Цефпар СВ (2,0 г)
Инструкция
-
русский
-
қазақша
Саудалық атауы
Цефпар СВ
Халықаралық патенттелмеген атауы
Жоқ
Дәрілік түрі
Көктамыр ішіне және бұлшықет ішіне енгізу үшін ерітінді дайындауға арналған ұнтақ.
Құрамы
Бір құтының ішінде
белсенді заттар: 0,5 г немесе 1 г цефоперазонға баламалы цефоперазон натрийі, 0,5 г немесе 1,0 г сульбактамға баламалы сульбактам натрийі.
Сипаттамасы
Ақ түстен ақ дерлік түске дейінгі ұнтақ.
Фармакотерапиялық тобы
Бактерияларға қарсы бета-лактамды басқа да препараттар. Цефоперазон біріктірілімдері
АТЖ коды J01DD62
Фармакологиялық қасиеттері
Фармакокинетикасы
Сульбактам мен цефоперазон ең жоғары концентрацияларына 1 г препаратты көктамыр ішіне енгізгеннен кейін 5 минут ішінде, 2 г енгізгеннен кейін 10 минут ішінде жетеді.
Препарат организмнің әртүрлі тіндеріне және сұйықтығына, өтті, өт қабын, теріні, аппендиксті, фаллопиев түтігін, аналық бездерді, жатырды және т.б. қоса есептегенде, жақсы таралады. Сульбактам және цефоперазон плацентарлы бөгет арқылы өтеді.
Сульбактамның шамамен 75-85%-ы және цефоперазонның 20-30%-ы бүйректер арқылы шығарылады. Цефоперазонның қалған бөлігі өтпен бірге шығарылады.
Фармакодинамикасы
Цефоперазон – сезімтал микроорганизмдерге бактерицидті түрде әсер ететін, үшінші буынды цефалоспорин.
Сульбактам – бета-лактамды антибиотиктерге төзімді микроорганизмдер өндіретін бета-лактамаза тежегіші.
Цефпар СВ цефоперазонға сезімтал барлық мына микроорганизмдерге: Haemophilus influenzae, Bacteroides spp., Staphylococcus spp., Acinetobacter calcoaceticus, Enterobacter aerogenes, Escherichia соli, Proteus mirabllis, Klebsiella pneumoniae, Morganella morganii, Citrobacter freundii, Enterobacter cloacae, Citrobacter diversus қатысты белсенді.
Цефоперазон+сульбактам клиникалық тұрғыдан маңызды микроорганизмдердің ауқымды өрісіне in vitro белсенді.
Қолданылуы
Сезімтал микроорганизмдерден болған мына жұқпалы-қабыну ауруларында:
- тыныс жолдарының жоғарғы және төменгі бөлімдерінің жұқпаларында
- несеп шығару жүйесінің жұқпаларында
- перитонитте, холециститте, холангитте
- сепсисте, менингитте
- тері мен жұмсақ тін жұқпаларында
- сүйектер мен буындардың жұқпаларында
- кіші жамбас ағзаларының қабыну ауруларында, эндометритті, созды қоса есептегенде
- операциядан кейінгі асқынулардың алдын алуға.
Қолдану тәсілі және дозалары
Көктамыр ішіне (сорғалатып және тамшылатып) және бұлшықет ішіне.
Ересектерде қолданылуы
Тәуліктік доза 2,0-4,0 г құрайды, оны тең бөліктерге бөлген және оның әрбір 12 сағат сайын енгізген жөн.
Ауыр және стандартты дозаларға төзімді жұқпаларда цефоперазон+сульбактамның тәуліктік дозасы 8 г-ға дейін арттырылуы мүмкін. Дозаны тең бөліктерге бөлген және әрбір 12 сағат сайын енгізген жөн. Сульбактамның ұсынылатын ең жоғары тәуліктік дозасы 4 г құрайды.
Бүйрек қызметі бұзылған кезде қолданылуы
Креатинин клиренсі минутына 15-30 мл науқастарда сульбактамның ең жоғары дозасы әрбір 12 сағат сайын 1 г (сульбактамның ең жоғары тәуліктік дозасы 2 г), ал креатинин клиренсі минутына 15 мл-ден кем болатын науқастарда сульбактамның ең жоғары дозасы әрбір 12 сағат сайын 500 мг құрайды (сульбактамның ең жоғары тәуліктік дозасы 1 г). Ауыр жұқпаларда цефоперазонды қосымша енгізу қажет етілуі мүмкін.
Сульбактамның фармакокинетикасы гемодиализде едәуір өзгереді.
Цефоперазонның қан сарысуынан жартылай шығарылу кезеңі гемодиализ кезінде біршама төмендейді. Демек, препаратты енгізуді диализден кейін жоспарлаған жөн.
Бауыр қызметі бұзылған кезде қолданылуы
Егер цефоперазонның сарысулық концентрациясына жүйелі бақылау жүргізілмесе, онда ең жоғары тәуліктік доза 2 г-нан аспауы тиіс («Айрықша нұсқаулар» тарауын қараңыз).
Балаларға қолданылуы
Тәуліктік доза дене салмағының әр кг-на шаққанда 40-80 мг құрайды. Дозаны тең бөліктерге бөлген және әрбір 6-12 сағат сайын енгізген жөн.
Ауыр немесе рефрактерлі жұқпаларда бұл дозалар негізгі компоненттердің 1:1 арақатынастары үшін тәулігіне дене салмағының әр кг-на шаққанда 160 мг-ға дейін арттырылуы мүмкін. Тәуліктік дозаны тең 2-4 бөлікке бөледі. Цефоперазонның белсенділігіне қарай есептелген, тәулігіне әр кг-ға шаққанда 80 мг-нан астам дозада енгізу қажет болған кезде доза цефоперазонды қосымша енгізу есебінен арттырылады.
Бұлшықетішілік енгізу
Еріту үшін инъекцияға арналған стерильді суды пайдаланады. Препаратты 250 мг/мл-ден асатын концентрацияларда енгізген жағдайда, ерітіндіні лидокаинды пайдалана отырып дайындау керек. Сұйылтуды 2 сатымен жүргізеді – ішінде 1 г препараты бар құтыға инъекцияға арналған 1,3 мл стерильді су, ішінде 2 г препараты бар құтыға 2,6 мл қосып, түгел ерігенше шайқап араластырады, ал содан кейін ішінде 1 г препараты бар құтыға 0,4 мл, ішінде 2 г препараты бар құтыға 0,8 мл 2% лидокаин гидрохлориді ерітіндісін қосады. Соңғы ерітіндіде 1 мл 0,5% лидокаин гидрохлорид ерітіндісінде 250 мг-ға жуық цефоперазон және 250 мг-ға жуық сульбактам болады.
Көктамырішілік енгізу
Құтының ішіндегі затты 10 мл 5% декстроза ерітіндісіне, 0,9% натрий хлориді ерітіндісіне немесе инъекцияға арналған стерильді суда ерітіп, 3 минут бойы енгізеді. Көктамыр ішіне инфузиялық енгізу үшін жоғарыда көрсетілгендей етіп ерітеді, содан кейін 20-100 мл-ге дейін сол еріткішпен сұйылтады және 15-60 минут бойы енгізеді.
Жағымсыз әсерлері
- жүректің айнуы, құсу, диарея, жалған жарғақшалы колит
- макулопапулезді бөртпе, есекжем, қышу, Стивенс-Джонсон синдромы; олардың қаупі сыртартқысында (әсіресе пенициллинге) аллергиялық реакциялары бар науқастарда жоғары
- нейтрофилдер санының төмендеуі, ұзақ уақыт емдеген кезде (басқа бета-лактамдық антибиотиктердегі сияқты) қайтымды нейтропения пайда болуы мүмкін, кейбір емделушілерді емдеу кезінде Кумбстің оң сынамасы байқалды; сондай-ақ гемоглобин және гематокрит деңгейлерінің төмендегені білінеді; өткінші эозинофилия, лейкопения және тромбоцитопения, сондай-ақ гипопротромбинемия байқалады
- бас ауыру, қызба, инъекция кезіндегі ауырсыну, қалтырау, васкулит
- бауыр қызметінің көрсеткіштері - АСТ, АЛТ, сілтілік фосфатаза және билирубин деңгейлерінің қан плазмасында өткінші жоғарылауы
- кейде бұлшықетішілік инъекциядан кейін өткінші ауырсыну байқалады
- Цефпар СВ препаратын (басқа да цефалоспориндер және пенициллиндер сияқты) катетердің жәрдемімен көктамыр ішіне енгізген кезде инфузия жасалған жерде флебит пайда болуы мүмкін
- анафилактикалық реакциялар (шокты қоса есептегенде)
Қолдануға болмайтын жағдайлар
- сульбактамға, цефоперазонға немесе басқа цефалоспориндерге, пенициллинге және бета-лактамдық антибиотиктерге жоғары сезімталдық
- лидокаинға жоғары сезімталдық
- құрамында лидокаин бар жүрекше ішілік блокадаға арналған ерітінді
Дәрілермен өзара әрекеттесуі
Цефоперазона+сульбактам және аминогликозидтер ерітінділерін, олардың арасындағы фармацевтикалық үйлесімсіздікті ескере отырып, тікелей араластырмаған жөн. Егер біріктірілген ем жүргізілсе, онда екі препаратты бөлек катетерді екінші қайтара пайдалана отырып, бірінен кейін бірі жасалатын инфузия жолымен енгізеді, ал алғашқы катетерді препарат дозаларын енгізу арасында барынша жақсылап жуып алады. Күні бойғы енгізу арасындағы аралықтар мүмкіндігінше үлкен болуы тиіс.
Цефоперазонмен емдеу кезінде этанолды қолданған кезде және оны енгізгеннен кейін 5 күнге дейін «қан кернеулермен», тершеңдікпен, бас ауырумен және тахикардиямен сипатталатын дисульфирамға ұқсас әсерлер пайда болуы мүмкін.
Жасанды түрде (ішке немесе парентеральді түрде) қоректену қажет болатын науқастарда құрамында этанолы бар ерітінділерді қолдануға болмайды.
Айрықша нұсқаулар
Бүйректің және бауырдың ауыр бұзылуларында, 3 айлыққа дейінгі балаларға абайлап қолдану керек.
Асқын сезімталдық реакцияларының, соның ішінде өлім-жітімге әкеп соғатын қаупі, сыртартқысында көптеген аллергендерге асқын сезімталдық реакциялары байқалған емделушілерде жоғары болады. Аллергиялық реакциялар пайда болған кезде препаратты тоқтату және талапқа сай ем тағайындау қажет.
Ауыр анафилактикалық реакцияларда адреналинді шұғыл енгізу қажет. Оттегі тағайындайды, көктамыр ішіне глюкокортикостероидтарды енгізеді және тыныс жолдарының өткізгіштігін, интубацияны қоса есептегенде, қамтамасыз етеді.
Дозаларды өзгерту өт жолдарының ауыр обструкциясы жағдайларында, бауырдың ауыр сипатты ауруларында, сондай-ақ көрсетілген жағдайлардың кез келгенімен бірігетін бүйрек қызметінің бұзылуларында қажет етілуі мүмкін.
Бауыр қызметі бұзылған және бүйрек қызметінің қатар жүретін бұзылулары бар науқастарда цефоперазонның сарысулық концентрацияларын бақылау және қажет болған жағдайда оның дозасын түзету қажет. Егер осындай жағдайларда цефоперазонның сарысулық концентрацияларына жүйелі бақылау жасалмаса, онда оның тәуліктік дозасы 2 г-нан аспауы тиіс.
Бенедикт және Феллинг ерітіндісін қолданған кезде несепте глюкозаға жалғаноң реакция байқалуы мүмкін.
Аминогликозидтерді бір мезгілде қолданған кезде бүйрек қызметін бақылау қажет.
Цефоперазонмен емдеген кезде сирек жағдайларда К витаминінің тапшылығы пайда болды. Қауіпті топқа толыққанды тамақтанбайтын, мальабсорбциядан азап шегіп жүрген (мысалы, муковисцидозда) және ұзақ уақыт көктамырішілік жасанды жолмен қоректеніп жүрген емделушілерді жатқызуға болады. Мұндай жағдайларда, сондай-ақ антикоагулянттар қабылдап жүрген науқастарда протромбинді уақытты бақылап отыру және көрсетілімдері бар болса, К витаминін тағайындау қажет.
Ұзақ уақыт емдеген кезде сезімтал емес микроорганизмдердің шамадан тыс өсуі байқалуы мүмкін. Емдеу кезінде науқастарды мұқият бақылау қажет. Ұзақ уақыт емдеген кезде ішкі ағзалар қызметінің көрсеткіштерін, бүйректі, бауырды және қан түзу жүйесін қоса есептегенде, мезгіл-мезгіл бақылап отыру керек. Бұл жаңа туған нәрестелер үшін, әсіресе шала туған нәрестелер, және кішкентай балалар үшін маңызды.
Жүктілік және лактация кезеңі
Жүктілік кезеңінде препаратты ана үшін күтілетін пайдасы ұрыққа тигізетін қауіптен басым болған жағдайда ғана қолданады. Препаратты лактация кезеңінде тағайындау қажет болған кезде емшек емізуді тоқтатқан жөн.
Дәрілік заттың көлікті немесе қауіпті механизмдерді басқару қабілетіне ықпал ету ерекшеліктері
Автомобильді басқарған немесе техниканы пайдаланған кезде сақ болған жөн.
Артық дозаланғанда
Симптомдары: неврологиялық бұзылулар, құрысуларды қоса есептегенде.
Емдеу: симптоматикалық, әсіресе бүйрек қызметі бұзылған науқастарда гемодиализ тиімді.
Шығарылу түрі және қаптамасы
Резеңке тығынмен тығындалған, қорғаныш пластмасса қақпағы бар алюминий қалпақшамен көмкерілген, түссіз шыныдан жасалған, сыйымдылығы 20 мл шыны құтыларда.
1 құты медицинада қолданылуы жөнінде мемлекеттік және орыс тілдеріндегі нұсқаулықпен бірге картон пәшкеге салынған.
Стационарлар үшін: 50 құты медицинада қолданылуы жөнінде мемлекеттік және орыс тілдеріндегі нұсқаулықпен бірге картон қорапқа салынған.
Сақтау шарттары
Құрғақ, жарықтан қорғалған жерде, 25°С-ден аспайтын температурада сақтау керек.
Балалардың қолы жетпейтін жерде сақтау керек!
Сақтау мерзімі
3 жыл
Жарамдылық мерзімі өткеннен кейін пайдалануға болмайды.
Дәріханадан босатылу шарттары
Рецепт арқылы
Өндіруші
Карнатака Антибиотикс & Фармасьютикалс Лимитед
Плот № 14,11 Фазе Пения, Бангалор-560058, Үндістан
Тіркеу куәлігінің иесі
«Русюрофарм» ЖШҚ
119571, Мәскеу, Ленин д-лы, үй 148, кеңсе 137, Ресей Федерациясы
Тұтынушылардан өнім сапасы жөнінде шағымдарды Қазақстан Республикасы аумағында қабылдайтын ұйымның мекенжайы:
«Русюрофарм» ЖШҚ, 119571, Мәскеу қ-сы, Ленин д-лы, үй 148, кеңсе 137, Ресей Федерациясы
тел./факс: 8 (495) 514-06-90, 514-06-91
e-mail: ruseuro@inbox.ru