Рупафин
Инструкция
-
русский
-
қазақша
Саудалық атауы
Рупафин
Халықаралық патенттелмеген атауы
Рупатадин
Дәрілік түрі
Таблеткалар, 10 мг
Құрамы
Бір таблетканың құрамында
белсенді зат: рупатадин фумараты – 12.8 мг (10 мг рупатадинге баламалы),
қосымша заттар: желатинделген крахмал, микрокристалды целлюлоза, темірдің (III) қызыл тотығы Е172, темірдің (III) сары тотығы Е172, лактоза моногидраты, магний стеараты.
Сипаттамасы
Дөңгелек пішінді, ақшыл қызыл сары-қызғылт түсті, таңбаланбаған таблеткалар.
Фармакотерапиялық тобы
Жүйелі әсер ететін басқа да антигистаминдік препараттар. Рупатадин.
АТХ коды R06АX28
Фармакологиялық қасиеттері
Фармакокинетикасы
Сіңірілуі және биотиімділігі
Рупатадин пероральді қабылдағаннан кейін жылдам сіңеді. Ең жоғарғы концентрациясына (Tmax) жету уақыты ішке қабылдағаннан кейін шамамен 0.75 сағатқа жуық. Ең жоғарғы орташа концентрациясы (Сmax) 10 мг пероральді дозасын бір рет ішке қабылдағаннан кейін 2.6 нг/мл және 20 мг дозасын бір рет ішке қабылдағаннан кейін 4.6 нг/мл құрайды. Рупатадиннің фармакокинетикасы 10-нан 40 мг дейінгі дозасы үшін дозаға тәуелді болып табылады. 10 мг дозасын 7 күн бойы күніне бір рет қабылдағаннан кейін орташа Сmax 3.8 нг/мл құрайды. Плазмадағы концентрациясы биэкспоненциальді қисық бойымен, 5.9 сағат жартылай шығарылуының орташа кезеңімен төмендейді. Рупатадиннің қан плазмасы ақуыздарымен байланысу коэффициенті 98.5-99% құрайды.
Рупатадин адамдарға ешқашан көктамыр ішіне енгізілмегендіктен, оның абсолюттік биологиялық жетімділігі туралы мәліметтер жоқ.
Ас ішудің әсері
Ас ішу рупатадиннің организмге жалпы әсерін (AUC, концентрация-уақыт қисығы астындағы ауданы) шамамен 23%-ға күшейтеді. Оның белсенді метаболиттерінің біріне және негізгі белсенді емес метаболитіне әсері бірдей деуге келеді (төмендеуі сәйкесінше шамамен 5% және 3%). Рупатадиннің плазмадағы ең жоғарғы концентрациясына жету үшін қажетті уақыт (Tmax) 1 сағатқа ұзарады. Плазмадағы ең жоғарғы концентрациясы (Сmax) ас ішудің нәтижесінде өзгермейді. Бұл айырмашылықтардың клиникалық маңызы жоқ.
Метаболизмі және шығарылуы
Шығарылуын зерттеген кезде адамда (40 мг 14С-рупатадин) препаратпен енгізілген 34.6%-ы радиобелсенділігі несеппен, ал 60.9%-ы 7 күн жиналған нәжіспен шығарылады. Рупатадин ішу арқылы қабылданғанда елеулі жүйеалдылық метаболизмге ұшырайды. Өзгермеген белсенді субстанциясы несеп пен нәжісте тек азғантай мөлшерлерде ғана анықталады. Бұл, рупатадиннің толығымен дерлік метаболизденетінін білдіреді. Адам бауыры микросомаларындағы in vitro метаболизмін зерттеулер рупатадиннің көбінесе Р450 (CYP3A4) цитохромымен метаболизденетінін көрсетеді.
Пациенттердің ерекше топтары
Жастау ересектер мен егде жастағы пациенттерден алынған нәтижелерді, салыстыру үшін дені сау еріктілерге жүргізілген зерттеулерде рупатадин үшін AUC және Сmax шамалары жастау ересектерге қарағанда егде жастағыларда жоғарырақ болған. Шамасы, бұған егде жастағылардағы бауыр арқылы бірінші өтуіндегі бауырлық метаболизмінің төмендеуі түрткі болған болу керек. Бұл айырмашылықтар талданған метаболиттер үшін байқалмаған. Егде жастағы және жас еріктілердегі рупатадиннің жартылай шығарылуының орташа кезеңі сәйкесінше 8.7 сағат және 5.9 сағатты құраған. Рупатадин мен оның метаболиттері үшін нәтижелер клиникалық маңызды болмағандықтан, препаратты егде жастағы пациенттерге 10 мг дозада тағайындағанда, жас шамаларына байланысты ешқандай түзетулер жасаудың керек еместігі туралы тұжырым жасалды.
Фармакодинамикасы
Рупафин антигистаминдік препараттардың екінші буынына жатады және гистаминнің Н1-рецепторларға шеткергі антагонистік белсенділігі бар ұзақ әсер ететін антагонисі болып табылады. Оның метаболиттерінің кейбірі (дезлоратадин мен оның гидроксилденген метаболиттері) антигистаминдік белсенділігін сақтайды және ішінара препараттың жалпы тиімділігіне өз үлесін қосуы мүмкін.
Рупатадинді жоғары концентрациясында in vitro зерттеулер иммунологиялық және иммунологиялық емес тітіркендіргіштер туғызған жуан жасушалар дегрануляциясының тежелуін, сондай-ақ жуан жасушалар мен адам моноциттерінен цитокиндердің, атап айтқанда TNFα шығуын көрсетеді. Бақыланған іс-тәжірибелік мәліметтердің клиникалық мәнін әлі растау керек.
Дені сау еріктілерге (n=375) және аллергиялық риниті және созылмалы идиопатиялық есекжемі бар науқастарға (n=2650) жүргізілген клиникалық сынақтардан рупатадинді 2 мг-ден 100 мг дейінгі дозаларда тағайындағанда электрокардиограммаға айтарлықтай әсері анықталмаған.
Созылмалы идиопатиялық есекжемнен зардап шегетін пациенттердің қатысуымен жүргізілген плацебо бақыланатын зерттеулерде рупатадин 4 апта емдеуден кейін қышынудың орташа баллын бастапқы шамасымен салыстырғанда тиімді төмендеткен (бастапқы деңгейіне қатысты өзгеріс: рупатадин 57.5%, плацебо 44.9%), және аллергиялық бөртпелердің орташа мәнін (39.7%-бен салыстырғанда 54.3%) төмендеткен.
Қолданылуы
- ересектер мен жасөспірімдерде (12 жастан асқан) аллергиялық ринит пен есекжемді симптоматикалық емдеуде
Қолдану тәсілі және дозалары
Ересектер мен жасөспірімдер (12 жастан асқан)
Ұсынылатын дозасы ас ішуге байланыссыз күніне бір рет 10 мг (бір таблетка) құрайды.
Егде жастағы адамдар
Егде жастағыларда Рупафинді сақтықпен қолдану керек («Айрықша нұсқаулар» бөлімін қараңыз).
Педиатрия тәжірибесі
Қауіпсіздігі мен тиімділігі туралы мәліметтердің жеткіліксіз болуы себебінен, Рупафинді 12 жасқа толмаған балаларға тағайындау ұсынылмайды.
Бүйрек немесе бауыр жеткіліксіздігі бар пациенттер
Бүйрек немесе бауыр функциясының бұзылулары бар пациенттерде қолданылуының клиникалық тәжірибесі болмағандықтан, Рупафин 10 мг таблеткаларын пациенттердің аталған тобында тағайындау ұсынылмайды.
Жағымсыз әсерлері
Көбінесе, рупатадинді қабылдаған пациенттерде препаратқа ұйқышылдық - 9.5 %-ында, бас ауыруы - 6.9 %-ында және пациенттердің 3.2 %-ында шаршау сияқты жағымсыз реакциялар туралы хабарланған. Көп жағдайларда препаратты тоқтату қажет болмаған. Жағымсыз реакцияларының даму жиілігі бойынша жіктемесі:
жиі - 1/10-нан 1/100 дейін, жиі емес - 1/100-ден 1/1000 дейін.
Жиі
- ұйқышылдық, бас ауыруы, бас айналуы
- шаршау, астения
- ауыздың құрғауы
Жиі емес
- зейінділіктің төмендеуі, ашушаңдық
- мұрыннан қан кету, мұрын шырышты қабығының құрғауы, фарингит, жөтел, тамақтың құрғауы, жұтқыншақ пен көмейдің ауыруы, ринит
- жүрек айнуы, диарея, диспепсия, құсу, іштің ауыруы, іштің қатуы
- тәбеттің артуы
- бөртпе
- арқаның ауыруы, артралгия, миалгия
- шөлдеу
- дімкәстану, қызба
- дене салмағының жоғарылауы
- креатинфосфокиназа, аланинаминотрансфераза, аспартатаминотрансфераза жоғарылауы; бауырдың функциялық сынамалары көрсеткіштерінің өзгеруі
Қолдануға болмайтын жағдайлар
- рупатадинге немесе препараттың қосымша компоненттеріне аса жоғары сезімталдық
- 12 жасқа дейінгі балалар (тиімділігі мен қауіпсіздігі анықталмаған)
- тұқым қуалайтын галактозаны көтере алмаушылық, лактаза тапшылығы немесе глюкоза-галактоза сіңуінің жеткіліксіздігі синдромы
- бауыр және бүйрек жеткіліксіздігі (тиімділігі мен қауіпсіздігі туралы мәліметтер жеткіліксіз болғандықтан)
Дәрілермен өзара әрекеттесуі
Кетоконазолмен және эритромицинмен өзара әрекеттесуі
20 мг дозадағы рупатадин мен кетоконазолды немесе эритромицинді бірге қолдану рупатадиннің жүйелік әсерін 10 есе және соңғыларының әсерін - 2-3 есеге күшейтеді. Бұл біріктірілімдері QT аралығының өзгеруімен немесе аталған препараттарды бөлек-бөлек қолданумен салыстырғандағы жағымсыз реакциялары жиілігінің артуымен қатар жүрмейді.
Алайда Рупафинді осы дәрілік заттармен және CYP3A4 изоферментінің басқа тежегіштерімен бірге сақтықпен қолдану қажет.
Грейпфрут шырынымен өзара әрекеттесуі
Рупатадин мен грейпфрут шырынын бір мезгілде қабылдау рупатадиннің жалпы әсерін 3.5 есе күшейтеді. Грейпфрут шырынын препаратты қабылдаумен бір мезгілде қолданбау керек.
Алкогольмен өзара әрекеттесуі
Алкогольді қабылдағаннан кейін Рупафиннің 10 мг дозасы, тек бір ғана алкогольді қабылдаудың әсерінен біраз өзгеше болса да, психомоторлық қызметке жүргізілген кейбір тестілердің нәтижелеріне болар-болмас әсер етеді. 20 мг дозасы алкоголь қабылдаудан туындаған өзгерістерді күшейтеді.
ОЖЖ бәсеңдететін дәрілік заттармен өзара әрекеттесуі
Басқа антигистаминдік препараттармен жағдайдағы сияқты рупатадиннің орталық жүйке жүйесі депрессанттарымен өзара әрекеттесуі жоққа шығарылмайды.
Статиндермен өзара әрекеттесуі
Клиникалық зерттеулер кезінде креатинфосфокиназаның симптомсыз артқан сирек жағдайлары тіркелген. Кейбіреулері Р450 цитохромының CYP3A4 изоферментімен метаболизденетін статиндермен өзара әрекеттесу қаупі белгісіз. Аталған себептер бойынша Рупафинді статиндермен бір мезгілде сақтықпен қолдану керек.
Айрықша нұсқаулар
Рупафинді грейпфрут шырынымен бір мезгілде қабылдау ұсынылмайды.
Рупафиннің жүрек функциясына әсері Thorough QT/QTc зерттеуінде бағаланған, онда рупатадин емдік дозасынан 10 есе артық дозада ЭКГ-ға әсер етпеген және сонысымен, кардиологиялық қауіпсіздігіне қатысты алаңдаушылық тудырмаған. Алайда Рупафинді QT аралығы ұзарған пациенттерге, түзетілмеген гипокалиемиясы бар пациенттерге, клиникалық маңызды брадикардия, жедел миокард ишемиясы сияқты тұрақты проаритмиялық жағдайлары бар пациенттерге сақтықпен тағайындау керек.
Егде жастағыларда қолданылуы
10 мг таблеткалардағы Рупафинді егде жастағы пациенттерге (65 жастан және одан да үлкен) сақтықпен тағайындау қажет. Клиникалық зерттеулерде тиімділігінде немесе қауіпсіздігінде жас шамасына байланысты жалпы айырмашылықтар білінбесе де, кейбір егде жастағы пациенттерде препаратқа жоғары сезімталдықтың болуы мүмкіндігін жоққа шығаруға болмайды, өйткені зерттеулерге егде жастағы пациенттер аз қатысқан («Фармакокинетика» бөлімін қараңыз).
Қауіпсіздігі мен тиімділігі туралы мәліметтердің жеткіліксіздігіне байланысты, 12 жасқа толмаған балаларға және бүйрек немесе бауыр бұзылулары бар пациенттерге тағайындау ұсынылмайды.
Рупафин таблеткаларында лактоза моногидраты болғандықтан, препаратты сирек тұқым қуалайтын галактозаны көтере алмаушылығы, лактаза жеткіліксіздігі бар немесе глюкоза-галактозаның сіңуі бұзылған пациенттерге қабылдауға болмайды.
Жүктілік және лактация кезеңі
Препаратты жүктілік кезінде тағайындау жағдайларының шектеулілігі туралы мәліметтер рупатадиннің жүктілік ағымына немесе шарананың/жаңа туған нәрестенің денсаулығына жағымсыз әсерлерінің жоқтығын көрсетеді. Бүгінгі күні бұл мәселе бойынша эпидемиологиялық мәліметтер жоқ. Сондықтан Рупафинді сақтықпен тағайындау қажет. Жануарларға жүргізілген зерттеулерден жүктілікке, шарананың/эмбрионның дамуына, босану ағымына немесе постнатальді дамуға тікелей немесе жанама зиянды әсері анықталмаған.
Рупатадин жануарлардың сүтімен бөлініп шығады. Рупатадиннің әйелдің емшек сүтімен бөлініп-шығатын-шықпайтындығы белгісіз. Адамға қатысты мәліметтер жоқ болғандықтан, рупатадинді бала емізетін әйелдерге тағайындағанда сақ болу керек.
Дәрілік заттың көлік құралдарын және қауіптілігі зор механизмдерді басқару қабілетіне ықпал ету ерекшеліктері
Рупафин автокөлік және басқа механизмдерді басқару қабілетіне әсер етпейді. Рупафинмен емдеудің басында, пациенттің Рупафинге жекелей реакциясы анықталғанға дейін абай болу қажет.
Артық дозалануы
Артық дозалану жағдайлары анықталмаған. Қауіпсіздігіне клиникалық зерттеу жүргізгенде Рупафин 100 мг тәуліктік дозада 6 күн бойы жақсы көтерімді болған. Симптомдары: ең көп таралған жағымсыз реакциясы ұйқышылдық болып табылады. Емі: симптоматикаялық ем және қажетті демеуші шаралар.
Шығарылу түрі және қаптамасы
7 таблеткадан поливинилхлоридті/поливинилдихлоридті үлбір мен алюминий фольгадан жасалған пішінді ұяшықта қаптамаға салынған.
1 пішінді қаптамадан медициналық қолдану жөніндегі мемлекеттік және орыс тіліндегі нұсқаулықпен бірге картон қорапшаға салынады.
Сақтау шарттары
Құрғақ, жарықтан қорғалған жерде, 25 ºС-ден аспайтын температурада сақтау керек.
Балалардың қолы жетпейтін жерде сақтау керек!
Сақтау мерзімі
3 жыл
Жарамдылық мерзімі өткеннен кейін пайдалануға болмайды.
Дәріханалардан босатылу шарттары
Рецепт арқылы
Өндіруші
X.Уриач & Компанья С.А, Испания
Avda. Cami Reial, 51-57 08184-Palau-solita i Plegamans (Barcelona), Spain
Тіркеу куәлігінің иесі
X.Уриач & Компанья С.А, Испания
Қаптаушы кәсіпорын
X.Уриач & Компанья С.А, Испания
Avda. Cami Reial, 51-57 08184-Palau-solita i Plegamans (Barcelona), Spain
Қазақстан Республикасы аумағында тұтынушылардан өнім (тауар) сапасына қатысты шағымдарды қабылдайтын және дәрілік заттың тіркеуден кейінгі қауіпсіздігін қадағалауға жауапты ұйымның мекенжайы.
«Абботт Қазақстан» ЖШС
050059, Алматы қ., Достық д-лы, 117/6, Хан Тәңірі 2
тел.: + 7 727 244 75 44
факс: +7 727 244 76 44
e-mail: pv.kazakhstan@abbott.com
ES/H/0105/001/II/029