіндісінде.

Цефуроксимді аминогликозидтер тобының антибиотиктерімен бір еккіште араластырмаған жөн.

Натрий гидрокарбонатының 2,74% ерітіндісінің Цефуроксим ерітіндісінің түсіне елеулі әсер ететін pH көрсеткіші бар, сондықтан сұйылту үшін оны ұсынбайды. Қажет болса, натрий гидрокарбонаты ерітіндісін емделушіге тікелей инфузия жүйесіне енгізуге болады.

Жағымсыз әсерлері

• қалтырау, бөртпе, қышыма, есекжем, бронх түйілуі, анафилактикалық шок, сарысу ауруы, интерстициальді нефрит, сирек – көптүрлі экссудативті эритема (соның ішінде, Стивенс-Джонсон синдромы)

• бүйрек қызметінің бұзылуы, креатинин және/немесе қан сарысуындағы мочевина азотының жоғарылауы, креатинин клиренсінің төмендеуі, дизурия, шаптың қышуы, вагинит

• құрысулар, бас ауруы, ұйқышылдық, естудің нашарлауы

• диарея, жүрек айнуы, құсу, іштің түйілуі мен ауыруы, іштің қатуы, метеоризм, диспепсия, ауыз қуысы шырышты қабығының ойық жаралануы, анорексия, шөлдеу, глоссит, ауыз қуысының кандидозы, "бауыр" ферменттері белсенділігінің, сілтілік фосфатазаның, лактатдегидрогеназаның артуы, гипербилирубинемия, бауыр қызметінің бұзылуы, холестаз, сирек – жалған жарғақшалы энтероколит

• гемоглобин мен гематокриттің төмендеуі, көшпелі эозинофилия, көшпелі нейтропения мен лейкопения, апластикалық және гемолитикалық анемиялар, тромбоцитопения, агранулоцитоз, гипопротромбинемия, протромбиндік уақыттың ұзаруы

• жергілікті реакциялар: тітіркендіру, енгізген жердегі инфильтрат және ауыруы, флебит

• басқа да: кеуденің ауыруы, тыныс алудың жиілеуі, дисбактериоз, супержұқпа, оң Кумбс тесті

Қолдануға болмайтын жағдайлар

• асқын сезімталдықта (соның ішінде басқа цефалоспориндерге, пенициллиндерге және карбапенемдарға).

Сақтықпен:

• жаңа туға сәбилерде

• шала туылған сәбилерде

• жүктілік және лактация кезеңінде

• созылмалы бүйрек жеткіліксіздігінде (СБЖ)

• әлсіреген және қажыған емделушілерде

• сыртартқыдағы асқазан-ішек жолының қан кетулерінде, соның ішінде спецификалық емес ойық жаралы колитте

Дәрілермен өзара әрекеттесуі

“Ілмектік” диуретиктерді бір мезгілде пероральді тағайындау өзекшелік сөліністі баяулатады, бүйрек клиренсін төмендетеді, плазмадағы концентрациясын арттырады және Цефуроксимнің Т1/2 ұлғайтады.

Аминогликозидтермен және диуретиктермен бір мезгілде қолданғанда нефроуытты әсерлер қаупі артады. Құрамында 1%-ға дейінгі лидокаин гидрохлориді бар сулы ерітінділермен, натрий хлоридінің 0,9% ерітіндісімен, 5 және 10% декстроза ерітіндісімен, 0,18% натрий хлоридінің ерітіндісімен және 4% декстроза ерітіндісімен, 5% декстроза ерітіндісімен және 0,9% натрий хлориді ерітіндісімен, Рингер ерітіндісімен, Хартман ерітіндісімен, натрий лактаты ерітіндісімен, 0,9% натрий хлориді ерітнідісіндегі гепаринмен (10 ӘБ/мл және 50 ӘБ/мл) фармацевтикалық үйлесімді. Аминогликозидтермен, 2,74 % натрий гидрокарбонаты ерітіндісімен фармацевтикалық үйлесімсіз.

Айрықша нұсқаулар

Сыртартқысында пенициллиндерге аллергиялық реакциялар болған емделушілердің цефалоспориндік антибиотиктерге асқын сезімталдығы болуы мүмкін. Емдеу үдерісінде, әсіресе препаратты жоғары дозаларда алып жүрген науқастарда бүйрек қызметін бақылау қажет. Емдеуді симптомдары жоғалғаннан кейін 48-72 сағат бойы жалғастырады, Streptococcus pyogenes тудырған жұқпалар жағдайында, емдеу курсы - 7-10 күннен кем емес. Емдеу кезінде несептегі глюкозаға талдауда Кумбстың тікелей жалған оң реакциясы болуы мүмкін. Қолдануға дайын ерітінділерді бөлме температурасында 7 сағат бойы, тоңазытқышта - 48 сағат бойы сақтайды. Сақтау кезінде сарғайған ерітіндіні қолдануға жол беріледі. Цефуроксимді алып жүрген емделушілерде, қандағы глюкоза концентрациясын анықтауда глюкозооксидазамен немесе гексокиназамен тестілерді пайдалану ұсынылады. Парентеральді енгізуден ішке қабылдауға көшкенде жұқпаның ауырлығын, микроорганизмдердің сезімталдығын және емделушінің жалпы жай-күйін ескерген жөн. Егер Цефуроксимді ішке қабылдағаннан кейін 72 сағаттан соң жақсару байқалмаса, парентеральді енгізуді жалғастыру қажет.

Дәрілік заттың көлік құралын немесе қауіптілігі зор механизмдерді басқару қабілетіне әсер ету ерекшеліктері

Деректер жоқ.

Артық дозаланғанда

Белгілері: ОЖЖ қозуы, құрысулар.

Емі: эпилепсияға қарсы дәрілік заттарды тағайындау, ағзаның өмірлік маңызы бар қызметтерін бақылау және демеу, гемодиализ және перитонеальді диализ.

Шығарылу түрі мен қаптамасы

Көктамыр ішіне және бұлшықетішіне енгізу үшін ерітінді дайындауға арналған 0,75 г ұнтақ тығындармен тұмшаланып тығындалған және алюминий қалпақшалармен қаусырылған шыны құтыларда.

Препараты бар 1 құты мен мемлекеттік және орыс тілдеріндегі қолдану жөніндегі нұсқаулықты картоннан жасалған пәшкеге салады.

Сақтау шарттары

Құрғақ, жарықтан қорғалған жерде, 25 С-ден аспайтын температурада сақтау керек.

Балалардың қолы жетпейтін жерде сақтау керек!

Сақтау мерзімі

3 жыл

Жарамдылық мерзімі өткеннен кейін қолдануға болмайды.

Дәріханалардан босатылу шарттары

Рецепт арқылы

Өндіруші

”Биосинтез” ААҚ, Ресей Федерациясы

440033, Пенза қ-сы, Дружба к-сі, 4, тел/факс (8412) 57-72-49,

e-mail: certificate@biosintez.com

Тіркеу куәлігі иесінің атауы мен елі

«Биосинтез» ААҚ, Ресей Федерациясы

Қазақстан Республикасы аумағында тұтынушылардан өнім (тауар) сапасына қатысты шағымдарды қабылдайтын ұйымның мекенжайы

«Биосинтез» ААҚ, Ресей Федерациясы

440033, Пенза қ-сы, Дружба к-сі, 4, тел/факс (8412) 57-72-49,

e-mail: certificate@biosintez.com

 

7