Упсарин УПСА (500 мг)

• русский
• қазақша

• Скачать инструкцию медикамента

 

УПСАРИН УПСА

Саудалық атауы

Упсарин УПСА

Халықаралық патенттелмеген атауы

Ацетилсалицил қышқылы

Дәрілік түрі

500 мг көпіршитін таблеткалар

Құрамы

Бір таблетканың құрамында

белсенді зат: ацетилсалицил қышқылы - 500 мг,

қосымша заттар: натрий гидрокарбонаты, лимонның сусыз қышқылы , сусыз натрий цитраты, сусыз натрий карбонаты, аспартам E 951, повидон (К30), кросповидон, апельсин хош иістендіргіші*.

*алфа-пинен, бета-пинен, мирцен, лимонен, октаналь, деканаль, линалол, алфа-терпинеол, мальтодекстрин, акация, күкірттің қостотығы, бутилденген гидроксианизол.

Сипаттамасы

Беті тегіс және сызығы бар, шеттері кертілген ақ түсті таблеткалар, суда газ көпіршіктерін бөле отырып ериді.

Фармакотерапиялық тобы

Анальгетиктер мен антипиретиктер. Салицил қышқылы мен оның туындылары.

АТЖ коды N02ВА01

Фармакологиялық қасиеттері

Фармакокинетикасы

Ацетилсалицил қышқылы пероральді енгізуде тез сіңіріледі. Плазмадағы ең жоғарғы концентрациясына 15-40 минуттан соң жетеді. Ацетилсалицил қышқылы белсенді метаболиті салицил қышқылын түзе отырып, тез гидролизденеді. Биожетімділігі дозасына байланысты және 500 мг-ден аз дозасы үшін 60% және 1 г-ден артық дозасы үшін 90% құрайды. Ацетилсалицил қышқылы мен салицил қышқылы барлық тіндерге тез таралады. Плацентарлық бөгет арқылы өтеді және ана сүтіне түседі. Салицил қышқылы айтарлықтай дәрежеде (90%) плазма ақуыздарымен байланысады. Плазмадан жартылай шығарылу кезеңі ацетилсалицил қышқылы үшін 15-20 минутты, салицил қышқылы үшін 2 - 4 сағатты құрайды. Ацетилсалицил қышқылы едәуір дәрежеде бауырда метаболизмге ұшырайды, көбінесе несеппен салицил қышқылы мен глюкурондық конъюгаттар түрінде шығарылады.

Фармакодинамикасы

Ацетилсалицил қышқылы ауыруды басатын, ыстық түсіретін және қабынуға қарсы қасиеттері бар қабынуға қарсы стероидтық емес препараттар тобына жатады. Оның әсер ету механизмі простагландин синтезіне қатысатын циклооксигеназа ферменттерін қайтымсыз тежеуіне негізделген. Сондай-ақ, ацетилсалицил қышқылы А2 тромбоксанының тромбоцитарлық синтезін бөгеу жолымен тромбоциттер агрегациясын тежейді.

Қолданылуы

- бас ауыруында (оның ішінде, алкогольдік абстинентті синдроммен байланысты), тіс ауыруында, бас сақинасында, невралгияда, кеуделік түбіршектік синдромда, бұлшықет пен буындардың ауыруында, етеккір кезіндегі ауруларда

- тұмау және басқа жұқпалы-қабынбалы аурулардағы жоғары дене температурасында (ересектер мен 16 жастан асқан балаларда).

Қолдану тәсілі мен дозалары

Тек ересектер мен 16 жастан асқан балалар үшін

Ең жоғарғы ұсынылған тәуліктік дозасы 3 г аспиринді, яғни, тәулігіне 6 көпіршитін таблетканы құрайды.

Әдеттегі дозасы 500 мг-лік бір көпіршитін таблетканы құрайды. Қажет болған жағдайда дозасын 4 сағаттан кем емес аралықпен қайталауға болады. Ауыру қарқындырақ немесе қызба болса, 500 мг-ден екі көпіршитін таблетка дозасын қабылдауға болады, қажет болса оны 4 сағат аралықпен, дозасын тәулігіне 6 көпіршитін таблеткадан асырмай қайталауға болады.

Егде жастағы тұлғалар:

Ең жоғарғы тәуліктік дозасы 2 г аспирин, яғни, тәулігіне 4 көпіршитін таблетканы құрайды.

Әдеттегі дозасы 500 мг-лік бір көпіршитін таблетканы құрайды. Қажет болған жағдайда дозасын 4 сағаттан кем емес аралықпен қайталауға болады. Ауыру қарқындырақ немесе қызба болса, 500 мг-ден екі көпіршитін таблетка дозасын қабылдауға болады, қажет болса оны 4 сағат аралықпен, дозасын тәулігіне 4 көпіршитін таблеткадан асырмай қайталауға болады.

Жағымсыз әсерлері

Асқазан-ішек жолы тарапынан әсерлер

- іштің ауыруы

- айқын (қан құсу, қанды нәжіс және т.б.) немесе жасырын асқазан-ішек қан кетуі, темір тапшылығы анемиясына себеп болады. Дозасы жоғары болған сайын, мұндай қан кетулердің туындау жиілігі жоғары болады.

- асқазанның ойық жаралары мен тесілуі.

Орталық жүйке жүйесі тарапынан әсерлер

- бас ауыруы, вертиго

- естудің нашарлауын сезіну

- құлақтағы шуыл, ол әдетте артық дозаланудың белгісі болып табылады.

Гематологиялық әсерлер

Геморрагиялық синдром (мұрыннан қан кету, қызыл иектің қанауы, пурпура, және т.б.) хирургиялық араласуға ұшыраған емделушілерде қан кету қаупін арттыруы мүмкін.

Жоғары сезімталдық реакциясы

Есекжем, тері реакциялары, анафилактикалық реакциялар, демікпе, Квинке ісінуі.

Рейе синдромы.

Қолдануға болмайтын жағдайлар

Бұл дәрілік затты мына жағдайларда қолдануға болмайды:

- ацетилсалицил қышқылына немесе қандай да бір құрамдас бөлігіне жоғары сезімталдықта

- фенилкетонурияда, өйткені препараттың құрамында аспартам бар

- сыртартықыда салицилаттарды немесе осыған ұқсас белсенді заттарды, әсіресе, қабынуға қарсы стероидтық емес препараттарды қабылдаудан туындаған демікпе болса

- жүктіліктің үшінші триместрінде (тәулігіне ≥ 500 мг және қабылдауға)

- белсенді фазадағы асқазан мен он екі елі ішектің ойық жарасында

- кез-келген конституциональді немесе жүре пайда болған геморрагиялық ауруларда

- геморрагия қаупінде

- бауыр мен бүйректің ауыр жеткіліксіздігінде

- ауыр, бақыланбайтын жүрек жеткіліксіздігінде

- аптасына 15 мг-ден асатын дозада метотрексатпен біріктіруге,

- ацетилсалицил қышқылының жоғары дозаларын пайдалануда пероральді антикоагулянттармен біріктіруге

- 16 жасқа дейінгі балаларға (Рейе синдромы дамуының қаупі жоғары).

Дәрілермен өзара әрекеттесуі

Ацетилсалицил қышқылы метотрексаттың, ҚҚСП әсерлерін, тиклопидин мен клопидогрельдің, тирофибанның, эптифибатид пен абциксимабтың, илопросттың, тромбоцитке қарсы препараттардың, пероральді антикоагулянттардың, гепариндердің, диабетке қарсы дәрілер: инсулиндердің уыттылығын күшейтеді; диуретиктер мен АПФ тежегіштерінің, урикозуриялық дәрілердің (бензбромарон), жатырішілік ұрықтануға қарсы дәрілердің әсерін төмендетеді.

Глюкокортикоидтар қандағы салицилаттар деңгейін төмендетеді және оларды тоқтатқаннан кейін салицилаттармен артық дозалану қаупін жоғарылатады.

Жергілікті асқазан-ішек дәрілері (тұздар, оксидтер, магний, алюминий, кальций гидроксидтері) салицилаттардың бүйрекпен шығарылуын күшейтеді.

Айрықша нұсқаулар

- Басқа препараттармен біріктірілімінде артық дозалануды болдырмау үшін, басқа препараттардың құрамында ацетилсалицил қышқылы жоқ екендігіне көз жеткізу керек.

- Ауыруды басатын дәрілердің жоғары дозаларын ұзақ уақыт қабылдауда туындаған бас ауыруын ұлғайтылған дозаларымен емдеуге болмайды. Ауыруды басатын дәрілерді, әсіресе біріктірілген ауыруды басатын дәрілерді ұдайы қабылдау бүйрек жеткіліксіздігі қаупі бар тұрақты бүйрек зақымдануын тудыруы мүмкін.

- Балаларға құрамында ацетилсалицил қышқылы бар препараттарды тек дәрігердің ұсынымымен тағайындау қажет, өйткені вирустық жұқпа жағдайында Рейе синдромының туындау қаупі жоғарылайды. Рейе синдромының белгілері: ұзақ құсу, сана бұзылыстары, аномальді мінез-құлық болып табылады.

-Гемолиз туындау қаупіне байланысты, глюкоза-6-фосфат дегидрогеназасы жеткіліксіздігі жағдайында ацетилсалицил қышқылын дәрігердің қадағалауымен қабылдау керек.

- Ацетилсалицил қышқылының тромбоцитке қарсы әсерін ескере отырып, хирургиялық араласулар алдында дәрігерді құлағдар ету керек.

- Бұл дәрілік заттың құрамында көпіршитін бір таблеткаға 388,5 мг натрий бар, мұны қатаң түрде тұзы аз емдәм ұстанып жүрген емделушілерді емдеуде ескеру қажет.

- Препараттың құрамында глюкоза болғандықтан, ол глюкоза және галактоза мальабсорбциясы синдромында қарсы көрсетілімді.

Жүктілік және лактация кезеңі

Қажет болған жағдайда ацетилсалицил қышқылын жүктіліктің I және II триместрі кезінде симптоматикалық ем үшін тағайындауға болады.

Пайда/қауіп арақатынасын бағалағаннан кейін ғана тағайындалуы мүмкін.

Сақтық шарасы ретінде, ацетилсалицил қышқылын күніне 150 мг-ден артық дозада ұзақ уақыт емдеуге пайдаланбаған дұрыс.

Ацетилсалицил қышқылы жүктіліктің соңғы үш айы бойына қарсы көрсетілімді.

Дәрілік заттың көлік құралдарын және қауіптілігі зор механизмдерді басқару қабілетіне әсер ету ерекшеліктері

Автокөлік басқару және механизмдермен жұмыс жасау қабілетіне әсер еткен жағдайлары байқалған жоқ.

Артық дозаланғанда

Егде жастағы тұлғаларда және, әсіресе, кішкентай балаларда артық дозалану қаупі бар, ол өмірге қауіп төндіруі мүмкін.

Белгілері:

Құлақтағы шуыл, естудің нашарлағанын сезіну, бас ауыруы, вертиго артық дозалану белгілері болып табылады. Оларды дозасын төмендету арқылы бақылауға болады.

Ауыр улану:

Балаларда артық дозалану бір қабылдағанда 100 мг/кг немесе одан да көп дозада болса, өлімге әкелуі мүмкін. Белгілеріне мыналар жатады: қызба, гипервентиляция, кетоз, респираторлық алкалоз, метаболикалық ацидоз, кома, қантамыр жеткіліксіздігі, тыныс алу жеткіліксіздігі, айқын гипокликемия.

Емі:

Дереу мамандандырылған медициналық мекемеге жатқызу керек.

Затты асқазанды шаю және белсенділендірілген көмірді енгізу арқылы шығару. Қышқыл-сілтілік теңгерімді бақылау. Сілтілік диурез, ол несептегі рН 7,5-8 мөлшеріне жетуге мүмкіндік береді. Ауыр уланған жағдайларда гемодиализ қолданылуы мүмкін. Симптоматикалық ем.

Шығарылу түрі мен қаптамасы

Алюминий фольгадан жасалып, ішкі жағынан полиэтиленмен қапталған пішінді ұяшықсыз қаптамада (стрипте) 4 көпіршитін таблетка. 4 пішінді қаптамадан (стрип) мемлекеттік және орыс тілдеріндегі медицинада қолданылуы жөніндегі нұсқаулықпен бірге картон қорапқа салынған.

Сақтау шарттары

Құрғақ жерде, 25С-ден аспайтын температурада сақтау керек.

Балалардың қолы жетпейтін жерде сақтау керек!

Сақтау мерзімі

3 жыл.

Жарамдылық мерзімі өткеннен кейін пайдалануға болмайды.

Дәріханалардан босатылу шарттары

Рецептісіз

Өндіруші

Бристол-Майерс Сквибб

979, авеню де Пирене, 47520 Ле Пассаж, Франция

Тіркеу куәлігі иесінің мекенжайы: 3, рю Жозеф Монье, а/я 325, 92506 Рюэй-Мальмэзон Седекс, Франция.

Тіркеу куәлігінің иесі

Бристол-Майерс Сквибб, Франция

Қазақстан Республикасы аумағында тұтынушылардан өнім (тауар) сапасына қатысты шағымдарды қабылдайтын ұйымның мекенжайы

«ВИВА ФАРМ» ЖАҚ

2-ші Остроумов к-сі, 33, Алматы қ-сы, ҚР

тел.: +7 (727) 383 74 63, факс: +7 (727) 383 74 56;

e-mail: viva@vivapharm.kz, botagoz.mashkeyeva@vivapharm.kz