Флуконазол (Раствор для инфузий, 2 мг/мл)

• русский
• қазақша

• Скачать инструкцию медикамента

Саудалық атауы

Флуконазол

Халықаралық патенттелмеген атауы

Флуконазол

Дәрілік түрі

Инфузияға арналған 2 мг/мл 50 мл, 100 мл ерітінді

Құрамы

1 мл препараттың құрамында

белсенді зат – 2.0 мг флуконазол,

қосымша заттар: натрий хлориді, инъекцияға арналған су.

Сипаттамасы

Мөлдір түссіз сұйықтық

Фармакотерапиялық тобы

Жүйелі пайдалануға арналған зеңге қарсы препараттар. Триазол туындылары. Флуконазол.

АТХ коды J02А С01

Фармакологиялық қасиеттері

Фармакокинетикасы

Флуконазол қан сарысуындағы концентрация шыңына көктамырішілік инъекциясынан кейін бірден жетеді. Препараттың жартылай шығарылу кезеңі – 30 сағатқа жуық. Плазмадағы концентрациясы дозаға пропорционалды тәуелділікте. Тепе теңдік концентрациясының 90 % деңгейіне препаратпен тәулігіне 1 рет енгізу арқылы емнің 4-5-ші күндері қол жеткізеді. Плазма ақуыздарымен байланысуы - 11-12 %. Флуконазол барлық биологиялық сұйықтықтарға, организмнің ағзалары мен және тіндеріне жақсы өтеді. Препараттың сілекейдегі және қақырықтағы концентрациясы оның қан плазмасындағы деңгейіне ұқсас.

Зеңді менингитпен науқастарда жұлын сұйықтығындағы флуконазол құрамы оның қан плазмасындағы деңгейінің 80 % жетеді. Мөлдір қабықта, эпидермисте, терідегі, тер сұйықтығында сарысуындағыдан асатын жоғары концентрациясына жетеді. Флуконазол мөлдір қабықта жинақталады және ұзақ сақталады. Флуконазол негізінен бүйрекпен шығарылады; енгізілген дозаның шамамен 80 % несеппен өзгермеген түрде шығарылады. Флуконазол клиренсі креатинин клиренсіне пропорционалды.

Фармакодинамикасы

Флуконазол цитохром Р 450 тәуелді зең ферменттеріне спецификалық әсер ете отырып, зең жасушаларындағы стеролдар синтезін тежейді, зеңге қарсы әсер етеді. Сandida sрр., Мicrosporum sрр., Тrichophyton sрр., Cryptococcus neoformans, Blastomyces dermatidis, Соссidioides immunis, Histoplasma capsulatum қатысты белсенді.

С. аlbicans басқа, Саndida түрлерінен туындаған белгілі асқын жұқпа жағдайларының флуконазолға табиғи сезімталдығы бар (мысалы, Саndida krusei). Бұндай жағдайлар альтернативті антимикоздық емдеуді талап етеді.

Қолданылуы

Ересектер

- криптококкты менингитте

- кокцидиоидомикозда

- инвазивті кандидозда

- өңештің орофарингеалды кандидозын қоса шырышты қабықтар кандидозында, кандидурия, тері және шырышты қабықтардың созылмалы кандидозында

- тіс протездерін киюге байланысты болатын ауыз қуысының созылмалы атрофиялық кандидозында

- қайталау қаупі жоғары науқастардағы криптококктық менингит қайталануының алдын алу мақсатындағы демеуші емде

- АИВ-жұқпаланған емделушілерде орофарингеалдық немесе өңештік кандидоз қайталауының алдын алуда

- ұзақ уақыттық нейтропениясы бар емделушілерде кандидоз жұқпасының алдын алуда (мысалы, химиотерапия қабылдайтын гематологиялық қатерлі жаңа түзілімдері бар емделушілер немесе гемопоэздік діңдік жасушалар трансплантациясын қабылдайтын емделушілер)

0 жастан 17 жасқа дейінгі балалар және жасөспірімдер

- шырышты қабықтар кандидозы (ауыз қуысы және жұтқыншақ, өңеш шырышты қабығы), инвазивті кандидоз, криптококкты менингитте

- иммунитет тапшылығы бар емделушілерде кандидоз жұқпасының алдын алуда

- қайталану қаупі жоғары балаларда криптококкты менингит қайталануының алдын алу мақсатындағы демеуші емде

Қолдану тәсілі және дозалары

Көктамырішілік инфузия – көк тамырішіне енгізуге арналған ерітінді.

Препаратты көп рет қабылдауды талап ететін жұқпаны емдеу клиникалық-зертханалық әсерге қол жеткізгенше созылуы мүмкін (белсенді зеңдік жұқпа бәсеңсігенше). Емдеу мерзімінің жеткіліксіз болуы белсенді жұқпалық процесстің жаңғыруына алып келуі мүмкін.

Флуконазолды көктамыр ішіне инфузия түрінде минутына 10 мл аспайтын жылдамдықпен енгізеді. Көктамырішіліктен пероральді қабылдауға немесе керісінше өткенде тәуліктік дозаны өзгерту қажеттігі жоқ.

Ем өсірінді немесе басқа да зертханалық зерттеулер нәтижесі алынғанша басталуы мүмкін, ал олар алынған жағдайда микробқа қарсы препараттар қосылады.

Флуконазолдың тәуліктік дозасы зеңдік жұқпаның табиғатына және ауырлығына байланысты болады.

Ересектерге

Криптококкты менингитте бірінші күні 400 мг тағайындайды, содан соң емді тәулігіне 1 рет 200 мг-ден 400 мг –ге дейінгі дозаны қолдана отырып жалғастырады.

Өмірге қауіпті жұқпаларда тәуліктік доза 800 мг-ге дейін ұлғайтылуы мүмкін. Криптококкты менингитте емнің ұзақтығы ең болмағанда 6-8 аптаны құрайды.

Қайталану қаупі жоғары науқастарда криптококкты менингиттің қайталануының алдын алу мақсатында ұсынылатын доза тәулігіне 200 мг құрайды.

Кокцидиоидомикозда әдеттегі доза науқастың жағдайына қарай 11-24 ай немесе одан да ұзақ емдеуде тәулігіне 1 рет 200 мг-ден 400 мг –ге дейінді құрайды. Күніне 800 мг кейбір жұқпаларда, әсіресе менингеалдық аурулар жағдайында қарастырылады.

Кандидемияда, инвазивті кандидозда тиімді екпінді доза бірінші күні 800 мг құрайды, содан соң тәулігіне 400 мг-ден.

Емнің ұзақтығы клиникалық әсеріне байланысты.

Шырышты қабықтар кандидозын емдеу

Орофарингеалды кандидозда тиімді доза бірінші күні 200 мг-ден

400 мг –ге дейінді құрайды, содан кейінгі доза тәулігіне 1рет 100 мг-ден 200 мг-ге дейінді құрайды. Қайталану ықтималдығын төмендету үшін емді 7-21 күн бойына жалғастырады. Қажетіне қарай ем иммундық қызметі әлсіреген емделушілерде елеулі түрде жалғастырылуы мүмкін.

Өңеш кандидозында тиімді екпінді доза бірінші күні 200 мг-ден

400 мг –ге дейінді құрайды, содан кейінгі доза тәулігіне 100 мг-ден 200 мг-ге дейінді құрайды. Қайталану ықтималдығын төмендету үшін емді 14-30 күн бойына жалғастырады. Қажетіне қарай ем иммундық қызметі бұзылуының ауыр түрі бар емделушілерде елеулі жалғастырылуы мүмкін.

Кандидурияда әдеттегі доза 7-21 күн бойына тәулігіне 200 мг-ден 400 мг-ге дейінді құрайды. Қажетіне қарай ем иммундық қызметі әлсіреген емделушілерде елеулі түрде жалғастырылуы мүмкін.

Тіс протезін киюге байланысты болатын ауыз қуысының созылмалы атрофиялық кандидозында протезды өңдеу үшін жергілікті антисептикалық дәрілермен үйлесімде препаратты әдетте 14 күн бойына тәулігіне 1 рет 50 мг дозада тағайындайды.

Шырышты қабықтар және терінің созылмалы кандидозында ұсынылатын доза емнің 28 күн ұзақтығында тәулігіне 50 мг-дан 100 мг-ге дейінді құрайды.

Емнің ұзақтығы жұқпаның ауырлығына және клиникалық тиімділігіне байланысты.

ЖИТС-пен науқастарда орофарингеалды кандидоз қайталануын тойтару үшін флуконазолдың ұсынылатын дозасы тәулігіне 100 мг-дан 200 мг дейінді немесе аптасына 3 рет 200 мг құрайды.

Ем ұзақтығы әр адамға жеке анықталады.

ЖИТС-пен науқастарда өңеш кандидозы қайталануын тойтару үшін флуконазолдың ұсынылатын дозасы тәулігіне 100 мг-дан 200 мг дейінді немесе аптасына 3 рет 200 мг құрайды.

Ем ұзақтығы жеке анықталады.

Кандидозды жұқпаның алдын алу үшін флуконазолдың ұсынылатын дозасы тәулігіне 200 мг-ден 400 мг дейінді құрайды.

Флуконазолмен емдеуді болжамды нейтропенияға дейін бірнеше күн бұрын бастау керек; нейтрофилдер мөлшері 1 мм3 -де 1000 асқаннан кейін емді тағы да 7 күн бойына жалғастырады.

Егде адамдарда қолданылуы

Бүйрек жеткіліксіздігі белгілері болмаған жағдайда препаратты әдеттегі дозада тағайындайды.

Бүйрек жеткіліксіздігі бар науқастарда қолданылуы

Флуконазол негізінен несеппен өзгермеген түрде шығарылады. Бір рет қолданғанда дозаны өзгертудің қажеті жоқ. Бүйрек қызметі бұзылуы бар науқастарға (балаларды қоса) препаратты көп рет қолданғанда алдымен 50 мг-дан 400 мг дейінді құрайтын екпінді доза енгізу керек.

Екпінді дозаны енгізуден соң тәуліктік дозаны (көрсетілімдерге қарай) кесте бойынша анықтайды.

Бауыр жеткіліксіздігі бар науқастарда қолданылуы

Бауыр жеткіліксіздігі бар науқастарда қолданылуының деректері шектеулі, сондықтан флуконазолды бауыр дисфункциясы бар емделушілерге сақтықпен тағайындау керек.

Балаларда қолданылуы

Ересектердегі ұқсас жұқпалардағы сияқты емнің ұзақтығы клиникалық және

микологиялық әсерге байланысты. Флуконазолды күнделікті бір доза түрінде тағайындайды.

Балалар үшін ең жоғары тәуліктік доза - 400 мг.

Нәрестелер, сәбилер және балалар (28 күннен 11 жасқа дейінгі)

Шырышты қабықтар кандидозында флуконазолдың ұсынылатын дозасы тәулігіне 3 мг/кг құрайды. Бірінші күні тұрақты тепе теңдік концентрацияға жылдамырақ қол жеткізу мақсатында 6 мг/кг екпінді доза тағайындалуы мүмкін.

Инвазивті кандидозды және криптококкты менингитті емдеу үшін ұсынылатын доза аурудың ауырлығына қарай тәулігіне 6-12 мг/кг құрайды.

Қайталану қаупі жоғары балаларда криптококкты менингиттің қайталануын болдырмау үшін демеуші емде ұсынылатын доза аурудың ауырлығына қарай күніне 6 мг/кг құрайды.

Цитоуытты химиялық терапия немесе сәулемен емдеу нәтижесінде дамитын нейтропенияға байланысты жұқпа даму қаупі бар, иммунитеті әлсіз науқастарда зеңдік жұқпалардың алдын алу үшін препаратты индукцияланған нейтропенияның айқындығы мен сақталу ұзақтығына қарай тәулігіне 3-12 мг/кг тағайындайды.

Жасына қарай балаларда қолданылуы ( 0 -ден 14 күнге дейін)

Жаңа туған нәрестелерде флуконазол баяу шығарылады.

Ең жоғары тәуліктік доза 12 мг/кг аспауы тиіс.

Өмірінің бастапқы 2 аптасында флуконазол жасы үлкен балаларға арналған дозада, бірақ 72 сағат аралықпен тағайындалады (дене салмағының 1 кг есептеліп).

Балаларда жасына қарай қолданылуы (15 күннен 27 күнге дейін)

Препарат балаларға 3 және 4 апталық кезінде жасы үлкен балаларға арналған дозада, бірақ 48 сағат аралықпен тағайындалады.

Жағымсыз әсерлері

Жиі ( ≥1/100-ден <1/10 дейін)

- бас ауыру

- іш ауыруы, жүрек айнуы, құсу, диарея

- сілтілік фосфатаза деңгейінің жоғарылауы, аминотрансфераза сарысулық (АЛТ және АСТ) деңгейінің жоғарылауы

- бөртпе

Жиі емес( ≥ 1/1000-ден <1/100 дейін)

- ұйқысыздық, ұйқышылдық

- құрысулар, бас айналуы, парестезия, дәм сезудің бұзылуы

- вертиго

- анемия

- тәбет төмендеуі

- ауыз құрғауы, диспепсия, метеоризм, іш қатуы

- холестаз, сарғаю, жоғарылаған билирубин

- қышыну, есекжем, жоғары тершеңдік, дәрілік препарат әсерінен туындаған дерматит

- миалгия

- шаршағыштық, дімкәстік, әлсіздік, дене температурасының жоғарылауы

Сирек ( ≥1/10000-ден ≤ 1/1000 дейін)

- агранулоцитоз, лейкопения, нейтропения, тромбоцитопения

- анафилаксия, ангионевротикалық ісіну

- гипертриглицеридемия, гиперхолестеринемия, гипокалиемия

- тремор

- қарыншалардың жыпылықтау/дірілдеу, QT аралығының ұлғаюы

- сирек болатын өліммен аяқталатын жағдайларды қоса гепатоуыттылық, бауыр жеткіліксіздігі, гепатоцеллюлярлық некроз, гепатит, гепатоцеллюлярлық зақымдану

- уытты эпидермальді некролиз, Стивенс-Джонсон синдромы, жедел

жайылған экзантематозды пустулез, эксфолиативті дерматит, бет ісінуі,

алопеция

ЖИТС-пен немесе обырмен науқастарда флуконазолмен емдегенде қан көрсеткіштері өзгерістері, бүйрек және бауыр қызметі өзгерістері байқалған, алайда бұл өзгерістердің клиникалық мәні және олардың емдеумен байланысы анықталмаған.

Қолдануға болмайтын жағдайлар

- флуконазолға, препараттың басқа да компоненттеріне немесе флуконазолға ұқсас құрылымды азольді заттарға жоғары сезімталдық

- флуконазолды тәулігіне 400 мг және одан да астам дозада көп рет қабылдау уақытында терфенадинді бір мезгілде қабылдау

- QT аралығын ұзартатын және CYP3A4 ферменттері арқылы метаболизденетін цизаприд, астемизол, эритромицин, пимозид және хинидин сияқты дәрілік препараттарды бір уақытта қабылдау

- жүктілік және лактация кезеңі

Сақтықпен

Флуконазол қабылдау аясында бауыр қызметі көрсеткіштері бұзылуы; беткейлік зеңдік жұқпалары және инвазивті/жүйелік зеңдік жұқпалары бар науқастарда флуконазол қабылдау аясында бөртпе пайда болуы;

тәулігіне 400 мг аз дозада флуконазолды және терфенадинді бір уақытта қолдану; қауіптің көптеген факторлары бар науқастардағы потенциалды проаритмиялық жай-күй (жүректің органикалық аурулары, электролиттік теңгерімнің бұзылуы және осыған ұқсас бұзылулардың дамуына ықпал ететін қатарлас ем).

Дәрілермен өзара әрекеттесуі

Флуконазол цитохром P450 (CYP) 2C9 изоферментінің қуатты тежегіші және CYP3A4 ферментінің орташа тежегіші болып табылады. Төменде көрсетілген өзара әрекеттесулерден басқа, флуконазолмен бір уақытта қолдануда CYP2C9 және CYP3A4 ферменттерімен метаболизденетін басқа да қосылыстардың плазмалық концентрацияларының жоғарылау қаупі бар. Сондықтан бұл біріктірілімдерді қолданғанда сақтық жасау керек, ал науқастарды мұқият бақылаған дұрыс. Флуконазолдың фермент-тежегіш әсері жартылай шығарылу кезеңі ұзақтығынан флуконазолмен ем тоқтатылғаннан кейін 4-5 күн бойы сақталады.

Альфентанил: флуконазолмен бір уақытта емдегенде клиренс төмендеуі және таралу көлемі төмендеуі, сондай-ақ альфентанил T½ (жартылай шығарылу кезеңі) ұзаруы бақыланған. Болуы мүмкін әсер ету механизмі флуконазолмен

CYP3A4 ферменті тежелуі болып табылады. Альфентанил дозасын түзету талап етілуі мүмкін.

Фентанил: флуконазол фентанил элиминациясын елеулі іркеді. Фентанилдің жоғарылаған концентрациясы тыныс алу жеткіліксіздігіне алып келуі мүмкін.

Амитриптилин, нортриптилин: флуконазол амитриптилин және нортриптилиннің әсерін күшейтеді. 5-нортриптилин және/немесе S-амитриптилин біріктірілген емнің басында және бір аптадан соң өлшенуі мүмкін. Егер қажет болса амитриптилин/нортриптилиннің дозасы түзетілуі тиіс.

Амфотерицин B: иммунитеті қалыпты және әлсіреген жұқпаланған тышқандарда флуконазол мен В амфотерицинін бір уақытта қолдану төмендегі нәтижелерді: C. Albicans туындаған жүйелік жұқпаларда зеңге қарсы қосымша аздаған әсері болуын, Cryptococcus neoformans туындаған бассүйекішілік жұқпаларда ешқандай өзара әрекеттесулер болмағанын, A. fumigatus туындаған жүйелік жұқпаларға екі препараттың антагонизмін көрсетті. Бұл зерттеулерден алынған клиникалық елеулі нәтижелер белгісіз.

Карбамазепин: флуконазол карбамазепин метаболизмін тежейді және соңғысының сарысудағы концентрациясын 30% жоғарылатады. Карбамазепиндік уыттылық даму қаупі бар. Концентрациясы/тиімділігі өлшемдеріне қарай карбамазепин дозасын түзету талап етілуі мүмкін.

Кальций өзекшелері блокаторлары: Кейбір кальций өзекшелері антагонистері (нифедипин, исрадипин, амлодипин, верапамил және фелодипин) CYP3A4 ферментімен метаболизденеді. Флуконазол кальций өзекшелері антагонистерінің жүйелік әсерін елеулі жоғарылатуы мүмкін. Препараттардың жағымсыз әсерлеріне жиі мониторинг жүргізу ұсынылады.

Целекоксиб: флуконазолмен (тәулігіне 200 мг) және целекоксибпен (200 мг) қатарлас ем уақытында, целекоксибтің Cmax және AUC тиісінше 68% және 134% ұлғайды. Флуконазолмен үйлесімде целекоксиб дозасының жартысы талап етілуі мүмкін.

Циклофосфамид: циклофосфамид пен флуконазолдың біріктірілген емі қан сарысуында билирубин және креатинин деңгейінің жоғарылауына алып келеді. Бұл біріктірілім қан сарысуында билирубин және креатинин деңгейінің жоғарылау қаупі пайда болғанша пайдаланылуы мүмкін.

Галофантрин: флуконазол CYP3A4 тежейтін әсеріне байланысты галофантриннің плазмадағы концентрациясын жоғарылатуы мүмкін.

Гидроксиметилглутарил-кофермент A-редуктаза тежегіштері (ГМГ-КоA-редуктазалар): флуконазолды ГМГ-КоA-редуктазаның CYP3A4 арқылы метаболизденетін аторвастатин және симвастатин сияқты, немесе CYP2C9 арқылы метаболизденетін флувастатин сияқты тежегіштерімен бір мезгілге тағайындағанда миопатия және қаңқа бұлшықеттерінің жедел некрозы (рабдомиолиз) даму қаупі ұлғаяды. Қатарлас ем қажет болса, науқас миопатия және рабдомиолиз симптомдары пайда болуына бақылануы тиіс, сондай-ақ креатинкиназа деңгейіне бақылау жүргізілуі тиіс. Егер креатинкиназа деңгейінің елеулі жоғарылауы байқалса немесе егер миопатия/ рабдомиолиз дамуына күдік болса немесе анықталса ГМГ-КоA-редуктаза тежегіштерін қабылдауды тоқтату керек.

Лосартан: флуконазол Лосартанмен ем уақытында жүретін ангиотензин II рецепторлары антагонизмінің үлкен бөлігіне жауапты лосартанның белсенді метаболитіне (Е-31 74) метаболизмін тежейді. Науқастар артериялық қысымды ұдайы бақылауы тиіс.

Метадон: флуконазол метадонның қан сарысуындағы концентрациясын жоғарылатуы мүмкін. Метадон дозасын түзету талап етілуі мүмкін.

Қабынуға қарсы стероидты емес препараттар (ҚҚСП): флуконазолмен бірге тағайындағанда, флурбипрофенмен моноеммен салыстырғанда, флурбипрофеннің Cmax және AUC тиісінше 23% және 81% ұлғаяды. Осыған сәйкес, ибупрофен моноемімен салыстырғанда флуконазолды ибупрофеннің (400 мг) рацемиялық қоспасымен бір мезгілге тағайындағанда фармакологиялық белсенді изомер [S-(+)-ибупрофен] Cmax және AUC тиісінше 15% және 82% ұлғайған.

Флуконазол CYP2C9 арқылы метаболизденетін (мысалы, напроксен, лорноксикам, мелоксикам, диклофенак) басқа да ҚҚСП жүйелік әсерін күшейтуі мүмкін. ҚҚСП байланысты жағымсыз әсерлер мен уыттылығына жиі мониторинг жүргізу ұсынылады.ҚҚСП дозасын түзету талап етілуі мүмкін.

Преднизон: флуконазолмен және преднизонмен ұзақ уақыт ем алушы науқастар флуконазол қабылдауды тоқтатқан соң бүйрек үсті безі қыртысының жеткіліксіздігі дамуына бақылау жүргізуі тиіс.

Такролимус: флуконазол және такролимустың өзара әрекеттесуі салдарынан соңғысының сарысулық деңгейі жоғарылағаны туралы мәлімдеулер бар. Флуконазол және такролимусты бір мезгілге тағайындағанда нефроуыттылық жоғарылау жағдайлары сипатталған. Такролимус және флуконазолды бір мезгілде қабылдайтын науқастарды мұқият бақылау керек.

Сиролимус: флуконазол сиролимустың плазмалық концентрациясын, болжау бойынша, сиролимус метаболизмін CYP3A4 және Р-гликопротеин арқылы тежеу жолымен ұлғайтады. Бұл біріктірілім тиімділік/концентрация өлшемдеріне қарай сиролимустың дозасын түзетуде пайдаланылуы мүмкін.

Қабыршөп алкалоиды: флуконазол CYP3A4 тежегіш әсеріне байланысты қабыршөп алкалоидының (мысалы, винкристин және винбластин) плазмалық деңгейін жоғарылатуы және нейроуыттылыққа алып келуі мүмкін.

А витамині: бұл біріктірілімді пайдалануға болады, бірақ емделушілерді ОЖЖ байланысты жағымсыз әсерлер анықтау мақсатында бақылау керек.

Зидовудин: зидовудинді пероральді қабылдағанда клиренстің шамамен 45% төмендеуінен флуконазол зидовудиннің Cmax және AUC тиісінше 84% және 74%-ға ұлғайтады. Флуконазолмен біріктірілген емнен кейін зидовудиннің жартылай шығарылу кезеңі шамамен 128% ұзарады. Бұл біріктірілімді қабылдайтын науқастар зидовудин қабылдауға байланысты жағымсыз реакцияларды анықтау мақсатында бақылауда болуы тиіс. Зидовудин дозасы азайтылуы талап етілуі мүмкін.

Вориконазол (CYP2C9, CYP2C19 және CYP3A4 тежегіші): вориконазолды бір мезгілде пероральді қабылдау (1 күнде әрбір 12 сағатта 400 мг, содан соң 2,5 күн бойына әрбір 12 сағатта 200 мг) және флуконазолды пероральді қабылдау (400 мг 1-ші күні, содан соң 4 күн бойына 200 мг әрбір 24 сағатта) вориконазолдың концентрациясы және AUC мәнінің орташа тиісінше 57% және 79% ұлғаюына алып келді. Вориконазол және флуконазолды кез келген дозада бір уақытқа тағайындау ұсынылмайды.

Антикоагулянттар: варфарин қабылдаған дені сау еркек-еріктілерде, флуконазол протромбиндік уақытты 12 % ұлғайтты.

Флуконазолды варфаринмен бір мезгілде қабылдаған емделушілерде протромбиндік уақыттың ұлғаюына байланысты қан кетулер (гематома түзілуі, мұрыннан қан кету, асқазан-ішектен қан кетуі, гематурия және мелена)

болғаны туралы хабарламалар болды. Кумаринді антикоагулянттар қабылдайтын науқастарда протромбиндік уақытты үнемі бақылау керек.

Азитромицин: азитромицинді бір мезгілде бір реттік 1200 мг дозада және флуконазолды 800 мг дозада ішке пероральді қолдану флуконазол мен азитромициннің елеулі фармакокинетикалық өзара әрекеттесулеріне алып келмеді.

Бензодиазепиндер (әсері қысқа мерзімдік): мидазоламды ішке тағайындағанда флуконазолды қолдану біріншісінің концентрациясының елеулі жоғарылауына және психомоторлық реакциялар туындауына соқтырады. Мидазоламның бұл әсері флуконазолды көктамыр ішіне қолдануға қарағанда флуконазолды капсула түрінде қабылдағанда айқын білінеді. Флуконазол қабылдап жүрген емделушіге бензодиазепин тағайындау қажет болса, соңғысының дозасын азайту керек, ал емделушіні үнемі бақылау керек болады.

Цизаприд: флуконазол мен цизапридті бір мезгілде қолдануда "пируэт" типті пароксизмальді қарыншалық тахикардияны қоса, жүрек тарапынан жағымсыз реакциялардың бірен-саран жағдайлары сипатталады. 200 мг флуконазолды тәулігіне бір рет және 20 мг цизапридті тәулігіне төрт рет бір мезгілге тағайындау цизапридтің қан плазмасындағы концентрациясының елеулі ұлғаюына және QТ аралығының ұзаруына алып келді. Флуконазол қабылдайтын емделушілерге цизаприд тағайындауға болмайды. Циклоспорин: клиникалық зерттеулердің деректері бойынша бүйрек трансплантациясы реципиенттерінде тәулігіне 200 мг дозадағы флуконазол

циклоспорин концентрациясын баяу ұлғайтты. Алайда басқа зерттеулер барысында флуконазолды тәулігіне 100 мг көп рет қабылдағанда сүйек кемігі реципиенттерінде циклоспорин деңгейінің өзгерістері анықталмаған. Флуконазолмен емдеуде қандағы циклоспорин концентрациясын анықтау ұсынылады.

Гидрохлоротиазид: флуконазол қолданған дені сау еріктілерде өзара әрекеттесулердің кинетикасын зерттеуде гидрохлортиазидті көп рет қолдану флуконазолдың плазмадағы концентрациясының 40 %-ға жоғарылауына алып келді. Бұл көрсеткішке әсер ету диуретиктер қолданатын емделушілерде флуконазол дозасын өзгертуді талап етпейді, бірақ дәрігерлер болуы мүмкін өзара әрекеттесулер туралы ұмытпауы тиіс.

Пероралъді контрацептивтер: 50 мг флуконазол қабылдағанда гормондар деңгейіне елеулі ешбір әсері анықталмады, ал тәулігіне 200 мг қабылдағанда этинилэстрадиолдың «концентрация-уақыт» (АUС) қисығы астындағы ауданы 40 %-ға және левоноргестрелдің «концентрация-уақыт» (АUС) қисығы астындағы ауданы 24 % ұлғайғаны бақыланған. Флуконазолды аптасына бір рет 300 мг дозада қабылдап зерттеуде этинилэстрадиол және норэтиндронның «концентрация-уақыт» (АUС) қисығы астындағы ауданы тиісінше 24 % және 13 %-ға артты. Флуконазолды келтірілген дозаларда көп рет қабылдағанда біріктірілген оральді контрацептивтердің тиімділігіне теріс әсері болуының ықтималдығы аз.

Фенитоин: флуконазол және фенитоинді бір мезгілге тағайындау фенитоин концентрациясының клиникалық елеулі дәрежеге дейін жоғарылауымен қатар жүруі мүмкін. Егер екі препаратты үйлестіре қолдану қажет болса қан сарысуындағы емдік концентрациясын қамтамасыз ету үшін фенитоин деңгейінің және оның дозасын таңдаудың мониторингі керек.

Рифабутин: флуконазол және рифабутиннің өзара әрекеттесу нәтижесінде соңғысының сарысулық деңгейі жоғарылағаны туралы мәлімделген. Флуконазол және рифабутинді бір уақытқа тағайындағанда увеит жағдайы сипатталған.

Рифабутин және флуконазолды бір уақытта қабылдайтын науқастарды үнемі бақылау керек.

Рифампицин: флуконазол және рифампицинді бір уақытқа тағайындау АUС 25 %-ға азаюына және флуконазолдың жартылай шығарылу кезеңі ұзақтығының 20 % азаюына алып келді. Рифампицин және флуконазолды бір уақытта қабылдайтын науқастарда соңғысының дозасын ұлғайтудың дұрыстығын қарастыру керек.

Сулъфонилмочевина препараттары: дені сау еріктілерде флуконазол бірге тағайындалғанда пероральді сульфонилмочевина препараттарының (хлорпропамид, глибенкламид, глипизид және толбутамидтің) жартылай шығарылу кезеңін ұзартты. Флуконазол және пероральді сульфонилмочевина препараттарын қант диабетімен науқастарға қатар тағайындауға болады, бірақ бұл арада гипогликемия даму ықтималдығын ескеру керек.

Теофиллин: флуконазолды 200мг-ден 14 күн бойына қабылдау теофиллин клиренсі орташа жылдамдығының 18 % төмендеуіне алып келді. Теофиллинді жоғары дозаларда қолданатын науқастарды немесе теофиллиннің уыттылық әсері қаупі жоғары науқастарды флуконазолмен емдеуде теофиллиннің артық дозалану симптомдарын бақылау керек; олар пайда болған жағдайда емді тиесілі өзгерту керек.

Терфенадин: флуконазол және терфенадинді бір уақытта қолдануда ырғақтың ауыр бұзылуы жағдайларына байланысты бұл препараттардың өзара әрекеттесулеріне қатысты зерттеулер жүргізілді. Флуконазолды тәулігіне 200 мг дозада қолдану арқылы зерттеулерде QТ аралығының ұзаруы бақыланған. 400 және 800 мг дозаларын қолдану, флуконазолды тәулігіне 400 мг және одан көп дозада қолдану терфенадиннің қан плазмасындағы концентрациясын елеулі жоғарылататынын көрсетті.

Флуконазолды тәулігіне 400 мг және одан көп дозада терфенадинмен бір мезгілге тағайындауға болмайды. Флуконазолмен тәулігіне 400 мг төмен дозада терфенадинмен үйлесімдегі емді ұдайы бақылаумен жүргізу керек.

Астемизол: флуконазолды бір мезгілде астемизолды немесе цитохром Р450 жүйесімен метаболизденетін басқа да препараттарды қабылдайтын емделушілерде қолдану бұл препараттың қан сарысуындағы концентрациясы жоғарылауымен қатар жүруі мүмкін. Нақты ақпарат болмағанда флуконазолмен бір уақытқа сақтықпен тағайындау керек. Емделушілер мұқият бақылауды талап етеді.

Басқа дәрілік заттармен өзара әрекеттесулеріне зерттеулер жүргізілмеген, сондықтан өзара әрекеттесулерінің потенциалды мүмкіндігі бар.

Үйлесімділігі

Көктамыр ішіне енгізуге арналған флуконазол төмендегі ерітінділермен үйлесімді:

а) Рингер ерітіндісі;

б) Хартман ерітіндісі;

в) калий хлоридінің декстрозадағы ерітіндісі;

г) 4,2 % натрий бикарбонаты ерітіндісі;

д) аминофузин;

е) 0,9 % натрий хлориді ерітіндісі.

Флуконазолды жоғарыда аталған ерітінділердің біреуімен бірге инфузиялық жүйемен енгізуге болады.

Айрықша нұсқаулар

Жекелеген жағдайларда флуконазол қолдану бауырдың уытты зақымдануларымен қатар жүрді, оның ішінде салдары өлімге соқтырғаны да бар (ең бастысы, олар қатарлас ауыр аурулары бар науқастарда бақыланған).

Флуконазол қолдануға байланысты гепатоуытты әсерлер туындау жағдайында, олардың жалпы тәуліктік дозаға, ем ұзақтығына, жынысы мен науқастың жасына тәуелділігі анықталмаған. Флуконазолдың гепатоуытты әсері әдетте қайтымды болды, оның белгілері ем тоқтатылған соң жойылып отырды.

Флуконазолмен ем кезінде бауыр қызметі көрсеткіштері бұзылатын науқастарды бауыр зақымдану белгілерін анықтау мақсатында бақылау керек. Флуконазолмен ем кезінде бауырдың патологиялық қызметі дамитын емделушілер бауырдың күрделірек жарақаты дамуына мұқият бақылануы тиіс.

Емделуші бауырға берілетін күрделі әсерінің симптомдарынан (маңыздысы астения, анорексия, жүрек айнуы, құсу және сарғаю) хабардар болуы тиіс.

Флуконазол қолдануға байланысты болуы мүмкін бауыр зақымдануының клиникалық белгілері пайда болуында препаратты тоқтату керек.

Флуконазолды бүйрек қызметі бұзылуы бар емделушілерге сақтықпен тағайындау керек.

Балалардағы дерматофитияны емдеуге арналған флуконазолды зерттеу нәтижесіне сай флуконазол тиімділігі жөнінен гризеофульвиннен аспайды және жалпы тиімділік көрсеткіші 20% азды құрайды. Сондықтан флуконазолды дерматофитияны емдеу үшін қолдануға болмайды. Флуконазолдың криптококкоздың басқа орналасудағыларын емдеу үшін (мысалы, өкпе криптококкозы және тері криптококкозы) тиімділігіне айғақ жеткіліксіз, сондықтан бұл ауруларды емдеуге арналған дозалық режиміне қатысты ұсыныстар жоқ.

Паракокцидиоидомикоз, гистоплазмоз және тері-лимфалық споротрихоз сияқты эндемиялық микоздардың басқа түрлерін емдеу үшін флуконазол тиімділігіне айғақ жеткіліксіз, сондықтан бұл ауруларды емдеуге арналған дозалық режиміне қатысты ұсыныстар жоқ.

Флуконазолмен ем кезінде науқастарда Стивенс-Джонсон синдромы, уытты эпидермальді некролиз сияқты эксфолиативті тері реакцияларының сирек жағдайларда дамыған. ЖИТС-пен науқастар дәрінің үлкен мөлшерін қолдануда ауыр тері реакциялары дамуына бейімдеу болып келеді.Егер беткейлік зең жұқпалары бар науқастарда флуконазол қолдануға байланысты бөртпе пайда болса, препаратты тоқтату керек.

Инвазивті/жүйелік зең жұқпалары бар науқастарды тері бөртпесі пайда болса мұқият бақылау керек және буллезді зақымданулар немесе мультиформалы эритема пайда болғанда флуконазолды тоқтату керек.

Флуконазолды қоса, кейбір азолдардың электрокардиограммадағы QТ аралығының ұзаруымен байланысы бар. Флуконазол қолданғандарда QТ-аралығы ұзаруының және қарыншалық дірілдің бірен-саран жағдайлары анықталған. Бұл мәлімдемелер көптеген қауіп факторлары, жүректің органикалық аурулары бар, электролиттік алмасуы бұзылған және осы бұзылуларды тудыру факторлары болуы мүмкін қатарлас ауруларды емдеу қажет ауыр науқасты емделушілер туралы деректерде болды. Q–Tс аралығын ұзартатын және цитохром Р450 CYP 3А4 ферменті көмегімен метаболизденетін дәрілік заттармен бір уақытта қолдануға болмайды.

Флуконазолды потенциалды проаритмиялық жағдайы бар емделушілерге сақтықпен тағайындау керек.

Флуконазол цитохром P450 (CYP) 2C9 изоферментінің қуатты тежегіші және CYP3A4 ферментінің орташа тежегіші болып табылады. Төменде келтірілген өзара әрекеттесулерден басқа, флуконазолмен бірге қолданғанда CYP2C9 және CYP3A4 ферменттерімен метаболизденетін басқа қосылыстардың плазмалық концентрацияларының жоғарылау қаупі бар. Сондықтан бұл біріктірілімдерді пайдаланғанда абай болу керек, ал науқастарды мұқият бақылаған дұрыс. Жартылай шығарылу кезеңінің ұзақтығынан флуконазолмен ем тоқтатылған соң флуконазолдың фермент тежегіш әсері 4-5 күн бойына сақталады.

Галофантрин CYP 3А4 ферментінің субстраты болып табылады және ұсынылған емдік дозаларда қолданғанда Q–Tс аралығын ұзартады.

Галофантрин мен флуконазолды бір уақытта қолдану ұсынылмайды.

Флуконазолды күніне 400 мг азырақ дозадан терфенадинмен үйлестіре қолдану мұқият тексерілуі тиіс.

Жекелеген жағдайларда анафилаксия туралы хабарланған.

Бұл препараттың бір милилитрінің құрамында 0,154 ммоль натрий бар. Натрий бақыланатын емдәмдегі емделушілер сақ болуы тиіс.

Жүктілік және лактация кезеңінде қолданылуы

Флуконазолды жүкті әйелдерде қолданудан аулақ болу керек.

Лактация кезінде қолданғанда флуконазол сүтте қандағыдай концентрацияда табылады, сондықтан препаратты бала емізетін әйелдерге тағайындау ұсынылмайды.

Балаларда

Препарат педиатриялық практикада қолданылады.

Үйлесімсіздігі

Препараттың басқа препараттармен спецификалық емес үйлесімсіздігі жағдайлары сипатталмаса да, оны инфузия алдында басқа препараттармен араластыру ұсынылмайды.

Дәрілік заттың көлік құралын немесе қауіптілігі зор механизмдерді басқару қабілетіне әсер ету ерекшеліктері

Флуконазолды қолдану тәжірибесі автокөлік немесе механизмдерді басқару қабілетіне әсері болу ықтималдығы аз екенін айғақтайды.

Артық дозалануы

Симптомдары: жүрек айнуы, құсу, құрысулар, естен тану.

Емі: симптоматикалық (қосымша шаралар қолданумен бірге асқазан шаю – қажет болғанда). Флуконазол көбіне несеппен шығарылады, сондықтан қарқынды диурез оның ағзадан шығарылуын жылдамдатуы мүмкін. 3 сағаттық гемодиализ сеансынан кейін қан плазмасындағы флуконазол концентрациясы шамамен 50 % азаяды.

Шығарылу түрі және қаптамасы

Инфузияға арналған 2 мг/мл 50 мл, 100 мл ерітінді

50 мл, 100 мл препараттан резеңке тығынмен тығындалған және алюминий қалпақшамен немесе алюминий-пластик қалпақшамен қаусырылған, қанға, трансфузиялық және инфузиялық препараттарға арналған шыны бөтелкелерде.

Бөтелкелер термоұстағыш үлбірмен палеттерге тартып оралған немесе әрбір бөтелке орама қағазбен оралған.

Термоұстағыш үлбірмен палеттерге тартып оралған бөтелкелер медицинада қолданылуы жөнінде мемлекеттік және орыс тілдеріндегі нұсқаулықтың тиісті санымен бірге картон жәшіктерге салынған

Сақтау шарттары

Жарықтан қорғалған жерде, 250С-ден аспайтын температурада сақтау керек.

Балалардың қолы жетпейтін жерде сақтау керек!

Сақтау мерзімі

2 жыл

Қаптамасында көрсетілген жарамдылық мерзімі өткеннен кейін қолдануға болмайды.

Дәріханалардан босатылу шарттары

Рецепт арқылы

Өндіруші

«Юрия-Фарм» ЖШҚ

Украина, 03680, Киев қ., Н.Амосов к-сі, 10.

Тіркеу куәлігінің иесі

«Юрия-Фарм» ЖШҚ

Украина, 03680, Киев қ., Н.Амосов к-сі, 10.

Қазақстан Республикасы аумағында тұтынушылардан өнім (тауар) сапасына қатысты шағымдарды қабылдайтын ұйымның мекенжайы

«GOOD LOOK сауда үйі» ЖШС

ҚАЗАҚСТАН РЕСПУБЛИКАСЫ, Тараз қ., Көшеней 6-тұйық к-сі16.

Телефон нөмірі: 8(726) 2438219

Электронды поштасы: goodlook@mail.ru