Сэйдекс

Сэйдекс

Дексмедетомидин

Дәрілік түрі, дозалануы

Инфузия үшін ерітінді дайындауға арналған концентрат, 100 мкг/мл, 2 мл

Жүйке жүйесі. Психолептиктер. Ұйықтататын және седативтік дәрілер. Ұйықтататын және седативтік басқа препараттар. Дексмедетомидин.

АТХ коды N05CM18

- қарқынды емдеу бөліміндегі пациенттерде седация үшін, дауыстық стимуляцияға жауап ретінде оятудан аспайтын седацияның қажетті тереңдігі (Ричмондтың ажитация-седация шкаласы бойынша 0-ден 3 балл шамасына дейінгі ауқымға сәйкес келеді)

- диагностикалық немесе хирургиялық араласулар жүгізгенге дейін және/немесе оларды жүргізу кезінде интубацияланбаған ересек пациенттердегі седация, яғни анестезиологиялық шаралар жүргізу кезіндегі седация/санадан айырусыз седация.

Қолданудың басталуына дейінгі қажетті мәліметтер тізбесі

- дексмедетомидин гидрохлоридіне немесе кез келген қосымша заттарға аса жоғары сезімталдық

- жүректің ауыр блокадасы (2 және 3 дәрежелі), кардиостимуляторсыз

- бақыланбайтын гипотензия

- жедел цереброваскулярлық патология.

Қолдану кезіндегі қажетті сақтандыру шаралары

Мониторинг

Сэйдексті қарқынды ем немесе хирургия бөліміндегі пациенттермен жұмыс істеу тәжірибесі бар медицина қызметкерлері ғана енгізуі тиіс. Сэйдекс препаратының инфузиясы кезінде жүрек қызметінің үздіксіз мониторингі жүзеге асырылуы тиіс.

Тыныс алудың бәсеңдеуі және, кейбір жағдайларда апноэ қаупіне байланысты, интубацияланбаған пациенттерде тыныс алуды бақылау керек.

Дексмедетомидинді қолданғаннан кейін қалпына келу уақыты шамамен бір сағатты құрайды. Амбулаториялық жағдайларда қолданған кезде кемінде бір сағат бойы (немесе пациенттің жай-күйіне байланысты неғұрлым ұзақ кезең ішінде) мұқият мониторингті жалғастыру қажет, пациенттің қауіпсіздігіне көз жеткізу үшін медициналық бақылау тағы бір сағат бойы жалғасуы тиіс.

Препаратты енгізу

Сэйдекс препаратын болюсті енгізуге болмайды және қарқынды ем, анестезиология және реанимация бөлімшесінде жүктеме дозаны пайдалану ұсынылмайды. Сондықтан балама седативті дәріні, әсіресе жедел қозуды емдеудің алғашқы бірнеше сағаттарында немесе емшаралар жүргізу кезінде қолдану қажет. Седация уақытында емшараларды жүргізу кезінде седация деңгейін жылдам арттыру талап етілсе, басқа седативті дәрінің болюстік инъекциясының шағын дозаларын қолдануға болады. Сэйдекс қабылдап жүрген кейбір пациенттерде жеңіл ояну байқалды және стимуляциядан кейін олар есін тез жинап алды. Басқа клиникалық симптомдары жоқ болғанда осы белгі препараттың тиімсіздігі ретінде бөлек қарастырылмауы тиіс.

Әдетте дексмедетомидин терең седацияны тудырмайды, сондықтан пациенттерді оңай оятуға болады. Нәтижесінде дексмедетомидин препараттың бұл қасиеттері сәйкес келмейтін пациенттерге, мысалы, терең седацияны қажет ететін пациенттерге жарамайды.

Сэйдексті миорелаксанттарды қабылдау кезінде седация немесе интубация үшін индукциялық дәрі ретінде пайдалануға болмайды.

Дексмедетомидин құрысу белсенділігін баспайды, сондықтан құрысуды емдеуде қолдануға болмайды.

Дексмедетомидинді седативтік әсері бар немесе, ықтимал аддитивті әсерінің салдарынан, жүрек-қантамыр жүйесіне ықпал ететін дәрілік заттармен бір мезгілде қолданғанда сақтық таныту керек.

Сэйдекс препаратын пациенттер бақылай алатын седация үшін қолдану ұсынылмайды. Тиісті деректер жоқ.

Сэйдекс препаратын амбулаториялық жағдайда қолданған кезде пациенттерді үшінші тұлғалардың қадағалауымен шығаруға болады. Пациенттерге автокөлікті басқарудан немесе қызметтің басқа да ықтимал қауіпті түрлерімен айналысудан бас тарту және егер мүмкін болса, дексмедетомидиннің байқалатын әсеріне сәйкес жеткілікті уақыт ішінде седативтік әсер етуі мүмкін басқа құралдарды (мысалы, бензодиазепиндер, апиындар, алкоголь) қолданудан аулақ болу, емшараға, бір мезгілде қабылданатын дәрілік заттарға, пациенттің жасына және жағдайына байланысты ұсынылуы керек. Дексмедетомидинді егде жастағы пациенттерге қолданғанда сақ болу керек. Дексмедетомидин қолданған кезде, оның ішінде жүктеме дозасын пайдалану кезінде және емшаралар жүргізу кезінде 65 жастан асқан пациенттер гипотензияға неғұрлым бейім болуы мүмкін. Дозаны төмендету мүмкіндігін қарастыру керек.

Қанайналымның бұзылуы

Дексмедетомидин өзінің орталық симпатолитикалық әсерлерінің арқасында жүректің жиырылу жиілігін және қан қысымын төмендетеді; алайда бұл жоғары концентрацияларда шеткері тамырлардың тарылуы салдарынан гипертонияны туғызуы мүмкін.

Дексмедетомидинді брадикардиясы бар пациенттерге тағайындағанда сақтық таныту керек. Дексмедетомидиннің жүректің жиырылу жиілігі 60-тан төмен пациенттерге әсеріне қатысты деректер өте шектеулі, және бұл пациенттерге ерекше сақтық қажет болады. Брадикардия әдетте емдеуді қажет етпейді; алайда, әдетте, антихолинергиялық препараттарға немесе дозаның қажетті түзетілуіне реакция берген. Тыныштық күйінде жүректің жиырылу жиілігі төмен спортпен шұғылданатын пациенттер альфа-2-рецепторлардың агонистерінің брадикардиальді әсеріне өте сезімтал болуы мүмкін; синустық түйіннің уақытша тоқтап қалу жағдайлары болған. Сондай-ақ, жүректің тоқтауы, көбінесе алдыңғы брадикардия немесе атриовентрикулярлық блокада жағдайлары туралы хабарланды.

Сэйдекстің гипотензивтік әсері гипотензиясы (әсіресе вазопрессорларға төзімділік жағдайында), гиповолемиясы, созылмалы гипотензиясы бар немесе функционалдық резервтері төмен, ауыр қарыншалық дисфункциясы бар пациенттерде және егде жастағы пациенттерде анағұрлым айқын болуы мүмкін. Бұл жағдайлар ерекше назар аударуды қажет етеді. Гипотензия қалыпты жағдайларда арнайы емдеуді қажет етпейді; алайда қажет болса, дозаны азайту, сұйықтықты және/немесе вазоконстрикторларды пайдалану керек.

Шеткері автономды жүйке жүйесі зақымданған (мысалы, жұлынның жарақаттануы салдарынан) пациенттерде Сэйдекс препаратын енгізгеннен кейін гемодинамикалық әсерлер айқынырақ болуы және ерекше бақылауды қажет етуі мүмкін.

Дексмедетомидиннің жүктеме дозаларын енгізген кезде бір мезгілде шеткері вазоконстрикторлық әсермен бірге артериялық қысымның транзиторлық жоғарылауы байқалды, сондықтан жүктеме дозаны енгізу ұсынылмайды.

Жоғарылаған артериялық қысымды емдеу, әдетте, қажет емес, алайда препаратты енгізу жылдамдығын төмендету мүмкіндігін қарастырған жөн.

Дексмедетомидиннің жоғары концентрациясында ошақтық вазоконстрикция жүректің ишемиялық ауруы немесе ауыр цереброваскулярлық аурулары бар пациенттерде үлкен маңызға ие болуы мүмкін, мұндай пациенттерге қалтқысыз бақылау жүргізуді белгілеу керек. Миокард немесе ми ишемиясының белгілері бар пациенттерде препарат дозасын төмендету немесе оны енгізуді тоқтату мүмкіндігін қарастыру керек.

Дексмедетомидинді гипотензия және брадикардия қаупінің ықтимал артуына байланысты жұлын немесе эпидуральді анестезиямен біріктірілімде сақтықпен қолдану ұсынылады.

Бауыр жеткіліксіздігі

Бауырдың ауыр жеткіліксіздігі бар пациенттерде сақ болу керек, өйткені препаратты шамадан тыс енгізу дексмедетомидин клиренсінің төмендеуі нәтижесі ретінде жағымсыз реакциялар қаупінің жоғарылауына және шамадан тыс седацияға әкелуі мүмкін.

Неврологиялық бұзылулар

Сэйдекс құрысу белсенділігін төмендетпеуі әбден ықтимал, сондықтан эпилепсиялық статуста монотерапия түрінде қолданылмауы тиіс.

Бастың жарақаттануы және нейрохирургиялық операциялардан кейінгі кезең сияқты нейрохирургиялық жағдайларда Сэйдекс препаратын қолдану тәжірибесі шектеулі, сондықтан ол мұндай жағдайларда, әсіресе терең седация қажет болғанда, сақтықпен қолданылуы тиіс. Емді таңдағанда Сэйдекс церебральді қан ағынын және бассүйекішілік қысымды төмендететінін ескерген жөн.

Жалпы сақтық шаралары

Ұзақ қолданудан кейін 2-адренорецепторларының агонистерін күрт тоқтатқанда сирек жағдайларда «тоқтату» синдромы туындады. Ажитация дамығанда және артериялық қысым жоғарылағанда дексмедетомидинді тоқтатқаннан кейін бірден осы жағдайдың туындауы мүмкін екенін ескеру керек.

Қатерлі гипертермияға бейім адамдарда дексмедетомидинді қолданудың қауіпсіздігі анықталған жоқ, сондықтан препараттарды мұндай жағдайда қолдану ұсынылмайды. Түсініксіз тұрақты қызба дамығанда Сэйдекс препаратын қолдануды тоқтату керек.

Дексмедетомидин препаратымен емдеу кезінде қантсыз диабеттің дамуы туралы хабарламалар бар. Полиурия дамыған жағдайда дексмедетомидинді қабылдауды тоқтатып, қан сарысуындағы натрий деңгейін және несептің осмолярлығын тексеру ұсынылады.

Сэйдекс препаратының құрамында мл-ге шаққанда 1 ммоль (23 мг) аз натрий бар.

Басқа дәрілік препараттармен өзара әрекеттесуі

Дәрілік өзара әрекеттесуін зерттеулер ересектерде ғана жүргізілді.

Дексмедетомидинді анестетиктермен, седативтік дәрілермен, ұйықтататын дәрілермен және есірткілік анальгетиктермен бір мезгілде қолдану, бәрінен бұрын, олардың әсерлерінің күшеюіне әкелетін болады. Осы болжам изофлуранмен, пропофолмен, альфентанилмен және мидазоламмен жүргізілген зерттеулерде айғақталды.

Дексмедетомидин және изофлуран, пропофол, альфентанил және мидазолам арасында фармакокинетикалық өзара әрекеттесулер байқалған жоқ. Алайда мұндай дәрілерді дексмедетомидинмен біріктіріп қолданғанда ықтимал фармакодинамикалық өзара әрекеттесулер салдарынан дексмедетомидиннің немесе анестезия үшін бір мезгілде қолданылатын дәрілердің, седативтік дәрілердің, ұйықтататын дәрілердің немесе есірткілік анальгетиктердің дозаларын төмендету қажет етілуі мүмкін.

Дексмедетомидин және негізінен CYP2B6 субстраттары арасында өзара әрекеттесулердің әлеуетті ықтималдығы бар.

Дексмедетомидин CYP1A2, CYP2B6, CYP2C8, CYP2C9 және CYP3A4 изоферменттерін индукциялауға қабілетті, сондықтан мұндай мүмкіндік жоққа шығарылмайды.

Артериялық қысымның төмендеуін және брадикардияны туындататын дәрілік заттарды, мысалы, β-адреноблокаторларды қабылдап жүрген пациенттерде көрсетілген әсерлердің күшеюі мүмкін екенін ескерген жөн (алайда эсмололмен жүргізілген зерттеулерде осы әсерлердің қосымша күшеюі орташа болды).

Арнайы сақтандырулар

Жүктілік және лактация кезеңінде

Жүкті әйелдерге дексмедетомединді қолдану туралы мәліметтер жоқ немесе шектеулі. Егер әйелдің клиникалық жағдайы дексмедетомидинмен емдеуді қажет етпесе, дексмедетомидинді жүктілік кезінде қолдануға болмайды.

Дексмедетомидин емшек сүті арқылы бөлінетіндігі белгісіз.

Нәресте үшін қауіпті жоққа шығаруға болмайды. Емшекпен емізуді тоқтату немесе дексмедетомидинмен емдеуді тоқтату туралы шешім емшек емізудің нәресте үшін пайдасын және анасы үшін дексмедетомидин терапиясының пайдасын ескере отырып қабылдануы керек.

Фертильділік

Адамның ұрпақ өрбіту функциясының әсеріне қатысты деректер жоқ.

Препараттың көлік құралын және қауіптілігі зор механизмдерді басқару қабілетіне әсер ету ерекшеліктері

Пациенттерге емшара кезінде тыныштандыру үшін дексмедетомидинді қабылдағаннан кейін тиісті уақыт кезеңі ішінде көлік құралдарын басқару немесе басқа қауіпті тапсырмаларды орындаудан бас тартуға кеңес беріледі.

Қолдану жөніндегі нұсқаулар

Қарқынды емдеу бөліміндегі пациенттерде седация үшін, дауыстық стимуляцияға жауап ретінде оятудан аспайтын седацияның қажетті тереңдігі (Ричмондтың ажитация-седация шкаласы бойынша 0-ден 3 балл шамасына дейінгі ауқымға сәйкес келеді)

Тек қана стационар жағдайларында қолдануға арналған. Сэйдексті қарқынды ем жағдайларында пациенттерді емдеу тәжірибесі бар мамандар қолдануы тиіс.

Дозалану режимі

Интубация жүргізілген және седацияда жүрген пациенттерде бастапқы инфузия жылдамдығы сағатына 0,7 мкг/кг болатын Сэйдекс препаратына ауыстырылып, кейіннен седацияны қажетті тереңдігіне жеткізу мақсатында дозаны (пациенттің реакциясына байланысты) сағатына 0,2-1,4 мкг/кг шегінде біртіндеп түзетуге болады. Әлсізденген пациенттер үшін инфузияның бастапқы жылдамдығы төмендетілуі мүмкін. Дексмедетомидин күшті әсер ететін дәрі болып табылады, сондықтан оны енгізу жылдамдығы сағатына есептеліп беріледі. Дозаны түзеткеннен кейін бір сағат бойы седация көзделген тереңдікке жетпеуі мүмкін.

Ең жоғарғы доза

Ең жоғары 1,4 мкг/кг/сағ. дозаны арттырмау ұсынылады. Препараттың ең жоғары дозасында талапқа сай седативтік әсерге қол жетпеген пациенттер баламалы седативтік дәріге көшірілуі тиіс. Препараттың қаныққан дозасын енгізу ұсынылмайды, өйткені мұндайда жағымсыз реакциялардың жиілігі жоғарылайды. Сэйдекс препаратын енгізуден кейін клиникалық әсердің басталуына дейін пропофолды немесе мидазоламды қолдануға жол беріледі.

Емдеу ұзақтығы

Сэйдекс препаратын 14 күннен артық уақыт бойы қолдану тәжірибесі жоқ. Препаратты 14 күннен ұзақ қолданғанда пациенттің жай-күйіне ұдайы бағалау қажет.

Диагностикалық немесе хирургиялық араласулар жүгізгенге дейін және/немесе оларды жүргізу кезінде интубацияланбаған ересек пациенттердегі седация, яғни шаралар жүргізу кезіндегі седация/санадан айырусыз седация.

Сэйдексті операция бөлмесінде немесе диагностикалық процедуралар кезінде пациенттерге анестезиологиялық шаралар жүргізу тәжірибесі бар медицина мамандары ғана қолдануы керек. Есін жоғалтпай тыныштандыру үшін Сэйдексті қолдану кезінде пациенттер тұрақты түрде диагностикалық немесе хирургиялық араласуларға қатыспайтын тұлғалардың бақылауында болуы тиіс. Гипотензия, гипертензия, брадикардия, тыныстың тарылуы, тыныс жолдарының обструкциялары, апноэ, диспноэ және/немесе сатурация төмендеуінің ерте белгілерін анықтау үшін пациенттерді тұрақты қадағалап отыру қажет.

Қосымша оттегігінің болуын қамтамасыз ету қажет және оны қолдану үшін көрсетімдер болған жағдайда дереу қолданылуы тиіс. Оттегі сатурациясын пульстік оксиметрия әдісімен қадағалау қажет. Сэйдексті енгізуді инфузия түріндегі жүктеме дозадан бастайды, одан кейін демеуші инфузия жүргізіледі. Қажетті клиникалық әсерге жету үшін араласу түріне байланысты тиісті жергілікті анестезия немесе анальгезия қажет болуы мүмкін. Ауырсындыратын араласулар жағдайында немесе седацияның неғұрлым терең деңгейі қажет болғанда қосымша анальгезияны немесе седативті дәрілерді (мысалы, апиындар, мидазолам немесе пропофол) қолдану ұсынылады. Препараттың жартылай бөлінуінің фармакокинетикалық кезеңі шамамен 6 мин деп бағаланады, оны қажетті клиникалық әсеріне қол жеткізу үшін дозаны титрлеу үшін қажетті уақытты бағалау үшін басқа қолданылатын препараттардың әсерлерімен бірге назарға алуға болады.

Емшаралар кезінде седацияның басталуы:

- Жүктеме доза 10 минут бойы инфузия түрінде 1,0 мкг/кг. Мысалы, офтальмологиялық операциялар сияқты аз инвазиялық араласуларға қатысты 10 минут бойы 0,5 мкг/кг инфузия түрінде жүктеме дозасын қолдануға болады.

Емшаралар кезінде седацияны сақтау:

- Демеуші инфузияны әдетте 0,6-0,7 мкг/кг/сағ дозадан бастайды және 0,2-ден 1 мкг/кг/сағ доза диапазонында қажетті клиникалық әсерге жеткенге дейін титрлейді. Демеуші инфузияның жылдамдығын седативті әсердің қажетті деңгейіне жеткенге дейін түзету қажет.

Артық дозалану жағдайында қабылдау қажет болатын шаралар

Клиникалық және тіркеуден кейінгі зерттеулер аясында дексмедетомидиннің артық дозалануының бірнеше жағдайлары жөнінде мәлімделді. Осындай жағдайларда артық дозалану салдарынан өте жиі кездесетін жағымсыз реакциялар брадикардия, артериялық гипотензия, шамадан тыс седация, ұйқышылдық және жүректің тоқтап қалуы болды.

Клиникалық симптоматикамен көрініс беретін артық дозалану жағдайында Сэйдекс инфузиясын азайту немесе тоқтату керек. Жүректің тоқтап қалуымен қатар жүретін ауыр артық дозаланудың жекелеген жағдайларында реанимациялық шаралар жүргізу қажет етілді. Артық дозалану жағдайларының бірде-біреуі өліммен аяқталған жоқ.

Дәрілік препаратты қолдану тәсілін түсіну үшін медицина қызметкерінен кеңес алу жөніндегі ұсынымдар

Тек қана стационар жағдайларында қолдануға арналған. Сэйдексті қарқынды ем жағдайларында пациенттерді емдеу тәжірибесі бар мамандар қолдануға тиіс.

ДП стандартты қолдану кезінде көрініс беретін жағымсыз реакциялар сипаттамасы және осы жағдайда қабылдау керек шаралар

Өте жиі

- брадикардия*, артериялық гипотензия*, артериялық гипертензия

Жиі

- гипергликемия, гипогликемия

- ажитация

- ишемия немесе миокард инфарктісі, тахикардия

- тыныс алудың бәсеңдеуі

- жүрек айнуы, құсу, ауыздың құрғауы

- тоқтату синдромы, гипертермия

Жиі емес

- метаболизмдік ацидоз, гипоальбуминемия

- елестеулер

- І дәрежедегі атриовентрикулярлық блокада, жүректің минуттық көлемінің азаюы

- диспноэ, апноэ

- іштің кебуі

- препараттың тиімсіздігі, шөлдеу

Белгісіз (қолда бар деректер бойынша бағалау мүмкін емес)

- зәр шығару жиілігінің жоғарылауы мен қатты шөлдеу қантсыз диабет деп аталатын гормоналды бұзылыстың симптомдары болуы мүмкін. Мұндай жағдайда дәрігерге хабарласыңыз.

Клиниалық мәні бар артериялық гипотензия және брадикардия Сэйдекс инфузиясының жылдамдығын азайту немесе оны тоқтау жолымен басылуға тиіс. Қарқынды емдеу бөлімінде болмаған салыстырмалы түрде дені сау ерікті адамдарда Сэйдексті қолданғанда брадикардия кейде синустық түйіннің белсенділігі тоқтауына немесе синустың үзілуіне әкелді. Симптомдар аяқты көтергенде (бас деңгейінен жоғарыға) және атропин немесе гликопиролат сияқты антихолинергиялық дәрілерді қолданғанда басылды. Жекелеген жағдайларда бұрын брадикардия болған пациенттерде ол асистолия көріністеріне дейін үдеді.

Артериялық гипертензия жүктеме дозаларды қолданумен байланысты болды. Бұл реакцияны жүктеме дозасын енгізбеу немесе инфузия жылдамдығын немесе жүктеме дозасын азайту арқылы азайтуға болады.

Жағымсыз дәрілік реакциялар туындағанда медициналық қызметкерге, фармацевтикалық қызметкерге немесе, дәрілік препараттардың тиімсіздігі туралы хабарламаларды қоса, дәрілік препараттарға болатын жағымсыз реакциялар (әсерлер) жөніндегі ақпараттық деректер базасына тікелей хабарласу керек:

Қазақстан Республикасы Денсаулық сақтау министрлігі Медициналық және фармацевтикалық бақылау комитеті «Дәрілік заттар мен медициналық бұйымдарды ұлттық сараптау орталығы» ШЖҚ РМК

http://www.ndda.kz

Қосымша мәліметтер

Дәрілік препарат құрамы

Әрбір мл препараттың құрамында

белсенді зат - 100 мкг дексмедетомидин (118 мкг дексмедетомидин гидрохлориді түрінде),

қосымша заттар - натрий хлориді, инъекцияға арналған су.

Сыртқы түрінің, иісінің, дәмінің сипаттамасы

Мөлдір, түссіз ерітінді.

Шығарылу түрі және қаптамасы

2 мл препараттан бейтарап боросиликатты мөлдір шыныдан (I типті), бромбутилден (I типті) жасалған резеңке тығындармен тығындалған, «flip off» типті пластмасса қалпақшалары бар алюминий қаптамалармен қаусырылған құтыларға салынады.

5 құтыдан пішінді пластик тұғырға (контейнерге) салынады.

1 тұғырдан медициналық қолдану жөніндегі қазақ және орыс тілдеріндегі нұсқаулықпен бірге картон қорапқа салынған.

2 жыл

Жарамдылық мерзімі өткеннен кейін қолдануға болмайды.

25 °С-ден аспайтын температурада сақтау керек.

0,9% натрий хлоридінің ерітіндісімен сұйылтылған концентратты 25°С-ден аспайтын температурада 48 сағат бойы сақтау керек.

Балалардың қолы жетпейтін жерде сақтау керек!

Рецепт арқылы. Арнайы емдеу мекемелеріне арналған.

Өндіруші туралы мәліметтер

Jiangsu Hengrui Pharmaceuticals Co., Ltd.

No.7, Kunlunshan Road, Economic & Technological Development Zone, Ляньюньган, Цзянсу 222047, Қытай.

Тел.: 0086-518-85159525, 0086-518-81221367

Факс: 0086-518-85159525

Тіркеу куәлігінің ұстаушысы

THESAY PHARMA DRUG STORE LLC.

1101, The Oberoi Centre, Business Bay, Дубай, БАӘ

Телефон: +971 4 587 6443

Электронды пошта: info@thesaypharma.ae

Қазақстан Республикасы аумағында тұтынушылардан дәрілік заттар сапасына қатысты шағымдар (ұсыныстар) қабылдайтын және дәрілік заттың тіркеуден кейінгі қауіпсіздігін қадағалауға жауапты ұйымның атауы, мекенжайы және байланыс деректері (телефон, факс, электронды пошта)

«Saa Pharma» ЖШС,

050010, Алматы қ., Достық даңғылы, 38, кеңсе № 705, KDC бизнес орталығы,

Тел.: +7 (727) 345 10 12

ұялы: +7 (701) 922-60-63

Электронды пошта: info@saapharma.kz