Флуимуцил (20 мг/мл)

• русский
• қазақша

• Скачать инструкцию медикамента

Саудалық атауы

Флуимуцил

Халықаралық патенттелмеген атауы

Ацетилцистеин

Дәрілік түрі

Ішуге арналған ерітінді, 20 мг/мл және 40 мг/мл

Құрамы

100 мл ерітіндінің құрамында

белсенді зат - 2 немесе 4 г ацетилцистеин,

Ішуге арналған ерітінді, 20 мг/мл

қосымша заттар: метилпарагидроксибензоат, натрий бензоаты, динатрий эдетаты, натрий кармеллозасы, натрий сахаринаты, натрий цикламаты, сукралоза, таңқурай хош иістендіргіші, натрий гидроксиді, тазартылған су.

Ішуге арналған ерітінді, 40 мг/мл

қосымша заттар: метилпарагидроксибензоат, пропилпара-гидроксибензоат, динатрий эдетаты, натрий кармеллозасы, натрий сахаринаты, анар хош иістендіргіші, құлпынай хош иістендіргіші, сорбитол 70%, натрий гидроксиді, тазартылған су.

Сипаттамасы

Таңқурайға тән иісі бар мөлдір немесе сәл бозаңданатын түссіз ерітінді

(20 мг/мл).

Құлпынай мен анарға тән иісі бар мөлдір түссіз немесе әлсіз сары түсті ерітінді (40 мг/мл).

Фармакотерапиялық тобы

Суық тию және жөтел симптомдарын жоюға арналған препараттар. Қақырық түсіретін препараттар. Муколитиктер. Ацетилцистеин.

АТХ коды: R05CB01

Фармакологиялық қасиеттері

Фармакокинетикасы

Флуимуцил ішу арқылы қабылдағанда жақсы сіңіріледі. Ол бауырда цистеинге дейін шұғыл деацетилденеді. Қанда бос және плазма ақуыздарымен байланысқан ацетилцистеин мен оның метаболиттерінің (цистеин, цистин, диацетилцистеин) қозғалыс тепе-теңдігі байқалады. Бауыр арқылы «алғаш өту» әсерінің жоғары екеніне орай, ацетилцистеин биожетімділігі 10% жуық құрайды. Ацетилцистеин жасушааралық кеңістікке өтеді, көбінесе бауырда, бүйректе, өкпеде, бронх сөлінде таралады.

Плазмадағы ең жоғары концентрациясына ішу арқылы қабылдағаннан кейін 1-3 сағаттан соң жетеді және 15 ммоль/л құрайды, плазма ақуыздарымен байланысы – 50%. Т1/2 – 1 сағатқа жуық, бауыр циррозында 8 сағатқа дейін ұзарады. Бүйрекпен белсенді емес метаболиттер түрінде (органикалық емес сульфаттар, диацетилцистеин) шығарылады, болымсыз бөлігі өзгеріссіз күйде ішек арқылы бөлініп шығады. Плацентарлық бөгет арқылы өтеді.

Фармакодинамикасы

Муколитиктік дәрі, қақырықты сұйылтады, оның көлемін көбейтеді, қақырық бөлінуін жеңілдетеді. Әсері ацетилцистеиннің бос сульфгидрильді топтарының қақырықтық қышқыл мукополисахаридтердің молекулалар ішіндегі және аралығындағы дисульфидті байланыстарын үзу қабілетімен байланысты, бұл мукопротеиндер деполимеризациясына және қақырық тұтқырлығының азаюына әкеледі. Іріңді қақырық тұсында белсенділігін сақтайды.

Тұтқырлығы аз сиаломуциндердің бокал тәрізді жасушалар арқылы сөл бөлуін арттырады, бронх шырышты қабығының эпителий жасушаларындағы бактериялар адгезиясын төмендетеді. Сөлін фибрин ерітетін бронхтардың мукозды жасушаларын көтермелейді. Осыған ұқсас әсерін ЛОР-ағзалардың қабыну ауруларында түзілген сөлге де көрсетеді. Электрофильді тотықтырғыш токсиндерді бейтараптандыруға қабілетті SH-топ болуымен шартталған антиоксиданттық әсерін көрсетеді. Ацетилцистеин жасуша ішіне оңай өтеді, жасушаішілік глютатион синтезделетін L-цистеинге дейін деацетилденеді. Глютатион – жоғары реактивті трипептид, антиоксидант, эндогенді және экзогенді бос радикалдар мен токсиндер аулайтын цитопротектор. Ацетилцистеин жасушалардың тотығу-тотықсыздану үдерістеріне қатысатын жасушаішілік глютатион сарқылуын болдырмайды және оның синтезінің артуына ықпал етеді, осылайша зиянды заттар детоксикациясына жағдай жасайды. Парацетамолмен улану кезінде у қайтарғы ретіндегі ацетилцистеин әсері осымен түсіндіріледі.

Альфа1-антитрипсинді (эластаза тежегіші) белсенді фагоциттер миелопероксидазасымен өндірілетін HOCl тотықтырғышының белсенділіктен айыру әсерінен сақтандырады. Қабынуға қарсы әсері де бар (өкпе тініндегі қабынудың дамуына жауапты бос радикалдардың және оттегісі бар белсенді заттардың түзілуін бәсеңдету есебінен).

Қолданылуы

- қақырықтың шектен тыс түзілуімен қатар жүретін тыныс алу жолдарының жедел және созылмалы ауруларында

- парацетамолдың артық дозалануында

Қолдану тәсілі және дозалары

Ішке қабылдауға арналған.

Ересектерге: 40 мг/мл 1-3 қабылдауға бөліп ішуге арналған 5 мл ерітінді (күніне 200-600 мг ацетилцистеинге сәйкес келеді).

Балаларға:

- 2-ден 5 жасқа дейінгі балалар: 20 мг/мл 2-3 қабылдауға бөліп ішуге арналған 5 мл ерітінді (күніне 200-300 мг ацетилцистеинге сәйкес келеді)

- 6-дан 14 жасқа дейінгі балалар мен жасөспірімдер: 20 мг/мл 3-4 қабылдауға бөліп ішуге арналған 5 мл ерітінді (күніне 300-400 мг ацетилцистеинге сәйкес келеді) немесе 40 мг/мл 2 қабылдауға бөліп ішуге арналған 5 мл ерітінді (күніне 400 мг ацетилцистеинге сәйкес келеді)

- 14 жастан асқан балалар: 40 мг/мл 1-3 қабылдауға бөліп ішуге арналған 5 мл ерітінді (күніне 200-600 мг ацетилцистеинге сәйкес келеді).

Парацетамолмен артық дозаланғанда: қабылдағаннан кейін алғашқы 10 сағат ішінде мүмкіндігінше тезірек 140 мг/кг есебінен, әріқарай 1-3 күн бойы әр 4 сағат сайын 70 мг/кг есебінен Флуимуцил енгізеді.

Жағымсыз әсерлері

Жиі емес:

- аса жоғары сезімталдық

- бас ауыру

- құлақтың шыңылдауы

- тахикардия, артериялық қысымның төмендеуі

- стоматиттер, абдоминальді ауырулар, жүрек айну, құсу, диарея

- есекжем, бөртпе, Квинке ісінуі, қышыну, тері бөртпесі

- гипертермия

Сирек:

- бронх түйілу, диспноэ

- диспепсия

Өте сирек:

- анафилактикалық және анафилактоидтық реакциялар (Стивенс-Джонсон синдромы, Лайелл синдромы)

- қан кету

Жиілігі белгісіз:

- бет ісінуі

- тромбоциттер агрегациясының төмендеуі

Қолдануға болмайтын жағдайлар

- препараттың қандай да бір компонентіне аса жоғары сезімталдық

- өршу сатысындағы асқазан мен он екі елі ішектің ойық жаралы ауруы

- қан кету, өкпеден қан кету

- фенилкетонурия

- тұқым қуалайтын фруктозаны көтере алмаушылық, глюкоза-лактоза мальабсорбциясы, сукраза-изомальтаза ферментінің тапшылығы

- жүктілік және лактация кезеңі

- 2 жасқа дейінгі балаларға

- 6 жасқа дейінгі балаларға (40 мг\мл ерітінді үшін)

Дәрілермен өзара әрекеттесуі

Ацетилцистеинді жөтелге қарсы дәрілермен үйлестіріп қолдану жөтел рефлексінің бәсеңдеуі салдарынан қақырық іркілісін күшейтуі мүмкін.

Тетрациклиндер (доксициклинді қоса), ампициллин, амфотерицин В сияқты антибиотиктермен бір мезгілде қолданғанда олар ацетилцистеиннің тиолды тобының өзара әрекеттесуі екі препараттың да белсенділігінің төмендеуіне апарады. Сондықтан осы препараттарды қабылдаулар арасындағы аралық 2 сағаттан аз құрауы тиіс.

Ацетилцистеин мен нитроглицеринді бір мезгілде қабылдау соңғысының тамыр кеңейткіш және дезагрегантты әсерінің күшеюіне әкелуі мүмкін. Егер ацетилцистеин мен нитроглицеринді бір мезгілде қабылдау қажет болса, емделушілер сипаты ауыр болып келетін гипотензияны бақылап отыру керек және оларға бас ауыруларының пайда болуы немесе дамуы жөнінде ескерткен дұрыс. Белсендірілген көмір ацетилцистеин тиімділігін төмендетуі мүмкін.

Ацетилцистеин парацетамолдың уытты әсерлерін жояды.

Айрықша нұсқаулар

Бронх демікпесі және обструкциялық бронхиті бар науқастарға, бронх түйілуінің дамуы мүмкін екеніне орай, ацетилцистеинді сақтықпен тағайындау керек. Бронх түйілуі туындаған жағдайда ацетилцистеинмен емдеуді дереу тоқтату керек. Ацетилцистеин қолдану, ең алдымен, емдеудің басында бронх сөлінің сұйылуын туындатып, оның көлемін ұлғайтуы мүмкін. Егер емделуші қақырықты өнімді жөтеліп шығаруға қабілетсіз болса, постуральді дренаж немесе бронхтардан қақырықты аспирациялау қажет.

Флуимуцил препаратының құрамында фенилаланин көзі – аспартам бар. Мұны фенилкетонуриядан зардап шегетін емделушілерге ескерту қажет.

Сонымен қатар препарат құрамында тұқым қуалайтын фруктоза көтере алмаушылығы, сондай-ақ глюкоза-галактоза сіңуінің бұзылуы және сахароза-изомальтаза жеткіліксіздігі бар емделушілерде қолдануға болмайтын сорбитол мен сахароза бар.

Сыртартқысында асқазан мен он екі елі ішек ойық жарасы бар емделушілерге, әсіресе, асқазан шырышты қабығын тітіркендіретін өзге дәрілік заттар қатарлас қабылданған жағдайларда сақтықпен қабылдау ұсынылады.

Көлік құралын немесе қауіптілігі зор механизмдерді басқару қабілетіне әсер ету ерекшеліктері

Әсер етпейді

Артық дозалануы

Симптомдары: артық дозалану жүрек айну, құсу және диарея сияқты асқазан-ішек симптомдарымен көрініс беруі мүмкін.

Емі: симптоматикалық ем. Арнайы у қайтарғысы жоқ.

Шығарылу түрі және қаптамасы

200 мл препараттан хлорбутилді эластомерлі жабыны бар бұралатын пластик қақпақшамен тығындалған III типті күңгірт шыны құтыда.

1 құтыдан өлшегіш қалпақшасымен және медицинада қолданылуы жөніндегі мемлекеттік және орыс тілдеріндегі нұсқаулықпен бірге

картон пәшкеде.

Сақтау шарттары

25 С-ден аспайтын температурада сақтау керек.

Балалардың қолы жетпейтін жерде сақтау керек!

Сақтау мерзімі

2 жыл.

Құтыны алғаш ашқаннан кейін препаратты 15 күн ішінде пайдалану керек.

Жарамдылық мерзімі өткеннен кейін препаратты қолдануға болмайды.

Дәріханалардан босатылу шарттары

Рецепт арқылы

Өндіруші

Замбон С.П.А.

Виа делла Кимика, 9 – 36100 Виченца, Италия

Тіркеу куәлігі иесінің атауы және елі

Замбон С.П.А., Италия

Қазақстан Республикасы аумағында тұтынушылардан өнім (тауар) сапасына қатысты шағымдар қабылдайтын ұйымның мекенжайы:

«ВИВА Фарм» ЖШС

2-ші Остроумов к-сі, 33, Алматы қ., ҚР

тел.: +7 (727) 383 74 63, факс: +7 (727) 383 74 56;

e-mail: viva@vivapharm.kz, pv@vivapharm.kz