Хантераза

• русский
• қазақша

• Скачать инструкцию медикамента

Саудалық атауы

Хантераза

Халықаралық патенттелмеген атауы

Идурсульфаза бета

Дәрілік түрі

Инфузия үшін ерітінді дайындауға арналған концентрат, 2 мг/мл

Құрамы

Бір құтының ішінде:

белсенді зат – 6 мг идурсульфаза бета,

қосымша заттар: натрий дигидрофосфат моногидраты, натрий дигидрофосфат гептагидраты, натрий хлориді, полисорбат 20, инъекцияға арналған су

Сипаттамасы

Мөлдір немесе сәл бозаңданатын түссіз ерітінді.

Фармакотерапиялық тобы

Ас қорыту жолы және зат алмасу. АІЖ ауруларын және зат алмасу бұзылуын емдеуге арналған басқа да препараттар. Ферментті препараттар. Идурсульфаза бета.

ATX коды А16АВ16

Фармакологиялық қасиеттері

Фармакокинетикасы

Хантеразаның фармакокинетикалық параметрлері туралы ақпарат Хантер синдромы бар пациенттерді клиникалық зерттеу барысында алынды.

Талдау нәтижелері бойынша Идурсульфаза бетаның сарысулық концентрациясының уақытқа тәуелділік қисығы болжамды екі фазалы шығарылу қисығын көрсетті. Жартылай шығарылуының болжамды ақырғы кезеңі (t1/2, z) 7,3-9,1 сағатты құрады. Хантеразаны 0,5 мг/кг дозада алған пациенттер тобында Сmax 1024,9 нг/мл, ал AUClast - 2724 нг.сағ/мл құрады.

Хантеразаны 1,0 мг/кг дозада алған пациенттер тобында, Сmax 2045,2 нг/мл, ал AUClast - 7804 нг.сағ/мл құрады.

0,5-1,0 мг/кг дозалар диапазоны шегінде Сmax және AUClast экспозицияның ұлғаю тенденциясын көрсетті, ал бұл кезде жартылай шығарылуының болжамды ақырғы кезеңі (t1/2, z) елеулі айырмашылықтарды көрсеткен жоқ.

Гликопротеиндердің деградациясы ақуыз гидролизі арқылы жүріп, аздаған пептидтік қалдықтар және амин қышқылдарын түзеді, сондықтан бүйрек немесе бауыр функциясының бұзылуы идурсульфаза бетаның фармакокинетикалық параметрлеріне ықпалын тигізбейді.

Хантер синдромының пайда болуына себепкер IDS геніндегі мутациялар нәсілге және географиялық аймаққа байланыссыз жүзеге асады, сондықтан аурудың сипаты мен сиректігіне орай жыныс, нәсіл, өсу, дене салмағы, жасы сияқты ішкі факторлар идурсульфаза бетаның фармакокинетикалық параметрлеріне елеулі ықпал ете алмайды. Сыртқы факторлар да (мысалы, дәрілік өзара әрекеттесу, диета, шылым шегу немесе алкоголь тұтыну) вена ішіне енгізілетін ақуыз препараттарының экспозициясына ықпал етпейді деп танылған.

Фармакодинамикасы

II типті мукополисахаридоз (МПС II) немесе Хантер синдромы пациенттің организміндегі лизосомальді фермент идуронат-2-сульфатазаның жеткіліксіздігінен туындаған Х-ілініскен рецессивті сирек тұқым қуалайтын ауру болып табылады. Идуронат-2-сульфаза гликозаминогликандар (ГАГ) – гепаран- және дерматансульфаттың катаболизмінің бірінші сатысында қатысады. Идуронат-2-сульфатаза белсенділігінің жеткіліксіздігі нәтижесінде гликозаминогликандардың (ГАГ) – гепаран- және дерматансульфаттың іс жүзінде әртүрлі тіндер мен ағзалардың барлық жасушаларының лизосомаларында жинақталуы туындайды, бұл жасушалардың шамадан тыс қанығуына, органомегалияға, тіндердің бүлінуіне және ағзалар функциясының бұзылуына әкеледі.

Идурсульфаза бета лизосомалық фермент идуронат-2-сульфатазаның тазартылған түрі – рекомбинантты адам идуронат-2-сульфатазасы (раИДС) болып табылады. раИДС қытай атжалманы аналық безінің жасушалар желісін (CHO) (жасуша - қожайын: CHO DG44 / экспрессия векторы: ID pJK dhfr Or2) пайдаланып рекомбинантты ДНҚ технологиясы бойынша өндіріледі.

Идурсальфаза бета – бұл 525 амин қышқылдары бар молекулалық салмағы 78 КДа жуық гликопротеин, оның құрамында аспарагин-байланысқан гликозилденудің кешенді олигосахаридтік құрылымдар және екі дисульфидтік байланыстар орналасқан сегіз аймағы бар. Идурсульфаза бетаның ферментативтік белсенділігі спецификалық цистеиннің формилглицинге посттрансляциялық өзгеруіне байланысты.

Хантер синдромы бар пациенттерге идурсульфаза бетаны вена ішіне енгізу жасушалық лизосомаларға экзогендік ферменттердің түсуін қамтамасыз етеді. Олигосахаридтік тізбектердегі манноза-6-фосфаттық (М6Ф) қалдықтар ферментке жасуша бетіндегі М6Ф-рецепторлармен спецификалық тұрғыдан байланысуға мүмкіндік береді, бұл жасуша ішіндегі лизосомаларға бағытталған ферменттің қармалуына, және жинақталған ГАГ кейіннен болатын катаболизміне әкеледі.

Бұл дәрілік зат "ерекше жағдайлар" ережелеріне сәйкес тіркелді. Бұл, аурудың сиректігіне байланысты, осы дәрілік зат жөнінде толық ақпарат алу мүмкіндігі болмағанын көрсетеді.

Қолданылуы

Хантераза Хантер синдромы (II типті мукополисахаридоз, МПС II) бар науқастарды ұзақ емдеу үшін қолданылады.

Қолдану тәсілі және дозалары

Препарат вена ішіне инфузиялық енгізуге арналған («Инфузияға арналған ерітіндіні дайындау» тарауын қараңыз).

Хантераза препаратын енгізуді дәрігердің немесе II типті мукополисахаридозы немесе тұқым қуалаған метаболизмдік бұзылулары бар науқастарды емдеу тәжірибесі бар медициналық қызметкердің бақылауымен жүргізу қажет.

Хантераза препаратын аптасына бір рет дене салмағының килограмына 0,5 мг дозада вена ішіне 1-ден 3 сағатқа дейінгі кезең ішінде енгізген жөн. Пациенттерге инфузия аясындағы қолайсыз реакцияларға байланысты инфузия уақытын ұзарту қажет болуы, алайда инфузия ұзақтығы 8 сағаттан аспауы тиіс. Инфузияның бастапқы жылдамдығы алғашқы 15 минут ішінде 8 мл/сағ құрауы тиіс. Егер инфузияны пациент қанағаттанарлықтай көтере алса, онда препаратты енгізу жылдамдығын әр 15 минут сайын 8 мл/сағ арттырып, препаратты енгізу аяқталғанша – 40 мл/сағ дейін жеткізуге болады. Инфузия жылдамдығы 100 мл/сағ аспауы тиіс. Егер инфузия аясындағы қолайсыз реакциялар туындаса, онда, клиникалық біліністеріне сәйкес, инфузия жылдамдығын азайтуға және/немесе тоқтата тұруға немесе тоқтатуға болады. Хантераза препаратын басқа препараттармен инфузияға арналған ортақ катетер арқылы бір мезгілде енгізбеу керек.

Балалар

Балалар мен жасөспірімдерге препаратты дене салмағына 0,5 мг/кг дозада аптасына бір рет енгізген жөн.

Инфузияға арналған ерітіндіні дайындау

Хантераза препараты ішінде 2 мг/мл идурсульфаза бета бар құтыдағы инфузия үшін ерітінді дайындауға арналған концентрат болып табылады.

Хантераза препаратының құтылары ішінде микробқа қарсы консерванттар жоқ және бір рет қана пайдалануға арналған.

Вена ішіне енгізер алдында құтының ішіндегісін асептика ережелерін сақтай отырып, инъекцияға арналған 0,9% натрий хлориді ерітіндісімен төмендегідей сұйылту қажет:

1. Пациентке 1 рет енгізуге қажетті Хантераза препаратының құтылары санын анықтау керек, оны пациенттің дене салмағын және ұсынылатын дозасын (дене салмағына 0,5 мг/кг) ескере отырып сұйылту қажет.

Пациенттің салмағы (кг) × 0,5 мг/кг идурсульфаза бета ÷ 2 мг/мл = Хантераза препаратының жалпы мөлшері (мл).

Хантераза препаратының жалпы мөлшері (мл) ÷ 3 мл/құты = Хантераза препараты құтыларының жалпы саны.

Хантераза препараты құтыларының алынған жалпы санын бүтін мәнге дейін дөңгелектеу қажет.

2. Ерітінді түссіз мөлдір немесе аздап бозаңданатын, көзге көрінетін бөлшектерсіз екеніне көз жеткізу үшін көзбен тексеріп қарау керек.

3. Хантераза препаратының есептелген көлемін құтылардың сәйкес санынан шығарып алып, инъекцияға арналған 100 мл 0,9% натрий хлориді ерітіндісінде асептика ережелерін сақтай отырып сұйылту керек. Тесіктерінің диаметрі 0,2 микрометр болатын сүзгімен жабдықталған, инфузияға арналған жүйені пайдалану ұсынылады. Инфузияға арналған ерітіндіні сұйылтқаннан кейін инфузияға арналған жүйені немесе контейнерді сілкімей, абайлап қозғау керек.

4. Микробиологиялық қауіпсіздік тұрғысынан, сұйылтудан кейін инфузияға арналған қолдануға дайын ерітіндіні дереу пайдалану керек. Дереу пайдалану мүмкін болмаған жағдайда, сақтау уақыты мен шарты үшін жауапкершілік тұтынушыға жүктеледі, және мұндай жағдайда инфузияға арналған сұйылтылған ерітіндіні тоңазытқышта 2-ден 8 оС дейінгі температурада 48 сағаттан асырмай сақтауға жол беріледі, сұйылтылған ерітіндіні бөлме температурасында сақтаған жағдайда ол 8 сағаттың ішінде пайдаланылуы тиіс.

Жағымсыз әсерлері

Хантераза препаратын клиникалық зерттеулер барысында байқалған жағымсыз реакциялар ауырлық дәрежесі бойынша барлық жағдайларда дерлік жеңіл немесе орташа болды.

Препаратты енгізумен байланысты ең жиі реакциялар тері реакциялары болды (есекжем, бөртпе және қышыну). Барлық жағымсыз реакциялар елеусіз болды әрі инфузия жылдамдығын реттеу және тиісті дәрілік ем қолдану жолымен барынша азайтылды.

Препаратты қолдану аясында туындаған, төменде келтірілген ықтимал жағымсыз реакциялар кездесу жиілігіне сәйкес ағзалар жүйелері бойынша берілген: өте жиі (>1/10), жиі (≥1/100-<1/10).

Инфекциялық және паразитарлық аурулар:

өте жиі – жоғарғы тыныс жолдарының инфекциялары, бронхит, синусит, ортаңғы құлақ отиті, фаринготонзилит;

жиі – көз инфекциясы (теріскен), пневмония*.

Тері және теріасты тіндері тарапынан бұзылулар:

өте жиі – есекжем, тері қышынуы, дерматит, дененің зеңдік зақымдануы,

жиі – эритематозды бөртпе, атопиялық дерматит, экзема, дақтар, табанның зеңдік зақымдануы.

Тыныс алу жүйесі, кеуде қуысы және көкірек ортасы ағзалары тарапынан бұзылулар:

өте жиі – жөтел, ринорея, аллергиялық ринит;

жиі – ринит, бронх демікпесі, эпистаксис, өнімді жөтел*, ұйқы кезінде тыныс алу қимылдарының тоқтауы.

Асқазан-ішек жолы тарапынан бұзылулар:

өте жиі – диарея, гастроэнтерит, энтерит;

жиі – жүрек айну, құсу, іш қату, артқы өтістің сызаты, аноректальді аймақтың зақымдануы, диспепсия, стоматит, тіс ауруы.

Жалпы бұзылыстар және препаратты енгізген жердегі бұзылулар:

өте жиі – қызба;

жиі – жалпы жағдайдың нашарлауы.

Қаңқа-бұлшықет және дәнекер тіні тарапынан бұзылулар:

жиі – бұлшықет түйілуі, миалгия.

Көру ағзасы тарапынан бұзылулар:

жиі – конъюнктивит, құрғақ кератоконъюнктивит*.

Жарақаттар, улану және манипуляция асқынулары:

жиі –инфузия аймағының домбығуы.

Жыныс ағзалары және сүт бездері тарапынан бұзылулар:

жиі – баланопостит*.

* 1,0 мг/кг Хантераза препараты тобында клиникалық зерттеулерде тіркелген жағымсыз реакциялар.

Анафилаксиялық реакциялардың пайда болу мүмкіндігін жоққа шығаруға болмайды («Айрықша нұсқаулар» бөлімін қараңыз).

Айрықша нұсқаулар

Иммуногенділік

Барлық пациенттерде клиникалық зерттеулер барысында Хантераза препаратын енгізгеннен кейін бақылау кезеңі ішінде антиденелер анықталған жоқ.

Балаларда

Балаларда байқалатын жағымсыз дәрілік реакциялардың, сипаты және кездесу жиілігі бойынша, ересек пациенттердегі сәйкес реакциялардан айырмашылықтары болған жоқ.

Болжамды жағымсыз реакциялар жөнінде хабарлау

Препараттың болжамды жағымсыз реакциялары туралы мәліметтер ұсыну дәрілік заттың пайда/қауіп арақатынасына үздіксіз мониторинг жүргізуге мүмкіндік беретін аса маңызды сәт болып табылады. Медицина қызметкерлері нұсқаулықтың соңында көрсетілген байланыс деректері бойынша, сондай-ақ ұлттық ақпарат жинау жүйесі арқылы кез келген болжамды жағымсыз реакциялар туралы ақпарат ұсынуы керек. 

Қолдануға болмайтын жағдайлар

Симптомдар тиісті ем жүргізген кезде қайтпаған жағдайларда, әсер етуші затқа немесе қосымша заттардың кез келгеніне клиникалық айқын немесе пациенттердің өміріне қауіп төндіретін жоғары сезімталдық.

Жүктілік.

Бауыр және бүйрек функциясының бұзылуы бар науқастарға қолдану

Препаратты бауыр және бүйрек функциясының бұзылуы бар науқастарға клиникалық қолдану тәжірибесі жоқ.

Ересек науқастарға қолдану

Препаратты 35 жастан асқан пациенттерге қолдану тәжірибесі жоқ.

Балаларға қолдану

38 айға дейінгі балаларда препаратты қолдану тәжірибесі жоқ.

Сақтықпен

Препаратты тыныс жолдарының қатар жүретін ауыр аурулары бар пациенттерге сақтықпен тағайындау керек.

Дәрілермен өзара әрекеттесуі

Хантераза препаратының басқа дәрілік препараттармен өзара әрекеттесуіне зерттеулер жүргізілген жоқ.

Айрықша нұсқаулар

Хантераза орфандық препарат болып табылады, мәліметтері жеткілікті емес және зерттеу бағдарламасын белгіленген мерзімде орындауға міндеттеледі, оның нәтижелері "пайда-қауіп" арақатынасына қайта баға беруге, орфандық препаратты қолданған кезде пайда болған кез келген жағымсыз әсерлер және қолға алынған шаралар туралы мемлекеттік органға дереу мәлімдеуге негіз болады.

Препаратты инфузиялық енгізуге байланысты реакциялар

Идурсульфаза бетаны қабылдаған пациенттерде препаратты инфузиялық енгізумен байланысты, тыныс алудың бұзылуы, гипоксия, гипотония, апоплексия соғуы және (немесе) ангионевроздық ісіну сияқты реакциялар дамуы мүмкін. Жағымсыз реакцияларды препаратты енгізу жылдамдығын азайту, инфузияны тоқтату немесе антигистаминдік дәрілерді, глюкокортикостероидтарды енгізу жолымен басуға болады.

Хантеразаны тыныс жолдарының қатар жүрген ауыр сырқаттары бар пациенттерге енгізгенде ерекше сақтық шаралары қажет. Препаратты инфузиялық түрде енгізу және клиникалық жағдайға бақылау жүргізу үшін аурухананың мамандандырылған бөліміне пациенттерді жатқызу қажет болуы мүмкін. Осы пациенттерде антигистаминдік препараттарды және басқа да седативті дәрілерді пайдалануды шектеген немесе мұқият бақылаған жөн. Кейбір жағдайларда тыныс жолдарында оң қысымды демеу қажет етілуі мүмкін.

Егер пациентте температураның жоғарылауымен жедел респираторлық ауру дамыса, Хантераза препаратын енгізуді кейінге қалдыру керек. Орнын басатын оттегімен емдеу пайдаланылатын науқастар үшін препаратты енгізу кезінде жағымсыз реакциялар дамыған жағдайда оттегінің қоры болуы қажет.

Анафилаксиялық реакциялар

Кейбір пациенттерде өмірге қауіп төндіретін анафилаксиялық реакциялар пайда болуы мүмкін. Анафилаксиялық реакциялардың кейінгі белгілері алғашқы реакциядан кейін 24 сағат өткен соң да байқалуы мүмкін. Анафилаксиялық реакция дамыған кезде инфузияны дереу тоқтатып, тиісті ем және бақылау жүргізу керек. Шұғыл емнің ағымдағы медициналық стандарттарын ұстанған жөн. Ауыр немесе рефрактерлі анафилаксиялық реакциялары бар пациенттерге ұзақ уақыт клиникалық бақылау қажет болуы мүмкін. Бұрын Хантераза препаратын енгізуге анафилаксиялық реакциялар байқалған пациенттерге қайтадан препаратты сақтықпен тағайындаған жөн, препаратты енгізу кезеңінде арнайы оқып үйренген медициналық қызметкердің қатысуы және реанимациялық емшараларды жүргізу үшін қажетті жабдықтардың болуы қажет. Пациенттің жағдайы бақылауға келмеген жағдайда, өмір үшін ауыр және қауіпті аса жоғары сезімталдық реакциялары препаратты қайталап қолдану үшін қарсы көррсетілім болып табылады (“Қолдануға болмайтын жағдайлар” бөлімін қараңыз).

Препаратты бірінші қабылдау кезіндегі әсер ету ерекшеліктері

Препаратты бірінші қабылдау кезіндегі әсер ету ерекшеліктері бақыланған жоқ.

Инфузияға арналған сұйылтылған ерітінді

Хантераза препаратының әрбір құтысы бір рет қолдануға ғана арналған.

Пайдаланғаннан кейін инфузияға арналған ерітіндінің қалдығын утилизациялау керек.

Жүктілік

Жүкті әйелдерге Хантераза препаратын қолдану жөнінде деректер жоқ. Сақтық шарасы ретінде, жүктілік кезінде Хантераза препаратын қолданудан аулақ болған дұрыс.

Емшек емізу кезеңі

Хантераза препаратын емшек емізу кезеңінде қолдану туралы деректер жоқ. Идурсульфаза бетаның емшек сүтімен бірге бөлініп шығатыны-шықпайтыны белгісіз. Емшек еміп жүрген балалар үшін қауіпті жоққа шығару мүмкін емес, сондықтан Хантераза препаратын қабылдауды жалғастыру жөніндегі шешім нәресте үшін емшек емізудің пайдасын және емшек емізетін әйел үшін Хантераза препаратымен емдеудің пайдасын есепке ала отырып, қабылдануы тиіс.

Фертильділік

Хантераза препаратының адамдағы фертильділікке әсері зерттелмеген.

Дәрілік заттың көлік құралын немесе қауіптілігі зор механизмдерді басқару қабілетіне ықпал ету ерекшеліктері

Көлік құралдарын басқару және зейін қоюдың жоғарылығы мен психомоторлық реакциялардың шапшаңдығын қажет ететін жұмысты орындау қабілетіне ықпал етпейді.

Артық дозалануы

Адамда Хантераза препаратының артық дозалану тәжірибесі жоқ.

Шығарылу түрі және қаптамасы

3.0 мл препараттан І типті түссіз шыныдан жасалған, тефлон жабыны бар бутилкаучук тығындармен тығындалған және күлгін түсті сындырып алынатын пластик қақпақшалы алюминий қалпақшалармен келтеленген көлемі 6.0 мл құтыларда. 1 құтыдан медициналық қолдану жөніндегі мемлекеттік және орыс тілдеріндегі нұсқаулықпен бірге картон қорапшаға салынған.

Сақтау шарттары

Жарықтан қорғалған жерде 2C-ден 8C-ге дейінгі температурада. Мұздатып қатыруға болмайды.

Балалардың қолы жетпейтін жерде сақтау керек!

Сақтау мерзімі

2 жыл

Жарамдылық мерзімі өткеннен кейін қолдануға болмайды

Дәріханалардан босатылу шарттары

Рецепт арқылы

Өндіруші

Грин Кросс Корпорейшн, Корей Республикасы

586, Гвахаксанеоп 2-ро, Очанг-ып, Чонвон-гу, Чонджу-си, Чунчонбук-до, 28119, Корей Республикасы

Тіркеу куәлігінің иесі

«Нанолек» ЖШҚ, Ресей

127055, Мәскеу қ., Бутырский Вал к-сі, 68/70 үй, 1-құрылыс.

Қазақстан Республикасы аумағында тұтынушылардан дәрілік заттардың сапасына қатысты шағымдарды (ұсыныстарды) қабылдайтын және дәрілік заттың тіркеуден кейінгі қауіпсіздігін қадағалауға жауапты ұйымның атауы, мекенжайы және байланыс деректері:

ConsultAsia ЖШС, Алматы қ.

Шевченко к-сі, 165 Б үй

тел./факс: +77051708825/+77273794258

e-mail: pv@consultingasia.kz