Тардокс (Doxycycline)

• русский
• қазақша

• Скачать инструкцию медикамента

Саудалық атауы

Тардокс

Халықаралық патенттелмеген атауы

Доксициклин

Дәрілік түрі

100 мг капсулалар

Құрамы

Бір капсуланың құрамында

белсенді зат – 100 мг доксициклин хиклаты түріндегі доксициклин,

қосымша заттар: альгин қышқылы, магний стеараты, лактоза, натрий лаурилсульфаты, жүгері крахмалы,

капсула құрамы: индиготин (Е 132), титанның қостотығы (Е 171), темірдің сары тотығы (Е 172), желатин.

Сипаттамасы

Цилиндр пішінді, цилиндр негізінде дөңес келген, күңгірт-жасыл түсті қатты, мөлдір емес, желатин капсулалар №2, капсуланың ішінде - сары түсті зат.

Фармакотерапиялық тобы

Бактерияға қарсы жүйелі пайдалануға арналған препараттар. Тетрациклиндер. Доксициклин.

АТХ коды J01AA02

Фармакологиялық қасиеттері

Фармакокинетикасы

Доксициклин ас қорыту жолынан қабылданған дозаға пропорционалды түрде тез сіңеді. Бұл үдерісті ас құрамы, әсіресе сүт өнімдері мен металл иондары бар препараттар баяулатуы мүмкін. 200 мг доксициклин ішке қабылданғанда 2,6 мкг/мл құрайтын плазмадағы ең жоғары концентрациясына 2 сағаттан соң жетеді.

Доксициклин қан ақуыздарымен шамамен 80-90% байланысады. Доксициклин майларда жақсы ериді. Организмнің тіндері мен биологиялық сұйықтықтарына жақсы өтіп, қуық асты безінде, аналық бездерде, жатырда, қуықта, өтте, бауырда, бұлшықеттерде, тістер мен сүйектердің негіздерінде, бронхта, өкпеде, лимфатикалық түйіндерде, мұрын маңы қойнауларында және таңдай бадамша бездерінде жоғары концентрацияларына жетеді. Плацентарлық бөгет арқылы өтеді. Ана сүтіне енеді. Доксициклин мардымсыз дәрежеде ғана метаболизденеді.

Доксициклиннің жартылай шығарылу кезеңі 18-ден 22 сағатқа дейін құрайды және бүйрек жеткіліксіздігі бар емделушілерде шамамен 25 сағатқа дейін ұзарады. Жартылай шығарылу кезеңінің ұзаққа созылуына орай, препаратты тәулігіне бір рет қабылдауға болады.

Бүйрек функциясы қалыпты емделушілерде шамамен 40% препарат өзгеріссіз күйде несеппен шығарылады, ал препараттың қалған бөлігі организмнен көбінесе метаболиттер түрінде нәжіспен шығарылады.

Доксициклин организмде жинақталуға ұшырамайды, сондықтан бүйрек жеткіліксіздігі бар емделушілерде дозаны өзгерту қажеттілігі жоқ. Доксициклиннің жартылай шығарылу кезеңі мен AUC мәні өзгермейді.

Бүйрек жеткіліксіздігі бар емделушілер өтінде доксициклин концентрациясы ұлғаяды, бұл антибиотиктің нәжіспен шығарылуын арттырады.

Гемодиализ препараттың сарысудан жартылай шығарылу кезеңіне ықпал етпейді.

Фармакодинамикасы

Доксициклин - тетрациклиндер тобына жататын антибиотик. Грамтеріс және грамоң бактерияларға, сондай-ақ қарапайымдыларға қатысты әсер ету ауқымы кең. Препараттың бактериостатикалық әсер ету механизмі ақуыз синтезін рибосомалық деңгейде тежеумен жүзеге асады. Доксициклин микроб жасушасындағы ақуыздар синтезін тежеп, рибосомалық жарғақша 30S суббірлігімен аминоацил-тРНҚ байланысуын бұзады.

Доксициклин мыналарға қатысты бактерияға қарсы in vitro әсер көрсетеді:

- грамтеріс бактериялар

Neisseria gonorrhoeae, Campylobacter granulomatis, Haemophilus ducreyi, Haemophilus influenzae, Pasteurella pestis, Pasteurella tularensis, Vibrio cholerae, Bartonella bacilliformis, Yersinia pestis, Brucella spp.; құбылмалы сезімталдық танытатындары: Escherichia coli, Klebsiella spp., Enterobacter aerogenes, Shigella spp., Mima spp., Herellеa spp., Bacteroides spp.;

- грамоң бактериялар

Streptococcus pyogenes, Streptococcus pneumoniae, Streptococcus faecalis, Streptococcus faecium, Staphylococcus aureus, viridans тобының -гемолитикалық стрептококктары;

- басқа микроорганизмдер

Rickettsia, Chlamydia psittaci, Chlamydia trachomatis, Mycoplasma pneumoniae, Ureaplasma urealyticum, Borrelia recurrentis, Treponema pallidum, Treponema pertenue, Clostridium spp., Fusobacterium fusiforme, Actinomyces spp., Bacillus anthracis, Propionibacterium acnes, Entamoeba spp., Balantidium coli, Plasmodium falciparum.

Доксициклинге төзімділік көп штаммдар арасында, әсіресе, грамоң бактериялар арасында байқалады. Бұл құбылыс әртектілігімен сипатталады, өйткені әлемнің әртүрлі аймақтарында бактериялардың төзімділігінде үлкен айырмашылықтар жиі байқалады. Доксициклинге төзімділік механизмі препараттың бактериялық жасуша ішіне өту қабілетінің төмендеуімен байланысты. Бұл төзімділік жасушада тасымалданатын R-плазмидтердің болуымен жүзеге асады.

Доксициклинге төзімді Streptococcus pneumoniae штаммдары, сонымен бірге, басқа тетрациклиндерге, көбінесе пенициллиндер мен макролидтерге төзімділік (айқаспалы төзімділік) танытады.

Қолданылуы

Препаратқа сезімтал микроорганизмдер туындататын жұқпалы-қабыну ауруларында:

• жоғарғы және төменгі тыныс жолдарының, ЛОР-ағзалардың жұқпалары: Haemophilus influenzae, Klebsiella spр., Streptococcus pneumoniae, Mycoplasma pneumoniae, Chlamydia pneumoniae туғызған тонзиллит, фарингит, ортаңғы отит, синусит, бронхит, пневмония

• несеп шығару жолдарының жұқпалары: Chlamydia trachomatis, Ureаplasma urealitycum туғызған пиелонефрит, цистит, уретрит

• Chlamydia trachomatis туғызған жыныс жолымен берілетін аурулар, мерез (Treponema pallidum), пеницилиндерге көтере алмаушылығы бар емделушілердегі жұмсақ шанкр (Haemophilus ducreyi), шап гранулемасы (Calymmatobacterium granulomatis), асқынбаған соз (Neisseria gonorrhoeae)

• Clostridium spp., Propionibacterium acnes сезімтал штаммдары туғызған терінің және жұмсақ тіндердің жұқпалары (кешенді ем құрамында)

• энтеропатогенді Esсherichia coli (саяхатшылар диареясы), Entamoeba histolytica, Shigella spp., Vibrio cholerae, Clostridium spp. штаммдары туғызған ас қорыту жолының жұқпалары

• көз жұқпалары: Chlamydia trachomatis туғызған созылмалы конъюнктивит (трахома); доксициклинмен немесе жергілікті қолданылатын препараттармен біріктіріп емдеу

• басқа жұқпалар: пситтакоз (Chlamуdia psittaci), стрептомицинмен біріккен бруцеллез (Brucella spp.), оба (Yersinia pestis), туляремия (Francisella tularensis), хлорохинге және/немесе пириметамин-сульфадоксинге төзімді малярия

• малярияның, саяхатшылар диареясының, лептоспирозаның алдын алу.

Қолдану тәсілі және дозалары

Доксициклинмен емдеуді бастар алдында бөлінген қоздырғыштың сезімталдығын айқындау қажет. Емдеуді микроорганизмнің сезімталдық нәтижесі алынғанша бастауға болады. Антибиотикограмма алынған соң препаратты тиісінше ауыстыру қажет болуы мүмкін.

Капсулаларды бір стақан сумен ішіп, бүтіндей жұту қажет.

Тамақтың немесе ішектің тітіркену мүмкіндігін болдырмау үшін, капсулаларды ұйықтаудан кемінде 30 мин бұрын отырып немесе тік тұрып қабылдау қажет (емделушінің капсуланы қабылдағаннан кейін бірден жатып қалмауы маңызды). Ас қорыту жолы тарапынан перманентті жағымсыз әсерлер байқалатын емделушілерге препаратты тамақтану кезінде қабылдауды ұсынуға болады.

Ас ішу кезінде доксициклин қолдану ас қорыту жолы тарапынан жағымсыз әсерлердің пайда болуын азайтады және оның сіңуіне елеулі әсер етпейді.

Дозалау режимі клиникалық және микробиологиялық диагнозға, емделушінің жалпы жай-күйіне, оның жасы мен дене салмағына байланысты.

Ем ұзақтығын дәрігер белгілейді, орта есеппен 5-10 күн.

Ересектер

Алғашқы тәуліктерде бір реттік дозада немесе 2 қабылдауға бөлінген дозада 200 мг доксициклин тағайындалады: әр 12 сағат сайын 100 мг, артынан тәулігіне 100 мг демеуші дозаға ауысады.

Ауыр жұқпаларда бүкіл емдеу кезеңі бойына тәулігіне 200 мг тағайындалады.

Кейбір ауруларда ұсынылатын дозалар

• Асқынбаған соз: 7 күн бойы тәулігіне екі рет (әр 12 сағат сайын) 100 мг. Соз жұқпаларын емдеу нәтижелерін ем аяқталғаннан кейін 3-4 күнге бақылау екпесін өткізіп, растау қажет.

• Chlamydia trachomatis немесе Ureaplasma urealyticum туғызған жыныс жолымен берілетін аурулар: 7 күн бойы тәулігіне екі рет (әр 12 сағат сайын) 100 мг.

• Алғашқы және салдарлы мерез (пенициллинге сезімталдығы жоғары емделушілерде): 10 күн бойы бөлінген дозаларда тәулігіне 200 мг-ден 300 мг дейін.

• Хлорохинге төзімді малярия: 7 күн бойы тәулігіне 200 мг (доксициклинді хининмен біріктіріп тағайындау керек).

Алдын ала қолдану кезінде дозалануы

• Малярия: малярия бойынша эндемиялық аудандарға жоспарланатын сапарға дейін 1-2 күн бұрын тәулігіне бір рет 100 мг, артынан сапар кезінде күн сайын және оралғаннан кейін 4 апта бойы.

• Саяхатшылар диареясы: сапардың бірінші күні 200 мг (бір қабылдауға немесе тәулігіне екі рет 100 мг), әріқарай ауданда болған бүкіл уақыт бойы тәулігіне бір рет 100 мг (21 күннен көп емес).

• Лептоспироза: жайсыз ауданда болған уақытта аптасына бір рет 200 мг (21 күннен көп емес) және сапар аяқталған соң бір рет 200 мг. Ең жоғары тәуліктік доза – 300 мг.

Егде жастағы емделушілер

Дозалануын өзгерту қажет емес. Алайда бұл емделушілердің ас қорыту жолы тарапынан жағымсыз әсерлерге аса сезімтал екенін есте ұстау қажет, сондықтан төменде сипатталған «Қолдану тәсілі» тармағында берілген нұсқаулар тиянақты қадағалануы тиіс.

Бүйрек және (немесе) бауыр жеткіліксіздігі бар емделушілер

Бүйрек жеткіліксіздігі (КК 60 мл/мин аз) және бауыр жеткіліксіздігі бар емделушілерде сақ болу қажет, өйткені организмде біртіндеп жиналу жүреді (гепатоуытты әсерінің даму қаупі). Осы емделушілерде, көбінесе ұзақ уақыт емдегенде, үлкен дозалар қолданылғанда немесе гепатоуытты әсер ететін басқа препараттарды бір мезгілде қолданғанда бауыр функциясына жүйелі зерттеулер жүргізу ұсынылады.

Емдеу ұзақтығы

Көптеген жұқпалар жағдайында, доксициклинді симптомдар басылғаннан кейін тағы 24-тен 48 сағатқа дейін қабылдау қажет.

Атобының ß-гемолитикалық стрептококктары туғызған жұқпаларда препаратты кемінде 10 күн қабылдау қажет.

Егер препарат дәл тағайындалған уақытта қабылданбаса, оны мүмкіндігінше тезірек қабылдау (егер препаратты кезекті қабылдауға дейін уақыт әлі жетерлік көп болса) немесе препаратты жүйелі қабылдауды жалғастыру қажет.

Өткізіп алған дозаны толықтыру мақсатында қосарлы дозаны қабылдауға болмайды.

Жағымсыз әсерлері

Жиі (>1/100-ден <1/10 дейін)

- жүрек айну, қыжыл, құсу, анорексия, метеоризм, диарея

- бас ауыру, бас айналу, вестибулярлы бұзылулар

- бауыр аминотрансферазалары белсенділігінің мардымсыз транзиторлы жоғарылауы

Жиі емес (>1,000/100-ден <1/100 дейін)

- глоссит, дисфагия, фарингит, қырылдау, жұтынудың қиындауы

- фотосенсибилизация (терінің күн сәулесіне шалдығуы: қызаруы, ісінуі, сулы бөртпелердің түзілуі, тері түсінің өзгеруі), макулопапулезді және эритематозды бөртпе

- аллергиялық реакциялар, жайылған экзантема, эритема, есекжем, Квинке ісінуі, анафилаксия, анафилактоидты пурпура, жүйелі қызыл жегінің өршуі, терінің қышынуы, мультиформалы экссудаттық эритема, терінің, шырышты қабықтардың немесе буындардың қайтымды жергілікті ісінуі (ангионевротикалық ісіну), демікпе, анафилактикалық шок, жыныс ағзаларындағы және дененің басқа бөліктеріндегі тұрақты дәрілік бөртпе, қызбамен, бас ауыруларымен және буындардың ауыруымен қатар жүретін сарысу құю ауруы тәрізді реакция

- перикардит

- остеогенездің баяулауы, балалардағы тістердің қалыпты дамуының бұзылуы, тіс эмалінің боялуы

- қан түзілуінің бұзылуы және гематурия

- ауыз және жұтқыншақ шырышты қабығының қабынуы сияқты симптомдармен (стоматит, глоссит) қатар жүретін терінің және шырышты қабықтардың (әсіресе, жыныс ағзаларының және ауыз бен ішек шырышты қабықтарының) кандидозы, өңештің ойық жаралануы, энтерит, әйелдердегі сыртқы жыныс ағзалары мен қынаптың жедел қабынуы (вульвовагинит), артқы өтіс аумағындағы қабыну өзгерістері, сондай-ақ анус аумағындағы қышыну (Pruritus ani)

Сирек (>1/10,000-нан <1/1000 дейін)

- бас ауырулары, жүрек айну, құсу түрінде көрініс беретін бассүйекішілік қысымның көтерілуі және көру жүйкесі дискісінің ісінуі салдарынан көрудің бұзылуы (көз алдының «бұлыңғырлануы», диплопия), құлақтың шуылдауы

- тырнақтар тарапынан болатын өзгерістермен фотоуытты реакциялар – тырнақ оймасынан тырнақтың бөлінуі және тырнақ пластинасы түсінің өзгеруі

- гемолитикалық анемия, лейкопения, лейкоцитоз, тромбоцитопения, анемия, лимфоцитопения, лимфаденопатия, атипиялық лимфоциттер және гранулоциттердің уытты түйіршіктілігі

- бауырдың зақымдануы, панкреатит

- нефроуытты зақымданулар, бұрыннан бар бүйрек функциясы бұзылуының өршуі, интерстициальді нефрит, жедел бүйрек жеткіліксіздігі, анурия

- сарғаю

- гепатит

- беттің ісінуі, тілдің ісіп кетуі, тыныс жолдарының тарылуымен көмейдің ішкі ісінуі сияқты аса жоғары сезімталдықтың ауыр жедел симптомдары, жүректің жиі соғуы, тұншығу (ентігу), шок және жүрек тоқтауына дейін апаратын артериялық қысымның түсіп кетуі

- парестезиялар, тахикардия, миалгиялар, артралгиялар, мазасыздық, қорқыныш ахуалы

- иіс және дәм сезудің бұзылуы немесе сезбей қалу

Өте сирек (< 1/10,000)

- энтероколит, жалған жарғақшалы колит

- ректальді және/немесе генитальді аумақтың қабынуы

- препараттың анаболикаға қарсы әсерінен болатын мочевинаның қалдық азотының артуы

- алыстан көрмеу, миопия

- эпилепсиялық ұстамалар

- Лайелл синдромы

- Стивенс-Джонсон синдромы

- эпидермистің уытты-колликвациялық некрозы

- қалқанша бездің оның функциясына әсер етпейтін қоңыр-қара түске боялуы

Жоғарыда тізбеленген немесе осы нұсқаулықта аталмаған жағымсыз құбылыстардың кез келгені пайда болған жағдайда олар жөнінде дәрігерге хабарлау қажет.

Қолдануға болмайтын жағдайлар

• доксициклинге, басқа тетрациклиндерге немесе препарат құрамына кіретін қандай да бір затқа аса жоғары сезімталдық

• бауыр функциясының ауыр бұзылулары

• жүктілік және лактация кезеңі

• 18 жасқа дейінгі балалар мен жасөспірімдерге

• тұқым қуалайтын лактозаны, галактозаны көтере алмаушылық, лактаза жеткіліксіздігі, глюкоза-галактозаның нашар сіңуі

• порфирия

• лейкопения

• бүйрек жеткіліксіздігі (КК 30 мл/мин аз)

Дәрілермен өзара әрекеттесуі

Соңғы уақытта қабылданып жүрген, тіпті рецептісіз босатылатын барлық препараттар жөнінде дәрігерге хабарлау қажет.

Сүт, сүт өнімдері, құрамында көп валентті алюминий иондары, кальций (сүттің, сүт өнімдерінің және жеміс шырындарының құрамына кіретін кальцийді қоса), магний бар антацидті препараттар, сондай-ақ құрамында темір, мырыш немесе висмут иондары бар препараттар доксициклиннің сіңуін төмендетеді. Бұл препараттар мен тағам өнімдерін доксициклин қабылдаудан кейін кемінде 2 сағаттан соң қабылдау қажет.

Акнені изотретиноинмен емдеуді бастар алдында, ем кезінде және одан кейін тікелей доксициклинді пайдалануға болмайды, өйткені агенттер бассүйекішілік қысымның қайтымды көтерілуін (жалған ми ісігі) сирек туындатады. Дигитоксиннің сіңуін бір мезгілде тетрациклиндер қабылдаумен азайтуға болады.

Доксициклин пенициллиндердің және бактерицидті әсер ететін басқа антибиотиктердің бактерияға қарсы әсерін төмендетеді.

Доксициклин ұюға қарсы препараттардың, кумарин және сульфониломочевина туындыларының (диабетке қарсы ішуге арналған препараттар) әсерін күшейтеді. Осы препараттарды доксициклинмен бір мезгілде қолданғанда қан сарысуындағы глюкоза концентрациясын және ұю жүйесінің функциясын анықтайтын параметрлерді бақылап отыру қажет - осы препараттардың дозасын азайту қажет болуы мүмкін.

Доксициклин метоксифлуранның өліммен аяқталатын нефроуытты әсерін күшейтеді, сондықтан доксициклин қабылдайтын емделушілерде метоксифлуран қолданумен жалпы анестезия жасамаған жөн.

Доксициклин циклоспориннің уытты әсерін күшейтеді. Екі препаратты да бір мезгілде қолдану қажет болған жағдайда қан сарысуындағы циклоспорин концентрациясын бақылау ұсынылады. Метотрексатпен бір мезгілде қолдану оның уыттылығын арттыруы мүмкін.

Доксициклин гормональді контрацептивтер тиімділігін төмендетеді. Емделуші әйелдер доксициклинмен емделу кезінде контрацепцияның қосымша гормональді емес әдістерін қолдану қажеттілігінен хабарланған болуы тиіс. Поляризацияланбаған миорелаксанттармен (мысалы, тубокурарин және галламин) жүйке-бұлшықет тежелісі артуы мүмкін.

Микросомалық ферменттерді индукциялайтын барбитураттар, карбамазепин, дифенилгидантоин сияқты препараттар доксициклин метаболизмін жеделдетеді, соның нәтижесінде оның жартылай шығарылу кезеңі қысқарып, емдік әсері төмендеуі мүмкін. Жоғарыда аталған препараттарды қабылдайтын емделушілерде доксициклиннің тәуліктік дозасын арттыру мүмкіндігін қарастыру қажет.

Алкоголь доксициклиннің жартылай шығарылу кезеңін қысқартады.

Доксициклин мен теофиллинді бір мезгілде қолданғанда ас қорыту жүйесі тарапынан жағымсыз әсерлері жиірек көрініс береді.

Доксициклин қолдану несептегі катехоламиндерді анықтау тестілерінің нәтижелеріне ықпал етіп, сондай-ақ несепке, қантқа және уробилиногенге жасалған ақуыз талдауын фальсификациялауы мүмкін.

Айрықша нұсқаулар

Доксициклинді басқа да гепатоуытты препараттар қабылдайтын емделушілерде сақтықпен қолдану қажет.

Доксициклин, тетрациклиндерге қарағанда, аз дәрежеде барлық сүйек тіндерінде кальциймен берік кешенді қосылыстар түзеді. Алайда, оны тістердің даму кезеңінде қолдану (жүктіліктің бірінші триместрі, перинатальді кезең, ерте балалық шақ) тістердің боялуына және зақымдануына әкелуі мүмкін.

Тетрациклиндер, соның ішінде доксициклин жарыққа жоғары сезімталдықты туғызуы мүмкін. Емделу кезінде, фотодерматоздардың даму қауіптілігіне байланысты, күн астында қалудан немесе жасанды УК-сәулелену (солярий) әсерінен аулақ болу қажет. Емделушілерге осындай реакциялардың даму мүмкіндігі жөнінде дамуы мүмкін екенін ескерту қажет, ал тері эритемасының алғашқы симптомдары білінген жағдайда препарат қабылдауды дереу тоқтату қажет.

Доксициклинмен емделу кезінде төзімді микроорганизмдер, мысалы, Candida шектен тыс өсуі мүмкін. Егер төзімді микроорганизмдер жұқтыру орын алса, доксициклин қабылдауды тоқтатып, тиісті емделуді бастау қажет.

Бактерияға қарсы әсер ету ауқымы кең антибиотиктер (цефалоспориндер, жартылай синтетикалық пенициллиндер, тетрациклиндер, макролидтер) кейде өліммен аяқталатын жалған жарғақшалы колитті туғызуы мүмкін.

Ішекте қалыпты бактериялық флораның бұзылуы токсиндері жалған жарғақшалы колиттің клиникалық симптомдарын туындататын Clostridium difficile таяқшасының дамуына ықпал етеді. Сондықтан антибиотикпен емделу кезінде немесе оны тоқтатқан соң бірден іш өтуі болған емделушілер дәрігерге қаралуы және өзін-өзі емдемеуі тиіс. Жалған жарғақшалы колит диагнозы анықталған жағдайда антибиотик қабылдауды дереу тоқтатып, тиісті емделуді бастау қажет. Жеңілірек жағдайларда, әдетте, препаратты тоқтату жеткілікті, ауырлау жағдайларда ішке метронидазол немесе ванкомицин тағайындау қажет. Ішек перистальтикасын тежейтін препараттарды немесе бекіткіш әсері бар басқа дәрілерді қабылдау қарсы көрсетілімді.

Венерологиялық аурулары бар және бір мезгілде өтетін мерез күдік тудыратын емделушілерге ем басталғанша күңгірт көру өрісіне микроскопиялық зерттеу жүргізу қажет, ал серологиялық қан зерттеуін (РВ) кемінде 4 ай бойы ай сайын жүргізу қажет.

Доксициклин миастениясы, жүйелі қызыл жегісі (ЖҚЖ) немесе порфириясы бар емделушілерде осы аурулардың симптомдарын күшейтуі мүмкін.

Емдік дозаларды қабылдағанда емшектегі балаларда еңбегінің ісіп кеткен жағдайлары, ал балалар мен ересектерде емдеуді тоқтатқан соң басылған бассүйекішілік қысымның орташа айқын көтерілуі жөнінде хабарламалар бар.

Таблеткалар немесе капсулалар түріндегі тетрациклин тобы препараттарын (доксициклинді қоса) қабылдайтын емделушілерде өңештің қабынуы және ойық жаралануы жөнінде хабарламалар бар. Көпшілік жағдайларда, емделушілер препаратты тура төсекке жатар алдында қабылдаған немесе препаратты тым аз сұйықтық мөлшерімен ішкен. Өңештің эрозиялы-ойық жаралы зақымдануының дамуын болдырмау үшін көп мөлшердегі сумен (200-300 мл) ішуге кеңес беріледі.

Егер тіпті жоғарыда атап көрсетілген сақтандырулар бұрын болған жағдайларға қатысты болса да, дәрігермен кеңесу қажет.

Дәрілік заттың көлік құралдарын басқару және қауіптілігі зор механизмдерді басқару қабілетіне әсер ету ерекшеліктері

Сақтану шарасын қадағалау керек. Жекелеген жағдайларда автокөлік басқару кезінде қауіпсіздікке әсер етуі мүмкін көрудің өткінші бұзылулары байқалған.

Артық дозалануы

Тетрациклиндердің жедел артық дозалануы өте сирек кездеседі.

Симптомдары: қызба жағдайы, беттің ісінуі, бас айналу, кейде коллапс дамуы мүмкін.

Емі: препаратты тоқтату, құстыру, асқазанды шаю (естен танбаған емделушілерде), антацидті препараттар немесе кальций және магний тұздарын қолдану. Қажет болған жағдайда, симптоматикалық емдеу және өмірлік маңызды функцияларды (тамыр соғуы, тыныс алу) бақылау.

Қаннан препаратты шығару үшін гемодиализ қолдану тиімсіз болып табылады.

Препарат ұсынылуынан көп дозада қабылданған жағдайда дереу дәрігерге қаралу қажет.

Шығарылу түрі және қаптамасы

Поливинилхлоридті үлбірден және алюминий фольгадан жасалған пішінді ұяшықты қаптамада 5 капсуладан.

Медицинада қолданылуы жөніндегі мемлекеттік және орыс тілдеріндегі нұсқаулықпен бірге 2 қаптамадан картон қорапшаға салынады.

Сақтау шарттары

Құрғақ, жарықтан қорғалған жерде, 25 ºС-ден аспайтын температурада сақтау керек. Балалардың қолы жетпейтін жерде сақтау керек!

Сақтау мерзімі

4 жыл

Жарамдылық мерзімі өткеннен кейін пайдалануға болмайды.

Дәріханалардан босатылу шарттары

Рецепт арқылы.

Өндіруші

Тархоминск фармацевтикалық зауыты «Польфа» акционерлік қоғамы А.Флеминга 2 к-сі, 03-176 Варшава, Польша

Тіркеу куәлігі иесінің атауы және елі

Тархоминск фармацевтикалық зауыты «Польфа» акционерлік қоғамы,

Польша

Қазақстан Республикасы аумағында дәрілік препарат сапасына қатысты шағымдар қабылдайтын ұйымның мекенжайы:

«Adalan» ЖШС

Тимирязев к-сі 42, 23 пав., 202 кеңсе, 050057, Алматы қ.

Тел. + 727 269 54 59; e-mail: reg@adalan.kz