Тиамина гидрохлорид (Витамин В1)

• русский
• қазақша

• Скачать инструкцию медикамента

Саудалық атауы

Тиамин гидрохлориді (Витамин В1)

Халықаралық патенттелмеген атауы

Тиамин

Дәрілік түрі

Инъекцияға арналған 5 % ерітінді, 1мл

Құрамы

1 мл ерітіндінің құрамында

белсенді зат - тиамин гидрохлориді (100% затқа шаққанда) 50,0 мг,

қосымша заттар: унитиол, инъекцияға арналған су.

Сипаттамасы

Өзіне тән әлсіз иісі бар мөлдір, түссіз немесе сәл боялған сұйықтық.

Фармакотерапиялық тобы

Витаминдер. В1 витамині және В6 және В12 витаминдермен оның біріктірілімі. В1 витамині. Тиамин.

АТХ коды А11DA01

Фармакологиялық қасиеттері

Фармакокинетикасы

Тиамин бұлшықет ішіне енгізген кезде тез және толық сіңіріледі. Барлық ағзалар мен тіндерге жеткілікті түрде тегіс таралады. Тиаминнің миокардта, қаңқа бұлшықеттерінде, жүйке тіндерінде және бауырда салыстырмалы жоғары мөлшері осы құрылымдардың тиаминді жоғары тұтынуына байланысты. Бауырда метаболизденеді және шамамен 8-10% өзгермеген күйде бүйрекпен шығарылады.

Фармакодинамикасы

Организмде тиамин гидрохлориді фосфорлану үдерістері салдарынан көптеген ферменттік реакциялардың коферменті болып табылатын және көмірсу, ақуыз және липидтік алмасуда маңызды рөл атқаратын кокарбоксилазаға айналады.

Құрамында азот атомының төрттен бір бөлігі бар тиамин гидрохлориді синапстарда жүйке қозуын жүргізуге әсер етеді, ганглиобөгегіш және кураре тәрізді әсерлері бар.

Қолданылуы

- В1 гиповитаминоз және авитаминозда (соның ішінде зондпен тамақтанудағы, гемодиализдегі, мальабсорбция синдромымен зардап шегетін емделушілерде)

- витаминге жоғары қажеттілікте (жүктілік және лактация кезеңінде)

Кешенді ем құрамында:

- дистрофиялық үдерістерде (ашығу, миокардиодистрофия, ішек атониясы, бауыр функциясының айқын бұзылуларында)

- шеткергі жүйке жүйесінің ауруларында (неврит, радикулит, невралгия, шеткергі парезде немесе салдануда)

- терінің зақымдануында (дерматоздар, теміреткі, псориаз, экземада)

- уыттануларда (соның ішінде созылмалы алкоголизм, тиреотоксикозда).

Қолдану тәсілі мен дозалары

Ересектерге бұлшықет ішіне 50 мг тиамин гидрохлоридін (1 мл 5% ерітінді) күнделікті 1 рет енгізеді. Тиаминді парентеральді енгізуді аз дозалардан (0,5 мл 5% ерітіндіден көп емес) бастау ұсынылады және көтерімдігі жақсы болғанда ғана жоғары дозаларға көшу керек. («Айрықша нұсқаулар» тарауынан толық қараңыз). Емдеу курсы әдетте күнделікті 10-30 күн.

8 жастан асқан балаларға

12,5 мг-дан (0,25 мл 5% ерітінді) енгізеді.

Жағымсыз әсерлері

- енгізген орынның ауырсынуы

- аллергиялық реакциялар (Квинке ісінуі, есекжем, тері қышынуы)

- құрысулары бар бронхоспастикалық синдром, анафилактикалық шок

- тахикардия, жүрек соғуын сезіну, коллапс

- синаптоплегия – тиаминнің түрлі медиаторлармен кешен құру қабілеті артериялық қысымның төмендеуімен, жүрек аритмияларының туындауымен, қаңқа (соның ішінде тыныс алу) бұлшықеттері жиырылуының бұзылуымен, орталық жүйке жүйесінің бәсеңдеуімен қатар жүруі мүмкін; тиамин гидрохлориді стафилококтың антибиотиктерге резистенттілігінің құрылуына ықпал етеді

- бас ауыруы, бас айналуы, мазасыздық, парестезиялар

- көру жүйкесінің зақымдалуы

- тыныс алудың қиындауы, ентігу

- жұтудың қиындауы, жүрек айнуы, ішек геморрагиялары

- гиперемия, қышыну

- бауыр ферменттері белсенділігінің бұзылуы

- жалпы бұзылулар: қатты тершеңдік, қалтырау, тремор, жалпы әлсіздік, ісінулер, қызба

- инъекция орнындағы реакциялар: бөртпелер, қышыну

Қолдануға болмайтын жағдайлар

- препаратқа және оның компоненттеріне аса жоғары сезімталдық

- В1 гипервитаминоз

Дәрілермен өзара әрекеттесуі

Тиамин гидрохлоридінің ерітіндісін құрамында сульфиттер бар ерітінділермен араластыруға болмайды, себебі оның ішінде ол толық ыдырайды. Тиаминді пиридоксинмен немесе цианокобаламинмен бір уақытта парентеральді енгізу ұсынылмайды: пиридоксин тиаминнің биологиялық белсенді түрге айналуын қиындатады, цианокобаламин тиаминнің аллергиялаушы әсерін күшейтеді. Басқа витаминдер (жекелей алғанда, цианокобаламин) В1 витаминінің ыдырау өнімдері қатысуымен белсенділігі жойылуы мүмкін. Бір еккіште тиаминді бензилпеницилинмен немесе стрептомицинмен (антибиотиктердің бұзылуы), тиамин мен никотин қышқылын (тиаминнің бұзылуы) араластыруға болмайды. Деполяризацияланатын миорелаксанттардың (суксаметоний йодиді және басқалар) әсерін әлсіретеді. Тиамин сілтілі және бейтарап ерітінділерде тұрақсыз; карбонаттармен, цитраттармен, Cu2+ бар барбитураттармен тағайындау ұсынылмайды. Антиоксидант немесе консервант ретінде құрамында натрий гидросульфиты бар ерітінділермен бір уақытта бұлшықет ішіне енгізгенде тиамин тұрақсыз. Этанол пероральді қабылдағаннан кейін тиаминнің сіңірілу жылдамдығын баяулатады.

Айрықша нұсқаулар

Аллергиялық реакциялар мен анафилаксия аллергияға бейім адамдарда, климактерия алдындағы және климактериялық кезеңдерде әйелдерде, алкоголизммен зардап шегетіндерде жиі дамиды.

Жағымсыз әсерлер туындаған кезде препаратты қабылдауды тоқтату керек және емдеуші дәрігермен кеңесу қажет.

Тиамин хлориді ерітіндісін парентеральді қолданар алдында препаратқа жекелей сезімталдықты анықтау үшін міндетті түрде тері сынамасын жүргізу керек. Инъекция жүргізгеннен кейін ауыр аллергиялық реакциялар туындау мүмкіндігі салдарынан 30 минут бақылау қажет.

Анафилактикалық реакциялар жоғары дозаларда көктамыр ішіне енгізгеннен кейін жиі дамиды.

Тиамин инъекцияларын пиридоксиннің инъекциясынан кейін 12 сағаттан кейін ғана жасау қажет.

Бұлшықет ішіне енгізген кезде препаратты терең бұлшықетке, көктамыр ішіне енгізгенде баяу енгізу керек.

Бұлшықетішілік және теріастылық инъекциялар төмен рН ерітінді салдарынан ауыртады.

В1 витаминіне тәуліктік қажеттілік: ересек ерлер үшін – 1,2-2,1 мг, егде жастағы адамдар үшін – 1,2-1,4 мг, әйелдер үшін – 1,1-1,5 мг, жүкті әйелдерге 0,4 мг қосу арқылы және 0,6 мг – бала емізу кезеңінде әйелдерге, балалар үшін, жасына байланысты, – 0,3-0,5 мг.

Препаратты тек емдәммен емдеу кешенінде теңгерімді емдәм алмастырушы ретінде қолдануға болмайды.

Препараттың инъекциялық түрін ішектің сіңіруі бұзылған немесе асқазан резекциясы бар науқастарды емдегенде, тиаминді таблетка түрінде қабылдау мүмкін болмағанда (жүрек айнуы, құсу, операцияға дейінгі және кейінгі кезең), сондай-ақ, аурудың ауыр түрлерінде немесе емдік әсеріне тезірек қол жеткізу үшін емнің басында қолдану қажет.

Парентеральді енгізуді аз дозалардан бастау ұсынылады (ересектерге 0,5 мл-ден көп емес) және жақсы көтерімді болғанда ғана жоғары дозаларды енгізеді.

Жүйке жүйесінің жоғары қозуында, он екі елі ішектің ойық жаралы ауруының гиперацидтік түрлерінде сақтықпен тағайындайды.

Вернике энцефалопатиясында глюкозаны енгізер алдында тиамин қабылдау қажет.

Егер В1 витаминіне аллергия байқалса, науқасқа күріш, қарақұмық, ет, нан (майдалап ұнтақталмаған ұннан пісірілген сорттар) жеуге болмайды.

Алкоголизммен ауыратын науқастарда препараттың жағымсыз әсерлері симптомдары күшеюі мүмкін.

Тиамин деполяризациялайтын миорелаксанттар, адренолитикалық және симпатомиметикалық дәрілер әсерін әлсіретуі мүмкін.

Препарат (жоғары дозаларды қабылдағанда) спектрофотометриялық әдіспен қан сарысуындағы теофиллинді және Эрлих реагенті көмегімен уробилиногенді анықтаған кезде нәтижелерді бұрмалауы мүмкін.

Жүктілік, лактация

Препарат ұсынылған дозалардағы көрсетілімдер бойынша жүктілік немесе бала емізу кезеңінде қолданылуы мүмкін.

Балалар

Балалар үшін әдетте 2,5 % тиамин хлориді ерітіндісін қолданады. 8 жастан асқан балаларға 5 % ерітінді енгізуге жол беріледі.

Дәрілік заттың көлік құралын немесе қауіптілігі зор механизмдерді басқару қабілетіне әсер ету ерекшеліктері

Емдеу кезінде жүйке жүйесі тарапынан жағымсыз әсерлері даму мүмкіндігімен байланысты көлік құралын басқарғанда және күрделі механизмдермен жұмыс істегенде сақ болу керек.

Артық дозалануы

Симптомдары: препараттың жағымсыз әсерлері симптомдары күшеюі мүмкін. Ұзақ уақыт бойы үлкен дозаларда қолданғанда гипертиреодизм, бас ауыруы, қозу, тремор, жүрек жиырылуылары жиілігінің артуы, ұйқысыздық белгілері пайда болуы мүмкін.

Емі: препаратты қабылдауды тоқтату, симптоматикалық ем.

Шығарылу түрі және қаптамасы

1 мл-ден бейтарап шыны ампулаларда немесе еккіштік толтыруға арналған стерильді ампулаларда.

Әр ампулаға заттаңбалық қағаздан жасалған заттаңбаны жапсырады немесе мәтінді шыны бұйымдарға арналған терең баспа бояумен тікелей ампулаға жазады.

10 ампуладан картон қорапқа салынған. Әр қорапқа ампулалық скарификатор салынған.

Ампулаларды кертіктерімен, сақиналарымен және нүктелерімен қаптаған кезде скарификатор салынбайды.

5 немесе 10 ампуладан поливинилхлоридті үлбірден және алюминий фольгадан жасалған пішінді ұяшықты қаптамаға салынған.

5 ампуладан 2 пішінді қаптамадан медицинада қолданылуы жөніндегі мемлекеттік және орыс тілдеріндегі бекітілген нұсқаулықпен бірге картон қорапшаға салынған. Әр қорапшаға ампулалық скарификатор салынған. Ампулаларды кертіктерімен, сақиналарымен және нүктелерімен қаптаған кезде скарификатор салынбайды.

5 немесе 10 ампуладан пішінді қаптамалар картон қораптарға салынған. Әр қорапқа қаптама саны бойынша медицинада қолданылуы жөніндегі мемлекеттік және орыс тілдеріндегі бекітілген нұсқаулық салынған.

Сақтау шарттары

Құрғақ, жарықтан қорғалған жерде, 300С-ден аспайтын температурада сақтау керек.

Балалардың қолы жетпейтін жерде сақтау керек

Сақтау мерзімі

3 жыл

Жарамдылық мерзімі өткеннен кейін пайдалануға болмайды.

Дәріханалардан босатылу шарттары

Рецепт арқылы

Өндіруші

«Химфарм» АҚ, Қазақстан Республикасы,

Шымкент қ., Рашидов к-сі, 81, т/ф: 560882

Тіркеу куәлігінің иесі

«Химфарм» АҚ, Қазақстан Республикасы

Қазақстан Республикасы аумағында тұтынушылардан өнім (тауар) сапасына қатысты шағымдарды қабылдайтын ұйымның мекенжайы:

«Химфарм» АҚ, Шымкент қ., Қазақстан Республикасы,

Рашидов к-сі, 81, т/ф: 560882

Телефон нөмірі 7252 (561342)

Факс нөмірі 7252 (561342)

Электронды поштасы standart@santo.kz