Цефикар

• русский
• қазақша

• Скачать инструкцию медикамента

Саудалық атауы

Цефикар

Халықаралық патенттелмеген атауы:

Цефтриаксон

Дәрілік түрі

Бұлшықет ішіне және көктамыр ішіне енгізу үшін

ерітінді дайындауға арналған ұнтақ, 1 г

Құрамы

Бір құтының ішінде

белсенді зат - 1197,32 мг цефтриаксон натрий гидраты

(1 г цефтриаксонға баламалы).

Сипаттамасы

Сарғыш түсті ақ кристалды ұнтақ

Фармакотерапиялық тобы

Бактерияға қарсы бета-лактамды басқа да препараттар. Үшінші буын цефалоспориндері. Цефтриаксон.

АТХ КОДЫ J01DD04

Фармакологиялық қасиеттері

Фармакокинетикасы

Цефтриаксон фармакокинетикасы көбінде оның плазмалық альбуминмен байланысу дәрежесімен анықталады. Емдік концентрациялар аралығында бос (байланыспаған) фракция үлесі 5% құрап, 300 мг/л концентрациясында 15% дейін артады. Плазмалық альбумин деңгейі төмендегенде интерстициальді сұйықтықта байланыспаған цефтриаксон үлесі, тиісінше, плазмадағыдан жоғары.

Плазмалық концентрациялар: Ең жоғары плазмалық концентрациясы 500 мг дозаны көктамыр ішіне болюсті енгізгеннен кейін 120 мг/л және 1 г дозада цефтриаксон енгізілгеннен кейін 200 мг/л шамасын құрады; 250 мг/л концентрациясының орташа деңгейіне 30 минут ішінде 2 г инфузиясынан соң жетеді. Бұлшықет ішіне 1% лидокаиндегі 500 мг цефтриаксон енгізілгенде бір сағат ішінде ең жоғары плазмалық концентрациясы 40-70 мг/л құрайды. Бұлшықет ішіне енгізу кезіндегі биожетімділігі – 100%.

Шығарылуы: Цефтриаксон биоөзгеріске ұшырамайды және өзгермеген күйде шығарылады. Енгізілген дозасының 60% шамасы бүйрекпен бөлінеді (көбінесе гломерулярлы сүзіліс жолымен), қалған бөлігі өтпен ішекке шығарылады. Плазмалық клиренсі – 10-22 мл/мин, бүйрек клиренсі – 5-12 мл/мин. Цефтриаксонға тән ерекшелік – оның плазмадан жартылай шығарылу кезеңінің 8 сағатқа жуық салыстырмалы ұзаққа созылуы, бұл оның күніне бір рет енгізілуін емделушілердің көпшілігіне ыңғайлы етеді. Дозасы, енгізу тәсілі немесе қайта енгізілуі жартылай шығарылу кезеңіне елеулі ықпал етпейді.

Ерекше клиникалық жағдайлардағы фармакокинетикасы: тіршіліктің алғашқы аптасында енгізілген дозаның 80%-ы несеппен шығарылады; алғашқы өмір сүрген айда аталған көрсеткіш цефтриаксонның ересектердегі несеппен бөлінген деңгейіне дейін төмендейді (60%).

75 жастан асқан емделушілерде орташа жартылай шығарылу кезеңі, әдетте, жас емделушілердегіден 2-3 есе ұзағырақ. Басқа цефалоспориндердегі сияқты, егде жастағы емделушілерде бүйрек қызметінің төмендеуі жартылай шығарылу кезеңінің ұзаруына әкелуі мүмкін. Цефтриаксонға қатысты бүгінгі таңға дейінгі қолда бар деректер, дегенмен де, осындай жағдайларда дозалау режимін түрлендіруді талап етпейді деп жорамалдауға мүмкіндік береді.

Бүйрек немесе бауыр қызметі бұзылған емделушілерде, қызметтердің қайта бөлінуіне орай, жартылай шығарылу кезеңі болымсыз ұзаруы мүмкін.

Цереброспинальді сұйықтық: цефтриаксон гематоэнцефалдық бөгет арқылы жақсы өтіп, сарысулық концентрациялар деңгейінің 4-7% дейінгі концентрацияларын түзеді.

Фармакодинамикасы

Цефикардың әсер етуші заты цефтриаксон – әсер ету ауқымы кең III буынның бактерицидті цефалоспориндік антибиотигі болып табылады. Цефтриаксон транспептидазаны ацетилдендіріп, сол арқылы жасуша жақтауының беріктігі мен серпінділігін қамтамасыз етуге қажетті пептидогликандардың (оның беріктігін қамтамасыз ететін бактериялардың жасушалық жақтауының құрылымдық мукопептиді) айқаспалы тігісін бұзады. Цефтриаксон грамоң және грамтеріс бактериялардың көпшілігі өндіретін бета-лактамазалар (пенициллиназалар мен цефалоспориназалар) әсеріне жоғары төзімділігімен сипатталады. Цефтриаксонның, бета-лактамазалар өндіретін штаммдарды қоса, микробқа қарсы әсер ету ауқымы кең.

Цефикар мынадай микроорганизмдерге қатысты белсенділік танытады:

Грамтеріс аэробты микроорганизмдер

Acinetobacter spp. (A. baumanii және A. calcoaceticus қоса)

Citrobacter spp. (C.freundii қоса)

Enterobacter spp. (E.aerogenes және E. cloacae қоса)

Escherihia coli

Нaemophylus influenzae (бета-лактамаза өндіретін ампициллинге төзімді штаммдарды қоса)

Haemophylus parainfluenzae

Klebsiella spp. (K. oxytoca және K.pneumoniae қоса)

Moraxella catarrhalis (бета-лактамаза өндіретін штаммдарды қоса)

Morganella morganii

Neisseria gonorheae (пенициллиназа өндіретін және өндірмейтін штаммдарды қоса)

Neisseria meningitidis

Proteus spp. (P.mirabilis және P.vulgaris қоса)

Salmonella spp. (S.typhimurium қоса)

Serratia spp. (Serratia marcescens қоса)

Shigella spp.

Цефтриаксон Pseudomonas aeruginosa көптеген штаммдарына қатысты белсенді.

Микроорганизмдердің көп аталған түрлері басқа антибиотиктерге, мысалы, пенициллиндерге, цефалоспориндер мен аминогликозидтерге көптеген төзімділік иеленеді, бірақ цефтриаксонға сезімтал.

Грамоң аэробты микроорганизмдер

Staphylococcus aureus (пенициллиназа өндіретін штаммдарды қоса)

Коагулаза-негативті штаммдар Staphylococcus spp. (S. epidermidis қоса)

Streptococcus pneumoniae

Streptococcus bovis

В тобы Streptococcus (Streptococcus agalactiae)

A тобы Streptococcus (Streptococcus pyogenes)

Streptococcus viridans

Анаэробты микроорганизмдер:

Bacteroides spp. (өтке сезімтал)

Clostridium species (C. difficile қоспағанда)

Peptostreptococcus spp.

Метициллинге төзімді стафилококктар, цефтриаксонды қоса, цефалоспориндерге төзімді. D тобы Streptococcus, Enterococci штаммдарының көпшілігі, мысалы, Enterococcus faecalis, Listeria monocytogenes, Mycoplasma spp., Stenotrophomonas maltophilia, Ureaplsma urealyticum, Chlamydia spp., Clostridium dificile штаммдарының көпшілігі цефтриаксонға төзімді. β-лактамазаларын түзетін көптеген Bacteroides spp. штаммдары (атап айтқанда, B. fragilis) цефтриаксонға төзімді.

Қолданылуы

Препаратқа сезімтал қоздырғыштар туғызған жұқпалы-қабыну ауруларын емдеуде:

- сепсис

- менингит

- құрсақ қуысының жұқпалары (перитонит, асқазан-ішек жолының, өт шығару жолдарының қабыну аурулары)

- сүйектер мен буындар жұқпаларында

- иммунитеті төмендеп кеткен науқастардағы жұқпаларында

- бүйректің және несеп шығару жолдарының жұқпаларында

- тыныс жолдарының (соның ішінде, пневмония), ЛОР ағзаларының жұқпаларында

- жыныс ағзаларының жұқпаларында, созды қоса

- терінің және жұмсақ тіндердің жұқпаларында

- операциядан кейінгі кезеңдегі жұқпалы асқынулардың алдын алуда

Қолдану тәсілі және дозалары

Ерітіндіні дайындау және оны енгізу

Цефтриаксонды, ерітіндіні дайындау және енгізу жөніндегі келесі нұсқауларға сай, бұлшықетішілік инъекциялар немесе баяу көктамырішілік инъекциялар түрінде енгізуге болады:

Бұлшықетішілік енгізу: бұлшықет ішіне енгізуге арналған ерітіндіні әзірлеу үшін: 1 г Цефикaр ұнтағын 3,5 мл 1% лидокаин гидрохлориді ерітіндісінде ерітеді (тек б/і енгізуге пайдаланады).

Бұлшықет ішіне терең енгізіледі. Бір ғана бұлшықетке 1 г-ден артық енгізу ұсынылмайды. Құрамында лидокаин бар ерітіндіні көктамыр ішіне енгізуге болмайды!

Көктамырішілік енгізу: Көктамыр ішіне енгізуге арналған ерітіндіні әзірлеу үшін: 1 г Цефикар ұнтағын инъекцияға арналған 10 мл суда ерітіп, 2-4 минут ішінде к/і баяу енгізеді.

Цефикар препаратының ерітіндісін, үйлеспеуі мүмкін екеніне орай, құрамында микробқа қарсы басқа препараттар бар ерітінділерге немесе өзге еріткіштерге араластыруға немесе қосуға болмайды.

Дозасы және енгізу тәсілі жұқпа үдерісінің ауырлығына, қоздырғыш сезімталдығына және емделуші ахуалына қарай белгіленеді. Көпшілік жағдайларда цефтриаксон тәулігіне бір рет енгізіледі.

Ересектер мен 12 жастан асқан балалар үшін орташа тәуліктік дозасы тәулігіне 1 рет (немесе тәулігіне 2 рет тең дозаларға бөлінген) 1-2 г құрайды. Ауыр жағдайларда немесе орташа сезімтал бактериялар туғызған жұқпалар кезінде тәуліктік дозасын 4 г дейін арттыруға болады.

Жедел түрдегі асқынбаған соз: бұлшықет ішіне бір рет 250 мг цефтриаксон тағайындалады. Пробенецидті бір мезгілде тағайындау ұсынылмайды.

Емшектегі сәбилер (≥ 28 күн) және 12 жасқа дейінгі балалар үшін тәуліктік дозасы дене салмағына 20-50 мг/кг құрайды, тәулігіне бір рет енгізіледі. Ауыр жұқпалар жағдайында дозаны 80 мг/кг дейін арттыруға (әр 12 сағат сайын 2 енгізуге бөлінген) болады. Жалпы тәуліктік дозасы 2 г-ден аспауы тиіс.

Дене салмағы 50 кг-ден асатын балаларға препарат ересектерге ұсынылған дозада тағайындалады. Препаратты дене салмағына 50 мг/кг-ден көп дозада к/і инфузия түрінде енгізу қажет; енгізу ұзақтығы 30 минуттан кем болмауы тиіс. Емдеу ұзақтығы ауру динамикасына байланысты.

Бактериялық менингитте жаңа туған нәрестелерге (≥ 28 күн) және балаларға препарат тәулігіне 1 рет дене салмағына 100 мг/кг бастапқы дозада тағайындалады. Ең жоғары тәуліктік дозасы 4 г-ден асырылмауы тиіс. Қоздырғыш сәйкестендіріліп, оның цефтриаксонға сезімталдығы анықталғаннан кейін препарат дозасын алынған нәтижелерге сәйкес азайту керек. Емдеу ұзақтығы – 5-тен 7 күнге дейін.

Операциядан кейінгі жұқпалардың алдын алу: операцияға дейін, әдетте, ½ - 2 сағат бұрын 1 г бұлшықет ішіне немесе баяу көктамыр ішіне енгізіледі. Колоректальді хирургияда 2 г бұлшықет ішіне (бөлек дозалармен әртүрлі жерге) немесе баяу көктамыр ішіне анаэробты бактерияларға қатысты белсенді микробқа қарсы дәрімен бірге енгізіледі.

Егде жастағы емделушілер

Егде жастағы емделушілерге арналған дозаларын күніне 2 г дейінгі дозалар аралығында және егер бүйрек немесе бауыр қызметінің бұзылуы болмаған жағдайда түзету қажет емес.

Бүйрек және бауыр қызметінің бұзылуы.

Егер емделушіде бүйректің шығару қызметі төмендеген, бірақ бауыр қызметі бұзылмаған жағдайда цефтриаксон дозасын азайту керек емес. Бүйрек қызметі претерминальді кезеңде бұзылған жағдайда ғана (креатинин клиренсі 10 мл/мин аз) тәуліктік дозасы 2 г-ден асырылмауы тиіс.

Егер емделушіде бауыр қызметі бұзылған, бірақ бүйректің шығару қызметі төмендемеген болса, дозалық режимін түзету қажет емес.

Егер емделушіде бүйректің шығару қызметінің едәуір төмендеуі бауыр жеткіліксіздігімен қатар жүрген жағдайда, цефтриаксонның плазмалық концентрациясына жүйелі мониторинг жасап, қажет болса, дозалау режимін түзету керек.

Диализде жүрген емделушілерде диализ емшарасынан соң цефтриаксон енгізу қажет емес. Цефтриаксон плазмалық концентрациясына жүйелі мониторинг жасаған жөн, алайда дозалау режиміне түзету жүргізгенде осы емделушілердегі бөлінудің едәуір төмендеуін есепке алу керек.

Емдеу ұзақтығы

Емдеу ұзақтығы аурудың динамикасына байланысты. Басқа антибиотиктермен емдеу кезіндегідей, температура қалпына түскеннен немесе бактериялық жұқпа эрадикациясы расталғаннан кейін цефтриаксон енгізу кем дегенде 48-72 сағат бойы жалғасуы тиіс. Емдеу курсының орташа ұзақтығы 4-тен 14 күнге дейін құрайды, асқынулар болғанда емдеу курсын ұзартуға болады. Қоздырғышы Streptococcus pyogenes болып табылатын жұқпаны емдегенде емдеу курсы кемінде 10 күнге созылуы тиіс.

Емдеу ұзақтығы қоздырғышқа байланысты.

Үйлесімділігі мен тұрақтылығы

Үйлеспеуі мүмкін екендіктен цефтриаксонды сұйылту үшін құрамында кальций бар ерітінділер пайдалануға жол берілмейді. Сұйылтуға арналған ерітінділер ретінде Рингер немесе Гартман ерітіндісі сияқты құрамында кальций бар ерітінділерді пайдалануға болмайды. Өзара әрекеттесу нәтижесі ерімейтін қосылымдардың түзілуіне әкелуі мүмкін. Цефикар мен парентеральді қоректендіруге арналған құрамында кальций бар ерітінділерді қоса, көктамыр ішіне енгізуге арналған құрамында кальций бар ерітінділер, соның ішінде инфузиялық енгізуге арналған әртүрлі жүйелерді пайдалану арқылы араластырылмауы немесе жас ерекшелігіне қарамастан емделушілерге бір мезгілде тағайындалмауы тиіс.

Жағымсыз әсері

Даму жиілігінің көрсетілуінде былайша жіктеу пайдаланылған: өте жиі (>1/10), жиі (≥1/100, < /10), жиі емес (≥1/1000, < 1/100), сирек (≥1/10000, <1/1000), өте сирек (< 1/10000), жекелеген жағдайларды қоса.

Жиі ( ≥1/100-ден < /10-ға дейін)

- диарея (кейде жалған жарғақшалы колит симптомы болуы мүмкін, «Сақтандыру» бөлімін қараңыз)

- кандидоз

- жүрек айну, құсу

Жиі емес (≥1/1000-нан < 1/100-ге дейін)

- тромбоцитопения, лейкопения (кейде айқын)

- макуло-папулезді бөртпе немесе экзантема, қышыну, есекжем, жұмсақ тіндердің ісінуі, аллергиялық дерматит

Сирек (≥1/10000-нан <1/1000-ға дейін)

- стоматит, глоссит

- іштің ауыруы

- барлық ауырлық дәрежесіндегі анемия, гемолитикалық анемия, лейкопения, нейтропения, тромбоцитопения, эозинофилия

- протромбин уақытының ұзаруы

- дәрілік қызба, діріл

- анафилактикалық (бронх түйілуі сияқты) немесе анафилактоидтық реакциялар

- бас ауыру, бас айналу

- бауыр ферменттері (АСТ, АЛТ, сілтілі фосфатаза) белсенділігінің транзиторлы жоғарылауы

- глюкозурия, олигурия, гематурия

- сарысулық креатинин деңгейінің көтерілуі

- гениталий микозы

- цефтриаксон бұлшықет ішіне енгізілген жерде енгізгеннен кейін бірден ауырсыну мен жайсыздық сезілуі мүмкін, дегенмен бұл симптомдар, әдетте, жеңіл көтерімді болады және басылады

- цефтриаксон көктамыр ішіне енгізілгеннен кейін флебит дамуының сирек жағдайлары жөнінде хабарламалар бар, алайда, цефтриаксонды көктамыр ішіне баяу (ең кемі, 2-4 минут ішінде) енгізу жөніндегі нұсқау қадағаланғанда флебиттің даму қатерін жоққа тән азайтуға болады.

Өте сирек (<1/10000)

- Кумбстің оң сынамасы

- коагуляция бұзылуы, агранулоцитоз

- жалған жарғақшалы колит

- ауыр тері реакцияларының жекелеген жағдайлары (мультиформалы эритема, Стивенс-Джонсон синдромы, Лайелл синдромы немесе уытты эпидермалық некролиз)

- осы асқынудың дамуы мен цефтриаксон енгізу арасындағы себеп-салдарлы байланыс анықталмаса да, панкреатит дамуы жөнінде жекелеген хабарламалар бар; несептегі кальций цефтриаксоны преципитаттарының қайтымды түзілуі (балаларда, жас емделушілерде және иммобилизацияланған емделушілерде қатері жоғары).

- анурияның бірнеше жағдайлары және преципитаттар түзілуі себебінен бүйрек қызметінің бұзылуы анықталған.

Қолдануға болмайтын жағдайлар

- жүктіліктің I триместрі

- сыртартқыдағы цефалоспоринді антибиотиктерге жоғары сезімталдық

- сыртартқыдағы шұғыл типті аса жоғары сезімталдық реакциялары және/немесе пенициллиндерге және басқа да бета-лактамды антибиотиктерге аса жоғары сезімталдықтың кез келген ауыр реакциялары

- жаңа туған нәрестелер (≤ 28 күн)

- жаңа туған және шала туған нәрестелердегі гипербилирубинемия (цефтриаксон, осындай емделушілердегі билирубиндік энцефалопатия қатерін арттырып, билирубинді сарысулық альбуминмен байланыстан ығыстырып шығаруы мүмкін)

- сарысулық альбумин мөлшері төмендеп кеткен, ацидозы бар немесе билирубиннің сарысулық альбуминмен байланысуы бұзылған балалар.

Жоғарыда аталғаннан басқа, бұлшықет ішіне енгізуге арналған лидокаиндегі Цефикар ерітіндісі қарсы көрсетілімді:

- көктамыр ішіне енгізу үшін

- балалар және жасөспірімдер жасында

- сыртартқысында лидокаинге аса жоғары сезімталдығы бар емделушілерге

- синустық түйін әлсіздігі, электростимуляторсыз жүрек блокадасы бар емделушілерге

- жүрек жеткіліксіздігі ауыр емделушілерге

Дәрілермен өзара әрекеттесуі

Аминогликозидтік антибиотиктер және диуретиктер: Цефтриаксон мен диуретиктер бір мезгілде тағайындалғанда бүйрек қызметінің нашарлауы байқалмаған. Цефтриаксонмен біріктірілген антибиотиктермен емдеу кезінде аминогликозидтік антибиотиктердің нефроуытты әсері білінбеген.

Алкоголь: Цефтриаксон молекуласында белгілі бір цефалоспориндермен емдеу аясында алкоголь қабылдағанда дисульфирам тәріздес әсерді жүзеге асыратын N-метилтио-тетразоль алмастырғышы жоқ.

Антибиотиктер: Іn vitro зерттеулерінде хлорамфеникол мен цефтриаксон біріктірілгенде антагонистік әсері байқалды.

Антикоагулянттар: Цефтриаксонда N-метилтиотриазиндік бүйірлі тізбек болуы гипопротромбинемия туғызатын әлеуетті қабілет болуын кепілді етеді («Жағымсыз реакциялар» бөлімін қараңыз).

Зертханалық тестілер нәтижелерінің бұрмалануы:

Цефтриаксонмен ем алатын емделушілерде жалған-оң Кумбс реакциясының сирек жағдайлары анықталған. Цефтриаксонның осы қасиеті айқаспалы үйлесімділігіне қан талдауын жасауға кедергі келтіруі мүмкін.

Емделушілерде цефтриаксонмен емдеу аясында, басқа антибиотиктер сияқты, галактоземияға жасалатын тестінің жалған-оң нәтижесі анықталуы мүмкін. Осыған ұқсас, несептегі глюкозаны анықтаудың, мысалы, мысты қалпына келтіруге негізделген (Бенедикт, Фелинг, Клинитест реактивтерін пайдаланылатын) басқа да ферментативті емес әдістері де жалған-оң нәтиже беруі мүмкін. Осыған орай, несептегі глюкоза мөлшеріне тест өткізілгенде тек энзиматикалық әдістерді пайдаланған дұрыс.

Фармацевтикалық үйлеспеушіліктер

Цефтриаксон ерітінділері, 1% лидокаин ерітіндісін қоспағанда, өзге дәрілік заттардың ерітінділерімен араластырылмауы немесе қосылмауы тиіс және тек бұлшықетішілік инъекцияларға арналған. Цефтриаксон Хартман және Рингер ерітіндісі сияқты, құрамында кальций бар ерітінділермен үйлесімсіз. Цефтриаксон ванкомицинмен, флуконазолмен, аминогликозидтермен, пентамидинмен, амсакринмен және лабеталолмен фармацевтикалық тұрғыда үйлеспейді. Оларды бірізділікпен тағайындау қажет болса, енгізулер арасында инфузиялық жүйені қандай да бір үйлесімді ерітіндімен мұқият жуып-шаю ұсынылады.

Айрықша нұсқаулар

Аса жоғары сезімталдық реакциялары

Цефикармен емдеу басталғанша емделушінің сыртартқысын цефтриаксонға, өзге цефалоспориндерге, пенициллиндерге немесе басқа да бета-лактамды антибиотиктерге аса жоғары сезімталдық реакциялары дамыған жағдайлар жөніндегі мәліметтер болуына қатысты (әлде олардың дамуы мүмкін екеніне күдіктер болса) тиянақты бағалау керек. Цефикар сыртартқысында цефалоспориндердің қандай да біріне аса жоғары сезімталдық реакциялары бар емделушілерге қарсы көрсетілімді. Цефикар емделушілерге, олардың сыртартқысында шұғыл типті аса жоғары сезімталдық реакциялары және/немесе пенициллиндерге және/немесе басқа да бета-лактамды антибиотиктерге кез келген ауыр реакциялары болғанда, қарсы көрсетілімді («Қолдануға болмайтын жағдайлар» бөлімін қараңыз).

Цефтриаксон емделушілерге, егер олардың сыртартқысында пенициллиндерге немесе басқа да бета-лактамды антибиотиктерге аса жоғары сезімталдық реакцияларының басқа типтерінің дамуы жөнінде мәліметтер болса, аса сақтықпен тағайындалуы тиіс. Аталған сақтандыру шаралары айқаспалы аллергиялық реакцияның даму қаупіне орай жүзеге асырылады. Цефикар тағайындағанда анафилактикалық шоктың даму қатерін ескеру керек. Анафилактикалық шок дамыған жағдайда оны басатын шұғыл шаралар қабылдап, Цефикар енгізуді дереу тоқтату керек.

Құрамында кальций бар ерітінділермен өзара әрекеттесуі.

Көктамыр ішіне енгізуге арналған цефтриаксон ерітінділерін сұйылтқанда еріткіштер ретінде Рингер ерітіндісі мен Гартман ерітіндісі сияқты құрамында кальций бар ерітінділер пайдаланылмауы тиіс, өйткені кальций цефтриаксоны шөгіндісі түзілуі мүмкін. Шала туылған, мерзіміне жетіп туған нәрестелерде де өкпе және бүйрек тіндерінде өліммен аяқталған кальций цефтриаксонының ерімеген тұздары жиналып қалған жағдайлар сипатталды. Кейбір жағдайларда енгізуге арналған инфузиялық жүйелер және цефтриаксон мен құрамында кальций бар ерітінділердің енгізілу уақыты әртүрлі болды. Цефтриаксон ерітіндісін және құрамында кальций бар ерітінділерді көктамыр ішіне енгізуге арналған бір жүйені пайдаланумен енгізген жағдайда шөгінді түзілуі мүмкін. Цефтриаксон, сонымен бірге, құрамында кальций бар ерітінділерді ұзақ уақыт енгізгенде парентеральді қоректендіру сияқты Y-тәрізді коннектор пайдаланумен енгізілмеуі тиіс. Алайда, енгізулер арасында инфузиялық жүйені үйлесімді ерітінділермен мұқият жуып-шаю шартымен, жаңа туған нәрестелерді қоспағанда, барлық емделушілерге цефтриаксон мен құрамында кальций бар ерітінділер бірізді (бірінен соң бірі) тағайындалуы мүмкін. Ересек емделушілердің плазмасы мен жаңа туған нәрестелер кіндігінен алынған плазма пайдаланылатын in vitro зерттеулерінде жаңа туған нәрестелерде кальций цефтриксоны ерімейтін шөгіндісінің түзілу қаупі жоғары екені айғақталды.

Жалған жарғақшалы колит

Цефтриаксонмен ем жүргізілгенде зеңді, ашытқылы немесе антибиотикке төзімді микроорганизмдер туғызған өзге асқын жұқпаның дамуы мүмкін. Цефтриаксонмен емдеу аясында Clostridium difficile персистирленуі нәтижесінде жалған жарғақшалы колит дамыған сирек жағдайлар хабарланды. Осыған орай, цефтриаксонмен емдеу курсы кезінде немесе ол аяқталғаннан кейін емделушіде ауыр диарея пайда болғанда осы асқынудың дамуы мүмкін екенін ескеру керек.

Гемолитикалық анемия

Цефтриаксон қамтылатын цефалоспориндермен емдеу аясында емделушілерде иммунологиялық сипаттағы гемолитикалық анемия дамыған жағдайлар анықталған. Ересек емделушілерде және балаларда, өліммен аяқталған жағдайларды қоса, гемолитикалық анемияның ауыр жағдайлары сипатталған. Егер емделушіде цефтриаксон тағайындау аясында анемия дамыса, оның дамуындағы цефлоспоринді антибиотик рөлінің мүмкіндігін бағалап, анемияның шығу тегі анықталғанша оны енгізуді тоқтату керек.

Дәлелденген немесе негізді күдік тудыратын бактериялық жұқпа болмағанда Цефикар тағайындау, сондай-ақ алдын алу мақсатында тағайындау емделуші үшін қауіп-пайданың қолайлы арақатынасы болмайды және антибиотикке төзімді бактериялардың даму қаупін арттырады.

Іn vivo және in vitro зерттеулерінде цефтриаксонның, кейбір басқа цефалоспориндер сияқты, билирубинді сарысулық альбуминмен байланысу орынынан ығыстыруға қабілетті екені көрсетілген. Жаңа туған нәрестелерде алынған клиникалық деректерде осы мәліметтер расталады. Осыған орай, цефтриаксон сарысулық альбумин мөлшері төмендеген, ацидозы бар немесе билирубиннің сарысулық альбуминмен байланысуы бұзылған жаңа туған нәрестелерге немесе емшек жасындағы сәбилерге, сондай-ақ шала туылғандарға тағайындалмауы тиіс.

Цефтриаксон өт қабында шөгуі, артынан УЗИ зерттеуінде қабырғаның қараюы түрінде анықталуы мүмкін. Аталған құбылыс кез келген жастағы емделушілерде болуы мүмкін, алайда оның дамуына жаңа туған нәрестелер және цефтриаксон кг дене салмағына мг есебінен шығарылатын үлкен дозада тағайындалатын жасы кіші балалар бейімдеу болып келеді. Балаларға, өт қабындағы преципитацияның жоғары қатеріне орай, цефтриаксонды 80 мг/кг-ден асып кететін дозада тағайындамау керек. Балаларға цефтриаксон тағайындаудың өт қабында тас түзілуіне немесе жедел холецистит дамуына ықпал еткеніне дәлелдер жоқ. Осы құбылыс өткінші және қайтымды сипатта болатындықтан, оны түзетуге қатысты емдік шаралар қажет емес.

Емделушіде бүйрек немесе бауыр қызметінің күрделі бұзылулары бар болса, Цефикармен ем жүргізуге және дозалауға қатысты айрықша нұсқауларды жетекшілікке алған жөн («Қолдану тәсілі және дозалары» бөлімін қараңыз).

Цефалоспориндер класына эритроциттер жарғақшалары беткейінде сіңірілу және дәрілік затқа антиденелермен өзара әрекеттесу қабілеті тән, бұл Кумбс тестісіне болатын оң реакцияға және өте сирек – гемолитикалық анемияның дамуына әкеледі. Бұл қабілет цефалоспориндермен айқаспалы реакцияға жол ашуы мүмкін.

Бүкіл ем барысында шеткергі қан көрінісін (гемоглобин, эритроциттер, лейкоциттер және тромбоциттер, протромбин уақыты) ұдайы бақылап отыру керек.

Цефтриаксонмен емдеу аясында протромбин уақыты өзгерген сирек жағдайлар жөнінде хабарламалар бар. К витаминінің синтезі бұзылған немесе оның мөлшері төмен (мысалы, созылмалы гепатит немесе жеткіліксіз тамақтану) емделушілерде Цефикармен емдеу барысында протромбин уақытын бақылау қажет болуы мүмкін. Егер емдеуге дейін немесе ем кезінде протромбин уақытының ұзаруы болса, К витаминін (апта сайын 10 мг) тағайындау талап етілуі мүмкін.

Цефтриаксон алған емделушілерде панкреатит дамыған сирек жағдайлар хабарланды. Аталған жағдайлардағы панкреатиттің себебі өттің тарылуы болуы мүмкін. Емделушілердің көпшілігінде жалпы парентеральді қоректендіру, белгілі бір қатарлас ауыр патология түріндегі өттің литогенді заттарының шөгуі және холестаздың дамуы т.б. қауіп факторлары болды. Алайда, цефтриаксонның осы асқынудың дамуына түрткі болатын әлде ықпал ететін рөлі жоққа шығарылмайды.

Натрий бақыланатын емдәмде жүрген емделушілерге натрий цефтриаксонының әр грамында 3,6 ммоль натрий мөлшері барын есепке алу керек.

Жүктілік кезінде және лактация кезеңінде қолдану

Жүктілік: Цефтриаксон плаценталық бөгет арқылы өтеді. Жануарларға жасалған зерттеулерде цефтриаксон жайсыз әсерін тигізбеген және ұрық дамуының бұзылуын туындатпаған, алайда оны жүкті әйелдерде қолдану қауіпсіздігі дәлелденбеген. Осыған орай, цефтриаксонды оны тағайындауға толық көрсетілімдер болған жағдайларда ғана қолдануға болады.

Лактация кезеңі: Цефтриаксон аздаған мөлшерде сүтке бөлінеді, әдетте, оны бала емізу кезеңінде тағайындауға болады. Бұл орайда, дегенмен, сәби ахуалын мұқият қадағалау ұсынылады.

Көлік құралын немесе қауіптілігі зор механизмдерді басқару қабілетіне әсер ету ерекшеліктері

Цефтриаксон тағайындау бас айналуымен қатар жүруі мүмкін екендіктен, бұл емделушінің автомобиль көлігін жүргізу және қауіпті құрал-жабдықтармен және механизмдермен жұмыс істеу қабілетіне ықпал етуі мүмкін.

Артық дозалануы

Симптомдары: жағымсыз әсерлердің күшеюі.

Емі: белгісіне қарай емдеу. Арнайы у қайтарғысы жоқ. Гемодиализ және перитонеальді диализ цефтриаксонның сарысулық концентрациясын төмендетпейді және артық дозалану кезінде пайдаланылмайды.

Шығарылу түрі және қаптамасы

1 г препараттан резеңке тығындармен тұмшалана тығындалған, алюминий қалпақшалармен қаусырылған және сақтандырғыш пластмасса қақпақпен жабылған сыйымдылығы 10 мл құтыларға салады.

Құтыға заттаңбалық қағаздан жасалған заттаңба жапсырылады.

1 құтыдан қолданылуы жөніндегі мемлекеттік және орыс тілдеріндегі нұсқаулықпен бірге картон пәшкеге салынады.

Сақтау шарттары

Жарықтан қорғалған жерде, +25С-ден аспайтын температурада сақтау керек. Дайындалған Цефикар ерітіндісі бөлме температурасында 24 сағат бойы және тоңазытқышта 5С-ден төмен сақтағанда 3 күн сақталады.

Балалардың қолы жетпейтін жерде сақтау керек!

Сақтау мерзімі

3 жыл

Қаптамасында көрсетілген жарамдылық мерзімі өткеннен кейін пайдалануға болмайды.

Дәріханалардан босатылу шарттары

Рецепт арқылы

Өндіруші

Бирзейт Фармацевтикалық компаниясы (БПК), Палестина

Рамалла, Индустриялық аймақ

Тел.: + 97222900682 

Тіркеу куәлігінің иесі

Фармакар Инт. Ко./Герман-Палестин біріккен кәсіпорыны, Палестина

Қазақстан Республикасы аумағында тұтынушылардан өнім сапасына қатысты шағымдар қабылдайтын ұйымның мекенжайы: «El company» ЖШС, Алматы қ., Масаншы к-сі 98 А, 41 кеңсе, тел: 292-26-30, 292-26-65, факс: 292-26-37; www.elcompany.kz