Фурагин®

• русский
• қазақша

• Скачать инструкцию медикамента

Саудалық атауы

Фурагин®

Халықаралық патенттелмеген атауы

Жоқ

Дәрілік түрі

Таблеткалар 50 мг

Құрамы

Бір таблетканың құрамында

белсенді зат - фурагин 50 мг,

қосымша заттар - лактоза моногидраты, желатинделген крахмал, қант, полисорбат 80 (твин 80), стеарин қышқылы.

Сипаттамасы

Сарыдан қызғылт сары реңкімен сары түске дейінгі, ойығымен жайпақ цилиндр пішінді таблеткалар.

Фармакотерапиялық тобы

Жүйелі қолдануға арналған микробқа қарсы препараттар. Бактерияға қарсы басқа препараттар. Нитрофуран туындылары.

АТХ коды J01XE

Фармакологиялық қасиеттері

Фармакокинетикасы

Фурагин асқазан-ішек жолынан жақсы сіңеді. Препараттың абсорбциясы негізінен, пассивті диффузия арқылы ішектің дистальді сегментінен өтеді.

Бір реттік дозадан кейін қан плазмасындағы белсенді заттың ең жоғары концентрациясына 30 минуттан соң жетеді, бұл деңгейде 1 сағат бойы қалады, содан кейін баяу төмендейді. Қан плазмасындағы фурагиннің бактериостатикалық концентрациясы 8-12 сағат бойы сақталады. Фурагин қан плазмасының ақуыздарымен байланысады. Енгізілген дозаның салыстырмалы аз бөлігі (10%) бауыр мен бүйректерде биотрансформацияланады, бірақ бүйректерден шығарылу функциясы төмендегенде енгізілген дозаның көп бөлігі биотрансформацияланады. Фурагиннің жартылай шығарылу кезеңі қысқа (1 сағатқа жуық). Фурагин бүйрек арқылы, негізінен өзекшелі секреция арқылы (85%) шығарылады. Қабылданған фурагиннің 8-13%-ы несепке өтеді, мұнда фурагин концентрациясы көптеген сезімтал микроорганизмдер үшін ең төмен тежейтін концентрациядан бірнеше есе жоғары. Несептегі фурагиннің ең жоғары концентрациясы - 5.7 мкг/мл. Фурагиннің әсері қышқыл ортада (рН 5,5) неғұрлым айқын. Несепті бейтараптандыратын дәрілер препарат әсерінің тиімділігін төмендетеді.

Фармакодинамикасы

Фурагин – бактерияға қарсы дәрі нитрофуран туындысы, грамоң (Staphylococcus epidermidis, Staphylococcus aureus, Staphylococcus faecalis), және грамтеріс (Enterobacteriаceae, Salmonella, Shygella, Proteus, Klebsiella spp., Escherichia coli, Enterobacter және т.б.) бактерияларға қатысты тиімді. Препарат стафилококктарға және сульфаниламидтер мен антибиотиктерге төзімді микроорганизмдердің басқа патогендік штаммдарына әсер етеді. Фурагинге микроорганизмдердің резистенттілігі баяу дамиды және жоғары дәрежеге жетпейді. Препаратқа Pseudomonas aeruginosa-ға төзімді.

Препараттың микробқа қарсы әсер ету механизмі нитро тобының амин тобына қалпына келтірумен байланысты. Сонымен бірге препараттың қалпына келтірілген формалары жасушалық макромолекулаларға және микробтық жасушадағы электрондарды тасымалдауға тікелей әсер етеді. ДНҚ деңгейінде (дезоксирибонуклеин қышқылы) өзара әрекеттесіп, онда оның биологиялық функциясының бұзылуына әкелетін үзілулер мен мутациялар тудырады. Сондай-ақ, препараттың қалпына келтірілген түрі микроорганизмдердің бірқатар ферментативті жүйелерін тотықтырады деп болжанады. Кейбір микроорганизмдерге қатысты фурагиннің микробқа қарсы әсері басқа нитрофурандарға қарағанда жоғары. Препарат әсіресе несеп жолдарының инфекцияларында белсенді.

Нитрофурандар организмнің иммундық жүйесін әлсіретпейді, тіпті оны белсендіреді, мысалы, комплемент титрін және лейкоциттердің микроорганизмдерді фагоциттеу қабілетін арттырады.

Қолданылуы

• несеп жолдарының (пиелонефрит, цистит, уретрит) және қуық асты безінің (простатит) жедел және созылмалы инфекциялары;

• несептік-жыныстық жүйенің операциядан кейінгі инфекциялары (операциядан кейінгі пиелонефрит, цистит, простатит).

Қолдану тәсілі және дозалары

Фурагин® таблеткалары астан кейін судың жеткілікті мөлшерімен ішіп, ішке қабылданады.

Ересектерге күніне 2-3 рет 100-200 мг тағайындайды. Ең жоғары тәуліктік доза - 600 мг. Емдеу курсы 7-10 күнді құрайды. Қажет болған кезде емдеу курсы 10-15 күннен соң қайталанады.

Әйелдерде несеп жолдарының қайталанатын инфекцияларында (12 ай ішінде кемінде 3 көрініс) Фурагин 6-12 ай ішінде күніне 100 мг-ден (2 таблетка) қолданылады.

Жағымсыз әсерлері

Басқа дәрілік заттар сияқты, Фурагин барлық пациенттерде білінбейтін жағымсыз әсерлерді туғызуы мүмкін.

Жағымсыз реакцияларды даму жиілігі бойынша жіктеу: өте жиі (≥ 1/10); жиі (≥ 1/100 < 1/10 дейін); жиі емес (≥ 1/1000 < 1/100 дейін); сирек (≥ 1/10 000 < 1/1000 дейін); өте сирек (< 1/10 000); біліну жиілігі белгісіз (қол жетімді деректер бойынша анықталуы мүмкін емес).

Қан және лимфа жүйесінің бұзылулары

Өте сирек: қан түзілуінің бұзылулары (агранулоцитоз, тромбоцитопения, апластикалық анемия).

Жүйке жүйесінің бұзылулары

Жиі емес: бас айналуы, ұйқышылдық;

Сирек: шеткері невропатия.

Көрудің бұзылулары

Сирек: көрудің бұзылулары.

Қантамыр жүйесінің бұзылулары

Өте сирек: жеңіл интракраниальді гипертензия.

Тыныс жүйесінің бұзылулары, кеуде қуысы және көкірек орта аурулары

Сирек: жедел және созылмалы өкпе реакциялары.

Асқазан-ішек жолының бұзылулары

Жиі емес: тәбеттің жоғалуы, жүрек айнуы;

Сирек: құсу, диарея;

Өте сирек: панкреатит.

Бауыр және/немесе өт жолдары жұмысының бұзылулары

Өте сирек: холестаздық сарғаю, гепатит.

Тері және тарі асты зақымданулары

Сирек: папулездік бөртпелер, қышыну;

Өте сирек: ангиоэдема, есекжем, эксфолиативті дерматит, erythema multiforme.

Тірек-қимыл жүйесінің және дәнекер тіндер жүйесінің зақымданулары

Өте сирек: артралгия.

Жалпы бұзылулары және енгізу орнындағы реакциялары

Сирек: күшті жоғалту, дене температурасының жоғарылауы, өтпелі алопеция.

Егер сізде осы нұсқаулықта көрсетілмеген қандай да болсын жағымсыз әсерлер пайда болса немесе аталған жағымсыз әсерлердің кез келгені аса күшті байқалса, дәрігерге қаралуыңызды өтінеміз.

Қолдануға болмайтын жағдайлар

• фурагинге, нитрофуран тобының препараттарына немесе препараттардың қосымша заттарына жоғары сезімталдық;

• ауыр бүйрек жеткіліксіздігі (креатинин клиренсі минутына 60 мл кем немесе креатининнің жоғары деңгейі);

• ауыр бауыр жеткіліксіздігі;

• порфирия;

• полиневропатия (соның ішінде диабеттік);

• энзима глюкозо-6-фосфатдегидрогеназа жеткіліксіздігі (гемолиз даму қаупі);

• жүктілік және емшек емізу;

• фруктозаны тұқым қуалай көтере алмаушылығымен, Lapp-лактаза ферментінің тапшылығымен, глюкоза-галактоза мальабсорбциясымен тұлғалар.

• балалар және 18 жасқа дейінгі жасөспірімдер;

Дәрілермен өзара әрекеттесуі

Несепті сілтілендіретін дәрілер (мысалы, натрий гидрокарбонаты) фурагиннің емдік әсерін азайтады (фурагиннің несеппен шығарылуын жеделдетеді). Несепті қышқылдандыратын дәрілер (қышқылдар, соның ішінде аскорбин қышқылы, сондай-ақ кальций хлориді) несептегі фурагин концентрациясын арттырады (оның несеппен шығарылуын бәсеңдетеді), осылайша препараттың емдік әсерін арттырады, сонымен бірге уытты жағдайлар қаупін да арттырады.

Амингликозидтер мен тетрациклин фурагиннің бактерияға қарсы әсерін күшейтеді. Бүйрек жеткіліксіздігі кезінде фурагинді амингликозидтер тобының антибиотиктерімен бір мезгілде қабылдау ұсынылмайды. Хлорамфениколмен және ристомицинмен біріктірімде гемоуытты жағдайлар қаупі артады.

Нитрофурандар in vitro хинолондарға (налидикс қышқылы, оксолин қышқылы, норфлоксацин) антагонизмді білдіреді. Алайда, осы өзара әрекеттестіктің клиникалық мәні in vivo-да зерттелмеген, сондықтан осы препараттарды бір мезгілде қолданудан аулақ болу керек.

Фурагин мен урикозурияалық дәрілерді (пробенецид, сульфинпиразон) бір мезгілде қолдану кезінде фурагиннің несеппен шығарылуы төмендейді, бұл фурагиннің кумуляциясына және уытты жағдайлардың даму мүмкіндігіне әкеледі.

Фурагинді және құрамында магний трисиликаты бар антацидтерді бір мезгілде қолдану кезінде фурагиннің сіңуі төмендейді.

Атропин фурагиннің сіңуін баяулатады, бірақ сіңірілетін препараттың жалпы мөлшері өзгермейді.

Емдеу кезінде алкоголь ішпеу керек, өйткені жағымсыз әсерлер (жүрек қағуы, жүрек ауруы, бас ауыруы, жүрек айнуы, құсу, құрысу, артериялық қысымның төмендеуі, қызу және қорқыныш сезімі) пайда болуы мүмкін.

Айрықша нұсқаулар

Сақтық шаралары

Бүйрек функциясының бұзылуларымен науқастарға анемия, В тобындағы дәрумендердің және фолий қышқылының тапшылығы, өкпе аурулары кезінде сақ болу керек. Фурагинді ұзақ қабылдау кезінде шеткері невропатия дамуы мүмкін. Қант диабетімен науқастарға фурагинді абайлап қолдану керек, өйткені препарат полиневропатияның дамуына ықпал етуі мүмкін. Ұзақ емдеу жағдайында бауыр және бүйрек функциясын, сондай-ақ өкпе функциясын, қандағы лейкоциттердің мөлшерін, әсіресе 65 жастан асқан науқастарда мезгіл-мезгіл бақылау керек.

Пациенттерді клиникалық зерттеулер мен клиникалық бақылаулар барысында нитрофурандар аталық бездің функциясына жағымсыз әсер еткені анықталды, бұл шәуһет және эякулят мөлшерінің азаюы, сперматозоидтар қозғалғыштығының төмендеуі және олардың морфологиясының патологиялық өзгерістері түрінде білінді.

Сирек жағдайларда жедел және созылмалы өкпе реакцияларының даму ықтималдығын ескеру қажет. Жедел өкпе реакциясы ауыр ентікпе, қызба, кеуде ауыруы, қақырықпен немесе онсыз жөтел, эозинофилия ретінде білінеді. Жедел өкпе реакциясымен бірмезгілде терінің бөртпелері, қышыну, есекжем, ангиоэдема және миалгия туралы хабарланған. Жедел өкпе реакциясының негізінде бірнеше сағаттан кейін, сирек - бірнеше минут ішінде жоғары сезімталдық реакциясы болады. Жедел өкпе реакциясы қайтымды сипатқа ие, ол дәрілік затты қабылдауды тоқтатқаннан кейін жоғалады. Созылмалы өкпе реакциясы нитрофурандармен емдеу тоқтатылғаннан кейін ұзақ уақыт кезеңінен кейін дамуы мүмкін. Бұл ентікпенің біртіндеп ұлғаюымен, жиі тыныс алумен, тұрақсыз қызбамен, эозинофилиямен, прогрессивті жөтелді және интерстициальді пневмонитпен және/немесе өкпе фиброзымен сипатталады.

Өте сирек жағдайларда жалғанжарғақшалы колиттің даму мүмкіндігін ескеру керек, оның себебі тік ішектің табиғи микрофлорасын басу және Clostridium difficile көбейту олып табылады. Жалғанжарғақшалы колиттің жеңіл түрі кезінде дәрілік затты қабылдауды тоқтату жеткілікті. Тиісті емді жүргізгенде, ішектің перистальтикасын баяулататын дәрілік затты қабылдауға болмайды. Аспен дәрілік затты қабылдау, бұл препараттың сіңірілуіне айтарлықтай әсер етпей, колиттің даму қаупін төмендетеді.

Фурагинді қабылдайтын пациенттерді зертханалық зерттеу, егер анықтау үшін мысты қалпына келтіру әдісі қолданылса, несепте глюкозаның болуына жалған оң реакция беруі мүмкін. Энзиматикалық әдіспен орындалатын несептегі глюкозаны анықтау нәтижелеріне фурагин әсер етпейді.

Фурагинді қабылдағанда несеп қоңыр түске боялуы мүмкін.

Егер жағымсыз әсерлер дамыған жағдайда дозаны азайту немесе препаратты қабылдауды тоқтату керек. Егер сұйықтықтың көп мөлшерін ішіп, препарат астан кейін қабылданса, жағымсыз әсерлер төмендейді.

Препараттың құрамында лактоза бар

Фруктозаны тұқым қуалай көтере алмайтын, Lapp-лактаза ферменті тапшылығымен, глюкоза-галактоза мальабсорбциясымен тұлғаларға қолдануға болмайды.

Препараттың құрамында қант бар

Фруктозаны сирек туа біткен көтере алмайтын, глюкоза/галактоза мальабсорбциясымен немесе сахароза/изомальтаза жеткіліксіздігімен пациенттерге препаратты қолдануға болмайды.

Дәрілік затты көлік құралын немесе әлеуетті қауіпті механизмдерді басқару қабілетіне әсер ету ерекшеліктері

Фурагин көлік құралдарын басқару және механизмдермен жұмыс атқару қабілетіне әсер етпейді.

Артық дозалануы

Бүйрек функциясының бұзылуымен науқастарға уытты әсер етуі мүмкін.

Симптомдары: бас ауыруы, бас айналуы, депрессия, шеткері полиневрит, аллергиялық реакциялар (есекжем, ангионевроздық ісіну, бронх түйілуі), жүрек айнуы, құсу, гемолиздік анемия (глюкозо-6-фосфатдегидрогеназа жеткіліксіздігімен тұлғаларда), мегалобластық анемия, өте сирек - бауыр функциясының бұзылуы.

Емі: асқазанды шаю, в/і инфузиялық ерітіндіні (0,9% натрий хлоридінің ерітіндісін) енгізу. Симптоматикалық және демеуші емді жүргізу. Ауыр жағдайларда гемодиализ көрсетілген. Спецификалық антидоты белгісіз.

Шығарылу түрі және қаптамасы

10 таблеткадан поливинилхлоридті үлбірден және алюминий фольгадан жасалған пішінді ұяшықты қаптамаға салынған.

3 пішінді ұяшықты қаптамадан медициналық қолдану жөніндегі мемлекеттік және орыс тілдеріндегі нұсқаулықпен бірге картон қорапшаға салынған.

Сақтау шарттары

Құрғақ, жарықтан қорғалған жерде, 25 °С-ден аспайтын температурада сақтау керек.

Балалардың қолы жетпейтін жерде сақтау керек.

Сақтау мерзімі

3 жыл

Жарамдылық мерзімі өткеннен кейін қолдануға болмайды.

Дәріханалардан босатылу шарттары

Рецепт арқылы

Өндіруші/тіркеу куәлігінің ұстаушысы

«ОЛАЙНФАРМ» АҚ

Мекенжайы: Рупницу к-сі, 5, Олайне, LV-2114, Латвия.

Қазақстан Республикасының аумағында тұтынушылардан дәрілік заттардың сапасы жөнінде шағымдарды (ұсыныстарды) қабылдайтын және дәрілік заттың қауіпсіздігін тіркеуден кейінгі қадағалауға жауапты ұйымның атауы, мекенжайы және байланыс деректері (телефон, факс, электрондық пошта):

«Олайнфарм» АҚ өкілдігі

050009, Алматы қ-сы, Абай даңғылы, 151/115, 807 кеңсе

Телефон / факс 007 727 333 46 52

E-mail olainfarm.instr@mail.ru