Тамоксифен

• русский
• қазақша

• Скачать инструкцию медикамента

Саудалық атауы

Тамоксифен

Халықаралық патенттелмеген атауы

Тамоксифен

Дәрілік түрі

20 мг таблеткалар

Құрамы

Бір таблетканың құрамында

белсенді зат - 30.4 мг тамоксифен цитраты

(20 мг тамоксифенге баламалы),

қосымша заттар: лактоза моногидраты, микрокристалды целлюлоза, магний немесе кальций стеараты, сусыз коллоидты кремнийдің қостотығы

Сипаттамасы

Ақ түсті, жалпақ цилиндр пішінді, бір жақ бетінде «G» әрпінің өрнегі бар і және басқа жақ бетінде крест тәрізді сызығы бар таблеткалар

Фармакотерапиялық тобы

Ісікке қарсы гормондық препараттар. Гормондардың антагонистері және олардың аналогтары. Антиэстрогендер. Тамоксифен.

АТХ коды L02BA01

Фармакологиялық қасиеттері

Фармакокинетикасы

Ішке қабылдағаннан кейін тамоксифен жақсы сіңеді. Сарысуда ең жоғары концентрацияға бір реттік дозаны қабылдағаннан кейін 4-тен 7 сағатқа дейінгі шекте жетеді. Тамоксифен қан сарысуындағы тепе-тең концентрациясына әдетте 3-4 апталық қабылдаудан кейін жетеді.

Бауырда метаболизденіп, бірнеше метаболиттер түзеді. Тамоксифеннің организмнен шығарылуы бастапқы жартылай шығарылу кезеңі 7-ден 14 сағатқа дейін болатын және кейін 7 күн бойы жартылай шығарылуының баяу терминальді кезеңіне ұласатын екі фазалы сипатта болады. Ең алдымен коньюгаттар түрінде, негізінен, нәжіс массаларымен бөлініп шығады, оның тек аздаған мөлшері ғана несеппен бірге бөлініп шығады.

Фармакодинамикасы

Тамоксифен әлсіз эстрогендік қасиеттері бар стероидты емес антиэстрогендік дәрі болып табылады. Оның әсері эстрогендердің рецепторларын бөгеу қабілетіне негізделген. Тамоксифен, сондай-ақ оның кейбір метаболиттері сүт безінің, жатырдың, қынаптың, гипофиздің алдыңғы бөлігінің және эстроген рецепторларының мөлшері жоғары ісіктердің тіндерінде эстрогеннің цитоплазмалық рецепторларымен байланысуы үшін бәсекелеседі. Эстрогеннің рецепторлық кешеніне қарама-қарсы, тамоксифеннің рецепторлық кешені ядрода ДНҚ синтезін стимуляцияламайды, ол жасушаның бөлінуін бәсеңдетеді, бұл ісік жасушаларының кері дамуына және олардың жойылуына әкеледі.

Қолданылуы

- сүт безінің обырын емдеуде

- ановуляторлық бедеулікті емдеуде

Қолдану тәсілі және дозалары

• Сүт безінің обыры

  Ересектер

  Тамоксифеннің әдеттегі ұсынылған тәуліктік дозасы 20 мг құрайды. Өте жоғары дозаларын қабылдаған кездегі қосымша артықшылығы қайталанудың кешірек дамуы және пациенттердің өміршеңдігінің жақсаруы түрінде болады. Емдеу үшін тәулігіне 30-40 мг қолдануды айғақтайтын деректер жеткіліксіз, соған қарамастан, олар өте ауқымды аурулары бар пациенттерді емдеу үшін қолданылды.

  Егде жастағы пациенттер

  Дозалаудың ұқсас режимі сүт безінің обыры бар пациенттерде, ал кейбір пациенттерде монотерапия ретінде қолданылды.

• Ановуляторлық бедеулік

  Бастамалайтын немесе кейінгі емдеу курсын тағайындағанға дейін ықтимал жүктіліктің бар-жоқтығын анықтау қажет. Етеккір оралымы жүйелі, бірақ ановуляторлық болатын әйелдер үшін бастамалайтын дозасы етеккір оралымының 2-ші, 3-ші, 4-ші және 5-ші күндері тағайындалатын, тәулігіне 20 мг болып табылады. Қанағаттанарлықсыз базальді температура немесе пре-овуляторлы цервикальді шырыш жеткіліксіз болған жағдайда кейінгі етеккір оралымы ішінде тәулігіне 40, ал содан кейін 80 мг-ге дейін арттырылатын дозаларымен емдеудің келесі курсы тағайындалуы мүмкін.

  Етеккір оралымы жүйелі әйелдерде емдеу бастамасы оралымның кез келген күні жүруі мүмкін. Овуляция белгілері жоқ болған жағдайда, емдеудің кейінгі курсын мұның алдындағы дозаны жоғарыда сипатталғандай арттырып, емдеу аяқталғаннан кейін 45 күн өткен соң бастауға болады.

  Педиатриялық популяция

  Тамоксифенді балаларға қолдану ұсынылмайды. Балаларда тамоксифеннің тиімділігінің және қауіпсіздігінің бейіні анықталған жоқ.

  Таблетканы пероральді түрде қабылдаға жөн.

Жағымсыз әсерлері

Ұзақ мерзімді емдеуде жағымсыз құбылыстар көбіне ауырлығы жеңіл дәрежеде көрініс берген.

Ауырлығы ауыр дәрежедегі жағымсыз әсерлер дамыған кезде препарат дозасын ауруды бақылануын жоғалтпай (тәулігіне кем дегенде 20 мг дейін) азайтуға болады. Егер жағымсыз әсерлер сондай дәрежеде сақталса, емдеу тоқтатылуы мүмкін.

Цереброваскулярлық бұзылыстар: кейбір мәлімдемелер тамоксифенді қабылдау цереброваскулярлық бұзылыстар қаупінің жоғарылауымен астасқанын көрсетеді.

Көру аппаратының бұзылулары: көрудің бұзылуларының кейбір жағдайлары (бұлдырап көру, көру жітілігінің төмендеуі, көру жүйкесінің невриті, көз бұрышының өзгеруі және ретинопатия жөніндегі есептерді қоса) және катарактаның даму жиілігінің жоғарылауы тамоксифенмен ем қабылдаған пациенттерде байқалды. Тамоксифен қабылдаған пациенттерде көру жүйкесінің нейропатиясы және көру жүйкесінің невриті, ал кейбір жағдайларда соқырлықтың даму жағдайлары жөнінде мәлімделді.

Асқазан-ішек жолы тарапынан бұзылулар: асқазан-ішек жолындағы жақпаушылық, жүректің айнуы, құсу.

Жалпы бұзылулар: қажығыштық, аяқтардың құрысулары

Гематологиялық бұзылыстар: сүт безінің обырын емдеу үшін ем ретінде тамоксифенді қабылдап жүрген пациенттерде тромбоциттер санының 1см3-ге шаққанда 80000-90000 дейін, ал кейбір жағдайларда одан төменге төмендеуі. Тамоксифенді қабылдауды бастағаннан кейін, кейбір жағдайларда анемиямен және/немесе тромбоцитопениямен байланысты лейкопения байқалды. Нейтропения жағдайлары жөнінде сирек мәлімделді, кейбір жағдайларда ауырлығы ауыр дәрежедегі нейтропения дамыды.

Гепатобилиарлық бұзылулар: тамоксифенді қолдану бауыр ферменттері деңгейінің өзгеруімен, кейбір жағдайларда холестазды, алкоголдік емес стеатогепатитті және циррозды қоса, ауыр ауытқулардың дамуымен астасты. Алкогольдік емес стеатогепатиттің және цирроздың дамуымен қатысты тамоксифеннің потенциалы келесі қауіп факторларымен байланысты: артық салмақ немесе семіздік, инсулинрезистенттілік, диабет, гиперлипидемия. Алкоголдік емес стеатогепатит құбылысы тамоксифенді тоқтатқан кезде қайтымды болып табылады.

Иммунологиялық бұзылулар: ангионевроздық ісінуді қоса, аса жоғары сезімталдықтың сирек реакциялары.

Метаболизмдік бұзылулар: салмақтың артуы, сұйықтықтың іркілуі. Сүйектерінде метастаздары бар пациенттердің аздаған бөлігінде тамоксифенмен емдеудің бас кезінде гиперкальциемия дамыған. Сирек жағдайларда тамоксифенді қабылдаумен байланысты панкреатитпен қатар жүретін бірқатар жағдайларда триглицеридтердің сарысулық деңгейінің жоғарылағаны байқалды.

Қатерсіз жаңа түзілімдер, қатерлі жаңа түзілімдер және дифференциацияланбаған жаңа түзілімдер (цисталарды және полиптерді қоса): ісіктерді өсуінің өршуі және ауыру синдромы. Эндометрий және жатыр саркомасы обырының (көбіне Мюллердің аралас қатерлі жаңа түзілімдері) даму жиілігінің артуы. Эндометрий обырының даму қаупі тамоксифеннің тәуліктік дозасын арттырумен және емдеудің ұзаққа созылған режимімен ұлғаяды.

Жүйке жүйесі тарапынан бұзылулар: бас ауыру, әуейілік.

Психикалық бұзылулар: әбігерлену, депрессия.

Репродукциялық бұзылулар: вагинальді қан кету, қынаптан бөлінетін бөлінділер, вульваның қышуы. Тамоксифенді сүт безінің обырының емі ретінде қабылдап жүрген ұрпақ өрбіту жасындағы әйелдердің бір бөлігінде етеккір оралымы бәсеңдетіледі. Жатыр миомасы, эндометриоз жағдайлары және, гиперплазиясын және полиптерді қоса, басқа эндометриялық өзгерулер жөнінде мәлімделді. Кейбір жағдайларда тамоксифен қабылдап жүрген, ұрпақ өрбіту жасындағы әйелдерде анабездердің кистоздық ісінуі байқалады.

Ұрпақ өрбіту бұзылыстары: өте сирек жағдайларда интерстициальді пневмонит жағдайлары.

Тері бұзылулары: бөртпе (мультиформалы эритеманың, Стивен-Джонсон синдромының және буллезді пемфигоидтың жекелеген жағдайларын қоса), терінің құрғақтығы, алопеция. Сирек жағдайларда сәулелік дерматит дамиды.

Васкулярлық бұзылулар: қан кернеулер, тамоксифенмен емдеу кезіндегі тереңдегі көктамырлар тромбозының және өкпе эмболияларының жағдайлары. Тамоксифенді цитоуытты агенттермен біріктіріп қолданғанда тромбоэмболиялық құбылыстардың дамуының жоғары қаупі байқалады.

Қолдануға болмайтын жағдайлар

Тамоксифенді келесі жағдайларда қолданбаған жөн:

- жүктілік кезінде. Пременопаузада жүрген пациенттерде емді бастағанға дейін жүктіліктің бар-жоқтығын мұқият тексеру қажет;

- белсенді компоненттерге немесе препараттың кез келген басқа компонентіне аса жоғары сезімталдық;

- анастрозолды қатарластыра қолдану;

- бедеулікті емдеу. Көктамырлық тромбоэмболиясы айғақталған жеке немесе тұқым қуалау тарихы бар пациенттер;

- 18 жасқа дейінгі балалар.

Дәрілермен өзара әрекеттесуі

Бактерияларға қарсы препараттар: тамоксифен Р450 цитохромының CYP3A4 изоферментімен метаболизмге ұшырайды, сондықтан ферменттің белсенділігін индукциялайтын, мысалы, рифампицин сияқты препараттармен бірге қолданғанда сақтық таныту қажет, өйткені тамоксифеннің концентрациясы төмендеуі мүмкін.

Тамоксифенді кумариндік антикоагулянттармен бірге қолданғанда, антикоагулянттық әсері едәуір артуы мүмкін. Бірге тағайындау жөнінде шешім қабылдағанда пациентің жағдайына мұқият мониторинг жүргізу қажет.

Басқа гормондық антагонистер: тамоксифен летрозолдың плазмалық концентрациясын төмендетуі мүмкін. Тамоксифенді адъювантты терапия ретінде летрозолмен біріктіріп қолдану тамоксифенмен монотерапиямен салыстырғанда, тиімділігінің айтарлықтай жақсаруын көрсеткен жоқ.

Цитостатиктер: гемолиздік анемия, тромбоцитопения, бүйректің фатальді гемолиздік уремиялық синдромға әкелетін дисфункциясы митомицинді қабылдаудан кейін қысқа мерзімде тамоксифенді қабылдап жүрген пациенттерде дамуы мүмкін. Тамоксифенді цитостатиктермен қатарластыра қолданғанда тромбоэмболиялық құбылыстардың даму қаупі жоғарылайды. Тамоксифенді химиотерапиямен қатар қабылдап жүрген пациенттерде тромбоздың профилактикасы жөнінде шаралар қабылдауы қажет.

Сондай-ақ әдебиеттерде препараттың бір немесе одан көбірек метаболиттерінің, соның ішінде эндоксифеннің плазмалық концентрацияларының 65-75%-ға төмендеу жағдайлары мәлімделген. Тамоксифен тиімділігінің төмендеуі кейбір зерттеулерде серотонинді кері қармайтын селективті тежегіштерін (мысалы, пароксетин) қабылдау аясында байқалды. CYP2D6 потенциалды тежегіштерімен (мысалы, пароксетин, флуоксетин, хинидин, цинакальцет немесе бупропион) бірге қолданғанда тамоксифен әсерінің төмендеуін жоққа шығаруға болмайтындықтан, осындай біріктірілімдерге жол бермеген жөн.

Айрықша нұсқаулар

Сирек тұқым қуалайтын галактоза жақпаушылығы, Лапп лактаза жеткіліксіздігі немесе глюкоза-галактоза мальабсорбциясы бар пациенттер осы препаратты қабылдамағаны жөн.

Гиперплазияны, полиптерді, жатыр обырын және саркоманы (көбіне Мюллер аралас қатерлі жаңа түзілімдерін) қоса, эндометрийдегі өзгерулердің жоғары жиілігі тамоксифенді қабылдаумен байланысты дамыды. Эндометрийдің обырлық өзгерулерінің даму қаупі тамоксифеннің тәуліктік дозасының жоғарылауымен және емдеудің ұзаққа созылуымен ұлғайды. Осы патологияның негізінде жатқан механизм айқын емес, бірақ тамоксифеннің эстрогенге ұқсас әсерімен байланысты болуы мүмкін. Тамоксифен қабылдап жүрген немесе қабылдаған, және гинекологиялық ауытқулар, әсіресе вагинальді қан кетулер, етеккір оралымының бұзылулары, қынаптан бөлінетін бөлінділер немесе жамбас аймағының ауыруы немесе қысым жоғарылауы сияқты симптомдар болғаны жөнінде хабарлаған кез келген пациент шұғыл тексерілуі тиіс.

Клиникалық зерттеулерде эндометрийден айырмашылығы бар ағзаларда дамитын жаңа түзілімдердің қайталап даму және тамоксифенмен сүт безінің обырын емдеуден кейін екінші сүт безінің зақымдану жағдайлары жөнінде мәлімделді. Мұндай жағдайларда себептік өзара байланысы байқалған жоқ, сондықтан клиникалық маңыздылығы анық емес күйінде қалады.

Ұрпақ өрбіту жасындағы пациенттердің бір бөлігінде сүт безінің обырын емдеу үшін тамоксифенді қабылдағанда етеккір оралымы бәсеңдетіледі.

Тамоксифенді порфирия кезінде қолдану қауіпсіз емес, ол тұқым қуалайтын порфириялардың жедел ұстамаларын өршіту түрінде көрініс береді.

Әдебиеттерді талдау CYP2D6 әлсіз метаболизденетін заттарды қабылдаған кезде қан плазмасында тамоксифеннің негізгі метаболиттерінің бірі эндоксифеннің өте төмен концентрациялары байқалатынын көрсетті. CYP2D6 тежейтін препараттарды қатарластыра қолдану эндоксифен концентрациясының төмендеуіне әкеп соғуы мүмкін. Демек, тамоксифенмен емделу кезінде CYP2D6 потенциалды тежегіштерін (мысалы, пароксетин, флуоксетин, хинидин, цинакальцет немесе бупропион) қабылдауға жол бермеген жөн.

Көктамырлардың тромбоэмболиясы

- тромбоэмболияның даму жиілігінің 2-3 есе жоғарылауы тамоксифен қабылдаған дені сау әйелдерде байқалды;

- тромбоэмболияның даму қаупі артық салмақ болғанда, жастың және басқа да қауіп факторларының ұлғаюымен жоғарылайды. Тамоксифенмен емдеуді бастағанға дейін барлық пациенттер үшін пайда/қаупіне баға беру қажет. Сүт безінің обыры бар пациенттерде қауіп химиотерапияны қабылдау аясында жоғарылайды. Профилактикалық мақсатпен ұзақ мерзімдік антикоагулянттық ем сүт безінің обыры бар пациенттерде көптеген қауіп факторлары болғанда ақталған;

- тромбоэмболияның дамуының кез келген белгілері табылған барлық пациенттер өзінің емдеуші дәрігеріне ол туралы дереу мәлімдеуі тиіс.

Сүт безінің обырын емдеу және тромбоэмболия

- тамоксифенді кеуде обырын емдеу үшін тағайындар алдында көктамырлардың жеке немесе тұқым қуалайтын тромбоэмболиясын анықтау мақсатында ауру тарихын зерттеу қажет. Тромбоэмболияның даму қаупі болған жағдайда қауіп факторларының бар-жоқтығына әрі қарай тексеру жүргізу қажет. Тестінің оң нәтижелерінде, пациенттерге тромбоэмболиялық құбылыстардың даму қаупі жөнінде алдын ала ескерткен жөн. Тромбоэмболиялық құбылыстардың даму қаупі химиотерапия қабылдап жүрген пациенттерде жоғарылайды.

- тамоксифенді тағайындау жөніндегі шешім пациент үшін жалпы қауіпке негізделуі тиіс;

- антикоагулянттық емді қолдану ақталған.

Хирургиялық араласымдар және иммобилизация

- тамоксифенмен емдеуді хирургиялық араласымға немесе ұзақ мерзімдік иммобилизацияға дейін тамоксифен түрткі болған тромбоздың даму қаупі емдеуді тоқтатудан жойылмағанша тоқтатпаған жөн;

- осы шешім алдында емдеуді тоқтатудың ықтимал ұзақтығына, обырдың таралу сатысына және дәрежесіне, тамоксифенмен емдеуге клиникалық жауабына және ем тоқтатылатын емдеу сатысына көңіл бөлген жөн;

- барлық пациенттер тромбоздың тиісті профилактикалық емін қабылдауы тиіс.

Тромбоэмболияның дамуы

- тамоксифенмен емдеуді дереу тоқтату және тромбозға қарсы емді бастау керек;

- тамоксифенмен емдеуді қайта жаңғырту жөніндегі шешім пациенттің пайда/қаупінің жалпы арақатынасын есебінен қабылдануы тиіс;

- тамоксифенмен емдеуді қайта жаңғырту қажет болатын пациенттерге антикоагулянттық ем тағайындау керек.

Ановуляторлық бедеулікті емдеу және тромбоэмболия

Тамоксифенмен емдеуді бастар алдында:

- тамоксифенді жеке немесе тұқым қуалайтын, идиопатиялық тромбоэмболиясы бар, немесе тромбоэмболияға бейім факторлары бар пациенттерге қолдануға болмайды;

Хирургиялық араласымдар және иммобилизация

- бедеулікті емдеуден өткен пациенттерді тамоксифенмен емдеу хирургиялық араласымға дейін немесе ұзақ мерзімді иммобилизацияға дейін (мүмкіндігінше) ең жоқ дегенде 6 аптаға тоқтатылуы және, егер пациент толық тұрып - жүру қалпына келген жағдайда, қайтадан жаңғыртылуы тиіс;

- барлық пациенттер тромбоэмболияның тиісті профилактикалық емін қабылдауы тиіс.

Тромбоэмболияның қайталануы

- тамоксифенмен емдеуді дереу тоқтату және тромбозға қарсы тиісті емді бастау керек;

- тромбоэмболияның дамуының баламалы себептері анықталғанға дейін тамоксифенмен емдеуді қайта жаңғыртпау керек.

Тамоксифенді қабылдау кезінде қан көрінісіне және бауырдың функциялық көрсеткіштеріне мониторинг жүргізу қажет.

Жүктілік

Тамоксифенді жүктілік кезінде тағайындамаған жөн. Әйелдер тамоксифенді қабылдағаннан кейін өздігінен болатын түсіктердің, туа біткен кемістіктердің және шарананың өлуінің біршама жағдайлары жөнінде мәлімделгеніне қарамастан, мұның себептік өзара байланысы анықталған жоқ.

Егеуқұйрықтарда, үй қояндарында және маймылдарда тұқым өрбіту функциясына тигізетін уыттылығына жүргізілген зерттеулерде тератогендік потенциал байқалған жоқ.

Алайда, егеуқұйрықтарға жүргізілген зерттеулер қаңқа аппаратының тератогендік емес, қайтымды өзгерулерін, ұрықтың өлу жиілігінің және үйренуге қабілеттілік баяулайтын дамудың жатырішілік кідіруінің артқанын көрсетті. Үй қояндарында түсік және мерзімінен ерту туу жағдайлары байқалды. Кеміргіштер үлгілерінде тұқым өрбіту ағзаларына ықпал етуіне жүргізілген зерттеулерде тамоксифен эстрадиолдың, этинилэстрадиолдың, кломифеннің және диэтилстилбестролдың әсеріне ұқсас әсер көрсетті. Осы өзгерулердің клиникалық маңыздылығының белгісіздігіне қарамастан, олардың кейбіреулері, әсіресе вагинальді аденоз, диэтилстилбестролдың жатырлық экспозициясына ұшыраған, және қынаптың және жатыр мойнының карциномасының 1:1000 даму қаупі бар жас әйелдердегі осындайлармен ұқсас болды. Жүкті әйелдердің аздаған бөлігі тамоксифенмен ем қабылдады. Осы жағдайда тамоксифеннің жатырлық экспозициясына ұшыраған жас әйелдерде вагинальді аденоздың немесе қынаптың және жатыр мойнының карциномасының елеулі өзгерістері жөнінде мәлімделген жоқ.

Тамоксифенмен ем қабылдап жүрген әйелдер жүкті болудан сақтанғаны және гормондық емес тиісті контрацепциялық әдістерді қолданғандары жөн. Ұрпақ өрбіту жасындағы пациенттерде тамоксифенмен емдеуді бастар алдында жүктіліктің бар-жоқтығын мұқият тексеру керек. Сондай-ақ әйелдер шарана үшін ықтимал зор қаупі жөнінде хабардар болуы тиіс.

Лактация

Адамдарда тамоксифеннің емшек сүтіне экскрецияланатыны немесе олай болмайтыны белгісіз, демек, емшек емізген кезде тамоксифенді қабылдау ұсынылмайды. Емшек емізуді тоқтату немесе тамоксифен қабылдауды тоқтату жөніндегі шешім ана үшін ықтималды пайдасына негізделуі тиіс.

Автокөлікті және қауіптілігі зор механизмдерді басқару қабілетіне дәрілік заттың ықпал ету ерекшеліктері.

Тамоксифен пациенттердің механизмдерді жүргізу немесе басқару қабілетіне ықпалын тигізуі екітаталй. Алайда тамоксифенді қабылдаған кезде қажығыштық жағдайларының болғаны мәлімделді, сондықтан осы симптомдар көрініс берген кезде сақтық танытқан жөн.

Артық дозалануы

Теориялық тұрғыдан, артық дозаланғанда жоғарыда сипатталған жағымсыз құбылыстар күтіледі. Жануарларға жүргізілген зерттеулер дозаны төтенше арттырғанда (тәуліктіктен 100 және 200 есеге) эстрогендік әсер көрініс беруі мүмкін екендігін көрсетті. Тамоксифенді стандартты дозадан артық дозада қабылдағанда ЭКГ-дегі QT аралығының ұзару жағдайларының болғаны мәлімделді.

Артық дозаланған кезде спецификалық емі жоқ, симптомдық ем жүргізу қажет.

Шығарылу түрі және қаптамасы

Поливинилхлоридті үлбірден және лакталған баспалы алюминий фольгадан жасалған пішінді ұяшықты қаптамада 10 капсуладан. Пішінді ұяшықты 3 қаптама медициналық қолдану жөнінде мемлекеттік және орыс тілдеріндегі нұсқаулықпен бірге картон қорапшаға салынған.

Сақтау шарттары

Құрғақ, жарықтан қорғалған жерде, 250С-ден аспайтын температурада сақтау керек.

Балалардың қолы жетпейтін жерде сақтау керек!

Сақтау мерзімі

3 жыл

Жарамдылық мерзімі өткеннен кейін қолдануға болмайды.

Дәріханалардан босатылу шарттары

Рецепт арқылы

Өндіруші

«Абди Ибрахим Глобал Фарм» ЖШС

Қазақстан Республикасы, Алматы обл., Іле ауд., Өндірістік аймақ 282

тел.: +7 (727) 232-44-85

Тіркеу куәлігінің иесі

«Абди Ибрахим Глобал Фарм» ЖШС

Қазақстан Республикасы

Тұтынушылардан өнім (тауар) сапасы жөніндегі шағымдарды Қазақстан Республикасы аумағында қабылдайтын ұйымның мекенжайы

Абди Ибрахим Глобал Фарм» ЖШС, Қазақстан Республикасы, Алматы обл., Іле ауд., Өндірістік аймақ 282, тел.: +7 (727) 232-44-85,

электронды поштасы: info@aigp.kz

Қазақстан Республикасы аумағында тіркеуден кейін дәрілік заттың қауіпсіздігін бақылауға жауапты ұйымның мекенжайы

Абди Ибрахим Глобал Фарм» ЖШС, Қазақстан Республикасы, Алматы обл., Іле ауд., Өндірістік аймақ 282, тел.: +7 (727) 232-44-85, электронды поштасы: info@aigp.kz