Синарта

• русский
• қазақша

• Скачать инструкцию медикамента

Саудалық атауы

Синарта

Халықаралық патенттелмеген атауы

Глюкозамин

Дәрілік түрі

Инъекцияға арналған 200 мг/мл 2 мл ерітінді (диэтаноламин), 1 мл еріткішпен жиынтықта

Құрамы

1 мл препараттың (А ампула) құрамында

белсенді зат: глюкозамин сульфаттың натрий тұзы 100% затқа шаққанда – 251,25 мг, глюкозамин сульфатқа шаққанда - 200 мг, натрий хлоридіне шаққанда – 51,25 мг,

қосымша заттар: лидокаин гидрохлориді, инъекцияға арналған су.

1 мл еріткіштің құрамында (В ампула) диэтаноламин, инъекцияға арналған су бар.

Сипаттамасы

А ампула: мөлдір түссіз немесе ашық-сары түсті сұйықтық.

В ампула: мөлдір түссіз сұйықтық.

А + В ампула: мөлдір түссіз немесе ашық-сары түсті сұйықтық.

Фармакотерапиялық тобы

Қабынуға қарсы стероидты емес және ревматизмге қарсы препараттар.

Қабынуға қарсы стероидты емес басқа да препараттар. Глюкозамин.

АТХ коды М01АХ05

Фармакологиялық қасиеттері

Фармакокинетикасы

Бұлшықет ішіне енгізгеннен кейін глюкозамин сульфаты биологиялық бөгеттер арқылы тез өтеді және тіндерге, көбіне буын шеміршектері тіндеріне енеді. Жартылай шығарылу кезеңі − 60 сағатқа жуық, негізінен бүйректер арқылы шығарылады.

Фармакодинамикасы

Глюкозамин сульфаты гликозаминогликандардың синтезін және, тиісінше, буындық протеогликандардың синтезін стимуляциялайды. Бұдан басқа, глюкозамин қабынуға қарсы қасиеттер танытады, буын шеміршектерінің деградация үдерісін, негізінен, оның метаболизмдік белсенділігі, интерлейкин-1 (IL-1), лизосомальді фермент, коллагеназдер және A2 фосфолипаза белсендігін тежеу қабілеті есебінен, баяулатады.

Глюкозамин сульфатымен емдеу әсері емдеуді бастағаннан 2-3 апта өткеннен кейін білінеді.

Қолданылуы

– остеоартрит симптомдарын емдеуге: ауыру және қызметтік шектелушілік

Қолдану тәсілі және дозалары

Препаратты тек бұлшықет ішіне қолданады.

Ересек емделушілер және егде жастағы емделушілер.

Қолданар алдында В ерітіндісін (еріткіш) А ерітіндісімен (препарат ерітіндісі) бір еккіште араластыру керек. Препараттың дайындалған ерітіндісін (А+В ерітіндісі) 4-6 апта ішінде аптасына 3 рет күн ара бұлшықет ішіне 3 мл-ден енгізеді.

Жағымсыз әсерлері

Жиі

– асқазанның ауыруы, метеоризм, диарея, іш қату, жүректің айнуы, құсу

– бас ауыру, ұйқышылдық, жалпы әлсіздік, қатты қажу

Жиі емес

– эритема

Өте сирек

– анафилактоидтық реакциялар, анафилактикалық шок, денеге жайылған эксфолиативтік дерматит

Жекелеген жағдайларда

– тіл мен еріннің ұюы, жарықтан қорқу, ұйқының бұзылуы, көрудің нашарлауы, заттың қосарланып көрінуі, сананың шатасуы, бұлшықеттің жыбырлауы, жоғары дозаларды қолданғаннан кейін – құлақтың шыңылдауы, қозу жағдайы, парестезиялар, құрысулар

– артериялық гипотензия, жүректің көлденең блокадасы

– ісіну

– тыныстың тарылуы немесе тоқтап қалу, ентігу

– ыстықтау, салқындау сезімі немесе қол-аяқтың ұюының сезілуі, қатерлі гипертермия, иммундық жүйенің бәсеңдеуі

– жеңіл күйдіру сезімі (1 минут ішінде жансыздандыру әсерінің пайда болуымен жоғалады), тромбофлебит, инъекция жасаған жердің ауыруы

Байланысы дәлелденбеген

– әртүрлі тері бөртпелері және қышыну түріндегі аллергиялық реакция

– көрудің нашарлауы

– шаштың түсуі

Қолдануға болмайтын жағдайлар

• глюкозамин сульфатына, лидокаинге және препараттың қосымша компоненттеріне жекелей жоғары сезімталдық

• моллюскаларға, теңіз өнімдеріне аллергия

• кардиогендік шок

• айқын артериялық гипотензия

• жүрек қызметінің созылмалы жеткіліксіздігінің ауыр түрлері

• сол жақ қарынша қызметінің төмендеуі

• атриовентрикулярлық блокаданың ІІ-ІІІ дәрежесі

• ауыр брадикардия

• Адамс-Стокс синдромы

• лидокаинді қолдану әсерінен болған құрысулардың сыртартқыда болуы

• синустық түйін әлсіздігі синдромы

• бауыр қызметінің ауыр бұзылулары

• гиповолемия

• миастения

• 18 жасқа дейінгі балалар

• жүктілік және лактация кезеңі

Дәрілермен өзара әрекеттесуі

Бір еккіште басқа препараттармен бірге араластыруға болмайды. Жанына салынған еріткіштен басқаны пайдаланбау керек.

Препарат қабынуға қарсы стероидты емес дәрілермен және глюкокортикостероидтармен үйлеседі.

Кумаринді антикоагулянттармен бірге қолданғанда олардың әсері күшеюі мүмкін. Осыған байланысты бұл емделушілерде коагуляция параметрлеріне бақылау жүргізген дұрыс.

Тетрациклиннің асқазан-ішекте сіңуі күшеюі мүмкін.

Циметидин, пептидин, бупивакаин, пропранолол, хинидин, дизопирамид, амитриптилин, нортриптилин, хлорпромазин, имипрамин қан сарысуында лидокаин деңгейін арттырып, оның бауырдағы метаболизмін азайтады.

Лидокаин жүйке-бұлшықет берілімін бөгейтін препараттардың әсерін күшейтуі мүмкін, өйткені соңғысы жүйке импульстарының өткізгіштігін азайтады.

Аритмияға қарсы ІА класына жататын препараттармен (соның ішінде хинидинмен, прокаинамидпен, дизопирамидпен) бір мезгілде қолданғанда QT аралығы ұзарады, жекелеген жағдайларда қарыншалардың AV-блокадасы немесе фибрилляциясы пайда болуы мүмкін.

Седативтік дәрілермен бір мезгілде қолданғанда тыныштандырғыш әсері күшейеді. Фенитоин лидокаиннің кардиодепрессивтік әсерін күшейтеді.

Прокаинамидпен бір мезгілде қолданғанда сандырақтау, елестеулер болуы мүмкін.

Этанол лидокаиннің тыныс алу жүйесін тежеу әсерін күшейтеді.

Айрықша нұсқаулар

Қолданар алдында, препараттың құрамында лидокаин бар болғандықтан, жекелей сезімталдыққа тері сынамасын жүргізу қажет. Қатерлі гипертермияға бейім науқастарға препаратты абайлап тағайындаған жөн.

Жүрек ауруларында лидокаинді қолданар алдында қандағы калий деңгейін қалыпқа келтіру қажет (гипокалиемия лидокаиннің тиімділігін төмендетеді).

Препаратты қан айналымы жеткіліксіз, артериялық гипотензиясы бар, бауыр және/немесе бүйрек қызметтері бұзылған емделушілерге қолданғанда аса сақ болған жөн. Синартаны егде жастағы емделушілерге, эпилепсиямен ауыратын науқастарға, жүрек өткізгіштігі бұзылғанда, тыныс алу қызметінің жеткіліксіздігінде тағайындағанда сақ болған жөн.

Глюкоза жақпайтын емделушілерге абайлап қолдану керек. Емдеудің бастапқы кезеңінде қант диабеті бар емделушілерде қандағы қант деңгейін жүйелі бақылап отыру қажет.

Бронх демікпесі бар емделушілерді емдеген кезде препаратты сақтықпен қолданады.

Дәрілік препараттың бір дозасында 40,3 мг натрий бар. Мұны қатаң тұзсыз емдәм қолданылатын емделушілерге тағайындағанда ескерген жөн.

Препараттың көлікті және қауіпті механизмдерді басқару қабілетіне ықпал ету ерекшеліктері

Препараттың автомобильді және басқа да механизмдерді басқару қабілетіне ықпал етуіне қатысты зерттеулер жүргізілген жоқ.

Көлікті басқарғанда және зейінді қажет ететін жұмыстарды жасағанда, ұйқышылдық немесе көрудің нашарлауы пайда болған жағдайда, сақ болған жөн.

Артық дозалануы

Глюкозамин сульфатының артық дозалануы жағдайлары байқалмаған. Артық дозаланған жағдайда су-электролиттік теңгерімді қалпына келтіруге бағытталған симптоматикалық ем жүргізу қажет.

Препараттың инъекциялық түрінің құрамына қосымша зат лидокаин кіреді. Лидокаин гидрохлоридінің артық дозалануының алғашқы симптомдары орталық жүйке жүйесі тарапынан тіл мен еріннің ұюы, қозу жағдайы, үрейлену, құлақтың шыңылдауы, бас айналу, көрудің бұлдырауы, тремор, депрессия, ұйқышылдық болуы мүмкін. Симптоматикалық ем жүргізіледі және ол организмнің тіршілік үшін маңызды қызметтеріне бағытталған.

Шығарылу түрі және қаптамасы

Сындыратын сақинасы (немесе сындыру нүктесі) бар, сыйымдылығы 3 мл, қоңыр мөлдір шыны ампулаға 2 мл препараттан құйылған (А ампула).

Сындыратын сақинасы (немесе сындыру нүктесі) бар түссіз мөлдір шыны ампулаға 1 мл еріткіштен құйылған (В ампула).

Ампулаларға өздігінен желімденетін заттаңба жапсырылған.

Полимерлі үлбірден жасалған пішінді ұяшықты қаптамаға 5 А ампула (препараты бар) және 5 В ампула (еріткіші бар) салынған.

Ішінде А ампулалары бар пішінді 1 қаптама және ішінде В ампулалары бар пішінді 1 қаптама медицинада қолданылуы жөнінде мемлекеттік және орыс тілдеріндегі нұсқаулықпен бірге картон пәшкеге салынған.

Сақтау шарттары

Жарықтан қорғалған жерде, 25°С-ден аспайтын температурада сақтау керек.

Балалардың қолы жетпейтін жерде сақтау керек!

Сақтау мерзімі

2 жыл

Дайындалған ерітіндіні бірден қолданған жөн.

Қаптамасында көрсетілген жарамдылық мерзімі өткеннен кейін препаратты қолдануға болмайды.

Дәріханадан босатылу шарттары

Рецепт арқылы

Өндіруші

«Фармак» ЖАҚ, Украина, 04080, Киев қ-сы, Фрунзе к-сі, 63.

Тіркеу куәлігінің иесі

«Фармак» ЖАҚ, Украина

Тұтынушылардан өнім (тауар) сапасы жөнінде шағымдарды Қазақстан Республикасы аумағында қабылдайтын ұйымның мекенжайы

Қазақстан Республикасы, 050009 Алматы қ-сы, Абай к-сі 157, 5 кеңсе

Тел/факс: +7 (727) 250 66 23, электронды поштасы: Djatlova88@mail.ru