Солкодерм

• русский
• қазақша

• Скачать инструкцию медикамента

Саудалық атауы

Солкодерм

Халықаралық патенттелмеген атауы

Жоқ

Дәрілік түрі

Сыртқа қолдануға арналған ерітінді, 0.2 мл

Құрамы

1 мл ерітіндінің құрамында

белсенді заттар: 70% азот қышқылы 580,660 мг, мұзды сірке қышқылы 41,080 мг, қымыздық қышқылының дигидраты 57,320 мг, 90% сүт қышқылы 4,550 мг, мыс (II) нитратының тригидраты 0,048 мг,

қосымша зат – тазартылған су.

Сипаттамасы

Түссізден сәл сарғыш түске дейінгі мөлдір ерітінді

Фармакотерапиялық тобы

Тері ауруларын емдеуге арналған басқа да препараттар. Мүйізгектену мен сүйелдерді емдеуге арналған препараттар.

АТХ коды D11AF

Фармакологиялық қасиеттері

Фармакокинетикасы

Солкодерммен емдеуде белсенді затының тері арқылы қандай-да бір елеулі сіңірілуі байқалмайды. Емдік дозасы көлемінің аса төмен екенін ескере отырып, препараттың организмге жүйелі әсер етуінен қауіптенбеуге болады.

Фармакодинамикасы

Солкодерм құрамында концентрацияланған қышқылдар бар ерітінді түрінде келеді және терінің қатерсіз беткейлік зақымдануларында сыртқа қолдануға арналған. Солкодерм емделіп отырған тіннің патологиялық өзгерген бөлігінің жылдам девитализациясын және бекуін қамтамасыз етеді.

Препараттың тікелей әсері өзіне тән бозғылт-сұр немесе сарғыштау рең пайда болғанда көрінеді. Препараттың әсерінен кейін девитализацияланған тін сусызданады және мумификациялануына қарай күңгірт-қоңыр түске ие болады. Түзілген мумификацияланған қабыршақ бірнеше күннен немесе аптадан кейін өздігінен ажырайды.

Қолданылуы

- кәдімгі сүйелдерде

- табан сүйелдерінде

- үшкір кондиломаларда

- қатерсіз невожасушалық невуста

Қолдану тәсілі мен дозалары

Солкодерм тек сыртқа қолдануға арналған. Емшараны дәрігер немесе дәрігердің бақылауымен медицина қызметкері жүргізуі тиіс.

Емшара алдында терінің зақымдалған бөлігінің аумағы этил спиртімен немесе эфирмен сүртіледі. Солкодерм тікелей терінің зақымдалған бөлігіне жағылады. Препаратты теріге жағу үшін, әрбір қаптамада болатын ұштары өткір және мұқал арнайы пластик аппликатор пайдаланылады. Өткір ұшы, негізінен, препаратты терінің көлемі жағынан аз зақымдалған бөлігіне жағу үшін; мұқал ұшы ауқымды зақымдалу ошақтарын өңдеу үшін пайдаланылады.

Препаратты жағудың баламалы әдісі ретінде қоса берілген шыны капилляр пайдаланылады. Терінің ауданы 2-3 см2 біріктірілген зақымдануларын да шыны капиллярдың көмегімен өңдеуге болады. Шыны капиллярды препаратпен толтыру үшін, оны бірнеше минутқа Солкодерм ерітіндісіне батыру қажет. Аппликациялау кезінде, Солкодерм ерітіндісінің тым көп мөлшерінің жағылып кетуін және тіннің терең қабаттарының зақымдалуына жол бермей, аса сақ болу керек.

Солкодерм терінің зақымдалған бөлігіне пластик аппликатормен немесе шыны капиллярмен сақтықпен жағылады, содан соң терінің таңдап алынған бөлігінің беткейіне пластик аппликатордың көмегімен ерітінді тінге толығымен енгенге дейін баса отырып, біркелкі жайылады. Келесі 3-5 минут ішінде өңделген бөлікте болып жатқан өзгерістерді мұқият қадағалау қажет: өзіне тән бозғылт-сұр немесе сарғыштау түс пайда болып, тері түссізденеді. Емшара жоғарыда аталған тері түсінің өзгеруі пайда болғанша қайталануы тиіс.

Мүйізденген сүйелдерді өңдеуде алдын-ала мүйізді қабаттың үстіңгі қабатын алып тастау керек.

Терінің диаметрі 10 мм асатын зақымдалған бөліктері Солкодерммен тек терінің беткі қабатының ғана түрі патологиялық өзгеріске ұшырағаны анықталған жағдайда ғана өңделеді.

Терінің зақымдалған ошақтары көп болса, Солкодерммен емдеу бірнеше кезеңде, 4 аптаға жуық аралықпен жүргізілуі тиіс. Әр емшара кезінде қосынды ауданы 2-3 см2 аспайтын 2-3-тен аспайтын зақымдалу ошағы өңделуі мүмкін.

Емшараны жүргізген кезде орташа өтпелі эритема және препаратты жаққан жердің айналасындағы сау теріде ақ ишемиялық шеңбер байқалады. Бұл құбылыстар қалыпты болып есептеледі және арнайы емдеуді қажет етпейді. Ауыруы пайда болған жағдайда емдеу кідірмей тоқтатылуы тиіс. Емшара жүргізгеннен кейін бірнеше күн бойы терінің өңделген бөлігі күңгір-қоңыр реңге ие болады және қабыршақ түзе отырып құрғайды. Патологиялық өзгерген тіннің мумификациясы қанағаттанарлықсыз болған жағдайда, бірнеше күннен кейін емшараны қайта жүргізуге болады.

Емдеуге ұшырайтын патологиялық өзгерген тіндердің бекуі мен мумификациясына ықпал ету үшін, зақымдалған бөліктерді күніне 2-3 рет 70 % спиртке шыланған тампонмен сүрту керек (әсіресе ванна қабылдағаннан немесе жуынғаннан кейін).

Жағымсыз әсерлері

жиі

- препаратты жаққан жерде жеңіл шымылдатудың туындауы (бірнеше минут бойы), өңделген жердің айналасының қызаруы

сирек

- тері пигментациясының өзгеруі, тыртықты тіннің түзілуі

- терең тін қабаттарының зақымдануы

Жағымсыз құбылыстар Солкодермді дұрыс пайдаланбағанда немесе тым жоғары дозаларын қолданғанда туындайды.

Қолдануға болмайтын жағдайлар

- терінің қатерлі түзілістері, соның ішінде, қатерлі меланома

- тыртықты тіннің түзілуіне айқын бейімділік

- 5 жасқа дейінгі балаларға

Дәрілермен өзара әрекеттесуі

Солкодермнің жергілікті әсері бар басқа дәрілік препараттармен өзара әрекеттесуі анықталмаған.

Айрықша нұсқаулар

Солкодерм тек сартқа қолдануға арналған.

Солкодерм секпілдер мен келлоидты тыртықтарды кетіруге пайдаланылмауы тиіс.

Терінің айналасындағы бөліктерінде айқын жергілікті тітіркену және қытты қышыну пайда болса, құрамында стероидты компоненттері бар крем немесе ауырғанды басатын әсері бар жақпамайды қолдану ұсынылады.

Солкодерм ерітіндісі ампуланы ашқаннан кейін химиялық тұрғыдан тұрақсыз болатындықтан, әр емдеу шарасы үшін жаңа ампуланы пайдалану қажет.

Ашар алдында ампуланы сілку және ампуланың үстіңгі бөлігіне шығып кеткен ерітіндіні төмен түсіру керек. Ампуланың мойны салынған сызығы бойымен сындырылады. Ашылған ампула оны ампулаларға арналған пішінді қаптаманың ұяшығына бекіту арқылы, қатаң түрде тігінен сақталуы тиіс.

Шырышты қабықтардың жанында, соның ішінде көз айналасында орналасқан терінің зақымдалған бөліктерін емдеуде ерекше сақ болу керек.

Қабыршақты қырып немесе механикалық құралдарды пайдаланып алып тастауға болмайды. Қабыршақ өздігінен түсіп қалуы тиіс, әйтпесе тіндердің жазылу үдерістері бұзылуы және тыртықтар түзілуі мүмкін.

Солкодерммен өңделген зақымданулардың толық жазылуына қол жеткізу үшін (емдеуден кейін шамамен 2-4 ай) тікелей күн сәулесінің және ультракүлгін сәуленің түсуін болдырмау керек.

Жүктілік және лактация кезеңі

Солкодерммен емдеуді тек оны қолданудың анасы үшін ықтимал пайдасы ұрық үшін мүмкін болатын қауіптен асатын жағдайларда ғана тағайындау керек.

Балалар мен егде жастағы адамдарда қолданылуы

Препаратты 5 жастан асқан балаларда қолдануға қатысты шектеулер жоқ.

Препараттың егде жастағы емделушілерде қолданылуына қатысты шектеулер жоқ.

Солкодермді пайдаланудағы сақтық шаралары

• Солкодермді терінің қабынған бөліктерінде қолдануға жол берілмейді.

• Ауыру пайда болған жағдайларда, емдеу кідірмей тоқтатылуы тиіс.

• Солкодермнің тым жоғары дозаларын қолдану қышқылды күйіктердің және терінің терең қабаттарының зақымдалуына алып келуі мүмкін.

• Солкодерм ерітіндісін бетке, әсіресе терінің көз айналасында орналасқан бөліктеріне жаққанда айрықша сақтық шараларын сақтау керек.

• Егер Солкодерм ерітіндісі байқаусызда сау теріге тиіп кетсе, ол кідіртпей суға малынған мақта тампонының көмегімен кетіріп тасталуы тиіс. Егер Солкодерм ерітіндісі байқаусызда көзге тиіп кетсе, көзді тез арада мол судың немесе әлсіз сілтілік ерітіндінің, мысалы - 1 % натрий бикарбонаты ерітіндісінің көмегімен жуып-шаю қажет. Солкодерм ерітіндісінің жиһазға немесе киімге тиіп кеткен тамшыларын сумен жуып тастау қажет, өйткені Солкодерм олар жасалған материалдарды бүлдіруге қабілетті.

• Терінің зақымдалған бөлігінің биопсиясынан кейін, Солкодерм ерітіндісімен емдеуге кіріспес бұрын 8-10 күн күте тұру ұсынылады.

• Терінің бұрын басқа препараттармен, басқа әдістермен емделген қатерсіз жаңа түзілімдерін Солкодерммен емдеуде ерекше сақ болу қажет.

• Пайдаланылған ампулаларды жою: ампуланы тастар алдында, ерітіндінің қалдықтарын ағынды сумен шайып тастау керек. Бос ампуланы қалдыққа арналған контейнерге тастауға болады.

  Дәрілік заттың көлік құралын немесе қауіпті механизмдерді басқару қабілетіне әсер ету ерекшеліктері

  Әсер етпейді.

Артық дозалануы

Симптомдары – ойық жара.

Емі – препаратты тоқтату, белгілеріне қарай.

Шығарылу түрі мен қаптамасы

0.2 мл препараттан түссіз шыныдан жасалған, ампуланы ашуға арналған сызығы бар ампулаларға құяды.

1 ампуладан аппликаторлар (1 дана) және шыны капиллярлар (2 дана) жинағымен жиынтықта пішінді ұяшықты қаптамаға салады. Ампулаға заттаңба жапсырылады.

1 пішінді қаптамадан қолданылуы жөніндегі мемлекеттік және орыс тіліндегі нұсқаулықпен бірге картоннан жасалған пәшкеге салады.

Сақтау шарттары

25 оС-ден аспайтын температурада сақтау керек.

Балалардың қолы жетпейтін жерде сақтау керек!

Назар аударыңыз! Ерітіндінің қатты еріткіш әсері бар. Сақ болып жұмыс істеу керек!

Сақтау мерзімі

2 жыл

Жарамдылық мерзімі өткеннен кейін пайдалануға болмайды.

Дәріханалардан босатылу шарттары

Рецепт арқылы

Өндіруші

Легаси Фармасьютикалс Швейцария ГмбХ

Рюрбергштрассе 21, 4127 Бирсфельден, Швейцария

Тіркеу куәлігінің иесі

МЕДА Фармасьютикалс Швейцария ГмбХ

Хегнауштрассе 60, 8602 Ванген-Брюттизеллен, Швейцария

Қазақстан Республикасы аумағында тұтынушылардан өнім сапасына қатысты шағымдарды қабылдайтын ұйымның мекенжайы

Қазақстан Республикасындағы МЕДА Фармасьютикалз Швейцария ГмбХ өкілдігі: Алматы қ., Әл-Фараби д-лы 7, «Нұрлы Тау» ПФО, 4 А ғимараты, 31 кеңсе, тел. 311-04-30, 311-52-49, тел./факс 277-77-32

Электронды поштасы: info.safety@meda-cis.com